Saturday 26 March 2011

خلينا في المفيد.. التوقيعات في تزايد وايدكم معانا

تحديث:
دي صفحة الفيس بوك بتاعة التوقيعات
تحديث:
للي بيجمع توقيعات في اسوان
0122375490


دلوقت انتوا شايفين ده؟ 
ده يخض فعلا، لأن مالك عدلي قال لي ممكن يصدر حكم لصالحهم في غفلة منا
عشان كده احنا عايزين اعلان دستوري فوري، يسقط دستور 71 
يسقط دستور 71 
يسقط دستور 71 
مش يعطله... مش يعطله، لازم الجيش يقول انه تم الغاء دستور 71، دلوقت اللي بتتحرك ومحروقة وما بتفكرش غير في الانتقام من الجيش المصري وقيادات الجيش والشعب والوجوه البارزة في الثورة هي سوزان مبارك، وهي شرانية وغبية الاتنين
اللي بيهندس لها الحاجات دي هو فتحي سرور وصفوت الشريف وزكريا عزمي
هي عمالة تغلي دلوقت ان ليه الجيش المصري سيب جوزها الحكم وليه جوزها سابه من غير ما يعمل فينا زي ليبيا واليمن وهي لما شافت البلدين دول اتشجعت وحست ان القذافي وعلي عبد الله صالح اجدع من جوزها من وجهة نظرها لأنها غلاوية فوق ما تتخيلوا.. اتشجعت للانتقام، هي اللي يهمها ابنها وبس، والشعب خطف التيتينة من ابنها وخلاه يعيط، والجيش ساعد الشعب في الحكاية دي
هي وجوزها وعيالها حييجوا حييجوا، ان شاء الله
بس الاول نخلص من المهندس القانوني والمهندس الاعلامي والمهندس الميليشياتي
بالترتيب: سرور، الشريف، عزمي. 
ودلاديلهم بقى من فلول امن الدولة اللي برضه عندهم حالة يأس ومش قادرين يستوعبوا انهم خلاص ما بقوش "اسيادنا"
مبدئيا
الحمد لله.. حملة التوقيعات بقت ممتازة، وخالد عبد الحميد قال لي النهاردة: ميت الف ايه؟ ان شاء الله اضعاف العدد ده
لأن موقعين الشارع - كالعادة - اجدع من بتوع النت 
:)
والحملة ان شاء الله حتنجح وتلاتة دول حييجوا وحيجيبوا معاهم عوكل واطاطا وكركر وكتكوت ضعيف الجناح والدنيا غدرت بيه
نحب نفكركم تاني ان دي التوقيعات الالكترونية
ده رقم مالك عدلي
0101044264
للي بيجمع في دمياط يتصل برقم
0111179793
اللي بيجمع توقيعات في الاسماعيلية يتصل على
0122526411
اللي بيجمع توقيعات في طنطا يتصل على
0124544946
واللي بيجمع توقيعات في اسكندرية يتصل على
0111860593
اللي عايز يوقع في سوهاج يتصل على
0146075050
وزاد عليهم
اللي بيجمع توقيعات في بورسعيد
0120522209
اللي بيجمع توقيعات في المنصورة
0101176127
اللي بيجمع توقيعات في المنوفية
0171009042
لارسال مجموعات التوقيعات داخل او خارج مصر عبر البريد الالكتروني
fegypt20@yahoo.com
الميل ده للي بيجمع توقيعات كتير وياخدها سكان ويبعتها بالميل، ما تبعتليش توقيعك لوحدك، لو توقيعك لوحدك يبقى حطه على التوقيع الالكتروني
وللارسال بالبريد او التسليم يدا بيد
1 ش سوق التوفيقية
ولو حابب تجمع توقيعات في اي محافظة اتصل بمالك عدلي نسق معاه في محافظتك واطبع النموذج ده واجمع عليه توقيعات
بس بتوع الترنت دولم طلعوا فشنك قوي، كل واحد يقولك اصل اخاف احط رقم بطاقتي.. الناس في الشارع اول ما تسمع صفوت الشريف وفتحي سرور وزكريا عزمي وامن الدولة بيحطوا رقمهم القومي وبيبقى ناقص يتصوروا جنب البيان عشان يبقى مع سبق الاصرار والترصد
اهمية الرقم القومي او الباسبور ان ده بلاغ للنائب العام، فلازم توكل المحامي في البلاغ ده، وبما انك مش عامل له توكيل عام ولا توكيل قضايا يبقى لازم تحط اسمك الثلاثي ورقم اثبات شخصيتك
وانا متفائلة خير ان شاء الله، وحييجوا يعني حييجوا، بأمر الله
لما نخلص منهم ان شاء الله، يبقى خلصنا من مشكاح وريما وجوز المهاطيل خلفة الندامة
بس لازم الاعلان الدستوري قبل يوم الثلاثاء، ولازم الاعلان ده ينص على سقوط دستور 71 والغاء العمل به الى غير رجعة.. 
وانا عايزة اقول لاتنين في هاذوها الحياة ان لو حكم زي ده صدر لصالح مبارك هم اول ناس مش تمام عشانهم
الاخوان المسلمين - وبصراحة اي وعود باي مقاعد في البرلمان مش حتنفعكوا بحاجة لو مبارك اخد حكم زي ده حتى لو ما رجعش وجاب ابنه او حد من دلاديله انتوا حتتدبحوا في الشوارع بلا رحمة ولا شفقة
ومش محتاجة اقول الكلام ده للمؤسسة العسكرية لأنهم ادرى الناس قد ايه مبارك ومراته وولاده بيكرههوهم وامل حياتهم انهم ينتقموا منهم وخصوصا من المشير
لافونا الاعلان الدستوري بقى وبلاش مخاطرات وغلاوة النبي عشان احنا مش ناقصين تعب اعصاب، انا شعري طقطق وخلاص بقيت شبه زوزو ماضي فعلا 
لو سمحتوا شيروا على قد ما تقدروا... 
ملحوظة:
المظاهرة عند ماسبيرو كانت قرف وطين على دماغهم، في الاول كانت مش بطالة وبعدين جم ناس كده ما اعرف مدسوسين ولا اغبيا، واغبيا ده مش عذر لأن عدو عاقل خير من صديق جاهل، وقعدوا يسفهوا ويقلوا ادبهم فانا مشيت بقى لما لقيتها عكت كده
ومش حانزل تاني لو استمر جو الهطل ده.. ده ايه القرف ده يا ربي؟
التوقيعات احسن واضمن، على الاقل عارفين ان مافيش مختلين عقليا حيقولوا هتافات حقيرة ومنحطة ولا تقل سفالة وسفاهة وقرف وانحطاط ووساخة وحقارة وطين على دماغهم عن الهتافات اللي كانت بتتقال ايام ماتش الجزائر، وناس بتئذي بلدها وثورتها، يا اما بعلم يا اما بغير علم، وغير العلم مش عذر، لأن فيه حاجة اسمها كومن سنس
قرفتونا شكوك وطين على دماغكم بقى، لو انتوا مدسوسين وبتوع كنتاكي وخمسين يورو يبقى الجيش والمشير متعاونين مع مبارك، زي ما بعض المخاليل بيشكوا في الجيش، الجيش كمان فيه منهم بيشكوا فيكم انكم مندسين وبتوع خمسين يوروا خصوصا لما بتبقوا باعداد قليلة، وانا اقعد اقول لدول: والله ما يقصدوا، واقول لدكهومة: والله ابدا.. وانا بقى مش حاقضي عمري اصلح بين المسلمين والمسيحيين وبعدين بين بتوع نعم ولا وبعدين بين الشعب والجيش... انا مش مأذون شرعي يعني
بس القرف ده ما استحملوش انا خالص
لا المعتصمين بتوع خمسين يورو، ولما بتحصل غلطات بيبقى الغلط بسبب خوفهم وحرصهم على الثورة، مش عشان هم فوضوية وعايزين خراب للبلد.. لأنهم اول ناس حيتئذوا من خراب البلد، ولو عايزين خرابها ما كانوش عرضوا نفسهم للخطر والبهدلة والاصابات والقتل والتعذيب
ولا الجيش والمشير بتوع مبارك، ولما بتحصل غلطات بيبقى بسبب برضه خوفهم وحرصهم على الامن، مش عشان هم بيحبوا مبارك وعايزين ياخدوا الشعب على خوانة، ولو بتوع مبارك كانوا نفذوا الامر وضربوا الشعب وخلصوا الليلة بلا وجع دماغ وهم اول ناس برضه حيئتذوا لو نظام مبارك رجع سواء بابنه او بوكيل لابنه لأن النظام ده عايز ينتقم منهم
فاهدوا بقى انتوا الاتنين
حبوا بعض.. حبوا بعض
حبوا بعض بقى كلكم، مسلمين ومسيحيين، نعميين ولائيين، مدنيين وعسكريين... حبوا بعضضضضضضضضضضضضضض انا اتخنقت
هو الشك في غير محله ده جين مصري ولا ايه؟ 

