Tuesday 15 March 2011

رسالة وصلتني بالميل عايزين نتأكد من صحتها ونتخذ اجراءاتنا

تحديث:
لقيت دايرتي وحاحرسها
تحديث:
خشوا الايفينت ده واعملوا اتنديج 
عايزين بقى صفحة تتعمل لجمع التوقيعات بالرقم القومي النهاردة
واحنا نازلين الاستفتاء كل واحد موقع يطبع عشر ورقات ويمضي الناس عليها
فيه في الايفينت ده 180 الف، اضربهم في عشرة يبقى لوز
وبسرعة التحرك، عشان عايزين التلات مطالب المرفقة: تجميد امن الدولة والتحفظ على العاملين فيه، التحفظ على الثلاثي المرح وتجميد ارصدتهم بالداخل والخارج، البدء في محاكمات عاجلة، دول عايزين نقفل ان شاء الله مليون على نهاية يوم السبت اللي جاي، ونسلمهم للجهات المعنية ونديهم مهلة ليوم الجمعة اللي بعد الاستفتاء
بس بسرعة والنبي
خلينا نخلص، مش حنعيش عمرنا كله نعمل لجان شعبية عشان نحمي البلد من تلاتة وكام صايع بيشتغلوا في امن الدولة
-------
اكيد فيه وسيلة للتأكد من صحة هذه الرسالة:
مجموعة أمن الدولة اللى تم سجنها و معهم رئيس الجهاز هم يقيمون فعليا فى مستشفى أكاديمية مبارك بالتجمع الخامس .. حيث يتمتعون بحرية الحركة و حرية الإجتماع معهم موبايلتهم الخاصة و طعامهم يأتى دليفرى بشكل طبيعى .. أما رئيس الجهاز فقد حصل على غرفة نوم و أنتريه .. كما تم تحصين المكان تحسبا لأى هجوم من الشعب
بإختصار تحول المكان لمقر جديد لأمن الدولة يمكن ان يديرون منه ما يشاءون
فلنضف لى ذلك ان حبيب العادلى فى سجن المزرعة حيث يعيش فى ثقة من أمره يملك موبايلين ويمكنه الإتصال بمن يرغب
هل يفسر ذلك بعض ما نواجهه ؟؟

