Wednesday, 30 March 2011

البلاوي اللي ورا عمر سليمان... وكمان سيف اليزل مرشح نفسه؟

نوووووووووووووووووووووووووو غيان دو غياااااااااااااااااااان
احمد موسى كتب مقال يرشح عمر سليمان، وزي ما احنا عارفين احمد موسى من زمان كان بيقرا الغيب، لكن احنا مش حنعتبره بيقرا الغيب، حنعتبره بيقول رايه وحنقول له ما تقولش رايك تاني.. بمنتهى الديمقراطية 
مصادفة بقى ان سامح سيف اليزل عايز يرشح نفسه.. هو عموما مصدر الخبر هي اليوم السائع، وزي ما احنا عارفين، اليوم السائع بتعبر عن رأيها بالظبط زي ما احمد موسى بيعبر عن رايه لانهم الاتنين بيقروا من نفس البلورة السحرية
كلا البطة... كله الا عمر سليمان، اهي دي بقى ممكن اموت فيها موتا
اولا: مافيش حد في الدنيا يرشح واحد كان في المخابرات لرئاسة الجمانهورية... ابتا ابتا ابتاااااا، بتوع المخابرات دول بيعيشوا ويموتوا وما بنعرفش ولاءهم الحقيقي كان لمين، مافيش الا جمعة الشوان بس اللي اتأكدنا من ولائه، وده بسبب انه اتبهدل، لو كان عاش عيشة كويسة كنا فضلنا شاكين فيه، ما تقوليش رأفت الهجان، رأفت الهجان اسرائيل بتقول عليه عميل مزدوج، واحنا بنقول بطل قومي، اسرائيل بتكدب كتير، بس احنا كدابين برضه، وما بين الكدابين تضيع الحقائق، انا طبعا مش عايزة احطم لكم الخيالات اللي بناها صالح مرسي، كفاية اللي عمله فينا عمر سليمان بعد "باط هوين.. براذر موسليمهود" وخلانا نقطع كل روايات رجل المستحيل اللي قريناها، ومش باقول ان رأفت الهجان مش وطني، بس فيه احتمال تسعين في المية يبقى وطني، واحتمال عشرة في المية يبقى مش وطني، فهو مثلا ما اتبهدلش زي جمعة الشوان، هو كان مزروع في اسرائيل وقت النكسة، والنكسة حصلت بخيانة، قد تكون الخيانة مش منه، وقد يكون ما قصرش وبعت التقارير كلها وهم اللي قصروا او خانوا او اي حاجة، الخلاصة، احنا كنا زارعين جاسوس في مكان استراتيجي واتهزمنا برضه، وعمرنا ما حنعرف السبب الحقيقي لهزيمتنا، عندك مثلا اشرف مروان، اسرائيل بتقول عليه عميل مزدوج، ومبارك، اللي هو حبيب اسرائيل بالاساس، بيقول عليه بطل قومي، وما نعرفش كان يقصد أنهي قوم بالظبط، لأن فيه احتمال كبير يبقى مبارك معتبر ان اسرائيل هم قومه
احنا مالناش دعوة يا عم برمز مخابراتي يبقى رئيس جمهورية.. احنا مالنا احنا، ثم ايه دخل رئاسة الجمهورية بشغل المخابرات، رئاسة الجمهورية شغل سياسة، المخابرات شغل مخابرات، لا ينفع الرئيس يعمل شغل المخابرات، ولا ينفع المخابرات يعمل شغل الرئيس، اذا كنا مش عايزين ظابط جيش للرئاسة، مع ان ظابط الجيش ده بقى نسبة الشك في ولائه قليلة قوي خصوصا لو كان قتل واتقتل.. احنا عايزين رئيس يفهم في القانون والسياسة وحقوق الانسان ويبقى له ولاء واضح ومعروف يتحاسب عليه
وعلى رأي غادة صاحبتي: حد يجيب كبير البصاصين رئيس؟ 
