الله يجبر بخاطرك يا مجلسنا العسكري.. طب بالنسبة للاعلان الدستوري؟

تحديث

الخبر ده كخطوة اولى كويس، بس هو مش مشكلته الكسب غير المشروع، ده شارك في الاربعاء الاسود والمجلس القومي لحقوق الانسان والتحقيقات مع النائب العام اثبتت انه مشارك فيها ولازم يتم حبسه على ذمة التحقيق، احنا قلقانين منه طول ما هو برة.. على الاقل ما يبقاش عنده حرية الحركة وحرية الاتصال ببلطجيته لانهم بيئذونا، لو هو اتمسك اللي وراه حيتشردوا ويدوروا لهم على شغلانة شريفة.. او غير شريفة بس مش حتبقى حسب خطة ممنهجة زي دلوقت

كمان فيه واحدة صاحبتي بتعمل اعمال خيرية في اسطبل عنتر وقالت ان الحزب الوطني شغال عادي كأن فيه خطة معينة بيحضروا لها، يوم الاستفتاء واحد اسمه خالد حمودة في اسطبل عنتر تبع الحزب الوطني الراجل ده ما كانش فاضي ثانية وكمان بيستعين بتجار مخدرات وفيه تاجر مخدرات منهم عضو في الحزب الوطني احنا عايزين نخلص منهم دول، وبيشتغلوا ليه؟ هم حيترشوا في مجلس الشعب تاني؟ لا ما يترشحوش بقى، خالد حمودة ده مش كويس ابدا، وفيه غيره كتير في الحزب الوطني، لازم نشاطهم يتجمد

وشكرا

الله يجبر خاطركم ويسعدكم قادر الكريم يا رب

نشكركم على سرعة الاستجابة، بالنسبة للانتهاكات انا مصدقة ان فيه اجراءات تمت بشأن اللي عملوا كده، بس اصلا المحاكمات دي ما بتبقاش علنية، مافيش فرد جيش بيتحاسب بعلم المدنيين ابدا، فكونهم اصلا يقولوا لنا انهم اتخذوا اجراءات ضد اللي عمل كده ده لوحده حاجة هم مش متعودين يعملوها، بس نظرا للظرف الحالي هم قالوا

تمام كده

احنا بقى في انتظار الاعلان الدستوري واعلان سقوط دستور 71 

وفي انتظار احالة الثلاثي المرح (صفوت الشريف، وفتحي سرور، وزكريا عزمي) للمحاكمة، ويا ريت لو يتم التحفظ عليهم من دلوقت لأنهم بيضايقونا قوي هم وعمر سليمان، قاعدين يلعبوا في الفتنة الطائفية وكل يوم والتاني يسلطوا ناس يبعتوا تهديدات للكنائس ولسه حارقين المقر القديم للبنك المركزي وعاملين لنا لبش.. فيا تقولوا لهم يلموا نفسهم ويبلطوا يطلقوا كمان اشاعات، عشان هم البلطجية بتوعهم اللي بيعملوا اشاعات وكلام فارغ

على فكرة لما كنا عند وزارة الداخلية والدة بثينة كامل شاورت على واحد كان بيحاول يتحرش بعناصر الجيش عشان يعمل مشكلة بين المتظاهرين والجيش وقالت له: انا من سكان المنطقة وعارفاك، انت كنت بتنزل في انتخابات فتحي سرور وبتقفل له الانتخابات، فراح مشي بسرعة قبل ما الناس تمسكه

فرجاء، هم مستفيدين من انهم يعملوا مشاكل بين الشعب والجيش، وبعدين يطلع فتحي سرور يقول كلام فيه تملق عشان فاكر نفسه كده ناصح

وعايزين كمان سيطرة على عناصر وبلطجية الحزب الوطني وامن الدولة لان امبارح كان فيه هجوم على بيت مرشد الاخوان المسلمين وتقريبا كانوا عايزين يلزقوها في المسيحيين 

بس هم بيعملوا حاجات مش كويسة ابدا

فلو تريحونا وتتحفظوا على الاربعة: صفوت الشريف، فتحي سرور، زكريا عزمي، عمر سليمان

ولو حتى اقامة جبرية في بيوتهم، وتراقبوا تليفوناتهم عشان نعرف بالظبط هم بيعملوا ايه.. معلش، ما ياما راقبوا تليفوناتنا من غير سبب، لما هم يتراقبوا بسبب عشان حماية البلد مافيهاش حاجة، واحب انبه بس انهم عندهم وسائل اتصال اخرى غير التليفونات العادية فيا ريت يبقوا تحت رقابة مشددة 

