Friday 18 March 2011

نداء عاجل للمراقبين المتطوعين.. وطلب تفسير من القوات المسلحة

تحديث:
دي صفحة المراقبة على الاستفتاء، فيها المواقع وفيها الاتصال عشان لو لقيت مخالفة تتصل بيهم
كمان دي الصفحة الرسمية للاستفتاء وهنا الابلاغ عن التجاوزات
ملحوظة كمان عشان فيه واحد خوفني وقال لي انت بتسخني العيال، لما تراقب ما تروحش تتخانق، انت تبقى لطيف، لان اللي قاعد ده قاضي، ولازم تكلمه باحترام، وهو اصلا القوات المسلحة متعهدة بأن الفرز يبقى علني والصناديق ما تتحركش من مكانها، لو لقيت اي حركة مش لطيفة تطلب بشكل مهذب، ما حصلش صور وبلغ
ما تتخانقش، لانك لو اتعرضت للقاضي حتتحاكم
اولا:
المتطوعين لمراقبة اللجان
من حقكم ان الفرز يبقى علني، وانكم تشترطوا ان الصناديق ما تتنقلش من مكانها، يعني الفرز في اللجنة، وعلني، كل قاضي يبقى عارف صندوق زميله في ايه وانتوا تبقوا واقفين وعارفين النتائج وانتوا واقفين 
ولو حصل انهم نقلوا الصناديق من مكانها او عملوا فرز سري تبلغوا وتصوروا وتعملوا فضيحة بجلاجل وتخلوا اللي ما يشتري يتفرج وتتصلوا بالقنوات الفضائية 
اوعوا اوعوا اوعوا اوعوا الصناديق تتنقل من مكانها
اوعوا اوعوا اوعوا اوعوا الفرز يبقى سري
فرز سري يعني تزوير
نقل صناديق يعني تبديل الصناديق
من الآخر كده.. موبايلك معاك، كاميرتك في جيبك، تصور وتتصل بالفضائيات وتعمل فضيحة مالهاش زي قبل كده
احنا ما يهمناش النتيجة.. احنا يهمنا انها ما تبقاش مزورة
اظن دي حاجة متفق عليها اللي حيصوتوا بنعم ولا
-------
حاجة تانية محتاجة تحقيق وتفسير من المجلس الاعلى للقوات المسلحة
فيه ناس بتقول انها لقت الورق ده في شارع الجمهورية بأسيوط، وانهم راحوا للجيش والجيش ما فهمش ايه وجه الخطورة، فشرحوا لهم الوضع فقالوا لهم روحوا للشرطة، فالشرطة ما عملتش محضر وقالت لهم روحوا للنيابة، وبكرة الجمعة ومافيش نيابة وهم مش عارفين يعملوا ايه
رجاء التحقيق العاجل في الامر ده 
احنا عايزين نعرف مين اللي في ايده ورق استفتاء خارج اللجنة ومختوم كمان
لو سمحتوا شيروا البوست ده على قد ما تقدروا عشان يمكن يوصل لجهاز واحد من المجلس الاعلى للقوات المسلحة ويتحركوا لأن مش عارفة آلية الاتصال بيهم وبلال فضل مش بيرد على تليفوناتي ومش عارفة الائتلاف لسه على اتصال بيهم ولا لا
بس انا عايزة الموضوع ده يوصل للمجلس الاعلى للقوات المسلحة
مش لاي حد تاني

34 comments:

Tears said...

استمارات الاستفتاء على تعديل الدستور مرمية فى الشوارع و بقى فيه استمارة دوارة

اتفضلى

https://www.facebook.com/album.php?fbid=1474234594941&id=1805970597&aid=54054

mohamed said...
This comment has been removed by the author.
mohamed said...

MeBakry

شكرا نوارة علي الاهتمام

Global Muslim Hub said...

حطيه على صفحتهم يا نوارة وصفحة رئاسة الوزراء وإيميل عصام شرف ..

Tears said...