60 comments:

Mohamed Abouzeid said...

ربنا معكم يا نوارة بجد لكن أنا سمعت واحد من المجلس العسكري في مداخله مع بلال فضل على أو تي في بيقولوا ماهو الوصف القانوني للفساد السياسي أنا اترعبت لما سمعت السؤال عشان حسيت إن ده حكم مسبق على الالتماس اللي بنوقع عليه حاليا ... أنا لازلت حاسس إن مشكاح وريما والمهاطيل ماسكين كمبيالات على الجيش

EgyptToThePoint said...

هي الصفحة الرسمية للمجلس الأعلى للقوات المسلحة بعد "نعم" الإستفتاء توقفت عن التحديث ليه؟

لعل المانع خير؟

مبروك علينا "نعم"

صوت الحق said...

يعني ايه الشرطة العسكريةتضرب لمتظاهرين في كلية الإعلام-ولحد دلوقتي المناوي في ماسبيرومااتتشالش هووقيادات الإعلام-يعني ايه مرضى الثوار لحددلوقتي مش لاقيين يتعالجوا -يعني ايه عزمي وسرور والشريف لسه مااتحاكموش وان فيه لحددلوقتي استخدام رسمي لمناديب مجلس الشعب وخطابات رسمية-لأجل كل هذا وأكثر دعوة مليونية في التحرير الجمعة القادمة لمحاكمة ...عزمي وصفوت وسرور -المؤيد ينشر
http://egyptwindow.net/news_Details.aspx?News_ID=11707

Anonymous said...

معلشي يانوارة انا بحس انك ذي الهبلة وجابولها طبلة مش واضح انك متعلمة بتخوفينا من حاجات هي وهم ولن تحدث ابدا انا بصراحة النهاردة قريت كاتب روسي بيقول ان كل ماحدث لاثورة ولايحزنون واقنعني ان امريكا مخططة كل شيئ وبالتعاون مع الاخوان في مصر وبدليل ان لما نتيجةانتخابات مجلس الشعب الا فاتت وخسر فيها الاخوان الاخوان عملوا اجتماع وتكلموا في الخروج الامن للرئيس وة كان في اوائل ديسمبر الماضي وارجعي للصحف الا في تلك الفترة انا قريت نفس الكلام دة في الاهرام المسائي وصعقت ودة يؤكد كلام الراجل الروسي يعني احنا اتلعب بينا وكنا ضمن لعبة الفوضي الخلاقة ياريت يانوارة يااختي تتاكدي من دة وسلاما يااغلي نوارة

ٍShakty said...

