Monday 7 March 2011

امن الشعب/ والضحية الجديدة

تحديث:
تونس لغت امن الدولة... لا بقى.. هي تونس دي على طول جايبة فينا اجوان
احنا حنلغيه يعني حنلغيه.. ونعمله سندوتشات حلاوة بالقشطة
------------
عشان بس نقفل ملف امن الدولة المنحل
امن الدولة خلاص حليناه، مش لسه حنحله
حننضف مكان الازاز المتكسر ازاي؟ 
دلوقت انا اتكلمت مع بلال فضل امبارح وفهمت منه اكتر وجهة نظره اللي لخصها لي في المثال الآتي: لما يبقى عندك بيت حوى تعابين وعقارب وفيران، المفروض تقفلي البيت ده كويس لحد ما تسيطري على اللي فيه مش تهديه تقوم التعابين تسرح عليك
هو شايف اننا نقفل البيت على اللي  فيه، ونغير مهامه، وصفاته، وخصاله، وصلاحياته، واسمه، ومرجعياته
الجهاز ده كان بيخدم اسرائيل وامريكا، عشان هو البرنامج اللي نازل له كده - الكلام لسه لبلال - وهو كان بينفذ البرنامج، خلاص، نغير له البرنامج
انا شايفة اننا نوزعهم على اجهزة تانية، وماحدش يروح مع زميله، عشان بيبوظوا بعض، لما يروح في اجهزة اخرى وحواليه سياسة مختلفة حيتعود على النظام الجديد
بلال شايف ان ده ممكن يضر الاجهزة الاخرى ويخليه يحاول ينتقم من الجهاز اللي اتنقل له كله
طيب.. في كل الاحوال، الجهاز ده مش نافع ولازم يتحل، يا المبنى يتقفل ويتغير من بيت اشباح لفندق خمس نجوم، يا نوزع العفش اللي فيه على الفنادق اللي حواليه
وطبعا اكد على فكرة ان ماحدش منهم يتقبل منه استقالة لمدة خمس سنين.. وانا موافقة جدا، لحد ما نعصره ينزل اطفال احداث
الكلام دلوقت على بقى حننضف البيت اللي قفلناه ازاي
فيه كام حاجة عايزين نتفق عليها مع بعض، واللي مش حيتفق معانا.. ما يخافش، يعبر عن رأيه بكل شجاعة، واحنا حنعذبه ونخلي اللي ما يشتري يتفرج عليه... احنا عايزين نبقى ديمقراطيين
أولا: بالصلاة عالنبي.. كل الستات بيغيغوا مني مش عاغفة ليه؟ ماما وبابا عملوني عربي انا ذنبي ايه؟
مع متابعة الثورات العربية بشكل عام، والثورة المصرية بشكل خاص، عدم اللامؤاغزة احنا مش بنستلف برامج من حد
احنا الشعوب الوحيدة في العالم اللي بتنضف وتروق وتبيض بعد ما بتخلص ثورة، والليبيين كل ما يحرروا حتة ينضفوها، كأن الحكام العرب دول كانوا نجاسة واحنا بنغسل بلادنا منها عشان تقدر تصلي بقى
واحنا اول ناس نعمل حاجات كتير قوي، مسير كل شعب من الشعوب العربية الثائرة يكتب يوميات الثورات دي وحيلاقي اننا ناس جامدين قوي
ناس جامدين، ومش محتاجين نستلف موديلات من اي حد في الدنيا، احنا بالصلاة ع النبي اللي حنعمل موديلات ونسنجف بلادنا ونروق القناني ونعلم الدنيا بالدول اللي حنبنيها زي ما علمنا العالم بالثورات اللي عملناها
مش حنروح ناخد موديلات من دول ابتدت منحنى هبوطها واحنا اللي صاعدين، احنا بنخترع واحلى اختراعات ان شاء الله
ثانيا: مافيش حاجة اسمها ارهاب
خالص، ما عادش حد يجيب لنا السيرة دي، اللي بيقول ارهاب ده بني ادم ديموديه ومافيش حاجة اسمها اجهزة مكافحة الارهاب
الدنيا دي: افكار واقوال وافعال
الافكار عمرها ما تبقى جريمة، مهما كانت متخلفة، ولو حنحاسب على الافكار يبقى نيتشه ارهابي، لانه كان ملهم لهتلر، ما تقدرش تحمل نيتشه مسئولية فهم هتلر لفلسفته، هو فهمها كده، غيره حيفهمها بطريقة تانية... عشان دي اسمها افكار
الاقوال، فيه تعبير، وفيه خطاب كراهية، وتجريم خطاب الكراهية غباوة، لان ده معناه انك مش قادر ترد، وبتدي خطاب الكراهية اهمية ما يستحقهاش، ثانيا تعريف خطاب الكراهية يتراوح من ثقافة لثقافة بل ومن شخص لشخص ومن ظرف لظرف
يعني مثلا كلمة الاسلام السياسي دي تعد خطاب كراهية في الظرف الحالي لانها ارتبطت بخطاب يخدم على اهداف استعمارية لامريكا واهداف قمعية لواحد زي مبارك مثلا، وفي الحالة دي تنتقل من خانة خطاب الكراهية لخانة التحريض غير المباشر وحنخش في متاهات بقى
اللي عايز يقول حاجة يقولها... مدام ما ترتبش على كلامه افعال هو مسئول عنها، ومافيش انسان يتحاسب على فهم خاطئ لاشخاص تانيين عملوا افعال اجرامية بناء على فهمهم الخاطئ، والا لو حد مثلا راح قتل مبارك دلوقت يبقى احنا اللي قتلناه عشان قعدنا نقول له ارحل ارحل فهو فهم ارحل دي يعني موت؟ 
ومافيش حاجة اسمها تحريض غير مباشر، فيه حاجة اسمها تحريض بجد، يعني انت جبت حد وقلت له ولع في نوارة وانا اجوزك بنتي ولا ادفع لك سبعين جنيه خمسات
طبعا انا مش باتكلم قانون دلوقت، قوانين السب والقذف وافشاء الاسرار العسكرية والحاجات دي تخصص القانونيين، ماليش فيها انا، انا باتكلم على الجزئية اللي كان بيتكلم فيها امن الدولة واللي مالهاش اي علاقة بالقانون خالص: خطاب تحريضي، خطاب إثاري، زعزعة الامن، ارهاب فكري، اللعب في اساس الدولة والكلام اللي مالوش راس من رجلين ده ومالوش اي سند ولا مرجعية قانونية
البند ده يتلغي خالص، مش من امن الدولة المنحل بس، من الكون كله، واحنا بالصلاة ع النبي اللي حنعلم العالم ما يتكلمش الكلام الفارغ ده تاني
الافعال: يا اما قانونية، يا اما خارجة عن القانون، الخارج عن القانون اختصاص القسم بتاعه، الجريمة جريمة، وتتعامل على انها جريمة، مافيش جريمة بشرطة اسمها الارهاب، عشان مكافحة الارهاب دي بتتجاوز مكافحة الجريمة لمكافحة الافكار واحنا مالناش فيه الكلام ده
ثم احنا ما عندناش ارهاب، ما اللي فجر الكنيسة واللي فجر شرم الشيخ كان امن الدولة المنحل.. احنا مالنا احنا؟
ماحدش لا يكلمنا عن الامن والامان، ولا يكلمنا عن الاستقرار، ولا عن الارهاب.. اللي كان بيزعزع الامن هي الشرطة، واللي كان بيهدد الاستقرار هم رجال الاعمال الحرامية، واللي كان بيعمل الارهاب هو امن الدولة المنحل
يبقى اييييه؟
يبقى محتاجين حاجة اسمها
1- امن الشعب
2- شغلتها تحمي امن الشعب من العناصر الفاسدة في الشرطة اللي بتزعزع الامن وتعتدي على المواطنين، وتراقب رجال الاعمال الحرامية اللي بيهددوا الاستقرار، وتطارد فلول امن الدولة المنحل المتورطين في الارهاب
