Saturday 12 March 2011

توضيح للنشطاء المعاتيه اللي ابتدوا يبقوا شبه القذافي

معلومات مؤكدة، وانا بنفسي اخدت بالي منها:
الحزب الوطني عمل لجان تنزل الشارع تكلم الناس - غير البلطجية، منظمين بلطجية برضه، وغير بتوع الانترنت - الاهم انهم عاملين لجان ومخليين مجموعات كل مجموعة تبقى متخصصة في منطقة تدور تكلم الناس، وعندهم نية لاعادة هيكلة نفسهم واعادة تقديم نفسهم بشكل مختلف
هم دلوقت بطلوا يشتموا في الثورة وبطلوا يقولوا وقف حال البلد
بقوا يلفوا على الناس يتكلموا معاهم ويقولوا احنا شباب الثورة ويحطوا افكارهم، زي مثلا الكلام بتاع ان المعتصمين بتوع التحرير بيضربوا مخدرات وبيشتموا الجيش وبيعملوا فتنة طائفية.. 
انا تأكدت بنفسي ازاي؟
عشان طبعا انا الوحيدة اللي عملت بنصيحتي وبقيت الف في الشوارع واتكلم مع الناس، ولاحظت ان في بعض المناطق في وشوش مكررة كأنها مسئولة عن المنطقة دي
نقدر نلخص خطة الحزب الوطني - مع قرب الانتخابات - في الآتي:
1- اعادة انتاج نفسهم بصورة تانية
2- تشكيل لجان من الشباب (الى جانب سواقين التاكسي والبياعين وخلافه) لبث الاشاعات والكدب والافتراءات، ولاحظت انهم بقوا يسايروا الجو العام، يعني الشارع بيحب الجيش، بطلوا يشتموا فيه، الشارع بيحب طنطاوي بطلوا يشتموا فيه (كانوا بيشتموا الاول) الشارع بيحب الثورة بطلوا يشتموا فيها، الشارع بيكره مبارك بطلوا يقولوا ياريت مبارك يرجع، بيطوروا خطابهم يعني، ولولا ان الوشوش مكررة ولقيتهم من فترة بيقولوا كلام ورجعوا يقولوا كلام تاني مغاير ما كنتش جزمت بالموضوع ده، لاني مش عايزة السع لكم مخكم زيادة ماهو ملسوع
3- الترويج لاحمد شفيق وعمرو موسى كرئيس 
حتعرف منين انهم حزب وطني مش ناس مختلفة معاك في الرأي (لأنهم بطلوا يزعقوا ويقولوا حسبي الله ونعم الوكيل فيكم وحاجات كده لما انا كتبت العلامة دي فيهم على المدونة هههههههههههه) انهم بيقولوا: شفت بعيني، ويهيصوا بقى، سنج ومطاوي وسيوف وناس بتنام مع بعض ومخدرات وكلام هجص كده
انا رحت الاعتصام - اللي انا كنت معترضة عليه - ولا لقيت سيوف ولا سنج، لو الناس دي معاها سيوف او سنج ما حمتش نفسها ليه وهم بيهجموا عليهم
خطة بعض النشطاء لحد دلوقت:
1- انهم يسخنوا على الجيش فيخسروا رصيدهم عند الناس
2- انهم يعملوا او يشجعوا على اعتصامات صغيرة لا تلقى قبول عند الناس
3- انهم يتعالوا على الشعب ويتهموه بعدم الوعي او الندالة او الخيانة او الوساخة او او او
فالحين
الا هل بلغت؟ 
اللهم فاشهد
وحاقول نعم على التعديلات
مش بس عشان اخلص من الجيش
عشان اخلص منكم انتوا كمان، خلينا بقى ندخل في اي عملية انتخابية من اي نوع حتى لو نتائجها مش مرضية بالنسبة لي مية في المية احسن من الوش اللي انتوا عاملينه، وعمالين تخسروا في الشارع وتزايدوا على الشعب وعلى الجيش 
الحزب الوطني حزب فاسد
وعناصره فاسدة
وسياسته فاسدة
هو مش استقصاد للحزب الوطني وخلاص
هو مش مصدق انه انهار وبيحاول يرجع
ولسه رغم كل اللي بيعمله ده، لسه ضعيف، واحسن ميزة فيه ان عناصره يتميزوا بالتخلف التاريخي اللي مالوش مثيل
ينفع الناس اساسا تحدد هي عايزة ايه في حياتها
وتشكل لجان للكلام مع الناس في الشارع (باسلوب محترم وفيه احترام للي بتكلمه، مش تحسسه انه غبي وجاهل ومتخلف وتكلمه باستهزاء) 
ويبقى فيه واحد او اتنين مسئولين عن كل منطقة يتكلموا مع الناس
ازاي يتكلموا مع الناس؟
اولا: لازم قبل ما تتكلم تسمع، يبقى زي استطلاع رأي
ثانيا: تاخد وتدي في الكلام بالمنطق
ثالثا: مش لازم رأيك صح على فكرة، مش عشان قالوا لك الرأي ده يبقى لازم الا تقنع بيه الناس في الشارع، ممكن الناس في الشارع يبقى لها وجهة نظر اعمق واحسن (وعادة لا مؤاخذة الناس اللي انتوا بتقولوا عليهم ما عندهمش وعي دول بيفهموا احسن منكم ستميت مرة) اسمعها وقلبها في دماغك وارجع انقلها للمجموعة بتاعتك
يمكن تطلع احسن
انا قلت الكلام ده قبل كده... صح؟
فيه نشطاء بيعملوا ده، وفيه نشطاء مصممين يهبلوا
معلش... ماهي ديمقراطية يعني، وكل انسان له حق التهبيل

75 comments:

-_- said...

اللي بيطبلوا لعمرو موسى كبير
و المعارضة مش لازن تتقسم لميت جهة
عمرو موسى هيروح كاسبها و مرجع اللي كان تاني
و كأنك يا ابو زيد ما غزيت

ayman radwan said...

انتي بتتكلمي كأن مصر كلها هي القاهره؟
الحزب لسه موجود في الصعيد علي الاقل الي واثق منه سوهاج وقنا واسوان وطني لان مفيش غيرهم ولان الناس هناك بتدي اشخاص بالاسم غير ان الصعيد محدش سئل فيه من الاحزاب ولا الجماعات ولا انتو حتي يا نشطاء يا سياسين عشان كده انا ابصملك بالعشره ان التلت محافظات دي انصار عمر موسي حتي لو فضلنا نغني لغير كده لانهم ميعرفوش غيره ومفيش وقت عشان يعرفو غيره اصلا وابقي خلي عمرو موسي بقي ساعتها يعمل دستور جديد .
مفيش امل غير ان احنا نرفض التعديلات الدستوريه للضغط علي كل الي رافضين لدستور جديد دلوقتي انهم ياخدو بالحل ده لانه ساعتها مفيش غيره او حكم الجيش.

liliy pink said...

نواره من فضلك بالراحه مفيش وقت لازم كلنا نتفق على رأى واحد المهم دلوقتى الدستور الناس كلها متلخبه وكل واحد بيقول راى عايزينك انتى وبلال فضل تتفقوا على رأى واحد بخصوص الدستورانتم الاثنين اكثر ناس بأثق فيهم
وموضوع الحزب الوطنى ومرشحينه الناس كلها عارفينهم متقلقيش وكمان انتى وبلال تتفقوا على المرشح اللى نثق فيه
ارجوكى الموضوعين دول مهمين محتاجين لرد منكم انتم الاثنين

liliy pink said...

على فكره انا بدأت بالناس اللى معايا فى الشغل وكل الناس اللى باقابلهم والله حتى السعاه والشغاله اللى فى البيت لان انا عارفه ان البسطاء دول بيتكلموا مع بعض فى بيوتهم ونفسهم يفهموا وكمان والله المتعلمين كثير منهم مش فاهم

Unknown said...

هوه ليه النشطاء بدل كل يوم ما بيخسروا في الشارع ميجمعوش الناس على قضية حسني مبارك قاعد في شرم ليه لغاية دلوقتي , وليه الكلام عنه خف , هوه عادي يعني ياكل كفيار في شرم وناس تشم ىالكوته في السجن الحربي

Unknown said...

والمصحف عندك حق بيحصلدلوقتي الكلام ده فعلا والدليل انه امبارح(الجمعه)واحد صاحبي اكدلي ان بعض اعضاء الحزب الوطني في سوهاج عملوا اجتماع كبير وكانوا بيأيدوا الثوره رغم ان ناس كتير بسطاء استغربوا بس الاعضاء اكدولهم انهم كانوا مجبرين زيهم زي الناس وان اللي كان بيحصل كان اوامر هما بينفذوها المهم انهم قالوا عايزين .........او بمعني ادق الحزب هيعاد هيكلته ويعاد تسميته تحت اسم حزب الحريه الديموقراطي وللاسف يا عيني الناس هنا ف الصعيد بيصدقوا اي حاجه بسرعه ........يا ريت والنبي تشوفيلي حل

ayman radwan said...