بصي يا نوارة انتي وطنيتك وخوفك علي البلد حاجه مفهاش شك علي الاقل للناس اللي بتحبك لكن كلنا شايفين في الاونه الاخيرة بداتي تتعاملي مع الاحداث بعاطفه مبالغ فيها تميل للمانجا للياباني اكتر منها احداث ثورات.. زي شحن الناس في اتوبيسات لشرم الشيخ واتحاد الجيش المصري والتونسي لتحرير ليبيا وحجات كتير , وميقلش علي الكلام ده دفاعك المستميت عن الجيش بسبب وبدون سبب احنا عارفين دور الجيش الهام والاساسي الخ بس انتي مش شايفه انك بترجعينا تاني للفرعون الفكرة بدل الفرعون الفرد ؟؟ بتلتمسي اعذار عبيطه للجيش وتحليلات لسكربيت فيلم شهر عسل وتتغاضي عن اتهامات حقيقه بتتوجه "للاداره العسكرية" وليس بالطبع الجيش المصري , مجرد التفكير في الفرعون الفكرة .بتاعت اداره الجيش دي مستفزه جدا

مش فاهمه said...

مش قادره تعترفى ليه انها كانت اكبر غلطه ترك ميدان التحرير و انك من ضمن اللى طلبتى ترك الميدان احنا عملنا ايه و التوقيعات د حاتعمل ايه فى الأخر حانبلها و نشرب ميتها مش عارفه انتى بتهددى انك مش حاتنزلى تانى لو لقيتى الوضع بالشكل ده طيب و بعدين يعنى طيب افرضى ان يوم الثلالاثاء جه و ماطلعش الأعلان الدستورى حاتعملى ايه
استهدى بالله و اقعدى مع ائتلاف الثورة و شاوروا بعض كده و بلاش الحب الفززززززيع للجيش ده خليه حب بحذر

Unknown said...

انا حاسة اننا بنتثبت و بجد لاول مرة هقولها و اعلن خوفى انا خايفه على تعبنا و مجهودنا و الناس اللى راحت مننا
انا حاسة انهم بيشتغلونا
انا عاوزانا نرجع تانى نتظاهر و نسمع صوتنا بس باعداد كبيرة
ناس تلم توقيعات و ناس تنزل تصرخ و تنادى باسم الله ثم كل واحد راح فى الثورة و نقول كل مطالبنا
انا خايفه من بكرة اوووووى

من أجل حقوق المصري said...

http://j.mp/dLnfw9 دي آخر التحديثات على صفحة الفيسبوك
Please share

صوت الحق said...

هو احنا قمنا بثورة واللا كنا بنهزر يعني ايه فيه ناس ضد الثورة حتى الان وامن الدولة بقى اسمه الامن الوطني والمعتقلين السياسيين لسه مسجونيين وغيره وغيره والقيادات في كل مكان في الاعلام وفي الجامعات وفي غيرها لسه موجودييين -------- ايييه نعمل اييه اكتر من ثورة عشان نشيلهم

Unknown said...

اللي عايز يقعد الشعب في الميدان لمدة شهرين يبقى مختل عقليا رسمي

صوت الحق said...

مفييش حد بيقول الشعب يقعد شهرين في الميدان

احنا بنحارب في كذا اتجاه ده اوك معرووف لكن لازم من فترة للتانية يبقى فيه شدة ودن تحمي الباقي وتساندهم في انهم يطهروا البلاد في كل مكان لكن اهم بدأوا يطمعوا فينا وبدأنا ننضرب ومحدش بينطق وبدأوا يعتقلوا فينا ---- اييه نستنى اييه تاني نستنى مبارك يرجع يطلع لنا لسانه وعلى فكرة موضوع منعه من السفر ده ضحك على الدقون احنا عاوزينه يرحل وهو اللي اصلا مش عاوز يرحل شغل استعباااط وقلة ادب ومش عاوزين نتصادم مع الجيش بس لازم نكون متماسكيين خاصة واكرر خاصة بعد الاستفتاء وبعد هيصة نعم ولا

eman said...

اانت دائما صح .... يسلم كلامك وتسلمى لنا ولمصر يا رب

eman said...

انت دائما صح ... وان شاء الله التوقيعات هتوصل مليون

Unknown said...

أنا مش عارف اصدق مين ولا مين
نظرية المؤامرة لازم تتهد شوية
بس انا معاكي في تجميع التوقيعات.....أنا في بورسعيد هخلي السمك حتى يمضي على البيان

utopia said...

نورة التوانسة رجعوا للاعتصان لتالت مرة
لتصحيح مسار الثورة

هو حضرتك فيه موقف التوقيعات غيرت فيه حاجة فى مصر

صدقينى هانبلها ونشرب ميتها
وبكرة تشوفى

والاعلان الدستورى شكله مش ناوى ييجى

kaed said...

نوارة .. واللة زمان .. أنا مدخلتش مدونتك من يجى قرن كدة ..لو مش فاكرانى أنا قائد.. قائد وزعيم ومالة هوا صغير ..هههههههههههههه .. المهم هوا إية اللى حيخلينا تقعد فى الميدان شهرين .. الضغط على الجيش لة وسائل كتيرة غير الميدان

Unknown said...

أين قناه التحرير؟
العزيزة نوارةاتساءل اين قناة التحرير ولماذا تأخر الافتتاح؟

كنت باننتظار الافتتاح لنبدا معا متابعة اعلامية اقوى مما يتاح فى الصحف و الانترنت لتصل الى البسطاء من الناس

ولكن المفاجأة ثبات شريط تقديمي بصوت ضعيف!!!!!!!!!!!!

