هم دول محبوسين ليه والثلاثي المرح برة؟

دول محابيس سجن العقرب اللي محكوم عليهم بالاعدام في قضايا فشنك زي العائدون من افغانستان والعائدون من البانيا والعائدون من البوسنة والعائدون من بيت ابوها رايحة بيت الجيران

القضايا دي كانت فساكونيا اخر حاجة، وكانت كلها محاكم عسكرية بامر من مبارك، ما عملوش حاجة، ماحدش فيهم عمل حاجة، كانوا شباب والدولة بتشجعهم في المساجد والتلفزيونات والدنيا كلها عشان يروحوا يجاهدوا، فكانوا بيلبوا الندا ويروحوا وبعد ما يخلصوا يرجعوا، يقوم ابن الواطية بعد ما يبعتهم بنفسه يعمل لهم قضية ويحكم عليهم بالاعدام

والغريب ان الاعدامات ما اتنفذتش.. ما اتنفذتش يبدو عشان ما عملوش حاجة، او عشان كانوا ماسكينهم يقرروهم: شفتوا مين هناك؟ عملتوا ايه هناك؟ طب فيه واحد سعمنا عنه اسمه كذا، تعرفه ده؟ اعصري مخك يا زينب

وكان منهم محمد الظواهري راخر اللي افرج عنه ورجع اتقبض عليه تاني عشان الحكم بالاعدام

طب انا عايزة اعرف دول محبوسين زي ما هم في قضية فشنك، بموجب محاكمة سقطت بسقوط الدستور، لأنهم مش متحاكمين بالقانون، مافيش قانون بيحاكم انسان لما بيسافر يتطوع في اي حاجة - حتى لو تطوع في القتال - ويرجع بلده يقوم يتحبس، خصوصا لما يبقى مسافر بعلم كل اجهزة الدولة مش هربان ولا مسافر بشكل غير شرعي

المواد الدستورية اللي بتعطي الرئيس صلاحيات انه يحول اي انسان مناخيره مش عاجبة سيادة الريس لمحاكمة عسكرية ويديهم اعدام عشان دمهم تقيل على قلبه، سقطت 
سقطت
سقطت
احنا اسقطناها بدمنا

اللي ما سقطش ومش حيسقط هي جرائم مبارك ومراته وولاده الاتنين وصفوت الشريف وفتحي سرور وزكريا عزمي، دي جرائم لا سقطت قبل الثورة، ولا تسقطها الثورة وعايزينهم

وعايزين الافراج الفوري عن دول، او اعادة محاكمتهم، انشالله تحطوهم تحت الاقامة الجبرية حتى، انما اعدام؟ اعدام ومبارك اللي قتل كل دول عايش في شرم الشيخ؟ وبعدين وثائق امن الدولة قالت لنا ان ما عندناش ارهاب، مبارك وجمال وامن الدولة هم اللي كانوا بيعملوا الارهاب (وكانوا بيراقبوا الجيش كمان، وكانوا بيشتغلوا مع السي اي ايه.. جواسيس جواسيس يعني) ... بقى تفتكروا دول وتنسوا اللي كان في النص؟

الا هو مبارك فين؟
مش عارفين تحكموا عليه ليه؟
مش عارفين تحكموا عليه بتهمة الخيانة العظمى؟ واحد خان شعبه، وخان قواته المسلحة، وادا امر للقوات المسلحة بانها تقتل الشعب، وده اللي خلعه من منصبه، مش دي خيانة عظمى ولا ايه؟ 
اولا افرجوا عن دول:

