Friday 4 March 2011

لجنة حماية الثورة

انا لسه راجعة من التحرير، اللي ما راحش التحرير في يوم الجمعة يبقى ما عداش على مصر
المهم
دلوقت انا طبعا الخوف واكلني جدا من موضوع الانتخابات الرئاسية قبل البرلمانية دي، وفيه ناس خايفة من البرلمانية قبل الرئاسية، عشان بيقولوا ان مش حيبقى فيه تكافؤ فرص
والمجلس العسكري مش عايز مجلس رئاسي
طيب، ما احنا ممكن نعمل لجنة اسمها لجنة حماية الثورة، واللجنة دي هي اللي تشرف على الاداء، سواء كان الرئاسي الاول، او البرلماني الاول، ولجنة حماية الثورة دي لازم يبقى فيه قضاة مستقلين عشان تضمن الحماية، واللجنة دي تبقى هي السلطة اللي فوق الرئيس المنتخب او البرلمان المنتخب لحين وضع الدستور وبعد كده كل واحد يروح لحاله
اللجنة دي يبقى فيها تلات قضاة مستقلين، وليكن زكريا عبد العزيز، ومحمود الخضيري، ونهى الزيني
واعضاء ائتلاف شباب ثورة الغضب - كلهم، ليه كلهم؟ عشان هم تشكيلة من مختلف التيارات السياسية من اقصى اليمين لاقصى اليسار، او اذا ما كانش كلهم هم فيما بينهم ينتخبوا واحد من كل تيار، بس انا شخصيا افضل التسعتاشر واحد يبقوا موجودين
وتلاتة حقوقيين، وليكن فيها عايدة سيف الدولة، واحمد سيف الاسلام، وحسام عيسى
قبل ما حد يقترح كتاب ومثقفين وادباء.. الخ، وانا باقول لكم بلاش المثقفين، ليه؟ عشان يستحسن ان المثقف يبقى مستقل ومراقب فردي من الخارج على اداء لجنة حماية الدستور، وبلاش يدخل في لجنة عشان المثقفين والكتاب والادباء، هو مش بيشتغل غير لما بيقفل الاودة على نفسه، كده احسن عشان ما يبقاش مقيد، اداءهم الفردي بيبقى احسن من الاداء في الجماعة، دي طبيعتهم
وطبعا مافيش داعي للسياسيين او القابلين انهم ياخدوا مناصب
اللجنة دي تتشكل، وتعمل مع بعضها بيان توافقي، باهداف الثورة، من غير ما تجتمع مع المجلس العسكري، وينشروا البيان ده في كل وسائل الاعلام ويعرضوه على الرأي العام، ومن خلال هذا البيان التوافقي يتم مراقبة عمل الحكومة، ثم عمل المنتخب، سواء كان الرئيس الاول او البرلمان الاول
حصانة اللجنة دي حصانة شعبية، بمعنى، الشعب مسئول يحمي كل افراد هذه اللجنة من الضغط ومن التهديد ومن النقصان ومن اي تهديد مادي او معنوي يمكن ان يمارس عليهم من قبل اي سلطة في الكونيات
على اللجنة ان تراقب الجهة المنتخبة سواء كان رئيس او برلمان للتأكد من الالتزام بمبادئ الثورة

78 comments:

محمد نور الدين said...

تدفنين وردك في خده وأنت تبكين
صباه النظير الحار يتفق من جرحه
وجهه الذي صمتت شفتاه وتكلمت عيناه
مبتسم الآن و إلى الأبد
أيتها العروس هل ضاقت به الأرض حتى جاء هنا ليموت
قالت بل هو يحي هنا وأشارت إلى قلبها
لقد تزوجنا هنا وأشارت إلى عيون الناس
ولقد كسى ثوبي الأبيض وردا و أشارت إلى دمه
ولسوف يبقى هذا الكلام لا لأن القلم ثمين أو الخط منمق
بل لأن الذي أملاه ،أملاه باقتدار
فالمكتوب بالأحمر الساخن لا يكذب لا يمحى
بل يمكث في الأرض كالأشجار دائمة الخضرة
يصير مرجعا في علم السياسة و الاقتصاد ومذهبا في علم الجمال
وبابا أولا في كل ميثاق ودستور
وعيونا من الشعر و الماء النقي المتدفق بالمجان لكل الناس
تدفنين ربيعك في ورده
دموعك في بسمة إلهية بعرض السموات و الأرض
أشرقت في خدّيه ثم انتشرت في وجوه الناس
تنهضين وقد ذاب فيك تماما صار زوجك حقا
تنهضين به وهو منطرح فوق أصحابه
وتسيرين نوارة في الزحام تحملين خلاصة وعد الربيع
تشترطين على مجمع الزهر شروط التفتح
تملين بأحمر الورد منشتات السنين القادمة
وتزغردين ببراءة ودلال
زغرودة عرسك المؤجل الذي آن أوانه ألف مرة
و الذي سنحرسه هذه المرة بكل ما في قلب الزهور
من إصرار ومن نوار

Perfection Seeker said...

جميل اوي : اقترحي على الناس و شوفي هيقولو ايه : و معتقدش ان في اي موانع هتكون عند اي حد

yujina said...

انا شايفه ان لازم نضغط علشان الدستور يتغير تماما وعلى فكره ده مش هاياخد وقت كبير وبعدها يحصل ده الانتخاابات البرلمانية وبعدها الرئاسية

مواطن مصري said...

معلش يا نوارة انا شايف بجانب لجنة

حمالية الثورة يبقى فيها عسكرين بمعنى

ان لو الرئيس الاول او البرلمان الاول

انحرفو عن اهداف الثورة يقوم لجنة

حماية الثورة بطلب من المجلس

العسكري بالتدخل لحل البرلمان أو

خلع الرئيس زي الي بيحصل في تركيا

كدة ولا انتي اية رائيك

yujina said...

انا شايفة ان نزيد الضغط شويه ونغير الدستور اللى يخليها جمهورية برلمانية وتفعيل حرية الاحزاب وبعدها نعمل انتخابات برلمانية وبعد كده انتخابات رئاسية وكده يبقى غيرنا فعلا

Unknown said...

we couldn't protect amr elbehery how can we protect those people

Admire Design said...

سامعك دلوقتي ابوس ايديك نظرة للمستقبل
ايوه كده تمام ربنا يخليكي لينا

mahmoued abdulsattar bayomi said...

انا علي فكرة اعرف دكتور عصام شرف عن قرب شخصية ممتازة وفعلا انا اؤيدة تماما ولما حدث موضوع قطار القليوبية وانشال من الوزارة انا كنت حزين جدا جدا اتمني من الله انة يحقق ما يطمح لة المصريين الشرفاء مش الغوغائيين وقلالات الادب واصحاب الصوت العالي كعلاء الاسواني الذي كنت احبة واحترمة لكن بعد لقاءة مع الخلوق الفريق شفيق كرهتة واكرة كل انسان غير مؤدب ينزل بلغة حوارة الي مستوي السفلة والفاسقيين وانا عمري مكنت حزب وطني وعمري مكنت مع الفاسديين ان ثبت انهم فاسديين كما انني لست مع قلة الادب

Unknown said...