نوارة تقدرى تقوليلنا ايه الحل دلوقتى و الناس واثقة ثقة عمياء فى النزاهة و ان صوتها فى محله؟

دلوقتى بس بقى فيه تفسير منطقى لكل اللى راحوا الوراق و مناطق اخرى شعبية ادوا الناس زيت و صلصة و مكرونة مقابل صورة من الرقم القومى

الناس اللى اشرفت على تزوير انتخابات مجلس الشعب هى نفسها اللى جالها جوابات تكليف بالذات فى القرى و النجوع..المشكلة مش فى الاستفتاء قد ما هى فى فهم الناس للامر على انه تمام و هو مش تمام جدا من اوله و بان من اول ترك المجال لاستغلال الدين و ترويج اكاذيب للخلق و الاهم ان دى بروفة لانتخابات الرئاسة و لو اللعب وارد كده يبقى ايه فايدة الثورة ما كان مبارك ماشى حاله
!

Anonymous said...

http://www.facebook.com/album.php?fbid=1636489199673&id=1460018059&aid=2079038

من اكونت الدكتور ايمن نو ر ع تو يتر

Zack said...

دول خليجية تهدد مصر بالمقاطعة فى حالة محاكمة مبارك
http://www.gn4me.com/gn4me/details.jsp?artId=3923449

Anonymous said...

رصد | مصر | أسيوط | عاجل : فلول الحزب الوطني تطبع "أوراقا مزورة" الخاصة بالإستفتاء وتلقى بالآلاف منها في شوارع أسيوط لإيهام الناس بحدوث عمليات تزوير في الإستفتاء

Effective said...

في انباء عن أسيوط | عاجل : فلول الحزب الوطني تطبع "أوراقا مزورة" الخاصة بالإستفتاء وتلقى بالآلاف منها في شوارع أسيوط لإيهام الناس بحدوث عمليات تزوير في الإستفتاء والله اعلم

Abo Maro said...

الورق اتسرب من دلوقتى http://www.facebook.com/photo.php?fbid=198315983523259&set=a.191404107547780.43578.190520104302847&theater

اسكندرانيه موووت said...

هى دى عوايدنا وهو ده سلو الانخابات وربنا مايقطع لنا عاده ههههه

Unknown said...

انا هقتبس كلامك يا نوارة فعلا عييييييييييييب اللي بيحصل ده اوي فيه ناس نفسها انها تجهض عمليتنا الديمقراطية مش لشئ الا انه هيبقى حازز في نفسه اوي ان الاسلاميين بقى ليهم دور في البلد عيييييييييييب

Unknown said...

ممكن يكون موضوع مفبرك للتشكيك لأننا لسه مانعرفش شكل الإستمارة الأصلية علشان نقارن أونحكم بالتسريب من عدمة

Unknown said...

لازم التعليق يتعرض ههههه هى المدونة دى متراقبة

xxx said...

يانوارة اسمعيني كويس انا كلمت واحد من مكتب النائب العام بيقول انو لازم
اللى معاه ورق من أى نوع يسلمه رسميا بعد صلاة الجمعه فى مكتب المستشار رئيس المحكمة فى المجمع ويكتب شكوى بكده وهيتحول طبيعى على النيابة

tahrir said...

يا ترى النظام القديم لهانا كلنا في الاستفتاء علشان يلقط انفاسه ؟

kobbara said...

أبلغ عن التجاوزات الإنتخابية
http://referendum.eg/report-forgery.html

Heba said...

فيها ايه لو نسخ وجدت على قارعة الطريق هل هذا يعني محاولات تزوير؟ يعني الواحد حيدخل اللجنة و في ايده 100 نسخة مثلا و يصوت بيهم و يحطهم في الصندوق و صوته يتحسب بمية صوت؟
صور البطاقات المشار اليها في الفيس بوك غير مختومة و من تعليمات الاستفتاء
http://referendum.eg/2011-03-13-00-11-35.html
عرفت ان الاستمارة لازم تكون مختومة بختم اللجنة الفرعية
و كمان ناس بتخوفنا و تقول الناس في المناطق الشعبية بتاخد رز و مكرونة في مقابل صورة البطاقة و دول نقولهم التصويت بأصل بطاقة الرقم القومي و ليس الصورة و امين اللجنة بيتأكد ان الشحط اللي حيصوت هو صاحب البطاقة

الخوف مش من نتيجة الاستفتاء و لا تزويره اثناء الفرز بقدر ما هو خوف من المرجفين اللي بيفتنوا الناس

د. هانى احمد said...