أما فى سجن المزرعة بطرة
فبجوار العنبر الذى يضم السجناء المهمين هناك عنبر يحوى 500 مسجل خطر تم إحضارهم من سجن القطا
يعيشون فى ظروف سيئة للغاية و كل 150 مسجون يقيمون فى مكان يتسع ل 50 فقط
أى ان سجن المهمين يعتبر بمثابة إستفزاز يومى لهم
و هو وضع غير طبيعى .. ينذر بإنفجار قد يحدث فى أى وقت .. ما الهدف من ذلك ؟؟
لن نتحدث عن الظروف المرفهة نسبيا للسجناء المهمين و ما يحظون به من رعاية نسبية فهذا أمر متوقع
يبقى شئ أخير و هو أن وضع المسجونين من الداخلية فى سجون الداخلية هو وضع يحول عملية السجن إلى مكان للإجتماع أو نادى
هناك العديد من ظباط السجون الشرفاء يتمنون لو تم تحويل المسجونين من الشرطة و امن الدولة إلى سجون يشرف عليها الجيش او على الأقل ان تكون هناك جهة رقابية تضمن عدم تحول السجن إلى نادى بالنسبة لهؤلاء
وشكرا
--------
انتهت الرسالة
الأمر التاني بقى اللي عايزة اكلمكم فيه
اظن احنا رغينا في مسألة التعديلات وفيه حاجات كتير مكتوبة اي حد عايز يقرر رأيه يقدر يرجع لها
وزي ما قلنا، ايا كانت نتيجة الاستفتاء، ان شاء الله خير، لأن ربنا واخد باله منا، فاللي ربنا حيعمله حيبقى خير ان شاء الله، المهم اننا نشارك في اللجان الشعبية لمراقبة الانتخابات ونبلغ باي خروقات، ما حدش عارف، مدام امن الدولة شغال وفتحي سرور وزكريا عزمي وصفوت الشريف شغالين ممكن يلحقوا اضرار بالصناديق، ممكن يعملوا محاولات تزوير عشان الناس تفقد الثقة في نفسها وفي المراقبين وفي القضاء وفي الجيش وتحصل فوضى، ممكن يتعرضوا للمواطنين، لأنهم مش عايزين المواطنين يشاركوا في الاستفتاء، لا بلا ولا بآه، هم يهمهم تعويق العملية الديمقراطية، ممكن تبقى بالنسبة لهم فرصة يستغلوها لإحداث فتن طائفية، او احداث هرجلة، او الحاق ضرر بالمواطنين، او بعناصر الجيش، او اختلاق مصادمات بين اي مجموعة ومجموعة تانية
يبقى احنا شغلتنا:
نحمي اللجنة واللي فيها
نراقب عملية الاستفتاء
اي حد يحاول يعمل مشاكل، سواء طائفية او مصادمات مع الجيش او ضرر للمواطنين نمنعه 
الاهم دلوقت
هو احنا حنعيش كده باللجان الشعبية؟ مش حنخلص بقى؟
لا لازم نخلص
ولازم نجمع مليون توقيع للآتي:
1- تجميد جهاز أمن الدولة والتحفظ على كافة العاملين به لحين التحقيق معهم
2- التحفظ على كل من فتحي سرور وزكريا عزمي وصفوت الشريف بموجب الأحكام العرفية القائمة في البلاد الآن واقالة زكريا عزمي من منصبه، او احالته للتقاعد، وتجميد كافة ارصدتهم في الداخل والخارج
3- البدء الفوري في تحقيقات جادة مع المذكورين أعلاه

احنا نعمل صفحة على الانترنت دلوقت، ويبقى التوقيع برقم البطاقة، وبرضه نلم توقيعات من الشارع
وعايزين نسلم التوقيعات دي لكل من:
- المجلس العسكري
- رئيس الوزراء الدكتور عصام شرف
- النائب العام
ونقدر نجمع توقيعات من الشارع، ونقدر نجمع توقيعات يوم الاستفتاء الناس حتبقى كتير 
يا ريت التحرك بسرعة
وانا بادبس دلوقت مركز هشام مبارك والمحامي مالك عدلي والمركز المصري والمحامي خالد علي
امسكوا في رقبتهم بقى
اظن يعني زكريا عزمي وفتحي سرور وصفوت الشريف مش احسن من علي صبحي وعمرو البحيري عشان هم يتقدموا لمحكمة عسكرية وموردي االبلطجية يتسابوا
واذا اتحققت لنا التلات مطالب بقى مش حنبقى فريسة للاشاعات ولا للشكوك 
خلينا نشوف اللي ورانا 

43 comments:

Sgheita said...

sa7 ya Nawwara.. ezzay net2akked men mawdou3 amn el dawlah el mota7afath 3aleihom?

علاء زين الدين said...

شكراً نوارة..فكرة جمع التوقيعات ضرورية. يا ريت تعلني عن الموقع عند إنشاءه. ضروري أيضا تجنب إضافة أي مطالب سياسية لهذه المطالب حتى لا تختلط الأوراق. أقصد على سبيل المثال مطالب تتعلق بالتعديلات الدستورية أو تأجيل الاستفتاء أو إجراء انتخابات رئاسية قبل برلمانية أو العكس. التوقيعات تنحصر فيما يجتمع عليه الجميع للتخلص من النظام السابق المتمثل في أمن الدولة والداخلية والحزب الوطني وبلطجيتهم. وأضيف الإفراج عن كافة المعتقلين السياسيين ووقف كافة أشكال التعذيب.

i_am_2andeel said...