ثانيا: ايه الحكاية بالظبط؟ ليه الاصرار على ان حد من المخابرات العامة يبقى رئيس.. لو كانت النية سليمة كانوا اقترحوا مخابرات عسكرية لأن دول ولاءهم للوطن ومالهمش تعاون مع اسرائيل، انما المخابرات العامة نضمنها منين وهم لهم تاريخ في التعاون مع السي اي ايه؟ 
ونقعد نخمن ليه؟
ادي ولاء عمر سليمان اهو.. للسي آي إيه
واحد ضحك على الامريكان عشان يحتلوا العراق، والاكتر من كده انه طلب من الاسرائيليين انهم يحتلوا سيناء عشان يخلصوه من التعاون اللي بين بدو سيناء وبين حماس، وكان بيتفق مع الامريكان سنة 2007 على حرب غزة سنة 2009/ 2010 ويقول لهم ما توقفوش اطلاق النار الا لما انا اقولكم عشان عندي مصادر جوة حتقول لي وقت ما حماس سلاحها يخلص حاقولكم توقفوا الضرب، وقال للامريكان انا زارع خلايا سرية جوة ايران عشان تعمل قلاقل وبلبلة وقت ما تحبوا تعملوا الانقلاب على احمدي نجاد قولوا لي عشان اديهم الاشارة، وهو اللي ضخ غاز مسمم في الانفاق ضد الفلسطينيين، وهو اللي عذب الناس اللي امريكا جابتهم من افغانستان ونزلتهم ترانزيت هنا... 
واللي مش مصدقني اهو
ايه ايه ايه يا جدعان؟ احنا ناقصين رعب؟ احمد موسى يطلع يقول انا بارشح عمر سليمان للرئاسة وسامح سيف اليزل اللي كان بيشتغل مع عمر سليمان يقول انا حاترشح للرئاسة؟ وبعدين سامح اليزل ده كان بيهرتل في الكلام ويقول: احنا زارعين جواسيس في اسرائيل لكنهم اكثر حنكة من جواسيس اسرائيل عندنا، عشان كده احنا بنقفش جواسيسهم وهم مش بيقفشوا جواسيسنا
ايه الهلاوس دي؟ ايران قبضت على عملاء للمخابرات المصرية عندها واسرائيل لأ؟ يعني انت عايز تقنعني ان احنا اشطر من اسرائيل وان ايران اشطر منا؟ امال اسرائيل نجحت النجاحات دي كلها ازاي؟ ببركة دعا الوالدين؟ وازاي المخابرات الايراني اشطر منا يعني؟ دي تبقى مصيبة.. ولو هم فالحين كده كانوا عرفوا يسيطروا على القلاقل اللي حصلت ولسه بتحصل عندهم، لا هم مش اشطر منا لا
وبعدين احنا كنا ناسيين موضوع عمر سليمان ده لحد ما هيج لنا موضوع كاميليا تاني
هو ايه اللي صحاه؟ ماحدش فتح موضوع كاميليا ده غيره، العادلي في السجن، وهو اللي برة، يبقى هو اللي عمل كده، ماهم اللي كانوا ماسكين الملف ده مع بعض، ومعاهم دراعات صفوت وسرور وعزمي
طب ايه اللي يخليك انت تضايقنا احنا دلوقت؟ احنا مش كنا سايبينك في حالك وماسكين في خناق صفوت وعزمي وسرور؟ لازم تفكرنا انك كنت العقل المدبر؟ 
افففففففف
طاااب خلاص..
دلوقت المطلب بقى من الاخوة الفلسطينيين والعراقيين انهم يرفعوا قضية على عمر سليمان
احنا هنا نرفع لهم القضية لو عايزين والف محامي سداد، عذبهم واتسبب في احتلال بلادهم وزرع جواسيس وسطهم اتسببت في الاغتيالات وخرب بيتهم.. اتفضلوا مصر انت في بيتك واحنا ضيوف، كلموا المحامين عندنا هنا، وهاتوا الشهود والمصابين، او صور القتلى، والمستندات اللي عندكم واحنا نظبطكم هنا
ووالله بقى لو فضلوا عندنا يتباطئوا زي ما بيتباطئوا في محاكمة مبارك واسرته والثلاثي المرح يبقى خير وبركة ومصلحة