هل هذا ضمن خطط الإجهاد اياها؟
ارسلت الرسالة دي للاستاذ بلال فضل قناة التحرير اهم نافذة دلوقتي و ممكن بالمصداقية تحقق اعلى نسبة مشاهدة و تخليكم توصلوا للناس الغلابة
أين قناه التحرير؟
أين قناه التحرير؟

Unknown said...

نواره اوعي تسمعس لكل الحلويين الاماميير اللي داخلين ينتقدوا و بيقولولك ليه بتدافي عن الجيش ، و بصوا يا شوية عسليات اللي مش عاجبه الجيش و ششايف انه متواطئ او بطئ او اي حاجه تانيه ارجووه 1000 مره يجيبلي بديل عاقل تاني دلوقتي او يتخيل نفسه رئيس و يقولي ايه القرارات اللي عايز يعملها بس يحط في اعتباره مطالب كل الناس في مصر و اولوياتها

افهموا ان الشئ لما بيزيد عن حدوا بينقلب لضده

أرنوب said...

توقيعات أيه اللي إنتي بتجمعيها دي ؟ هي المحاكمات تتم بالتوقيعات ؟ ماكنش حد غلب .. إفرضي مثلاً إني عايز أسجن نوارة نجم .. هل يكفي لذلك أن أجمع ألف توقيع يطالب بهذا ؟ .. محاكمة شخص أو مجموعة من الأشخاص تتم يا سيدتي بأن تتوافر ضدهم إتهامات مدعمة بالوثائق والمستندات حتى لو قدمها فرد واحد .. الحكاية مش حكاية عدد .. الحكاية حكاية أدلة وبراهين .. التوقيعات مهمة لو كانت تطالب بسرعة محاكمة من توفر ضدهم أدلة ومستندات تبرهن على فسادهم أما في حالة عدم توفر هذه المستندات فلا قيمة هناك لأي عدد من التوقيعات حتى لو كانوا عشره مليون توقيع

Sherif said...

لا يا نوارة, اللى عايز الناس تقعد شهرين فى الشارع ليس مختلا, لأن دة لو حصل هيحل مشاكل كتير, لكن المشكلة إنه مش هيحصل. الحقائق اللى لازم التعامل معاها حاليا هى: 1- الشعب (بتعريف الشعب على أنه الكتل المليونية اللى نزلت قبل التنحى وفى ليلته ولغاية إقالة شفيق) عايز دلوقتى يستريح ويرسى على بر, وتحريكه يزداد صعوبة باستمرار, و2- الجيش ليس قوة ثورية ولن يكون. الجيش أعلن انحيازه للشعب وليس للثورة (لم ترد كلمة الثورة فى أى بيان, وراجعيها). يبقى إيه العمل؟ كيف نحقق المطالب الثورية بـ"التفاهم" مع الجيش والقوى المؤثرة الآخذة فى التشكل أمام أعيننا؟ وكيف نحول قوى الثورة نفسها إلى واحدة من تلك القوى؟ هو دة السؤال الوحيد اللى يستاهل تعب التفكير, التفكير العقلانى, المتأنى, الناتج عن أخد ورد مع, وإنصات مستمر لـ"الشعب".

ٍShakty said...

هو احنا عملنا ثورة علشان برده نجمع توقيعات ؟؟؟

فعلا فعلا محتاجين تصحيح لمسار الثورة بشده

Tears said...

ياريت نوزع ده على الناس فى الشوارع خاصة فى المناطق الفقيرة او العشوائية و القرى و اللى مش بيعررف يقرأ نقف احنا و نقراه له

http://twitpic.com/4d9snc

abeer hany said...

نواره نجم انا معجبة بيكي من ايام الثوره شوفت فيكي شجاعة بميييت راجل والليي خاللاني اكتب لك ان نفس الكلام اللي بتكتبيه هوه اللي انا بفكر فيه انا مقدره الجيش ووطنيته اللي انا مش بشك في اخلاصه بس التراخي اللي في لتخاذ القرارات هوه اللي بيخلليني خايفة على الثوره والاهم من كده شباب الثورة لازم يرجعوا ايد واحده لان عليهم دور جديد وكبير الايام الجايه ومش معناه اننا اختلافنا بنعم او بلا في الاستفتاء اننا نبطل نتحد المشكلة الاكبر تداول اخبار ظهور جمال مبارك مع زكريا عزمي خلصنا الله منه ومع العبقريه الشريره الاقتصادية عاطف عبيد اول يوم تتفتح البورصه بالذات انه له فلوس كتير جوه البورصه والبورصه بدات تشتغل اللي خايفة منه ان يكون هناك مخطط جديد اقتصادي لتدمير البلد وتحول انصار الثوره لمعارضين لها او ظهور ثوره جديده تاكل الاخضر واليابس يبقى مفيش حل الا ان المجلس العسكري يامر بالقبض على الثلاثي المرح ومن قبلهم ولاد الدلدول المخلوع وياريت يبقى فيه تواصل ايجابي abeerzahra@hotmail.co.uk

Sameh Elsawy said...

شوفي يانواره
التفكك والتخبط بين الشباب اللي بدء الثوره هو اللي حايضيع الثوره
احنا وثقنا وصدقنا فيكم وقدمنا الشهداء وكنا جنبكم ووراكم وخلفكم, واملنا في الله وفيكم كبيييير قوي, فارجوكم لاتخذلونا, ولا تخذلو مصر
اتتتتتحححححححدددددددووووووووووووووووو.

ثلاثينية العمر said...