دي حلقه طلرق البشري اسمعي الهلس الي فيها نقاء الجنسيه ما هو حسني كان مصري نقي الو دي النقاوه الي قصدهم عليها الكلام ده عيب وعيب ان 7 مليون مصري بره مصر بيصرفو علي اكتر من تلت الشعب المصري هنا يبقو ملهمش لاازمه بسبب التعديلات الجميله الي انتي حتقولي عليها ايوهhttp://www.youtube.com/watch?v=KyEsKFiyhfw

حسين محمد said...

من اكتر البوستات اللي اتفق فيها معاكي يا نوارة
اعضاء الحزب الوطني عندنا اللي كانوا مش طايقين بعض بيتجمعوا تاني وغيروا لهجتهم فعلا
كمان انا مع ان الانتخابات البرلمانية تكون قريبل والناس لسه كارهة اعضاء الحزب الوطني وعارفاهم وع فكرة مسألة ظهور احزاب وانها تكون قوية والكلام مش هينفع معاه لا ستة شهور ولا سنتين
فيه ناس كويسة ومحبوبة ما كنتش بتشارك في الانتخابات علشان الوساخة اللي كانت فيها كتير منهم دلوقتي في مناطق كتير بيفكروا ينزلوا وبعضهم قرروا فعلا الشطارة بقى ان الناس دي نعرف نضمهما لحزب جديد او حزبين او حتى احزاب من القديمة اللي ممكن تكون فيها حاجة كويسة
بالشكل ده الحكومة لما تكون من تيارت مختلفة هتراقب نفسها بنفسها ومش هتعرف تتفق علينا والرئيس الجديد لو جه قريب وحاول يضحك علينا ويستغلنا يبقى مجنون رسمي وناوي يخرب البلد والاسماء الطروحة بما فيهم عمرو موسى اللي انا مش طايقه هو مش مجنون علشان يفكر في حاجة زي كده على الاقل لو حصلت انتخابات قريب

nosseir said...

خيرت الشاطر بيقول ان الاخوان المسلمين هينافسوا على 40 % فقط من مقاعد مجلس الشعب
طب لو هو خايف من فوز الاخوان بشكل كبير ..على اساس ان الفوز الكبير دة ممكن يخوف الناس والجيش والاقباط...فعلى الاقل ينسق مع باقى الاحزاب الكبيرة فى باقى المقاعد اللى مش هينافس عليها
عشان انا خايف بواقى الحزب الوطنى يفوزا بالمقاعد دة..وترجع ريمة لعادتها الزفت

Unknown said...

الله ينور
شيلي صورة وائل الكومي خلاص الإسكندرانية ظبطوه آخر تظبيييط

Tamer said...

انا عندى اقتراح :
ليه الائتلاف والاخوان وجميع القوى اللى ساهمت فى الثورة تطلبالتطوع من كل الشباب اللى ساهموا فى الثورة لعمل لجان توعية فى الشوارع يتم تنظيمها ..
الل انا عارفه انك لو ما بتتحركش لقدام يبقى انت بترجع لورا مافيش حد بيقف ثابت ابدا وانا حاسس ان الناساللى شاركت فى الثورة فاكره نفسا واقفة وخلاص عملت اللى عليها وده مع الاسف مش صحيح ..
الحزب الوطنى وامريكا واسرائيل مش هايسكتوا ان مصر تروح من اديهم وتيقى دولة ممكن فى 6-10 سنين تبقى دولة كبرى قوية
ارجوا الناس تاخد بالرأى ده

Anonymous said...

الله عليكى أيتها النوارة الجميلة العزيزة ،أنا فعلاً كنت مقرر اعطى صوتى بالإيجاب لصالح التعديلات الدستورية ، فهى الممكن والسكة الوحيدة المتٌاحة أمامنا الآن ، وثقتى كبيرة فى وقود هذه الثورة المجيدة وهم الشباب والشعب المصرى العظيم الذى انضم لهولاء الشباب فقوبت الثورة .. سوف أعطى صوتى بنعم لهذه التعديلات ... واخيراً يارب أحفظ مصر من كل سوء...

Unknown said...

انتي عندك حق فعلا!!!
يعني من كتر ما انا بركب تاكسيات لقيت الناس كلها مغيبه تماما
كل ما اكلم سواق تاكسي يقولي البرادعي عميل!!!
اقعد افهمه واقنعه بيستجيبوا والله..
وللاسف الناس دي معاها مؤهلات عليا!!!
اومال غير المتعلمين بتوع الحزب الوطنب بيعملوا فيهم ايه!!!!
----------
الناس محتاجه توعيه مش طبيعيه والا هنلاقي عمرو موسى بقى الرئيس، وكل واحد من النشطاء عمال يشتم ويخون في الباقي...
----------
انا هقول نعم للتعديلات عشان مش عاوزه الجيش يكمل .. واما ممكن في الاخر تبقى احكام عرفيه ونكمل زي ثوره 52
مع ان ابويا كان جيش وكذا حد في عيلتي حتى زوجي جيش :D
بس الواحد مش عاوز حكم عسكر تاني كفااااااااااااايه

nour1971 said...

انا حاسه بطريقتك انك عندك يأس و عايزه العمليه تخلص علي طول و خلاص. لازم نطول بالنا شويه و لازم الجيش يصبر معانا شويه كمان مهي دي بلده برضه و هو ده الشعب الي بيدافع عنننه مش عن اي شعب تاني ولا انا غلطانه فالي حا يجرا علينا حا يجري عليه هو كمان و لمن ظروف البلد تبقي احسن الفايده حا تعم علي الجميع مشعلي الشعب لوحده ربنا يستر و يكمل الثوره علي خير و ينصر البلد دي بقي علشان هي بقالها سنين كتير اوي بتتنهب

انا عن نفسي حا ارفض التعديلات علشان عايزين دستور جديد الدستو المترقع ده مينفعش يا نعمل حاجه عدله مره واحدهيا نعمل حاجه عدله برضه لا القديم كويس ولا التعديلات كويسه عايزين دستور يخليالي بيحكم مصر يخاف من الشعب و يخاف علي البلد و ميبعهاش تاني

shady said...

هى اللجان دى من زمان مجرد إنك تتكلم فى السياسة على قهوة ما أو فى مؤسسة ما تلاقى الأخ ده جاى عليك يقنعك بشكل فظيع بالتوقف عن الثورة مثلا أيام زمان ويحلف ميت طلاق إنه من أوائل إللى دعوا إليها مع إن منظرة وكلامه لا يوحى إلا بالدعوة عليها

ابراهيم رزق said...

نوارة يا بطلة

انا رحت اطفيح و المحرك الاساسى هناك الحزب الوطنى الناس هناك بتعشق محمد حسان و مع ذلك لم ينصت المعتصمين بالكنيسة له يحترموا صفوت حجازى لكن تم تجاهل كلامه ايضا مشايخ الازهر يبقى الموضوع مش دينى و لا اجتماعى لان علاقة الاقباط بالمسلمين جيدة يبقى الحزب الوطنى و العضو اللى ناس كتير اكدت لى انه وراء ما حدث الناس البسيطة دى تربة خصبة لاى شىء

خالص تحياتى

shady said...

فعلاً الناس دى موجوده فى القهوه وفى الشغل مؤسسات الدولة أول ما تيجى تتكلم فى السياسة تلاقيه نط لك وبدون سابق معرفة يحاول يقنعك بفكره المريض مثلاُ وجودب توقف الثورة زمان قبل رحيل مبارك ويحلف لك ميت يمين إنه أول من دعى إليها بالرغم من إن شكله وكلامه لا يوحى إلا أنه أول من دعى عليها

محمد نور الدين said...