بالنسبة لسوزان وجمال كمان عايزين نعرف هم فين لأن فيه كلام كتير انهم في القاهرة وده بيوترنا جدا، وعايزينهم يتحاكموا ويتراقبوا لحين احالتهم للمحاكمة

من ناحيتنا احنا:

احنا لازم نعمل لجان شعبية يا شباب في كل المحافظات مهمتها التصدي للناس اللي بتحاول تعمل فتن طائفية وتهديدات للكنائس ونعرف مين دول بالظبط، ماحدش يطلع يقول "سلفيين" يعني ايه سلفيين؟ هو السلفي ده مولود بوحمة مكتوب عليها: احترس سلفي يرجع الى الخلف؟ اي حد يضرب جلابية ودقن ويعمل نفسه سلفيين

اللي تلاقوه في اي محافظة بيعمل فتن طائفية، بيهدد كنائس، بيحاول يفرض الحجاب على البنات زي ما سمعنا والله اعلم بصحة الاشاعة دي، تمسكوه وتقبضوا عليه وتسلموه للجيش

مش للشرطة.. معلش.. نتعب الجيش معانا شوية، احنا ما عندناش لسه ثقة في الشرطة لان لهم تاريخ طويل في تسليط بلطجية يعملوا فتن طائفية

يتسلم للجيش، وقبل ما يتسلم للجيش تشوف بطاقته، هم خلصوا حكاية البلطجية دي، ولما فشلت دخلوا لنا في حكاية "سلفيون يهددون"، والمفروض لو هم مش سلفيين فعلا اللي بيهددوا الكنائس وبيقطعوا الودان وبيفرضوا الحجاب بالقوة دول، المفروض الناس اللي فعلا سلفيين هم اول ناس يعملوا اللجان الشعبية دي ويقبضوا على اللي بيعمل كده في كل المحافظات ويسلموه للجيش عشان على الاقل يحموا سمعتهم بدل ما كل الناس عمالة تتهمهم انهم بيخربوا البلد

ونرجع نتعاون مع بعض كلنا تاني، ونستعيد روح التحرير، ده ممكن جدا.. فيه مسئولية دلوقت على السلفيين، اللي شفتهم بعيني وهم واقفين يحموا المسيحيين في القداس، المفروض انهم يتخذوا اجراء ضد الناس اللي بتحول تصورهم على انهم متوحشين وبيقطعوا الودان

احنا ممكن نختلف فكريا

بس انا واثقة مليون المية.. مليون المية.. مليون المية.. ان مش السلفيين اللي بيعملوا الحاجات دي، وان مافيش شيخ سلفي واحد، مهما كنت مش باطيقه، حيطلب في السر ولا في العلن من مريديه انهم يعملوا حاجة زي دي ابدا ابدا ابدا.. يستحييييل يستحييييل

ده شغل صفوت الشريف وعمر سليمان وفتحي سرور وزكريا عزمي.. انا متأكدة من كده

ملحوظة:

الناس فرحانة يا مجلسنا العسكري بالبيان ده على فكرة، انا شفت ردود افعالهم على التويتر والفيس بوك، وده بيأكد ان كل املهم انهم يطمئنوا مش عايزين يعملوا خناقة ولا حاجة

ناقص بس:

1- الاعلان الدستوري اللي يلغي 71.. هم بس عايزين يسمعوا "اسقاط دستور 71" والنبي والنبي والنبي.. الله يخليكم، النهاردة بس 

2- نشوف الثلاثي مقبوض عليهم عشان نرتاح ومعاهم عمر سليمان بالمرة.. او على الاقل نعرف انهم تحت الاقامة الجبرية والرقابة المشددة ونشوف اثر ده على حياتنا لانهم خربوا لنا الدنيا

3- مبارك واسرته.. وخصوصا اسرته، الحيزبون وابنها بالتحديد، يتحاكموا، وما ينطلقوش كده في القاهرة يجتمعوا بالناس، ويبقوا تحت المراقبة المشددة كمان بس نشوف خطوات جدية على الاقل في سبيل محاكمتهم

4- حلو التواصل ده كده وبيانات وبتاع.. احنا بنبسط لما بنحس ان فيه آلية للتواصل معانا، انا شخصيا مبسوطة