سلامو عليكم يا نوارة الانتصار، أرجو طرح اسم العميد السابق محمود قطرى كوزير للداخلية و هو رجل نزيه و رجل شرطة شريف و عنده خطة كاملة لاعادة هيكلة الوزارة و الغاء أمن الدولة و تحقيق مطالب الثورة، و قد تم نشر الخطة فى الدستور الاصلى فى 15/2/2011 بعنوان: إعادة هيكلة الشرطة المصرية

marwa said...

تمام حل كويس جدا منطقى و قابل للتنفيذ و يؤكد سلطة الشعب

عندما ينطق القلم said...

يعني إنت راجعه من التحرير وإحنا بتوع الإسكندرية مغضوب علينا والا إيه
وكمان إيه إللي ما عداش ع التحرير يبقى ما شفش مصر،أه.. وإللي ما عداش على ميدان القائد إبراهيم يبقى ما شفش مصر برضه.... عمومًا تحياتي ليكي ولأحرار التحرير أسيادنا وتاج راسنا، بس إحنا لازم نبقى إيد واحدة وطلاما ما حدش فينا عايز مصلحة لنفسة يبقى نشيلة على رسنا مدام بيحب مصر، ولازم نساعدبعض وكل واحد فينا يرمي أفكاره للتاني عشان إما يؤيده فيها أو يصححهاله.

ده عنوان مدونتنا شباب الإسكندرية وآخر مرة حأكتبهولك كدعوة لإني واضح إنك أكبر مننا.... والا إيه

http://gabhataw3ya.blogspot.com/

المنسى said...

أولا حمدالله على السلامة ..وحلوة لجنة حماية الثورة دى ....انا نفسى أعرف بتبقوا فين فى التحرير ؟؟؟؟!!!
أنا كنت عايز أكلمك فى موضوع بخصوص دعم أسر الشهداء كان فى حد كلمنى هى دكتور فى الحمعية المصرية للأبجاث العلمية

كانت كلمتنى على إعتبار إنها تعرف إنى على صلة ببعض الأعمال التطوعية

وقلتلها إنك أكتر حد ممكن يفيدها فى الموضوع ده
هى أعتقد بعتتلك ميل فى الأيام إللى فاتت بس واضح إنك ما شفتيهوش

عامة انا مش عارف دلوقتى أتواصل معاكى إزاى ولا أسيبلك إيميلى هنا ولا رقم تليفونى ولا الكونتاكت بتاعة الدكتور نفسها ولا أعمل إيه ؟؟؟؟

علاء زين الدين said...
This comment has been removed by the author.
محمد نور الدين said...

ست الكل بعد الشعر نتكلم في السياسية
الآن كنت أساهد السيد عمرو موسى على قناة العربية
وكان يتحدث في نفس الموضوع وبشيء من الثقة جعلني أشم رائحة طبخة
لأن الرجل تقدم ببرنامج انتخابي متكامل ثم أكد على مسألة بدت لي انها نتيجة اتفاق أو توافق وقد تكون نتيجة لتسوية ما وهي أن الرئيس القادم مهمته مؤقته تكون فترة واحدة واقترح نفسه ليكون صاحب هذه الفترة التي تتمثل في الإشراف على الدستور الجديد والاعداد للانتخابات البرلمانية وانتخاب برلمان .بمعنى الرئيس القادم يشرف على إنجاز المؤسسات الدستورية عندها يتم انتخاب رئيسا جديدا
ويبدو هذا هو توجه المؤسسة العسكرية .وفي تقديري يعد حلا معقولا بخاصة إذا كانت الحكومة تنال رضى الثوار
لأن رئيس مصر القادم يجب أن يراعي التوازنات الدولية.
أما اللجنة التي تتحدثين عليها فهي فكرة جميلة قد تأخذ اشكالا
أخرى ، لكن هدفها الأساسي و الرئيسي هو استكمال مشروع الثورة والوصول بهاإلى بر الأمان. وهذا لن يتحقق إلا باستكمال تفكيك النواة الصلبة للإستبداد. لأن النظام قد يضحي بالكثير و الكثير من أجنحته في سبيل الحفاظ على نواته الصلبة التي تمكنه لاحقا من إعادة بناء نفسه

هذه هي المهمة التاريخية للثورة التي تتلخص في بناء دولة عصرية على أنقاض المؤسسات الاستبداية

elzahraamegahed said...

احنا مش هنضحك على بعض
لو الرئاسية الأول يبقى الدستور كله يتعدل أو على الأقل ال35 مادة بتوع صلاحياااات الرئيس
لو البرلمانية الأول يبقى المواد دى تتضبط،
بالنسبة لاقتراحك هو كووووووول بس مش عارفه لسه مش هاضماه لان ضمانته الناس تفتكرى زخم الثوره هيفضل كده على ندهه؟؟

elzahraamegahed said...

كل الفقهاء الدستوريين قالوا أن إعداد دستور جديد لن يستغرق إلا أيام بسيطة

إيه الحكمة بأه من الترقيع وبدل ما نعمل استفتاء بهرجله كده والغالبية العظمى من الناس مش فاهمه المواد لسه ولا هاضماها
والصراحة معظم القضاه والخبراء ليهم تحفظات على التعديلات نفسها،
فبدل ما نعمل استفتاء ووش وفيش شرطه أساسا،
طب ما نعمل لجنة تأسيسيه لعمل دستور جديد

elzahraamegahed said...

بالنسبه لاقتراحك هو ممكن نعمل انتخابات رئاسية الاول بعد تعديل الدستور كاملا
بس الرئيس الجديد يقعد سنتين بس
أو حتى لو قعد اربعه
بس المهم الدستور يتعدل وما تتعملش انتخابات تشريعيه الا بعد سنه
وتبقى البلد برلمانية

tahrir said...

ولله العظيم كلام انشاء , ولا ياكل مع اي حد عاوز يستأثر بالسلطة, لأن الرئيس المنتخب حتكون معاه الشرعية ودياهم سلاح حيحطه في عين اي حد
و طبعا حضراتكم نسيتوا ان رؤساء التحرير اياهم لسه في مكانهم , و ابشركم من دلوقت بصفحات اولى تمجد في جناب الرئيس الشرعي وغطيني و صوتي يا ثورة
الحل اننا نضغط لتمديد الفترة الانتقالية عشان الوقت ما يكونش حجة حد و بعدين نطالب بدستور 1953

عندما ينطق القلم said...

