Monday 28 March 2011

الله يجبر بخاطرك يا مجلسنا العسكري.. طب بالنسبة للاعلان الدستوري؟


تحديث
الخبر ده كخطوة اولى كويس، بس هو مش مشكلته الكسب غير المشروع، ده شارك في الاربعاء الاسود والمجلس القومي لحقوق الانسان والتحقيقات مع النائب العام اثبتت انه مشارك فيها ولازم يتم حبسه على ذمة التحقيق، احنا قلقانين منه طول ما هو برة.. على الاقل ما يبقاش عنده حرية الحركة وحرية الاتصال ببلطجيته لانهم بيئذونا، لو هو اتمسك اللي وراه حيتشردوا ويدوروا لهم على شغلانة شريفة.. او غير شريفة بس مش حتبقى حسب خطة ممنهجة زي دلوقت
كمان فيه واحدة صاحبتي بتعمل اعمال خيرية في اسطبل عنتر وقالت ان الحزب الوطني شغال عادي كأن فيه خطة معينة بيحضروا لها، يوم الاستفتاء واحد اسمه خالد حمودة في اسطبل عنتر تبع الحزب الوطني الراجل ده ما كانش فاضي ثانية وكمان بيستعين بتجار مخدرات وفيه تاجر مخدرات منهم عضو في الحزب الوطني احنا عايزين نخلص منهم دول، وبيشتغلوا ليه؟ هم حيترشوا في مجلس الشعب تاني؟ لا ما يترشحوش بقى، خالد حمودة ده مش كويس ابدا، وفيه غيره كتير في الحزب الوطني، لازم نشاطهم يتجمد
وشكرا
الله يجبر خاطركم ويسعدكم قادر الكريم يا رب
نشكركم على سرعة الاستجابة، بالنسبة للانتهاكات انا مصدقة ان فيه اجراءات تمت بشأن اللي عملوا كده، بس اصلا المحاكمات دي ما بتبقاش علنية، مافيش فرد جيش بيتحاسب بعلم المدنيين ابدا، فكونهم اصلا يقولوا لنا انهم اتخذوا اجراءات ضد اللي عمل كده ده لوحده حاجة هم مش متعودين يعملوها، بس نظرا للظرف الحالي هم قالوا
تمام كده
احنا بقى في انتظار الاعلان الدستوري واعلان سقوط دستور 71 
وفي انتظار احالة الثلاثي المرح (صفوت الشريف، وفتحي سرور، وزكريا عزمي) للمحاكمة، ويا ريت لو يتم التحفظ عليهم من دلوقت لأنهم بيضايقونا قوي هم وعمر سليمان، قاعدين يلعبوا في الفتنة الطائفية وكل يوم والتاني يسلطوا ناس يبعتوا تهديدات للكنائس ولسه حارقين المقر القديم للبنك المركزي وعاملين لنا لبش.. فيا تقولوا لهم يلموا نفسهم ويبلطوا يطلقوا كمان اشاعات، عشان هم البلطجية بتوعهم اللي بيعملوا اشاعات وكلام فارغ
على فكرة لما كنا عند وزارة الداخلية والدة بثينة كامل شاورت على واحد كان بيحاول يتحرش بعناصر الجيش عشان يعمل مشكلة بين المتظاهرين والجيش وقالت له: انا من سكان المنطقة وعارفاك، انت كنت بتنزل في انتخابات فتحي سرور وبتقفل له الانتخابات، فراح مشي بسرعة قبل ما الناس تمسكه
فرجاء، هم مستفيدين من انهم يعملوا مشاكل بين الشعب والجيش، وبعدين يطلع فتحي سرور يقول كلام فيه تملق عشان فاكر نفسه كده ناصح
وعايزين كمان سيطرة على عناصر وبلطجية الحزب الوطني وامن الدولة لان امبارح كان فيه هجوم على بيت مرشد الاخوان المسلمين وتقريبا كانوا عايزين يلزقوها في المسيحيين 
بس هم بيعملوا حاجات مش كويسة ابدا
فلو تريحونا وتتحفظوا على الاربعة: صفوت الشريف، فتحي سرور، زكريا عزمي، عمر سليمان
ولو حتى اقامة جبرية في بيوتهم، وتراقبوا تليفوناتهم عشان نعرف بالظبط هم بيعملوا ايه.. معلش، ما ياما راقبوا تليفوناتنا من غير سبب، لما هم يتراقبوا بسبب عشان حماية البلد مافيهاش حاجة، واحب انبه بس انهم عندهم وسائل اتصال اخرى غير التليفونات العادية فيا ريت يبقوا تحت رقابة مشددة 
بالنسبة لسوزان وجمال كمان عايزين نعرف هم فين لأن فيه كلام كتير انهم في القاهرة وده بيوترنا جدا، وعايزينهم يتحاكموا ويتراقبوا لحين احالتهم للمحاكمة