3- زي ما اقترحت نعمل ميثاق لمبادئ الثورة واهدافها بما يخدم مصالح الشعب، السلطة للشعب، وشوفوا بقى، يا يبقى هو الدستور الجديد، يا يبقى ميثاق منفصل الناس تصوت عليه ونديه لبتوع امن الشعب دول ونقول لهم شغلتكم تنفذوا ده 
امن الدولة المنحل كان شغلته يراقب ويعتقل ويعذب اي حد مناوئ للنظام
لا بقى، امن الشعب شغلته يراقب الناس اللي مناصب قيادية وفي ايدها صناعة القرار عشان يطلع منهم المناوئ لارادة الشعب واهداف الثورة.. ويسلمه للقانون. 
عارفة انا حتموته تعذبوا حد
معلش.. حنجيب لكل واحد فيكم مخدة يضربها
مافيش مراقبة على مواطنين تاني، الرقابة تبقى على صناع القرار واللي في موقع مسئولية، لصالح الشعب ومبادئ الثورة ودستور الشعب اللي حيصوت عليه مادة مادة ويوافق عليه
ولازم يبقى فيه ترابط ما بين ثقافة الشعب وعقيدة الجيش وبقية اجهزة الدولة خاصة جهاز امن الشعب
ما ينفعش تبقى ثقافة الشعب بتكره اسرائيل وامريكا، وعقيدة الجيش اللي بتدرس في الحربية: اسرائيل هي العدو، وامريكا بتكره الجيش، وجهاز امن الدولة المنحل بيتعاون مع اسرائيل وامريكا ضد الشعب.. دي خيانة عظمى
حد يفهمهم ان اسرائيل وحشة، وامريكا وحشة، واحنا حلوين، وما يعملوش فتنة طائفية تاني دي حاجة غلط كده
في كل الاحوال
اذا كنتوا حتوزعوا عناصر امن الدولة المنحل غير المتورطة في جرائم على بقية الاجهزة، تفهموهم ان الشعب حلو وامريكا واسرائيل وحشين
اذا كنتوا حتحولوا بيت الاشباح لفندق خمس نجوم ويتحول امن الدولة المنحل الى امن الشعب وحماية الثورة تفهموهم برضه ان الشعب حلو وامريكا واسرائيل وحشين والناس اللي في موقع المسئولية وصناعة القرار دول شغلتهم خدامين للشعب، من النهاردة مافيش باشا، الشعب هو الباشا، الشعب هو الباشا
مش احنا كنا عايزين جهاز لحماية الثورة؟ خلاص.. نقلب الشراب ويتحول لجهاز حماية الثورة او جهاز امن الشعب
انا مقدرة ان الناس حتقول لي دول مجرمين، دول حيحموا الثورة؟
طيب، هم جزء منهم مجرمين قوي لازم حيتحاكموا، وجزء منهم مجرم كاجوال حيدخل في نطاق العفو العام، هو مجرم عشان متبرمج على برنامج اجرام، نبرمجه على برنامج الثورة، وحيبقى مجرم برضه في حماية البرنامج اللي نازل له.. اصل اوفر قوي السلمية اللي احنا فيها
ده اقتراح فيه بناء على اقتراح بلال 
ولو ان انا بشكل شخصي، احب انهم يتوزعوا على اجهزة اخرى ومافيش واحد فيهم يبقى بيشتغل مع زميله، زي الفصل الفاشل، كل واحد فيهم يتوزع على بقية الفصول عشان يتعلم الادب من اللي حواليه، لان برضه قعدتهم مع بعض بتعلمهم قلة الادب
في كل الاحوال... جهاز امن الدولة اتحل خلاص... ده الواقع
احنا حليناه
we are the bad cop
وعذبناهم
دلوقت هم اتحولوا من جهاز، الى مجموعة من البلطجية، وفي ايدينا نفضل نعذبهم لحد ما نقضي على شأفتهم
مطروح قدام فلول امن الدولة التفاوض مع
the good cop 
اللي زي بلال وناس كتير من رأي بلال، حياخدوهم في اودة تانية، ويفتحوا لهم التكييف، ويجيبوا لهم شاي وكيك ويقولوا لهم: ساعدني عشان اقدر اساعدك.. ده انا حايش فرج عنك بالعافية
يجيبوا هم بالراحة كده كل المستندات اللي ضد الشعب، وينضموا الى "التائبين العائدين"
اه.. بلال
the good cop
حيسميهم "الشرفاء"
انا
the bad cop
حاسميهم التائبين العائدين
ويمضوا على الاعترافات اللي احنا عايزينهم يمضوا عليها واحنا حنعتبرهم شهود، وحنشوف لهم شغلانة شريفة، بس حيشتغلوا عملاء للشعب، سوا بقى يشتغلوا عملاء للشعب باننا نوزعهم في الاجهزة المختلفة مدام مدمنين تجسس كده
او نعمل لهم جهاز مخصوص للعمالة لصالح الشعب.. اذا كان ضروري عمالة يعني
واوعى يفتكروا اننا حنغفل عنهم، فرج لسه موجود.. 
وبالمناسبة بقى.. كنيسة اطفييييح... اللي انتوا هديتوها.. والناس اللي زقيتوهم يصلوا الفجر فيها.. حتتبني تاني في مكانها، على حسابكم، والمسلمين حيروحوا ان شاء الله يحطوا حجر الاسااااس، وانتوا واللي زقيتوهم حتتشأمظوا
كفاية نجاسة بجى
هي مديرية امن حلوان منين؟
-----------------------
انا مش فاهمة الجيش، الناس نفسها الجيش يطلع لها بيان عسكري مرقم واللي يقوله واحد لابس بدلة ظابط، ويبنوا لهم الكنيسة مكانها
ما يعملوا لهم اللي هم عايزينه
اهو في الموضوع ده البطئ ما ينفعش يا باشا.... انجز
ومش فاهمة التلفزيون، بيقول مظاهرات اقباط، وفيه نسبة محجبات ومنقبات وملتحين رافعين مصاحف وصلبان في المظاهرة كبيرة قوي
ليه بيقول مظاهرة اقباط؟
عموما عصام شرف اتكلم معاهم وقال لهم الكنيسة حتتبني مكانها والجيش بيتعهد بملاحقة المجرمين اللي عملوا كده
سواء اللي هدوا الكنيسة، او اللي عملوا مكانها مسجد ضرار وراحوا فيه صلاة مش مقبولة ان شاء الله
مافيش امن دولة حيتقبل له صلاة طول ما حاله نجس كده
الناس في المظاهرة يا عيني قعدوا يقولوا تحيا مصر وفرحوا
انما الجيش يعني سهل يفرق اللي اغتصبوا الكنيسة، هو مافيش عصيان كهربائية ولا ذخيرة في الهوا في حلوان ولا ايه؟ ولا دي بس عشان المتظاهرين ولا يتم استخدامها ضد امن الدولة؟ 
يعني نروح احنا نفضهم ولا ايه؟
باقول قلتوا لي امن دولة حلوان فيييين يا جدعااااان، الظاهر لسه عندنا شغل
اخر يابني 
the good cop 
شوية
منكم لله، مش عارفين ننام احنا
وبعدين غباوة كمان؟ ماحدش بيتكلم عن فتنة طائفية خالص، المظاهرة قدام التلفزيون مليانة سلفيين بالتحديد
واكتر مواقع الاقباط تشددا بتتهم امن الدولة
وجربتوها قبل كده اكتر من مرة وما نفعتش... هو انتوا حافظين مش فاهمين يا امن الدولة؟ 
طب الجيش حيتدخل الليلة يا عمدة ويخلصنا من وجع الدماغ ده ولا نروح احنا بكرة الصبح بدري؟ 
------------------------------
الضحية الجديدة حتبقى المجلس الرئاسي
مين اللي قال ان المجلس العسكري مش موافق عليه؟ 
زياد قال المجلس العسكري ما ردش
مش ممكن بعد العشرة دي لسه مش عارفين المجلس العسكري، المجلس العسكري الآه بتاعته آه، واللأ لأ.. لما بيسكت يبقى بيقول: انتوا وشطارتكوا.. لو اقنعتوا الناس بيه يبقى على خيرة الله
ده حتى واضح يعني ومش مراوغ في اي حاجة

32 comments:

Anonymous said...

