انا تاج العلاء في مفرق الشرق

ايه كمالو ده؟ ايه حلاوته دي؟ ايه الشعب الجامد ده؟ 

الشعب يريد تطهير البلاد.. لا مبارك ولا نظامه ولا حزبه ولا اعوانه

ايه يا ناس ده؟ اكلك منين يا مصري اكلك منين، وفراولتين في خدودك حلوين حلوين... بصراحة انا كنت خايفة من النهاردة

بس انتوا شعب جامد اخر حاجة، ما شاء الله لا قوة الا بالله

هاااا؟ الرسالة وصلت ولا ايه؟ ولا ديول الحزب الوطني سمعه تقييييييييييييييييييييييييييل زي رئيس العصابة بتاعهم... الشعب صاحي ومصحصح وواعي ومش عايز شفيق ولا اي حد من رموزه وعايز محاكمة مبارك

عشان انس الفقي يبقى يكابر ويطلع هو والعادلي يطولوا لسانهم علينا تاني

خطبة العلامة الشيخ القرضاوي كانت رائعة

وتجاوب الناس مع الخطبة كان مذهل 

--------------

دلوقت الرائد احمد شومان يا جماعة.. الرائد احمد شومان مسئوليتنا 

ايوة الناس كانت جاية النهاردة عشان تقول انها صاحية وشايفة ان الحال مايل ومش عاجبها الكلام، وحاضرة وجاهزة تطلع لكم باعداد غير مسبوقة

يا ريت المجلس العسكري ياخد باله من الرسالة ويعمل للناس اللي هم عايزينه عشان دي ناس صعايدة واللي عايزاه حتعمله يعني حتعمله 

لكن الرائد احمد شومان شايل تلات قضايا، قضية اهمال، وعدم اطاعة اوامر، ومحاولة قلب نظام الحكم

التهمة الاخيرة مش عاجبانا، محاولة يعني ايه؟ محاولة؟ هي فشلت؟ لا ما فشلتش، الشعب كله بيقلب نظام الحكم وقال الشعب يريد اسقاط النظام، والتهمة الموجهة لاحمد شومان اهانة لكل مصري 

لازم كلنا نخرج لاحمد شومان، مش بس عشان وقف جنبنا، بس عشان التهم الموجهة له اهانة للثورة المصرية

------------

دلوقت مصر وتونس وصلوا الدور النهائي

بس ليبيا في الدور الستاشر واليمن في الدور التمانية، والبحرين في الدور قبل النهائي

عايزين ناخد بالنا من الناس

اسمعوني بقى كويس وركزوا معايا

ثورة تونس كانت ثورة ملهمة لثورة مصر، بس كمان ثورة مصر هي دعم لثورة تونس، ونجاح ثورة مصر تثبيت لاركان ثورة تونس، بس ثورة مصر ما ينفعش يبقى ضهرها للحيط، لازم ثورات اليمن والبحرين وليبيا تنجح.. لازم ينجحوا

ولازم نقف جنبهم

لان نجاح ثوراتهم دعم لثورتنا

ملك البحرين وعلي عبد الله صالح قالوا خطاب.. فاضل لهم خطابين

اما القذافي فهو مجنون رسمي ومستعد يقتل الشعب كله ويستورد شعب تاني

مساندتهم واجب وطني عاجل

الجزائر معلش كل شوية تخرج من التصفيات بس حترجع تاني ان شاء الله، لما ليبيا والبحرين واليمن ينجحوا ان شاء الله الجزائر حتيجي... بس قولوا يا رب

------

الطلعة الجاية لازم نعمل حسابنا على الآتي:

صور احمد شومان، واعلام كل من البحرين وليبيا واليمن، والطلعة الجاية لازم تبقى قريبة، عشان هم ناويين يعملوا حكومة جديدة بس برضه برئاسة فشيق يا راجل

مش عايزينه فشيق يا راجل ده

كمان عايزين نمسك الفاسدين ملف ملف ونطالب بتقديمهم للمحاكمة

انس الفقي ده لازم يتشنير على طولة لسانه دي، ويتقدم للتحقيق

ونمسكهم بقى، سامح فهمي، نلم ملفات الفساد ونصيح له

مصيلحي.. ملفات الفساد ونصيح

الولية اللي بقت وزير عشان بتزغرد في عيد العمال... ملفات ونصيح

وهكذا لحد ما نخلص عليهم واحد واحد كل يوم نوقع لنا واحد عشان كل واحد فيهم يلم نفسه

