امن الدولة مش لازم يعيش ليوم التلات.. ولا الاربع

دلوقت ايه الاخبار؟ فيه حد عمل دعوة ليوم الجمعة ولا ايه؟

يا ريت امبارح تكونوا شوفتوا حلقة اخر الكلام بتاعة يسري فودة، جه فيها القمص عبد المسيح بسيط وبلال فضل

القمص قال ان سبب المشكلة واد كان بعد ما عمل المشكلة سافر ليبيا، جه امن الدولة استدعاه ورجعه لمصر - قبل احداث ليبيا - والموضوع اصلا مشكلة الواد والبت ده من سنة

وبلال فضل بيقول ان عنده ادلة حينشرها ان العادلي عنده ميليشيات خاصة ولاءها له

وموقع الاقباط المتحدون ناشر فيديو لواد بيشتغل في امن الدولة هو اللي بيحرض وبيعرقل الصلح

واساس مشكلة الكنيسة برضه سببها امن الدولة زي ما الشروق كتبت

الاعجوبة بقى، ان مالك مصطفى وفاطمة عابد راحوا امبارح منشية ناصر ولقوا ان البلطجية اللي بيضربوا على الزبالين معاهم سلاح وبيشتموا في الثورة وبيشتموا في الجيش

اللي بيشتموا في الثورة ممكن يبقوا اهالي بيتفرجوا على القناة الاولى.. لكن مافيش حد بيشتم في الجيش غير الامن، معلش دي خبرة بقى، حتى اللي زعلوا من الجيش لما ضربنا يوم الجمعة وضربنا بعدها يوم لاظوغلي، وما عندهمش المشاعر اللي عندي تجاه الجيش، حتى الاناركيين اللي مش مؤمنين بالمؤسسات اللي زي الجيش اساسا وشايفين ان فكرة الجيش من اساسها فكرة فاشية حتى دول، ماحدش فيهم بيشتم في الجيش المصري، اقصى حاجة: هم ليه يضربونا كده؟ ومش حكاية انهم مش بيعوزوا يشتموه في العلن، ولا حتى في القعدات الخاصة اللي عارفين ان ماحدش حيسمعهم غير صحابهم

ماحدش في مصر بيشتم الجيش اساسا.. ما بتحصلش دي

ده جيمي بيقول لي انه يعرف ناس من السيدة زينب وقالوا له ان فيه ناس لابسة ملكي لفت على القهاوي والمحلات وقالت لهم ان العيال اللي عند لاظوغلي دول جايين يضربوا الجيش تعالوا معانا نضربهم وده اللي خلا بعض الاهالي ينضموا للبلطجية عشان كانوا فاكرينا عايزين نضرب الجيش، وده مبرر مفهوم جدا لأي انسان عايش في مصر وبيمشي في الشارع يعني، جيمي نفسه قال لي: انا لو عرفت انه جاي يضرب الجيش حاروح اضربه، وبعدين الناس بتوع روحوا بقى ورانا اشغال دول، مش بيربطوا ابدا بين الثورة والجيش، بالعكس بيقولوا ادوا الجيش فرصة والدنيا اتخلقت في ست ايام وحاجات كده

مين بقى اللي رابط بين الثورة والجيش ومتغاظ من الجيش انه ساند الثورة؟ مين يا ترى؟ ومعاهم سلاح؟ وقتلوا ستة امبارح مسيحيين، وكل المصابين اعيرة نارية، واللي بيضربوا بدقون وناس غريبة واقفة تقول عليهم: دول السلفيين!

مع احترامي لكلام سيادتك وليكن ما يكون، السلفيين ما بيشيلوش سلاح، ما يقدروش يشيلوا سلاح، كل سلفي في مصر عليه خمسة وعشرين واحد بيراقبه وما بيرخصش سلاح ولو حب يطلع ترخيص سلاح يطلعوه من دينه لمجرد انه فكر الفكرة دي، ولو شال سلاح من غير ترخيص في اي لحظة من حياته حيتحول لكرسي.. ده سيد بلال ما كانش شايل نبلة ومات من التعذيب، وكلنا عارفين الرقابة على السلفيين شكلها ايه

ثم السلفيين ما شفناهم في المظاهرات مع المسيحيين قدام التلفزيون، وبصراحة اتفاجئت انهم راحوا ونزلوا بالاعداد كبيرة دي

مين بدقون ومعاهم سلاح؟ وبيشتموا في الجيش والثورة؟ اكيد مش الاخوان، واكيد مش السلفيين، واكيد مش مسيحيين..

