Tuesday, 8 March 2011

احنا عايزين ايه دلوقت؟ تونس جايبة فيها اجوان السنين

تحديث:
شوفوا مقال بلال فضل، والله ما كنت قريته وانا باكتب البوست ده، الجيش في خطر، لازم يرجع مكانه فورا ونعمل مجلس رئاسي، حضروا الاسماء وخطة العمل وكلموا الشارع ما تكلموش المجلس عشان هو خلاص كده وصل انه بقى على اخره
---------------
نشوف حنعمل ايه
دلوقت فيه تعليق للاحتجاجات والتظاهر يوم الجمعة الجاية
طيب احنا محتاجين نتناقش في كذا محور:
اولا: امن الدولة ده حيتعمل فيه ايه؟ لازم يتجمد نشاطه بقرار من النائب العام ومطلوب من الحقوقيين انهم يتقدموا بالطلب ده
ثانيا: بالنسبة للتعديلات الدستورية
الاستفتاء خلاص فاضل عليه 10 ايام
احنا قدامنا تلات خيارات
1- يا اما نتعامل مع 13 مادة المعدلة على انها دستور مؤقت وكل مواد الدستور التانية تتلغي وفي الحالة دي نقدر بقى نعمل الانتخابات الرئاسية قبل البرلمانية
2- يا اما تمر التعديلات على انها تعديلات بما فيها بقى من صلاحيات لرئيس الجمهورية اللي في المواد التانية وفي الحالة دي يبقى لازم نعمل البرلمانية قبل الرئاسية لأن صلاحيات رئيس الجمهورية ما ينفعش تمنح لبني ادمين اساسا، ولا ابوك ينفع يبقى له الصلاحيات دي عليك اساسا، رئيس الجمهورية في الدستور المصري زي ما هو كده بالتعديلات متحكم في رقاب العباد ويرفع اقواما ويخفض اقواما وشوية حيتكتب في اخر الدستور: توقيع: انا ربكم الاعلى
بس لو معاه برلمان والدستور بيلزمه يعمل دستور جديد حيحجم صلاحياته شوية، لو عايزين الرئاسية الاول يبقى الدستور ده ما ينفعش، نلغيه خالص ونعيش من غير دستور ارحم
3- يا اما نطالب بمجلس رئاسي عاجل ونأجل الاستفتاء على التعديلات الدستورية
انا عايزة مجلس رئاسي، ومش صحيح ان المجلس العسكري مش حيقبل بمجلس رئاسي، لو لقى ان ده مطلب شعبي وقدمنا له اسماء حيوافق، بدليل انه لا ابدى اعتراض ولا ابدى موافقة، ماهي دي طريقتهم، لما حاجة بتبقى مش عاجباهم بيقولوا لا.. هم حيتكسفوا يعني؟ وانا اظن انهم مش ممانعين لأنهم فعلا متوترين من وجودهم في الشارع كده وعايزين يتفرغوا لشغلهم ومتضايقين جدا بسبب اللي حصل في السودان وعايزين يرجعوا يراقبوا للحدود مع اسرائيل، وعايزين ياخدوا بالهم من اللي بيحصل في ليبيا، وحاسين انهم بيعملوا شغلانة مش شغلانتهم، وزهقوا من القعدة في الشارع، وابتدا خلقهم يضيق، وحاسين انهم اتحولوا من جيش لداخلية، واتخنقوا، وفي نفس الوقت مش عايزين يسيبوا البلد سايب في سايب واحنا مش مقدمين لهم طرح لمجلس رئاسي واضح ومتماسك وفيه شخصيات عليها توافق واسلوب عمل بحيث يطمنوا للفكرة الى جانب انهم حاسين ان الشارع بيحبهم ومش عايزين يحسسوا الشارع انهم تخلوا عنه لو ان فكرة المجلس الرئاسي دي مش مطلب شعبي
ونرجع تاني لفكرة ان الكلام مع الشارع اهم من الكلام مع المجلس العسكري
لان المجلس العسكري بيسمع الشارع عايز ايه ويعمله، مش بيسمع لت وعجن لنخب وبصراحة صح كده، هو معاه حق
نتكلم تاني مع الناس زي ما اتكلمنا معاهم في موضوع شفيق، ولما الشارع اقتنع المجلس اقتنع
بالنسبة للدكتور عصام شرف، احنا محتاجينه دلوقت بس يساعدنا في موضوع السيطرة على امن الدولة عشان فجأة كده هاج وماج وعمل لنا اطفيح وفتح لنا موضوع كاميليا شحاتة، دي حالة ردة فظيييعة فظييييعة فظييييعة، حالة الهبل اللي جات له دي لازم يتم السيطرة عليها وامن الدولة ده يتخصي خالص، ودي مسئولية الدكتور عصام شرف ولازم يتخذ اجراءات سريعة في الموضوع ده الى جانب الطلب اللي يتقدم للنائب العام بتجميد عمل امن الدولة فورا، ده من الوثائق اللي شفناها كانوا شغالين لحد يوم 4 مارس، يعني شغالين اهم
وتونس حلت امن الدولة
اشمعنى تونس؟ ده اول قرار اخده السبسي انه حل امن الدولة
احنا عايزين يجمد العمل فيه طيب لحد ما نشوف حنعمل فيه ايه؟ ما هي دايما تونس كده سابقانا واجدع مننا وبتخلص وتجيب من الآخر
انا عايزة افهم اشمعنى تونس افلح مننا كده؟ ماهم حلوا امن الدولة اهو وما حصلش حاجة
انا مش عايزاه امن الدولة ده تاني، مش عايزاه تاني ابدا..
وبصراحة بقى
التوانسة اجدع
التوانسة اجدع
التوانسة اجدع
من الآخر كده.. بصراحة اجدع.. بصراحة اجدع
بقى احنا نقعد نلف على مقرات امن الدولة، واساسا الجيش هو اللي ماسك البلد، يعني المفروض يبقى ايه، الحماية حماية.. متوحشة يعني، تونس الجيش مش هو اللي ماسك البلد، القيادة مدنية، وعندهم امن الدولة زي عندنا بالظبط وقعد يجيب لهم فرق موت وبلطجية وكل حاجة
