ارحمونا بقى من اشتغالة كنيسة اطفيح دي خلونا نشوف اللي ورانا

ردوا على ابونا ده.. انا مجنونة.. اهو مسيحي عاقل، حد يرد عليه

الموضوع ده يتقفل فورا واللي في الشارع دول يروحوا واللي بره بيوتهم يرجعوا

هو فيه ايه؟ 

ايه الحكاية بقى؟ ايه الحكاية دي؟ 

لا تعالوا لي بقى عشان انا روحي في مناخيري وورانا ستميت حاجة مش عارفين حنعملها امتى

امن الدولة ده لازم يتشاف فيه حل ووزير الداخلية الجديد مش عاجبني كلامه

والتعديلات الدستورية دي احنا مش عارفين نعمل فيها ايه، لان لو التعديلات الدستورية دي صوتنا على قبولها يبقى يستحيل باي حال من الاحوال الانتخابات الرئاسية تتعمل واللي حيفتح موضوع الانتخابات الرئاسية الاول بعد ما تتمرر التعديلات دي زي ما هي حاشنقه

وعايزين مجلس رئاسي عشان الجيش خلقه ضاق

الجيش

اه.. 

قال لك بت حبت واد قام ابن عمها راح قتل ابوها، قام ابوها صعب عليه نفسه وقالك ازاي عيل من دور عيالي يقتلني؟ وكتاب الله ما معديها له وراح ابوها بعد ما اتقتل قتل ابن عمها زي ما قتله بالظبط عشان ما يبقاش حد احسن من حد، قام الناس راحت تشيع جنازة الواد اللي "كان له شعبية كبيرة وسطهم"! قام وهم راجعين هدوا كنيسة تلات ادوار.. ده الاهالي.. الاهالي هدوا كنيسة تلات ادوار، ليه؟ هم هيركليز؟ قام المسيحيين طفشوا من بيوتهم عشان خافوا، قام جم هنا يتظاهروا، قام عصام شرف، اللي حصلت الحادثة دي اول ما قالوا حنحط عصام شرف ويا عيني ما كانش لحق حتى يخش مكتبه راحوا عاملين له المصيبة دي راح لهم بنفسه، قاموا قالوا له تحيا مصر وفرحوا، قام مايكل منير قال بس هم مش حيهدوا، قام سبحان الله ما هديوش زي ما مايكل منير قال، وراحوا طالعين قاطعين الطريق على كوبري اكتوبر والمحور، وقال لك ده بعض الشباب المتحمسين 

وسبحان الله يا اخي

كنيسة تلات ادوار الاهالي هدوها بايديهم ومافيش حد كان جوة الكنيسة خالص، كانت فاضية الكنيسة، مافيهاش حتى عامل نضافة، ولا حد اتصاب، ولا حد اتعور، ولا حد اتكعبل وهو بيجري

وسبحان الله راحوا صلوا الفجر مكان الكنيسة 

وسبحان الله البابا اللي كان منبه ماحدش يخرج في مظاهرات التحرير - طبعا ولا سمعوا كلامه وخرجوا عادي - دلوقت ساكت وسايبهم يقطعوا طريق اكتوبر

ايه الحكاية بقى؟

طب مايكل منير ده مخابرات ومخابرات مصري كمان.. هو احنا حنحارب في كام ناحية دلوقت؟ 

وسبحان الله الاهالي الهيركليز قعدوا يهدوا في كنيسة تلات ادوار والجيش اللي اول ما الحاجز الحديدي اتسحب عند وزارة الداخلية فضل يضرب في ذخيرة كأنه بيحارب اسرائيل واقف ياخويا لا بيعدل ولا بيبدل والكنيسة بتتهد، وما حدش شاف لا شرطة عسكرية ولا عصايا كهربائية ولا دياولو

ايه الحكاية بالظبط؟ 

احنا حنرمي لكم امن الدولة ده كله في النيل.. حنرمي لكم الداخلية كلها في النيل

ايه الحكاية؟ 

واياك حد هنا يقول لي اقباط واهالي ومسلمين وطائفية والكلام الخرا ده ما ياكلش معايا انا الكلام ده 

الليلة دي تتلم فورا.. يا اما ويمين الله ننزل لكم في الشوارع ونجيب لكم مصارين الداخلية دي ويبقوا يفتحوا علينا ذخيرة تاني بقى

انام اصحى الاقي الموضوع ده اتقفل

واحنا بقى عايزين ننزل الجمعة الجاية.. احنا غلطنا اننا قلنا حنعلق الاحتجاجات يوم الجمعة، مش ممكن يعني كل ما نغفل عن البلد يسرحوا لنا فيها

ماحدش يتحجج بعصام شرف وفرصة عصام شرف، عصام شرف زار الناس عند مجلس الشعب وفي التحرير ولو عايزهم يمشوا ما كانش زارهم، او كان قال لهم: امشوا انتوا بتحرجوني

هو قال كده؟ اللي في التحرير والمجلس سمعوه بيقول لهم امشوا انتوا بتحرجوني؟ 

عايزين ننزل الجمعة الجاية عشان امن الدولة يختفي من حياتنا الى الابد ويتعمل لنا مجلس رئاسي بالاسامي اللي احنا نختارها، وما نسمعش كلمة طائفية دي تاني ابدا تتلغي من قاموسنا

ودماغنا بقى شوية من موضوع وهم الطائفية ده اللي عيشتونا فيه وفي رعبه تلاتين سنة وفي الاخر طلع امن الدولة هو اللي بيفجر الكنايس.. اللي يفجر كنيسة ويقتل 24 بريء، يهد كنيسة تلات ادوار.. دماغنا.. دماغنا