انا خايف اعمل صفحة الوقيعات يطلعوا التويترجية ياكلوني زي ما عملوا في صفحة مقاطعة الموبايل يوم 18 مارس و هيقولوي عايزنا نحط ارقام بطايقنا عشان نتلم كلنا
عموما يا نوارة انا ثقتي في ربنا ثم في مصر الجديدة دي اللي فايقة و فيكي انتي كشخصية مثقفة واعية مهمومة بالبلد ملهاش حدود و اللي يطلب مني هعمله فورا و أول شيء هكون في اللجنة ان شاء الله

Tarek Afifi said...

الله عليكي يا نوارتنا

Mohamed kharoub said...

اعملي فورمة معينة و نزلوها علي النت و انا من المحلة و هطبعها و هنمضي الناس ان شاء الله ...... لازم نطهر البلد من الشريف و اعوانه

heba sherief said...

يا ريييت عشان كمان المصريين اللي في الخارج يشاركوا اهو حاجه نشارك بيها حاليا ... ربنا معاكم يا رب ان شااء الله و ننضف مصر من امن الدوله و رؤوس الفساد اللي لسه سارحين مش عارفين بيخططوا لايه ..

heba sherief said...

يا ريييت عشان كمان المصريين اللي في الخارج يشاركوا اهو حاجه نشارك بيها حاليا ... ربنا معاكم يا رب ان شااء الله و ننضف مصر من امن الدوله و رؤوس الفساد اللي لسه سارحين مش عارفين بيخططوا لايه ..

heba sherief said...

يا ريييت عشان كمان المصريين اللي في الخارج يشاركوا اهو حاجه نشارك بيها حاليا ... ربنا معاكم يا رب ان شااء الله و ننضف مصر من امن الدوله و رؤوس الفساد اللي لسه سارحين مش عارفين بيخططوا لايه ..

heba sherief said...

يا ريييت عشان كمان المصريين اللي في الخارج يشاركوا اهو حاجه نشارك بيها حاليا ... ربنا معاكم يا رب ان شااء الله و ننضف مصر من امن الدوله و رؤوس الفساد اللي لسه سارحين مش عارفين بيخططوا لايه ..

zmmorabya said...

طب نــــــــــــــــــــــوارة
معلش طولت فيها عشان تاخدي, و على امل انك تكوني خدتي بالك
عاوزين طيب نص الكلام اللي هيكون في الورقة اللي نخلي الناس توقع عليها... يا ريت لو حد يعمله و يرفعه عشان كل الناس تحمله
و حطه لينل التحميل على الايفنت بتاع "عاوزين محاكمة هباب و هباب وهباب"... اوكي؟؟؟

اه كمان حاجة, يا ريت بالمرة بقى كمان ورقة, او في نفس الورقة عشان الطباعة بس =D
المطالبة بحل امن الدولة... هو ممكن نخليها ورقة تانية عشان محدش يقول انا موافق على المحاكمة لكن مش موافق على حل امن الدولة... مثلا!! ساعتها هديله على افاه بدل ماديله اي ورقة فيهم بس بردو, الديمقراطية واجبة...
استبينا... الورقتين دول و حد يحطهم على الايفنت

Unknown said...

حد خد باله من الاخ اللى لابس جلابية بيضاء وكان يؤم الناس فى جمعة الغضب فى الفيديو الموجود فى الصفحة على اليمين - حد عرف اسمة او ذكرة او هو حاول يطلع فى الفضائيات ويقول انا كنت فى الثورة انا عملت الثورة وعاوز نصييبى من الكعكة - هذا الاخ يوجد منه كثير خرجوا فقط لتحرير مصر ولا ينتظرون من احد جزاءا ولا شكورا هؤلاء هم المسلمون حقا لايرجون بعملهم الا الله ولكن للاسف البعض يحاول تهميشهم واقصائهم من الساحة وتخوينهم وتخويف الناس منهم

Unknown said...