من ناحيتنا احنا:
احنا لازم نعمل لجان شعبية يا شباب في كل المحافظات مهمتها التصدي للناس اللي بتحاول تعمل فتن طائفية وتهديدات للكنائس ونعرف مين دول بالظبط، ماحدش يطلع يقول "سلفيين" يعني ايه سلفيين؟ هو السلفي ده مولود بوحمة مكتوب عليها: احترس سلفي يرجع الى الخلف؟ اي حد يضرب جلابية ودقن ويعمل نفسه سلفيين
اللي تلاقوه في اي محافظة بيعمل فتن طائفية، بيهدد كنائس، بيحاول يفرض الحجاب على البنات زي ما سمعنا والله اعلم بصحة الاشاعة دي، تمسكوه وتقبضوا عليه وتسلموه للجيش
مش للشرطة.. معلش.. نتعب الجيش معانا شوية، احنا ما عندناش لسه ثقة في الشرطة لان لهم تاريخ طويل في تسليط بلطجية يعملوا فتن طائفية
يتسلم للجيش، وقبل ما يتسلم للجيش تشوف بطاقته، هم خلصوا حكاية البلطجية دي، ولما فشلت دخلوا لنا في حكاية "سلفيون يهددون"، والمفروض لو هم مش سلفيين فعلا اللي بيهددوا الكنائس وبيقطعوا الودان وبيفرضوا الحجاب بالقوة دول، المفروض الناس اللي فعلا سلفيين هم اول ناس يعملوا اللجان الشعبية دي ويقبضوا على اللي بيعمل كده في كل المحافظات ويسلموه للجيش عشان على الاقل يحموا سمعتهم بدل ما كل الناس عمالة تتهمهم انهم بيخربوا البلد
ونرجع نتعاون مع بعض كلنا تاني، ونستعيد روح التحرير، ده ممكن جدا.. فيه مسئولية دلوقت على السلفيين، اللي شفتهم بعيني وهم واقفين يحموا المسيحيين في القداس، المفروض انهم يتخذوا اجراء ضد الناس اللي بتحول تصورهم على انهم متوحشين وبيقطعوا الودان
احنا ممكن نختلف فكريا
بس انا واثقة مليون المية.. مليون المية.. مليون المية.. ان مش السلفيين اللي بيعملوا الحاجات دي، وان مافيش شيخ سلفي واحد، مهما كنت مش باطيقه، حيطلب في السر ولا في العلن من مريديه انهم يعملوا حاجة زي دي ابدا ابدا ابدا.. يستحييييل يستحييييل
ده شغل صفوت الشريف وعمر سليمان وفتحي سرور وزكريا عزمي.. انا متأكدة من كده
ملحوظة:
الناس فرحانة يا مجلسنا العسكري بالبيان ده على فكرة، انا شفت ردود افعالهم على التويتر والفيس بوك، وده بيأكد ان كل املهم انهم يطمئنوا مش عايزين يعملوا خناقة ولا حاجة
ناقص بس:
1- الاعلان الدستوري اللي يلغي 71.. هم بس عايزين يسمعوا "اسقاط دستور 71" والنبي والنبي والنبي.. الله يخليكم، النهاردة بس 
2- نشوف الثلاثي مقبوض عليهم عشان نرتاح ومعاهم عمر سليمان بالمرة.. او على الاقل نعرف انهم تحت الاقامة الجبرية والرقابة المشددة ونشوف اثر ده على حياتنا لانهم خربوا لنا الدنيا
3- مبارك واسرته.. وخصوصا اسرته، الحيزبون وابنها بالتحديد، يتحاكموا، وما ينطلقوش كده في القاهرة يجتمعوا بالناس، ويبقوا تحت المراقبة المشددة كمان بس نشوف خطوات جدية على الاقل في سبيل محاكمتهم
4- حلو التواصل ده كده وبيانات وبتاع.. احنا بنبسط لما بنحس ان فيه آلية للتواصل معانا، انا شخصيا مبسوطة
5- وما عادش بقى ننضرب تاني، ويبقى فيه جهة تابعة للجيش تستقبل الشكاوى للشباب اللي اتعذب وكده، بدل ما يضطروا انهم يطلعوا على النت ويصوروا نفسهم، لأن دي حاجة بتسبب لهم الم نفسي فوق الالم النفسي اللي اتعرضوا له انهم يصوروا نفسهم ويتكلموا عن حاجات محرجة وجارحاهم، لو فيه مكتب معين او جهة معينة يتقدموا فيها بالشكاوى ويتابعوها.. ووالنبي اللي اخدوا احكام عسكرية دول غلابة، ومدنيين، ياريت الاحكام العسكرية اللي عليهم تتلغي ويتحالوا لمحاكمة مدنية

وانا عايزاكم يا شباب تشوفوا الفيديو ده عشان تعرفوا يعني ايه جيش مصر برضه



صلوا ع النبي كده.. احنا برضه كلنا مالناش الا بعض، وشوية علينا وشوية عليهم، المهم نحط ولاءنا الوطني قبل اي حاجة.. مافيش مسيحي يقول انا مسيحي، ومافيش مسلم يقول انا مسلم.. ومافيش حاجة اسمها "المسلمون يهددوا المسيحيين" المواقع اللي بتكتب لكم الكلام ده دي مواقع وحشة وعايزة تخرب ثورتنا، ومافيش حاجة اسمها: "دي مؤامرة عشان تشويه الاسلاميين"، المواقع اللي بتقول لكم دي وحشة برضه وعايزة تخربنا.. ده تخريب متعمد لبلدنا وثورتنا وعلاقتنا ببعض
نحمي بعض، وما نتهمش بعض، والجيش يطمنا من آن لآخر، ونشوف خطوات بس ملموسة ده كل اللي الناس عايزاه، ده المصريين شعب زي الفل والله، وجدع، وباله طويل، وحكيم، ويفدي بلده بروحه، واي حاجة بيعملها بيبقى قلق على بلده وخوف عليها لأن المصريين تعبوا على بلدهم قوي، واتبهدلوا عشانها قوي، ومش عايزين تعبهم ومعاناتهم تروح هدر
والنهاردة برضه فيه خبر حلو ان الاحزاب حتبقى بالاخطار، والانتخابات التشريعية حتبقى ان شاء الله في شهر سبتمبر وحيتشال الطوارئ قبل الانتخابات
بس عايزين تجميد نشاط اعضاء الحزب الوطني في اول انتخابات تشريعية سواء نزلوا باسم الحزب الوطني او نزلوا مستقلين، اللي له تاريخ اسود في عضوية الحزب ده - ولا حتى ابيض - ما يدخلش الانتخابات التشريعية الاولى والنبي، اصلا هم اخدوا اكتر من فرصتهم.. حتى لو هم ناس ملائكة نازلة من السما، تلاتين سنة منفردين بالبرلمان.. اظن كفاية كده، دورة برلمانية واحدة بس ما يدخلوش البرلمان
دورة واحدة بس وبعدها يرجعوا يشتغلوا.. اظن ده مطلب سقفه واطي قوي، فيه ناس طالبة حل الحزب من اساسه وحرمان اعضاءه من ممارسة الحياة السياسية اساسا، بس انا طيبة وطالبة انهم ما يدخلوش الانتخابات الجاية
وبالنسبة لاهالي المعتقلين المعتصمين قدام التلفزيون وماسكين ظباط وعساكر الجيش يعيطوا لهم ويحكوا لهم ويوروهم صور عيالهم والظباط والعساكر يطبطبوا عليهم هههههههههههههههه افرجوا عنهم بقى اذا كان العادلي هو اللي قابض عليهم في احداث الثورة بدل ما عناصر الجيش قاعدة تسمع برنامج حياتي قدام التلفزيون كده
وربنا يهدي الحال يا رب
نفسي في ايه تاني؟ نفسي في ايه تاني؟ مش فاكرة دلوقت، بس فيه تعليقات بقى على البوست ده... بوست يعني الموضوع، اقصد المقال ده يعني.. المهم فيه تعليقات حتلاقوا ناس كاتبة برضه حاجات نفسها فيها
والله الشعب قلبه حنين والجيش قلبه حنين وربنا يبعد عنا شياطين الانس والجن
ويالا بقى خلصوا التوقيعات اللي هنا عشان نسلمها على آخر الاسبوع ان شاء الله
<<<<<<<<<<<<