ست الكل مساء الخير
عملا بنصيحتك اطلعت على مقال بلال فضل. ونزولا عند رغبتك الملحة قرأت المقال بدون هستيريا ولا جنان . ومراعاة لمشاعرك لن نرد على الكثير من الآراء التي جاءت في المقال و التي تحتاج فعلا إلى رد .لكن صدّقيني يا ست الكل، بعدما فرغت من قراءة المقال تذكرت حكاية صديقي الصحفي وهو معروف. وبعدما تعب من الصحافة استقال وهو حاليا صاحب مؤسسة صغيرة للدعاية .
في التسعينيات لما اختلط الحابل بالنابل ولم يعد أمامنا إلا اختيارا واحد، إما أن نموت بالكوليرا أو الطاعون، الذي يعني، إما الإرهاب أو المؤسسة العسكرية.
أمام هذا المشهد التراجيدي انقسم الناس إلى ثلاثة فرق: البعض حمل السلاح مع الجبهة الإسلامية تحت شعار الإسلام هو الحل ،والبعض الآخر اصطف وراء المؤسسة العسكرية تحت شعار حماية الطابع الجمهوري للدولة ، و بعض أخر رفض هذا وذاك. و أنا كنت أحد هؤلاء .و صديقي الصحفي يومها كان صاحب جريدة مستقلة يومية كان من الفريق الذي تعامل مع المؤسسة العسكرية لكنه كان على درجة كبيرة من الاستقامة والشرف .ولهذا احتار البعض من موقفه . وعندما سأله أحدهم عن هذا الموقف قال بالحرف : أفضّل أن يركلني عسكري على مؤخرتي أفضل ما يذبحني إرهابي . وهذه الجملة استشهد بها أحد الكاتب في كتاب صدر له بفرنسا في تصنيفه للمثقفين . وإلى الآن كلما نلتقي أسأله مازحا عن سلامة مؤخرته .

وتسيرين نوارة في الزحام تحملين خلاصة وعد الربيع
تشترطين على مجمع الزهر شروط التفتح
تملين بأحمر الورد منشتات السنين القادمة

oum mariam said...

و الله يا نوارة أنا بدأت أقلق و أخاف و حاسة إن الجو العام ضد الثورة و الناس ما بتعرفش تفرق بين إللى عايز يعمل حاجة بجد و ده للأسباب إللى قولتيها أرجوك أنا عايزة أعمل حاجة أنا صحيح ما نزلتش التحرير بس أقدر أفيد الناس من خلال شغلى و الله نفسى أعمل حاجة أنا ما صدقت إن بقى فيه أمل مش عايزة الامل يروح نفسى مريم و إبراهيم ولادى يشوفوا أيام أحسن منى إعتبرينى معاكى فى أى حاجة و أكيد فى زيي كتير ما يقدروش يروحوا التحرير لكن يقدروا يخدموا الثورة الناس دى محتاجة حد يدلهم على الطريق و يقولهم يعملوا إيه أنا أعرف ناس كتير كده و يارب أشوف بنتى زيك باحييكى

Sgheita said...

please don't say that you need ay entekhabat we khalas konna zehe2na men badry we khalassna.. bas sa7 100% el nas tenzel tet2assem legan fel manate2 ba2ah we tekalem el nas fel share3

Tears said...

الجيش كقاعدة فى اغلبه كويس و مع الثورة لكن كمجلس لا....الدليل ان همه سايبيين صفوت و سرور و عزمى و جمال مبارك برغم ان فيه بلاغات ضدهم تجيب اعدام بس همه سايبينهم يستخدموا المليارات اللى سارقينها للعمل مع البلطجية و امن الدولة لاثارة الفتن و الفوضى و تنظيم صفوفهم و استعادة نفسهم

دول مش بيحموا الثورة دول بيمتصوها و بيحموا مبارك و شلة الحرمية بتوع الحرس القديم لان الهم طايل الكل

همه نفسهم بيحكموا بشرعية الثورة لكن واقفين ضدها و من اول لحظة قلنا حل امن الدولة و القبض على رموز الفساد و دستور جديد و مجلس رئاسى و كل ده لم يحدث بل اعطوا امن الدولة الوقت الكافى لحرق المستندات بتاعه كبار الفسدة و على راى بلال فضل القضايا متشركة و القضاة مش ح يلاقوا حاجة....النائم العام نام جامد و ترك قضايا فساد بالهبل سنين طويلة و دلوقتى احنا عايزينه يحقق فيها
!

تونس لم يقعوا فى غلطتنا و خلوا حكم مدنى منهم انما احنا انتصارنا بيجهض...امن الدولة مخبريهم فى الاتوبيسات بيقولوا للناس البرادعى تبع اسرائيل!!!

.................
ادخلوا على جوجل و اكتبوا

ارتياح اسرائيلي لمنافسة عمرو موسى على الرئاسة

يدعوت احرنوت: صعود البرادعي يضر آمن اسرائيل

حينها فقط ستفهموا سر هجوم الدولة و الصحف القومية على البرادعى و تلميع موسى

طول عمر مبارك ونظامه و امن دولته بينفذوا طموحات اسرائيل..تفجيرات فى شرم و القديسيين...بيع غاز باقل من سعر التكلفة لدعم اسرائيل من جيبنا بعشرة مليار دولار سنويا..تعذيب و تلفيق و قتل و تجسس للمصريين و نهب و افساد متعمد فى كل المجالات

Tears said...

انضم لاقتراح

Tamer

و اتمنى اخذه بجدية

مش لازم نلبس فى حد من اذناب النظام و كفاية ان عشان ماحدش مننا بيحكم الثورة بتفرغ من مضمونها بسبب حماية الفسدة و تركهم يرتعوا

Diaa said...

كل ما أقول لواحد صاحبي متثاقف إني هاصوت بنعم للتعديلات الدستورية يقولي (دم الشهدا!!!) هما الشهداء جابوا سيرة التعديلات الدستورية ما بلاش الكلام دا ولا هو (قميص عثمان) كله عاوز يلبسه

Mostafa Balba2 said...

المستشار/ هشام البسطويسى رئيسا لجمهورية مصر العربية

http://www.facebook.com/pages/%D8%A7%D9%84%D9%85%D8%B3%D8%AA%D8%B4%D8%A7%D8%B1-%D9%87%D8%B4%D8%A7%D9%85-%D8%A7%D9%84%D8%A8%D8%B3%D8%B7%D9%88%D9%8A%D8%B3%D9%89-%D8%B1%D8%A6%D9%8A%D8%B3%D8%A7-%D9%84%D8%AC%D9%85%D9%87%D9%88%D8%B1%D9%8A%D8%A9-%D9%85%D8%B5%D8%B1-%D8%A7%D9%84%D8%B9%D8%B1%D8%A8%D9%8A%D8%A9/208392529174839?sk=wall

Mostafa Balba2 said...

المستشار/ هشام البسطويسى رئيسا لجمهورية مصر العربية

http://www.facebook.com/pages/%D8%A7%D9%84%D9%85%D8%B3%D8%AA%D8%B4%D8%A7%D8%B1-%D9%87%D8%B4%D8%A7%D9%85-%D8%A7%D9%84%D8%A8%D8%B3%D8%B7%D9%88%D9%8A%D8%B3%D9%89-%D8%B1%D8%A6%D9%8A%D8%B3%D8%A7-%D9%84%D8%AC%D9%85%D9%87%D9%88%D8%B1%D9%8A%D8%A9-%D9%85%D8%B5%D8%B1-%D8%A7%D9%84%D8%B9%D8%B1%D8%A8%D9%8A%D8%A9/208392529174839?sk=wall

Unknown said...

عايزة الحق؟
اللي عاجبهم عمرو موسى كتير (خصوصاً الجيل الكبير شوية)
واللي حيقولوا لأ للتعديلات كتير (خصوصاً المثقفين والواعيين)... ببساطة، نسبة كبيرة من الكتاب بيقولوا لا... فالناس بتمشي وراهم... المقال بتاع عمرو حمزاوي... والفيديوهات بتاعت حملات لا لترقيع الدستور... وحاجات تانية من هذا القبيل
أنا بكلم اللي حواليا وأقولهم ليه نفول نعم،بس الناس فعلاً منحازة لإنهم يقولوا لأ...
أنا عن نفسي عاجباني الحملة بتاعت إضافة بند: أريد دستور جديد، بس شايفة إن معناها برضه إن الجيش حيفضل قاعد

إيه الكلام بقى؟

Dolly said...

صح فعلا أننا لازم نتكلم مع الناس ونسمعهم...
بس معلش يا نوارة....هحاول أتغافل نظرية المؤامرة مع الجيش لعودة فلول النظام وحكم البلد...
هنعمل ايه لو خدنا بنصيحتك ده واتعملت الانتخابات على عوارها.. وأعلنوا نتيجة مزورة ولا أعلنوا أن أحمد شفيق أو ... أي حد تاني فاسد من الحزب الوطني هو اللي نجح في الانتخابات.. بالتزوير والطرمخة بمساعدة الجيش
هنعمل ايه ؟؟؟؟؟
هنعمل ثورة من أول وجديد ويسقط مئات الشهداء من جديد...