الموقع بسرعة علشان نلحق نعمل حاجة ونلم توقيعاتنا بسرعة ولازم نكتب بردة ان اسم الاكاديمية يتغير والعصابة اللى مرفهة هناك دى تروح عالمزرعة هو كمان هيكون فى طبقية فى الحبس مش نافع الكلام دة علشان انا المرة دى لو وقفت فى التحرير مش هاروح بيتنا تانى الا اما المطالب كلها تتحقق او اموت بقى واخلص

Unknown said...

بعد اذنك استاذه نواره نعمل صيغه موحده باالثلاث مطالب ويكون فيها الغاء امن الدوله ومحاكمه الثلاثي محاكمه عسكريه سريعه
من جنود الثوره عصام نصار

mido said...

@mkwp2010

حيلموا مين؟
هو لسه فى حد بيخاف؟
اتكل على الله واعمل الفورم ويكون فى مطالبنا اللى فى البوست ده

FATMA said...

لو سمحتي يا نوار ضعي اميلك احيانا يوجد كلام نريد ان نرسله لك ولانريد نشره

Yaser Helmy said...

شكرا على المقالة الرائعة يا نوارة.

(أنا بتاع الغوغائية اللي كنت على الفيسبوك على فكرة)

Sayed said...

please make this page as soon as possible...we are ready....We want to get rid of these pigs!

الجبرتوته said...

صحيفة المصريون ناشره مقال بتاريخ 14 /3/2011
المرصد المصري: لا يزال أمن الدولة يمارس عمله رغم التجميد



مازال جهاز مباحث أمن الدولة المصري يعمل إلى الآن بذات الطريقة وبنفس الأسلوب ومازال يحتجز المواطنين وينتهك حرياتهم دونَ وَجْهِ حقّ ودون سند من القانون رغم الإعلان عن تجميد عمله الأسبوع الماضي.

وأوْضَح المرصد المصري للعدالة والقانون أنّ ضباط أمن الدولة بمطار القاهرة الدولي قاموا أمس باحتجاز المحامي والقيادي الإسلامي علي راضي أثناء قدومه من دولة قطر.

وأشارَ إلى أنّ راضي احتُجِز في المطار لمدةٍ تزيد على ثلاث ساعات وتَمّ وضعه في الحجز، وأكّد راضي أنّ من قام باحتجازه هم ضباط ومُخْبِري أمن الدولة وهم معرفون له شخصيًا، مشيرًا إلى أنّ المحتجزين يتم معاملتهم معاملة قاسية ويمنعون من الذهاب إلى دورات المياه.

وطالب المرصد المصري للعدالة والقانون في هذا الشأن تفعيل قرار تجميد جهاز مباحث أمن الدولة ووقفه عن العمل تفعيلاً حقيقيًا والإفراج فورًا عن كل المحتجزين في حجز أمن الدولة بمطار القاهرة، والتحقيق في واقعة احتجاز على راضى ومعاقبة المسئول عنها.

كما دعا المرصد وزيرَ الداخلية بتنفيذ تعهداته التي أكّد خلالها احترام رجال الشرطة لحريات المواطنين وحقوقهم، والتزامهم أثناء ممارسة عملهم بأحكام القانون.

AhmedEzzat said...

قابليني لو امن الدوله اتحل بعد ما ناويين يصوتو بنعم :( :(

nosseir said...

لو حتى جمعتى عشرين مليون تقيع الجيش مش هيعمل لهم حاجة
الجيش ماشى قانونى يا بنتى...يعنى لازم حد يتقدم بورق سليم ضدهم للنائب العام ..وساعتها النائب العام نفسة هو اللى هيصدر القرار
احنا مش عملنا ثورة ضد الظلم عشان نبداء دولتنا الجديدة بظلم...كل شئ لازم يكون قانونى
اما بالنسبة لامن الدولة فدة مطلب مشروع..واعتقد الجيش ومجلس الوزراء ووزير الداخلية شغالين فى تعديل الجهاز الان...ومش كل شئ لازم يعلن لينا

محمد طنطاوي said...

