Wednesday, 16 March 2011

ما حدث في حي الضاهر

تحديث:
يا ريت تنبهوا على كل الناس انهم ما يدوش رقمهم القومي لحد، عشان فيه كلام ان فيه ناس بتلف على الناس بمواد تموينية وتاخد بطاقاتهم
---------
الست اللي بتساعدنا في البيت ماما بتسألها انت حتروحي الاستفتاء؟
قالت لها: طبعا حاروح، كلنا حنروح
ماما: وحتقولي ايه؟
الست: حاقول لا طبعا.. مش عايزاهم يجيبوا لنا السنيين دول، امبارح السنيين هجموا وكسروا المحلات وبهدلوا الدنيا وسرقوا حاجات وحرقوا حاجات وفيه اتنين ماتوا، وناس جم وقعدوا يقولوا لنا شايفين لو قلتوا نعم حيحصل ايه؟ السنيين حييجوا ويكسروا البلد ويعملوا كل حاجة حرام، وكانوا بيوزعوا ورق مكتوب عليه لا للإرهاب
فماما قالت لها: طب اسأليني، او اسألي نوارة، لأن انا باقول نعم، بس نوارة بتقول الاتنين زي بعض
انا قلت لها انت حرة تقولي نعم او لا، بس ده مالوش علاقة بالسنيين، وقلت لها لو قالت لا حيحصل ايه، ولو قالت نعم حيحصل ايه، وقلت لها انا شخصيا شايفة ان الاتنين زي بعض بس مش عايزة انا الجيش يطول عموما فكري انت وشوفي حتقولي ايه
قالت لي: دلوقت انا عايزة اعرف نعم ولا دول اعملهم ازاي عشان مش باعرف اقرا ومش عايزة حد يستهبلني، قلت لها: الدايرة الخضرا يعني نعم، والدايرة السودا يعني لا، واهم حاجة، بعد ما تفكري وتشوفي حتقولي ايه بس قولي لشباب الحتة انهم يعملوا لجان شعبية لأن صفوت الشريف وفتحي سرور وزكريا عزمي.. عارفاهم؟ قالت لي: ايوة طبعا الحرامية، حسبي الله ونعم الوكيل، ده انا قبضت جمعية بتلتميت جنيه قعدت اعد فيهم الليل كله، وهم واخدين فلوسنا.. قلت لها: اهم دول لسه برة، ولهم بلطجية بينزلوا يضربوا الناس، وممكن ينزلوا بلطجية يوم الاستفتاء عشان يولعوا في اللجان، او يغيروا الصناديق، او يضربوا الجيش، او يضربوا الشرطة، ويوقعوا بين الجيش والشعب، عشان كده قولي للشباب في الحتة يقفوا يحاوطوا اللجان ويساعدوا الجيش والشرطة انهم يحموا اللجان والصناديق
قالت لي: حاقول لخطيب بنتي، هو اللي كان بينظم اللجان الشعبية في الاول ايام ما الشرطة كانوا هربانين.. ولا بتعمل حاجة الشرطة دي، ديك النهار بت داخلة عمارة قام داخل وراها واد مسيحي في الاسانسير، البواب بيقول له انت داخل فين؟ قال له عاجبني الاسانسير عايز اركبه، ودخل معاها الاسانسير وجه قعد يبوس فيها، الناس اتلمت عليه واخدوه للكنيسة، الكنيسة بقى نزلوا فيه ضرب لما عدموه العافية، قام الشرطة جات، وقالت لهم هاتوه، فالناس الشهادة لله قالوا لهم لا مش حانديهولكم، الواد ده تبعكم ولما حتاخدوه حتسيبوه، هاتوا لنا الجيش ياخده، قام جه الجيش واخده، وبرضه امبارح لما المحلات اتكسرت، وناس من فوق السطوح بقوا يرموا الازايز المولعة دي لوما الجيش لوما كنا متنا كلنا، والشرطة قاعدين قدام القسم يعاكسوا في اللي رايحة واللي جاية، قلت لهم انتوا بطلتوا ضرب وبقيتوا تعاكسوا دلوقت؟ ما تقوموا تشوفوا البلطجية اللي في الشارع.. طب وهم سايبين الحرامية برة ليه؟ مش بتقولي هم اللي مشغلين البلطجية؟ 
قلت لها: بصراحة ما اعرفش البلطجية اللي بتحكي عليهم دول بتوع ايه؟ بس لما كنا عند وزارة الداخلية مامة واحدة صاحبتي ساكنة في السيدة زينب بقت عمالة تشاور على البلطجية وتقول لهم: انا عارفاكم انتوا بتوع فتحي سرور اللي كانوا بينزلوا معاه في الانتخابات
قالت لي: بس انا مش عايزة السنية
قلت لها: ما تنتخبيش السنية.. سوا طلعت النتيجة بنعم او لا، ماحدش يقدر يجيب السنية غصب عنك الا اذا انت انتخبتيهم، وما تنتخبيش اللي بيوزعوا وجبات وفلوس
