Wednesday 23 March 2011

طلعوا الاعلان الدستوري اللي اداهولكم المستشار البشري بقى

يا سيادة البيه الجيش... هو ايه الساسبنس ده؟
كل حاجة لازم تتعمل ببطء كده؟ ما المستشار طارق البشري عامل لكم الاعلان الدستوري ومجهزهولكم وكله تمام، ماشي انا عارفة ان دول ناس لبط وبياكلوا الدماغ
وبتلاتين رأي كل ساعة، بس معلش اعذروهم، عشان تعرفوا بس مبارك عمل فينا ايه، انا اقولكم على حل يرضي بتوع نعم وبتوع لا
انتوا حتعلنوا اعلان دستوري بالمواد اللي احنا صوتنا علينا والاضافات اللي حطها المستشار طارق البشري للصلاحيات وحتقولوا عليه اعلان دستوري، صح؟ مش دي الخطة دلوقت؟ واحنا مستنينها اهو، وكل حاجة جاهزة على الاعلان بس
قولوا لهم بقى الجملة دي: "ونعلن سقوط دستور 71" انا عارفة طبعا انكم عايزين ترجعوا البلد زي ما استلمتوها ما تبقاش ناقصة دستور
بس صدقوني مش حينفع
لو اعدنا تفعيل دستور 71 دلوقت انتوا حتمشوا، وصدقوني كمان مرة، ما حدش عايزكم تمشوا... غيري، وطبعا مش لأن متضايقة من وجودكم ولا حاجة، ده انا حتى لسه ما اتصورتش على الدبابة، بس كان القصد اني ما اتعبكوش، واحنا واضح اننا تقلنا عليكم، والشرطة العسكرية عملت مجهود، وبعدين انا صوت بنعم اصلا عشان عايزة الدستور الجديد اللي يعملهولنا ناس مدنيين ما يبقاش تحت حكم عسكري
اللي صوتوا بنعم مافيهمش حد عايزكم تمشوا وتجيبوا رئيس المحكمة الدستورية اغلبهم شايفين ان ده الدستور اللي جابه الجيش وما يصحش نتني له كلمة وهو عارف اللي فيه الصالح
ومش محتاجة نشرح ان كل بتوع لا صوتوا عشان الجيش يقعد
اذن.. الجيش والشعب ايد واحدة وانا اللي حشرت نفسي في اللي ماليش فيه
ثم لو جبتوا رئيس المحكمة الدستورية لازم يعمل انتخابات بعد مرور 60 يوم من خلو المنصب.. من خلو المنصب.. يعني فاضل عشرين يوم على الانتخابات اللي مفروض يجريها رئيس المحكمة الدستورية لو فعلتوا 71
يبقى مش حتفعلوا دستور 71 ده كلنا عارفينه، طبعا انا قريت انكم عايزين تفعلوه تاني بعد الانتخابات، هو الحقيقة بعد الانتخابات السلطة حتتسلم لسلطة مدنية ومش حينفع يا سيادة البيه الجيش حضرتك ترجع اي حاجة لأن مالكوش سلطة وقتها - مش القصد ليكم سلطان على القلوب طبعا - بس مالكمش ترجعوا الدستور ده، وحتى لو كلمتوا الرئيس الجديد المنتخب وقلتوا له: رجعه، احسن احنا مستلمين البلد بدستور 71 وعايزين نرجعها زي ما استلمناها لبعدين يقولوا لنا اخدتوا البلد ورجعتوها ناقصة دستور
الرئيس المنتخب مش حيعرف يعمل الحكاية دي
لأنه محكوم بإعلان دستوري بيلزمه بدستور جديد، يعني حتى الرئيس والبرلمان المنتخبين مالهمش سلطة يرجعوا دستور 71
اذن، فهو على ارض الواقع ماحدش حيشتغل بالدستور ده، لا آجلا ولا عاجلا
سواء انتوا اعلنتوا ده او ما اعلنتوهوش... بس احنا عندنا شوية ناس مهابيش هنا نفسهم يسمعوا كلمة حلوة منكم، اعذروهم، بقالهم تلاتين سنة تحت حكم واحد بيديهم على قفاهم ويقولهم كلام ويبقى مطبخ لهم مصيبة، فمعلش يعني خلوها عليكم المرة دي وقولوا لهم الجملة دي خلينا نخلص لأني انا فعلا اتخنقت وراحوا عملوا للناس هيستيريا بلا مبرر واضح وخوفوهم
وانا اساسا عمالة اقول التصويت بنعم التصويت بلا مش حيفرق النتيجة اللي يفرق ان الدستور الجديد وفقا للتعديلات حيتعمل في ظل حكم مدني، والفرق ان الاعلان الدستوري ده احنا مصوتين عليه
بس طلعوا بقى الاعلان الدستوري دلوقت عشان الناس قلقت كده.. وانا عارفة ان معاكم اعلان دستوري كويس ما تقلقوش منه ده حيرضي كل الناس ان شاء الله.. على قد ما نقدر يعني، ما عدا اللي رجعوا من برة بمهمة مخصوصة انهم يفسدوا الثورة طبعا.. اللي هم مايكل منير بدون ذكر اسماء 
حاجة تانية: عرفت من مصدر موثوق بيه ان سوزان كل يوم والتاني بتيجي مصر وبتتغدى وتتعشى هي وابنها وهم الاتنين مفروض يتقدموا للمحاكمة.. وانها لم تفقد الامن وعندها امل قال ايه ترجع والظاهر هي اللي مسلطة الراجل ده
طبعا ده هلس مالوش اي لازمة قانونية، لكن حرام الناس حتتخض، راعوهم، ما شافوش شوية في حياتهم، طلعوا بقى الاعلان الدستوري لان اصلا الحيزبون دي متغاظة من الجيش والشعب الاتنين وهي خلل كده وتقريبا هي اللي بتحرك الثورة المضادة لأن دماغها سم، انا مش فاهمة انتوا ما بتحددوش اقامتها ليه؟ وغدا وعشا ايه اللي بتعملهم هنا وبفلوس مين؟ 
وما تسمعوش كلام يحيى الجمل.. يحيى الجمل وحش
وحش ومش كويس كمان
حاجة تالتة: احنا عايزين الثلاثي المرح عشان دول صبيانها اللي بيشتغلوا تحت ايدها
حاجة رابعة:
واحد اتصل بيا بيقول لي في حملة لترشيح د.سليم العوا وبيقول لي ان انا مشاركة في الحملة!
انا مش مشاركة في حملة ترشيح سليم العوا، وما اعتقدش ان من الحصافة ان العوا يترشح، اللي عمل الصفحة دي يقصد يعمل مقلب