مين؟ وفي اطفيح الناس بتقول العلاقة كانت كويسة قوي بين المسلمين والمسيحيين لحد ما ابتدى امن الدولة يقبض على بعض المسلمين ويعذبهم بالكهربا بدعوى انهم بيضايقوا المسيحيين والمسيحيين ما كانوش شاكيينهم اصلا، وامن الدولة هو اللي قال للمسيحيين يبنوا الكنيسة في المكان ده بالتحديد عشان حواليهم مسلمين كتير، والمسيحيين سمعوا الكلام لان بناء كنيسة في اي حتة فيه طلعان روح ومش عايزين مشاكل هم كانوا مع امن الدولة، المهم يعني عمل حاجات وسخة كتير، واللي راحوا اطفيح شايفين ان الناس عايزة تعيش، وان كل واحد بس خايف من التاني من رواسب اللي عمله امن الدولة، ورجع لعب تاني مؤخرا، يعني هو رمى بياضه من كام سنة ودق الاسفين ولما احتاج ابتدا يحرك الخازوق اللي هو داقه بالاساس

امن الدولة مش لازم يعيش ليوم التلات... ولا الاربع
-------------------

دلوقت فيه ستميت دعوة على الفيس بوك ليوم الجمعة وانا مش عارفة ايه فين مين ليه؟

وحد صفك

فيه دعوة مسيرة من الكاتدرائية لميدان التحرير بتطالب بحل امن الدولة

ودعوة ليوم الجمعة برضه ان الناس تروح اطفيح.. برضه عشان امن الدولة حبيب الملايين

ودعوة ميدان التحرير على طول.. مع الوحدة وضد امن الدولة

وناس قبل كده قالت معلقة الاحتجاجات يوم الجمعة

العمل ايه دلوقت؟ يا ريت جهة موثوقة ولها صوت توحد الصف كده وتقول لنا حنعمل ايه؟

عشان النهاردة ايوة الامور هادية بس فيه 6 شهداء راحوا امبارح، ولازم المسلمين قبل المسيحيين يعملوا حاجة للشهداء دول، واكيد فيه حاجة تتعمل بس قرروا حنعمل ايه والنهاردة وبكرة يتم الاعلان في كل التلفزيونات اللي خلقها ربنا، انا كنت فكرت اننا نحضر القداس في الكاتدرائية يوم الاحد ونطلع من الكاتدرائية على الميدان نطالب بحل امن الدولة بس يوم الاحد بعيد، واحنا عايزين نستعد للدستور ونتناقش فيه عشان برضه نوصل لكلمة موحدة والوقت مش في صالحنا، كمان من هنا ليوم الاحد يكون امن الدولة عمل اهازيج في البلد ولبسنا كلنا زي علام الملواني ورقصنا رقصة المجنونة

وبالمرة بقى عايزين نعرف زكريا عزمي صوته علي ليه؟ ويعني ايه كل شوية طالع يقول لنا انا لسه باشتغل في الرئاسة باوامر الجيش؟ وصفوت الشريف مش محبوس ليه؟ البلطجية اللي نزلوا علينا دول بتوع صفوت الشريف وفتحي السرور واللي حركهم امن الدولة (الكلام ده من مصادر ثقة، ووالدة بثينة كامل تعرفت على بلطجية فتحي سرور يوم لاظوغلي وراحت واجهتهم فجريوا منها)، وفيهم ناس كتير قوي مالك شافهم يوم لاظوغلي وامبارح شافهم في منشية ناصر بس بدقن! مش ممكن الفيلم الساقط اللي احنا عايشين فيه ده، وتحصل انهم يقتلوا منا شهدا وعايزين يلبسوها لنا، يقتلونا ويلبسونا جريمة القتل، عايزين نخلص ورانا شغل

حنعمل ايه يوم الجمعة

يا ريت الائتلاف ينزل بيان، وبقية القوى اللي اتعودت تدعي تنسق مع بعض ويعلنوا حيعملوا ايه ويردوا علينا بسرعة النهاردة، في حدود ساعة من دلوقت

وانا مبسوطة قوي من الحضور السلفي في مظاهرات المسيحيين، وعايزة حضور اكتر كمان وتزايد اكتر

مش عايزة اشوف مظاهرات مسيحيين ولا مظاهرات مسلمين، عايزة اشوف مظاهرات مصريين... واساسا من ساعة اول الموضوع انا مش شايفة اي طرف بيتهم التاني الحمد لله.. كل الناس بلا استثناء واحد عارفة ان دول امن دولة وبلطجية فتحي سرور وصفوت الشريف، مافيش خطر طائفية الحمد لله

بس فيه لخبطة في التنسيق بس، عايزين نظبط مع بعض

عشان فيه ناس كتير بتاكل عيش من الصور اللي بتنزل في الجرايد العالمية

يعني مثلا هنا كاتبين اشتباكات بين مسلمين ومسيحيين واساسا المسيحيين نفسهم ما قالوش اشتباكات مع مسلمين، قالوا بلطجية هجموا علينا

بس انتوا عارفين بقى كام حد بياكل عيش من الكلام ده، دول غير امن الدولة، اللي هم مايكل منير بدون ذكر اسماء، اكل عيشه جاي من خبر زي ده ينزل بعنوان مضلل كده