أنا عارفة أن أنتي عندك حق...وكلما تحدثنا عن سوء نية قيادات الجيش بنخسر أسهم عند ناس كتير ....برغم أن هي ده الحقيقة...
لو تغافلناها يبقى هيضحك علينا تاني..
قيادات الجيش اتمرمغت في عز مبارك 30 سنة والمؤسسة العسكرية نفسها مليانة فساد....وصفقات سلاح مشبوهة
وهم دلوقتي اللي بيحموا كل رموز الفساد وحرامية الحزب الوطني وأمن الدولة...عشان برده يحموا نفسهم ....المؤامرة واضحة للأعمى
أنا عارفة أن فيه ناس كتير مش عاوزة تصدق الكلام ده....
وأننا لو فتحنا موضوع تواطؤ قادة الجيش معظم الشعب مش هيبقى معانا

بس ايه الحل ؟؟؟؟؟
أنا ما عنديش أدنى شك أن الانتخبات لو اتعملت في وجود كل فلول النظام المسيطرين على كل مؤسسات الدولة...هتتزور وهتتطرمخ وهيجيلنا فاسد من تاني يحكم البلد...ونفس الفاسدين في البرلمان
لازم نفكر في جل تاني غير اللي بتقوليه ده....

Dolly said...

صح فعلا أننا لازم نتكلم مع الناس ونسمعهم...
بس معلش يا نوارة....هحاول أتغافل نظرية المؤامرة مع الجيش لعودة فلول النظام وحكم البلد...
هنعمل ايه لو خدنا بنصيحتك ده واتعملت الانتخابات على عوارها.. وأعلنوا نتيجة مزورة ولا أعلنوا أن أحمد شفيق أو ... أي حد تاني فاسد من الحزب الوطني هو اللي نجح في الانتخابات.. بالتزوير والطرمخة بمساعدة الجيش
هنعمل ايه ؟؟؟؟؟
هنعمل ثورة من أول وجديد ويسقط مئات الشهداء من جديد...

أنا عارفة أن أنتي عندك حق...وكلما تحدثنا عن سوء نية قيادات الجيش بنخسر أسهم عند ناس كتير ....برغم أن هي ده الحقيقة...
لو تغافلناها يبقى هيضحك علينا تاني..
قيادات الجيش اتمرمغت في عز مبارك 30 سنة والمؤسسة العسكرية نفسها مليانة فساد....وصفقات سلاح مشبوهة
وهم دلوقتي اللي بيحموا كل رموز الفساد وحرامية الحزب الوطني وأمن الدولة...عشان برده يحموا نفسهم ....المؤامرة واضحة للأعمى
أنا عارفة أن فيه ناس كتير مش عاوزة تصدق الكلام ده....
وأننا لو فتحنا موضوع تواطؤ قادة الجيش معظم الشعب مش هيبقى معانا

بس ايه الحل ؟؟؟؟؟
أنا ما عنديش أدنى شك أن الانتخبات لو اتعملت في وجود كل فلول النظام المسيطرين على كل مؤسسات الدولة...هتتزور وهتتطرمخ وهيجيلنا فاسد من تاني يحكم البلد...ونفس الفاسدين في البرلمان
لازم نفكر في جل تاني غير اللي بتقوليه ده....

Nahla Hussein said...

الله يفتح عليكى هو ده كلام الناس العاقلة اللى بتفهم فعلا لازم الناس توافق على التعديلات الدستورية مش تقعد تتحايل على الجيش انه يستمر فى السلطة علشان احنا مش هنعرف نختار ومفيش حد عدل جاهز وابقوا قابلونى بقى لو مشيوا وكمان الناس لازم تفهم ان الثورة دى مش حاجة و بتخلص والناس هتعيش فى تبات ونبات. كل يوم فيه فساد جديد هيظهر
من الوجوه القديمة وحتى الوجوه الجديدة ولا 100 دستور ولا قانون ممكن يمنعوا الفساد ماحنا كان عندنا كل ده وبرضه الفساد كان للركب المصريين لازم يتعلمواانهم لازم يفكروا ويخططوا ازاى الفساد ميرجعش وزى ما النظام القديم ابتدى يرتب صفوفه لازم باقى الناس اللى عمرها ما اشتركت فى الحياة السياسية ترتب صفوفهاهيه كمان والا يرجع ابوك عند اخوك بالدستور الجديد برضه

Tears said...

يا نوراة اسمعى وائل عبد الفتاح على الجزيرة مباشر حالا

الموافقة على تعديل الدستور تصنع مبارك جديد

الثورة تملى شروطها مش يفرض عليها مجلس بيرك بشرعيتها رايه اللى بيخدم الفساد و الاستبداد

الثورة الناقصة اخطر من استمرار مبارك

e said...

ﺍﻟﺘﻠﻔﺰﻳﻮﻥ ﻭﺍﻻﺫﺍﻋﺔ ﻻﺯﻡ ﻳﺘﻈﺒﻄﻮﺍ ﺍﻻﻋﻼﻡ ﻣﻬﻢ ﻗﻮﻱ ﻻﺯﻡ ﻳﻜﻮﻥ ﻓﻲ ﺻﻮﺕ ﻋﺎﻟﻲ ﻟﻠﺜﻮﺭﺓ..ﻓﻲ ﻧﺎﺱ ﺑﺴﻴﻄﺔ ﻭﺟﻬﻠﺔ ﻛﺘﻴﺮ ﻭﺍﻟﺜﻮﺭﺓ ﺍﻟﻤﻀﺎﺩﺓ ﺷﻐﺎﻟﻪ ﺍﻟﻠﻪ ﻳﻨﻮﺭ ﺍﻟﻨﺎﺱ ﺑﻴﺘﺼﺪﻕ ﺍﻟﺘﻠﻔﺰﻳﻮﻥ ﻭﺍﻻﺫﺍﻋﺔ ﺍﻛﺘﺮ ﻣﻦ ﺍﻱ ﺣﺎﺟﻪ ﺑﺜﻴﻨﺔ ﻛﺎﻣﻞ ﻣﻔﺮﻭﺽ ﻳﻜﻮﻥ ﻟﻴﻬﺎ ﺩﻭﺭ ﻓﻲ ﺍﻟﻤﻮﺿﻮﻉ ﺩﻩ ﻻﻥ ﻓﻲ ﻧﺎﺱ ﻛﺘﻴﺮ ﺑﺘﺤﺘﺮﻡ ﺭﺃﻳﻬﺎ

Amal said...

حملة تجريد كل مستفيد من التزوير من حق الترشح للانتخابات

http://www.facebook.com/pages/%D8%AD%D9%85%D9%84%D8%A9-%D8%AA%D8%AC%D8%B1%D9%8A%D8%AF-%D9%83%D9%84-%D9%85%D8%B3%D8%AA%D9%81%D9%8A%D8%AF-%D9%85%D9%86-%D8%A7%D9%84%D8%AA%D8%B2%D9%88%D9%8A%D8%B1-%D9%85%D9%86-%D8%AD%D9%82-%D8%A7%D9%84%D8%AA%D8%B1%D8%B4%D8%AD-%D9%84%D9%84%D8%A7%D9%86%D8%AA%D8%AE%D8%A7%D8%A8%D8%A7%D8%AA/117319925011014

Anonymous said...

سورى يا نواره---
1- يلزمو الرئيس يعدل الدستور كاملا
2- قائمه نسبيه
3-الحد من صلاحيات المحروس
ساعتها نقول نعم--مش شاغلين عند ابوهم احنا

Anonymous said...

ومش هاعمل شير اللموضوع ده---عشان العيال افكارهم متبوظش--انا مصلبهم بالعافيه

salwa ibrahim said...

I'm with you in all what you said except about el entkhabat, rushing means being afraid of something, the revolution is right all the way, the people are with it and behind it all the way, so we are not the ones who should be afraid of anything, the people who should be afraid are Amn eldawalh, feloul alwatany, magless elsha3b el mon7al members

salwa ibrahim said...

and by the way mafeesh hadd awz 3Amr Mosa because first of all he is too old and people had enough from el3awageez dool, Ahmed Shafiq became a joke no one really will vote for him except el 18 wahed fi midan Mustafa Mahmoud, to be careful and open your eyes widely yes, to panic and to have overdose of fear no no no

Unknown said...

محمد احمد محمد دارج وحسام اخوه سياسيين بقالهم 9 سنين ماخرجوش ليه لحد دلوقت رغم معاهم حكم بالبراءه
هو احنا يعني لازم نعمل اعتصام علشان يخرجو وكمان المعتقلين بتوع 9 مارس ماخرجوش ليه وهم مش بلطجيه وكمان عمرو البحيري نعمل ايه علشان صوتنا يوصل ويتو اتخاذ اللازم اعاليهم تعبانين جدا حرام بجد الي بيحصل

hardway said...

نوااااااااااااارة
شوفتك في دريم مع بلال فضل
بس حقيقي ... موزاااااااا
انا مكنتش متوقع كده .لالالالالالالا
موزا....موززززززززززززززززززززا حقيقي

Anonymous said...

