احنا عايزين ايه دلوقت؟ تونس جايبة فيها اجوان السنين

تحديث:

شوفوا مقال بلال فضل، والله ما كنت قريته وانا باكتب البوست ده، الجيش في خطر، لازم يرجع مكانه فورا ونعمل مجلس رئاسي، حضروا الاسماء وخطة العمل وكلموا الشارع ما تكلموش المجلس عشان هو خلاص كده وصل انه بقى على اخره

---------------

نشوف حنعمل ايه

دلوقت فيه تعليق للاحتجاجات والتظاهر يوم الجمعة الجاية

طيب احنا محتاجين نتناقش في كذا محور:

اولا: امن الدولة ده حيتعمل فيه ايه؟ لازم يتجمد نشاطه بقرار من النائب العام ومطلوب من الحقوقيين انهم يتقدموا بالطلب ده

ثانيا: بالنسبة للتعديلات الدستورية

الاستفتاء خلاص فاضل عليه 10 ايام

احنا قدامنا تلات خيارات

1- يا اما نتعامل مع 13 مادة المعدلة على انها دستور مؤقت وكل مواد الدستور التانية تتلغي وفي الحالة دي نقدر بقى نعمل الانتخابات الرئاسية قبل البرلمانية

2- يا اما تمر التعديلات على انها تعديلات بما فيها بقى من صلاحيات لرئيس الجمهورية اللي في المواد التانية وفي الحالة دي يبقى لازم نعمل البرلمانية قبل الرئاسية لأن صلاحيات رئيس الجمهورية ما ينفعش تمنح لبني ادمين اساسا، ولا ابوك ينفع يبقى له الصلاحيات دي عليك اساسا، رئيس الجمهورية في الدستور المصري زي ما هو كده بالتعديلات متحكم في رقاب العباد ويرفع اقواما ويخفض اقواما وشوية حيتكتب في اخر الدستور: توقيع: انا ربكم الاعلى

بس لو معاه برلمان والدستور بيلزمه يعمل دستور جديد حيحجم صلاحياته شوية، لو عايزين الرئاسية الاول يبقى الدستور ده ما ينفعش، نلغيه خالص ونعيش من غير دستور ارحم

3- يا اما نطالب بمجلس رئاسي عاجل ونأجل الاستفتاء على التعديلات الدستورية

انا عايزة مجلس رئاسي، ومش صحيح ان المجلس العسكري مش حيقبل بمجلس رئاسي، لو لقى ان ده مطلب شعبي وقدمنا له اسماء حيوافق، بدليل انه لا ابدى اعتراض ولا ابدى موافقة، ماهي دي طريقتهم، لما حاجة بتبقى مش عاجباهم بيقولوا لا.. هم حيتكسفوا يعني؟ وانا اظن انهم مش ممانعين لأنهم فعلا متوترين من وجودهم في الشارع كده وعايزين يتفرغوا لشغلهم ومتضايقين جدا بسبب اللي حصل في السودان وعايزين يرجعوا يراقبوا للحدود مع اسرائيل، وعايزين ياخدوا بالهم من اللي بيحصل في ليبيا، وحاسين انهم بيعملوا شغلانة مش شغلانتهم، وزهقوا من القعدة في الشارع، وابتدا خلقهم يضيق، وحاسين انهم اتحولوا من جيش لداخلية، واتخنقوا، وفي نفس الوقت مش عايزين يسيبوا البلد سايب في سايب واحنا مش مقدمين لهم طرح لمجلس رئاسي واضح ومتماسك وفيه شخصيات عليها توافق واسلوب عمل بحيث يطمنوا للفكرة الى جانب انهم حاسين ان الشارع بيحبهم ومش عايزين يحسسوا الشارع انهم تخلوا عنه لو ان فكرة المجلس الرئاسي دي مش مطلب شعبي

ونرجع تاني لفكرة ان الكلام مع الشارع اهم من الكلام مع المجلس العسكري

لان المجلس العسكري بيسمع الشارع عايز ايه ويعمله، مش بيسمع لت وعجن لنخب وبصراحة صح كده، هو معاه حق

نتكلم تاني مع الناس زي ما اتكلمنا معاهم في موضوع شفيق، ولما الشارع اقتنع المجلس اقتنع