قالت لي: لا.. ماحدش حينتخبهم ولاد الكلب دولت... دولت بتوعت الحزب الوطني.. عارفينهم احنا، كنا بناخد منهم الاول فاكرينهم ناس طيبين، بس بعد ما عرفنا انهم واخدين فلوسنا ما عادش حد ياخد منهم اي حاجة دلوقت، يعني ياخدوا الفلوس ويشحتونا احنا؟
انت عارفة عندنا راجل اسمه البدراوي.. المدرسة بتاعة بنتي باروح انا ادفع المصاريف، بعدها بقى ادارة المدرسة، بعد ما الاهالي يدفعوا المصاريف، ياخدوا بتاع خمسين بت ويروحوا بيها للبدراوي ده، عارفاه؟ بيبني عماير كده، اهو ده بقى بيروحوا بالبنات وياخدوا منه المصاريف تاني، بعد ما تكون اهالي البنات دفعوها من الاول، وبعد لمن يخرجوا من عند الراجل المدرسة تقولهم اوعاك تجيبوا سيرة لاهاليكم، احنا بناخد الفلوس دي عشان فيه بنات مش بتقدر تدفع.. جات بنتي بقى من النوع اللي دمها حامي، راحت سخنت وقالت لهم هاتوا الفلوس، وراحت جات بالبنات صحابها لابوها، جه جوزي راح المدرسة وقال لهم انا حاخرج من هنا على وزارة التربية والتعليم، تاني يوم مدير المدرسة جالنا البيت وقال له خد فلوس بنتك ومالكش دعوة بفلوس البنات، قال له فلوس البنات قبل بنتي.. طب سوا قلنا نعم او لا.. ايه اللي حيحصل بعد كده في الانتخابات؟ يعني انت تنتخبي على اساس ايه؟
قلت لها: انا شخصيا حانتخب في مجلس الشعب على اساس المستشفيات والمدارس، انا عايزة المستشفى تبقى للكل ما تبقاش مستشفى للاغنيا ومستشفى للفقرا، وكذلك المدارس برضه، ابن الغني يتعلم في نفس مدرسة ابن الفقير
قالت لي: لااا.. مش حتحصل دي.. عمرهم ما يرضوا يعملوها، فيه ناس عايشة وفاكرة نفسها فوق بقية الناس، وناس مش لاقية، ده احنا عندنا واحدة جوزها مشلول وهي غلبانة غلب الدنيا، ايام المظاهرات قلت لها خدي جوزك على الكرسي وانت اول واحدة تقول لا للحرامية دول، ده مبارك واخد فلوس يتعدوا ازاي دول؟ حيعمل بيهم ايه؟ ولا حد حيرضى بموضوع المستشفيات ده، ده كان ايام المظاهرات عمالين يقولوا في التلفزيون الكداب ان فيه تأمين صحي.. كنت عايزة اتصل اشتمهم واقولهم ده انا مقدمة على التأمين ده من امتى.. ولا جالي حاجة، مين حيرضى بقى يعلم الغني زي الفقير ويعالج الغني زي الفقير؟ ماحدش حيعملها
قلت لها: عشان احنا كنا سلبيين، هو احنا قبل الثورة كل الناس قالت مافيش حاجة حتحصل، بس لو احنا رحنا وانتخبنا ماحدش حييجي غير اللي احنا عايزينه، وبعد كده لما اجيب واحد اقدر اقول له انت وعدت بكذا وبكذا ولو ما نفذتش مش حانتخبك تاني.. المستشفى والمدرسة مالهمش دعوة بمين بيشتغل اكتر من مين، ممكن انا اشتغلت كتير فجبت بيت احسن من بيت واحد تاني، جبت عربية احسن من عربية واحد تاني، لكن جسمي اللي بيعيا ده ربنا اللي خلقه، ما اشتغلتش انا عشان اجيبه، اللي خلقني خلقك، يبقى زي ما جسمي اللي ربنا خلقه يتعالج انت كمان ربنا خلق جسمك وتتعالجي زيي، والبلد مليانة فلوس، ليه انا اتعالج احسن منك؟ ربنا خلق جسمي دهب وخلق جسمك من خرا؟ 
راحت ضاحكة
قلت لها ونفس الحكاية في التعليم.. انا اشتغلت وجبت لابني هدوم حلوة، لكن مخ ابني مش انا اللي اشتغلت وجبته، ده ربنا اللي خلقه، وابن بياع الخضار برضه مش هو اللي خلق مخ ابنه، ربنا اللي خلقه، يبقى ابني وابن بياع الخضار يتعلموا زي بعض، والشاطر فيهم هو اللي مستواه يعلا، لكن ليه ابن بياع الخضار يفضل بياع خضار وابن الدكتور يفضل دكتور، عشان ده مش معاه فلوس يعلم ابنه كويس مع انه ممكن يبقى ذكي والتاني معاه فلوس يشتري لابنه شهادة ويفضل يجيب له في دروس
قالت لي صح.. يبقى هو ده بقى الاساس اللي حننتخب عشانه، بس الناس مستحلفة عندنا في الضاهر للي كانوا بيوزعوا وجبات
انتهى
وما سألتهاش حتقول نعم ولا لا
ملحوظة: هي صعيدية من اسنا