وفي الآخر هم من غير لف ولا برم ولا مستندات بتتحرق ولا جيش دباباته في كل حتة وبيتعصب اول ما السور الحديدي يتزحزح ويفضل يضرب ذخيرة.. من غير ده كله، هم اللي يحلوا امن الدولة والبوليس السياسي
هم اسخم مننا، احنا عندنا امن دولة بس، هم عندهم امن دولة، وبوليس سياسي، بوليس سياسي زي ايام الملك، حلوهم الاتنين
لا خافوا من عصابات، ولا حاجة.. عصابات ايه؟ العصابات حتعمل ايه اكتر من اللي امن الدولة بيعمله دلوقت
اشمعنى تونس؟
ما تشوفوهم عملوا ايه معاهم ونعمل زيهم؟
وعندهم على فكرة مجلس حماية الثورة، مجلس مدني، غير الحكومة المدنية، والجيش التونسي خلاص بقى جيش عادي، مش عاملين في جيشهم اللي احنا عاملينه في جيشنا ومشيلينه كل حاجة وناقص يطبطب على ضهرنا عشان نقشط ويغير لنا الكوافيل، وما ضربش نار في الهوا، ده مرة واحدة ضرب المتظاهرين زي ما ضربنا قبل كده وخلوا اللي ما يشتري يتفرج عليه ما تناهاش، مش يضربهم مرة بالعصي الكهربائية والمرة اللي بعدها يضرب ذخيرة، المرة اللي بعدها ايه؟ طيران؟ ولما الكنيسة اتهدت بالبلدوزرات بتاعة المحافظة ما قدرش يتدخل، وعلى فكرة ما ينفعش يتدخل
ليه بقى؟ احنا متظاهرين يضرب نار في الهوا ويخوفنا نطلع نجري
لكن لو ضرب نار في الهوا والحكاية فيها مسلمين ومسيحيين حتبقى ليلة سودا، ده جيش، لو كان شرطة كان عادي يعمل كده، لكن الجيش ما ينفعش لما تبقى خناقة مسلمين ومسيحيين يدخل في الموضوع حتى لو المسلمين هم اللي غلطانين
وبعدين انا عايزة افهم، مين مسلم مش شايف ان اللي حصل ده غلط؟ هات لي اوسخ المسلمين تعصبا دلوقت وتطرفا دلوقت، هات لي واد من تنظيم القاعدة واسأله اللي حصل ده صح ولا غلط؟ طب امال ايه بقى؟ والجيش لما راح هناك لقى المسلمين بيقولوا له اللي حصل ده غلط! الله.. امال ايه؟ ماحدش بقى يرجع يقول لي اصل دي قرية فيها احتقان اساسا، فيها احتقان اساسا وكل سنة مسلم يحب مسيحية ومسيحي يحب مسلمة، بيحبوا بعض فين بقى اذا كان المسلمين والمسيحيين بينهم مشاكل اساسا؟ احنا مش حنقعد نخترع العجلة ولا نوضح الواضحات، ده امن الدولة ومسيطر على المحليات الي كنا عايزين نحلها هي كمان، امال بلدوزرات المحافظة دي جات منين؟
انا مش عاجبني الحال ده
تونس متقدمة علينا بخمستاشر جون
روحوا بقى شوفوها عملت ايه ونقلدها
احنا عايزين نحل امن الدولة زيهم
وعايزين مجلس رئاسي مدني، ومش حنقول زيهم يا سيدي، حطوا فيه واحد عسكري
واعضاء المجلس الرئاسي ما يترشحوش في الانتخابات الرئاسية عشان نضمن نزاهة المجلس بعد المجلس الرئاسي نعمل الاستفتاء على تعديلات الدستور ونشوف حنعمل فيها ايه وبعدين نعمل برلمان وبعدين نعمل انتخابات رئاسة على مهلنا
المهم الجيش يروح مكانه بقى عشان هو زهق فعلا وله حق يزهق
وتونس عملوا دستور جديد نوفي بعلبته، مش دستور متصلح
وعايزين مجلس حماية الثورة زيهم، ده لجنة شعبية ده معمول من كل الاطياف السياسية
احنا كده مش نافع، احنا مهددين اننا نفشل في اي لحظة بسبب وجود امن الدولة والناس صاحية النهاردة تتكلم عن موضوع كاميليا شحاتة قال
يعني امبارح الناس تتكلم عن كنيسة
والنهاردة يتكلموا عن كاميليا شحاتة؟
لو فضلنا كده حنلاقي نفسنا بكرة رجعنا نقول: يسقط يسقط حسني مبارك، وقولوا للعادلي الكلب وسيده بكرة الشعب حيقطع ايده
وبعد بكرة حنلاقي نفسنا كلنا في السجن، الشعب كله في السجن بقى
الناس بترجع ورا ولا بتتقدم
وعصام شرف مش شغلته انه يعمل مجالس عرب يصالح المسلمين والمسيحيين.. حاولع فيكم انتوا الاتنين
احنا عايزين من عصام شرف يعمل لنا زي السبسي ويخلصنا من امن الدولة
وشوفوا حكاية تعليق الاحتجاجات دي
طلع غلط.. والله طلع غلط، غلطنا، اهو اعلنا عن تعليق الاحتجاجات اهو الدنيا اتقلبت، لما فضينا ميدان التحرير بمطالبه الوطنية الناس فضيت تسلم دماغها للامن يقعد يكلمها عن كلام فارغ
وامبارح البلطجية هجموا على جامعة القاهرة!
البلطجي ده يهجم على محل صاغة، على سوبر ماركت، مصرف، ايه البلطجية المثقفين اللي بيهجموا على الجامعات دول؟ داخلين يسرقوا الساعة ولا الكتب ولا البروجيكتور ولا ايه بالظبط؟
تونس جايبة فينا اجوان السنين، بالحكم المدني، والدستور الجديد، وحل امن الدولة.. واجدع منا
يالا بقى، لو قابلينها على نفسكوا خليكم بقى.. تفضل ماسك الكورة طول الماتش هو اول ما يمسك الكورة يجيب فيك جون ويروح مرجعها لك تاني انت تجهد وهو يريح لحد ما تجيله الكورة يجيب جون كمان
طب ده في الماتشات مع شمال افريقيا.. كمان في الثورات؟
اه.. نسيت: ليبيا الدور التمانية