ارفعوا قضية دولية واحنا معاكم.. ده مجرم حرب اساسا، وساعتها بقى يرفع معاكم افغان وباكستانيين وليبيين وسعوديين ويمنيين والكونيات كلها لها تار عند عمر سليمان وحتبقى فضيحة
اااااه.. يبقى نلايمها بقى كده، واحنا نغسل عارنا بايدنا بدل ما الفضيحة تبقى بجلاجل
والفلسطينيين بالتحديد ملزومين يساعدونا.... والا حنعذبهم، وانتوا جربتوا تعذيبنا بقى
وبعدين هي التوقيعات الالكترونية نامت ليه؟ ها؟ نامت ليه؟ لما دول بس اللي وقعوا امال مين اللي حينزل الجمعة؟ ماحدش حينزل ولا ايه؟
عموما انا حانزل، بصراحة انا مش حانزل عشان مقتنعة، انا حاقول اللي في قلبي كله، انا مش مقتنعة بنزلة الجمعة دي، بس انا متعودة ما اسيبش الناس حتى لو كنت مش مقتنعة، يوم ما انضربنا عند مجلس الوزرا ما كنتش مقتنعة بالبيات، لا انا ولا مالك مصطفى، بس احنا متعودين نمشي اخر ناس، ولو الناس قاعدة احنا بنقعد حتى لو مش مبسوطين من اللي هم بيعملوه، او انا اتعودت كده شخصيا، ولو الناس نازلة بانزل حتى لو انا مش مقتنعة، زي ما نزلت ما سبيرو في وقفة تطهير الاعلام وانا عارفة ان الوقفة دي لا حتودي ولا حتجيب لأن اصلا طول ما صفوت موجود برة الاعلام مش حينضف والحل مش في وقفة قدام ماسبيرو، بس نزلت عشان اتعودت امشي ورا الناس منين ما يروحوا حتى لو شايفاهم غلطانين.. ناسي.. حاعمل ايه طيب؟ حارميهم؟ 
بس دي اخر مرة بقى انزل وانا مش مقتنعة، واخر مرة بقى ابقى دلدولة، والله لو طلعت غلطانة بافرح، ومش حاعرف اني غلطانة الا لو الجمعة كانت بعدد كويس وفيها مطالب واضحة وفيها سيطرة على المندسين: 
- لو العدد قليل مش حانزل تاني وده يبقى اثبات ان التظاهر ما بقاش وسيلة مظبوطة، وحاكمل في شكاوى الباز افندي دي.. انا مخي بيقول لي ان التوقيعات دي صح ومظبوطة، وكل واحد ومخه بقى
- لو حد جاب سيرة المشير بأي حاجة وحشة حاخد بعضي وامشي فورا، وعادي يعني لو اتعمل فيهم حاجة مش حازعل عليهم، ولا حتى حاجيب سيرتهم.. بس.. هه، شتيمة المشير وقلة الادب عليه ده شغل مخابرات امريكاني واسرائيلي، لأن اصلا ماحدش امريكاني ولا اسرائيلي طايق المشير حاليا دلوقت.. ولا قبل كده، ولا عمرهم حبوه ابدا
مينا قال لي انهم لما اقتحموا المدرسة بالدبابة الامريكية فامريكا بقى طلعت تتكلم معانا زي ما كانت متعودة تتكلم مع المخلوع بصيغة الامر وقالت: مش مسموح لمصر تستخدم الدبابة الامريكية في اقتحام اهداف مدنية
راح الجيش المصري راكن الدبابة الامريكي وركب الدبابة الروسي، راحت روسيا باعتة جواب شكر رسمي لمصر - دي مصر طلعت مزة يا جدعااااااااااااااان والشباب عليها كده كده كده، امال المخلوع كان مفقدنا ثقتنا في نفسنا ليه؟ - فأول ما روسيا عملت كده هيلاري جات على ملا وشها تقول لهم انتوا زعلانين من دبابتنا ليه؟
وجيتس وزير الدفاع الامريكي مخنوق اخر حاجة من الجيش ومن المشير.. وانا مبسوطة ان المشير بيعمل لنا كرامة، اسواني بقى وبرج العقرب ومش بيقبل علينا اهانة، وهم مش مبسوطين ان عنده كرامة