أسماء بعض المحكومين بالإعدام والموجودين في سجن العقرب




1. مصطفى أحمد حسن حمزة ، ثلاثة أحكام بالإعدام في القضايا 24/92 ، 11/93 ، 268/97 ( العائدون من أفغانستان، إغتيال صفوت الشريف ، أحداث المنيا ) وهو موجود في سجن العقرب . تاريخ القبض عليه 19/2/2003
2. محمد محمد ربيع الظواهري ، حكم بالإعدام في القضية 8/98 ، العائدون من ألبانيا ،موجود في سجن العقرب ، تاريخ القبض عليه 1999 م .
3. رفاعي أحمد طه موسى – 24/92 جنايات عسكرية – سجن المنيا – مايو 2001
4. حسن الخليفة عثمان علي ، – القضية 419/94 أمن دولة طوارئ – إعدام – العقرب – من 22/4/194
5. أحمد عبد القادر بكري محمد ، قضية 745/93 – أمن دولة طوارئ– العقرب – 8/10/1993
6. غريب الشحات أحمد الجوهري – قضية 745/93 – أمن دولة طوارئ – إعدام – العقرب – 14/8/1997
7. شعبان علي عبد الغني هريدي – قضية 847/96 – إعدام – امن دولة – العقرب
8. عثمان خالد إبراهيم السمان – 24/92 عسكرية – سجن المنيا – مارس 2004
9. عبد العزيز داوود موسى – 8/98 عسكرية – العقرب – من 2002
10. يونس محمد محمود – 664/2004 – العقرب
11. محمد جايز صلاح – 664/2004 أمن دولة عليا – العقرب
12. أسامة محمد عبد الغني – 664/2004 - العقرب
--------
فيه بقى غير دول.. عشان زي ما انتوا شايفين التواريخ، دول خللوا في السجن، زمان سرايرهم زرعت جدور في الارض
فيه بقى غيرهم
عمرو البحيري مثلا.. اللي اتنش خمس سنين حكم عسكري من غير مناسبة 
غير قضايا التعذيب قبل وبعد الثورة
انا سمعت امبارح مكالمة احد القادة في القوات المسلحة اللي ما رضيش يقول اسمه
وقعد يقول احنا جيش وطني
واحنا يا سيادة اللوا ما شككناش في وطنية الجيش 
وعارفين ان الجيش المصري جيش وطني
وعارفين ان اسرائيل وامريكا بيكرهوا المشير عشان ما رضيش يغير العقيدة العسكرية المصرية، وعشان بيرفض اي محاولات للاتصال به من قبل اي حد اسرائيلي، وعشان ما بيرضاش يتعامل ولا يتعاون مع اسرائيل، وعشان داجان بنفسه قال: احنا ما نعرفش اي حاجة عن الجيش المصري خالص، مش متعاون زي... وراح راصص اسامي شوية جيوش عربية انما ايه؟ ما يتقلعوش من الرجل كلهم، كل ده ووزير دفاع الجيش المصري مش راضي حتى يرد على تليفوناتهم
وعارفين ان المؤسسة العسكرية المصرية ولاءها للوطن وللشعب فقط ومالهاش اي ولاءات اخرى 
والاكتر من كده، عارفين ان الجيش فرحان بالثورة لأن النظام البائد كان بيتطاول على القوات المسلحة، وبيتجاوزهم في قضايا الامن القومي، وكان عشان ننوس عين امه جمال، وامورتي الحلوة علاء، بيعرض الامن القومي للخطر وبيخلي الجيش يشد في شعره، زي موضوع ماتش الجزائر ده مثلا اللي الجيش المصري وقتها كان عايز يولع في علاء ده لأن الجزائر من الدولة المهمة للأمن القومي المصري
وعارفين ان الجيش لما اتحط في اختيار ما بين النظام والشعب اختار الشعب وما عملش فينا زي ليبيا واليمن
وعارفين ان قيادات الجيش المصري قالت لامريكا لما هددت انها تقطع المعونة اذا ما غيروش العقيدة العسكرية: خدوا معونتكم وروحوا واحنا كمان حنلغي الاتفاقية، احنا اصلا مش عاجبانا الاتفاقية دي
وعارفين ان لما امريكا قالت لقيادات الجيش المصري: حاربوا معانا الارهاب، القيادات ردت عليهم: احنا مش مرتزقة
والكلام ده موجود في ويكيليكس
وعارفين ان بيريز ونتنياهو ورئيس الموساد بيشتكوا مر الشكوى من الجيش المصري ومن قياداته ومن المشير
عارفين ده كله والله العظيم تلاتة، ونبصم لكم عليه بالعشرة، وماحدش فينا انكر ده كله، وماحدش فينا شكك في الشرف العسكري لاي فرد في الجيش من اول المشير لأصغر عسكري، على عينا الشرف العسكري، وفخرنا الشرف العسكري، وعارفين انكم حافظتوا عليه، وماحدش فينا ناسي ان الجيش حمى الثورة وانحاز للشعب وما جازفش بأمن البلد وما عرضناش للي الليبيين واليمنيين بيعانوا منه 
حد ناسي الكلام ده كله يا شباب؟
ماحدش ناسي اهو.. بس ده كله ايه دخله بكشف العذرية على بنات مصر؟ 
بنات مصر.. 
ماهو زي ما احنا عارفين كل ما سبق، احنا عارفين ان الجيش المصري محكوم بعقيدة ايمانية ومعايير اخلاقية هي اللي بتوجه تصرفاته