44 comments:

Luay Sakr said...

http://www.google.com/moderator/?hl=ar#15/e=618ef&t=618ef.40

اقترح ورشح اعضاء للمجلس الرئاسي

نوارة لو سمحتي انشري

Luay Sakr said...

اقترح ورشح اعضاء للمجلس الرئاسي

http://www.google.com/moderator/?hl=ar#15/e=618ef&t=618ef.40

لو سمحتي انشري يا نوارة

nosseir said...

مستحيل المجلس العسكرى يوافق على موضوع المجلس الرئاسى وعندهم حق الصراحة
ازاى يسلموا مسؤلية البلد لناس ما اخترهاش الشعب؟...الجيش عايز يسلم البلد لرئيس الناس هى اللى جابتة بانتخابات حقيقية عشان لو الرئيس دة خربها يبقى محدش يلوم الجيش...لان احنا اللى اخترنا الرئيس والبرلمان اللى هيراقب الرئيس
من الاخر انا شايف نعمل الانتخابات البرلمانية الاول وبعدين الرئاسية ...نمشى طبيعى زى ما الكتاب بيقول...بلاش نظام ركوب الحمار بالمشقلب دة
وبعدين حتى لو البرلمان اللى جه فى شوية اخوان كتير وحبة رجال اعمال..مش مشكلة ..كدة كدة هيتعمل دستور جديد ...وهتتعمل احزاب حقيقية ..والشعب بيراقب الوضع ..ومستحيل رئيس الدولة يعرف يستعمل صلاحياتة الكتير لقمع الناس...ان كان مبارك اللى كان لة تلاتين سنة حاكم ما عرفش يقمع ثورتنا...هيعملها رئيس ابن يومين؟...توكلوا على الله وبلاش الخوف اللى هيوصلنا لمرحلة الشك فى كل شئ واى شئ وبالتالى تحصل لنا انتكاسة

جبهة التهييس الشعبية said...

مش مستحيل

لو حس ان الناس عايزة كده حيعمل اللي الناس عايزاه

بس هو مش حاسس ان الناس عايزة كده

لكن فعلا هو عليه مسئوليات مضاعفة

احنا هنا جوة

هو عليه مسئوليات برة

مش ممكن ابدا.. ابدا.. ابدا.. الجيش يتدخل يحل مشكلة بين مسلمين ومسيحيين مصدرها ان بت مسلمة حبت واد مسيحي

ده حتى عيب يا جدعان
ده الجيش

Mohamed said...

معلش يعنى - اللعب اللى شغال دلوقتى 30% أمن دولة و 70% كوكتيل موساد على امريكا على بلاوى زرقة من مصاصى دماء الشعب

جبهة التهييس الشعبية said...

بلا موساد بلا امريكا

وثائق امن الدولة بتقول ان امن الدولة هو نفسه بيشتغل لحساب الموساد والسي اي ايه

Shahir Boshra said...

أضم صوتي للرأي اللي بيقول ان المجلس العسكري مستحيل يوافق و السبب هو زي ما قلتي بالظبط، الشعب عمره ما حيعوز كده، الشعب مستفز خلقة من اقالة شفيق تلبية لمطالب الميدان و ان شرف اخد شرعيته من الميدان، المطالبة بتعيين مجلس رئاسي حتترجم (سواء بحسن نية او سوء نية) بأن الميدان مش عاجبه الجيش كمان، المطلب الجماهيري في الوقت الحالي هو التهدأه و استعادة اي مظهر من مظاهر الاستقرار، و يا دوب ابتدا يحصل كده بتعيين وزارة مقبولة، نقوم نسخن الناس باقتراح ممكن يترجم بانه رفض للجيش؟؟ اسمحيلي انا مختلف معاكي جداً في النقطة دي

Mohamed said...

بلا موساد بلا امريكا

وثائق امن الدولة بتقول ان امن الدولة هو نفسه بيشتغل لحساب الموساد والسي اي ايه
--------------------------
طب ما هوه ده اللى انا بقوله موساد و امريكا بيحركوا أمن الدولة بالريموت كنترول كالعادة يعنى

utopia said...

السلام عليكم
اهم شىء دلوقتى دستور جديد والغاء القديم
لازم دستور جديد انا لو فضل موضوع الترقيع ده مش هاروح استفتا
كده ضحك على الدقون
نلغى الدستور ونلغى امن الدولة ويتقبض عليهم هما ومبارك وحبايبه
والمجالس المحلية والمحافظين يتشالوا

بعد كده يعملوا الانتخابات الرئاسية يعملوها برلمانية مش هاتفرق
دم المصريين ما سالش على الارض علشان نقبل البدائل المتاحة

هى مش كانت ثورة ؟ولا احنا بيتهيألنا؟؟
ياريت بقا كمان الائتلافات الكتييرة قوى بتاعة الثورة تعمل

ائتلاف موحد مش بنلعب احنا وكل واحد عامل لى فريق

Nicholas Urfe said...

انا مع راي نصير،

خلي الناس تشوف شغلها وخلينا واثقين فيهم ،وبلاش نكرههم فينا

الامور واضحة والخطة الشعبية واضحة ، نصعبها على نفسنا ليه بطلبات جديدة؟

في كل الاحوال المطالب ارئيسية هتتنفذ

مجلس شعب عادل
دستور جديد
محاكمة للفساد

والحمدلله الرقابة الشعبية موجودة ،،يبقى مالهاش لازمة المطالب الجديدة

مع كل احترامي لرايك يا نوارة ولراي كل من يتفق معك

Gihan said...

المستشار طارق البشري
الدكتور محمد البرادعي
د. سكينة فؤاد
المستشارة تهاني الجبالي
د. فاروق الباز
المستشارة نهى الزيني

اختيار أي اثنين من الأسامي دي بالاضافة لشخص عسكري

Shahir Boshra said...

ممكن جداً يكون أمن الدولة كان بيشتغل لحساب أي حد، و انه كان واخد حقوق الفتن في مصر حصرياً، لكن بعد حل الجهاز مش كل الجهات دي حتضطر تتعب شوية و تشتغل في مصر بمجهودها؟

زعبلاوى said...

الحقيقة انا مش مقتنع بان مجلس رئاسى هيخفف الضغط عن الجيش , , وكأن اول ما الجيش هيعمل مجلس رئاسى الدنيا هتهدى , , والجيش هيرجع لثكانته, وده افتراض مش صحيح , , وخاصا ان احنا عندنا داخلية بتدلع ومش عايزة تشوف شغلها , , فالواقع بيقول ان قوات الجيش هتفضل موجودة ذى ما هى حتى بعد الجلس الرئاسى

انا شايف الميزة الوحيدة لوجود مجلس رئاسى , ,هو التعامل مع مطالب الشعب بقدر اكبر من الشفافية والسرعة, , عشان نشيل من دماغنا , حكاية ان الجيش بيتعرض لضغوط خارجية
بس هتفضل امامنا المشكلة الاكبر
كيفية اختيار هذا المجلس !

yara_ali17 said...