انا كان عندي شكوك من غير مصادر ان الحملة على المشير بالتحديد وراها مخابرات امريكية واسرائيلية لأني قارية وثائق ويكيليكس وعارفة انهم بيكرهوه
وبلال فضل اكد لي كل شكوكي وقال لي ان عنده معلومات مؤكدة مافيهاش نسبة شك نص في المليون بالموضوع ده، وبلال هو الوحيد اللي مش باسأله على مصادره لأنه مش بيكدب 
المهم.. انا نازلة مغصوبة يوم الجمعة.. يبقى توقعوا مغصوبين على البلاغ انتوا كمان
وبهذه المناسبة السعيدة احب اعمل فضيحة بجلاجل لصفحة خالد سعيد، وايفينت محاكمة عزمي وسرور والشريف، وبقية المدونين في كافة انحاء البسيطة، وللجمعية الوطنية للتغيير، وللأخوان المسلمين، وللسلفيين، ولنشطاء الكنيسة، ولقناة الجزيرة، عشان مطنشين آخر حاجة على موضوع التوقيعات على البلاغ للنائب العام لأسباب مجهولة، او معلومة
البلاغ ده مش بلاغ "نوارة" والحملة دي مش حملة "نوارة" ومافيش اي مجال للنفسنة البتة، ومافيش حد في الدنيا يسيب تلاتة مجرمين برة في الشارع عشان منفسن على بني ادمة، ده يبقى انسان مريض نفسيا فعلا، طب بعض القضاة نفسنوا على لجنة تعديل الدستور، كمان الثوار عندهم نفس الامراض؟
البلاغ بتاع هشام مبارك للقانون، واللي كاتبه مالك عدلي والفكرة فكرة علاء سيف، وانا مجرد مروجة للموضوع وماليش اي افضال فيه ده اولا
ثانيا، ما بلاش جر الناعم مع الحيات والعقارب.. الواحد يجر ناعم مع حد يكون صاحبنا وحبيبنا بس هو ما بيعرفش يعبر عن مشاعره ناحيتنا كويس، اللي هو الجيش، عشان مشاكلنا مع الجيش كلها لها علاقة بترتيب الاولويات وفرق السرعات، هم اولوياتهم الامن القومي وعجلة الاقتصاد واحنا بنقولهم ينفع الواحد يعمل الاتنين مع بعض وفي نفس الوقت يحسسنا ان فيه ثورة كده بشوية محاكمات على شوية اصلاحات سياسية، امن قومي وديمقراطية في ذات نفس الوقت، لكن ليه يا اخوان ويا سلفيين ويا نشطاء الكنيسة ويا جزيرة تجروا ناعم مع الثلاثي المرح وعمر سليمان؟ ليه؟ ليه؟ انتوا مش عارفين تاريخهم الطويل في انهم يبهدلوكوا؟ مش عارفين ان دول لو شموا نفسهم حيشخرموكوا ويخلوكوا عبرة لمن يعتبر ومن لا يعتبر؟ ليه الواحد يرتكب حماقات كده، ويخبط في اللي مش مفروض يخبط فيه لأن ده اللي قادر عليه مع انكوا عارفين انه حبيب مش عدو، وتسحبوا لطيف وظريف مع اللي مفروض تخبطوا فيه بكل قوتكم لأنكم عارفين ان دول عدو مش حبيب؟ ليه كده؟ ليه الانتهازية دي؟ ليه؟ ليه؟ ليه؟ 
طب الانتهازية دي حتؤدي ان كلكم.. اسفة.. كلنا حنموت، بس انا مش هاممني اموت، انتوا اللي هاممكم تعيشوا وتحصلوا مكاسب عمركم ما حتشموها لو استمريتوا بطريقتكم دي، حنموت كلنا، حنموت
لا مش مجازا.. فعليا، دول لو شموا نفسهم حنموت كلنا، وانا ملاحظة انهم بيشموا نفسهم، وملاحظة ان عمر سليمان صاحي وبيلعب وكان بيلعب من تحت لتحت وابتدا يورينا صباعه من ورا الستارة