يعني ايه الجيش المصري اللي الاسرى الاسرائيليين بيحلفوا بحسن معاملته وبيقولوا عمرنا ما شفنا جيش بيعامل اسراه كده يعامل ولاد بلده كده حتى لو كانوا بلطجية ويعذبهم لحد ما يخرجوا ضهرهم متشرح؟ 
يعني ايه الجيش المصري اللي في 73 ما رضيش ياخد المجندات الاسرائيليات اسيرات لأنه مش من اخلاقه يمد ايده على واحدة ست يقوم يعمل كشف عذرية على بنات مصريات؟ 
كل ده عشان عملوا ايه؟ عملوا ايه يستاهلوا عليه ده كله؟ 
نزلوا يعتصموا؟
طب الثورة ما خلصتش.. الثورة ما خلصتش.. خلصوا لهم الثورة ولكم عندي لو حد فيهم نزل انا بنفسي اللي حانزل واخده للمتحف واكشف على قفاه
الثورة ما خلصتش لأن جمال مبارك امبارح كان في نادي رجال الاعمال
الثورة ما خلصتش لأن مبارك في شرم الشيخ بياكل ويشرب وما اتحاكمش لحد النهاردة
الاكتر من كده قلتوا لنا جمدتوا ارصدته.. طب كام ارصدته بقى؟ مش جمدتوها، احنا عايزين نعرف اللي اتجمد ده كام.. ثم احنا عايزين الفلوس دي، بدل ما كل شوية طالع رئيس الوزرا يعمل اعلانات للبورصة واسراء عبد الفتاح طالعة تقول: سهم قليل يمنع بلاوي كتير
طب ما تجيبوا اللي جمدتوه تحطوه في الاقتصاد.. ايه؟ مستنيين ايه؟
ما هو بسم الله ما شاء الله عمرو البحيري اتحكم عليه في ثانية حكم عسكري، اشمعنى عمرو البحيري يتحكم عليه بالسرعة دي ومبارك هو اللي واخدينه على الحنين كده؟ 
وسوزان مبارك بتعمل ايه في مصر؟ وفين الفلوس اللي عليها؟ وفين محاكمتها؟
بلاش ده كله
فين محاكمة صفوت الشريف رئيس المجلس الاعلى للصحافة واللي ضلل الناس في فترة الثورة وشارك في قتل الناس؟ فين فتحي سرور اللي لحد ما كنا عند وزارة الداخلية - فاكرين؟ لما انضربنا - كان منزل بلطجية من بتوعه وكمان طالع يقول انا حاترشح في الانتخابات؟ فين زكريا عزمي اللي بيشتغل دلوقت في الرئاسة؟ زكريا عزمي ده على درجة وزير.. وزير وهو مجرم وقاتل ناس والمجلس القومي لحقوق الانسان وتحقيقات النائب العام بيقولوا انهم التلاتة شاركوا في مدبحة الاربعاء الاسود؟ 
قلنا بتحبوا تعملوا كل حاجة على مهلكم.. ماشي
اشمعنى ضرب الطلبة في اعلام ما كانش على المهل؟ قرار حظر الاعتصامات صدر الصبح العيال انضربت بالليل؟ ومبارك بقاله شهرين حر طليق؟ واكتر من كده دلاديله نازلين فتنة طائفية وبلطجة وادخال سلاح للبلد وبلطجيتهم بيلبسوا جيش وينزلوا الصيعد يعملوا فظائع وانتوا بنفسكم اللي قبضتم عليهم؟
طيب واللي في المتحف دول برضه لابسين ضباط؟ 
واللي كشفوا على عذرية البنات؟ برضه لابسين لبس العيد؟ 
وكل ما نتكلم تقولوا لنا جيش وطني؟ ما عرفنا ان الجيش المصري جيش وطني
عارفين احنا الحكاية دي تلاتة بالله العظيم، وهو الجيش ناقص ما يبقاش وطني كمان؟ 
اذا كان على وطنية الجيش احنا شكرناه كتير، وبنشكره وحنشكره ليوم الدين يا سيدي
بس برضه الاسئلة اللي فوق دي محتاجة اجابة والله
ومالهاش دعوة بالوطنية.. هو انا لما اسأل صاحبتي ما اتصلتيش قبل ما تطبي عليا في البيت ليه تقوم تقول لي انا اشرف من الشرف وعمري ما خنت جوزي؟ 
الاعتصامات مضايقاكم وعشان كده بتتصرفوا حيالها بسرعة
طب فيه وسيلة الطف، وممكن برضه تتصرفوا حيالها بنفس السرعة وحتخلصكم من الاعتصامات للابد:
هاتوا لنا مبارك هو ومراته وعياله وحطوهم في الحبس، ومعاهم الثلاثي المرح، وظباط امن الدولة اللي بيهددوا امن البلد.
محكمة ثورة تنجز مطالب الشعب
بدل مجهود التعذيب وكشف العذرية.. واطمنوا، بنات مصر اشرف من الشرف ومش محتاجين كشف عذرية، واظن كشفتوا عليهم بنفسكم واطمنتوا انهم ما جابوش لكم العار
-------------
يالا يا شباب، ماحدش حيدافع عن ثورتنا غيرنا، لو نمنا حيبقى مافيش ثورة، ومن ثم ماحدش حيتحرك نيابة عنا، احنا نتحرك يقوموا ينجزوا لنا اللي احنا عايزينه، ومش حنبطل وجع دماغ الا لما مطالبنا كلها تتحقق، مش بس جيش مصر جيش وطني، شعب مصر كمان شعب وطني، احنا مش خونة، ولا عملا، ولا بناخد خمسين يورو، ولا كنتاكي، احنا ضحينا باروحانا عشان بلدنا.. اكتر من اي حد.. اكتر من اي حد في البلد دي، الدم دمنا، والحق حقنا... امضوا هنا