52 comments:

مولاى صلى و سلم دائما أبدا على حبيبك خير الخلق كلهم said...

أولا عمرو البحيرى , و التعذيب اللى حصل فى المتحف و فى كلية الإعلام
أنا محترم إن الجيش بدأ يرجع يتواصل معانا بس متخوف إن يكون الهدف التهدئة مش الإصلاح بجد , برضو اللى قطعو ودن الراجل و كده لازم يتحاسبو عشان الحوادث دى مينفعش تتكرر

Loai said...

سرعة الاجابة ايه بس يا نوارة؟

محمد نبيل said...

أى كلام بهدف التهدئة والتخدير فى موضوع الانتهاكات لا يجدى، فالانتهاكات التى تمت خطيرة ونريد نتيجة علنية للتحقيقات والمحاكمات فى هذا الشأن. حق بنات مصر بالذات وكمان شبابها لازم يرجع.

Amr Abdel Razek said...

تسلمى يالى بميت راجل و الله بحبك فى الله

hesham said...

ماذا يعني انهم يخضعون تحت الاقامة الجبرية في مصر؟؟ هل هذا يعتي انهم يمكنهم التحرك بكل حرية داخل كل مصر ، ولكن بشرط عدم اسفر للخارج . الظاهر كدة. . هذا الخبر يعني أن كل مصر مازالت بيتهم. الوضع لم يختلف. يا ريت يقولولنا حدود اقامتهم بالمساحة والمتر!!!

hesham said...

ماذا يعني انهم يخضعون تحت الاقامة الجبرية في مصر؟؟ هل هذا يعتي انهم يمكنهم التحرك بكل حرية داخل كل مصر ، ولكن بشرط عدم اسفر للخارج . الظاهر كدة. . هذا الخبر يعني أن كل مصر مازالت بيتهم. الوضع لم يختلف. يا ريت يقولولنا حدود اقامتهم بالمساحة والمتر!!!

المهدى said...

طيب واللى عارف الكلام ده كله وعارف حال باقى المؤسسات والأحزاب والنخب والتيارات الدينية وتغول أمن الدولة وسياسات التخريب والتحطيم المتواصلة من 40 سنة إزاى يقول الجيش يمشى وبسرعة والديموقراطية سوف تصلح نفسها وحنبقى فل بين يوم وليلة
طيب وأمريكا اللى بتشتكى من جمود الجيش المصرى وإصراره على عقيدته القتالية وعلمه بخط الأمن القومى المصرى الأحمر إزاى عايزاه يقعد ويحذر إسرائيل من أى عمل عسكرى فى غزة ويجعلها لأول مرة تتعرض للضرب ويرد نتينياهو بأننا سنعمل بحكمة من أجل تفادى أى توتر فى المنطقة ؟

nosseir73 said...

عقبال ما نسمع الاحالة للمفتى بدل الاقامة الجبرية اميين يارب وعقبال الفلول لامن الدولة والوطنى و المحليات
النهاردة التفاؤل ملأ قلبى بعد يومين من التشاؤم يارب تكمل بالاعلان الدستورى

فارس بني خيبان said...

يا نوارة أنا قاعد في السعودية في الرياض وبعمل اتصالاتي عشان أجمع أكبر عدد ممكن من التوقيعات لإن كل اللي جمعتهم حالات فردية قعدت على دماغهم على النت لغاية أما وقعوا بس عايز أجمع أكتر وابعت على الإيميل فلو بس تقوليلي بالظبط انتو حتقدموه امتى وامتى آخر معاد اقدر أبعت فيه؟

Anonymous said...

للاسف الحزب الوطنى شغال ولا كأن فى حاجة العيال بتوعو كانو فى لجان الاستفتاء ودة ناس كانت معاهم ف الحزب قالت لى عليه شافوهم فى لجنة ف امبابة وقالو لهم بتعملو ايه مردوش عليهم وحاجة كمان فى انتخابات اتحاد طلبة ف الجامعات واتحكت لى واقعة برضو ف اداب القاهرة بنات عاملة دعاية اتخابية وبيطلبو من زمايلهم يصوتو لهم ولما يروحوا يخيروهم يصوتوا للوطنى او الاخوان!!! بصراحة انا هاتجنن وطنى ايه ربنا ينتقم منهم ناس باردة ازاى بعد الثورة وسقوط الشهداء وكشف فساد حسنى ورجالته ولسة فى ناس بتقول انا وطنى الحزب دة لازم يتحل ياجماعة يتحل ومايمارسوش سياسة تانى حرام

Argenda said...