ياشعب مصر,ألثورة,روحها دستور جديد,قبل أية انتخابات,رئاسية كانت,أم تشريعية.صوتوا بالرفض للتعديلات الدستورية.لا للترقيعات الدستورية.دستور جديد,بجمعية تأسيسية منتخبة من الشعب.دستور الحرية والعدالة الاجتماعية.دستور من الشعب للشعب

Anonymous said...

لشهدائنا الغاليين,لن تذهب أرواحكم هباء:دستور جديد بجمعية تأسيسية منتخبة من الشعب-حل أمن الدولة-حل حزب الفساد والكفر الصهيونى-محاكمة رؤوس الفساد-إعادة تأهيل الشرطة ووزير مدنى لها-تغيير كل المحليات

Unknown said...

عاملة ايه يا نوارة
اخبار عمرو ايه؟

ممكن اقول رأيي من غير اعتقالات؟.
امن الهباب ده مينفعش يتقفل و لا يتوزع
ده يتطبق عليه القانون
يعني واحد عذب ابرياء ياخد سجن مشدد
و اللي قتل يتعدم
و الجهاز كله يتجاب و يتحاكم
و يتحط علي كشوف الممنوعين من السفر
و ده سهل اوي
قررورا مدير الجهاز و هو يطلعلكم اسماء كل اللي شغالين معاه نفر نفر

و بعد التحقيق كل واحد ياخد جزاؤه حسب جريمته

انما واحد بيعذب اطفال اشغله في مكان تاني مينفعش

لان دا مختل عقليا و مكانه في عنبر الخطيرين جدا مع اكلي لحوم البشر

NAGWA said...

اختشي أختشي امى بتسلم عليكي وبتقلك واحده واحده
منكن اعمل Concept of speech
1.إعادة توزيع الضباط دول على اجهزة لايوجد فيها تعامل مباشر مع الجمهور
أقتراحي : مابدل ما نعملهم كدا بس طالما خايفين منهم لأنهم ساديين مش بس بالتعود نعملهم تأهيل نفسي يا أوختشي
2.نقفل المباني بتعتهم
رأيي: تعتقدي لو قفلنا مبانيهم أو هدناها هننسى اللى كان ؟
طيب
نقول كمان
ممكن تبقى المباني الخاصة باجهزة الشرطة تحت إشراف القضاء من حيث أنو ميكنش فيها سراديب ولا بتنجان


تفتكروا اللي بيقولوا انتم صغننين ومشفتوش صلاح نصر والناس دي وشايفين أمن الزفته دول عجبه بيعايبوا علينا يعنى يترد عليهم إزاي؟؟؟؟؟
أنا رديت وقلتلهم اتلهوا صلاح نصر كان في مرحلة القرن الماضي مفترض القرن المزفت دا اللي أحنا فيه ميكنش كدا

نواره
خلاصته
الضباط كلللللللللللهم أمن دوله ام شرطة لازمهم برنامج تأهيل يفصلوا بعده بين معاملة المجرم والمحترم عشان هما عندهم شيزوفرينيا يا امى
وسلامتك

rahrom said...

يلبنتى حد يكلم عصام شرف على البلاوى اللى موجودة دى هو فيه ايه مصر خلاص مافيهاش غير سيد مشعل والباقيات غير الصالحات دول ارجوكى شوفي لنا ايه حكاية اضراب الظباط دى هو محموء وجدى مالقاش فايدة قام محرضهم على اضراب علشان الشارع يفضل كدة ويفشل جهود الوزير الجديد لازم حد يلمهم بقى وكمان التلفزيون المصرى الفضيحة ده لسة زى ما هو بالظبط ايه الحقارة دى ارجوكى مخمخيلنا كدة واحنا معاكى وياريت تكلميلنا حد من اللى بيتحركوا ونتحرك كلنا احسن الواحد قرب يياس من حياته

Rowaa said...

عفارم عليكى يا نوارة عاجبنى جدا فكرة امن الشعب وان تكون الرقابة على من يخدم الشعب وليس العكس
وان كنت متخوفة جدا من كل من كانوا فى امن الدولة المنحل خاصة الذين اشتركوا فى التعذيب و كانوا يعتدون على اعراض المعتقلين، بصراحة من وصل لهذا التردى لابد من حبسة ومعاقبته
دول خطر تواجدهم مطلوقين وسط المجتمع

Hesham Elshipli said...

على فكرة انا بحترم رأيك جدا
لكن انا شايف ان
جهاز أمن الحاكم أو رعب الدولة السابق
لا يجب حله تماما

أنا عارف كويس جدا انه جهاز قذر جدا
لكن خلى بالك من نداء الجيش بعدم الاحتفاظ بوثائق امن الدولة

صحيح فيه حاجات ضدهم
ولكن أكيد فيه معلومات تانية عن ناشطين أجانب وناشطين من الشيعة يعملون على نشر المذهب الشيعى

القذر الملعون فى مصر
قلوب الشيعة تحترق لان مصر كانت شيعية ايام الفاطميين

واصبحت سنية فى عصر
صلاح الدين الايوبى

اذن يجب ان نفهم موقف الجيش
ورغبته فى احتواء امن الدولة مؤقتا

ملحوظة

بالنسبة لاعدام وثائق امن الدولة
لو تلاحظى هتلاقى ان كلها مكتوبة كمبيوتر

يعنى الاصول كلها موجودة هنا ولا هنا

يعنى ممكن تكون ملايين الوثائق موجودة على دى فى دى
فى مكان ما مع شخص ما

الجيش فاهم الكلام ده

كلمة اخيرة

عايز اقول ان البلد دى كانت واقفة على رجليها الفترة اللى فاتت بسبب ان في ناس كتير شرفاء موجودين

فى كل مؤسسات الدولة
واولا وأخيرا مصر فى حفظ الله

المهندس said...