9 comments:

بساطه said...

معلش استحمليني يانواره ... الاعلان الدستوري مش هيكون فيه 50 في الميه عمال وفلاحين تاني صح؟؟؟؟؟
ارجوكي طمنيني ان متغاظ وقلقان ومش مستريح ومعرفش ايه السبب ؟؟؟؟ ربنا يستر
المفروض ان الكلام ده كله يكون مات مع دستور 71 مش كده؟؟؟

Unknown said...

شكرا جزيلا وجزاكِ الله خيرا
يا ترى إيه اللي مأخرهم
ما خلاص النتيجة طلعت وكله كان ماشي تمام
ربنا يستر

Unknown said...

نوارة الدنيا
اى تعليق على كلامك هيبوظة هو كده جميل وموافقين على اللى انت قلتيه
انت فعلا بنت مصر و فخر لشباب مصر
ربنا يحفظك و يزيدك عقل وحكمة

بالنسبة لموضوع الترشيح ياريت يكون فيه 20 واحد مرشحين للرئاسة مش بس اثنين و عليهم كلام ( انا اقدر البردعى اكثر من موسى بس الاثنين لا يصلحوا)
كمان الباقى ( ايمن نور و لا حمدين و لا شفيق ..دول اقل من انهم يقودوا مصر و خاصة فى المرحلة الحساسة دى

مصر دى حاجة كبييييييييييييييرة جدااااااااااااااا
و المخلوع صغرها علشان تبقى على مقاسه
فاصبحت بدون دور لا عربيا و لا اقليميا و لا علميا
و هى عمرها ما كانت ده

فقط سعدت بخبر ترشح المستشار / هشام البسطويسى
و اراه رجل محترم لا غبار عليه و اقرب لشخصية عصام شرف

و سعد اكثر بخبر ترشح الدكتور / عبدالله الاشعل

و هو رجل محترم ايضا و قد يكون اصلح خارجيا من المستشار هشام
هو كان نائب وزير خارجية قبل استقالته و هو استاذ جامعى و له اكثر من 40 مؤلف و له مواقفه المشرفة قبل الثورة و اثناء الثورة

و ده اللينك

http://www.facebook.com/group.php?gid=112082428830158&v=info

و ياريت يكون فيه مرشحين كثير و نختار افضل برنامج و رؤية وتاريخ

Unknown said...

نوارة الدنيا
اى تعليق على كلامك هيبوظة هو كده جميل وموافقين على اللى انت قلتيه
انت فعلا بنت مصر و فخر لشباب مصر
ربنا يحفظك و

بالنسبة لموضوع الترشيح ياريت يكون فيه 20 واحد مرشحين للرئاسة مش بس اثنين و عليهم كلام ( انا اقدر البردعى اكثر من موسى بس الاثنين لا يصلحوا) كمان الباقى ( ايمن نور و لا حمدين و لا شفيق ..دول اقل من انهم يقودوا مصر و خاصة فى المرحلة الحساسة دى

مصر دى حاجة كبييييييييييييييرة جدااااااااااااااا
و المخلوع صغرها علشان تبقى على مقاسه
فاصبحت بدون دور لا عربيا و لا اقليميا و لا علميا
و هى عمرها ما كانت ده