اديني اهو خلصت ضميري من ربنا.. انا لا باعمل صفقات، ولا باخد وعود، ولا حيبقى لي مقعد ولا منصب حتى رئيسة مراجيح مولد النبي.. ها؟ واخد لي بالك يابو الكباتن؟ بس ولا ابو كباتن واحد حيشوف وعد من الوعود دي لو شلل الاطفال والثلاثي تمكنوا من البلد

ودي صفحة الفيس بوك
ودي النمرة مالك عدلي
0101044264
ودي النمر في المحافظات


اللي بيجمع توقيعات في اسيوط


0117252779




العاشر من رمضان


01517934676






للي بيجمع توقيعات في اسوان




0122375490




للي بيجمع في دمياط يتصل برقم




0111179793




اللي بيجمع توقيعات في الاسماعيلية يتصل على




0122526411




اللي بيجمع توقيعات في طنطا يتصل على




0124544946




واللي بيجمع توقيعات في اسكندرية يتصل على




0111860593




اللي عايز يوقع في سوهاج يتصل على




0146075050




اللي بيجمع توقيعات في بورسعيد




0120522209




اللي بيجمع توقيعات في المنصورة




0101176127




اللي بيجمع توقيعات في المنوفية




0171009042




للي بيجمعوا توقيعات في الفيوم




0185020552




لارسال مجموعات التوقيعات داخل او خارج مصر عبر البريد الالكتروني




fegypt20@yahoo.com




الميل ده للي بيجمع توقيعات كتير وياخدها سكان ويبعتها بالميل، ما تبعتليش توقيعك لوحدك، لو توقيعك لوحدك يبقى حطه على التوقيع الالكتروني




وللارسال بالبريد او التسليم يدا بيد




1 ش سوق التوفيقية مركز هشام مبارك



ما تعصبونيش بقى... عمر سليمان رجع يقب براسه تاني، اهو ده اللي كان ناقص بقى

48 comments:

محمد نبيل said...

هو احنا كنا بنعمل ثورة عشان نبدل عميل بعميل، لا يمكن موضوع زى دة حانسمح انه يحصل بعون الله.

yasso.97 said...

بعد الثوره ما هديت اكتشفت ان فيه ناس زيك بتشتغل علشان البلد تبقي كويسه و لمصلحه البلد و فيه ناس مع اول وعود او اول ..... جريت علي طول علي مصلحتهم الشخصيه ، ده رأي الشخصي الله اعلم صح ولا غلط بس اللي انا متأكده منه انك بتحبي مصر و بتعملي لمصلحه البلد دي و ده واضح من كتاباتك . لو سمحت قوليلنا رأيك في رؤساء الصحف الجداد علشان نعرف نقرأ الصحف دي تاني ولا لاه لاني مقاطعه كل الصحف القوميه من ساعه الثوره

PRIEST said...

كويس انه بيقب براسه علشان نعرف نديله بالشبشب على أم رأسه بالشبشب كالبرص ، وبعدين يا نوارة احنا زى ما بدأنا ايد واحده فى كل حاجه لازم نفضل كده ما كلنا كنا مع بعض حتى لو فيه طلبات فئويه موجوده ولازم نفضل كده علشان موزتنا مصر

Haya said...

المقال كله كووووم وإيديت بياف اللي في االأول كوووم تاني ..ونووووغااادوغياان

عسل والله يا نوارة

أرنوب said...

ليه كده؟ ليه الانتهازية دي؟ ليه؟ ليه؟ ليه؟
.....
لأنهم ليسوا على نفس المستوي الفكري والنقاء الثوري لمن أشعلوا فتيل ثورة الخامس والعشرين .. لما السلفيين فهموا الناس إن التصويت بلا في الإستفتاء كفر مكانوش على نفس المستوى .. لما المسيحيين إعتصموا عند ماسبيرو - رغم مصالحة الجيش لهم - مكانوش على نفس المستوى .. لما الإخوان إبتدوا يتكلموا في وسائل الإعلام وكأنهم وصلوا للحكم مكانوش على نفس المستوى .. لما ولما ولما .. عشان كده أنا حسي إتنبح باقول لشباب الخامس والعشرين : تجمعوا - أنتم وقوى المعارضة الشريفة - في كيان حزبي واحد قوي وإلا حتضيع ثورتنا .. والله العظيم تلاته بالله العظيم حتضيع

hosseiny shatat said...