رغم إني مش في مصر و زي ما الناس بتقولي إللي إيده في الميه مش زي اللي ايده في المظاهرات و حظر التجول .. بس اول ما قرأت الخبر بتاع تعليق المظاهرات .. معاجبنيش خالص .. المظاهرة مش ضد د.عصام شرف .. هو عارف لأي حد بنقدره .. و كمان قالولوا احنا جنبك عشان اي حاجة .. تقوم تتلغي المظاهرة ... يا سلام ّ!!! ما هو كدة فرصة عظيمة للتعابين تخرج من جحورها و يكملوا اكل في ودان جبهة نهدا و قابليني بقى لو المليونيات عرفت تتجمع تاني في الميدان ... كمان زي ما فهمت ان التظاهر مرتبط بتحقيق المطالب ... لما بقى قائمة المطالب تتحقق مانبقاش نروح نتظاهر .. و انا معاكي تماما إن لازم يكون فيه مجلس رئاسي و الجيش يرجع مكانه و نعمل دستور جديد و احزاب تتكون عدل .. هي ده ثورة ولا سلق بيض ؟؟!!

nosseir said...

انتى عايزة مجلس رئاسى عشان الجيش ما يبقاش متصدر المسؤلية ومحدش يخبطة فى الثوار؟
طب ما كدة كدة الجيش هيكون علية مسؤلية الامن فى البلد حتى مع وجود المجلس الرئاسى..انتى عايزة تقولى ان الشرطة هتقدر تنزل بكامل طاقتها وتحل محل الجيش زى زمان ؟ دة مستحيل تطبيقة على ارض الواقع حاليا...يعنى كدة كدة الجيش هو المتصدر فى الفترة الحالية
انا شايف ان خطة الجيش بتاعة الست اشهر عشرة على عشرة واحنا بنثق فى الجيش وانة يكون المسؤل عن البلد فى افترة الحالية..بلا مجلس رئاسى بلا بتنجان
هو فقط اللى انا منتظرة من الجيش هو قرار حل امن الدولة وترحيل اعضاء الجهاز الى داخل الاجهزة المختلفة للشرطة ...وجعل مسؤلية الامن الداخلى لجهاز الامن القومى او يعملوا جهاز جديد بسياسة جديدة تماما...وبدون ضباط جهاز امن الدولة الحالى..لان دول عايزين يتعالجوا الاول

nour1971 said...

الغبي هو الي مش فاهم ان الي بيحصل ده شغل آمن الدوله لأنها واضحه زي الشمس و شغل البلطجيه الي ظهر اول ما عصام شرف مسك الوزاره و كانوا امبارح مقفلين المحور و بالليل افلوا كوبري اكتوبر و نازلين رعب في الناس بالاشاعات مش عارفه مين اغتصب مين و مين موت مين و مين عمل في مين ايه ده شغل مش نضيف و الي غايظني ان فيه ناس مصدقه الاشاعات دي و بتروجلها و الي غيظني اكتر بتاع اليوم السابع الي هارينا اشاعات امن الدوله و التاني عمرو اديب و الي معاه ده في البرنامج ايه القرف ده حا نخلص منهم امتي . يا ب يتوب علينا من وساختهم كلهم يا رب .

عايزين نركز في الدستتتتتتتور المترقع ده مصيبته سوده حا نعمل فيه ايه؟

hassn hamdi said...

يا نوارة..
انتي ليكي اتصالاتك بائتلاف شباب الثورة..وانا نصحت من الاول ان لازم الائتلاف يتفق على مجلس رئاسي ويقدمه للمجلس العسكري...قلنا يا ريءت نعمل مجلس رئاسي من ناس الكل بيتفق عليهم زي رئيس المحكمة الدستورية العليا ورئيس محكمة النقض مثلا مع واحد زي رئيس الاركان سامي عنان وممكن نضيف د. عبد الله الأشعل علشان المسائل السياسية وواحد زي اللواء احمد رشدي علشان المسائل الأمنية
اتصلي بائتلاف شباب الثورة يا نوارة وخليهم قبل يوم الجمعة يكونوا متفقين على قائمة باعضاء المجلس الرئاسي ويحطوا خمس ست مجموعات أو بدائل للمجلس (يعني خمس مجالس مختلفة علشان الجيش يختار منهم ويناقشهم فيه) مجرد التمني هيخلينا نسيب البلد لحد ما تولع
وبعد المجلس الرئاسي ما يستلم السلطة هنتفق معاه على اعلان دستوري يحطه جهابذة القانون عندنا زي المستشار البسطويسي وغيره (وكمان المجلس الرئاسي هيكون فيه فطاحل في القانون الدستوري) وبكده نقدر نساعد دكتور عصام شرف على انه ينفذ باقي مطالبنا ويستبعد ويحجّم الغربان اللي بتحاول تلتف على الثورة زي بتوع أمن الدولة..
وبالنسبة لحكاية الفتنة الطائفية دي انا عندي اقتراح يتم تنفيذه برضه بالتوازي مع خطوة المجلس الرئاسي والاعلان الدستوري
والاقتراح كالتالي:
كيف نجهض مخطط نظام حسني مبارك وأمن الدولة لإثارة الفتنة الطائفية في البلد؟
أولا: يجب على قيادات الثورة (وأقصد بها كل من شارك في الثورة المصرية على اختلاف طوائفهم وتوجهاتهم ومنطلقاتهم الفكرية) تشكيل لجنة عليا لمحاربة الفتنة الطائفية على ان تتكون هذه اللجنة من وتضم قيادات مسيحية رسمية (من الكنيسة) وشعبية (من العلمانيين- اي من غير رجال الدين المسيحيين) والتيارات الاسلامية التي شاركت في الثورة مثل الاخوان والسلفيين والجماعة الاسلامية وغيرها، والحركات الشبابية مثل حركة 6 ابريل وحزب الجبهة وحزب الغد وكفاية وغيرها وصحفيين واعلاميين وكتاب وفنانين مستقلين من المسلمين والمسيحيين
تكوين فرع اعلامي للجنة مهمته توعية الناس في كل انحاء مصر بالمخطط الذي يستهدف البلاد وتحذير الناس من التجاوب مع دعاوى الاثارة والفتنة بعقد ندوات ومحاضرات ومواعظ في الكنائس ودروس في المساجد ولقاءات في وسائل الاعلام المختلفة وصفحات متخصصة على الفيسبوك وغيرها من شبكات التواصل الاجتماعية وغيرها.
تكوين فرع أمني لتشكيل لجان شعبية لحماية المساجد والكنائس ومؤسسات الدولة المختلفة بالتعاون مع وزارة الداخلية ود. عصام شرف
تكوين فرع دعوي متخصص يضم شيوخا من الشيوخ المشهورين (محمد حسان وياسر برهامي وناجح ابراهيم ومحمد مرسي وغيرهم) وقساوسة ورجال دين مسيحيين ممن اعتصموا في ميدان التحرير وشاركوا في الثورة ومهمته التركيز على هذه المسألة وتوعية الناس لما يجري في البلد لمحاصرته واحباطه
تكوين فرع قانوني لملاحقة ضباط امن الدولة التي تقف وراء هذا المخطط ورفع دعاوي قضائية ضدهم بتهمة الخيانة العظمى ونشر الفتنة في ربوع البلاد...ومتابعة حوادث الفتنة الطائفية والقضايا العالقة بين المسلمين والمسيحيين (مثل موضوع كاميليا شحاتة ودير الأنبا بيشوي وغيرها) لصرف طاقات الناس الغاضبين نحو التعامل مع هذه الحوادث بشكل قانوني وقضائي بدلا من اللجوء للاحتجاجات والعنف