النسبه للصور.. عايزين واحد موثوق فيه يطلع عليها للتأكد انها موجوده فعلا مش شغل فوتوشوب.. لان فيه ناس تهدف لعمل بلبله وانشقاق واتهامات.. طب اللى ح يراقبوا الصناديق من حقهم طلب ان يكون الصندوق شفاف والفرز فى مكان اللجنه دون نقل الصندوق والفرز يكون علنى وليس سرى.. طب ممكن الورقه المزورة تستخدم ازاى؟؟

د. هانى احمد said...

بدال تم القضاء على امن الدوله الوسخ وفيه حريه حقيقيه.. اظن ده لازم ينتج عنه مواطن شجاع لايخاف من ابداء رأيه علنا.. يبقى فيها ايه لو يكتب كل واحد بخط ايده رقمه القومى على الورقه والجاهل يقوم القاضى بكتابة الرقم ويختم عليه... ممكن كده

د. هانى احمد said...

فيه حاجه خطيرة جدا وينبغى اتخاذ اجراء قانونى ضدها.. الاستاذ صبحى صالح امس فى القناه المصريه كان بيشرح للناس معنى نعم ومعنى لا.. والمفروض ان يكون محايد لانه عضو لجنة التعديل.. ولكنه كرر اكثر من مره ان اللى يقول لا يبقى مش عايز دستور جديد؟؟؟ ده كلام .. طبعا المحترم جدا المستشار طارق البشرى كان محايدا فى عرض شرحه ولم يوجه الناس مثل الاستاذ صبحى اللى كان اكبر خطأ ضمه للجنه لانه صاحب توجه سياسى واهو وضح تأثير ذلك عليه عمليا على الملأ

الوصيف خالد said...

نوارة أنا لسة مصر إن اللي يشكك فيكي يبقى مش فاهم حاجة.. بس انتي غلطانة بشكل بشع، ومادام مهتمة بالتزوير اللي هيعمله الجيش المتواطئ فياريت تحاولي تستفهمي من الجيش اللي بتحبيه ده القضاة ما جالهاش بيان بأماكنها ليه والاستمارات ببتسرب ليه وممدوح شاهين بيعتبر الناس بهايم وبيقول في التلفزيون إن الدستور معطل ويرجع في المصري اليوم يقول إن دستور 71 هيرجع ليه ؟

احترامي ليكي وأتمنى تراجعي موقفك..

بنت من الزمن ده said...

هو انا ينفع اروح اتفرج ع الفرز

د. هانى احمد said...

ايه حكايه القلم الصينى فى لجان الاستفتاء واللى من السهل ازالته وبعدين تزوير الصوت.. طب ما كل الاقلام دلوقتى صينى؟؟ ولا ده صينى تخصص استفتاء مصرى؟؟ طيب خد معاك قلمك الصينى برضه وتأكد انه لا يمكن ازالة حبره... ده ايه اللى احنا عايشيين فيه ده.. ده مش عايز ثورة واحده ده عايز عدة ثورات

أرنوب said...

اوعوا اوعوا اوعوا اوعوا الصناديق تتنقل من مكانها
اوعوا اوعوا اوعوا اوعوا الفرز يبقى سري
فرز سري يعني تزوير
نقل صناديق يعني تبديل الصناديق
......
لا داعي لكل هذه السخونة يا نوارتي
مافيش حد من مصلحته يزور الإستفتاء إهدي كده وماتضحكيش خلق الله عليكي

mlk84 said...

