Sunday, 20 March 2011

من الذي اختطف محمد الظواهري

تحديث:
الخبر نزل على اليوم السائع.. هو احنا كل ما واحد يتقبض عليه لازم نعمل عليه ظياط عشان يقولوا لنا هو راح فين؟ 
وبعدين كده مين اللي قبض عليه؟
امن الدولة ما اتحلش يا عياااااااااااال... احنا انضحك علينا
تحديث:
وزارة الداخلية بتقول ان محمد الظواهري اعيد اعتقاله لعرضه على النيابة العسكرية للنظر في قضية العائدون من البانيا اللي هو محكوم عليه فيها بالاعدام!
اعدام؟ 
امال افرجوا عنه ليه؟
وينفع الناس تروح ما تطلعش كارنيهات وتصوب الاسلحة على الجيران؟ 
طب احنا عايزين نلم توقيعات على البيان بقى
تحديث:
تم اخلاء سبيل الظباط السفاحين اللي قتلوا المتظاهرين في اسكندرية.. النهاردة
لو سمحتوا احنا عايزين نشوف صورة حديثة للعادلي في السجن، متاخدة له دلوقت مثلا، او هاتوه على الهوا... الظاهر ان العادلي.. هييييه، اسكت يا لساني، ما عنديش معلومات
بس عايزين نشوفه برضه، خصوصا بعد ما قال: لن اكون كبش فداء لمبارك
معقول يكون اللي بيتم تناقله شفاهة ده حقيقة؟ فيلم اللي بالي بالك؟ 
السجين ده بتاعي
-------------------------
امبارح الساعة حداشر بالليل محمد الظواهري كان في بيته مع اولاده هجم على البيت اعداد مهولة من الرجالة، جزء منهم لابسين مدني، وجزء منهم لابسين لبس اسود "شبه لبس الشرطة او هو لبس الشرطة، بس مش العادي" معاهم سلاح كتير قوي
عبد الرحمن الظواهري ابن محمد قال لهم انتوا مين؟ قالوا له: ملكش دعوة احنا مين.. محمد الظواهري مقبوض عليه..
فعبد الرحمن قال لهم: ممكن الكارنيهات؟
فواحد من اللي لابسين اللبس الاسود ده قال له بالحرف: كل السلاح اللي معانا ده ومش مقتنع اننا شرطة وعايز كارنيهات؟
(ههههههههههههههههههههههه دي تضحك قوي، ده كان ناقص يقول له: انت عارف احنا جايبين السلاح ده بكام ومأجرين البدل بكام عشان نقنعك ولسه مش مقتنع؟)
واحد كان لابس ملكي قال لعبد الرحمن: انا مدير امن الجيزة يابني
وراحوا واخدين محمد.. وهم نازلين بيه على السلم صوبوا الاسلحة تجاه الجيران اللي فتحوا البيبان 
عبد الرحمن نزل وراه لقى عربيات شرطة كتير جداااااا جداااا جداااا (على حسب كلامه) وقافلين الشارع وعربيتين ملاكي، محمد ركبوه عربية ملاكي فعبد الرحمن اخد تاكسي وطلب منه يمشي وراهم
اول عربية اختفت كانت العربية اللي فيها محمد، بقية العربيات فضلت تتفرق في شوارع جانبية
عبد الرحمن مشي ورا العربية اللي فيها الشخص اللي قال له انه مدير امن الجيزة