الأستاذ أبو هاجر المهمة التاريخية للثورة تتلخص في بناء دولة عصرية على أنقاض المؤسسات الاستبداية
هذه مقولة أحييك عليها وأرجو من الأخت نوارة تأمل هكذاكلام لأنه واع وعميق
أما بالنسبة للجنة حماية الثورة فهي كما قلت فكرة جيدة ولكن طرحها كما ذكرت نوارة أعتبره قاصرا يحتاج الكثير من الفهم؛ لاننا حينما نريد حمايةالثورة لا نريد تكوين لجنة رقابية على مؤسسات الدولة ومنها المؤسسة الرئاسية ولكن حماية الثورة تكمن في رأيي في حماية مطالب الثورة وعدم السماح لأي وجه فاسد بالظهور مرة أخرى في أي مؤسسة من مؤسساتها وإذا نجحنا في ذلك سنقول وقتها إن ثورتنا قد نجحت، وليدر الشرفاء البلد ما دمنا اخترناهم بحرية ووثقنا فيهم ولمن يخالفهم الحق في الاعتراض
عليهم بالطرق المتحضرة التى نرضاها لبلدنا

أما ماتقوله نوارة فهو تصور أشبه بأن تبقى الثورة إلى الأبد وهذا لم يحدث في أي ثورة وأظن أنه لن يحدث.

elzahraamegahed said...

الحد القصى لسن الرئاسة يبقى 65 سنه ، زهقنا من الدساتير التفصيل
علشان ناس معينه تيجى،
لما واحد يحكم وهو 65 يادوب يخلص مدته وهو 70، مصر دوله كبيره واعبائها جامده ومحتاجين حد فى صحته ومركز

ayman radwan said...

معلش ده تشتيت في الاراء نعمل دستور جديد دلوقتي ونخلص باي طريقه ممكنه.
عايزيين الفتره الانتقاليه تبقي قليله ولما يجي رئيس يبقي جاي يشتغل علطول من غير وجع دماغ.

amer said...

الحل بسيط للغاية و هو وضع دستور جديد للبلد يحافظ علي كل مكتسبات الأمة و ثورتها... لا بد من المطالبة بوضع دستور جديد قبل أي انتخابات سواء رئاسية أو نيابية و بالتالي يضمن الجميع عدم الألتفاف أو القفز علي الثورة و منجزاتها... لا بديل عن دستور جديد يضبط أداء الجميع

elzahraamegahed said...

كل الفقهاء الدستوريين قالوا ان عمل دستور جديد هيستغرق ايام بسيطه
ليه بأه السلق والترقيع ،
نعمل لجنة تاسيسيه لعمل دستور جديد

على فكره انا رافضه التعديلات دى
يعملوا بأه لجان استفتاء ووش وهنرفضها
لحد ما يعملوا لنا اللى احنا عايزينه

والتعديلات دى ما سمعتش ولا قاضى ولا حقوقى شكر فيها

طبيب بيطري said...

والله نشوف برنامج الدكتور عصام وبعدين نتكلم
لكن موضوع لجنة حماية الثورة دي خايف لتكون زي قانون حماية الثورة بتاع 52 اللي لموا بيه كل المعارضين العاطل في الباطل واحنا عاوزين نحافظ علي كل اتجاه
وخايف بردوا من تكرار ما حدث في ثورة 52 ويبدأ يتكون مراكز قوي زي ما حصل لاعضاء مجلس الثورة بتاع 52 مش فاكر كان اسمه ايه
اي نعم شباب وعلي راسي لكن السلطة مغرية
هتقوليلي دول مش ظباط جيش انا معاكي لكن بردوا هيبقي مراكز قوي في اماكن عملهم وانا مش عاوز محمد نجيب تاني في مصر ويحصل سيطرة من ناس علي ناس ونبقي في حلقة مفرغة
لو حصل توعية في الشارع ممكن ساعتها الجيش يمارس عمله في حماية الحدود ودا بعد عودة الشرطة وساعتها ممكن في الجيش يأخروا الموضوع بتاع حل المجلس العسكري ست شهور كمان
وساعتها محدش يبقي ليه حجة
معلشي احنا مش هنفضل نقول الاحزاب معملتش قواعد واساسات
المفروض يشتغلوا من امبارح
مش هنستني عشر سنين لغاية لما الاحزاب تنضج
انا متفائل خير باذن الله
بس حاولوا في موضوع المصريين اللي في الخارج زيي مثلا
صدقوني هيظبطوا معاكم الكفة جدا
لان دول شافوا ثقافات مختلفة وعايشين في اتجاهات متعددة يعني بالعربي مراقبين دوليين
ربنا معاكم

Sgheita said...

Nawwara ya 7elwa.. i am glad that all went well after all, nefsy ba2ah bas attamen 3ala amr el beheiry dah we kol el masgoneen.. I can't feel happy for some reason, perhaps cause I was there with you and KNOW there were no baltagiyah or anysuch thing among us and that they beat ppl ghadran.. anyway tameneena if you know any news about him and the others. Your suggestion is nice send it le shabab 2e2telaf el thawrah and we will support it. Best part i like is that el lagnah dih doesn't do any meetings with el magless el a3la.. second point laaazem dustour gedeed I believe all the ppl who want to become presidents while they are fakes or old regime ppl if the constitution changes and they don't have same privileges any more won't even bother to run for presidency if they find themselves more of workers for the people than heads of the country.. Take care and keep up the good ideas :)

وجهة نظري said...

أنا أسف، كل الكلام د جميل ومنطقي، بس صدقيني النهاية مش هي مش 7atkoon إلي الشعب عايزها، ولسة مفيش حاجة خلصت خالص. إذا عايزين البلد دي توصل لدولة لديمقراطية لازم وحتماً يتكون مجلس رئاسي مدني فوراً، وتتأجل أي إنتخابات لغاية ما يتم وضع دستور كامل وجميع الأحزاب تكون والمرشحين مستعدين وبرامجهم جاهزة، دا ياخد 6 شهور أو سنة بس الدنيا تترتب، وينظم عمل المجلس الرئاسي أما دستور خاص مؤقت أو قانون خاص مؤقت أو أي صيغة أخرى. إلي الناس مش عايزة تاخد بالها منه إن مشكلتهم مع المجلس العسكري المتحجر أو على أحسن تقدير متعجل وحندخل في مشكلة أكبر قريباً جداً بسببهم. المشكلة مش مع أي رئيس وزراء لأنه مربوط بيهم وأي إنتخابات سريعة حتخلينا تحت رحمة ظروف مش عرفنها، وتحت رحمة مجلس عسكري رأيي الشخصي مشكوك في بعض أو كل اعضاؤه.

لازم الطلب الملح والأهم هو مجلس رئاسي مدني مستقل وفوراً.

elgenydy said...