للى خايفين
فاكرين فيلم الارهاب والكباب؟
كل ما عدد الموقعين على طلب المحاكمة هيزيد
هيحتاروا يقبضوا على مين ولا مين
هيحاكموا شعب يعنى؟
ده بفرض ان ربنا غضبان علينا لدرجة انهم رجعوا يعنى
لكن احنا معانا ربنا والله
وخير ان شاء الله
اللى مكتوب لك هيحصلك يا مصرى
وقع وما تخافش

Unknown said...

حبو بعض دى مش هتنفع منك لواحدك لازم يكون الناس هم اللى عاوزين يكبرو ويسامحو ويحبو بعض.

مهندس مصري بيحب مصر said...

و الله علشان الشك يكون في غير محله يبقى لازم يردوا على الكلام ده
http://egyptioneng.blogspot.com/2011/03/blog-post_24.html
لازم كل اللي عذب حد من المتظاهرين اياً كانت رتبته في الجيش يتحقق معاه و يتعاقب و ما نبقاش رخاص عند الجيش و يستهون يضرب و يعذب و يكشف على العذرية

بساطه said...

الشك مش بدون سبب .. يعني بعد نعم يابتوع نعم .. مش كان المفروض اعلان دستوري فسعتها ولا ايه ؟؟؟ طب العطله جيه منين ؟؟ يعني دي مش حاجه غريبه اوي؟؟

زينبو said...

يسلم فمك يا نوارتنا،و ريحت بالي على عدد التوقيعات احسن الواحد عمال يدلل عليها. اما بالنسبة للجيش فانا رأيي ان الجيش مش عايز ياخد قرارات بالنسبة للشلة البايظة دي الا لما يكون مالي ايده قانونيا انهم مش حيعرفوا يستأنفوا او يطعنوا ونبص نلاقيهم بعد شوية طالعين وبيطلعولنا لسانهم، او هكذا اتمنى

زينبو said...

يسلم فمك يا نوارتنا،و ريحت بالي على عدد التوقيعات احسن الواحد عمال يدلل عليها. اما بالنسبة للجيش فانا رأيي ان الجيش مش عايز ياخد قرارات بالنسبة للشلة البايظة دي الا لما يكون مالي ايده قانونيا انهم مش حيعرفوا يستأنفوا او يطعنوا ونبص نلاقيهم بعد شوية طالعين وبيطلعولنا لسانهم، او هكذا اتمنى

Anonymous said...
This comment has been removed by the author.
Unknown said...

هو ايه دخل لا واه

انا زهقت من الغباوة

ما قلنا ستين مرة ان لا زي اه واه زي لا والنتيجتين واحد واتعملت عشان تعمل فورتينة بينا

الخرا ده مش حيخلص صح؟

مش حيخلص ابدا

انا عارفة

وما بقتش عارفة بقى مين غبي ومين مزقوق

بس في النهاية يعني انتوا بتعملوا ده كله عشان الجيش يقعد ويفشخنا ويكسب تعاطف في نفس الوقت صح؟

ها؟

اعترفوا يا اشقيا

صح؟

ماهو انا مش عارفة اصدق ان كل العدد ده مجرد عيال هابلة

gedawy2014 said...

ربنا يستر من اللى جاى

gedawy2014 said...

ربنا يستر

gedawy2014 said...

ربنا يستر

Unknown said...

دي عبال خايفه و لازم نستحملهم ونكلمهم

محمود شلبي said...

نفسي أفهم.... لما انتي عايزه تسقطي دستور ٧١ أمال قلتي نعم علي أي أساس؟؟؟؟؟؟؟؟

أرنوب said...

ده يخض فعلا، لأن مالك عدلي قال لي ممكن يصدر حكم لصالحهم في غفلة منا
مع كل إحترامي للأخ مالك (اللي أنا ماعرفوش) فهذا الكلام فارغ ومضحك .. ليه ؟ .. لأنه لو فرضنا جدلاً وصدر لصالحهم مثل هذا الحكم يمكننا ساعتها الدفع بعدم صحته .. لسبب بسيط .. هو أن خلو منصب الرئيس في حالتنا هذه لم يكن خلواً طبيعياً بحيث يستوجب الأمر تطبيق نصوص الدستور بشأنه بل كان خلواً نتيجة لثورة شعبية طالبت الرئيس بالتنحي وبالتالي أسقطت - أوتوماتيكياً - شرعيته هو ونظامه ودستوره فلا يجوز الإحتكام إليه مثلما تم في حالة مقتل السادات مثلاً إذ أن خلو المنصب وقتها لم يكن نتيجه ثورة أسقطت النظام .. إطمنتي ولا لسه ؟

Unknown said...

على اساس الغباء والتخلف العقلي اللي صابكم

دستور 71 لازم يسقط والا قعاد الجيش يبقى غير دستوري، والتعديلات الدستورية بتلزم بدستور جديد فلما ييجي الرئيس والبرلمان الجداد مش حيقعدروا يشتغلوا بدستور 71 لكن لما اقول لا حيطلعوا اعلان دستوري برضه.. بس مش اكيد حيتم اسقاط 71 لان ممكن يطلعوا اعلان دستوري مافيهوش مادة ملزمة للرئيس والبرلمان الجداد بدستور جديد