العربية اللي فيها مدير امن الجيزة المزعوم وقفت قدام مديرية امن الجيزة ونزل منها الراجل فعبد الرحمن نزل وحاسب التاكسي عشان يخش ورا الراجل واول ما التاكسي مشي راح الشخص اللي قال على نفسه مدير امن الجيزة ركب العربية - العربية كانت عربية شرطة - وطلع بسرعة من غير ما يدخل المديرية، هو كان توجه للباب لكن ما دخلش 
--------------
عبد الرحمن سمع حاجتين
واحدة من واحد في سجن ليمان طرة قال له: مسجون جديد جه بعربيات كتير وهو نازل حصل اطلاق نار كثيف، ودخل زنزانة انفرادية، وخرج منها المسجون اللي كان جوة الزنزانة، والمسجون بيقول له: مش عارف... يمكن يكونوا بيفضوا له الزنزانة وودوا المسجون اللي جوة ده في حتة تانية.. لكنه مش متأكد
سمع كمان ان محمد في سجن اكاديمية مبارك
------------
بلغني من بعض مصادر، وعايزين تأكيدات من الجيش او الداخلية، ان امبارح في احدى المحافظات الجيش اعتقل مجموعة مسلحة لابسة جيش وارتكبت فظائع. 
-----------
يبدو ان فيه بعض ميليشيات النظام السابق استغلت انشغال الجيش والشرطة في الاستفتاء... احنا بنحاول الوصول لرئيس الوزراء الدكتور عصام شرف، ووزير الداخلية اللواء العيسوي عشان بس نتأكد ان اللي اخد محمد هم الداخلية فعلا، وعشان نعرف الاشاعات اللي سمعها عبد الرحمن دي مدى صحتها
كمان بنحاول الوصول للمجلس الاعلى للقوات المسلحة، لأن فيه كلام - مجرد كلام مش متأكدين من مدى صحته - بيقول ان مافيش فرد ولا قيادة في الجيش يعرف حاجة عن الاشخاص اللي جوة المتحف وان الجيش قبل كده دخل مشط المتحف وما لقاش حد، وعايزين نعرف مدى صحة الكلام ده، لأن الاشاعات والكلام كتر. الاكيد ان فيه ناس جوة المتحف بيعتقلوا الناس ولابسين شرطة عسكرية وجيش. مش متأكدين مما يتناقله الناس حول ان اللي لابسين جيش دول مزيفين او لا. 
وعايزين نسأل وزارة عصام شرف، والمجلس الاعلى للقوات المسلحة، لو الشكوك والحكاوي اللي فوق دي فيها اي شيء من الصحة احنا نقدر نساعد  بإيه؟
تاني حاجة: لو الشكوك والحكاوي اللي فوق دي صحيحة، احنا طالبين احتجاز عاجل لكل من صفوت الشريف، وزكريا عزمي، وفتحي سرور، وجمال مبارك، وقطع اتصالاتهم بكل الناس اللي بيشتغلوا معاهم بموجب قانون الطوارئ
تالت حاجة: لقراء المدونة، باستثناء رواية عبد الرحمن لاعتقال ابوه محمد الظواهري، كل ما سبق مجرد حكاوي يتم تناقلها ولم يؤكدها اي مصدر موثوق او مسئول، بمعنى، الخبر الوحيد المؤكد واللي عارفين انه حصل، ان محمد تم اختطافه من مجموعة لم يتم التأكد اذا كانت في الداخلية ولا لا، ومش عارفين هو فين بالظبط.. غير كده كلها حكاوي.. مجرد حكاوي وشكوك.. واحنا بنسعى دلوقت للاستوثاق من الخيال العلمي اللي فوق ده... على الله يطلع كله كدب يا رب.. والا نبقى دخلنا في فيلم امريكاني بقى