محمد الجندي من شباب 6 ابريل معتقل من يوم 9 مارس و هيتحاكم عسكري يا ريت بس أي توضيح لأهله
لينك لصفحة 6 ابريل عملاها له
http://www.facebook.com/?sk=lf#!/pages/%D8%A7%D9%84%D8%AD%D8%B1%D9%8A%D8%A9-%D9%84%D9%85%D8%AD%D9%85%D8%AF-%D8%A7%D9%84%D8%AC%D9%86%D8%AF%D9%8A/198657986831919?sk=info
الثلاثي و سوزان و جمال لازم يتمنعوا من الإتصال بعملاءهم البلد هتولع و هم بيلعبوا بينا
الإعلام لازم الوشوش إياها تروح كفاية علينا كدة

محمد نبيل said...

كما أن الموضوع لم يقتصر على فتيات فقط بل قال شبان أيضا أنه تم تعذيبهم واذلالهم. نريد شفافية ووضوح

Early bird said...

يا دى النيله انتم عايزيين تتشاموا والسلام
ما الست كاتبه كلام زى الفل

وانا كمان عجبانى حكايه ان شرف يروح السودان الحكايه دى فعلا خطوه على الطريق الصحيح
بس موضوع البورصه اللى قالقنى والشراء اللى زاد دى اموال مصريه والا اجنبيه احسن الواحد جاله حساسيه من الموضوع ده وبعديين ياريت الجيش يبقى عزيز كده على انه يقابل السياسيين الاجانب وبالدات الامريكان ويصدر ليهم وزير الخارجيه او نائب الوزير او اى سفير اهو يلطعوهم والسلام
وبعديين نفسى فى ايه كمان فلوسنا المنهوبه وبعديين معلش يا قياده جيشنا العظيم احنا بنتقل عليكم بس فيه حاجه كده لازم اقولها لما بلطجى ولا حرامى يتزبط بيسرق محفظه بتهفوا حبس فى محاكمه عسكريه اما النهيبه الكبار اللى معروفيين بالاسم عايزين بقى ادله وبراهيين وناس رايحه وناس جايه الكلام اسمه زى ما النبى عليه الصلاه والسلام نبهنا ان اللى اهلك الامم من قبلنا انهم ادا سرق فيهم الشريف تركوه وادا سرق فيهم الضعيف اقاموا عليه الحد

محمد نور الدين said...

ست الكل صباح الخير

نفسي في ايه تاني؟ نفسي في ايه تاني؟ مش فاكرة دلوقت
يعني فاضية وملكش شغل
في تعليقي، أمس قلت بالحرف أن الجيش لن يسمح لرأس النظام السابق بالعودة ومعه الحاشية
لأن الجيش كمؤسسة وبصرف النظر عن الفئات العليا له حساب مع النظام الذي أبعده وهمشه لصالح دولة البوليس أما مطالبك عما تسميه الثلاثي المرح فهذا يا النوارة يخضع لمجوعة من التوازنات ليس فقط داخل المجتمع بل حتى داخل المؤسسة العسكرية .
أنت تتحدثين عن الآخر و أنا حاب أعرف عنك أنت، وعندي شوية أسئلة ، هل سنرى في الانتخابات البرلمانية القادمة لافتة كبيرة تقول انتخبوا بنت الثورة نوارة نجم؟ هل تنوي الانضمام لحزب من الأحزاب القادمة ؟ .أما إذا فكرت في تأسيس جريدة فعديني من كتابها ولعلمك ببلاش
أما الآن فأنا بصدد مغادرة البيت إلى الإذاعة للمشاركة في ندوة حول: المثقف و الثورات العربية . المثقف الذي تهجمت عليه أمس ووجهت له تهم وحرضت عليه المؤسسة العسكرية. وبدون شك سأتطرق إلى ثورة مصر وسأتحدث تحديدا عن غياب الإطار النظري والمرجعية الفكرية لهذه الثورات وتداعيات هذا الفقر النظري . كما سأتحدث عن عدم فرز القوى الحقيقة التي من مصلحتها استمرار الثورة . و أرى البديل في جبهة وطنية واسعة يكون هدفها تحقيق هدف الثورة الأول و الأساسي و الجوهري، ما يحلو لي تسميته ، الثورة الوطنية الديمقراطية بوصفها أرضية صلبة لبناء مجتمع جديد . لقد لخصت لك الخطوط العريضة لما سأقوله. هذه هي الشفافية .
تحياتي الصادقة

أحمد البستاوي said...

الجمعة أول أبريل . . مليونية إنقاذ الثورة
عودة مارد الغضب

Argenda said...

للناس إللي لسة ملوية على الجيش ده فيديو ليوم الإستفتاء و قائد بيشرح لجنوده دورهم في اليوم ده
http://www.youtube.com/watch?v=TIVkgIvB0C0

محمد نبيل said...

خلى بالك يا نوارة هما قالوا "تم اتخاذ الاجراءات للوقوف على صحة هذا الموضوع واتخاذ مايلزم تجاهه" ! ماقالوش انهم اتخذوا اجراءات ضد اللى عمل الانتهاكات دى.

utopia said...

سعادة الباشا نوارة هانم
سعادة البيه جيش مصر العظيم
احنا مستعدين نعمل تمثال لقادة الجيش فى كل شارع فى مصر ونضرب له تعظيم سلام كل يوم.
بس احنا ما خدناش لدلوقتى غير كلام
سيادتك القبض على الحرامية والعيلة الوسخة واعوانها يتعمل فى ساعة زمن ليه ده ما حصلش؟؟؟
فلوسنا اللى برة اللى احنا فى عرض كل قرش منها ما رجعتش ليييييييه؟
تغيير قيادات التلفزيون والصحف ليه ما تمش؟؟ هما لازقين فى الكراسى قوى كده؟؟ ولا مين اللى بيحميهم؟؟
وبعد اذن حضرتك وسيادة جيش مصر العظيم احنا شعب شكاك وكمان بيحب اللمة وعاوزين نعمل مليونية كل جمعة وابتداء من الجمعة الجاية ...ما افتكرش دا له دعوة بالاستقرار والسياحة
يعنى انجلترا فيها اعتصام اهو فى اكبر ميادين لندن والسياحة ما اتضربتش
اشمعنى احنا يعنى؟؟
واخيرا ندااااء لجيشنا ارحمنا وخلصنا عاوزين نتفرغ لاشغالنا
مش عاوزين كلام احنا شبعنا منه

وياريت الاخوة الاعداء كمان بتوع الاخوان والاحزاب والالمثكفين يتفقوا على قايمة موحدة للانتخابات ومرحش رئاسة واحد واجلوا خناقكم للانتخابات اللى جاية مافيهاش حاجة يعنى ...والسلام ختام

المهدى said...