يا نوارة انا فضلت ادور عليكى النهاردة فى كل الميدان وعند كل الأذاعات كان عندى شوية اسئلة كتيرة وحيرة من كذا حاجة ولانى اعرفك كويس من خلال مقالاتك ومواقفك ومتابع نشاطك كويس ومقتنع بطريقة تفكيرك فاقوليلى اقدر اتكلم معاكى ازاى

utopia said...

السلام عليكم
شاهدت الحلقة على الجزيرة مباشر تحية ليكى ول اسماء ود ليلى

لكن ليه نقبل بما يفرض علينا؟
ولا رئلسية ولا برلمانية اولا
ولا مجلس امناء ولو انها فكرة جيدة و ممكنة التحقيق وضرورية
هدفنا الغاء الدستور الحالى وانشاء اعلان دستورى بلا صلاحيات للرئيس
ثم لتكن بعد ذلك انتخابات رئاسية
ثم برلمانية
(والله غالب على امره ولكن اكثر الناس لا يعلمون)
صدق الله العظيم

Unknown said...

أحنا عايزين مجلس رئاسى يرضى عنه الشعب أنا مستغربة أن المجلس العسكرى يرفض تعين مجلس رئاسى بدون سبب ولازم تغيير الدستور وده لازم يكون أهم مطلب لنا الجمعة القادمة إنشاء الله قبل الاستفتاء المحدد له 19/3
وإلا سوف نشعر أن الانقضاض على الثورة يمشى بخطى منتظمة ترقيع دستور ورئيس أو برلمان يتبعهم وإحنا بنتفج

Ahmed Mohamed said...

البيضه ولا الفرخه..........؟

انا بقول ان الناس يتعملها برامج توعيه
ونخلي المجلس العسكري موجود لفتره اطول
والاحزاب تعرف تشتغل في البلد كويس
والناس اصلا عارفه مين الحلو ومين الوحش
وخلاص مبقاش في حاجه اسمها الحزب الحاكم
فبالتالي محدش هينتخب علي هذا الاساس
والتزوير والرشوه بجانب التوعيه مقدور عليها
الي يتعرف انه وزع فلوس
يتمنع طول عمره من دخول مجلس الشعب
ودي سهله اصلا
والدعايه الانتخابيه تكون عادله لكل مرشح مستقل او حزبي

اساسا اهم ما في الدوله هوه مجلس الشعب
مش الرئيس

OberonSky said...

نوارة .. حمد الله على السلامة ... و مبروك علينا كلنا كل نصر الشعب بيعمله بأيده ...

أنا من الناس إلي بتقول إنتخابات رئاسية الأول أحسن .. أنا عندي واحد بس أبقى مركز عليه و حطوه تحت المجهر ... ولا ميت واحد من برلمان مش عارفين مين و بيعمل إيه .. و بعدين مشكلة البرلمان إن المحافظات ممكن تضيع لبتوع الحزب الوطني .. انما رئاسية مفيش غير ناس نضيفة و معروفة و عليها العين و مش هيعرفو يفلفصو مننا .. و كمان حيث إن الإخوان مش حيحطو حد في الرئاسية يبقى من مصلحتهم انهم يفضلو مصحصحين لأي رئيس ييجي ..

و أول عن آخر هو فرد واحد و سهل اننا نفلي تاريخه و نجيبه في التليفزيون مرة و اتنين و نسأله و نجيب د. علاء الأسواني يستجوبه هيهيهيهي =)

يعني أي رئيس هييجي دلوقتي مش هيقدر يتفرعن .. و لو حاول الملايين هتكون في الشوارع .. داحنا شلنا مبارك مش هنعرف نشيل واحد جديد ... البرلمان هيكون مستخبي و محدش هيتابع كل واحد منهم بيعمل إيه

بالنسبة لمين اللي هيراجع ورا الريس الجديد و يحاسبه لحد ما البرلمان يكمل .. .. أنا شايف إن المجلس الأعلى يعمل لجنة مؤقتة ممكن شبه بتاعت المجلس الرئاسي زي ماقلتي .. ممكن مثلاً واحد عسكري و أربعة مدنيين منهم القضاه و غيره و دول ممكن يكونوا أكنهم برلمان مؤقت وظيفته إنه يقعد للريس على الوحدة و يشوف بيعمل إيه ..

Ahmed Mohamed said...

الظريف زي ابوه جمال بن مبارك
لما كان بيتريق علي الشاب في الفيديو المشهور بتاع شباب الفيس بوك
كان بيقول رد عليه يا حسين
يقصد حسين عبد الغني مدير مكتب الجزيرة
السابق في القاهرة
فضحك حسين بل وانفشخ فمه وتمايل زي ما يكون حد بيزغزغه

ازاي بقي يقف في ميدان التحرير ويتكلم عن الشباب دي

Unknown said...

طيب لية مايتحطش فى الدستور دة بند يجبر الرئيس القادم على انهاؤة و عمل دستور جديد خلال مدة محددة عن طريق لجنة من القضاة المستقلين بعيد عن سلطات الرئيس و يحد من سلطة الرئيس على تعديل الدستور بنفسه او ان ارئيس القادم يكون مؤقت لمدة سنة مثلا لحين عمل الدستور والاشراف على الوضع الدستورى و البرلمانى للبلاد ثم تعاد انتخابات الرئاسة بينة و بين اخرين فى ظل النظام الجديد و بكدة الرئيس مش هيعدل الدستور لحسابة لانة مش ضامن بقاؤة فى السلطة و هيحاول يرضى الشعب ليعيدوا انتخابة بعد مرور العام

Anonymous said...

المبدأ ممتاز,لأن هذا الكيان الثورى,سيكون هدفه الأسمى,الوصول بمصر,إلى دستور الحرية والعدالة الاجتماعية.دستور من الشعب للشعب,وليس للفرعون.وكذلك ستحمى,هذه اللجنة,الثورة,من شر فلول حزب الفساد والكفر الصهيونى,إلى أن ننتهى من هزيمتهم,بلا رجعة

hossam said...

hhhhhhhh

hossam said...

لازم دستور جديد قبل اي انتخابات...زى تونس ما هتعمل

hossam said...

لازم دستور جديد قبل اي انتخابات...زى تونس ما هتعمل

kimo said...

انا شايف المصيبه الكبرى ان معظم الناس بدأو يتخنقوا مننا وبداو يقولو انتو مش بتمثلونا ..شعب غريب جدا بقى بيحب شفيق عشان صعب عليهم بعد اللقاء والمصيبه الاكبر اللي من امبارح في 20 الف على الفاسبوك بيرشحوه للرئاسه!
الناس بدات تهرتل واحنا غلطنا لما قلنا ان الثوره دي ثوره شعبيه شارك فيها شعب مصر ..الثوره دي ثورة الناس اللي بتفهم بس الحقيقه

hoopoe bird said...