يبقى احنا ما عملناش حاجه,وياريت الثوره ماقامت والناس ماتت على الفاضي,ايه الياس الي انت فيه ده يا ست الكل?

حسن على said...

اعتذر مسبقا للخروج عن الموضوع ,ولكنى انبة الى ان الشرطة العسكرية لاتحتاج لاستعمال العنف الا باوامر ,ولذا انصح قيادتها بالتشديد على استمرارها فى استعمال الاسلوب المتحضر ذاتة التى كانت تستعملة مسبقا فى التعامل السلمى مع المتظاهريرن ,فى نفس الوقت تستعمل الجزمة والقايش والعنف البدنى مع البلطجية ومعتادى الاجرام التابعين لامن الدولة والحزب الوطنى الفاسد

hardway said...

نواااااااااااااارة
شفتك في دريم مع بلال فضل
مكنتش مصدق......... طلعتي موزاااااااااا
حقيقي موزا موزا
اييييييييييييه ده

hardway said...

نواااااااااااااارة
شفتك في دريم مع بلال فضل
مكنتش مصدق......... طلعتي موزاااااااااا
حقيقي موزا موزا
اييييييييييييه ده

monasoly said...

انا قريت وجهه نظرك يا نواره بتاعه انك موافقه على التعديلات هاتقولى نعم ليها انا الاول ماكنتش مقتنعه وعاوزه جمعيه تاسيسيه لدستور جديد لكن بعد كلامك ده انتى عندك حق لان الجيش فعلا بدا يتعب والضغط على الجيش لن يولد الا الانفجار فى وجه الشعب ومها سيطرت اغلبيته على اعصابها ستبقى قله لن تستطيع السيطره على اعصابها تراقبها عيون الحزب الوطنى الفاشل عشان توقع بين الجيش والشعب وياريت فعلا يانواره تبداى انت وبلال فضل واصحابكم توعوا الناس ان لازم نوافق على التعديلات والا البديل هو قعاد الجيش مده اطول وساعتها ربنا يستر .

عندما ينطق القلم said...

أنا قلت ميت مرة أكبر تحدي أمامنا الآن هو توعية الناس، يا جماعة الإنتخابات هتيجي والناس مش هتعرف تنتخب مين وأدي بتوع الوطني بيرجعلهم بثوب جديد ثوب الحرباء، وإحنا مركزين بس في المظاهرات والصراخ والدستور والمناقشات الثقافية، مع أهمية كل ده لكن إحنا كده في وادي والشارع في وادي تاني وبالديمقراطية لو الناس ما تمش توعيتها هيرجع لينا إما الحزب الوطني أو الإخوان، لازم يكون هناك خطة توعية أساسية يقوم بها شباب الثورة في كل مكان خاصة في الأماكن الشعبية يا جماعة إللي قاموا بالثورة كتتتير صحيح لكن منهم كتير عنده فقر سياسي ولا يعرف الأشخاص ولا يعرف من الحزب الوطني غير جمال مبارك وأحمد عز وصفوت الشريف وفتحي سرور
هيه دي الحرب ولو ما إستعدلناهاش صح يبقى الله يرحم الثورة ويعوض على الثوار.
اللهم بلغت.. الللهم فاشهد.

الوصيف خالد said...

يا نوارة على فكرة أنا لا ناشط ولا نيلة، أنا واحد اتمرمط من غير اضطرار في الأحداث علشان لسة عنده أمل إن البلد الهباب دي تنضف..

أنا ضد موقفك من الجيش فعلاً بس مش حذم فيه علشان ما تزعليش بس مش علشان انتي صح..

بس انتي صح في حكاية الناس دي: ببساطة لازم النشطاء يتوجهوا للناس زي ما بتوع الوطني بيعملوا، وما يستموتوش في وقفات ومواقف مرفوضة شعبياً..

وإني لما أتناقش مع الناس أتوقع إنه ممكن جداً يكون فاهم أحسن مني.. كل ده انتي فيه صح..

لكن الغلط يا نوارة إني لما أروح للناس ما أقولهمش الكلام اللي أنا فعلاً مقتنع بيه علشان ما أخسرش رصيدي عندهم.. لو فكرتي فيها حتلاقي إن تعاليكي على المواطن اللي بتعملي معاه كدة أسوأ بكتير من تعالي الناشط اللي بيعتبر المواطن جاهل وبيقول كدة بصراحة، لإنه على الأقل بيقول إنه جاهل بس يمكن يفهم فيتغير وعلشان كدة بيكلمه باللي في قلبه على طول، إنما أسلوبك بيعتبره جاهل ولا يمكن إصلاحه فأسايره بدل ما أخسره علشان شعبيتي أو علشان قضية التغيير.. ما تفرقش..

والغلط كمان، والعيب واللي يخلي صحابك ليهم حق يزعلوا منك، إن لما الجيش يرتكب جرايم، وفي الآخر يفرج عن الناس اللي ليها أصحاب ناشطين حيعملوا زيطة وبقية العيال الغلابة يضيع مستقبلهم.. الغلط هنا إنك تتكلمي عن الموضوع بأقل قدر ممكن وتحت ضغط ضميرك وما تديلوش تغطية كافية وتقولي انتي وحد زي بلال فضل - وانتوا الاتنين من أنبل الناس في مصر واللي مش فاهم كدة يبقى حد حمار - بقول تقولوا كلام فارغ ولا يليق عن "جيشنا العظيم" وتدوا أعذار مايعة ولا تليق برضه عن إن أصله زهق مننا وتعب يا حرام!!

في مؤامرة وسخة واضحة للعيان - وواضحة ليكي - بتتعمل على الناس، واللي بيحترم الناس يفهمها، بالذوق وبالأدب ومع وضع احتمال فهمهم الأحسن، ويتصرف وفق ضميره ورزقه على الله.. وإذا كان مش هيقدر يتصرف لوحده بجسمه فكلمته حق عليه وواجبه يقول كل اللي في ضميره.. هو ده احترام الناس الحقيقي وهو ده الواجب تجاههم..

تحياتي..

teen eagle said...

ده كخه مثلا

http://www.facebook.com/notes/jade-stone/%D8%A7%D9%84%D9%85%D8%B3%D8%AA%D8%B4%D8%A7%D8%B1-%D9%87%D8%B4%D8%A7%D9%85-%D8%A7%D9%84%D8%A8%D8%B3%D8%B7%D9%88%D9%8A%D8%B3%D9%89-%D9%86%D8%A7%D8%A6%D8%A8-%D8%B1%D8%A6%D9%8A%D8%B3-%D9%85%D8%AD%D9%83%D9%85%D8%A9-%D8%A7%D9%84%D9%86/115160971894779

hossam said...

ارجوكى يا نوارة ان تراجعى نفسك فى موضوع التعديلات لان ناس كتير هتتاثر برايك
التعديلات لا تلزم الرئيس الجديد او مجلس الشعب بعمل دستور جديد لكن الموضوع متروك اختيارى يعنى احنا وبختنا
وعندى اقتراح انهم يزودوا التعديلات بحيث تشمل ايضا الحد من سلطات الرئيس
وفيه اقتراح تانى ان التعديلات دى تكون فى دستور مؤقت لا يحتوى على سلطات الرئيس
لكن بهذا الشكل فانى ارفض هذه التعديلات واستحلفك بالله ان تراجعى نفسك

hossam said...

ارجوكى يا نوارة ان تراجعى نفسك فى موضوع التعديلات لان ناس كتير هتتاثر برايك
التعديلات لا تلزم الرئيس الجديد او مجلس الشعب بعمل دستور جديد لكن الموضوع متروك اختيارى يعنى احنا وبختنا
وعندى اقتراح انهم يزودوا التعديلات بحيث تشمل ايضا الحد من سلطات الرئيس
وفيه اقتراح تانى ان التعديلات دى تكون فى دستور مؤقت لا يحتوى على سلطات الرئيس
لكن بهذا الشكل فانى ارفض هذه التعديلات واستحلفك بالله ان تراجعى نفسك

hossam said...

ارجوكى يا نوارة ان تراجعى نفسك فى موضوع التعديلات لان ناس كتير هتتاثر برايك
التعديلات لا تلزم الرئيس الجديد او مجلس الشعب بعمل دستور جديد لكن الموضوع متروك اختيارى يعنى احنا وبختنا
وعندى اقتراح انهم يزودوا التعديلات بحيث تشمل ايضا الحد من سلطات الرئيس
وفيه اقتراح تانى ان التعديلات دى تكون فى دستور مؤقت لا يحتوى على سلطات الرئيس
لكن بهذا الشكل فانى ارفض هذه التعديلات واستحلفك بالله ان تراجعى نفسك

مش فاهمه said...