بالنسبة للدكتور عصام شرف، احنا محتاجينه دلوقت بس يساعدنا في موضوع السيطرة على امن الدولة عشان فجأة كده هاج وماج وعمل لنا اطفيح وفتح لنا موضوع كاميليا شحاتة، دي حالة ردة فظيييعة فظييييعة فظييييعة، حالة الهبل اللي جات له دي لازم يتم السيطرة عليها وامن الدولة ده يتخصي خالص، ودي مسئولية الدكتور عصام شرف ولازم يتخذ اجراءات سريعة في الموضوع ده الى جانب الطلب اللي يتقدم للنائب العام بتجميد عمل امن الدولة فورا، ده من الوثائق اللي شفناها كانوا شغالين لحد يوم 4 مارس، يعني شغالين اهم

وتونس حلت امن الدولة

اشمعنى تونس؟ ده اول قرار اخده السبسي انه حل امن الدولة

احنا عايزين يجمد العمل فيه طيب لحد ما نشوف حنعمل فيه ايه؟ ما هي دايما تونس كده سابقانا واجدع مننا وبتخلص وتجيب من الآخر

انا عايزة افهم اشمعنى تونس افلح مننا كده؟ ماهم حلوا امن الدولة اهو وما حصلش حاجة

انا مش عايزاه امن الدولة ده تاني، مش عايزاه تاني ابدا..

وبصراحة بقى

التوانسة اجدع

التوانسة اجدع

التوانسة اجدع

من الآخر كده.. بصراحة اجدع.. بصراحة اجدع

بقى احنا نقعد نلف على مقرات امن الدولة، واساسا الجيش هو اللي ماسك البلد، يعني المفروض يبقى ايه، الحماية حماية.. متوحشة يعني، تونس الجيش مش هو اللي ماسك البلد، القيادة مدنية، وعندهم امن الدولة زي عندنا بالظبط وقعد يجيب لهم فرق موت وبلطجية وكل حاجة

وفي الآخر هم من غير لف ولا برم ولا مستندات بتتحرق ولا جيش دباباته في كل حتة وبيتعصب اول ما السور الحديدي يتزحزح ويفضل يضرب ذخيرة.. من غير ده كله، هم اللي يحلوا امن الدولة والبوليس السياسي

هم اسخم مننا، احنا عندنا امن دولة بس، هم عندهم امن دولة، وبوليس سياسي، بوليس سياسي زي ايام الملك، حلوهم الاتنين

لا خافوا من عصابات، ولا حاجة.. عصابات ايه؟ العصابات حتعمل ايه اكتر من اللي امن الدولة بيعمله دلوقت

اشمعنى تونس؟

ما تشوفوهم عملوا ايه معاهم ونعمل زيهم؟

وعندهم على فكرة مجلس حماية الثورة، مجلس مدني، غير الحكومة المدنية، والجيش التونسي خلاص بقى جيش عادي، مش عاملين في جيشهم اللي احنا عاملينه في جيشنا ومشيلينه كل حاجة وناقص يطبطب على ضهرنا عشان نقشط ويغير لنا الكوافيل، وما ضربش نار في الهوا، ده مرة واحدة ضرب المتظاهرين زي ما ضربنا قبل كده وخلوا اللي ما يشتري يتفرج عليه ما تناهاش، مش يضربهم مرة بالعصي الكهربائية والمرة اللي بعدها يضرب ذخيرة، المرة اللي بعدها ايه؟ طيران؟ ولما الكنيسة اتهدت بالبلدوزرات بتاعة المحافظة ما قدرش يتدخل، وعلى فكرة ما ينفعش يتدخل

ليه بقى؟ احنا متظاهرين يضرب نار في الهوا ويخوفنا نطلع نجري

لكن لو ضرب نار في الهوا والحكاية فيها مسلمين ومسيحيين حتبقى ليلة سودا، ده جيش، لو كان شرطة كان عادي يعمل كده، لكن الجيش ما ينفعش لما تبقى خناقة مسلمين ومسيحيين يدخل في الموضوع حتى لو المسلمين هم اللي غلطانين