فقط سعدت بخبر ترشح المستشار / هشام البسطويسى و اراه رجل محترم لا غبار عليه و اقرب لشخصية عصام شرف

و سعد اكثر بخبر ترشح الدكتور / عبدالله الاشعل
و هو رجل محترم ايضا و قد يكون اصلح خارجيا من المستشار هشام
هو كان نائب وزير خارجية قبل استقالته و هو استاذ جامعى و له اكثر من 40 مؤلف و له مواقفه المشرفة قبل الثورة و اثناء الثورة

و ده اللينك

http://www.facebook.com/group.php?gid=112082428830158&v=info
و ياريت يكون فيه مرشحين كثير و نختار افضل برنامج و رؤية وتاريخ

احلام جوليا said...

عاوزين محكمة للثورة زي ثورة 52 شرعيتها زي شرعية الجيش من الثورة نفسها يتحاكموا فيها كل المفسدين بلا تباطؤ كل يوم بيطلعوا لنا عفريت من كمامهم اسمعي كلامي يا نواره طاقية الحاوي مبتخلاش ابدا وهم عارفين مداخلها ومخارجها وانتم ثوار زي عيدان الزرع الاخضر لسه عودكم طري مش حتقدروا على الاعيبهم حاكموهم بسرعة وخلصونا ورجعوا الفلوس قبل البلد ما تجوع فات من الست شهور شهر وبقوا خمسه ومخزون الاغذية حيخلص ارجوكم محكمة ثورة وانا اول الموقعين عليها باذن الله بس اعملوها واجمعوا توقيعات عليها ارجوك يا نواره

Early bird said...

هم سايبن الاهرام وقايادتها ليه وكل البلاوى اللى زعلوا ان الشعب قال كلمته وبقى يهرتل اصل احنا عايزين الاستقرار واللى صوت ده علشان عايز الدستور القديم هم هبل ولو كانت النتيجه طلعت بلا كانوا حيقولوا شفتم بقى الاغلبيه الصامته عجباها المواد اللى فى الدستور القديم ومش عايزاها تتعدل ويبقى مبارك بقى لازم يرجع ايه الهبل ده
يا ريت لجنه التحكيم اللى استعان الشعب بيها اللى هى الجيش تطمن الناس شويه ويا ريت بالمره يعنى تبعت مندوبين للمحافظات يستطلعوا رأى الناس فى صفوت الشريف وسرور وزكريا عزمى علشان يا حرام اللجنه دى كانت عايشه فى المريخ وهبطت علينا بصاروخ لانها لو كانت لجنه ارضيه من اى مكان فى العالم كانت عرفت ان الناس دى هم اللى افسدوا مصر لان ريحتهم ازكمت اعالم

Early bird said...

هم سايبن الاهرام وقايادتها ليه وكل البلاوى اللى زعلوا ان الشعب قال كلمته وبقى يهرتل اصل احنا عايزين الاستقرار واللى صوت ده علشان عايز الدستور القديم هم هبل ولو كانت النتيجه طلعت بلا كانوا حيقولوا شفتم بقى الاغلبيه الصامته عجباها المواد اللى فى الدستور القديم ومش عايزاها تتعدل ويبقى مبارك بقى لازم يرجع ايه الهبل ده
يا ريت لجنه التحكيم اللى استعان الشعب بيها اللى هى الجيش تطمن الناس شويه ويا ريت بالمره يعنى تبعت مندوبين للمحافظات يستطلعوا رأى الناس فى صفوت الشريف وسرور وزكريا عزمى علشان يا حرام اللجنه دى كانت عايشه فى المريخ وهبطت علينا بصاروخ لانها لو كانت لجنه ارضيه من اى مكان فى العالم كانت عرفت ان الناس دى هم اللى افسدوا مصر لان ريحتهم ازكمت اعالم

rahrom said...

السلام عليكم يانوارة اسال حاجة انا ان شاء الله هاطبع البيان وهاحاول قد ماقدر اجيب امضاءات بس انا برة مصر اوصلهم ازاى وفين مستنية ردك

Anonymous said...

من المسؤل,عن تأخير تحقيق أهداف الثورة ؟؟..,تأخير النظر فى الإتهامات لمبارك ورؤوس الفساد,عدم حل حزب الفساد,تأخير تغيير المحافظين,تأخير تغيير الإعلاميين,من الإعلام المرئى والمقروء,الذين تسببوا بتحريضاتهم,فى قتل الثوار,تأخير تغيير حكومة شفيق,ثم الإحتفاظ,فى حكومة شرف,بأغلبية من وزراء حزب الفساد,تأخير حل أمن الدولة,تأخير تمكين المغتربين,حوالى عشر ملايين,من التصويت..,من الذى يضع,دائما,قدمه,على فرامل قطار الثورة المصرية,ليبطأه,فى الوصول لمحطاته ؟؟! د. شريف عبد الحكم-باريس