ياريت تيجى على قد خالد حمودة ده هنا تحت إيد الثوار ولو الإنتخابات الشهر الجاى ممكن أى شاب من شباب الثورة بقليل من الجهد والتنطيم أن يهزمه هزيمة منكرة المشكلة فى الأقاليم حيث العصبيات والقبلية ...الحزب الوطنى مش تنظيم فكرى يهزم بثورة دول مجموعة منتفعين أفراد يجمعهم الخوف من الحساب (على جرائم تعذيب وفساد ) ومكانهم إما البرلمان أو السجن وأدواتهم متعددة ثروة عصبية ميليشيات أمنية وحتى خلافات قوى وطنية لا أستبعد وتحت ضغط حلف إسلامى يستعجل فى بنائه الإخوان أن نجد الوفد والتجمع والناصرى وحتى الجبهة يلجأ لمحترفى الوطنى فى الأقاليم بحثا عن مرشح يعرف خريطة دائرته ويريد أن يغسل سمعته من أدران إنتمائه السابق للوطنى ده غير المال السياسى اللى بحق وحقيق مش 6 أصفار بس 7 و8 و9 المرة دى رقبته الثمن

utopia said...

صحيح يا نوارة هافكرك بس بكلام الرائد احمد شومان
http://www.youtube.com/watch?v=6ft3YhEShfs

خللى بالك هو قال ايه ولمين؟؟؟

Magdy El-Serafy said...

أرجوكى ما توصيناش على الجيش لان مافيش مصرى مخلص الا وبيحترمه و يقدرمكانته. حد يعرف المحاكمات السياسية بتيقى اجراءاتها ايه: القواعد اللى بتحكمها و كده. علشان البلاوى اللى بتهدد أمننا دى نحاسبها

Mohamed Al-Samarrai said...

طيب بالنسبه للواء اسماعيل عتمان اللي يشل و اللي قال انهارده عكس الكلام ده ..و نفى ان يكون حصل ضرب او حتى فض اعتصام بالقوه و ان الجيش في كليه اعلام مكانش معاها سلاح ..و خيم في التحرير كان فيها ولاد و بنات !!!!!!!

http://www.masrawy.com/News/Egypt/Politics/2011/march/28/Military_Council.aspx

مهندس مصري بيحب مصر said...

الكلام ده سمك في مياه و ملوش راس من رجلين
مفيش حاجة اسمها محاكمات سرية
لازم تحقيقات علنية
و نعرف مين اللي عذب الناس في المتحف المصري
و مين اللي كمل تعذيب لهم في الهايكستب
و مين الكلب اللي لابس بالطو أبيض و كشف على عذرية البنات و لو ده دكتور لازم يتعاقب من نقابة الأطباء
غير العقوبات الناتجة عن المحاكمة العلنية
يا كده يا مينفعش و اي إجراءات ما نعرفهاش يبقى كانها ما إتعملتش أصلاً

أنا حاسس ان الغرض من البيان ده تهبيط الناس اللي بدات تنادي بمليونية في التحرير يوم 1 ابريل مع إنهم مش بينفذوا أي طلب إلا يوم الخميس بالليل قبل المليونية علطول علشان يهبطوا الناس
و راجعي توقيتات كل قراراتهم المهمة حتلاقيها كده

Unknown said...

اذا كنت رفعتلك القبعة يانوارة اكثر من مرة على مقالات كتبتيها فللأسف ده اسوأ كلام كتبتيه
شغل التهدئة اللى انتى متبنياه ده بين الجيش والشعب انا كنت معاه وزى الفل لحد ماالمجلس نزل البيان الجديد اللى انتى حاطاه ده
لأنه بيثبت ان المجلس ماشى على نفس خطوات الحكومة المخلوعة
ده نكته ياجماعة مش بيان .. والله نكتة وبايخة كمان
هاتى عيل صغير من الشارع وقوليله الريس تحت الاقامة الجبرية فى شرم الشيخ وشوفى رد فعله ايه
وحلوة أوى حكاية النظر فى قضايا التعذيب دى
والمفاجأة بقا .. الإشاعات المغرضه

الكارثة الحقيقية يانوارة إنك وبالرغم من عقلك وثقافتك العالية اللى ميختلفش عليها اتنين .. تصورتى إن الجيش منزل البيان ده عشان شوية الكلام والمقالات اللى انتى وغيرك بتكتبتوهم هنا وعلى تويتر
صباح الفل
مانتى ايدك اتهرت كتابة من قبل كدا
انا باحترمك جدا وباقدر كلامك وآرائك واجزم بإنك من اكبر مصارد الوعى السياسى ليا ولكتير غيرى
بس صدقينى اللى كتبتيه ملوش أدنى علاقة بصدور بيان الجيش
الجيش بيهدى الأمور قبل يوم الجمعة
وبكره الأيام هتثبتلك
شوفى كمية القرارات اللى هتنزل من هنا لحد يوم الجمعة واللى معظمها هيكون أى كلام ومانشيتات وبالذات يوم الخميس أتوقع مظاهرةبلطجية أو فؤوية يوم الخميس فى الميدان

انا قلت ميت مرة انى لااشكك فى وطنية المجلس ولا المشير شخصيا .. بس المجلس كمجلس مسش أنبيا .. بشر عاديين ولايخلو من الفساد

حافظوا على الثورة
افيقوا يرحكم الله

ansaretawra said...