وبعدين انا عايزة افهم، مين مسلم مش شايف ان اللي حصل ده غلط؟ هات لي اوسخ المسلمين تعصبا دلوقت وتطرفا دلوقت، هات لي واد من تنظيم القاعدة واسأله اللي حصل ده صح ولا غلط؟ طب امال ايه بقى؟ والجيش لما راح هناك لقى المسلمين بيقولوا له اللي حصل ده غلط! الله.. امال ايه؟ ماحدش بقى يرجع يقول لي اصل دي قرية فيها احتقان اساسا، فيها احتقان اساسا وكل سنة مسلم يحب مسيحية ومسيحي يحب مسلمة، بيحبوا بعض فين بقى اذا كان المسلمين والمسيحيين بينهم مشاكل اساسا؟ احنا مش حنقعد نخترع العجلة ولا نوضح الواضحات، ده امن الدولة ومسيطر على المحليات الي كنا عايزين نحلها هي كمان، امال بلدوزرات المحافظة دي جات منين؟

انا مش عاجبني الحال ده

تونس متقدمة علينا بخمستاشر جون

روحوا بقى شوفوها عملت ايه ونقلدها

احنا عايزين نحل امن الدولة زيهم

وعايزين مجلس رئاسي مدني، ومش حنقول زيهم يا سيدي، حطوا فيه واحد عسكري

واعضاء المجلس الرئاسي ما يترشحوش في الانتخابات الرئاسية عشان نضمن نزاهة المجلس بعد المجلس الرئاسي نعمل الاستفتاء على تعديلات الدستور ونشوف حنعمل فيها ايه وبعدين نعمل برلمان وبعدين نعمل انتخابات رئاسة على مهلنا

المهم الجيش يروح مكانه بقى عشان هو زهق فعلا وله حق يزهق

وتونس عملوا دستور جديد نوفي بعلبته، مش دستور متصلح

وعايزين مجلس حماية الثورة زيهم، ده لجنة شعبية ده معمول من كل الاطياف السياسية

احنا كده مش نافع، احنا مهددين اننا نفشل في اي لحظة بسبب وجود امن الدولة والناس صاحية النهاردة تتكلم عن موضوع كاميليا شحاتة قال

يعني امبارح الناس تتكلم عن كنيسة

والنهاردة يتكلموا عن كاميليا شحاتة؟

لو فضلنا كده حنلاقي نفسنا بكرة رجعنا نقول: يسقط يسقط حسني مبارك، وقولوا للعادلي الكلب وسيده بكرة الشعب حيقطع ايده

وبعد بكرة حنلاقي نفسنا كلنا في السجن، الشعب كله في السجن بقى

الناس بترجع ورا ولا بتتقدم

وعصام شرف مش شغلته انه يعمل مجالس عرب يصالح المسلمين والمسيحيين.. حاولع فيكم انتوا الاتنين

احنا عايزين من عصام شرف يعمل لنا زي السبسي ويخلصنا من امن الدولة

وشوفوا حكاية تعليق الاحتجاجات دي

طلع غلط.. والله طلع غلط، غلطنا، اهو اعلنا عن تعليق الاحتجاجات اهو الدنيا اتقلبت، لما فضينا ميدان التحرير بمطالبه الوطنية الناس فضيت تسلم دماغها للامن يقعد يكلمها عن كلام فارغ

وامبارح البلطجية هجموا على جامعة القاهرة!

البلطجي ده يهجم على محل صاغة، على سوبر ماركت، مصرف، ايه البلطجية المثقفين اللي بيهجموا على الجامعات دول؟ داخلين يسرقوا الساعة ولا الكتب ولا البروجيكتور ولا ايه بالظبط؟

تونس جايبة فينا اجوان السنين، بالحكم المدني، والدستور الجديد، وحل امن الدولة.. واجدع منا

يالا بقى، لو قابلينها على نفسكوا خليكم بقى.. تفضل ماسك الكورة طول الماتش هو اول ما يمسك الكورة يجيب فيك جون ويروح مرجعها لك تاني انت تجهد وهو يريح لحد ما تجيله الكورة يجيب جون كمان

طب ده في الماتشات مع شمال افريقيا.. كمان في الثورات؟

اه.. نسيت: ليبيا الدور التمانية