معلش اسف يا نوارة ... وهو " الجود كوب " ... اللي هو الصحفي اللامع " بلال فضل " .. و " الباد كوب " اللي هو حضرتك ... معلش مش ليكم ثأر مع الجهاز ده ... انا عارف طبعا انكم كنتم محطوطين تحت رقابته ... وغالبا ليكم ملف كبيييير جدا هناك ... لكن انا اقصد ثأر بمعني تعدي عليكم بجريمة ... معلش انا اسف .
البشر الغلابة اللي اتعذبوا ,,,وذاقوا مالا يطيقه بشر علي ايدي زبانية ابليس ... عاوزين نقلهم ببالساهل كده ... خلاص احنا قررنا نعفو عن زبانية ابليس اللي عملوا فيكم كده ... وابقوا خدوا حقكم يوم القيامة ؟؟؟ ... بلاش انا هحكيلك حكاية ... في شاب كتير متدينين - والله متدينين مش ارهابيين ... والله ما بيستحملوا يشوفوا فرخة بتندبح - كانوا يصلوا في المسجد ... دي فيها حاجة ؟ عارفة اهاليهم كانوا ببيصوتوا كل ما العيل في دول يروح يصلي في الجامع ... خايفين الواد يتعمله ملف عند زبانية ابليس ومستقبله يضيع ... طيبب اقولك حاجة اكتر ... في شباب غصب عنهم - تحت تاثير الخوف - بطلوا يصلوا في المسجد .. وعشان هما مش مقتنعين غير بالصلاة هناك ... بطلوا صلاة ... والله العظيم ... بطلوا صلاة ... دول ذنبهم في رقبة ميييين ؟؟؟ طبعا انا عارف دي مش جريمة ذات توصيف قانوني ... لكن انا باضرب مثال علي انه مينفعش نقولهم اذهبوا فانتم الطلقاء ... وبرضه مش هقولك يتحاكموا محاكمة عادلة .. ويعدموا - مع اني والله العظيم نفسي جدا اقولها - .. ولكن تتعمل لجنة قضائية ... وكل من تورط في جرائم تعذيب .. وهتك اعراض ... وبلاوي متلتلة من اللي انت عارفاها ... يتحاسبب قاونيا ... اللي ياخد اعدام .. واللي 25 سنة ... واللي 15 .. لحد الاقالة والايقاف من العمل ... واللي معلهوش حاجة - وده صعب - .. اصل معلهوش حاجة كانوا مخليينه هناك ليه ؟؟ يكمل او لو حب يتقاعد وياخد معاشه زي بقية مخاليق ربنا .
لكن النظر ان مصر خلالالاص فضيت علي دول هما اللي هيحموا الثورة ؟؟؟عشان نعمل زي ثورة يوليو .. لما احتفظت بالقلم السياسي ... عشان تحارب بيه اعداء الثورة ... فبعد شوية بقيت اسوأ من جلاديها .... لالالالا ... الابالسة لا يتحولونن لملائكة ... ولا بشر حتي ... انتي عمرك شفتي شياطن اتحول لبشر ؟
بصي ... انا عارف انه ممكن تكون في جهات عاوزة تحميهم ... وتدافع عنهم ...- وربنا ان شاء الله هيخيب ظنهم - لكن حتي لو نجحوا ميقوش اخدوا الصك مننا احنا ...انا عن نفسي ... مش مسامح في حقي كمصري علي اللي عمله الجهاز ده ... ده كان يخلي الناس مش عاوزة تقتنع بسوء اللي هيا فيه من كتر خوفه لينكل بيهم
انا قلت رايي ... ومستعد اقدم نفسي طائعا مختارا لجهاز امن الدولة بتاع الثوار ... علي فكرة انا باحب اشرب كابتشينوا ..مش شاي
ملحوظة :- انتي عرفتي انهم لقيوا صور حديثة لميدان التحرير في مقر امن الدولة ترجع ليوم الخميس تقريبا ... يعني ... " يموت الزمار وصوابعه بتلع " ... وايه ذنب وائل غنيم ... وشباب الثورة يلزقوا فيهم كل بلوي في الدننيا .. بدءا منن .... وانتهاءا بـ .... , وايه ذنبهم المسيحيين اللي عاوزين يوقعوهم في المسلمين ... وايه ذنب المسلمين يحاولوا يطلعوهم في الصورة الوحشة دي بعد ما شفنا المسلمين والمسيحيين الاصليين في ميدان التحرير, واظن شفتي اليوم السابع نشر وثيقة " متلفقة " عملها مؤامرة كونية لاشعال الثورة في مصر ... جاب فيها امريكا ومجموعة ال 8 واسرائيل وايران وحزب الله ودول الاتحاد الاوروببي وحماس والاخوان ... كان ناقص يقول عملاء كوكب " بلغور " مشتركين فيها ... وتقوليلي هيتعدلوااااااا ؟؟؟؟
شكرا.. واسف جداااا علي الاطالة.. والسلام عليكم

Perfection Seeker said...

نوارة شفتي خبر الشرطة اللي عاملين اضراب عام الا لما الشعب يعتذر بصوت عالي
http://youm7.com/News.asp?NewsID=365026
هو احنا هنتذل منهم و لا ايه؟ لو تعرفي توصلي لحد في الداخلية و لا في رئاسة الوزرا شوفي اساس الخبر ده احسن انا هتشل

hossam said...

1-اشمعنى تونس عملوا عفو تشريعى عام
2-اشمعنى تونس هيعملوا لجنة تاسيسية لوضع دستور جديد
3-اشمعنى تونس حلوا الحزب الحاكم
4-اشمعنى تونس الغوا وليس هيكلوا امن الدولة
5- اشمعنى تونس طلبوا رسميا من السعودية ان تسلمهم بن على

hossam said...

اشمعنى تونس عملوا عفو تشريعى عام
2-اشمعنى تونس هيعملوا لجنة تاسيسية لوضع دستور جديد
3-اشمعنى تونس حلوا الحزب الحاكم
4-اشمعنى تونس الغوا وليس هيكلوا امن الدولة
5- اشمعنى تونس طلبوا رسميا من السعودية ان تسلمهم بن على

hossam said...

اشمعنى تونس عملوا عفو تشريعى عام
2-اشمعنى تونس هيعملوا لجنة تاسيسية لوضع دستور جديد
3-اشمعنى تونس حلوا الحزب الحاكم
4-اشمعنى تونس الغوا وليس هيكلوا امن الدولة
5- اشمعنى تونس طلبوا رسميا من السعودية ان تسلمهم بن على

rahrom said...

انا مع رفض التعديلات وكمان مع محاكمة سفاحين امن الدولة لان ربنا اللى خلقهم اعلم لما قال قتل القاتل والقصاص من المفسدين فى الارض وقتلهم او قطع ايديهم وارجلهم من خلاف (الا يعلم من خلق وهو اللطيف الخبير)
ربنا بيقول اللى بيعمل الحاجات دى مالوش غير القتل يعنى من الاخر مالوش اصلاح ازاى يعنى واحد قعد طول عمره سفاح لغاية ما بقى التعذيب والقتل عنده هواية ييجى فجاة ويتصلح او يتعامل عادى مع الناس وظباط ايه اللى نعتذرلهم مش كفاية بنقوللهم انزلوا وخلاص هانحاول نبص فى وشكم قوليلنا نعمل ايه ياابلتى

Unknown said...

- جرد بأسامي جميع العاملين بجهاز امن الدولة من اول بتاع البوفيه لأكبر القيادات
- الجرد ده مسئولية وزارة الداخلية

- محاكمة الجميع محاكمة عادلة و مفيش عفو و الكلام الحمصي ده عشان الناس تعرف السلبية و الجبن و التواطؤ اخرتهم اية

- اللي حيفضل منهم و ده طبعا قليل جدا ميجووش عشرة حمستاشر واحد يتعملهم برنامج اعادة تأهيل و ده نفس البرنامج اللي يتعمل لبقية عناصر الشرطة و الداخلية كلها ....برنامج المبدأ الاساسي فيه الشعب هو السيد... بجد ده مش تنطييط


و بعدين فكك من امن الدولة دلوقتي احنا ناسيين الدستور الجديد و المجلس الرئاسي والاستفتاء و شكلنا كده حنلبس

هو ده المهم دلوقتي

Omadham said...