wagdy said...

طب ما تخلصينا و تقوليلنا نعمل ايه, هو ايه شغل التبكييت ده......في الانجاز كده
- خطوات للنزول للشارع و اقناع الناس بالمجلس الرئاسي و الدستور الجديد

- وكلمي الجماعة بتوع الائتلاف ظبطي معاهم ....
والله العظيم يوم الجمعة ده هو اللي عاملنا قيمة ....بلاش سذاجة و نعلق ونقعد في البيوت هو احنا ايه مابنتعلمش.....بس بسرعة الله يخليكي بسرعة و النبي........

hassn hamdi said...

لازم نتحرك يا نوارة على الارض ونقطع الطريق على نظام مبارك لاجهاض ثورتنا...
مسألة الفتنة الطائفية ممكن تولع البلد وتكون سبب للتدخل الخارجي
وصدقيني فيه ناس متابعة الكلاب اللي بينخروا في عضم البلد ومش هنسيبهم في حالهم بس همتك انتي واخواتك في اللي اقترحته عليكي.. عاوزين نوزع الادوار بدلا من تشتبت الجهود
الجيش متحمل ضغط رهيب والدكتور عصام بدأ هوه كمان ينخ تحت الضغط

salwa ibrahim said...

I totally agree with you ya Nawara
elgeish 3amal ellie 3aleih and we love them, now they have to go back to protect our boarder and we should make magless reyassa, beacaue elgeish is not used to replace a president, and there should be magless to protect elthawra,
by the way egypt tv is ok now except bernameg Masr alnahardah Khairy and Tamer know people do not want them they are so desprate that they started to poison people's brains and you know poor people do not have dish satellite they watch the local channels, specially khairy watch him yesturday you will see hatered and hekd and ghel on the thawra he was talking so bad trying to make it appear as civil war they would do anything to keep their faces shown on TV, WA ALLAH ya Nawara homma elethnein sabab el depression , without them people's mood is happy and proud , they have to be removed from tv because their plan is changing the people's mood and openion from thawrah slowely ,I think they are still loving the old regime inside their hearts and you know they used to interview 3alaa and Gamal Mubark all the time.

سواح في ملك الله- said...

انا عندي راي
قبل اي مطالب
يجب اعطاء الجيش فرصة لافراز الغث
من الثمين
ومساعدته
يعني تعليق الاعتصامات والمطالب
لمدة زمنية اسبوع مثلا او اسبوعين
والدعوة لعدم خروج للمظاهرات
حتي يتم الفرز مين اللي مع الثورة
ومين اللي ضدها
حتي لاتختلط الامور علي الجيش
اللي ضدها هيخرج بمطالب فئوية
واللي معاها ميخرجش
واعطاء فرصة لعصام شرف لالتقاط انفاسه
واعادة ترتيب اوراقه

omran said...

متفق تماما مع الكلام اللى قولتيه.. عايز أعلق على التعديلات الدستورية:

http://bit.ly/hYjZti

nosseir said...

الجيش قام بدور عظيم فى مساندة الثورة
وانحاز للشعب ضد الحاكم الطاغية ...لكن
لكن اتمنى من الجيش انة يحمى الثورة من اعدائها ...مين اعدائها؟
1- امن الدولة ..يعنى يتحل الجهاز واعضائة يتوزعوا فى الداخلية والعناصر الخطيرة منهم تتعزل وتتحاكم
2- الحزب الوطنى يتحل
3- المجالس المحلية ..ودول خطيرين جدا..يكفى اللى حصل اول امبارح للكنيسة والبلدوزرات تكشف ازاى الناس دة ممكن تبوظ الدنيا
4- مديرى الامن فى جميع انحاء الجمهورية ..يتم استبدالهم بعناصر نزيهة ومضمون ولائها للبلد مش للعادلى والنظام السابق
لو الاربع عناصر دة اتغيرت ..السادة البلطجية اللى طلعوهم من السجن مش هيعرفوا يتحركوا عشان دول العضلات ..اما المخ فهم العناصر اللى ذكرتهم
والله الموفق

cherif.hakam said...

مجلس رئاسى ثلاثى,بلا عسكريين,ثم انتخاب جمعية تأسيسية دستورية,بواسطة الشعب,ثم دستور جديد,ثم انتخاب رئيس الجمهورية,ثم انتخاب مجلس الشعب-لا حاجة لمجلس شورى-فهو لا يفعل شيئا.أى تسلسل آخر,سيعرض الثورة للخطر

ابو اجنده said...

http://gate.ahram.org.eg/News/47244.aspx
اسرائيل تقول ان نواره نجم ووقود الثوره

حسن يحيى said...

كلامك صح 100% لازم نعمل مجلس رئاسي، نطول الفترة الإنتقالية، الجيش يرجع يشوف شغله، البلد تستقر، نعمل دستور جديد، نطول الفترة الإنتقالية، نطلق الحريات و حرية تكوين الأحزاب، نعمل إنتخابات رئاسية و بعدين برلمانية نكون كده ضمننا إن الرئيس هيجي بإنتخابات نضيفة من غير سيطرة حد معين و كمان البرلمان نفس الكلام.