انتى بتقولى يا نوارة انا مش مصدقه ودنى قصدى عينى يعنى عارفه ان الحزب الوطنى بوساخته نازل و ناوى على الأنتخابات و مع ذلك ناويه تقولى نعم و بتقولى زهقتى مننا و مش عايزه تمشى مع المجموع انتى بتتكلمى جد ولا بتهزرى

MarcH said...

فكرة
أنا درست قى التسويق فكرة ممتازة لاقناع واحد برأى غير اللى قى دماغه
اسمها ( أيوة و لكن ) يعنى ما أعارضش أقول ليه أيوة على رأيه و لكن أهاحم رأيه بعد كده
كدا أنا بألغى دفاعه الطبيعى عن رأيه و أخليه يتقبل كلامى
با ريت تفيد

Hesham essa said...

Dear Nawara I remember that post when you said we must speak to people , but I think that some of revolutions stell stockes at first steep
Where is there promises to help police
Where is there hands to rebuild destroyed offices
Why they stell speak in took shows program only
There are a lot of where and why
I think that the work time is start and inshaa Allah we will success to build new EGYPt

Unknown said...

العزيزة نوارة ,للأسف كلامك صحيح مثل ما قال أيمن رضوان ,بالفعل ألحزب الوطني يئس من القاهرة والعواصم الكبيرة فاتجه الى الخطة ب,وهي الصعيد والنجوع,لأن ماسبيرو كلها من الصعيد .واليوم جاء لأحد الأصدقاء رسالة على الموبايل تمجد بالمخلوع.هل من أحد يستطيع أن يفسر ليه كان في مظاهرات الجمعة في ميدان مصطفى محمود صور للمخلوع؟

بساطه said...

يانواره اتكلمي مع الائتلاف يتفاوضوا مع المجلس في تعديل التعديلات لو هم فعلا عايزين يخلصوا هيعدلوا ... بالذات الماده75 ...والالزام بوضع دستور بشكل واضح...و تكون اللجنه الي هتحط الدستور بعد كده بانتخاب شعبي مش مجلسي الشعب والشورى..... تحديد صلاحيات الرئيس المنتخب زي وضع النائب مثلا.. ده الحل الوحيد علشان الناس تجتمع على نعم للتعديلات والمفروض بجد الجيش يوافق لان لو النس قالت لا هو الي هيلبس.... لكن كمان في مشكله في الاستفتاء وهي التامين ... ربنا يستر

Unknown said...

يمكن انتي شوفتي حاجات بنفسك و أنا مصدقاكي لكن مش موافقه علي كلامك علي طول الخط أنا واحده من الناس مش عاجبني اللي بيعمله الجيش من تعذيب و اعتقال و تقديم لمحاكم عسكريه من راي كمان ان طنطاوي لازم يمشي لان هو كمان من اتباع نظام مبارك و أنا مش تبع الحزب الوطني و لا بيطق اسمع سيرتهم اساسا
احنا محتاجين ننسي شويه طريقه التفكير اللي هي يا ابيض يا أسود لو انت بتفكر كده تبق تبع فلان أو علان زي مثلا انتي هتصوتي نعم للتعديلات الدستوريه لكن أنا هصوت لا و بحترم وجهه نظرك تماما لان عندك اسباب وجيهه بس ما ينفعش أجي اقول اللي هيصوتوا نعم تبع الحزب الفلاني و اللي هيصوتوا لا عملاء لاسرائيل
الحريه هي حريه راي و حريه تفكير
كفايه بقي ارهاب فكري

طبيب بيطري said...

علي فكرة يانوارة
انتي قولتي اللي مش هينزل يبقي خاين
والناس مبتفهمش
لازم نواجه نفسنا باخطائنا قبل غيرنا
كان المفروض بدل تضييع الوقت في الاعتصامات والاستعباطات واتهام الناس بالتخلف واختصار الثورة في مجموعة اسماء مع احترامي لهم
كان لازم يكون فيه لقاء مع الناس وتوحيد قيادة
مش الائتلاف بيقول هنعلق الاعتصام وهو ميعرفش لامؤاخذة يعلق جلبية بلدي
ياريت كنا سمعنا صوت العقل م الاول
لكن مين لازم نهيص ونطلع في كل مكان ولا دا الجيش عمل لا اصل الوطني خربها لا اصل المشير مش عارف ايه
طيب فين انتوا من الشعب
كله بيقول الشعب يريد
طيب حد نزل وسال
ربنا يسترها ويصبر الجيش علينا

kingtut said...

دماعنا اتبرت.......اخر كلام نقبل التعديلات ولا نرفضهاااا؟؟؟؟؟؟؟ا

ramez_nassef said...

اولا غلط يتفض اعتصامنا يا اخت نوارة مطالبنا مش طايفية ومش فيوية مطالبنا وطنية و امتداد لمطالب الثورة و عاجلة جدا
وزهقنا
وقرفنا
اه صحيح ايه حكاية فلول النظام
ماهي دي زي المندسين
و الجهات الاجنبية
الي عمل كدة مسلمين
ومايوقفهمش غير مسلمين
علشان كدة اعتصام ماسبيرو امتداد للثورة و يحمي الثورة منن الركوب عليها
فلو فعلا انت جد
انضموا لنا قوونا ...مطالبنا عاجلة زي سقوط مبارك والان الان والا لن يكون شوفتك في ماسبيروا بتحاولي تقنعي الناس يمشوا ماكنش العشم كنت فاكرك هتيجي و تجيبي الاتلاف
حرام نبقى واقفين لوحدنا
حرام مطالبنا امتداد لمطالب الثورة حريتنا الدينية و الشخصية ممكن تكون اهم و انبل و اعجل من حريتنا السياسية
مش قادرين نهتف
ارفع راسك انت مصري
ومش هنهتفها الا لما تيجوا تقفوا جنبنا و ماتمشوش الا لما ناخد حقنا
و لغاية مادة يحصل
هرفع راسي لاني مسيحي
لاني لسة مش مصري
و بتعامل اقل من اي مصري
لو سمعتي الشيخ حجازي على دريم
و الشيخ حسان على مصر النهاردة
قولي لهم يتقوا ربنا ....عيب نقلب المجرم ضحية و الجاني مظلووووم
ماعملهاش فلول النظام ولو حتى عملوها عملوها بمسلمين و مايوقفهمش غير مسلمين

Ibrahim said...

المشكلة إن كل واحد راسم سيناريو في خياله ،، و شايف إنه الأفضل ،،

و المشكلة التانية ،،، الخوف و عدم الثقة في اي شئ ،،

طب لو عملنا بيان دستوري مؤقت ،، أيه الضامن إن الرئيس (( المنتخب )) و مجلس الشعب ((المنتخب ))

ميتحفوناش بدستور ديكتاتوري محترم ؟؟؟؟

في وجهة نظري إن الضامن هو عنصر الوقت السريع ،، قبل ما الثورة تفقد زخمها و الناس تهدي و تنسي

و الضامن التاني الديمقراطية السريعة

مفيش قوة دلوقتي تقدر تحصد الأغلبية

و الإختلاف و التنوع و تضارب المصالح و الأفكار هوا الضامن و ليس مجلس الشعب الملائكي المثقف الواعي الفاهم اللي أي حد بيحلم بيه

هما السيناتورات و لا مش عارف اسمهم ايه دوول بتوع أمريكا ،، ناس فاهمة و واعية و مثقفة و الشعب الأمريكي خبير سياسي بيختارهم بناء علي ذلك ؟؟

خلينا نتفق إن الحزب الوطني ،،،،، إستحالة ينتهي !!!!!

ممكن نحله ،،، بس هنبقي مجرد بنحل رمز صوري و بنطيب خاطر الناس مش أكتر

الحزب الوطني فكرة قائمة علي استغلال السياسة من أجل المصلحة الشخصية

و ده عمره ما هيخلص !!!!!!

للابد هيفضل الناس اللي عايزه تشتغل في السياسة منهم اللي بيدور علي الفلوس و منهم اللي بيدور علي السلطة و منهم اللي بيدور علي المجد الشخصي

و قلة منهم اللي هتكون بتدور علي خدمة الناس فعلا

أيه الحل ؟؟؟

إن إحنا ندور علي ما يقلل ذلك لأقصي درجة ،،

- انتخابات نزيهة بجد

- قانون يجرم الرشوة السياسية (( أعتقد موجود بالفعل ))

- أفكار فنية تانية زي الانتخاب بالقائمة للالتفاف حول القبلية

- إعلام شفاف (( اصبح متوفر الان عن طريق الإعلام الشعبي )

- جهات رقابية و قضائية لا تخضع لأي سلطة

ساعتها هيكون العمل السياسي عبء و تكليف أكثر منه مصلحة و سلطة

اتمني قوي الثورة تتخطي مرحلة الشكليات و السيناريهوات المملة سريعا و تنتقل للهدف السادس من أهداف ثورة يوليو

** إقامة ديموقراطيه سليمه **

مع إضافة كلمة من عندي بأسرع وقت ممكن و كفاية خووووووف

ENG.M.Mahrous said...