كمان الستو هانم اللي جات هي وابنها مصر دي

هو مش جمال مبارك ده له ملف كسب غير مشروع، وكان امين لجنة السياسات

ده يتقدم فيه بلاغات للنائب العام بشكل عاجل، مدام جه مصر بقى ونورنا
فيه واحدة باعتة لي على الدايركت في التويتر تقول لي انا عندي ملف فساد
ما ينفعش كده يا جماعة، انا مش قسم
اللي معاه ملف فساد يروح بيه للنائب العام او يروح بيه لمركز حقوقي مش يبعت لي على الدايركت يقول لي انا عندي ملف فساد
مش حارد انا على الناس اللي بتعمل كده على فكرة 

يبقى احنا كده لازم لنا طلعة جاية قريبة فيها تلات محاور

روس الفساد 

احمد شومان

ثورات العالم العربي

وحنعمل ايه كالعادة؟ اييييوه.. حنقول يااااااااا رب... يا رب.. مالناش غيره، نعم المولى ونعم النصير

قشطات؟ 

-------

فيه ناس كانت معلقة يافطة عليها صورتي عبد الناصر والسادات، بعد الاستسماح احب اقول الناس اللي علقت الصور دي مش معانا خالص ولا متابعين الثورة قامت ليه؟ 

مع خالص احترامي لكل الشخصيات اللي في الدنيا، احنا مش مشينا مبارك عشان نعلق صور اي زعماء تانيين، الشعب يريد اسقاط النظام

نظام الفرعون

نظام حكم الفرد، ايا كان الفرد ده حلو ولا وحش

الفرد حلو او حش ده راجع لطبيعة شخصيتك، واحنا مش عايزين الوطن البادي ده تاني

الوطني البادي اللي هو يلبسه الفرد فياخد شكل جسمه، والله بيحكمك واحد لطيف - من وجهة نظرك - الوطن حيبقى شبهه، بيحكمك واحد رخم - برضه من وجهة نظرك - يبقى الوطن رخم

مش عايزين زعماء تاني، ولا عايزين الاب القائد تاني، لو حنعلق صورة عبد الناصر والسادات عشان لهم انجازات، يبقى مبارك ما وقعش من قعر القفة، ماهو له انجازات برضه، مش عمل المحور والكباري والقراءة للجميع والخلع؟

بس مش دي القضية، القضية ان مبارك آخر الفراعنة، دي آخر مرة حد يحكمنا وفقا لأهوائه الشخصية ووفقا لميوله وطبيعة شخصيته واحنا وحظنا يطلع ابن حلال ولا يطلع ابن حرام وبرضه ابن حلال وحرام دي نسبية

صورة مبارك اتشالت... صورة آخر الفراعين اتشالت، واتحط مكانها لفظ الجلالة

خلاص... ما عادش يتحط مكان لفظ الجلالة حد، ولو سيدنا محمد نفسه له صورة ما ينفعش تتحط مكان لفظ الجلالة

لا غالب الا الله

وتحت كلمة: الله.. الواحد، اللي كلنا مؤمنين بيه ايا كان الدين اللي مؤمنين به

وتحت الله، علم مصر... ومصر يعني الشعب.. الشعب بس، ما عادش الشعب يبقى له رمز، وما عدش الوطن يتلخص في فرد، ما فيش قيادة ولا زعامة الا بايد الشعب، وما عدناش نرفع صور زعماء ولا قادة ولا فراعين ولا نأله حد تاني

انتهى النظام ده

وانتهت الثقافة دي

وانتهى الفكر ده

حندرس ولادنا في كتب التاريخ عن عبد الناصر والسادات ومبارك ما لهم وما عليهم بوصفهم آخر الفراعين.. لكن خلاص.. ما بقيناش دولة فراعين تاني

خلاص.. هدمنا الاصنام وما عدناش نرفعها تاني

--------------

بعد كده ماحدش يشتكي في القسم ولا يرفع قضايا، انا بعد كده اي حد مضايقني حاشتكي للشعب وهو يتصرف معاه

ده طلع جامد اخر حاجة، جامد وعاقل وتقيل ومفهومية وقال على رأي المثل: غفر الله لي وارشد أبنائي فشدوا لي العلا أي شد، إنما الحق قوة من قوة الديان أمضى من كل أبيض هندي

الشعب يريد....