التعديلات دي فيها توريث سياسي
بمعني ان الرئيس يعين نائب له ده
توريث زي ما حصل قبل كده
لازم النائب يكون منتخب

BT said...

انا رأى ان الدستور كله يتغير قبل اى انتخابات رئاسيه او برلمانيه
و لو خلاص قفلت خالص و مش هينفع يبقى نعمل اعلان دستورى مؤقت لكن ان الدستور القديم يرجع العمل بيه مع شوية التعديلات ديه يبقى احتمالات وجود مجلس برلمانى اى كلام او فرعون جديد وارده جدا

ارجوكم ركزوا على ان الدستور لازم يتغير كله او على الأقل اعلان دستورى جديد يعنى بلاش اى انتخابات على الدستور القديم
ده افيد من اننا نقعد نقول البيضه قبل الفرخه

نواره انتى بتقرى الكومنتس يا ريت تردى علشان اعرف انك بتقريها و ايه رأيك فى اللى بقوله؟

Anonymous said...

انا عندي اقتراح... هو ليه المجلس الاعلى للقوات المسلحة مايريحناش و يخلي اللجنة بتاعة التعديلات الدستورية بدل ماهي قاعدة فاضية دلوقتي تحضر قانون جديد للانتخابان و يدعو هو لانتخاب لجنة تأسيسية علشان تحط دستور جديد للبلد و نخلص من كل وجع الدماغ ده ..انتخابية الاول ولا رئاسية الاول ... بصراحة كل واحدة أمررر من التانية ... ما نعمل زي ما نعمل زي ماتوني عملت .. بصراحة هما كانو جدعين و نصحونا ايام المظاهرات ليه ماناخدش باللي عملوه مرة تانية ... هما رئيسهم المؤقت دعا لانتخاب لجننة تأسيسية لوضع دستور و جاب من الآخر ... ليه مانعملش زيهم مرة كمان ... و ياريت ماحدش يقوللي أصل مصر مش تونس ... ما قالو كدة و طلعنا اخوات ... ايه رأيكم ؟؟؟

الجبرتوته said...

انا معاكي جدا في الفكره دي وياريت ده يتم بسرعه بس عشان يبقي ادائها ملزم للرئيس لازم تكون بموافقة المجلس العسكري ويكون لها صلاحيات محدده يعني لو صدر بصلاحيتها مرسوم من المجلس الاعلي تبقي حاجه كويسه في الرقابه الفعليه علي السلطه التفيذيه ولحمايه مطالب ومكتسبات الثوره في حاله انتخاب الرئيس في البدايه واعتقد ان في الحاله دي انتخاب الرئيس الاول هيكون افضل .. لحين اصدار الدستور وانتخاب البرلمان طبقا للدستور الجديد وعلي مهل حتي تاخذ الاحزاب فرصتها وخصوصا لو كنا عايزين نظام برلماني لانه التمثيل الحقيقي لحكم الشعب لنفسه لأننا حاليا في مرحله خطيره و دقيقه من مستقبل مصر ومش عايزين برلمان ضعيف ولا وزاره معوقه وخصوصا ان الرئيس في النظام البرلماني سلطاته محدوده ويكاد يكون شرفي وصعب جدا ان يصبح فرعون في بلد صانعه للفراعين مثل بلدنا

hossam said...

فى تونس تم تحديد ميعاد لانتخابات مجلس تاسيسى لوضع دستور جديد قبل الانتخابا الرئاسية او التشريعية

hossam said...

فى تونس تم تحديد ميعاد لانتخابات مجلس تاسيسى لوضع دستور جديد قبل الانتخابا الرئاسية او التشريعية

elzahraamegahed said...

طب ما نعمل انتخابات برلمانيه بالقائمة النسبيه ، فنلغى ان الناس تختار افراد، ، كده هنختار برنامج والأطياف كلها هيبقى لها تمثيل حسب نسبتها
والبرلمان يضبط لنا دستور وبعد كده نعمل انتخابات الرئاسة

hossam said...

اتفق تماما مع ايه فى امل

Mafrousa said...

بصي يا نوارة
انا اللى فهمته ان المجتمع مش جاهز بالاحزاب
و لو حصلت انتخابات الاخوان و اعضاء الحزب الوطني اللى موجودين فى انحاء الجمهوريه همه اللى حيكون ليهم نصيب الاسد فى الانتخابات
ده غير ان الاخوان عشان منظمين بزيادة
بدأوا بالفعا عمل زيارات لبعض من القري و انتى سيد العارفين ان فيه مصريين طيبين و مش فاهمين و الفلوس دلوقتى ممكن تعمل البدع
انا شايفة ان انتخاب الرئيس تكون الاول
و شباب التحرير يحاول يكون اكثر تنظيما من الاخوان
و يبدأ بعمل زيارات لجميع محافظات الجمهورية
منها يعرف نفسه للمجتمع و منها يوعي الناس
و كفاية ان الطرق الصوفية حتعمل 18 حزب
و معروفين فى اكثر من محافظة نظرا لنشاطهم برضه
لازم شباب التحرير و من اقتنع بيهم سواء من الاول او مؤخرا
يتعرفوا و يكونوا اكتر من القوى السياسية فى المجتمع

و بعدين عندى ليكي خبر زفت
ورد الى مسامعي و ياريتنى ما سمعت
ان موظف اداري فى رياسة الجمهورية بيحلف ميت يمين ان زكريا عزمي بيروح مكتبه كل يوم يقفل على نفسه
و يقوم باعدام الاوراق
يعنى شكله حيطلع زي الشعرة من العجين
فكري بقا ممكن تعملوا ايه
تحياتي

عندما ينطق القلم said...

رسالةللدكتور عصام شرف

http://gabhataw3ya.blogspot.com/

إلى المواطن المصري الشريف: عصام شرف،،،

أحد أبناء ثورة 25 يناير، وأحد المؤمنين بمبادئها، وما قامت من أجله، وفقدت لتحقيقه أشرف شبابها المخلصين الذين ستظل أرواحهم الطاهرة تتطالبنا بتحقيق كل ما ماتوا من أجله.



السيد الدكتور: رئيس وزراء مصر،،،


يشرفنا أن نناشدكم، بما تأكد لنا من إخلاص نيتكم لإصلاح حال البلاد والعباد، وما تجسد في شخصكم الكريم من وطنية، تجلت لنا من أول مبادرة اتخذتموها وهي نزولكم لميدان التحرير وسط الناس، وتعهدكم أمامهم بتنفيذ مطالبهم.

إن هذا العمل يدفعنا إلى احترامكم، وتأمُّل الكثير من الخير لبلادنا على يديكم.

من هذا المنطلق الوطني نناشدكم سرعة النظر في تحقيق المطالب الشعبية التالية؛ حرصًا منا نحن شركاؤكم في الوطن على استتباب مناخ الاستقرار في مصر، وهو ما ينشده كلُّ وطنيٌّ شريف، وأملاً منا في أنَّ تحقيق تلك المطالب العادلة سوف يعطي دفعًا لعجلة العمل والتنمية في البلاد لكيّ تتبوأ مصر ما هي أهلٌ له من مكانة ومقام في الساحتين الإقليمية والدولية.