5- وما عادش بقى ننضرب تاني، ويبقى فيه جهة تابعة للجيش تستقبل الشكاوى للشباب اللي اتعذب وكده، بدل ما يضطروا انهم يطلعوا على النت ويصوروا نفسهم، لأن دي حاجة بتسبب لهم الم نفسي فوق الالم النفسي اللي اتعرضوا له انهم يصوروا نفسهم ويتكلموا عن حاجات محرجة وجارحاهم، لو فيه مكتب معين او جهة معينة يتقدموا فيها بالشكاوى ويتابعوها.. ووالنبي اللي اخدوا احكام عسكرية دول غلابة، ومدنيين، ياريت الاحكام العسكرية اللي عليهم تتلغي ويتحالوا لمحاكمة مدنية

وانا عايزاكم يا شباب تشوفوا الفيديو ده عشان تعرفوا يعني ايه جيش مصر برضه

صلوا ع النبي كده.. احنا برضه كلنا مالناش الا بعض، وشوية علينا وشوية عليهم، المهم نحط ولاءنا الوطني قبل اي حاجة.. مافيش مسيحي يقول انا مسيحي، ومافيش مسلم يقول انا مسلم.. ومافيش حاجة اسمها "المسلمون يهددوا المسيحيين" المواقع اللي بتكتب لكم الكلام ده دي مواقع وحشة وعايزة تخرب ثورتنا، ومافيش حاجة اسمها: "دي مؤامرة عشان تشويه الاسلاميين"، المواقع اللي بتقول لكم دي وحشة برضه وعايزة تخربنا.. ده تخريب متعمد لبلدنا وثورتنا وعلاقتنا ببعض
نحمي بعض، وما نتهمش بعض، والجيش يطمنا من آن لآخر، ونشوف خطوات بس ملموسة ده كل اللي الناس عايزاه، ده المصريين شعب زي الفل والله، وجدع، وباله طويل، وحكيم، ويفدي بلده بروحه، واي حاجة بيعملها بيبقى قلق على بلده وخوف عليها لأن المصريين تعبوا على بلدهم قوي، واتبهدلوا عشانها قوي، ومش عايزين تعبهم ومعاناتهم تروح هدر
والنهاردة برضه فيه خبر حلو ان الاحزاب حتبقى بالاخطار، والانتخابات التشريعية حتبقى ان شاء الله في شهر سبتمبر وحيتشال الطوارئ قبل الانتخابات
بس عايزين تجميد نشاط اعضاء الحزب الوطني في اول انتخابات تشريعية سواء نزلوا باسم الحزب الوطني او نزلوا مستقلين، اللي له تاريخ اسود في عضوية الحزب ده - ولا حتى ابيض - ما يدخلش الانتخابات التشريعية الاولى والنبي، اصلا هم اخدوا اكتر من فرصتهم.. حتى لو هم ناس ملائكة نازلة من السما، تلاتين سنة منفردين بالبرلمان.. اظن كفاية كده، دورة برلمانية واحدة بس ما يدخلوش البرلمان
دورة واحدة بس وبعدها يرجعوا يشتغلوا.. اظن ده مطلب سقفه واطي قوي، فيه ناس طالبة حل الحزب من اساسه وحرمان اعضاءه من ممارسة الحياة السياسية اساسا، بس انا طيبة وطالبة انهم ما يدخلوش الانتخابات الجاية
وبالنسبة لاهالي المعتقلين المعتصمين قدام التلفزيون وماسكين ظباط وعساكر الجيش يعيطوا لهم ويحكوا لهم ويوروهم صور عيالهم والظباط والعساكر يطبطبوا عليهم هههههههههههههههه افرجوا عنهم بقى اذا كان العادلي هو اللي قابض عليهم في احداث الثورة بدل ما عناصر الجيش قاعدة تسمع برنامج حياتي قدام التلفزيون كده
وربنا يهدي الحال يا رب
نفسي في ايه تاني؟ نفسي في ايه تاني؟ مش فاكرة دلوقت، بس فيه تعليقات بقى على البوست ده... بوست يعني الموضوع، اقصد المقال ده يعني.. المهم فيه تعليقات حتلاقوا ناس كاتبة برضه حاجات نفسها فيها
والله الشعب قلبه حنين والجيش قلبه حنين وربنا يبعد عنا شياطين الانس والجن
ويالا بقى خلصوا التوقيعات اللي هنا عشان نسلمها على آخر الاسبوع ان شاء الله
<<<<<<<<<<<<