الفكرة دى كنت ناوى أعرضها عليكم النهاده لكن سبحان الله تواردت الأفكار
المهم احنا مش كل يوم هنعمل توقيعات مليونية ، لذلك ينبغى أن تكون مطالبنا أكثر شدة خصوصا ونحن نتعامل مع مجلس عسكرى متلون نرى يداه مطلقة على كل فئات الشعب بينما نراه يغض الطرف عن المجرمين من مافيا وعصابات وفلول النظام ولا نجمل فى ولا نحب من يجامل ولا يزايد علينا أحد بأنه حمى أو شارك فى النهاية هم مصريون ولم يقدموا لنا شهيدا الا خطًا ولم ينزف لهم دم فى هذه الثورة بل هم نفسهم جلدوا وسجنوا منا ما أرادوا
مطالبنا فى هذه المرحلة بالإضافة إلى ما قلتى يا نواره :
ـ إلغاء جهاز أمن الدولة ولا أتمنى أن يكون الجيش المصرى فى هذا بأقل وطنية من تونس التى لغت هذه الجهاز القذر
ـ البدء فى تحقيقات عاجلة لمبارك وعائلته ووضعهم تحت الإقامة الجبرية
ـ الإفراج العام عن كافة المعتقلين الثوريين وإلغاء المحاكمات العسكرية
الإفراج العام عن المعتقلين السياسيين
ـ مطالبة المجلس العسكرى بإثبات حسن النوايا لماطلب الثورة الشرعية

Ahmed-Badr said...

الغاء جهاز مباحث أمن الدولة هييييييييييييييه وانشاء قطاعاً جديداً للأمن الوطني همممممممممم
نفس الناس أسم جديد؟؟؟

محمد طنطاوي said...

نسيت حاجة كمان وهى المطالبة بإلغاء مجلس الشورى وحل الحزب والمناداة بعدم ترشيحه فى أى انتخابات شعبية أو رئاسية على الأقل الفترة الأولى
ولو علىَّ مش هينزلوا أبدا دول مكانهم السجن بس عشان المجلس العسكرى ميزعلش

Ahmed Attia said...

جمع التوقعيات اثناء الاستفتاء
اولا غيراخلاقى
الناس نازلة لهدف معين
ثانيا
بحكم القانون ممنوع التعرض لاى مواطن نازل الاستفتاء باى نوع من الدعاية السياسية
(برجاء مراجعة حقوق المواطن على صفحة الاستفتاء)

nour1971 said...

الغواااااااااااا جهاززززززززززززز آمننننننننننننننننننننن الدولههههههههه


مبببببببببببببببببببببببببببببببروك لمصر


عقبال ما يحاكموا اللي اتسببوا في موت الشهداء

Ahmed Attia said...

مبرووووووووووووووووووووكككككككككككككككك
امن الدولة اتحللللللللللللللللللللل

يوميات شاب منوفى said...

يانوارة انتى عايزة تقنعنى انا النائب العام لم يمتلك اى مستند حتى الان ضد الثلاثى المرح

اللى هيجننى ان الجيش والوزارة اكدوا وجود ثورة مضادة والعيل اللى لسة بيرضع فى مصر عارف ان الثلاثى المرح وراه والجيش مش عايز يقبض عليهم ممكن تقوليلى ليه ؟

The Dagger said...

Nawara:

I just saw this on Al-Jazeera:

التلفزيون المصري : وزارة الداخلية تقرر حل جهاز مباحث أمن الدولة بأنحاء البلاد

Is it true?

Ahmed-Badr said...

أعلن المتحدث الرسمي لوزارة الداخلية، الثلاثاء، أن اللواء منصور العيسوي، وزير الداخلية، أصدر قرارا بإلغاء جهاز مباحث أمن الدولة بكافة إداراته وفروعه ومكاتبه بجميع محافظات الجمهورية.