38 comments:

Moataz Medhat said...

تحفة أدبية قبل أن تكون مقالة سياسية!
روعة.

Moataz Medhat said...

قاعدين نكلم نفسنا عالتويتر، و نكلم الأجانب، و نتبادل المقالات.
لكن حال البلد الحقيقي ملخص في قصة قصيرة واقعية، الغلابة بيقولوا ايه..و بلجهتهم و أسلوبهم.رائع

mohamed serag said...

احسن حاجة انى لقيت رايك زى رايى وهو ان الفيلم ده كله سواء قلنا نعم ولا لا هيخلص بان المجلس يعمل اعلان دستورى يحط فيه المواد اللى هوا عايزها ومتهيألى بدون استفتاء كمان ويبقى الموضوع كله فرقعة مالهاش لازمة

mohamedsoltan said...

جميلة الست ببرائتها ووعيها

Amira said...

الشهداء الأحياء اللي الحمد لله ثبت وجودهم و قاموا بالثورة لازم هم اللي يفرضوا وجودهم
ايهما له الأولوية:1- انهاء حالة التوتر بينا وبين الجيش قبل ما الفتن توصلها لمرحلة غليان و ندخل في مرحلة استعداد لانتخابات نزيهة و من خلال الشرفاء اللي يتولوا الأمر تعاد صياغة دستور متكامل؟
2- استمرار الحالة الحرجة من توتر و فتن و مظاهرات فئوية الكثير منها مخطط له صح؟
لازم الطرق على الحديد و هو ساخن الثوار الشرفاء لازم يأخذوا بزمام الأمور قبل ان يندس بينهم مدعي الشرف.
مصر هي أغنى بلاد العالم بكل الموارد الطبيعية و البشرية ، مصر هي اللي انقذت العالم من السنوات العجاف بتنظيم سيدنا يوسف عليه السلام؛، محتاجين كل حفيظ عليم مثله هو اللي يفرض وجوده أولا،،،،،،و و نوعيه الشهداء الأحياء اللي الحمد لله ثبت وجودهم و قاموا بالثورة لازم هم اللي يفرضوا وجودهم

واحد عادى said...