انتوا بتعملوا ايه بالظبط؟ بتعملوا ايه؟

انا اقولكم انتوا بتعملوا ايه

انتوا لو بتشتغلوا للجيش ما كنتوش اتقنتوا الشغلانة كده
1- اعتصامات هزيلة ووسخة بلا اهداف واضحة تزهق الناس فلما الجيش يفشخ الاعتصامات دي الناس كلها تتعاطف
2- قلة ادب وتخوين وطولة لسان بهيستيريا على الجيش بحيث الناس اتبسطرت من سخن على بارد وطبعا بما انهم بني ادمين فمش حيتبسطروا لكن حيقولوا عليكم اعداء ومندسين واللي اتعذب ده بلطجي ويستاهل التعذيب، ولا انتوا ما بتمشوش في الشوارع وتسمعوا بودانكم الناس بتبرر التعذيب
3- قعدتوا عملتوا هلولة على نعم ولا وانتوا عارفين بقى ولا مش عارفين ان النتيجة واحدة وبرضه بتهستروا ولسه بتستعبطوا وتيأسوا الناس عشان الناس تتشتت واي حد يكلمكم في اي حاجة مفيدة تقلبوا على اغنية نعم ولا كأنكم متسلطين ما تغيروش الموضوع عشان تفضل الناس تتخانق مع بعض يقوم يبقى شكل النشطاء خرا قدام الشارع

ايه الحكاية بقى اشرحوا لي كده؟ الجيش حيقعد صح؟ الجيش حيقعد وانتوا بتساعدوه؟
مش ممكن كل الناس دي اغبيا
ومش ممكن بعض الناس اللي بيسخنوا على الجيش اكتشف انهم بيتفاوضوا معاه في السر وبس نازلين شتيمة في بتوع الائتلاف
ومش ممكن ماحدش ملاحظ ان كل مرشحين الرئاسة اوهموا الناس ان لو صوتوا بنعم حتحصل كارثة وكل المرشحين للبرلمان اوهموا الناس انهم لو صوتوا بلا حتحصل كارثة، ومش ممكن الاتنين مش عارفين انه مش حتحصل كارثة ولا حاجة
صعب عليا قوي قوي قوي اصدق ان كل دول ابرياء
وصعب جدا اصدق ان اعتصام ماسبيرو باظ بحسن نية
كده حسن نية اوفر الحقيقة

mUsLiM said...

أولاً: مسألة أن تحدد المحكمة تاريخاً لنظر دعوى فهذا لا يعني أنها ستصدر الحكم فى هذه الجلسة فيجب أن ننتبه لهذا جيدا، ولكنها فقط حددت أول جلسة لنظر القضية ...

ثانياً: لا خوف أبداً من هذه الدعوى القضائية لسببين رئيسيين :-

أولاً: أن دستور 73 معطل بالفعل .. وأحكامه معطلة بموجب إعلان دستوري صادر من السلطة القائمة على أرض الواقع وهى القوات المسلحة وبالتالي لا تملك المحكمة تطبيق أحكام دستور معطل بموجب إعلان دستوري

ثانياً: القضاء الإدراي إعترف وأقر بالشرعية الدستورية المنبثقة عن إرادة الأمة وظهر ذلك جيداً فى حكم القضاء الإداري الصادر برفض دعوى وقف الإستفتاء الأخير التى رفعها البعض حيث أقر مجلس الدولة الشرعية الثورية التى تعلو على مشروعية الإجراءات ... فيجب أن نفرق بين الشرعية والمشروعية

وبالتالي لا داعي لكل هذا الخوف من هذه الدعوى ...

بل على العكس .. نتوقع عن قريب بإذن الله أن يصدر من القضاء الإدراي حكماً قضائياً بحل الحزب الوطني ومصادرة مقاره خاصة بعد أودعت هيئة مفوضي الدولة تقريرها فى دعوى حل الحزب الوطني وقد أوصت بحل الحزب وتصفية مقارة

فأبشروا إن شاء الله

إلا أن كلامي هذا لا يعني التثبيط ... فيجب على الجيش الإسراع فى إصدار الإعلان الدستوري المتوقع لإرساء الإستقرار ومنعا للبلبلة فى الفهم والتوقعات

والله المستعان

Unknown said...

muslim

ربنا يسعد قلبك وينور لك طريقك.. روح يا شيخ.. جمع توقيعات ضروري :)

مهندس مصري بيحب مصر said...

طيب ممكن تآخديني على قد عقلي و تفهميني إيه اللي يمنع شباب إئتلاف الثورة و كلنا خالد سعيد و كل الجهات التنظيمية للثورة من إنهم يدعو لمليونية يوم الجمعة الجاي في التحرير و جميع ميادين الثورة في كل محافظات مصر لإلغاء قانون منع التظاهر و الإعتصام ده و المطالبة بالقبض على الثلاثي المرح ؟

محمد نور الدين said...