السلام عليكم و رحمة الله و بركاته
نقلا عن صحيفة البديل
http://elbadil.net
هيثم أبو خليل : أمن الدولة صانع الثورة !
لا أبالغ إن قلت أن جهاز أمن الدولة كان من أحد أسباب قيام و نجاح ثورة 25 يناير ..وحتى لا يتهمني البعض بالمبالغة بل فلابد أن أقدم دفوعي لها الإدعاء الخطير فأنا اعتقد أن شعب مصر كان صابراً محتسباً علي إفقاره بل وصبر علي الظلم أكثر ..فما الذي أختلف في 25 يناير عن عشرات السنين ظن فيها البعض أن المصريين استعذبوا الفقر والقهر والظلم وأصبحوا لا يستطيعون العيش بدونه …!

هنا أجزم أن الغرور والانتفاخ الذي أصاب هذا الجهاز الأخطبوطي والذي سيطر علي كل مؤسسات ومقدرات مصر تحت دعوي حماية أمن الدولة وهو في الحقيقة كان يحمي أمن النظام وأمن الفاسدين الذين أنتشر بعضهم داخل مفاصل هذا الجهاز الخطير ..

لقد كان جهاز أمن الدولة الراعي الرسمي للظلم الفاقع البين والفساد العظيم المستشري في بلادنا ..

أمن الدولة يا سادة خلاف إشرافه علي جميع السجون وأقسام الشرطة وجميع المعتقلات وسلخانات التعذيب الموجودة في مقاره ومسئوليته المباشرة عن ما وقع فيها من تعذيب يفوق ما حدث في العصور الوسطي إلا أنه كان الذراع القريبة الحقيقية لتنفيذ الفساد في بر مصر كله فمؤسسات الرئاسة وبعض الجهات السيادية يدها لا تطول الكثير من المناطق المؤثرة في مصر ومع هيمنة أمن الدولة علي جميع فروع وزارة الداخلية بسط أمن الدولة سيطرته وسطوته علي كل شبر في مصر .. حتي أصبح مخبر أو أمين شرطة في هذا الجهاز أقوي من رئيس مجلس إدارة مؤسسة أو شركة بل أقوي من لواء شرطة في إدارة أخري من إدارات وزارة الداخلية فتقارير أمن الدولة طريقها مفتوح في كل أنحاء مصر لتطيح بمن تشاء بدم بارد فلا مكان للكفاءة والأمانة والإبداع الفيصل هو رضاء هذا الجهاز عن الشخصيات المرشحة في أي منصب في مصر حتي ولو كان شياخة حارة في نجع من نجوع الصعيد الجواني ..!

تسأل عن التعيينات في قطاع البترول والبنوك والشركات الكبيرة فيقال لك عن طريق أمن الدولة ..

تسأل عن هدم الفيلات والبناء المخالف في أماكن حيوية لا تخطئها عين الجهات المراقبة والمعنية فتعرف أن ثمة مسئول في أمن الدولة قد مر من هنا ..!

تسأل عن التعديات الصارخة علي حرم النيل فتعلم أن مسئول من أمن الدولة يحمي المتعدين ..!

تسأل عن تجفيف بحيرة مريوط وبعض المنشئات السياحية المقامة في منتصف البحيرة فيقال لك صاحبها مشارك قيادات في أمن الدولة

تسأل عن العمادة في الجامعات ورئاسة الأقسام والترقيات فيقال لك هذا شغل أمن الدولة

تسأل عن سرعة الترخيص لمشروع أو مصنع أو تعطيله وإلغاءه فيقال لك أمن الدولة

تسأل عن سيارة مخالفة بدون أرقام فيقال لك أمن الدولة

تسأل عن التستر علي قيادات فاسدة رغم نشاطها الواسع وفسادها البجح فيقال لك امن الدولة

تسأل عن تجميد النقابات والتستر علي فساد القائمين علي حراستها فيقال لك أمن الدولة

تسأل عن التزوير في الانتخابات في كل بر مصر فيقال لك أمن الدولة

تسأل عن اضطهاد النابغين وملاحقة العلماء فيقال لك أمن الدولة

تسأل عن ضرب المعارضين وإلقائهم في الصحراء فيقال لك أمن الدولة

تسأل عن التنصت والتجسس علي المواطنين فيقال لك أمن الدولة ..

تسأل عن صعود الأفاقين والفاسدين في غالبية مؤسسات مصر و انزواء الشرفاء الجادين فيقال لك أمن الدولة

تسأل عن الأحزاب الكرتونية وشخصيات معروفة بعينها لتفخيخ الأحزاب الجادة فيقال لك أمن الدولة

تسأل عن الشلل الذي أصاب منظمات المجتمع المدني من جمعيات أهلية ونوادي ومنظمات حقوقية فيقال لك أمن الدولة ..

تسأل عن إسهال قرارات الاعتقال وضرب عرض الحائط بقرارات الإفراج فيقال لك أمن الدولة

تسأل عن شخص مغرور يتعامل مع الناس بعنجهية وقلة ذوق فيقال لك أمن دولة

تسأل عن الوجوه الإعلامية القبيحة فيقال لك امن الدولة

تسأل عن اضطهاد القوي السياسية المحترمة من إخوان مسلمين و6 إبريل وكفاية وغيرهم فيقال لك أمن الدولة

تسأل عن حجب صحف وغلق مواقع وهدم مدارس ومستشفيات فيقال لك أمن الدولة

تسأل عن قتلي ومصابين بعاهات مستديمة وتقارير الطب الشرعي تقول إنها وفاة طبيعية فيقال لك أمن الدولة

تسأل عن التستر عن الزبانية والجلادين والمجرمين القاتلين من وزارة الداخلية فيقال لك أمن الدولة

أخيراً … آلا يكفي كل ما سبق أن يجهز جيش من المظلومين والمقهورين ظلمهم هذا الجهاز اللعين ليكونوا نواه لثورة 25 يناير ..

لقد أطلق الشباب الشرارة بجرأتهم ودون حسابات فتلقفتها مصر كلها عن بكرة أبيها لأن أمن الدولة مهد الطريق … ربما كان حرق بوعزيزي ألهم الشعب التونسي فتفجرت الثورة..

لكن جهاز أمن الدولة أحرق قلوب ونفوس ملايين المصريين ظلماً وفساداً واعتقالا وقتلاً فكانت الثورة ..

لا أجد ما أختم به هذا المقال إلا ..شكراً أمن الدولة ..!!

الجبرتوته said...

اخطر حاجه يا نواره ان يبقي فيه حد مخصوص لحمايه الثوره لان التاريخ بيقول انه هيدمرها وهيبعد بيها عن اهدافها احنا مش عايزين اي حد يحمي اهداف الثوره من الامن اهداف الثوره هيحميها الشعب و الدستور والحياه البرلمانيه والممارسه السياسيه وزيادة الوعي عند الناس غير كدا هبقي خطر علي الثوره كل اللي ارتكبوا الجرايم بعد الثوره الفرنسيه ارتكبوها بحجه حماية اهداف الثوره وحتي ثورة يوليو كل القمع اللي حصل بعدها كان بدعوي حماية الثوره امن الدوله او امن الشعب وطيفته يأمن الشعب وبس مالوش دعوه بالثوره والحقيقه انا عندي اقتراح لو عجبك قوليلي لو سمحتي
انا اتمني ان ينِشأ مجلس للأمن القومي يضم المخابرات العامه وأمن الشعب زي ما بتسميه ورئيسه يكون بدرجة وزير ويتحدد بقانون يصدر عن البرلمان قانون يحدد اطار عملهم وبعد الغاء حالة الطوارئ طبيعي مش هيكون فيه قبض بدون اذن نيابه والمجلس ده يخضع للتفتيش الدوري من لجنه مشتركه من القضاء والبرلمان نظرا لحساسيه عمله المتعلق بأمن الوطن وحتي نضمن الرقابه القضائيه والشعبيه عليه
يا ريت تردي عليا ايه رايك في الاقتراح

Anonymous said...