وتتلخص هذه المطالب الشعبية فيما يلي من نقاط:

أولاً: حلّ جهاز مباحث أمن الدولة وما يتصل به من محاكم ونيابات، مع إحالة اختصاصاته لجهاز الأمن القومي المصري.

ثانيًا: الإفراج عن كافة المعتقلين السياسيين وفق جدولٍ زمنيّ محدد ومعلن.

ثالثًا: المضي قدمًا في سرعة ما شرعتم فيه من ملاحقة رموز الفساد المالي والسياسي في العهد السابق، بما يضمن للشعب المصري عدم الالتفاف على مطالبه الشرعية، ويؤمِّن استحقاقاته الثورية.

رابعًا: حلّ المجالس المحلية القائمة في كافة محافظات البلاد لما يشوبها من عوارٍ وفساد.

خامسًا: نظرًا للتراجع الأمني الذي تشهده البلاد في هذه المرحلة الحرجة من تاريخ البلاد، يهيب الشعب المصري بكم سرعة اتخاذ الإجراءات الحاسمة التي من شأنها تأمين الأرواح، والممتلكات العامة والخاصة، وإعادة الانضباط إلى الشارع المصري وفقًا لما تنص عليه القوانين المعمول بها في جمهورية مصر العربية.

الدكتور الفاضل ، بل المواطن المصري الشريف: عصام شرف:

لسنا في حاجة إلى أن نوجه عنايتكم إلى أن سرعة الاستجابة لكافة المطالب

الواردة أعلاه كفيلٌ بأن يحقق الاستقرار في ربوع مصر، وأن ينزع فتيل

الاحتقان الشعبي الذي تعبر عنه المسيرات والاعتصامات التي تعم البلاد،

وأن يبث روح الثقة والأمن بين أبناء الشعب بمختلف طبقاته وتوجهاته،

وأعلم ان خلفك 82 مليون مواطن، يأملون فيك الخير، وينتظرون منك

الكثير من العدالة و الكرامة و الحرية التي بذلنا من أجلها الدماء وكل غالٍ

ونفيس، ونحن على أهبه الاستعداد للبناء معك كلٌ في مجاله، فتوكل على

الله وكلنا معك خدم لهذه البلد الجميل.

هذه رسالة أولى لما نراه من أولويات تقتضيه هذه المرحلة، وسوف نستمر في

تفصيل باقي ما نراه يأمله ذلك الشعب الطيب من مطالب.

وفقكم الله تعالى لما فيه مصلحة البلاد وخير العباد.

مش فاهمه said...

مش عارفه ليه مش قادره استوعب موضوع الجيش مش عايز لجنه رئاسيه ليه طيب مش جايز لو الضغط زاد او لو تواجد معتصمين فى الميدان جايز يوافقوا هم بيعملوا اللى احنا عايزينه بس لما بيفهموا الوضع صح زى موضوع شفيق لولا انهم شافوا حلقه علاء الأسوانى لولا اقتنعوا
و بعدين قريتى حسام عيسى النهارده فى الأهرام بيقول الشعب يقاطع استفتاء التعديلات الدستوريه لأنها غير شرعيه و المطلوب دستور جديد

Unknown said...

لاأوافقبصراحة
لأن الاسماء دي لم يتم الإتفاق عليها من قبل كل طوائف الشعب وهتلاقي كتير رافضين لأننا ببساطة مانعرفش مين هم دول كلهم ولانعرف مين هم 19 عضو اللي في الإئتلاف كويس
فعلا الحل الوحيد هو الدستور الجديد
وأنا على يقين انه مش هياخد وقت زي ماهم بيمثلولنا

عندما ينطق القلم said...

دعوة للمشاركة
السادةالأفاضل زوار المدونةالمحترمة جبهة التهييس الشعبية:
يسرنا أن ندعوا سيادتكم للمشاركة معنا في مدونتنا

(جبهة التوعية بأهداف الثورة)

http://gabhataw3ya.blogspot.com

التي أنشأناها للتعبير عن تصورنا لأهداف ومطالب الثورة، وعن آمالنا وتطلعاتنا في صنع مستقبلٍ أفضل لوطننا.
مرحبًا بكم شركاء لنا وإن اختلفنا على سطور هذه المدونة، فنحن كما نتشارك على أرض الوطن، يتعين علينا أيضًا أن نتشارك الرأي والمصير.

hassn hamdi said...

السلام عليكم:
بصي يا نوارة..
رفض المجلس العسكري لتعيين مجلس رئاسي مدني وإصراره على إجراء الانتخابات الرئاسية بعد ستة أشهر، وإصراره على ترقيع الدستور.. كل ذلك لا يعني إلا أن المجلس العسكري ينفذ خطة مدبرة بليل للالتفاف على الثورة..
لماذا يرفض العسكر تسليم السلطة للشعب الذي وقفوا يتفرجون عليه وهو يذبح وممتلكاته تنهب؟
إما اعتصام وضغط على المجلس لكي ينقل السلطة للمجلس الرئاسي المدني أو الانقلاب العسكري على المجلس ومحاكمة أعضائه..
انتظري وزراء الداخلية والعدل والخارجية الذين سيعينهم المجلس العسكري (سمعت أنهم التقوا باللواء أحمد رشدي) وفي ذلك دليل مؤكد على أن المجلس مصر على الحفاظ على نظام مبارك مع بعض التعديلات..
ربما يكون المجلس اختار عصام شرف المقبول لدى الثوار (ولكنه كان جزءً من النظام القديم.. ولا أشكك فيه) لكي يكون واجهة..
فيه خطة خبيثة دائما ما يستعملها أعداء الحرية أمثال النظام البائد: الاستعانة بوجه شريف ونظيف ووطني لكي يكون مقبولا لدى الناس وتركه يتصرف في البداية بجرية ووطنية حتى يهدأ غضب الناس ثم البدء في الضغط عليه بصورة غير مباشرة وتوريطه حتى ينفذ السياسات التي يريدها النظام تدريجيا فتبدو وكأنها هي ما يريده الشعب..
فعلوا ذلك مع أكثر من وجه نظيف مثل أحمد رشدي وأحمد جمال الدين ومنصور العيسوي وغيرهم...
يا نوارة عليكي أن تنتبهي لما يحدث وتنبهي غيرك...
عليك أن تنصحي ائتلاف شباب الثورة بالتنسيق مع قيادات الصف الثاني الوطنيين من الجيش لأن الثورة الآن بلا ظهر يجميها...
لو انقلب المجلس العسكري الأعلى على الثورة (وأراه يخطط لذلك) فما الذي سيحمينا؟
أرجو أن نتعلم من درس ليبيا وتونس

elzahraamegahed said...