الصبر طيب فمهما قلتوا وعدتوا إنت عندكوا جيش ميت فل وعشرة والحقيقة جات على لسان الأعداء في وثائق ويكيلكس بس خلوا عندكم نوايا طيبة لأني الثورة المضادة من فلول النظام أصعب من سقوط رأس النظام دي عملة زي وحش الكارتون اليباني كل ماتقطعيلو راس يطلعلوا راس ثاني وخصوصا إنهم حاسين غادروا المعركة بدري وما مطلوش زي اليمني مابيعمل فلهذا ماتصدقوش أي إشاعة توقعكم مع الجيش ودايما كده إكتبوا عن محبتكم وثقتكم فيه عالصحف وعالنت بالطريقة دي حتكسبوه وتخلوه في صفكم وتكتفوه عن صدور أي فعل وحش يخليكم زاعلنين لأن اللحاصل دلوقت من الفلول مالوش غير معنى واحد إن حاسس إنكم على الطريق الصحيح وهو عايزكم ضيعوا زي ماقال المخلوع في خطاب إنه خايف يمشي البلد تضيع فخليكوا الشعب و الجيش إيد واحدة

أمل said...

السلام عليكم ... 1- ما ينفعش تضربوا وتعزبوا وتقولوا اسفين وبعد كده نقول معلش .. وبعدين تضربوا وتعزبوا وتهتكو اعراض وبعدين تقولوا هنحقق ..ونقول معلش ...وبعدين تضربوا طلبة الجامعة وتسحلوهم وبعدين تقولوا ما نعرفش .. ونقول تانى معلش سماح المرة دى ..
2- وما ينفعش تسيبوا الظباط القتله الى قتلو شباب مصر وورد مصر وتقولو ده العدلى بس 3 -وما ينفعش تسيبوا الى سرقوا اموالناوشردوا الشعب المصرى فى كل البلاد ورموهم وشحتوا الشعب المصرى وهما يملو خزينهم بفلوس الشعب وتسبوهم يهربوا وما فيش اجراء واحد قانونى معاهم وتقولوا الى معاه مستند ضدهم يقدموا وطبعا معظم المستندات الى تدنهم اتحرقت من زمان بس فى حاجة بتاخد بيها المحاكم الشهادة والشعب والتاريخ يشهد عليهم .
الخ الخ الخ
ولما الشعب يفوء من الغيبوبه الى حصلتلو بعد الثورة و يعمل جمعة مليونية 1 ابريل تجرو بسرعة تبنجونه تانى لا والف لا ..كفاية اوى اوى لحد كده .. متشكريين لتعبكوا .. طلبات الثورة معروفة للكل .. بس لازم تتقال مش بالكتابة تتقال بطريقة ميدان التحرير علشان دى طريقة الى بتفهموا بيها ... وشكرا

Unknown said...

انا متابع المونة ده من قبل الثورة حتى بس ده اول تعليق لى من حلاوة الكلام والله بجد كلام جميل اوى انا مازلت عند روح التفاؤل باللى جاى
بصراحة المرتين اللى ما اقتنعتش فيها بكلام الاستاذة نوارة يوم الاستفتاء بس
و امبار كنت بدأت اازهق بس بصراحة اخبار النهاردة حلوة حتى استفتاء مجلس الوزراء جميل برضه
عقبال الاعلان الدستورى وبجد بجد الله ينور

Unknown said...

انتم يا جيش مصر الباسل خير اجناد الارض

Mohammed Hassan said...

هو الجيش ده فرد واحد ؟
طب أنا والدي طبيب مقيم في تبوك
وعرفت منه عن طريق اتنين شافوا مبارك في المستشفى العسكري وبعديها راح قصر اﻷمير سلطان
واحد من الشؤون الصحية وواحد عسكري
غير بقى أخبار تنقﻻت كتير جوة مصر لسوان وجمال

Sgheita said...

هما قالوا اجرآت للوقوف علي صحة الموضوع يعني بيشوفوا حصل ولا لأ مش اجرءات محاسبه ده اسمه تنييم للناس

Unknown said...

يلعن تلاتنين كدا يا جدعان بصراحه قالوا عليكوا في الامثال سكتنالو دخل بحماره ، ما تتهدوا و تهدوا شويا بقى عمالين تشككوا فالجيش واصله ايه و اف و اح ياخي اتوكسوا و احب اقولوكوا حاجه يا ريت بس تصارحوا نفسكوا شويه عارفين انتو معجبين بالاعتراض و الفوةان المتواصل دا ليه ؟؟ علشا يا قطط لو وقفتوا اعتصامات و مظاهرات مش هيبقى امامكوا الا انكوا تشتغلوا بجد و انت علشان لسه عايشين في عصر مبارك و انتخته مش مستعدين تعرقوا و تتعبوا .
لا يا رجالة مصر مش انتوا اللي اخواتكوا ماتوا علشان يفتحولكوا باب الحريه و العمل لو فعلا اوفياء لدماءهم قوموا اشتغلوا بجد و علموا الناس ، اصحابنا اللي ماتوا كان علشان لما حد فينا بيحاول يعمل مجهود او يخترع حاجه كان بينداس عليه الا اذا دخل علاء معاه في التورته دلوقتي خلاص علاء و اخوه يلعن ابوه غاروا في داهيه يلا اشتغلوا بقى و ابنوا بلدنا بدل منتو مضيعين مجهودكوا على مدير هنا و عميد هناك و أمانه عليكوا لو حد منعكوا تاني من الابداع صفاره صغيره بس و احنا نطلع عين اللي جابوه

Unknown said...