29 comments:

يقول أنى امرأة said...

نوارة هى ايه حكايه ان السعوديه ودول الخليج قالو لو حاسبتم مبارك هنشحنلكم المصريين الى عندنا ع اول مركب

mohamed kharoub said...

طيب ايه اللي دخل العادلي في الموضوع

مصري said...

قصة ابنه محمد نفسها خياليه ..معقول الظابط حيقعد يحكي ويقول كده ...هل في مخابرات اجنبية بتلعب جوه مصر ..ربنا يسترها

Hamed Esmail said...

سواء الجيش له يد او ملوش أو الداخلية لها يد أو ملهاش فهي مسؤلة عارفة ليه يا نوراة لأن في ناس المفروض تكون مسجونة دلوقتي أو بتتحاكم وسايبنهم يدافعوا عن نفسهم خارج القفص وبالتاللي العواقب هتكون كبيرة وكتيرة والإهمال والممطالة في أخد القرارات هي اللي هتودينا ورا كمان وكمان

بساطه said...

انا اتبسترت .... حلم جميييل كابوس مفزع... حلم جميييييل كابوس مفزع..... يارب نهدا ونفهم ايه الي بيحصل

Ebn 5aled said...

الجمعيه الوطنيه لتغيير باعتنلي ميل زفت كده ، بيقول الناس تنزل مظاهره ضد التعديلات الدستوريه !!! دول عايزين إيه بزبط !

عطيه said...

لسه صباعو بيلعب

kala said...

أخر تلات كلمات في كلامك هما اهم حاجه في البوست كله
كله فيلم امريكاني
معرفش ليه حاسس ان امريكا اللي وار الموضوع
دا لو صح يعني

عطيه said...

عايز اكتب في مدونه السيده نواره نجم وتشوف تعليقاتي وترد عليا اعمل ايه ارجو الرد ومتسبونيش كده

Liverpool said...

عااادى ... الزبالة موجودة و ظاهرة طبيعية لكن اللى المفروض يكون طبيعى بردو هوا كيفية التعامل الشعبى معاهم .. سواء انهم يبلغوا الجيش (لو يعنى دول شرطة بجد) او يحتكوا بيهم لحد اما يعرفوا دول مين

heba said...

أعتقد ان مخاربات عمر سليمان وراء هذا الأمر فهو مهندس تهريب المساجين على حد وصفهم بالارهابيين عبر امريكا

heba said...

ابحثوا عن رجال عمر سليمان

بهيج الشرير said...

تحديث ياأبلتي! الواد حبيس العاهري بعد أستغر الله العظيم من اللي إتعمل فيه من المساجين من تحرش جنسي وبعبصة وخلافه، غير إسم الشهرة بتاعه من حبيس العاهري ملك الليمان إلى حبيس العاهري عروسة الليمان

محمد طنطاوي said...

يعنى يا نواره هاتساعدى عصام شرف هو ايه اللى عملوا عصام شرف أو ايه اللى قدموا لينا لحد دلوقت مش كل دا بحصل فى وزراة سواء حصل بعلمه ولا من غير علمه هو مسئول مسئولية كاملة عن اللى بيحصل دا احنا مش عايزين نداهن مش كد المسئولية يسيبها وبعدين ليه نسيتوا مطالب الثورة محد ليه دلوقت عايد يتكلم عنها ولا جمعة مليونية ولا الفية وعمالين نسمع عن الدلع اللى بتداعوا القوات المسلحة ووزارة عصام شرف سواء للعدلى ولا غيره ومؤتمرات واجتماعات فى السجن وانتو عارفين اللى كان بحصل فى سجن المزرعة ، فى نفس الوقت اللى متجاهلين فيه تماما مطالب الثورة واختزلوها فى التعديلات الدستورية وأيديهم لم تسلم حتى من تعذيب وسجن البنات يعنى مازال اللى خان البلد يكرم والشريف يسجن ويعتقل ويجرم وتمنهن كرامته

Adb El-Hameed Riad said...

مش سرور ولا صفوت ولا زكريا الى ورا الحكايه دى وصفوت بيقولو انه فى فرنسا اساسا الحكايه دى وراها حد تانى وحاسس ان الحكايه دى مربوطه بالاكونتات الوهميه الى على الفيسبوك

Bienveillant أوفياء مصر d'Égypte said...

عدد (نعم) 14 مليون
عدد (لا) 4 مليون
وعدد الأصوات الباطلة مائة ألف

أى % 77.2 نعم
و % 22.8 لا

طيب كويس والله إن فيه فى مصر 4 مليون بيفهموا - ها ها ها

وطبعاً بسبب الديموقراطية - الوحشة دى - سوف نقبل رأى إللى مابيفهموش - مش مشكلة المرة دى - أما نشوف إيه أخرتها مع البتاعة إللى إسمها الديموقراطية دى

على الله ما يطلعلناش ناس تقول

الشعب يريد إسقاط الديموقراطية - ها ها ها

ده أحنا ما صدقنا نيتدى الديموقراطية يا غجر

أبوبشر said...