بقول ايه عشان نخلص من شفيق ومن عمرو موسى ومن كل الناس بتوعالفتره الكئيبه دى ، سن الرئاسة يبقى الحد الاقصى ليه 65 سنه يا دوب

Unknown said...

انا شايفه ان الدستور لازم يتغير الاول كله
لان في كتير مواد تخص الانتخابات يثار عليها جدل
______________

عاوزة حقي من الحكومه

انضمو معنا

http://3awzahaky.blogspot.com/

Sherif said...

الجيش ليس قوة ثورية, بطبيعته أولا, وبحكم التزامات جيشنا بالذات الخارجية وكمان الداخلية ثانيا. الجيش جاب آخره معانا خلاص, واللى مستنى منه حاجة تانى فليستعد لخيبة الأمل, على أقل تقدير. يبقى نعمل إيه؟ التوعية والتوعية والتوعية بأهداف الثورة ومنطقها, فى كل منفذ إعلامى تقدروا ـ ونقدر إحنا كمان ـ توصلوا له: لم تكن ثورتنا كالفرنسية أو الروسية, على نظام استبدادى يمنع المعارضة بالقانون, بل كانت على نظام ثعبانى, مراوغ, يلتف على المعارضة ويبتلعها ابتلاعا, بالقانون. كان عندنا "دستور" فيه إشارة على استحياء لمبدأ الفصل بين السلطات, وكان عندنا "برلمان منتخب" وكان عندنا "مؤسسات". يبقى هدف الثورة هو تعديل هذا الدستور, وهذا البرلمان, وهذه المؤسسات, بحيث لا تسمح بتخليق مبارك آخر. التركيز والتوعية, على أوسع نطاق ممكن, لكن لجنة لحماية الثورة؟ ومين اللى هيحمى اللجنة؟

حسن على said...

فكرة "لجنة حماية الثورة" فكرة ديموقراطية لائقة بالوضع الذى يعيشة الوطن الان,والاسماء التى ذكرتيها كلها اسماء تشرف الوطن وحامليها معا

mohamed said...

اتفق معاكى

الجبرتوته said...

نسيت اضيف حاجه ان حكاية اللجنه دي ممكن تيجي علي هوي المجلس العسكري اعتقد انه ممكن يقبل بيها لأنها هتهدي الناس وتطمنهم علي ثورتهم وبالتالي تبدأ الحياه ترجع لطبيعتها وتتوقف الاعتصامات والمظاهرات

unitedarab said...

شرعية ايه ونيلة ايه!!رئاسية الاول ولا برلملن الاول!!! امن الدولة لسة موجود بقوة وحرق كل ادلة الجرائم وكمان حقوقنا راحت معاهاااااا
toon lateeee

Tears said...

فيه اقتراح اسهل

بدل صرف الفلوس على استفتاء تعديل كام ماده يتحط دستور مؤقت و يتم تعديل صلاحيات رئيس الجمهورية بحيث انه مايبقاش فرعون و يبقى مجلس الشعب مستقل و القضاء و كل ده يتعمل باشراف اللجنتين الجديدة و القديمة و لما يخلصوا بعد شهر او اتنين نستفتى على الدستور كله و تتعمل انتخابات رئاسية و نبقى ضمنا ان مافيش فرعون لكن مجلس شعب فى ظل الوضع الامنى ده ح تشوفى بلاوى و قتلى و سنج و مطاوى و دفع رشاوى

الرئيس بتاعنا اللى مننا ح يعرف يخلى منصب نائب مش مغرى للحرامية و فعلا عمل تطوعى

فكرى و قوليلنا رايك

Anonymous said...

انتخابات برلمانية ثم محلية ثم رئاسية كدة نضمن ان الاخوان هيكونوا اغلبية في مجلس الشعب والمحليات وطالما انهم مش هيرشحوا حد في الرئاسية كدة نضمن انة هيكون فية مراقبة شديدة للرئيس الجديد والاخوان فعلا يستاهلوا لانهم هم وقود ماحدث في 25 يناير

Anonymous said...

قمت بنشر الإقتراح,بهذا النص,راجيا أن أكون أمينا فى نسبته لصاحبته,نوارة,وكذا بالنسبة لمضمونه:إقتراح,يستحق النقاش,لنوارة نجم,بتكوين "لجنة حماية الثورة" تنبثق من النشطاء,وتضم قضاة,وتستلهم شرعيتها من الثورة.هذا الكيان الثورى,سيكون هدفه الأسمى,الوصول بمصر,إلى دستور الحرية والعدالة الاجتماعية,دون أن يستغل,رئيس,أو مجلس شعب,الدستور المرقع,للإنحراف عن هذا الهدف الأعلى.دستور من الشعب للشعب,وليس للفرعون.وكذلك ستحمى,هذه اللجنة,الثورة,من شر فلول حزب الفساد والكفر الصهيونى,إلى أن ننتهى من هزيمتهم,بلا رجعة

unitedarab said...

ma khalas amn el dawla 7ara2 kol 7aga

أرنوب said...

موضوع لجنة المراقبة ده مش عملي والمجلس الأعلى (حيعصلج) فيه لأنه حيعتبره عدم ثقة ونفس الشيء بالنسبة لموضوع المجلس الرئاسي (وقلت من قبل أنه سيرفضه) الحل الوحيد لضمان تكافؤ الفرص في الإنتخابات البرلمانية المقبلة وإننا نقدر نعملها قبل الإنتخابات الرئاسية كما تريدين يا نوارة وأوافقك تماماً في هذا .. الحل الوحيد هو مد الفترة الإنتقالية برئاسة المجلس الأعلى للقوات المسلحة وبدون أية جهة رقابية أخرى خصوصاً وقد أثبت المجلس الأعلى حتى الأن - وبرغم تباطؤه في الإستجابة لمطالب الثورة - أنه أهل للثقة

Tears said...

بمناسبة حماية الثورة الورق اللى بيتوجد مفروم فى مقار الامن بالذات فى الفراعنه فى اسكندرية ياريت لا احد يعبث بيه فيه جهاز مخصوص لتجميعه استخدموه فى ثورة ايران و فى المانيا موجود هنا ياريت حد يشوف موضوعه

http://www.unshredder.com/

بهيج الشرير said...

والنبي ياأبلتي أنا عندي إقتراح! إيه رأييك نعمل في العيال الخولات بتوع الشرطة وأمن الدولة اللي إتمسكوا في إسكندرية نفس اللي إتعمل في عماد الكبير، وبعدين نخليهم يجروا بلابيص في الشوارع ونصورهم بالفيديو وبعدين ندي السيديهات للواد المخبول مرضعة مكسور زعيم قبائل البورنو والسيديهات الطازجة

مدونة سلامتك يا دماغي said...