النقطة بقى اللي لازم نوضحها إن مش كل ما نقول على إسم يترشح للمجلس الرئاسي يقول لأ عشان عاوزين ينزلوا إنتخابات الرئاسة و بجد لازم ننكر ذاتنا شوية، و مش شرط إنهم ميترشحوش للرئاسة ممكن نخلي الشرط إنهم يتمنعوا من الترشح للرئاسة لفترتين مثلاً.

طب إحنا كده هننزل الجمعه الجايه بقى ولا ايه النظام؟

ابو اجنده said...

صحفية إسرائيلية: النساء هن وقود الثورات العربية.. والدليل نوارة نجم http://t.co/I8oPLX6

أبو هاجر said...

ست الكل مساء الخير
أولا وقبل السياسة لا بد من التهنئة
أنت ناسية اليوم هو عيد المرأة الذي يصادف 8 مارس بهذه المناسبة لك أجمل التحيات يا زغرودة الزمن الجميل
وبالمناسبة هذا اليوم هو أيضا يصادق عيد ميلادي وأنت تعلمين ذلك. لقد انتظرت منك تهنئة من باب المجاملة، من باب العلاقة الإنسانية. بصدق انتظرت ذلك . المهم نعديها مثل غيرها .
نعود للسياسة من الخطأ، ليس الكبير فحسب ، بل الفادح أيضا المقارنة بين مصر وتونس هذا ينم عن سذاجة سياسة حتى لا أقول كلمة أخرى .مصر دولة محورية بالمعنى العميق للكلمة . وكما قلت لك في تعليق سابق أمريكا لها إستراتيجيتها و الشعوب العربية لها حساباتها وهو الرهان الحقيقي .ويبدو أن أمريكا محرجة كثيرا لأنها لم تتوقع أن تذهبوا بعيدا لأنها كانت تهدف إلى مجرد إصلاحات ، بيمنا الشعب حولها إلى ثورة حقيقية وأمريكا ستسعى حتما إلى الضغط على المؤسسة العسكرية من أجل تقليم أظافر الثورة والثوار حتى لا تمتد مخالب الثورة إلى الجارة غير المرغوب فيها . لأن ذلك يعني انقلاب موازين القوى في المنطقة لصالح مصر ومن ورائها الأمة العربية وهذا يتناقض مع مصالح أمريكا و الغرب عموما الذي يحمل أجندة سايكس بيكو جديد من هنا مسؤوليتكم التاريخية الكبيرة وهذا هو الرهان القادم
مرة أخرى كل عام و النوارة بألف خير

Liverpool said...

يا استاذ لؤى الجيــــش لازم يرضى عارف ليه لأنه هوا شخصيا بيحـــكم البلــــد من غير ما الشعب يختــــاره كحاكم هوا كمان
....
بس انا يثير خوفى أسئلة تانية كمان
هى ليه الثورة وقفت فجأة؟؟
و ليه الجيش كمان توقف عن اصدار البيانات؟؟
و ليه متلغاش امن الدولة لحد دلوقتى؟؟
من المسيحيين الذين خرجوا يتظاهرون رغم الشروع فى تنفيذ مطالبهم؟؟
و ايه حكاية زكريا عزمى فى الرئاسة الفترة دى؟؟
و ايه حكاية التأجيلات فى محاكمات الفاسدين ؟؟

assour said...

الوضع صعب لكن الشعب مش أهبل ، نبلغ الجيش ان بلطجية هدوا كنيسة و بلطجية ضربوا بعض ينقبض علي الكل كليلة و سيرة مسلم و مسيحي ما توردش اساسا في بلد حر

Amira said...

ياجماعة خلوا بالكم اهم حاجة نفضل جنب بعض.
سلام عليكم، بعد مشاهدتي للفيديو بتاع
القس و قراءة مقال بلال فضل الخص النقاط الآتية:
1- الجيش لازم يفضل في صفنا بمساعدتنا ليه حتى لو ظهرت علامات استفهام نحاول تجاهلها
2- اتحادنا مع اللأخوة المسحين ونعتبر عملية هدم كنيسة بلودرات مجلس محلي عملية تخريبية تخصنا كلنا و نتصرف بنفس طريقة الحصار للفساد اللي حصلت لمقرات أمن الدولة؛ الفساد عايز يتحاصر و لو بصينا لعملية الكنيسة دي نلاحظ ان اسلوبها مكشوف جدا و المفروض انه لا يحقق الفركشة اللي بدأت تحصل.

Nicholas Urfe said...

الغبي هو الي مش فاهم ان الي بيحصل ده شغل آمن الدوله لأنها واضحه زي الشمس
-----------------------

للأخ اللي قال كده ،دي مصادرة ، وعدم ديموقراطية ، وكل من يخالفك يصبح غبي !

hossam said...

بصراحة بقى التوانسة ايد واحدة واستمروا فى الاعتصام حتى بعد استقالة الغنوشى وما فيش الحوارات بتاعة انتو خربتو البلد وانتو معطلين البلد والكلام ده

hossam said...

بصراحة بقى التوانسة ايد واحدة واستمروا فى الاعتصام حتى بعد استقالة الغنوشى وما فيش الحوارات بتاعة انتو خربتو البلد وانتو معطلين البلد والكلام ده

hossam said...

بصراحة بقى التوانسة ايد واحدة واستمروا فى الاعتصام حتى بعد استقالة الغنوشى وما فيش الحوارات بتاعة انتو خربتو البلد وانتو معطلين البلد والكلام ده

جبهة التوعية بأهداف الثورة said...

وربنا يا نوارة أنا زعلان جدًا، بقى احنا مات مننا المئات، ومافرقناش أبدا بين مسسيحي ومسلم، والنهاردة كل يوم يحصل اعتصام أمام مكتبة الإسكندرية من المسيحيين
????!!!!!.... يا جماعة بصراحة الجيش زهق.. وزي ما قلنا قبل كده لازم نعرف عدونا من حببنا، ومصر وراها كتير أوي أوي، فيا إما نساعد بعض حتى نصل بالثورة إلى ما نريد تحقيقه منها، وإما زي ما قالت نوارة: بكرة هنلاقي ناس بتهتف بسقوط حسني مبارك وحكومة شفيق.... ولا حول ولا قوة إلا بالله.

khaled said...