يا نوارتنا انا معجب بصراحه ، كلامك رائع بس تعليقي الوحيد ان الجيش لا يمكن هيعلن انه بيراقبهم خاصة ان مفيش حاجه رسمي عليهم ز اكيد يعني الجيش اكتر واحد في الدنيا عايز يلم الثلاثي المرح دول و يحط الجزمه في بقهم بس ميعرفش يعمل كدا بدون دلائل او اعتراف عليهم ، لان الجيش من اول يوم اعلن انه مش هيعمل محاكم ثوره و يتاخد فيها حد بدون دليل علسان ميجيش حد بعد 20 سنه يقول قبضوا عليا ظلم اذا اظم مسيب الجيش يشتغل و احنا نحاول ندعبس وراهم اكيد يعني ربك عمى عينهم عن حاجه كددا ولا كدا و جايين جايين

و اطمني يكفي انهم مسافروش من مصر حتى من غير قرار للنائب العام الجيش صاحي يا اختي

mUsLiM said...

والله انتى قمر وزى الفل ربنا يخليكى يارب ويكتر من أمثالك ده السلفيين غلابه والله

وخدى عندك البيان ده ياريت بالله عليكي تحطيه عندك فى الموضوع

http://www.salafvoice.com/article.php?a=5250&back=

وانا متفق مع كل حرف قولتيه :)

ربنا يخليكى يارب ويكتر من امثالك ... الواحد كان حاسس انه مظلوم ... صحيح نحن كسلفيين نعاني من بعض المشايخ وتوصيفاتهم وإنفعالاتهم غير الدقيقة وغير المحسوبة ... لكن ده كله من قبيل المراهقة السياسية ، الحركة السلفية ظلت زمناً طويلا لا علاقة لها بالسياسة .. بل قل أنها لم تلج السياسة أصلا فى تاريخها

فطبيعي يا جماعة نشوف بعض التصرفات الغير منضبطة من قبل البعض

الحركة السلفية فقط تحتاج اليوم كما قلت سابقا إلى فقه الواقع الجديد بعد الثورة بالإضافة إلى مراعاة الأولويات

على أي حال .. جزاكم الله خيرا على كلامك

السلام عليكم

gogo said...

ايوة انا كمان مبسوطة اوى انهم رجعوا للبيانات والصفحة تانى لما عملوا التنوية عن المؤتمر بخصوص قانون الاحزاب كتبتلهم ع الصفحة اخيييرا احنا قولنا انتوا نسيتوا الصفحة ونسيتونا بعدها عملوا بيانين تانى حسيت انهم سمعونى ههههه
المهم عايزة انبه ع حاجة مهمة فى صفحة ع الفيس اسمها اسماء اعضاء الحزب الوطنى لعدم انتخابهم كان شغلها زى الاسم تنبيه عن اسماء اعضاء الحزب ف المحافظات علشان الناس تعرفهم ومحدش ينتخبهم تانى بس من امبارح تقريبا لقيتهم قلبوا عمر عفيفى ونزلين تلبيخ ف الجيش والمشير واستغلوا ان فى دعوات للنزول يوم الجمعة وعملوا دعوة ليوم الجمعة بردة ضد المشير او تطهير الجيش من المشير والقيادات الفاسدة هما مسمينها كدة وطبعا معروف مين اللى ورا الكلام دة
فانا بنبة علشان اكيد فى ناس ناوية تنزل الجمعة منهم وسط المتظاهرين ويعملوا قلق ويشتموا ف الجيش والمشير
فايريت يانوارة تنبهى ع الموضوع دة
شكرا

Unknown said...

بقالى كتير متبعاكى واول مره اكتبلك بحج بعشق صراحتك

Unknown said...

بجد بعشق صرحتك ووضوحك

haroon said...

ليه المطالبة بمحاكمة سرور وزكريا والشريف وعمر سليمان تقتصر بس علي التجاوزات المالية والتربح مع ان ده ف رأيي أقل جريمة ممكن يُتهموا بيها..أنا شايف أن افساد الحياة السياسية والاستخفاف بالشعب وكانه مكنش موجودواغتيال عقول المصريين بمباركة جهاز اعلامي منحط والوقوف كحائط صد عتيد وصلب لحماية المفسدين والقتلة من امثال ممدوح اسماعيل وتعمد تحقير رموز البلد من الشرفاء وتشويه سمعتهم فضلا عن اذلال وقهر وتركيع تمانين مليون بني ادم مصري بقوانين جاهزة وتفصيل بمقاسات سمووول ولغاية تلاتين اكس ....وغيره وغيره ....كل ده وتركيزنا بس علي فساد مالي ممكن يهربوا منه بسهولة خصوصا انهم أُعطوا الفرصة لترتيب أوراقهم جيداً خصوصا انهم مش هطل ولا عبايط عشان ميستغلوش الفرصة اللي مُنحت وبتقوللهم الحقوا خبوا ورتبوا نفسكم..خصوصا انهم خبرة غير عادية في التعتيم والتلون والفلفصة...

DR smiles said...

hwa feh 7amlet gm3 el tawqe3at fe el mansoura !!!!! law mafesh momkn asa3ed we a3ml m3a nas mn a7zab we 7rkat syasya mo5talefa ?

واحد مش فاهم حاجة said...

والله انا مفروس منك يانوارة بدل موجعتي دماغ الناس بموضع التوقيعات من فضلك ادعي عشان يوم الجمعة الي دعا ليه ائتلاف الثورة هو ده الطريق الصح الي احنا كلنا عرفينه وخلى مبارك يمشي واحنا والله كلنا بنحترم الجيش ونحترمه ونقدره فليس هناك داعي لتاكيد ماهو موكد ولكن احنا بتتكلم عن المجلس العسكري كسلطة سياسية بتحكم البلد وبالتالي ليس معنى نقدها اننا بنتتقد الجيش دي حاجة ودي حاجة دي سلطة سياسية يجوز في حقها النقد بالقاف وبالضاد

haroon said...

أقامة جبرية ..انا شفت الكلمتين دول مرة ف صيدلية ف دولاب المهدئات ...اقامة جبرية ايه وبتاع أيه ..واحد زي مبارك بتليفون بلاك بيري صيني وخط موبايل فيه عشرة جنيه رصيد يتصل بخدامينه سرور وزكريا وعزمي ويعمل مصايب سودا ...وكل ما يخلص رصيد أكيد عمر سليمان هيبعتله رصيد أو بسهولة ممكن مبارك يبعتله كوووول مييي شكراً.....دول شلة لازم لازم تتخصـــي وتترمي علي طووول ف طشت كولونيا

Dr.issamo said...