نوارة خليكي أكثر تحديداً في كلامك
المرحلة دي مش عاوزة محايلة
ومش عاوزة إننا نقعد نطبطب وندلع في القوات المسلحة
يعني إيه القوات المسلحة مش عاوزة مجلس رئاسي
هو الناس عملت مظاهرة وراح منهم شهدا عشان برضه نتعامل بمبدأ قولوا اللي يعجبكم وأنا أعمل اللي يعجبني
إيه المشكلة لو إتعين مجلس رئاسي مكون من المهندس عصام شرف والمستشار يحيى الجمل اللي اختارهم الجيش ومعاهم واحد أو اتنين عسكريين زي ماهو حاصل في أي ثورة ؟
هنفضل في المناهدة دي لحد إمتى ؟؟
البلد كده هتضيع مننا والناس هتنقلب على الثوار إذا ما كانوش إنقلبوا بالفعل ويبقى كانك يا بو زيد ماغزيت
وأفضل حل إننا ننزل الشارع ونبدأ نكلم الناس ونقنعهم بفكرة المجلس الرئاسي وتنعمل مظاهرات الجمعة اللي جاية يتقال فيها الشعب يريد مجلس رئاسي
والواحد مش فاهم الصراحة لما التركة تقيلة قوي كده على القوات المسلحة وعاوزين يخلصوا من الحكم بدري بدري ما يتعمل مجلس رئاسي ويتسلم السلطة
أيه الحكمة إني استعجل على انتخابات برلمانية أو رئاسية ودستور معدل مش مغير وأسلم البلد للناس وهي غير جاهزة ويا عالم الإنتخابات دي هتبقى عاملة إزاي والناس أصلاً غير جاهزة للإنتخابات ؟
تجيبيها يمين تجيبيها شمال مفيش غير المجلس الرئاسي لأن كده مش نافع

Unknown said...

رصد | خاص
إعلان هام للغاية وعاجل

نرجو من حضراتكم إرسال الآتي:

...1- أي فيديو أو صورة لإعتداء قوات الشرطة على المتظاهرين أثناء الثورة

2- كل من له أخ أو صديق أو قريب إعتقل أو أختفى في نفس الفترة بإرسال
الإسم رباعيا
بيانات السكن
رقم تليفون للتواصل المباشر
صورة حديثة
لتيسير عملية التعرف عليه ومعرفة مصيره

وذلك لتقديمهم بشكل رسمي للنائب العام والمجلس الأعلى للقوات المسلحة للتعامل معها والإستفادة منها في التحقيقات

نرجو أخذ الموضوع بجدية شديدة والتعجيل في إرسال المطلوب إلى الإيميل التالى
rassdnews@yahoo.com

Sgheita said...

I suggest that someone men 2e2telaf shabab el thawrah goes with the documents that are being confiscated from amn el dawlah buildings. If the army as one person who called el jazeera ensa7ab at 8 before el darb from amn el dawlah lel motathahreen then I am sorry to say mesh mesta2menahom 3ala el documents

Nicholas Urfe said...

الف مليون رأي !

ابراهيم رزق said...

نوارة يا بطلة

اولا حمد على السلامة انا كمان كنت فى التحرير

اقتراحك كويس بس يا ريت يبقى عمل توجيهى ملوش سلطة فى العمل التنفيذى عشان ميحصلش تشويش
كمان فى نقطة يجب اكمال كشف المفسدين و ليس الفاسدين لانهم اشد خطرا رجاء زيارتى فى مدونتى و ابداء رايك
لان اولا احنا اصدقاء قدام
ثانيا جاءتنى بعد التعليقات اللى بتقول كفى و عفا الله عما سلف وربنا بيسامح
خالص تحياتى

Unknown said...

Do you guys have Nwara's email? Thanks

Om Masraya said...

عارفة يا نوارة عندي فكرة ياريت تتطبق أسمعي فيه جروب على الفيس بوك اسمه ظباط ضد الفساد لوهم صادقين بجد يبقى عندنا لهم شغلانة مهمة وماحدش يعرف يقوم بيها أحسن منهم وهي تخليصنا من الضباط الفاسدين وأعوانهم ممن هم دونهم في الرتب "ضباط الصف والجنود والمخبرين" وبالتالي لو ح يعرف يحول لهم فيديو الشباب اللي اتخطفوا واغتصبوا والجميع المجرمين من ضباط وغيرهم واضحين في الفيديو وأنا ح اصدقهم واشهدهم لهم بالنزاهه والشرف والنظافة وحب الوطن أمام الناس وقبل كده أمام الله وأفضل ادعيلهم الوقت اللي باقي لي في عمري مهمة مش سهلة بس أصعب علينا منها عليهم ربنا يوفقهم لو كنا مخلصين لله ثم للوطن
سلامي للعظيمة صافي ناز كاظم وقوللها عرفتي تربي أنا فخورة جدا بكل شباب مصر الأحرار

استراحة مصرية said...

منك لله يانوارة يابنت نجم
كل ما أقرالك حاجة أو أسمعك فى برنامج أحس انى صغرت ييجى 30 سنة
أقولك على حاجة ؟أكيد انتى عارفة اننا لما بنكون مبسوطين أوى من حد بنشتمه على سبيل التقدير ..دى طبعا عادة بيتهيألى مصرية
يعنى لو فيه واد عاجبنى أوى أقوم أقول ده واد ابن كلب ملوش حل
اللى عايز أقوله انى فعلا عايز بجد أمدحك أوى أوى
بس

Sgheita said...

amn el dawlah fi 6th of october is being burned call the army enshallah te7amelloh 3arabiyah nos na2l legan sha3biyah terou7o te7moh leih el geish manasharsh quwat men embare7 around all maqarat amn el dawlah

Reham Nasser said...

I see that this could be a very good idea :)

د. هانى احمد said...

ياجماعه الثوار... هو ليه مجلس الجيش فضل ساكت لحد امن الدوله لما حرق ملفاته.. ليه ليه..ليه ساب شفيق كل الفترة دى ومجرد لما اتشال .. هب كرسى فى الكلوب وحريقه فى كل مبانى امن الدوله...لازم حد يقولهم ليه ليه؟؟ هو فى جزء منهم عايز يغطى على بلاوى النظام الحرامى البائد؟؟؟
مش عارف ليه لاعب فى عبى الفار

Ibrahim said...

بدل اللفة الطويلة دي
الأفضل ناخد برأي المخضرم البرادعي
تحالف يحصل علي الأغبية
بس يا ريت القوي كلها تتفق علي مرشح واحد و نقف كلنا وراه
علي أرضية مشتركة من المطالب
يا ريت تناقشي معاهم الفكرة دي
بس يا رب ميشتغلوش فردي ده أكيد هيكون في صالح أحمد شفيق أو عمر سليمان أو عمرو موسي