انا كمان يانواره مش مقتنع بموضوع بكره وخاصة بعد تغيير قيادات الصحف
وبعدين لو لكي كلام مع بلال خليه يخف شويه عن الاسلاميين ويركز في حماية الثوره من الوطني وفلول امن الدوله والثلاثي عشان مش حلو ان الثوار ياكلوا في بعض

Ahmed said...

msh moqtane3 ana b l 7ob l kbear ben israel w omar soliman l2ano da shoghl mo5abarat w e7na ka nas 3adyen mosta7ell nefhamo w israel msh aghbya awy kda 3shan ybayenolna 7obhom i 3omar soliman 3al mala2 kda homa aked 3arfen enena bndawar warah brdo

MarwaGoogle said...

يا حبيبتي أنا مضيت و الله.. انتي مالك كدة قفشة علينا عمال على بطال

مش كلنا شاطرين زيك كدة
بس حاضر هقول للي أعرفهم من البرزرز
ما تزعليش كلنا مش طيقنهم و الله
مين ده اللي يجر ناعم معاهم برضه
قولي كلام غير ده

فارس بني خيبان said...

Dear Nawara,

I still need your help regarding the petition signing abroad please contact me for the details. I really need help this is my first time as a newbie "activist" (if I can live up to that title) and I really want to do something for my beloved country.

My email is ababdelhadi@gmail.com

the bu zahra said...

نوارة....عاوز أقول حاجة محشورة في زوري
أنا لاحزب وطنى ولا إخوان ولا 6 إبريل ولا ليبرالي ولا سلفي
واتجوزت يوم 26 يناير ونزلت التحرير يوم 28 وإضربت وجريت وشميت غاز ووقفت لحد شفيق مشي
قابلت إمبارح واحد من إئتلاف الثورة وناس من 6إبريل ولقيت حاجة كانت في إحساسي بس كنت بكدب نفسي: ليه شباب الثورة اللي بيعرفوا يطلعوا في الجزيرة وغيرة طلعوا علي المنابر وبيتكلموا بطريقة منابر ونسيوا الشارع والناس اللي مش فاهمة والناس اللي معندهاش نت وفيس وتويتر
طيب وبعدين!!كفاية منابر ومش بقول الشارع يعنى مظاهرات بقول توعية.. توعية
قولت إنى عندى مشروع إعلامى بداية من الفكرة لحد إيد الناس..نفضولي وفاضل إنت يانوارة يا بنت عم نجم
أخيراً ممكن تبعتيلي ع الفيس لو مهتمة

أبو هاجر said...

ست الكل مساء الخير
هذا رأي واحد محايد، لكن يحب مصر
لكن قبل ذلك لقد بدأت الكلام بأجمل أغنية لأم كلثوم فرنسا اديت بياف وهي أغنية عاطفية جدا يعني مالهاش دعوة بمتن الكلام . المهم
شوفي يا النوارة أنا دائما ألومك على نقص الخبرة كما ألومك على التسرع. كل كلمة قلتها مرينا بها صدقيني أتابع المشهد السياسي في مصر كأنني أتابع مسلسل مصري اللي نهايته معروفة بختامها يتزوج أحمد بسميحة . لكن قبل ذلك لابد من تشويق وشوية كلام ناعم يتخلله مفاجآت توحي أن أزمة قادمة يمكن تؤثر على الحب الكبير يجعل سميحة تبكي وأحمد يصبرها .نفس المشاهد و اللقطات تمر بها اللحظة السياسية في مصر .قبل المواصلة إليك هذه المعلومات رئيس المخابرات عندما و الذي كان رئيس جهاز مخابرات بومدين ثم الشاذلي بن جديد وقبل ذلك فهو مجاهد وكان ضمن جهاز مخابرات الثورة بعدما دائرة الدائرة وتنحي بعد أحداث 88 وبعد الانفتاح و التعددية أسس حزب سياسي وأراد أن يترشح للانتخابات الرئاسية .وحاول أن يجمع بعض بقايا من سرحوا من الجهاز . لكن لما بدأ يلامس الخطوط الحمراء تمت تصفيته لأن قواعد اللعبة تغيرت وسيحصل نفس الشيء عندكم لما يلامس عمر سليمان الخطوط الحمراء سيتم معالجة المسالة بنفس الطريقة لأن قواعد اللعبة تغيرت في مصر .بعد الثورة دخل لاعبون جدد ولهم قواعد جديدة والتزامات جديدة داخلية وخارجية. كما ان قواعد اللعبة الجديدة تشجع الكثير من المرشحين إلى درجة التمييع حد الابتذال وهذا ما حصل عندنا وما سيحصل عندكم .ومن تحدثت عنهم يعدون أمام القادمين كبا ر القوم . و النهاية معروفة ،و الحلقة الأخيرة معروفة ورئيس مصر القادم و الله العظيم يا النوارة معروف من الآن ،وهو واضع في بطنو بطيخة صيفي . يا النوارة، يا زغرودة الزمن الجميل ، الديمقراطية ليست صحن كشري أنت آكلته . الديمقراطية طريقها طويل وطويل وشاق و متعب لقد دفعنا 200 ألف قتيل وضحكوا علينا وطلعنا على فاشوش .أبوك قال: دور يا كلام على كيف دور بكرة تحبل سلمى وتولد نور. لكن سلمى لابد أن تمر بألأم المخاض العسير و آلام الوليدة الأعسر .
هذا آخر مقطع من أغنية إديت بياف هل أنت قد هذا الكلام