ست الكل يسعد صباحك


-Keyboard. هبلة ومسكوها
الفرق بينك وبين الهبلة القديمة اللي مسكوها طبلة أنك هبلة عصرية ماسكة كي بورد وتتحكمين في تكنولوجيا الاتصال وتحسنين اللغة الإنجليزية . أما الشيء اللي خلانا نتحملك ونتحمل هبلك، أنك مرحة ودمك خفيف وعيونك سود وجميلة .
من الآخر يا النوارة أنت تريدين إنجاح قائمة التوقيعات هذا حقك لكن شوفيلك فزاعة أخرى غير الست و أولادها . هؤلاء أصبحوا ماضي وبغير رجعة . يعني نظام مبارك انتهى بغير رجعة . وهذه التعليمات وغيرها مثل عدم التعرض للمظاهرات جاء بها سامي عنان لما عاد من هناك. وبلاش ندخل في التفاصيل لأنها مؤلمة لنا جميعا . ولكن وبشكل عام إن إزالة الأنظمة العربية القائمة التي هي الآن تتساقط مثل أوراق الخريف قرار اتخذ هناك . لكن وكما قلت لك في تعليق سابق أمريكا لها إستراتيجيتها و الشعوب العربية لها حساباتها وهذا موضوع يطول شرحها
نعود إلى مصر التي كان نظامها يعرف بكونه نظاما أمنيا على غرار جميع الأنظمة العربية. ومعنى النظام الأمني إنه يستند في حكمه على الأجهزة البوليسية وليس العسكرية. ولهذا منذ بداية الثورة و أنا أقول لك أن نجاح الثورة مرهون بإسقاط وتصفية أمن الدولة ،الركيزة الأساسية للحكم في جميع الأقطار العربية . وهذا الجهاز يعاني الآن أزمة وعاجز وغير قادر ولن يسمح له الجيش بأي نشاط لأن الجيش عانى من الإبعاد و العزلة بسببه
لكن ما يجب ان تعلميه وتستوعبيه وتحطيه حلقة في أذنك، أن الجيش الذي لن يسمح بعودة مبارك وأبناء مبارك وأعوان مبارك ، لن يسمح أيضا للثورة أن تبلغ مداها .وهذا ليس أنهم أعداء الثورة ،إنما المؤسسة العسكرية بوصفها كذلك لها حدودها لا تستطيع أن تتجاوزها .هذا يا النوارة يعني فيما يعني أن مواصلة الثورة ليس عن طريق المؤسسة العسكرية التي تطالبينها بمطالب لا تستطيع تلبيتها ،إنما عن طريق عمل آخر وطني ، عن طريق تحالف قوى وطنية صاحبة المصلحة الحقيقية في مواصلة الثورة وهي متوفرة وبقوة في مصر لكنها تحتاج، أولا إلى مرجعية فكرية وبرنامج محدد تتفق عليه جميع الأطراف يكون هدفه إيصال الثورة إلى بر الآمان ،وثانيا إلى إطار تنظيمي يجمع هذه القوى الوطنية يكون الرافعة للثورة وبرنامجها الوطني الديمقراطي
ورغم هبلك وشططك ستظلين أجمل وأروع نوارة

Sgheita said...

howwa dah wazeer el ta3leem el 3ali elli fel wezarah el gedida el enty 2a3adty ma3ah http://www.shorouknews.com/ContentData.aspx?id=416898

بساطه said...

مالك زعلتي كده ليه يانواره .. انا بجد لما قلت نعم يابتوع نعم والله كنت بهزر .. انا ابويه قال نعم على فكره وراجل مثقف ومحارب .. ومسامحه يعني مخسرناش بعض .. ومش مزقوق ولا غبي ياستي .. ولا يمكن غبي ولا يهمك .. مانا مقلتش اني علامه .. امال انا بدخل عندك ليه مش عشان افهم واعرف الدنيا فيها ايه

Ahmed Mohamed said...

http://www.youtube.com/watch?v=-rzFJnNv_Mo

Unknown said...

كلامك يا ابو هاجر جكيل و في منطق عالي اوي بس هل انت شايف ان افضل طريقه لتحقيقه غو انك تشتم في واحده انت ضيف عندها لمجرد انها ممكن تكون مختلفه معاك قي الرأي

Ahmed Mohamed said...

حسين طلع
بطنه وجاه من وجبة الكنتاكي
هههههه

haroon said...

معلهش سؤال واحد بس والله لا اقصد منه التشكيك فيمن يقومون علي امور البلد حاليا ( المجلس الاعلي وحكومة شرف ) ...ايه السبب في استمرار زكريا عزمي في التردد علي مقر رئاسة الجمهورية بصفته رئيس ديوان رئيس الجمهورية برغم كل الشبهات التي تحوم حوله ..وايه السبب في عدم تطهير الاعلام حتي وقتنا هذا واستمرار التليفزيون المصري في بث سمومه عن طريق قيادات ثعبانية ومذيعين مشبوهين ومذيعات فاسدات ...هل السبب في الدفاع عن الجيش اننا معدش لينا غيره دلوقت ؟؟ عشان كدة ممكن نتغاضي عن بعض تجاوزاته واخرها تفريق اعتصام كلية الاعلام بالقوة برغم مطابة المعتصمين بعزل عميد الكلية والذي هو عميل لامن الدولة وبمزاجه كما ذكر بلال فضل في مقاله ف المصري اليوم ؟؟؟ هل من اجابة ؟؟؟؟

Anonymous said...

نوارة :مقالك رائع لانه من قلبك
لكن فيه حاجة كلنا مش فاهمينها (كيف يكون المواطن المصرى رأيه) لانه لايخضع لللنظريات العلمية اللى بتتناول المؤثرات المعروفة لا الخوف ولا الطمع ولا الحب وبالتالى باحس ان الخطاب للمصريين لازم يكون مختلف------------انا شرحت راىى فى التعديلات الدستورية لناس انصاف متعلمين 10 مرات واتفرجوا على شيخ معتدل بيؤيد راىى قالوا كده تمام هانقول لا وبعدين شافوا د.العوا لقتهم غيروا رايهم مع انهم مايعرفهوش وقالوا اصله شكله سمح وراجل كبارة
راجعى دليل علاء الاسوانى لماذا لايثور المصريون؟
وانا شايف انه قبول الناس لشخص الثوار او المحرضين على الثورة هو العامل الاساسى للتعاون
اى والله القبول وسماحة الوش

صوت الحق said...