ما تنسوش عمر سليمان انا اظن انه العقل المدبر لكل شيء

أرنوب said...

نشكر للمجلس الأعلى رسالته .. عليه أيضاً أن يستلم (رسالتنا) والتي تتلخص في سطر واحد : أسمع كلامك أصدقك أشوف أمورك أستعجب

زينبو said...

خطييييييييييييير جدا، انا لسة سامعة اللقاء مع مرشد الاخوان عن سرقة بيته.بيقول ان الناس اللي استلموا جهاز الامن الوطني في بني سويف هم نفسهم اللي كانوا في جهاز امن الدولة هناك!!! معنى كدة أنهم بيضربونا على قفانا وغيروااسمه بس .ده الرابط الي عليه القاء
(http://www.egyptwindow.net/news_Details.aspx?News_ID=11795)

مواطن مصري said...

حملة لجمع مليون توقيع بالإسكندرية لمحاكمة مبارك والشريف وعزمي وسرور وسليمان
http://elbadil.net/%D8%AD%D9%85%D9%84%D8%A9-%D9%84%D8%AC%D9%85%D8%B9-%D9%85%D9%84%D9%8A%D9%88%D9%86-%D8%AA%D9%88%D9%82%D9%8A%D8%B9-%D8%A8%D8%A7%D9%84%D8%A5%D8%B3%D9%83%D9%86%D8%AF%D8%B1%D9%8A%D8%A9-%D9%84%D9%85%D8%AD/

البديل كمان

Aml said...

المشكلة كلها فعلا فى الانتهاكات و التعذيب اى حاجة تانية زى التباطؤ و العك و الحاجات دى ممكن نحطلهم فيها اعذار كتير لكن المعتقلين و التعذيب و الحاجات اللى حصلت للبنات و فض المظاهرات كل ده لازمله اجراءات واضحة و قوية عشان الناس تهدا شويةوالله احنا بنحب الجيش و هو بابا و هو ماما و كل حاجة بس بلاش ايده الطرشة دى

Rowaa said...

نواره اعتقد ان الحل هو مساعدة الجيش بالضغط عليه بالعصيان المدنى لكل فئات الشعب وترجع الثورة تانى للتحرير وكل شوارع مصر بعد تحديد المطالب وسقفها
وما فيش رجوع الا بعد تنفيذ طلبات الشعب من اجل القضاء على الفساد ورؤوسة. بما فى ذلك القبض على ما سميتية الثلاثى المرح وعمر سليمان ورباعى مبارك
اما الطلبات الفئوية الاخرى فهى مشروعة لكن لكل شئ وقت وليس هذا الوقت المناسب تلك الطلبات

او الاجتماع اولا مع د عصام شرف والمجلس الاعلى للضغط عليهم بالطلبات واذا لم يستجيبوا بيقى ما فيش غير سكة المظاهرات

كيوبيد said...

نواره حلو الكلام بس مش شايفه انه بعيد عن الوقع شوى بمعنى اخر كلام فى كلام انا مش من الناس الى شايفه الصوره سوده ولا هاقولك المشير راجل مبارك وها الكلام كلو بس فين حد شافو بعينو ؟؟؟؟ احنا شعب عندو عدم مصدقى من الحكومه بمعنى ان الحكومه ممكن تكون بتثبت الشعب احنا عايزين نشوف بعينا نشوف محكامة نشوف ناس افرج عنه اعلان دستورى على ارض الوقع لكن كلام وكلام يبقى ده لعب

Anonymous said...

بالإضافة لكل مطالب الثورة الأخرى ,المعطلة..,حزب الفساد الصهيونى,يحل,ويحرم أعضاؤه من ممارسة,أى نشاط سياسى,لمدة عشرة سنوات. د. شريف عبد الحكم

احلام جوليا said...

عاوزين محكمة الثورة
عاوزين محكمة للثورة
عاوزين محكمة الثورة
عاوزين تنفيذ قانون الطوارئ على البلطجية الكبار عاوزين تنفيذاحكام عسكرية على القائد السابق للقوات المسلحة المخلوع والمأسوف عليه مبارك
عاوزين محاكمة بتهمة الخيانة العظمى

RZayan said...

الاهم من حل الحزب الوطني هو منع اعضاؤة من المشاركة في ا لانتخابات البرلمانية القادمة واذا لم يمكن ذلك فهناك مخرج قانوني وهو ما اقترحة الرئيس المتنحي قبل تنحية بعرض الطعون بالتزوير الخاصة بالانتخابات السابقة على القضاء وكل من يثبت نجاحه بالتزوير يتم منعه من الترشح للانتخابات القادمة.

RZayan said...

الاهم من حل الحزب الوطني هو منع اعضاؤة من المشاركة في ا لانتخابات البرلمانية القادمة واذا لم يمكن ذلك فهناك مخرج قانوني وهو ما اقترحة الرئيس المتنحي قبل تنحية بعرض الطعون بالتزوير الخاصة بالانتخابات السابقة على القضاء وكل من يثبت نجاحه بالتزوير يتم منعه من الترشح للانتخابات القادمة.

haroon said...

رداً علي تعليق زينبو ...بخصوص تغيير اسم امن الدولة الي الامن الوطني ..هو المشكلة مجرد ف الاسم ولا ايه ؟؟؟ ارجو منك نوارة الاهتمام بهذا الموضوع الخطير وتوصيل صوتنا للمجلس العسكري واللواء العيسوي لمصارحة الشعب بما تم اتخاذه من خطوات تجاه عناصر امن الدولة وهل مازالوا محتفظين باماكنهم وتحت مسمي مختلف فقط لاغير ؟؟؟ وهل سيتم غربلة وتصفية وفلترة وتنقية هذا الجهاز أم اقتصر الامر علي تغيير الاسم فقط لاغير ؟؟؟