الأفكار اللي ناقشتيها هايلة بس في شوية ملاحظات عندي
- طالما أمن الدولة هيعاد هيكلته جذريا و تغيير أهدافه و أفكاره و توجهاته و الكلام البطيخي ده مع ازالة بؤر التعذيب و الفساد الواضحة جدا بحيث يحقق أمن الشعب ... فلازم اللي يمسكه حد من الجيش على الأقل دلوقتي عشان يعرفوا ينضفوه كويس
- الحاجة التانية هي عن المجلس الرئاسي طالما موقف الجيش زي ما قلتي يبقى الحكاية هينة : كل الجرايد المستقلة و الرسمية و الحزبية تنظم استطلا عات رأي على مواقعها و تشوف النتيجة ... و طبعا رأي الاحزاب و المجموعات المنظمة معروف ..يتفضل القطاع اللي مالهوش في النت و لا في الأحزاب و هنا نلجأ الى الجهاز الحاضر الغائب : مركز دعم و اتخاذ القرار يقولنا رأي الشارع المصري في المجلس الرئاسي بس يكون استطلاع بحق ربنا ..و جمعة التحرير تطالب بنفس المطلب مع شوية تحميس من القنوات الفضئية و الصحف و كتاب المقالات بايجابيات فكرة المجلس الرئاسي ... عشان على بلاطة كدة الجيش بيتأنف و بيقول مش عايز يطول الفترة الانتقالية عشان ما يتقلش انه نفسه في السلطة و الناس عايزة تطولها عشان مافيش غير الجيش اللي الناس واثقة فيه ... فالحل الموضوعي هو الجمع بين الفكرتين و هي المجلس الرئاسي
-أهم حاجة بقى في نظري و اللي احنا لغاية دلوقتي مش مركزين عليها قوي أو على الأقل في الاعلام هي التعديلات الدستورية و هتكون ضمن الدستور الساقط ولا ستوضع في دستور مؤقت ... و حاجة صغنونة ايه اللي هيحصل لو المصريين صوتوا بالرفض على التعديلات ؟؟ هيبقى موقف المجلس الغسكري زي الزفت و ده اللي لازم نضغط بيه اما لتغيير الدستور دلوقتي بالكامل يا اما توضع التعديلات في دستور انتقالي للفترة الانتقالية
و شكرا

unitedarab said...

حمدالله على سلامتك من موقعة امبارح..شوفى بقى ياريت تقرى الكومنت دة انا مش مبسوط من اللى حصل عند لازوغلى لان الجيش اتفئع واحنا ارهقناه بزيادة..واحنا كدة اتاكدنا من كلامك ان ديول الزفت القديم بتدخل وعايزة تولعها.. عايزين نتصرف بلؤم شوية وبلاش الدهولة اللى احنا فيها ديه
..
تونس مش كسبانة انا عندى صديقة تونسية بكلمها على طول وبتأكد لى انهم غيرانين منا
هم ابتدوا الماتش قبلنا يجى شهر ومع ذلك لحقناهم و كمان سبقنا بالدستور وهم لسسسسسه

فيه حاجة تانية موضوع الشيخ السلفى اللى قلتى عليه !!طب ليه بس نختلف تانى ما خلاص كلنا ايد واحدة ما الشيخ حسان طلع قال كل الجماعات الاسلامية ينسوا الخلافات التافهة ويتوحدوا, فيه ناس يا نور بتفهم غلط زى كومنت شوفته على كلامك كله اتهام للسلفيين بالخيانة..مع ان فيه شيوخ كتير اتنفخوا بجد من امن الدولة..الشيخ نشأت والشيخ فوزى السعيد والدكتور محمد عبدالمقصود
هكمل الكومنت الجاى

انا مبسوووووط موووووت ان ابتدا يبقى فيه توجه عربى لثورتنا وانشاء الله هو ده اللى هيخليها تستمر و تنجح وتدرس فى التاريخ..العرب مستنينا بجد ناخد بايديهم ونرجع زى زمان بقى

unitedarab said...

انا نسيييت اكتب حاجة ..مادام امن الدولة سماوى اوى كدة ما نسنخدمه برة مصر وخصوصا ضد اسرائيل ..و هما اولى:)

Unknown said...

يا نوارة الدنيا
خبث و اما الزبد فيذهب جفاءا و اما ما ينفع الناس فيمكث فى الارض
اكيد شوفت بعض الفديوهات و اكيد انت سمعت اكثر ده حاجة ميعرفش يأهلها الا عشماوى
كمان لسه معندناش عقوبة واضحة للتعذيب و دى لازم تتوضح فى القانون الجديد و جرائم الاعتداء البدنى و الجنسى والنفسى لها عقوبات
ده يمكن لو قتلته يستريح اللى بيخرج من عندهم لو خرج حى بيكن فى الحقيق مات فيه الانسانية
التأهيل للى لم يشترك فى حاجة زى دى و اعتقد ان ده خيال كلهم مجرمين


يا جماعة انا برضه مش عاوز اكون ممل
احنا كنا محكومين بعصابة و اى واحد خذ منصب بيكون عضو فى التشكيل العصابى و هو بدورة بيقرب اقرب ناس للتشكيل العصابى و اسوء ناس علشان تساعده فى جرائمه و تدارى عليه
دى نقطة بديهية

تروح تجيب واحد قريب من وزير الثقافة السابق يطلع اسوء منه وهيدارى على سرقة الاثار بتاعة سوزان وحواس و هيدارى على عقود الترميم الوهمية و يدارى ان ميزانية الاثار 0 الأن ده موضوع خطير
كنا عاوزين سكينة فؤاد او فاروق جويدة او استاذ من كلية آثار و و فيهم ناس محترمين
هنلاقى مليارات طلعت ممن وراء بيع الاثار دى
منقول من المصرين
( أحد أبرز رجال فاروق حسني ونظام مبارك وضلع في مثلث إفساد الثقافة المصرية .. دعوات للاعتصام أمام وزارة الثقافة لمنع عماد أبو غازي من عضوية حكومة الثورة

كتب : أحمد سعد البحيري (المصريون) | 07-03-2011 01:13

في تحدي صارخ لمشاعر ملايين المواطنين تم الإعلان أمس عن اختيار عماد أبو غازي ، أحد رجالات عصر الفساد والإفساد في نظام مبارك ليكون وزيرا لثقافة حكومة الثورة ، الأمر الذي أدى إلى ظهور دعوات للاحتشاد أمام وزارة الثقافة لمنع أعداء الثورة من أن يكون لهم وجود في حكومتها .

وكان عماد أبو غازي أحد أبرز مساعدي وزير الثقافة الأسبق فاروق حسني ، وهو يمثل الضلع الثالث في مثلث إفساد الحياة الثقافية في مصر ، مع فاروق حسني وجابر عصفور ، وقد عينه فاروق حسني في السنوات الأخيرة أمينا عاما للمجلس الأعلى للثقافة ، حيث كان أبو غازي يمثل دورا بارزا في عمليات توزيع جوائز الدولة التقديرية والتشجيعية وهي التي اتهمت على نطاق واسع بالفساد والبعد عن الشفافية واعتبار معيارية المجاملة ورضى الأجهزة الأمنية والرسمية عن أصحابها .(
و الرابطة دى
http://www.almesryoon.com/news.aspx?id=51096

أقول ما قولشى said...