كل ما عدد المسلمين اللي مظهرهم متدين يزيد كل ما تقطعوا عيش الناس اللي بتسترزق من ورا خراب بلدنا

تحديث:

نقلا عن بثينة كامل:

1- النائب العام يتحرك بخصوص بلاغات حول احتجاز معتقلي امن الدولة في معسكرات الامن المركزي وجاري تفتيش المعتقلات

2- بثينة بتقول ان حكاية قائمة الاغتيالات دي صحيحة وقالت لي انها متأكدة وان اول مستهدف هو النائب العام وما قالتش مصدرها

3- تحذير للناس اللي بتحشد للذهاب لمعسكرات الامن المركزي، السلاح هناك كتير جدا والدم حيبقى للركب، ولو حصل دم كتير الامور حتتطور في اتجاه خاطئ وخطر

اسمعوني بقى الكلام ليا مش لبثينة، انا مصدري الوحيد من الكلام ده بثينة كامل وما سألتهاش مصدرها عشان انا باثق فيها، بس خلينا نتعامل برضه مع الكلام ده بحرص

الجيش منحاز لنا، وعايزة اقولكم كل يوم بتأكد ان الجيش ولاءه لنا لوحدنا، مش ولاء اول، ولاء وحيد للشعب المصري، وهو مش عايز يعمل احكام عرفية ابدا ابدا ابدا ابدا ابدا ابدا ابدا ابدا

صفوت الشريف وزكريا عزمي وامن الدولة عايزين يصعدوا ويعملوا دم عشان يجبروا الجيش انه يعمل احكام عرفية، هي دي خطتهم الاخيرة لو فشلناها يبقى هم خلاص انتهوا

لاحظوا ان صفوت الشريف وزكريا عزمي اتنين غيلان مخضرمين ومش سهل ان الجيش يتخلص منهم لوحده، احنا لازم نساعده

نساعده بالتحرك لحل امن الدولة، لكن ما نوصلش الامور لمواجهات تؤدي الى انه يضطر يعمل احكام عرفية عشان يحمينا، ودي الحاجة الوحيدة اللي تجبره يعمل حاجة زي دي، انه يلاقينا حنموت

واجبنا اننا نساعده ونحميه.. فيه مؤسسات كتير ضده، الحقيقة كل المؤسسات ضده، كل مؤسسات النظام السابق ضده وبتكرهه، وامريكا واسرائيل مش طايقين الجيش المصري مش طايقينه... حيموتوا من الغيظ منه، خصوصا بعد ما جاب لنا عصام شرف

دلوقت التحرك تجاه معسكرات الامن المركزي انا شايفة انه مش من الحكمة ابدا، انا فاهمة ان كل المصريين مستعدين يموتوا عشان مصر.. خلاص اثبتوا كده طول الفترة اللي فاتت ووالله العظيم كل العالم صدق الحكاية دي وعرفها، بس هو مش موت من اجل الموت

ومش معنى كده اننا نقعد في البيت

نفكر في تحرك يساند الجيش في مواجهة المؤسسات دي، وفي نفس الوقت ما يقلبش البلد دم

امن الدولة وصفوت وزكريا عايزينها دم.. حط نفسك مكانهم، لو ما اتحولتش لدم دول كل مصايبهم حتطلع وسلطاتهم حتروح وحيلبسوا البلدة الزرقا.. مستعدين يعملوا اي حاجة عشان ما يوصلوش للموضوع ده

كل اللي فات ده في حال ما اذا كان المصدر اللي قال لبثينة الكلام ده صادق

اذا كان كداب... برضه مش من الحكمة التوجه لمعسكرات الامن المركزي دلوقت

احنا طالبين من الجيش انه يفرج عن الناس هناك

وخليهم بقى يتجننوا في مخهم ويفتحوا نار على جيشنا.. ساعتها بقى كلنا نروح ونموت هنا

افتكروا ان الايام الاخيرة لامن الدولة مشابهة بشكل متطابق الايام الاخيرة للمخلوع، انا مش خايفة من حاجة، امن الدولة بيطلع في الروح

عايزين نعمل حسابنا ان اخر سلاح هو سلاح الاشاعات عشان يحصل بلبلة والناس تخاف ويا تطلع تبرطع بهبل يا تخاف وتكن، احنا اقوى ومنظمين

وبعدين بقى اللي عايز يعمل حاجة ما بيهددش.. من الاخر كده، نشر التهديدات ده يؤكد ان مافيش في ايدهم حاجة غير يهددوا

مش عايزين هرجلة، احنا الاقوى، وامن الدولة بيفرفر والتارجيت، ايه العمل يوم الجمعة؟ نرتب مع بعض ونوحد صفنا ونقرر

احنا تحركنا معروف، ان شاء الله نشوف حنعمل ايه يوم الجمعة عشان نسقط امن الدولة ونقضي على بواقي النظام ومافيش اي حاجة تقلق ان شاء الله