يا نوراة ..فيه وحدة اسمها وحدة مكافحة الارهاب الدولي موجودة ف مصر وبتضم عناصر من امن الدولة ووزراة الخارجية ومؤسسات تاني بالدولة والوحدة دي مرتبطة بشكل مباشر باجهزة المخابرات الخارجية وليها غالبا دور كبير ف حاجات غامضة حصلت وبتحصل لازالت ف مصر ومن ضمنها الموجودين بالمتحف او اللي اعتقلوا محمد الظواهري

nosseir said...

محمد الظواهرى اتقبض علية تانى عشان القضية المسماة (العائدون من البانيا ) ...وهيتعرض على النيابة العسكرية
الكلام دة لسة طالع حالا فى قناة اليوم

أبوبشر said...

يا نوارة ...فيه وحدة اسمها وحدة مكافحة الارهاب الدولي موجودة بمصر وبتضم ضباط من امن الدولة وناس بوزارة الخارجية وناس من اجهزة تانية داخل الدولة والوحدة دي مرتبطة باجهزة مخابرات خارجية وليها امكانيات مختلفة عن باقي الاجهزة في مصر ..وغالبا ليها دور ف حاجات كتير غامضة تمت ولا زالت تتم داخل مصر

khaled said...

الله ينور عليكي , هو ده الي انا بقوله
"تاني حاجة: لو الشكوك والحكاوي اللي فوق دي صحيحة، احنا طالبين احتجاز عاجل لكل من صفوت الشريف، وزكريا عزمي، وفتحي سرور، وجمال مبارك، وقطع اتصالاتهم بكل الناس اللي بيشتغلوا معاهم بموجب قانون الطوارئ"

واحد نزرلة ميدان التحرير واعتصام لغاية مالعالم المعفنة دي تتقفش من قفاها , ايه رايك, او اي راي تاني نتفق عليه , يا نوارة ردي علي الله يخليكي

yaser said...

علشان تقدري تتخلصي من حاجه اسمها فلول الحزب الوطني لازم تحلي الحزب الوطني

وده مش هيجي إلا بمليونيه كبيره في كل ميداين مصر للقضاء على الحزب الوطني بس يجب ان يتم الحشد من اليوم بكل الأساليب والإتفاق مع كافة جبهات الثوره وأيضا الإتفاق مع كافة القوى المعارضه والتنسيق أيضا مع الإعلام لكي يتم الحشد وحل هذا الحزب الظالم

وسموها مليونية القضاء على الحزب الوطني

وعلى فكره الجيش وزكريا عزمي وسرور وصفوت الشريف العلاقه بينهم زي السمنة على العسل

khaled said...

yaser
معاك 100 في ال 100
هاه يا جدعان ايه الكلام

hardway said...

ده فيلم أكشن...........ولا ايه
طبعا هو انت أقل من أستاذك....
نفس الكلام..نفس الاسلوب..شغال في الصحافة
الالكترونية
رشا عزب...ممثل حسن صبحي..سلخانة المتحف
العسكر...كلام..كلام..ولا ادلة
وحد يقدر يكلم... الملهم.....
استاذك..صاحب حاحا وتفاحة..و علي سبايسي
عيشي الموقف....عيـشي
الشعب فال نـــــــــــــعـــــــم
وانتم لسه في السلخانة والعسكر ورشا وصبحي

hardway said...

ده فيلم أكشن...........ولا ايه
طبعا هو انت أقل من أستاذك....
نفس الكلام..نفس الاسلوب..شغال في الصحافة
الالكترونية
رشا عزب...ممثل حسن صبحي..سلخانة المتحف
العسكر...كلام..كلام..ولا ادلة
وحد يقدر يكلم... الملهم.....
استاذك..صاحب حاحا وتفاحة..و علي سبايسي
عيشي الموقف....عيـشي
الشعب فال نـــــــــــــعـــــــم
وانتم لسه في السلخانة والعسكر ورشا وصبحي

Tears said...