نوارة لازم نتكلم اكتر عن التعديلات الدستورية ليه ماتعمليش ندوة مثلا يتكلم فيها بلال فضل او ابراهيم عيسى وتحدودلها مكان ووقت قبل 19 مارس الناس برده محتاجه تتكلم مع ناس بتفهم فكرى فى الموضوع

hassn hamdi said...

السلام عليكم يا نوارة:
في البداية عاوز أباركلك على القبض على وائل الكومي واطمئني.. سنقبض على باقي القتلة ونحن نتابعهم ولن نتركهم والأفضل لهم أن يسلموا أنفسهم وإلا ...
طبعا أولى الأولويات الآن هو موضوع "شربة" التعديلات الدستورية اللي عاوزين يشربوهالنا..لازم نحشد الناس على التصويت بالرفض ونتابع الاستفتاء واعلان النتيجة علشان ما يحصلش تزوير وبعد كده نضغط بكل قوتنا لإصدار إعلان دستوري ونقل المجلس العسكري صلاحياته وسلطاته كلها للمجلس الرئاسي والحكومة الانتقالية..
بالنسبة لموضوع أمن الدولة:
لكي نفصل في مسألة جهاز أمن الدولة لابد أن نجيب على السؤال التالي:
ما وظيفة ودور جهاز أمن الدولة بحكم القانون؟
هل مهمته حماية الأمن الداخلي لمصر؟ ضد من؟
ما هي صلاحيات وسلطات ضباط وأفراد الجهاز وضد من؟
هل جهاز أمن الدولة مهمته حماية الأمن الداخلي ضد عمليات التفجير والجريمة المنظمة والتجسس؟ فما دور المخابرات العامة إذاً؟
وثاني الأسئلة المهمة: كيف كانت ممارسات هذا الجهاز منذ انشائه والى الآن؟ ما العقيدة الشرطية التي كان يعمل بها هذا الجهاز؟ يعني: من هو "العدو" من وجهة نظر قيادات وأفراد هذا الجهاز؟
هل تدخل جهاز أمن الدولة مرة واحدة منذ إنشائه وكشف مخططا لإثارة الفتنة في البلاد او تهديد السلم الاجتماعي أو التجسس على البلاد أو تدمير اقتصادها أو أو؟
أعتقد أن كلنا يعرف أن هذا الجهاز القذر كان مهمته وأعماله تتمركز حول ما يلي:
- التجسس على معارضي النظام
-اثارة الفتنة وزعزعة الاستقرار في البلد
-التعذيب المنهجي للمواطنين
-القتل المنهجي لكل صاحب صوت شريف وحر، ولكل مواطن عادي لا يرضى عنه أحد أفراد هذا الجهاز (أنا نفسي تعرضت للضرب والاعتقال من أحد الضباط وتلفيق تهمة لي لا لشيء سوى أن "شكلي ما كانش عاجب البيه" ولأنني لم يعجبني "قلة أدب البيه" ولسانه الطويل فرددت له الصاع صاعين عندما قال لي أمك فقلت له ابوك واللي جابوك)
-حماية المفسدين والعملاء والجواسيس وسارقي ثروات الوطن
- التجسس على الحركات المقاومة لصالح اسرائيل وأمريكا
-تسهيل التجارة في المخدرات وتكوين جماعات متطرفة وارهابية لممارسة أعمال ارهابية لخدمة اغراض معينة
وغير ذلك الكثير مما يجعل هذا الجهاز من أخطر أعداء مصر
لهذا على كل من يطالب ببقاء هذا الجهاز أو اعادة هيكلته أن يطرح على نفسه هذا السؤال البسيط: هل تطالب ببقاء جهاز تقتصر مهمته على تخريب مصر؟
لدينا المخابرات العامة وجهاز الأمن القومي وهما يكفيان
وبالنسبة لضباط وأفراد الجهاز فأنا أرى أنهم جميعا ينقسمون الى صنفين لا ثالث لهما:
-قيادات وضباط وأفراد مارسوا القتل والتخريب والتجسس والإفساد في البلد وهؤلاء لابد أن يحاكموا محاكمة عادلة
-قيادات وافراد وضباط شئون ادارية وفنية واعمال كتابية، وهؤلاء وان كانوا شاركوا في الفساد بطريقة غير مباشرة، فيمكن توزيعهم على الجيش والشرطة والمخابرات لممارسة نفس الاعمال الكتابية والفنية والادارية تحت مراقبة صارمة
...
وبعد ذلك لابد يا نوارة أن نتكتل جميعا ونضغط للإفراج عن كافة المعتقلين السياسيين والغاء كافة الاحكام العسكرية سواء قبل 25 يناير أو بعده وتحويل جميع من تم القبض عليهم في الايام الاخيرة (سواء كانوا من النشطاء أو البلطجية أو غيرهم) للقضاء العادي ليفصل في امرهم (لا يجوز أن نطلب الجرية لعمرو البحيري ونهمل من اتهموا بالبلطجة والله أعلم إن كانوا ابرياء أم لا؛ أنا كنت ضابط في الجيش يا نوارة وعارف ان الواحد ممكن يتلفق له قضية عسكرية بسهولة ويتلب حكم أو حتى اعدام، مرة كنت هاخد اعدام بتهمة قيادة تمرد وانقلاب عسكري في الوحدة لأني رفضت الطعام السيء الذي كانوا يقدمونه لنا)
نحن نريد بناء دولةالقانون وليس دولة الفوضى والاستبداد...
ولابد أن نصر على محاكمة هذا الجهاز القذر وكشف كل ملفاته (وأقسم لكي لن تجدي فيها ملفا واحدا يهدد الأمن القومي لمصر.. لن نجد إلا فضائح وكوارث تكشف حجم المؤامرة التي كانت تتم بحق هذا البلد منذ عام 1975م) لكي نتخلص من كافة المتعاونين مع النظام البائد من رؤساء جامعات ومشايخ وقساوسة وفنانين وصحفيين ولواءات بالجيش والشرطة وجماعات دينية ونقابيين ومثقفين...
صدقيني تطهير البلد من هذا الجهاز وأدرانه أول وأهم خطوة على الطريق الصحيح..
وبالنسبة لزكريا عزمي ودوره جاليا سأذكرك فقط بجملة قالها شفيق المخلوع: المجلس العسكري هو الذي سيحدد دور اللواء عمر سليمان..
أعرف ان هذا خاص بعمر سليمان.. لكن كلنا نعرف ان الاثنين مرتبطين بجهاز الرئاسة وها هو شفيق يعترف بصراحة أن المجلس لا يرى أن الاثنين أجرما في حق البلد

Unknown said...