كما قرر الوزير إنشاء قطاع جديد بالوزارة بمسمى «قطاع الأمن الوطني»، يختص بالحفاظ على الأمن الوطني والتعاون مع أجهزة الدولة المعنية لحماية سلامة الجبهة الداخلية ومكافحة الإرهاب وفقا لأحكام الدستور والقانون ومبادئ حقوق الإنسان وحرياته.

وأضاف المتحدث باسم الوزارة أنه سيجري اختيار وتسكين ضباط القطاع الجديد خلال الأيام القليلة المقبلة؛ ليؤدي هذا الجهاز دوره في خدمة الوطن، دون تدخل في حياة المواطنين أو ممارستهم لحقوقهم السياسية

أنا متفااااااااائل يا ناس !!!! يا رب بقى يتحاكموا كده واحد واحد هيييييييييييييه و يا رب الجديد يكون مفيد


محدش يعرف تعريف الارهاب عند الحكومة

أحمد زاهر said...

ربنا معانا إن شاء الله

Sherif said...

نوارة, اصحابى, حبايبى, شفتوا الخبر دة: http://dostor.org/politics/egypt/11/march/15/38153
عايزين زغروطة أجمد من بتاعة ليلة التنحى!

بساطه said...

دلوقتي الجهاز اتلغى.... الوضع ايه؟؟ الناس الى في الجهاز الجديد هيجيبوهم منين؟؟؟ يارب تظبط حكية التامين دي عشان انا خايف على بنتي الي جايه معايا

حسن على said...

خبر هام وعاجل: وزير الداخلية يعلن حل جهاو امن الدولة سىء السمعة ولا ينقصنا الا زغروتة من نوارة

utopia said...

http://dostor.org/politics/egypt/11/march/15/38153

أعلنت وزارة الداخلية أن اللواء منصور العيسوى وزير الداخلية أصدر قرارا منذ قليل بإلغاء جهاز مباحث أمن الدولة بكافة إداراته وفروعه ومكاتبه فى جميع محافظات الجمهورية.
كما قرر وزير الداخلية إنشاء قطاع جديد بالوزارة بمسمى (قطاع الأمن الوطنى) يختص بالحفاظ على الأمن الوطنى والتعاون مع أجهزة الدولة المعنية "لحماية وسلامة الجبهة الداخلية ومكافحة الإرهاب، وذلك وفقا لأحكام الدستور والقانون ومبادىء حقوق الإنسان وحريته

بقا اسمه قطاع الامن الوطنى
ههههههههههههههههه البسوا
شغل يهود فعلا علشان لما تقول لهم عاوزين نحل امن الدولة يقولوا لك هو فين امن الدولة؟؟؟
طب هو فين الظابط؟؟؟

لسة برضه عاوزة تقولى نعم للاشتغالات....قصدى للتعديلات؟؟؟

Unknown said...

عزيزتى نواره
حاولت الدخول من خلال اللينك الموجود بالبوست للتوقيع و لكن يبدو انى لازم يكون لى حساب فى الفيس بوك و انا لا استخدمه
برجاء وضع الطلب المطلوب توقيعه دون ان يكون من شروطه ان يكون لى حساب فى موقع محدد
رجاء زيادة اسم مفيد شهاب مع هذا الثلاثى المرع فهو المتلون ترزى الدستور لعنة الله عليهم جميعا هم و اتباعهم حسبى الله و نعم الوكيل و ان شاء الله ربنا اللى ياخد لنا ثأر الشهداء الشباب الأبرياء

بساطه said...