نانا - الدستور بيقول ان خمسين فى الميه عمال وخمسين فلاحين - وزى ما انتى عارفه ان ده كان تهريج رخيص لان هذا التقسيم لا يصلح للمرحله القادمه واالنتخاب لازم يكون للاصلح بغض النظر عن تصنيفه - ده من اهم الاسباب اللى بتخلينى افكر اقول لااااا - وبعدين المجلس العسكرى اعلن انه لو الشعب قال لا ح يعمل اعلان دستورى يعمل انتخاب رئيس الجمهوريه على اساسه وبعدين دستور جديد وبعدين انتخابات المجالس النيابيه - اعتقد انه هوه ده اللى احنا بندور عليه - مش كده؟؟

واحد عادى said...

نانا - بجد سؤال برئ ومحيرنى واسالك بكل تهذيب تدينى اجابه (لو ما اديتنيش مش ح ازعل) هوه ليه كل القوى المعاديه للثوره عااوزه تقول لا للدستور - وهوه ليه شنوده عااوز المسحيين يقولوا لا للدستور

elzahraamegahed said...

مين بيعنل الهجمه الشرسه الرهيبه دى على الاسلاميين ليه الفرقه مش عايزينهم ما ننتخبهمش لكن ليه نشوههم
ليه بس الفرقه
البلد قامت والثوره نجحت بالوحده ولسه الثوره ما خلصتش
مين اللى بيلعب الدور القذر ده واللى بيسمعوا لهم من المتعلمين أعذرهم بايه
أنا ما بحبش السلفيين
والاخوان انا محرصه منهم
لكن فعلا التشويه اللى بيحصل لهم ده أوفر أوى ومتخطط صح جدا وباين كويس مين بيتفذه ومصلحنه ايه

جبهة التهييس الشعبية said...

التخوين ده مش مقبول ابدا

مش صحيح ان كل القوى المعادية للثورة عايزة تقول لا للدستور

وما سمعتش البابا شنودة بيقول لا للدستور

حتى الكنيسة منقسمة على نفسها في موضوع الدستور ده فيه قساوسة قالوا حنقول لا وفيه قالوا حنقول نعم

ثانيا

الحزب الوطني حيقول نعم للدستور

ما اظنش الحزب الوطني ثوري

لا اللي بيقول نعم للدستور كلهم حزب وطني ولا اللي بيقول لا من القوى المعادية للثورة

دي وجهات نظر
وكل طرف رأيه فيه وجاهته

واذا كان مثلا حزب الوفد حيقول لا عشان مصلحته

والحزب الوطني حيقول لا عشان مصلحته

فالاتنين اخرا من بعض والاتنين فاسدين، بس ده مش معناه ان اللي بيقول لا بيخدم فساد حزب الوفد واللي بيقول نعم بيخدم فساد الوطني
بتوع المصالح بيلاقوا مصلحة في اي حاجة

جبهة التهييس الشعبية said...

وعلى فكرة

البني ادم العاقل مش مفروض ياخد قراره على اساس مين بيقول ايه

المفروض ربنا مدي لكل واحد فينا عقل يفكر بيه

Bienveillant أوفياء مصر d'Égypte said...