لا يا نوراة اللى اخدوا الظواهرى وزراة داخلية و اعلنوا فى التلفزيون

على فكرة امبارح حاولوا تهريب حبيب العادلى و الجيش اشتبك معاهم لان همه واضح عايزين يقتلوه قبل ما يجيب رجل الجميع

الخبر منشور فى اكتر من مكان

موضوع المتحف ده خطير و لازم النقط تحت على الحروف

khaled said...

انا مش قادر افهم احنا متنيلين على عنينا ليه مستنين
زكريا وصفوت وسرور مطلوقين
ومبارك وعيلته في شرم مانتخين
والكومي والكلاب الي زيه مطلوقين
واحنا يا حرام مستنين, بنتفرج ومطنشين
هما الي ماتوا شهدا منا ولا ناس تانين....
ما حدي يرد عليا والا انتم نايمين؟؟؟

kbahey said...

نوارة

دة خبر بيقول ان ضرب الرصاص في السجن كان محاولة لتهريب العادلي

http://www.watan.com/%D9%87%D8%AF%D9%87%D8%AF-%D9%88%D8%B7%D9%86/%D9%85%D8%AD%D8%A7%D9%88%D9%84%D8%A9-%D8%AA%D9%87%D8%B1%D9%8A%D8%A8-%D8%AD%D8%A8%D9%8A%D8%A8-%D8%A7%D9%84%D8%B9%D8%A7%D8%AF%D9%84%D9%8A-%D9%88%D8%A7%D8%B4%D8%AA%D8%A8%D8%A7%D9%83%D8%A7%D8%AA-%D8%A8%D8%A7%D9%84%D8%B0%D8%AE%D9%8A%D8%B1%D8%A9-%D8%A7%D9%84%D8%AD%D9%8A%D8%A9-%D9%81%D9%8A-%D9%85%D8%AD%D9%8A%D8%B7-%D8%B3%D8%AC%D9%86-%D9%85%D8%B2%D8%B1%D8%B9%D8%A9-%D8%B7%D8%B1%D8%A9.html

أخيرا مصرية وأفتخر said...

اه خلاص مش عايزه اعرف اخبار عن اللي بيحصل في مصر تاني حرام
هو احنا اول دوله تطلب حريتها وكرامة ابنائها يعني لو مااخدتش حريتي وكرامتي في بلدي هاخدها فين والله حرام لو تعرفوا المصري بيتعاملوا معاه اذاي في السعوديه ودول الخليج احنا مهانين في كل مكان عشان نعيش بكرامه وعشان نلاقي لقمة عيش لاولادنا يعني لو رجعنا بلدنا هانعيش اذاي هانعيش متهانين باردوه مش هانقدر نعيش اولادنا ...الحراميه اللي سرقوا البلد وشردوا اولادها وسجنوهم وقتلوهم عايشين بيمرحوا فيها والجيش ودن من طين وودن من عجين واحنا نولع بجاز...كل ما نطلب شيئ نعمل ثورات ومظاهرات حرام نعيش ذي العالم والناس حرام.....

sally said...

طيب بفرض ان محمد الظواهرى ده مجرم مش فى حاجة اسمها قضاء ولا يقتحموا عليه بيته بالطريقة دى
مسكوه عشان يعرضوه على النيابة العسكرية طيب ماهو كان فى السجن 12 سنة معرضهوش ليه طول المدة دى
وبعدين حكم الاعدام القضاء اصلا اسقطه
الحادثة دى خطيرة وبتبينلنا ان مفيش اى حاجة اتغيرت نفس اسلوب امن الدولة
وبعدين انا نفسى اعرف هو معتقل عشان هو عمل جريمة ولا عشان افكاره ولا عشان هو اخو ايمن الظواهرى
لو معتقل عشان افكاره او عشان هو اخو ايمن الظواهرى يبقى مفيش اى حاجة اتغيرت فى مصر والموضوع ده عايزله وقفة