ما فيش حاجة اسمها مجلس رئاسي يختاره الجيش او الائتلاف ..ده اسمه تهريج ..احنا مش بنعمل اكلة ملوخية علشان الفتاوي تشتغل وكل واحد يقترح ناس .. مجلس رئاسي يعني منتخب .. يعني ييجي بانتخابات مش ترشيح ..عو مش مجلس الاباء في مدرسة ..ده حيدير دولة محورية ..واي حد يفكر غير كده يبقي لا فرق بينه وبين نظام مبارك اللي 400 واحد ماتوا علشان يغوروه في داهية ..هو مجموعه من الناس - ابا كانوا- حيفرضوا رئيس علي الشعب ؟؟ فين الديموقراطية اللي الناس ماتت علشانها .. الحاجة التانية مال المجلس الرئاسي ومال الجيش ..ايه اللي حيرجع الجيش لثكناته ؟؟ هو المجلس الرئاسي حيجيب العساكر بتاعته معاه ؟؟.. مجلس رئاسي او غيره حيفضل الجيش في الشارع ..وزيادة الفترة الانتقالية معناها زيادة الضغط علي الجيش .. والجيش مش حيستحمل ..واللي جرب العصاية الكهربا يحكيلكوا الجيش لما اعصابه تفلت بيعمل ايه..
الحاجة التالتة حنخسر الناس كلها والشعب لو قلنا عاوزين نطول الفترة الانتقالية بفم مليان كده ... والله الناس حتقلب علينا اهو اللي مصبرهم انها 6 شهور ويعدوا ..
لو مجلس رئاسي يبقي بالانتخاب ..اي حاجة غير كده ممكن الجيش نفسه حتحصل فيها انشقاقات في مستوي القيادة .. وان شاء الله حتلاقوا مصطفي محمود اتملا عن اخره بناس كانت معانا في التحرير ..
انا رأيي ان الوقت بيجري ونركز في اعادة دراسة الدستور وان لم يمكن عمل دستور جديد يبقي اعلان دستوري مؤقت ..وبعدين انتخابات رئاسية لفترة انتقالية سنة ولا يسمح بترشحه مرة اخري والدستور والاعلان الدستوري يقيد صلاحياته ويلزمه بدستور جديد ياخد وقته ويطرح للاستفتاء ثم انتخابات برلمانية واعداد لدولة برلمانية كاملة بانتخاب رئيس جديد ..هذا والله اعلم

doria Elkerdany said...

الاقتراحات في المقال ده عن تحقيق الأمن في البلد مهمة بدون الاستعانة بجهاز الشرطة اللي كل ما بيفوت الوقت بيصبح عليه علامات استفهام كتير
http://dostor.org/authors/11/57/11/march/8/37699

Hany said...

لازم مجلس لحماية الثورة يمثل جميع قوى الثورة ويصدر قراراته بمنتهى الديموقرطيه اللى الشهداء راحوا فى سبيلها.ده لازم يتكون فورا.
المجلس ده يمثل مخ الثورة والتظاهر (العضلات) يوم الجمعه فقط و لوقت محدد يحترم حظر التجول علشان لانخسر الجيش وعلشان البورصه اللى بعد اربعين يوم اغلاق ح تتلغى عالميا وتنهار..
زى مانتوا شايفين الثورة المضادة مشغله مخ ( امن الدوله وخلافه ) مع عضلات ( بلطجيه وخلافه لتنفيذ خطط اجهاض الثورة و تقليب الشعب ضدها).
دى خطوة اولى
الخطوة الثانيه هدفها تبديد مخاوف الثوار من صلاحيات الرئيس فى التعديلات الدستوريه وفى نفس الوقت احترام رغبة الجبش فى عمل الاستفتاء كخطوة اولى نحو الاستقرار. يبقى لازم مخ وعضلات الثورة تطالب بتعديل صلاحيات الرئيس قبل الاستفتاء و كذلك حرية تكوين الاحزاب ينص عليها فى التعديلات . وطبعا المفروض احتاما للديموقراطيه يكون الاستفتاء على كل مادة على حدى مش زى زمان سلق بيض.وبكده مش محتاجين الدخول فى شد وجذب مع الجيش واللى اكيد عليه ضغوط و اهمها معرفة الرئيس المحتمل هل هو مع ام ضد السلام مع اسرائيل هو ده بيت القصيد بالنسبه للغرب والباقى ميهمهوش الا شكليا.
الخطوة الثالثه موضوع الشرطه لانه عامل مؤثر على تعاطف الشعب مع الثورة. طب ايه الحل؟ اولا لازم د عصام يعلن حل امن الدوله و ضم افراد لقطاعات الداخليه الاخرى التى ليس لها احتكاك الا بالشرطه نفسها. ثانبالازم فورا يصدر رئيس الوزراء انذار الى الشرطه بالرجوع للعمل مع ضمان الجيش والثوار لسلامة غير المتورطين فى قتل او نعذبب المصريين لانهم مجرمين وليسوا شرطه ومن لايتسجيب يقدم لمحاكمه عسكربه مفيش دلع فى العسكريه. فى نفس الوقت يتم فتح باب القبول لدورة تدريب سريع على اساسيات العمل الشرطى تكون اولوية القبول فيها لطلية الحقوق او حديثى التخرج من الحقوق والحاق رقابه من منظمات المجتمع المدنى على اقسام الشرطه. طيب و مين يقوم بعمل الشرطه حالبا هى الشرطه العسكريه مع مراقبة اداؤها من مجلس حماية الثورة وتوصيل اى تجاوز الى مجلس الجيش.. بكده ممكن البورصه تفتح ويبدء شئ من الاستقرار وتفقد الثورة المضادة الامل فى الايقاع بين الثورة والجيش او الثورة والبسطاء من الشعب. وعندما يفقد المخ الامل يبقى العضلات من البلطجيه وخلافه سوف تتوقف

هذا تصورى لعله يكون معينا الى الثوار فى تثبيت نجاح هذه الثورة المباركه.. وفقكم الله الى مافيه خير مصر

ملكش دعوة said...