الشعب البسيط ساعات بيكون أحسن ألف مرة من المثقفين - نوارة نجم المثقفة الثائرة بتقول (نعم) - وأمه نعيمة (نعمين) - خللى عليوة يكلمنى - والست إللى بتساعدهم فى شغل البيت بتقول (لا) - الله لو الشعب ده كله زى الست إللى بتساعدهم فى شغل البيت دى - ونعلمها القراءة والكتابة وتعمل لها مدونة - بس ده باين عليه غلط لأنه ساعتها حاتقول نعم

بصراحة يا نوارة ما عندتش فاهمك

إيه وجه الاستعجال على الانتخابات ده

وأنهو مجلس شعب إللى حايجى بالصربعة دى إذا جاءت النتيجة بـ (نعم) - وكل الرص إللى إنتى رصتيه من قبل لم يقنعنى إطلاقاً بأن أقول نعم - وسوف أقول (لا) لللتعديلات الدستورية العبيطة دى بإذن الله - خلاص اتكلمى فى حاجة تانية بقى

Eldemokraty said...

لا تعليق

بس امانه عليكي يا شيخه تبقي تسلميلي على الجيش أوي أوي وتخليه يوصل سلامي لصفوت وعزمي وسرور ومبارك علشان هما أصحاب أوي

سلام

Eldemokraty said...

لا تعليق

بس امانه عليكي يا شيخه تبقي تسلميلي على الجيش أوي أوي وتخليه يوصل سلامي لصفوت وعزمي وسرور ومبارك علشان هما أصحاب أوي

سلام

Nicholas Urfe said...

دي تنفع رسالة للي شايفين ان الشعب مش بيفهم وانهم نخبة وبيفهموا،

اعترف اني كنت واحد من اللي مش واثقين في الشعب قبل الثورة، لكن اتعلمت كثير في ميدان التحرير وعرفت ان احنا شعب عبقري..وانا مش مستغرب من كلام الدادا عطيات الشغالة بتاعتكم يا نوارة، لأني شفت بعيني وقابلت نماذج زيها واكثر ووعيهم السياسي قد يفوق الكثير من الادعياء او ممن يظنون انهم اوصياء على الشعب اليوم..

تحياتي ليها اولا ثم لك وللسيدة الوالدة والكاتبة صافيناز كاظم

Mohamed Hussein said...

دلوقتى انا مش مبسوط غير من حاجة واحدة بس، إن الست دى طلعت بلدياتى !
أنا صعيدى و من أسنا برضه
:)

mohamed kharoub said...

أنا كنت عايز أعرف ازاي اتابع اخر مقالات الجبهة عسان مفيش ازاي اشترك فيهابحيش كل ما مقالة تنزل اعرف اجيبها

محمد طنطاوي said...

طب ليه يا نواره مقلناش كده لعصام شرف الراجل كتر خيره أول ما بدأ راح جاب لينا الحزب الوطنى فى الحكومة ، ومحتاج مظاهرة مليونية عشان يلغينا جهاز تخريب الوطن والدولة وطلع ظباط الأمن من السجن والمعتقلين من الثوار والسياسيين أمال نصرخ عشان حد يسمعنا بمنوا علينا كل شوية يطعلونا حد كده نفرح بيه سايب وزير الداخلية يمثل علينا فين مطابنا اللى اتعهد بيها ولا مستنى الفترة الانتقالية تخلص وبعدين يسلمنا لحد تانى

أبو هاجر said...

ست الكل مساء الخير

الست اللي بتساعدنا في البيت

لما تصل إلى القضايا الإنسانية الحساسة، نرى النوارة الأصيلة و الرائعة والمتألقة التي تكشف عن جوهرها الصافي النقي . نعم يا النوارة اللي بتساعدنا غير الشغالة . لكن هل كان لازم جسمك من .... يعني كان لازم. الله يسامحك .
ورغم ذلك، وربما بفضل ذلك. ستظلين النوارة، بألف واللام و ليس نوارة. وأنا لا أعتقد أنك تعرفيش الفرق
تحياتي الصادقة

بساطه said...