الثلاثي الزفت يانواره... انا اراهن انه ماسك زلل للشعب كله.... همال هما مش عارفين يجيبوهم ليه... كل واحد من الكبار والصغيريين عنده ملف حلو ومقطقط كده على جنب لوقت عوزه..... دول تعالب وعاملين حساب اليوم ده.... لكن حكاية التوقيعات دي حلوه اوي وانشاءالله تزنقهم في الحيط سواء الثلاثي او الي سايبنهم.... يانواره انا مش فاهم ايه حكاية البرلمان والمجلس الي قاعدين سنه وماشيين... ياريت تفهميني

Anonymous said...

يا ريت تكون من مطالب الثورة كمان حل الحزب الواطي و جميع الاحزاب الكرتونية و اللي كانت بتستفيد و تفيد في الفساد السياسي و الاجتماعي و المادي كمان قبل 25 يناير و منع اعضاؤهم من الترشح لاي انتخابات مقبلة لاي عضوية ولو حتي عضوية شيخ بلد او حارة لمدة لا تقل عن عشرة اعوام علي الاقل و تغليظ العقوبة لمن يتلاعب او يتمسخر بالشعب و يرشح نفسه بالاشغال الشاقة و مصادرة امواله و كفاية اكتر من تلاتين سنة قاعدين علي الكراسي يقولوا ايوه و عاضر و نعم لاي تشريع او قرار غير قانوني ليس في مصلحة الشعب المصري بل و احيانا في مصلحة اسرائيل و يمتصون دماء الشعب و يستغلون عضويتهم في الكسب غير المشروع يعني لسرقة مصر و المصريين و كلهم اما فاز بالتزوير و الارهاب و الرشوة او بالتعيين من زعيم العصابة لضمان اعطاؤه فروض الطاعة
و الموافقة العمياء علي اي شئ يريده هو او حزبة او الدلوعة ابنه
تونس سبقتنا و حلت الحزب الفاسد عندهم ............ لحد امتي تظل تونس تغلبنا و تسبقنا؟ يا خوفي ليطلعوا القمر قبلنا كمان

حياة الظل said...

سؤال غريب مريب
ليش في ناس مدنين وحتى بعد قيام الثورة انقبض عليها من الجيش واتحاكم في محاكم عسركية مع انهم مدنين وفي نفس ذات الوقت رئساء الاجهزة الامنية وبعض رموز الفساد المتورطين الى اخرهم في قمع وقتل المتظاهرين واعمال عنف وبلطجة وفتن طائفية لايزالوا يتمتعون بحريتهم وان تم القبض عليهم فانهم يوجهون اما تهم بفساد مالي او في اسوأ الاحوال يتم القبض عليهم ومحاسبتهم امام مؤسسات القضاء المدني مع انهم عسكرين
يا جماعه لسه في ظلم
مدني يحاكم امام محكمة عسكرية وعسكري يحاكم امام محكمة مدنية جنائية
وبعدين معاكم بقه

أرنوب said...

سؤال واحد وحيد حاسأله وعايزك تجاوبيني عليه (ده لو عندك إجابة يعني ) ممكن تقوليلي الدستور الجديد اللي حنعمله ده أيه الضمان إن الإخوان مايلغيهوش لما يوصلوا للحكم بغرض إحتكار السلطة للأبد ؟ مين حيحمي الدستور منهم أو من أي حاكم يخطر بباله تعديله لهوى في نفسه ؟ أوعي تقولي الإخوان مش حيوصلوا للحكم .. تبقي مابتفهميش سياسة لو قلتي كده

negmat lail said...

مراقبة الاستفتاء يحتم تقديم طلب في الجيزة http://www.referendum.eg/2011-03-10-18-33-38/2011-03-11-22-16-09.html

negmat lail said...

المنظمات المسموح بها للمراقبة:

http://www.referendum.eg/2011-03-10-18-33-38/2011-03-11-22-16-09.html

negmat lail said...

تصاريح متابعة عملية الاستفتاء
http://www.referendum.eg/2011-03-10-18-36-15/2011-03-16-14-16-57.html

samir osman said...

شكلك ناويه علي مليونيه تطلع علي ألأكاديميه