انا شايفه فعلا ان الناس نسيت الثوره والشهدا وكل حاجه ومبقناش نفكر غي في تعيين العماله المؤقته والاقتصاد اللي هيقع والشرطه وامن الدوله
فين ..فين شباب الاتلاف من شاشات التليفزيون بدل ما الناس اعده بتسمع للي بيسخنوا الشعب علي حال البلد المايل والبلطجه ومحدش فيهم بيقول مين اللي ورا كل ده المذيع يقول كلمتين في الاول ظراف ولطاف عن الثوار وبعدين هاتك يا همز ولمز مالوش معني ويقول طب وبعدين البلد بتضيع اللي اسمه خيري وتامر واديب وبنت الشاذلي الناس دي هتنقطني حسه انهم بيلعبوا علي الونجين فين مطالب الثوره فين صوتكوا سبتوا الناس يسمعوا اي كلام ويجروا ورا اي بلوه
لازم ترجعوا للساحه من تاني حتي لو الناس مش عايزه الناس مش فاهمه وفي اللي مش عايز يفهم
صفحات الانترنت نسيتكوا ليه الشباب اعدين يهبلوا في فضايح حسني وامن الدوله والفلوس المنهوبه ارجعوا ..ارجوكم ارجعوا

Hany said...

ماهى الخطوات المطلوبه لاتمام نجاح الثورة المصريه الان
by هانى on Tuesday, March 8, 2011 at 10:02pm
لازم مجلس لحماية الثورة يمثل جميع قوى الثورة ويصدر قراراته بمنتهى الديموقرطيه اللى الشهداء راحوا فى سبيلها.ده لازم يتكون فورا
المجلس ده يمثل مخ الثورة والتظاهر (العضلات) يوم الجمعه فقط و لوقت محدد يحترم حظر التجول علشان لانخسر الجيش وعلشان البورصه اللى بعد اربعين يوم اغلاق ح تتلغى عالميا وتنهار..
زى مانتوا شايفين الثورة المضادة مشغله مخ ( امن الدوله وخلافه ) مع عضلات ( بلطجيه وخلافه لتنفيذ خطط اجهاض الثورة و تقليب الشعب ضدها).
دى خطوة اولى
الخطوة الثانيه هدفها تبديد مخاوف الثوار من صلاحيات الرئيس فى التعديلات الدستوريه وفى نفس الوقت احترام رغبة الجبش فى عمل الاستفتاء كخطوة اولى نحو الاستقرار. يبقى لازم مخ وعضلات الثورة تطالب بتعديل صلاحيات الرئيس قبل الاستفتاء و كذلك حرية تكوين الاحزاب ينص عليها فى التعديلات علشان تمثيل كل القوى الجديدة فى البرلمات . وطبعا المفروض احتراما للديموقراطيه يكون الاستفتاء على كل مادة على حدى ويكون معنى عدم الموافقه على التعديلات يساوى الغاء كل الدستور وعمل دستور جديد مش بقلء دستور 71 زى ماهوه .. يعنى مش زى زمان سلق بيض.
وبكده مش محتاجين لمجلس رئاسى و الدخول فى شد وجذب مع الجيش واللى اكيد عليه ضغوط و اهمها معرفة الرئيس المحتمل هل هو مع ام ضد السلام مع اسرائيل هو ده بيت القصيد بالنسبه للغرب والباقى ميهمهوش الا شكليا.
الخطوة الثالثه موضوع الشرطه لانه عامل مؤثر على تعاطف الشعب مع الثورة. طب ايه الحل؟ اولا لازم د عصام يعلن حل امن الدوله و ضم افراد لقطاعات الداخليه الاخرى التى ليس لها احتكاك الا بالشرطه نفسها. ثانبالازم فورا يصدر رئيس الوزراء انذار الى الشرطه بالرجوع للعمل مع ضمان الجيش والثوار لسلامة غير المتورطين فى قتل او نعذبب المصريين لانهم مجرمين وليسوا شرطه ومن لايتسجيب يقدم لمحاكمه عسكربه مفيش دلع فى العسكريه. فى نفس الوقت يتم فتح باب القبول لدورة تدريب سريع على اساسيات العمل الشرطى تكون اولوية القبول فيها لطلية الحقوق او حديثى التخرج من الحقوق زنخريج دفعات سريعه من كلية ومعاهد الشرطه والحاق رقابه من منظمات المجتمع المدنى على اقسام الشرطه. طيب و مين يقوم بعمل الشرطه حالبا هى الشرطه العسكريه مع مراقبة اداؤها من مجلس حماية الثورة وتوصيل اى تجاوز الى مجلس الجيش.. بكده ممكن البورصه تفتح ويبدء شئ من الاستقرار وتفقد الثورة المضادة الامل فى الايقاع بين الثورة والجيش او الثورة والبسطاء من الشعب. وعندما يفقد المخ الامل يبقى العضلات من البلطجيه وخلافه سوف تتوقف

هذا تصورى لعله يكون معينا الى الثوار فى تثبيت نجاح هذه الثورة المباركه.. وفقكم الله الى مافيه خير مصر

علان العلانى said...

تعليق على مقال بلال فضل المشار اليه في بداية التدوينه

http://baynalkitabah.blogspot.com/2011/03/blog-post_08.html

monasoly said...

انا معاكى يانوارهلازم مجلس رئاسى فوراوبعدين انا مش موافقه على التعديلات المترقعه هيه الناس كانت عرفت ايه هيه التعديلات حد طلع على تليفزيون بلدنا من لجنه التعديل وقال والله كان اصل الماده كذا واحنا عدلناها وبقت كذا لسه برضه النظره المتعاليه واللى من فوق السطوح للشعب انا شامه ريحه وحشه اما بخصوص ان الشعب اتهبل لا الشعب عنده شيزوفرينيا نتيجه القهر والظلم والفقر والفسادوستين سنه والنتيجه طفحت دلوقتى الشيزوفرينيا الجماعيه انا خايفه اوى دلوقتى على مصرنا حاسه ان فيه نزعه للتدمير الذاتى

Ibrahim said...

رأي خطأ تماما ،،
أنا دلوقتي مقتنع تماما برأي المجلس العسكري و المستشار طارق البشري
و لا يوم زيادة في الفترة الانتقالية
انتخابات و نتصرف مع بعض بقي بالديمقراطية
انتم عايزين نعيش سنة أو أكثر فترة انتقالية مع كل المشاكل دي ،، عشان نبني أحزاب ؟؟
و البلد تولع بقه !!
دلوقتي نطالب فقط بصندوق انتخابات نظيف و من خلاله نعمل كل اللي عايزينه
أنا علي فكرة مع الثورة من أول يوم و شاركت في فعاليات كتير
مش محبط و لا من الثورة المضادة و لا خايف
بس اي فترة انتقالية زيادة فعلا بتدبسوا اللي هيمسكها