انا حزيييين جدا من فكرة تشوييه السنيين والسلفيين بالطريقه دي كانهم حاجه قبيحه.. والناس تقولك انا مش هوافق على التشويه مع اني مش هرشحهم.. ليه مش هترشحهم؟؟ الكويس يترشح سواء سني اولا ..ولا احنا لسه هنصنف الناس الكويسين بذقن او بدون.. في ناس بدقن وبلسم وناس عايزه ضرب الجزم زي كل البشر.. يبقى الواحد يقرر ويشوف بالعقل مين الاصلح من غير مايقفل عقله بافكار مسبقه.. وده مهم جدا الفتره القادمه وذلك لحملات التشويه الواسعه الي كانت بتشن على كل حاجه حلوه في حياتنا
.....

بساطه said...

ايه حكاية البطايق بتتسرق ولا بياخدوا الرقم القومي لجمع توقيعات مثلا.... انا مش فاهم... والله الي يعيش ياما يشوف

asteeka.storm said...

انا اول مره ادخل مدونتك يا نوارة لأني كنت اعتقد ان مافيش زي احمد فؤاد نجم تاني ... ولكني بالفعل انبهرت بحجم الزخم الأدبي والوطنية الأصيلة .. ولقيتك امتداد جميل لنجم .. وبخصوص الاستفتاء انا رافض التعديل واطالب بدستور كامل جديد ومجلس رئاسي مدني عسكري لأدارة شئون البلاد ... الانتخابات النيابية كمان لازم تعرفوا ان نص اللي هينجح فيها حزب وطني

يقول أنى امرأة said...

العشوائيات و الصعيد من بعد اسبوع من الخلع بتوع الحزب الوطنى كانو بيلفو ع الناس يلمو منهم بطايق الرقم القومى

dina said...

قصه من قلب مصر بجد تحفه يا نواره
ويا ريت كل ناسنا الشعبيين يبقى عندهم وعى زى الست دى

hossam said...

مش المفروض ان شباب الثورة اختاروا عصام شرف عشان هو انسان شريف وبس ولكن الاهم انه يكون وعدهم انه لما يختاروه هينفذ كل مطالب الثورة امال اختاروه على اى اساس؟؟

hossam said...

مش المفروض ان شباب الثورة اختاروا عصام شرف عشان هو انسان شريف وبس ولكن الاهم انه يكون وعدهم انه لما يختاروه هينفذ كل مطالب الثورة امال اختاروه على اى اساس؟؟

yasere said...

استاذة نوارة انا لاازعم الخبرة السياسية ولا الحتى محو الامية القانونية والدستورية ونظرا لانى لقيت ناس كتير يعرفوا يعبروا عن افكارى من ماركيز لنزار لهوجو والخر انتى وابراهيم عيسى وبلال ولقيت البرادعى ينفع لصورة الرئيس الديموقراطى
قصره كل الناس دى بيرفضوا التنازل وانصاف الحلول والحقيقة انى بطبعى كده وبناء عليه وبناء على تركيبة العقل الجمعى المصرى والثورى الذى يتمثل فى ان اللى مالوش كبير يشتريلوا كبير ولان الاخوان ماشيين باوامر مطاعة فانصحك وانصح نفسى باتباع التاس اللى طلعنا معاهم نثور مش دماغنا ومش اللى بيطلعوا فى التلفزيون
انامنشق عليكى يانوارة وعندى اجندة وطنية واشرف لى اكون خانكة من انى اكون فلول

محمد نجم said...

نوارة خدي دي
http://www.youtube.com/user/anwarsadat1981

ايه ده هو الفيديوهات الي علي مبارك العرص دي كانت فين؟

sohair said...

بصراحة يانوارة بيعجبني تهييسك وبساطته ..تساؤلاتك بتنور مساحة ممكن نكون شايفنها لكن بتعدي من غير مانقف عندها كتير ..أهم حاجة النهارده إن كلنا مصريين ولنا عقل ومش مفروض نسلمه لحد ..من يومين ابن خالي بيقوللى مش هروح الاستفتاء لأنى مش عارف أختار إيه وخايف اختار غلط أضر البلد والثورة ..قلت له لااااااازم تروح ..فكر كتتتير وإللى متوصله مادام هتروح صح ..الغلط إنك متشاركش لكن أى الاختيارين مش غلط ..مفيش حاجة اسمها صح وحاجة اسمها غلط
تحياتي
أم الرجال ...

nosseir said...