هل انت مطمئنه من الاحداث الاخيره الى الان لم يتم محاكمة اى احد من رموز النظام ولم يعلن اى حكم الى الان والمجلس العسكرى اعلن ان مبارك لن يحاكم امام محاكم عسكريه لماذا لا ندعوا الى مظاهره مليونيه الجمعه القادمه تحت عنوان الشعب يريد محاكمة النظام علنا ولماذا لا يتم الدعوه لعمل لجنة لحماية الثوره ممثله من كل فئات المجتمع ويكون لها متحدث اعلامى باسمها للضغط لتحقيق مطالب الثوره على فكره سمعت شائعه تقول ان الاقلام المستخدمه غدا فى الاستفتاء اقلام صينى يمحى حبرها بعد ساعه من التصويت بها نرجو التاكد من ذلك لماذا لا يتم الضغط لعمل لجنه قضاء مستقله لمحاكمة رموز الفساد لاسترداد اموال مصر ام ان الكل مشغول بالاستفتاء اعتقد ان هذا ما يريدونه

أقول ما قولشى said...

نوارةنبلغ مين لو لقينا تجاوزات لو فى نمرة عندك تعميليها بحيث الناس تكلمك عليها وابقى الغيها بعد الاستفتاء

hardway said...

نــــوارة....القلب و الــفـؤاد...
مع أنهم حاجة واحدة........
المهم ..في أيه..؟؟؟؟؟؟؟؟؟
عامله هيصة وزيطة.وتخويف وترهيب
و أوعو أوعو أوعو...........
و أوعو أوعو أوعو...........
وكاميرا في ايدك و الجوال في جيبك.....
والمطـواه مع البلطجية
يا نـوارة ...القلب والفؤاد...
..مع انهم حاجة واحدة
نتيجة الاستفتـــــــــــاء
نــــعــــم
لمــــــــاذا........... نـعــم
السؤال سهل الاجــــابة عليه
نحن من تطلقون علينا(الاغلبية الصامتة)
نحن ملايين ..ملايين..ملايين عارفة يعني ايه مــلايـيـن
اوعي تنسي تطلبي بلال فضل تاني يمكن يرد عليكي.............يمكن

MaHmOuD Swaidan said...

طيب انا بعتولى انى هاخد تفويض وكلمت استاذ وليد عبد الحليم قالى كلمنى بعد الساعه 4 عشان انت فى اسكندريه وهقولك ازاى تستلم التفويض بتاعك ولما كلمته مش بيرد على الموبايل

xxx said...

نوارة واحد بيقولي روح عند المحامي العام في اسيوط وقدم الورق ده حالا دلوقتي وقدم بلاغ ياريت تبلغيهم

أرنوب said...

للأسف .. للأسف .. للأسف
التعقيب المكتوب تحت إسم
Tears
صحيح تماماً وأوافق على كل حرف فيه
أقولها وقلبي يعتصره الألم والحسرة وخيبة الأمل

طبيب بيطري said...

يعني اصلا موضوع الاستمارة دي غباوة حتي لو اتعمل ختم او هنستفتي علي ورق ابيض ومش مختوم
كل واحد بالبطاقة ومرة واحدة يجيب ورقة بيضا ويكتب عليها رايه ويتمحي بعد 5 دقايق
دي اشتغلات بقي
الشك هيجنن الناس
ممكن الصندوق يبقي مخروم من تحت ومنفد ع الحمام كمان
اللي عنده استعداد يضحي بخمس سنين من عمره يزور ويعيش حياته ف الحربي
هو عيب يعني لما يتسجن 10 الاف ولا عشرين الف اهم يستغلوهم في زراعة الصحرا وببلاش كمان
الراجل وابن ابوه يدخل يزور ان ما الناس ظبطوه برا هيتظبط ف السجن الحربي

Shoukry said...

البسطويسي قال علي الجزيره ﺍن اهالي اسيوط وجدو عده صناديق مليئه بأوراق استفتاء قد تم ملئها ب"نعم"

يارا الحميلي said...

يوجد مخالفات. لا تواجد أمني بخارج المدرسة. عدد 2 ضابط شرطة داخل المدرسة. عدد 2 ضابط شرطة داخل المبنى و ضابط جيش و ضابط شرطة داخل اللجان. الست اللي بتسجل البطاقة كانت بتتعامل مع المواطنين بطريقة سيئة. و كثير من المواطنين لم يضعوا اصابعهم في الحبر الفسفوري. أنا حطيت ايدي فيه بس اختفى دلوقتي لوحده من غير حتى مية.