( كلاكيت الحكومة عاشر مرة

الطيران كمان بيقولوا شفيق باع طيارات مصر للطيران و مستأجر طيارات و ده بيعمل خسائر على المدى البعيد

و علشان كده اختار صديقه وزير الطيران الحالى علشان يدارى
يبقى مينفعش

يا جماعة سياسة الطاغية نجيب فاسدين علشان يداروا على الفساد و ميعملش شريف
و لو فيه واحد مسك موقع وطلع شريف لازم بيمشى و لا يستمر

فى كل مؤسسة او وزارة
اسوء واحد هو اللى بيدير و اللى بعده زيه و يمكن اسوء مينفعش نخدهم بالدور

نشيل وزير بترول نجيب تلميذه و زميله
ما ينفعش ممكن نجيب الدكتور (زهران )
او اى واحد بعيد عن التربيطة و يكون خبير و بيفهم

الاسكان ممكن ضاع خلاص و يتغطى على المليارات و ملفات الاراضى
مش هنعرف نطلع بلاويها
ده ( فتحى البردعى )عضو مجلس الشعب عن الوطنى يجى 20 سنة و محافظ دمياط 6 سنوات و ليه ملفات فساد وبلاوى يمسك ازاى وزارة مليانه فساد من 30 سنة
انا قرأت عنه كثير
يارباب اكون غلطان او حد ينفى او يؤكد المعلومات
و هو اختيار مبارك بعد الثورة

اببعدوا عن اختارات افراد العصابة لانهم مش هيقربوا منهم حد كويس

اسوء حد فى الاهرام اسامة سرايا و عبد المنعم السعيد و الثلاثة المرشحين دول مساعدين اسامة و زيه و يمكن اسوء لو بعدنا ممكن نلاقى الباقين كويسين

بلاش حاجة من ريحة المرحوم اذا كان تجوز عليهم الرحمة ودول مرحموش البلد

الله يخليكم بلاش وطنى
و لجنة السياسات
عاوزين
ناس لا من العصابة
و لا وكلاء عند العصابة

مصر لازم تنظف
مصر تستحق ناس افضل من دول

اللى يتولى منصب و فيه من هو افضل منه يبقى خان للامانة

ارجوكم مش كل حاجة تيجى ناقصة
نفسنا تكمل احلامنا بحكومة وطنية كفاءات و شريفة

يارب ولى امورنا خيارنا و لا تولى امورنا شرارنا

محمد نور الدين said...

أيتهاالنوارة، يا زغرودة الزمن الجميل

NO COMMENT

assour said...

كلام فل الفل و انا متفقة معاكي مية في المية غصب عن شلبوكة او برضاه، لكن الضمانة الاولى و الااخيرة هي القوانين التشريعية التي تسمح بهذا الهراء و بالقبض على الناس بالشبهات، و لابد للاسف من كتابة قوانين جديدة تماما بدل القوانين اللي من القانون الفرنسي ثم عهد الانجليز ثم بلاوي ناصر ثم مساخر السادات ثم بشاعة حسنى، القانون بتاعنا يناؤئ بعضه بعضه الاخر .
اما امن الدولة فلو فيه نظام ثواب و عقاب و اول ظابط يلطش مواطي بالقلم ياخد رفد يبقى انسي ان حد يعمل كده تاني.
يجب تعميم الكاميرات التليفزيونية في كل الاقسام و على كل العربات و في الشوارع كمان عشان اي شئ يبقى مكشوف و لا يمكن التلاعب به و كمان حماية للشرطي لو حد تطاول عليه.
المختصر عاوزين دستور نوفي و قوانين جديدة واضحة و ملخصة و لو عاوزين حل شافي لمشاكل الشرطة ادونا واحد وكيل نيابة هناك ليلا و نهارا يبقى خليتي ثلاث ارباع المشكل من اصله.
طولت عليكي لكن باحس بالحركة بتدب في البلد دي لما باقرا كلامك والانجاز و الحرحرة دي.
بالمناسبة انا محترمة جدا كلامك انتي و الاستاذة صافي على المسجد الضرار، عارفة لو المسلمين العاديين فاهمين روح الملة دي ما كانش عمر البلد اتمرمغت في الطين كده،يا ريت تتم مناظرات في التي في بين الجهلة من بتوع امن الدولة و اللحي الطويلة والعقول الهبيلة و التكفير و الجعجعة و بين واحد مثقف و يعرف الاسلام عشان يتم نسفهم عن طريق كشف ضحالة فكرهم و ضيق صدرهم و كذب فمهم.
و آخر طلب ابراهيم عيسي يعمل تويتر و ينورنا .
لو جاية اسكندرية في اي وقت يا ريت تسمحي لي اعزمك عل واحد شاي شكرا للكلمات الجميلة اللي بتكتبيها في زمن معظم ما كتب فيه زبالة و رياء و ضحالة و غباء
شكرا

monasoly said...

عارفه يانواره انا امبارح حزنت جدا لما ييجى وزير الداخليه الجديد ويقول ان عمل امن الدوله هايقتصر على مكافحه الارهاب يعنى ايه؟؟؟امال هوه الاول كان شغال على ايه ماهوه ده مسمار جحاويقوم تانى الجهازال يعنى بقى جديد فى جديدويرتكب بلاوى انامش متفائلهوتيجى ناس تقوللك بس ياجاهله امن الدوله لحمايه بلدنا من المخاطر الخارجيه والداخليه طيب وامخابرات المصريه بتعمل ايه والمخابرات العسكريه بتعمل ايه طيب وسمعت ان فى حاجه اسمها الامن القومى دى فين ؟؟؟ والحل اولا وزير مدنى للداخليه ثانيا احاله ضباط امن الدوله جميعا للتقاعد المبكر ثالثا محاكمه من تثبت عليه تهم فى حق المواطن المصرى اما لماذا اطالب بتقاعدهم وليس اعاده تاهيلهم نفسيا لاننى متخصصه فى علم النفس واعلم جيدا ان هذا سوف يكلف بلدنا مبالغ طائله وعقبال الضابط فى امن الدوله مايبقى بنى ادم تانى هايحتاج لحد سن معاشه وانبه اننى غير متحامله عليهم وعمرى مادخلت امن الدوله والله العظيم وعمرى مامشيت فى مظاهره.

Anonymous said...

لمن لا يفهمون,أو لا يريدون أن يفهموا,ويقولون"ننتخب مجلس شعب,ثم نأسس دستورا جديدا":ستنتخبون مجلس شعب معيبا,بخمسين فى المئة,عمال وفلاحين,وكوتة مرأة,وكل عوار الترقيعات,التى فصلت,على مقاس الطاغية المخلوع,رئيس حزب الفساد والكفر الصهيونى,المنحل قريبا,بإذن الله,وبإرادة الشعب

mohamed said...

اعتقد ان الفكره الجيده هو حل جهاز امن الدوله دون تسريح افراده .. لانه هناك حمكه تقول من الغباء ان تقرب اعدائك منك .. لانه فى احد اللحظات سيتغلون المواقف لتنفيذ مختطاتهم .

Anonymous said...

يانوارة,أنتى الوحيدة,وهذا يسرى على الكتاب من الجنسين,التى تقول,غالبا,ما لا أقدر,أن أعلق عليه..,والله,ليس فى هذا,أى تملق.كل ما أطلبه منك,.."خللى بالك من نفسك"..,الموساد,أكبر شرا,من أمن الدولة.ربنا يحافظ عليكى

Unknown said...

http://www.maikelnabil.com/2011/03/blog-post_07.html

بليز حد يفهمني

Anonymous said...

نوارة حرام عليكى
اللى قصدتيه وصل من اول 37 سطر
وعدتيه علشان اللى مابيفهمش
انتى بتعذبى زملاء الثورة ليه
اختصرى يازعيمة
انا عندى ساغة واحدة يوميااعرف فيها ملخص الموقف والمطلوب عمله معظمها بيضيع فى مقالتك
هانخليكى تحكى للمساجين من امن الدولة حكايات قبل الموت علشان يتسابقوا على المشنقة
ووالله المرة الجاية ليكون شرط الثوار مايكونوش رغايين قوى كده

Amirat Hor Aldonya said...

صراحة يا نوارة أنا شايفة ان اقتراحك الأول كانت أفضل اللي هو تفريقهم و توزيعهم على الأجهزة أعتق ديضمن أكتر ،،، يعني مش معقول نستعين باللى كان مهمته تعذيب الشعب في أنه يحمي أمن الشعب و الثورة صعبة أوي أن شخصيات أمن الدولة الإجرامية دي تمشي مع المهمة المحترمة دي مش عاااارف بقى بس مش مقتنعة صراحة