Non! Rien de rien
Non! Je ne regrette rien
Car ma vie, car mes joies
Aujourd’hui, ça commence avec toi

Mohamed hany said...

أحمد موسى ده مخبر ، هى الناس دى لسه موجوده

Karim Abdel-Moniem said...

عزيزتي نوارة
دي أول مرة أكتبلك
أنا إسمي كريم عرفة ومن القراء لكتاباتك ومن المحبين جداً لإسلوبك
ولي تعليق وأتمني يكون نقاش وأتمني أن تقتنعي
ليه مش عايزة الشباب تجيب سيرة المشير؟
هو مش زي ما قلنا لا لمبارك مش برضه حقنا نقول لا للمشير؟
اليس المشير هو من يتحكم في الجيش بحكم صفته الرسمية؟
واليس الجيش هو الجهة الوحيدة الآن إللي نازله فينا ضرب ومحاكمات عسكرية لحد ما إحنا نفسنا قربنا نصدق إننا قلة مندسة وواقفين حال البلد؟
إلا يكفي هذا للمطالبة بإقالة المشير؟
ولا هو علشان أمريكا وغيرها مش عايزين المشير يبقي إحني نطلع لهم لسانا ونقولهم حانخليه ينزل فينا ضرب بالعند فيكم!!؟
لا يا نوارة مش متفق معاكي في النقطة دي
كريم عرفة

أمــانــى said...

بصى اوعى تحرقى فى دمك
يترشح ما يترشحش كده كده ماحدش هيتنخبو لان خلاص اتحرق واكيد هيروح يحرق مبارك ان شاء الله عشان حرقه
وبخصوص التوقيعات ان شاء الله شغالين فيها
وكمان هننزل الجمعة فى اسوان
ومش هنسيب حقنا مهما حصـــل ومش هنرجع تانى لورا ابــــدا

السلام عليكم said...

فى موضوع كاميليا بقى افضحى وسيحى براحتك وشعر راسنا يقف يقع ميهمكيش
منبقاش قاعديين فاهميين انها مسلمه وبيعزبوها وكمان اخدوها فى رمضان وكمان دلوقتى بيقولوا ان فى المحكمه طلع واحد بيقول انه ابو وفاء قسطنطيين وبيقول انه اسلم والكنيسه حبسته وبعديين طلع الكلام ده مش سهل بلاش الغموض اللى فيه واظن اللى حيكتم حاجه دلوقتى يبقى حرام عليه وربنا حيحاسبه

السلام عليكم said...

فى موضوع كاميليا بقى افضحى وسيحى براحتك وشعر راسنا يقف يقع ميهمكيش
منبقاش قاعديين فاهميين انها مسلمه وبيعزبوها وكمان اخدوها فى رمضان وكمان دلوقتى بيقولوا ان فى المحكمه طلع واحد بيقول انه ابو وفاء قسطنطيين وبيقول انه اسلم والكنيسه حبسته وبعديين طلع الكلام ده مش سهل بلاش الغموض اللى فيه واظن اللى حيكتم حاجه دلوقتى يبقى حرام عليه وربنا حيحاسبه

مش فاهمه said...