اسمحيلى استغل الديمقراطيه والهبل ده واسجل راى باختصار
1-الحزب الوطنى ممكن ببساطه يتحل ونخلص ويبقى كلنا استريحنا
2-مشكلة الوعى حقيقيه مصر مش كلها اسكنديره والقاهره لا مصر كلها اقاليم وناس غلابه ملهمش دعوه بالسياسه يعنى لما بتيجى الانتخبات بتاعت مجلس الشعب بينتخبوا عضو معين لما تقوليلهم اشمعنى ده يترد عليكى هيشغل عيالنا البوكس مش هيخش البلد هيسفلت الطريق هيصلح الصرف وطبعا غير انهم بياخدو فلوس عشان صوتهم انا مبنتقدش ده لكن انا بوضح ان مفيش وعى سياسى بالسلطات ومهمتها ولو رجعتى لارقام المشاركه فى الاستفتءات او حتى الانتخبات هلاقيها 20 فى الميه وحاجات تثبت ان مصر فعلا دوله مفيهاش وعى سياسى لكن مش معنى كده ان مفيش امل او ايه الى هيحصل فينا لا لان الثوره الى قام بيها هما الناس او بمعنى اصح الشباب الواعى الى بيقرا على راى الاستاذ بلال فضل الشباب الى بيقرا الكتب او حتى بيكتب ولو على الفيس اذا فى ناس واعيه ولحسن خظنا انهم من الناس الى تنفع تتحرك يعنى شباب لو قلنا لا للتعديلات مش بس هنحمى مصر من بتوع الحزب الوطنى يجوا مجلس الشعب تانى او ان ممثل المعارضه الوحيد يبقى الاخوان لا احنا بندى فرصه ننظم صفوفنا ونعرف الى مطلوب فى المرحله دى مش انتخبات وخلاص لا المطلوب نوعى الناس نعرفهم ان لقمة العيش المسؤال عنها ربنا والشخص نفسه وان الاسباب الى ربنا قلنا ناخد بيها هى ان لما نعرف واجبنا تجاه سياستنا وان لازم نراقب ونعرف نناقش مش كلام فاضى لانه بياثر فى مرتبنا الى بيفضل ثابت والاسعار بتزيد ووظيفتنا الى بتفضل زى ما هى والاقل مننا هو الى بترقى وبنخترعلوا منصب

ببساطه الرضا بما قدره الله هو ان افعل ما بوسعى من اجل تحقيق ما هو افضل

3-ومعلش انا طولت ممكن انا ارشح حد غير الى نوارا هترشحه لكن الى لازم يهمنى انا ونوارا ان يكون الاتفاق بنا مش مهم مرشح مين الى هيكسب لكن المهم ان بعد ما اى مرشح منهم يكسب يبقى انا ونوارا على اختلافنا متفقين ان احنا هنراقبه ونشوف حقق اد ايه من الى قال عليه ونقومه او اخطا ونعذره لو سهى وننصحه لو جهل

ومره تانيه معلش لو طولت

hani said...

سلخانة الجيش فى التحرير.. المتحف المصرى سابقا


http://www.egyptiantalks.org/invb/index.php?showtopic=117915

أرنوب said...

حيث كده لابد من تشكيل حزب واحد .. أكرر .. حزب واحد يضم كل القوى السياسية الشريفة الشجاعة التي تكلمت حين صمت الجميع وعارضت حين هادن الجميع وتظاهرت حين تقاعس الجميع وأعني بهم التالين
- حركة كفاية
- حركة شباب سته أبريل
- جبهة التغيير
- حزب أسامه الغزالي حرب
- وأخيراً إئتلاف خمسه وعشرين يناير الذي نجح شبابه في تتويج كل جهود السابقين في ثورة شعبية ناجحة أطاحت بالنظام
لابد أن يُدمج كل هولاء في حزب واحد قوي قادر على المنافسة في الإنتخابات البرلمانية القادمة .. الحزب ده يا نوارة هو الذي سيشكل ما أسميتيه أنتي (حاجة جديدة بورقها) وهي الحاجة التي أكدتي - محقة - اللي الفئة الصامتة ستخرج عن صمتها كي تصوت لصالحها
أما حالة التشرذم الحالية التي تميز هذه القوى فلن تفيد إلا فلول الحزب الواطي وسائر الأحزاب الورقية الأخرى

صوت الحق said...

بمناسبة هذا الكلام ياريت الناس تدخل على الجروب ده

عاووزين نعمل قائمة سودااء لكل اللي كانوا في الحزب الوطني او في امن الدولة او كسبورا مجلس الشعب بالتزوير او بالفلووس

القائمة دي مش مهمتهما محاكمة حد بس مهمتها الاساسية اننا نبقى عارفينهم وواخدين بالنا منهم ومايمسكوش مناصب مانسمعش منهم وهكذا

حد يقدر يساعدني في الموضووع ده ؟؟؟؟؟

د/ احمد مخلص

http://www.facebook.com/pages/%D8%A7%D9%84%D9%82%D8%A7%D8%A6%D9%85%D8%A9-%D8%A7%D9%84%D8%B3%D9%88%D8%AF%D8%A7%D8%A1/147052445359713

mokhles174@gmail.com

د. هانى احمد said...

يا جماعه يللى ح تقولوا نعم على الاستفتاء.. اقرأوا المادة 189 مكرر فعلا بتلزم مجلس الشغب والشورى بتكوين جمعيه لعمل دستور جديد ولكن شوف اخر كلمات هذه المادة والتى يغلوش عليها اللى عايزين الناس تقول نعم... بتقول حسب القواعد فى المادة 189 وهذه القواعد بتشترط الاتى:
لايستطيع رئيس الجمهوريه طلب دستور جديد الا اذا وافق مجلس الوزراء
لايستطيع مجلسى الشعب والشورى طلب عمل دستور جديد الا اذا وافق نصف الاعضاء
طيب يبقى فين الالزام بالدستور الجديد وهما حطين شروط
وبعدين عارفين ان صلاحيات الرئيس القادم واللى ح يقعد اربع سنين فهيا ولمدة السنه اللازمه لعمل الدستور حتكون نفسها اللى مبارك كان بيتمتع بيها.. طب ايه البديل؟؟
اضافة الاتى للتعديلات:
1. تقليص صلاحيات الرئيس لمنعه من ان يتحول الى ديكتاتور
2.ان يكون يتم انتخاب رئيس ومجلسىشعب والشورى مؤقتين لمدة سنه او لحين صدور الدستور الجديد
3. يتم وضع نص الزامى لكل من رئيس الجمهوريه ومجلسى الشعب والشورى المؤقتون بعمل دستور جديد نص ليس فيه اى شروط
طيب ايه ميزة هذه الاضافات:
1. ارضينا الجيش الذى يرغب فى العودة الى ثكناته ومش ح يطول فى السلطه زى ما البعض خايف
2. ضمنت قوى الثورة عمل دستور جديد
3. بما ان الرئيس مؤقت والمجلسين مؤقتين ومرغمين على عمل الدستور الجديد فلن تتقدم اذناب الحزب الوطنى وتكون فرصه للقوى الجديده لعمل جزور شعبيه لها
4.عودة الاستقرار نسبيا الى مصر وتكون فرصه لتحسين الاقتصاد وتصفيه الفساد وصدور الاحكام ضد الفاسدين ليرتدع اللى بيفكر كده ولا كده

د. هانى احمد said...

يا جماعه يللى ح تقولوا نعم على الاستفتاء.. اقرأوا المادة 189 مكرر فعلا بتلزم مجلس الشغب والشورى بتكوين جمعيه لعمل دستور جديد ولكن شوف اخر كلمات هذه المادة والتى يغلوش عليها اللى عايزين الناس تقول نعم... بتقول حسب القواعد فى المادة 189 وهذه القواعد بتشترط الاتى:
لايستطيع رئيس الجمهوريه طلب دستور جديد الا اذا وافق مجلس الوزراء
لايستطيع مجلسى الشعب والشورى طلب عمل دستور جديد الا اذا وافق نصف الاعضاء
طيب يبقى فين الالزام بالدستور الجديد وهما حطين شروط
وبعدين عارفين ان صلاحيات الرئيس القادم واللى ح يقعد اربع سنين فهيا ولمدة السنه اللازمه لعمل الدستور حتكون نفسها اللى مبارك كان بيتمتع بيها.. طب ايه البديل؟؟
اضافة الاتى للتعديلات:
1. تقليص صلاحيات الرئيس لمنعه من ان يتحول الى ديكتاتور
2.ان يكون يتم انتخاب رئيس ومجلسىشعب والشورى مؤقتين لمدة سنه او لحين صدور الدستور الجديد
3. يتم وضع نص الزامى لكل من رئيس الجمهوريه ومجلسى الشعب والشورى المؤقتون بعمل دستور جديد نص ليس فيه اى شروط
طيب ايه ميزة هذه الاضافات:
1. ارضينا الجيش الذى يرغب فى العودة الى ثكناته ومش ح يطول فى السلطه زى ما البعض خايف
2. ضمنت قوى الثورة عمل دستور جديد
3. بما ان الرئيس مؤقت والمجلسين مؤقتين ومرغمين على عمل الدستور الجديد فلن تتقدم اذناب الحزب الوطنى وتكون فرصه للقوى الجديده لعمل جزور شعبيه لها
4.عودة الاستقرار نسبيا الى مصر وتكون فرصه لتحسين الاقتصاد وتصفيه الفساد وصدور الاحكام ضد الفاسدين ليرتدع اللى بيفكر كده ولا كده

negmat lail said...