يعني الواحد يقول اييه بالظبط ؟؟؟ هو يااما اعتصامات يااما توقيعات
اولا انا شخصيا مش ضد التوقيعات بس مش لوحدها ثانيا حاليا لو عاوزين تقطعوا الطريق على موضوع الإعتصامات والوقفات ونقطع السكة على الجيش انه يضربنا ويقعد والناس طبعا تصفق له يبقى نوحد نفسنا ونوحد إضراباتنا ووقفاتنا ازاااي ؟؟؟

نخليها بس يوم الجمعة كل أسبوعين حتى مش لازم كل اسبوع بس لازم نبين للكل إننا لسه موجودين --- ده كده هيكون عامل زي مؤتمر للثوار زي نشر وعي للناس زي احتفالية عامة ماينفعش نكون ماشيين بسرعة 100 كيلو ومرة واحدة نفرمل كده ---- وفي نفس الوقت هنعلن ان اي اعتصامات او مظاهرات في غير التحرير في غير يوم الجمعة احنا كثوار واحنا اللي قمنا بالثورة مش مسؤولين عنها وبنطالب بإلغاءها فورا في الحالة دي يبقى كسبنا 100 عصفور بحجر واحد --- نفكر بس في الموضوع بهدوووء كده --- لأن لما نقعد نجري وراهم في القوانين ومتاهاتها هيتوهوونا ومش هناخد معاهم لا حق ولا باطل واصل المحكمة مااعرفش اييه واصل حصل اييه وهكذا وفي نفس الوقت احنا مش هنتصادم مع الجيييش خاالص ---- ومع كده على فكرة عندي اعتقاد ان قيادات الجيش ده هيتفوروا بس مش مننا ان شاء الله هتكون من عند ربنا بس كده انا خلصت

mokhles174@gmail.com

صوت الحق said...

http://www.facebook.com/video/video.php?v=1940616875596&comments

من أهم آليات حماية الثورة-أن تحميها من انقلاب المحتاج وغير الواعي

nwara said...

كلنا معاكي وبنحاول على قد مانقدر

MarcH said...

و الله أنا شايف إن البرادعي يتقدم للمحكمة فى نفس القضية طيقا للتوكيلات اللى عملناها و يطلب إقالة و تنحية مبارك طبثا لما ورد فى هذه الدعوى حيث إن مبارك قد خالف اليمين الذي اداه امام مجلس الشعب بأنه اقسم بالله العظيم ان يحافظ مخلصا علي النظام الجمهوري وان يحترم الدستور والقانون‏.‏ ولهذا كله فإن مبارك خان هذا القسم و لم يحافظ علي الدستور‏. ثم يطلب إقالته كنتيجة لخيانة الأمانة على أن يتولى رئاسة الدولة مجلس رئاسى يتكون من ....... و تشكيل جمعية تأسيسية لعمل دستور كنتيجة لسقوط دستور 71 كنتيجة لثورة 25 يناير ‏

Unknown said...

احنا بدأنا نتجمع على الفيك بوص ..قصدي البيك فوس آسف
يووه..قصدي الفايس بوك .. زي ما بينطقوه على التي في

http://www.facebook.com/event.php?eid=199483743407705

وبعضهم نشر الخبر على المنتديات كمان

http://www.egyptiantalks.org/invb/index.php?showtopic=118771

شوفوا لو عايزين تعدلوا اتصلوا بمنظم المسيرة واهي فرصة نشم ريحة الحرية تاني بلا خنقة

Unknown said...

انا قصدي بالنوسبة لمليونية الجمعة...ليه ما نجمعش الناس الموقعة هنا هناك؟

عايزين نفتكر الحاجات اللي بتوحدنا بقى وكفاية فرقة وهزيمة
كفاية كفاية

http://www.facebook.com/event.php?eid=199483743407705

ansaretawra said...

لما حبيتوا تمشوا المخلوع رحت على ميدان التحرير لما مشيتوا شفيق وأمن الدولة برضه من الميدان إظاهر إن الجيش مابتوصلوش الرسائل إلا من ميدان التحرير فأا نأظن تخليكم عن الخروج أيام الجمعة هو اللي خلق البطئ الممل ده للمجلس الأعلى للقوات المسلحة وهو اللي خلى الجو لفلول النظام ترجع تخطط وتكتك من تاني وياريت بجد تحاولوا تنزلوا تاني لو لاقدر الله محصلش حاجة يوم الثلاثاء والله ولي التوفيق

محمد نور الدين said...

إلى المحترم
bodeaccount
أولا اشكر حرصك واهتمامك وفعلا نوارة تحتاج ذلك التي هي نوارتنا جميعا، وهي غالية ،وغالية جدا. اما كلامي كان مجرد مزح واستفزاز فكري .وهي تعرف مدى تقديري واحترامي لها .وهي تعرف ايضا انني اعدها قيمة فكرية ونضالية كبيرة. كما أحمل لها الكثير و الكثير من المشاعر الصادقة و الطيبة
وهذه ليست المرة الأولى التي استفزها ،بل منذ ان تعرفت عليها في جريدة الدستور ولااعتقد انها تغضب أبدا من كلامي .و العرب قديما قالت إذا بلغت المحبة سقط الأدب أي التكليف. مرة أخرى لك تحياتي الصداقة

negmat lail said...

يعني انت شغالة بتوفقي راسين في الحلال جعة و شاطرة...بس رحتي المظاهرة ليه مش انتي اللي قولتي ان الجيش ما بيسمعش غير مظاهرة عدد كام نفر .. طيب دي من الأول مش نافعة ..وبعدين حكاية التوقيعات دي حلوة ممكن ننفذها في كل حاجة .. نغير اسلوب المظاهرات .... اما عن قولك "الميل ده للي بيجمع توقيعات كتير وياخدها سكان ويبعتها بالميل، ما تبعتليش توقيعك لوحدك، لو توقيعك لوحدك يبقى حطه على التوقيع الالكتروني
" اللي فامماه ان اللي بيجمع توقيعات ممكن يدخلها كلها بنفسه على جهازه وخلاص من غير سكان ولا غيره والا ايه؟؟

Unknown said...

ربنا يكرم بلدنا ويهدي حالها