من الاخر ...الناس اللى على النت اغلبها فعلا بتقول لا للتعديلات..واغلبها دة مش كبيرة..يعنى حوالى 55 % بيقولوا لا للتعديلات والباقى بيقولوا نعم...ودة لاحظتة فى اغلب التصويتات اللى شفتها على المواقع المختلفة
المشكلة بقى ان اللى هيصوتوا بكرة مش بتوع النت ....بتوع النت جزء فقط...اللى هيصوت بكرة ناس كتيررر اعتقد اغلبهم هيصوتوا بنعم..لان التيار الدينى هيقدر يأثر عليهم

hardway said...

اخبار الموزااااااااا ايه


كنت مسافر......هو مفيش مقابلات تليفزيونية و لا ...ايه وحشتيني عايز اشوفك علي الشاشة000000000رجاء التنويه

Muslima said...

ممكن يا نوارة مع جمع توقيعات لأمن الدولة نجمع توقيعات لحل الحزب الوطني و منع أعضاءه من ممارسة الحياة السياسية لمدة 5 سنوات بتهمة إفساد الحياة السياسية في الفترة السابقة

raghda zouel said...

فعلا تحفة ادبيه بتدل على وعى الشعب المصرى البسيط حتى لو كان مش متعلم فهو عنده وعى سياسى قوى

nany said...

nany مقال سياسى يبسط حال فئه عريضه من المصريين لكن يانوارة الانتصار انا فتحت المدونة بتعتك عشان احاول استقر على راى اقدر اصوت بنعم ام لا لكن مفيش فايدة عليا الاعتماد على نفسى والله المستعان

nany said...

nany مقال سياسى يبسط حال فئه عريضه من المصريين لكن يانوارة الانتصار انا فتحت المدونة بتعتك عشان احاول استقر على راى اقدر اصوت بنعم ام لا لكن مفيش فايدة عليا الاعتماد على نفسى والله المستعان

m.nour said...

سلام عليكم،
نوارة، مع كامل احترامي ومش قصدي تكذيب حاجة، هل متأكدة من ان ده حصل في الظاهر فعلا؟، انا ساكن في الظاهر ولا شفنا ولا سمعنا الكلام ده، حصل خناقة اه بس بين بلطجية

غير ان صعب عندنا يحصل كده لان ببساطة قسم الظاهر احد الاقسام النادرة اللي متحرقتش، وده بسبب ان الاهالي وقفوا يحموه مع من تبقى من افراده قبل ما يمشوا، فده معناه ان الاهالي بتقف قدام اي مجموعات جاية قاصدة أذى، ولما بيحصل مشاكل بتبقى خناقات من جوا الحي نفسه

صحيح الشرطة قاعدين قدام القسم من غير شغلة ولا مشغلة لكن منجيش نقول بيعاكسوا، زي ما قلت انا ساكن في الظاهر وعلى بعد عمارتين من القسم، لا شفنا معاكسات ولا حاجة من اللي قاعدبن هناك

Hesham essa said...

That is Egypt people

أسامة لطفي said...

على فكرة يا نوارة
انا من انصار لا ولكن اكتشفت مؤخرا ان هناك قوة ممكن تكون هي الي بتلعب اللعب الوسخ ده وهية المحليات لانن تصورهم ان لا هاتطول مدة مغارة علي بابا المفتوحة الخاصة برشاوي التعديات وبدأو يتحركوا في الشارع ضد الاخوان
!!!!!
وبالتالي المفروض الخلاص من المحليات في اقرب وقت بغض النظر عن نتيجة الاستفتاء

ahmed essa said...

لالالا لالالالالالالالالالالا
للترقيعات الدستوريه المهينه لنا ولثوره 25 يناير