من الضروري ان يكون المترشح للرئاسة لا يحمل جنسية اخرى ،ولا زوجته ايضا ولا أهله .
وذلك ليس انتقاصا من وطنيتهم ولا طعنا فيهم ولكن من يتجنس بالجنسية الأمريكية مثلا فهو هنا مطالب من أمريكا الحامل لجنسيتها باطاعة القوانين والولاء لها فكيف اذا تعارضت القوانين والمصالح بين مصر وامريكا لمن سينحاز ؟
كما ان مقولة ان المصري الأمريكي اضطر للتجنس بالجنسية الامريكية فهي مقولة تعني انه ينكر فضل تلك الدولة عليه وعلى استعداد للتملص من الانتماء اليها بالرغم مما قدمته له وذلك ادعى الا ننتخبه .
أما عن الأهل والزوجة فمن الطبيعي ان يؤثر الأهل و الأزواج على بعضهم.

Ahmed elshebli said...

كلام جميل و لازم يوصل لكل واحد فى مصر يا نوارة الانتصار و الثورة

الجبرتوته said...

لمستشار هشام بسطويسي يطرح إعلانا دستوريا انتقاليا
http://www.facebook.com/#!/notes/%D9%85%D9%86%D9%80%D9%80%D9%80%D9%80%D9%89-%D8%A7%D9%84%D8%B4%D8%A7%D8%B0%D9%84%D9%80%D9%80%D9%89/%D8%A7%D9%84%D9%85%D8%B3%D8%AA%D8%B4%D8%A7%D8%B1-%D9%87%D8%B4%D8%A7%D9%85-%D8%A8%D8%B3%D8%B7%D9%88%D9%8A%D8%B3%D9%8A-%D9%8A%D8%B7%D8%B1%D8%AD-%D8%A5%D8%B9%D9%84%D8%A7%D9%86%D8%A7-%D8%AF%D8%B3%D8%AA%D9%88%D8%B1%D9%8A%D8%A7-%D8%A7/196548340367347

د. هانى احمد said...

يا جماعه يللى ح تقولوا نعم على الاستفتاء.. اقرأوا المادة 189 مكرر فعلا بتلزم مجلس الشغب والشورى بتكوين جمعيه لعمل دستور جديد ولكن شوف اخر كلمات هذه المادة والتى يغلوش عليها اللى عايزين الناس تقول نعم... بتقول حسب القواعد فى المادة 189 وهذه القواعد بتشترط الاتى:
لايستطيع رئيس الجمهوريه طلب دستور جديد الا اذا وافق مجلس الوزراء
لايستطيع مجلسى الشعب والشورى طلب عمل دستور جديد الا اذا وافق نصف الاعضاء
طيب يبقى فين الالزام بالدستور الجديد وهما حطين شروط
وبعدين عارفين ان صلاحيات الرئيس القادم واللى ح يقعد اربع سنين فهيا ولمدة السنه اللازمه لعمل الدستور حتكون نفسها اللى مبارك كان بيتمتع بيها.. طب ايه البديل؟؟
اضافة الاتى للتعديلات:
1. تقليص صلاحيات الرئيس لمنعه من ان يتحول الى ديكتاتور
2.ان يكون يتم انتخاب رئيس ومجلسىشعب والشورى مؤقتين لمدة سنه او لحين صدور الدستور الجديد
3. يتم وضع نص الزامى لكل من رئيس الجمهوريه ومجلسى الشعب والشورى المؤقتون بعمل دستور جديد نص ليس فيه اى شروط
طيب ايه ميزة هذه الاضافات:
1. ارضينا الجيش الذى يرغب فى العودة الى ثكناته ومش ح يطول فى السلطه زى ما البعض خايف
2. ضمنت قوى الثورة عمل دستور جديد
3. بما ان الرئيس مؤقت والمجلسين مؤقتين ومرغمين على عمل الدستور الجديد فلن تتقدم اذناب الحزب الوطنى وتكون فرصه للقوى الجديده لعمل جزور شعبيه لها
4.عودة الاستقرار نسبيا الى مصر وتكون فرصه لتحسين الاقتصاد وتصفيه الفساد وصدور الاحكام ضد الفاسدين ليرتدع اللى بيفكر كده ولا كده
حد له رأى يدحض الرأى ده.. يتفضل

Sgheita said...

http://www.masrawy.com/news/egypt/politics/2011/march/13/national_party.aspx?ref=rss
adeeky ya setty awwel marrah fee 7ayatek mathalan tetef2y enty wel 7ezb el watany 3ala 7agah wa7dah

Sgheita said...

http://malek-x.net/drupal/node/684 the fact that these note makes sense and that your position has been strange to me from the beginning about saying yes.. your reasons didn't seem madroussah .. and the fact that I know you respect the guy who wrote this and trust his opinion.. i want you please to reconsider after reading (if you haven't read it yet) cause your choice does effect a lot of people

بساطه said...

انا جالي اكتئاب بجد يانواره لما اتكلمت مع ناس محترمين ومتعلمن ودكاترة جامعه ومش تبع اي حزب بيتكلموا الكلام بتاع معلش ياريس حقك علينا.. وان الثوره قادها الاخوان وايران ويوم الجمعه ومظاهراته ايران الي بدعتها.. واحنا مش فاهمين الناس دي عايزه ايه تاني.. وكفايه وحرام وشفيق.. طب وبعدين ده بجد الناس دي كتير... منهم اختى بس مش معتوهه اوي كده وبتقول عليه انا الي متخلف .. طب الجهله بقى هيعملوا ايه؟؟ لو مرشحوش حسني تاني هيرشحوا عمرو موسى... وبالمناسبه كل فئات المجتمع بتجمع عليه لما هطق من الغيظ شكله هيكسب

airprince said...

انا فعلا قابلت ناس من دي كتير، في الميادين و المترو و القهاوي، بحس عندي حاسة شم اني لو قلبته هلاقي معاه كارنيه حزب وطني

mohandsmasry said...

اذناب الحزب فعلا شغالة فى كل حتة وبيعملوا اجتماعات وبيرتبوا اوراقهم علشان الانتخابات المهم ان الناس ماتصوتش لاى واحد انتمى للحزب ده قبل كدا مهما كان نضيف وشريف مطلوب حملة توعية جامدة لكل الشعب علشان الناس دى ما ترجعش تانى بالنسبة للتعديلات فهى قاصرة وضعيفة اصلا فى صياغتها ليا ملحوظة هامة جدا ليه نسبة الخمسين فالمية دى قاعدة ما اتلغتش على الاقل كان فى الانتخابات اللى جاية علشان ده اهم برلمان فى تاريخ مصر هايتولى تعديل كل القوانين والتشريعات سيئة السمعة والمتفصلة مخصوص لصالحهم وماكانتش محتاجة غير للهتيفة والمطبلاتية ؟ مش معقول هاننتخب اللى يادوب بيفك الخط ولا الجاهل اللى مش عاوز اكتر من الحصانة والفلوس وخلاص عاوزين اعضاء محترمة مثقفة تعرف تتناقش وتعبر عن وجهة نظر ورغبات الشعب مش ناس بتزوغ ولا بتنام ولا هما اصلا مالهمش فالبتنجان

hosseiny shatat said...

الله ينور عليك
انا موافق على كل كلمه بتقوليها من الالف الى الياء واول مرة اوافق على كلام واحده او واحد بالشكل ده
على فكره الاخوان موش هيسمحوا للوطني يتواجد في اي حته
الدواير الى مش هينزلوا فيها هيدعموا الثوار
انصح بعض الثوار ال بيهاجموا الاخوان ويتهموهم بالخيانه يبدأوا ينزلوا الشارع زيك ويشتغلوا
كفايه كلام