الأخ الفاضل ابو هاجر باستمتع جدا بمداخلاتك و للأسف ليس لك مدونه خاصه اتابعك من خلالها ياريت لو عندك فكرة من هو الرئيس القادم يبقى كتر خيرك و اهو تبقى نورتنا برضه بس بجد بقه كل الشغل اللى بيحصل لنا ده شغل مخابرات و الراجل شكله راجع راجع طول ما نوارة واقعه فى غرام الجيش بالشكل ده يبقى حانشربه بالهنا و الشفا

jess said...

معلش يا نوارة كل واحد حر يرشح نفسه هى دى الديموقراطية و حتة المخابرات دى موجودة فى كل دول العالم الأول بوتين كان رئيس الكى جى بى قبل ما يبقى رئيس و رئيس وزراء .إسرائيل نفسها بيحكمها كلهم مخابرات و السى آى إيه هى اللى بتحكم أمريكا ولا إنتى عاوزة حاجة تانية فى بلد زى مصر؟ مستهدفة من جميع الجهات...تانى حاجة اللينكات اللى انتى حاطاها لعمر سليمان مصدرها أميركانى و دة أبلغ دليل على وطنيته و كذب تلك المعلومات و بعدين هو حضرتك إيه معلوماتك على تفاصيل و زوارق المخابرات المصرية و آخر حاجة مفيش حاجة قلتيها تظهر إنه راجل مش وطنى و لا مخلص لمصر؟

gabarota2011 said...

بلاش نجرح فى اشرف مروان ,,الراجل ده اشتغل مع ثلاث رؤساء ,, جمال والسادات ومبارك ,, يعنى مستحيل التلاته يكونوا مخدوعين فيه ,,, ثانيا مين الى حذر الفريق سعد الدين الشاذلى من محاوله الاغتيال ؟؟ ثالثا ,, مين بقى الى قتل اشرف مروان نفس قتلت سعاد حسنى ؟؟ ,,, و اسرائيل اتكلمه عن عميل بابل الاسم الحركى لاشرفمروان وازاى خدعهم السنين الى فاتت دى كلها ؟؟
الكلام على يوم الجمعه ,, كان فى تحذير لينا قبل كدا للاسف الناس مفهمتهوش ,, ان كتر التظاهر بيفقد الورقه ديه قوتها فى الضغط ,, واحنا هلكنا الورقه ديه بشكل خلى الورقه ديه هزيله جدا فى الضغط والناس فى الشارع بقت بتنظر ليها على انها جزء من الملل ,, ده غير دلوقتى انا بحس بعد جمعه الرحيل كل جمعه بتختلف عن التانيه ,, يعنى فى سباق مين يسيطر على الناس ؟؟ ومين يا كل الجو ,, ده غير الى كنت بشوفه ايام الثوره قبل جمعه الرحيل ,, انا كنت فى الاول متحمس جدا انى انزل جمعه النصر وبدأ الحماس يقل تدريجيا لحد ما وصلت لأنى قاطعت النزول واكتفيت بفيس بوكبالنسبه للجيش والمشير يا جماعه ,, انا بعقلى كدا شايف ان الجيش يختلف عن اى مؤسسه تانيه فى انها ,, مؤسسه متقوقعه داخل نفسها ,, يعنى مش بيبان لينا كل حاجه عايزين نعرفها وهما بيتعملوا بالطريقه ديه ,, وده بسبب المهنه العسكريه و اسررها ,, المؤسسه... دى عباره عن خلايا وقطاعات كلهم عارفين بعضهم ,, و اكثر من واحد مركز قوه ,, يعنى الجيش يا جماعه قوته مش فى المشير ولا الفريق ولا كانى ولا مانى ,, لاء قوته فى القاده مجتمعيين كبار وصغار على هدف واحد ,, وهو حمايه مصر وامنها وحمايه الشرعيه ,, لو حاجه من الاتنين دول فقدوا من اى شخص ,, هيخلى الباقى يقف ضده ويهاجمه ,, وسعتها هنشوف انقسام فى الجيش ,, انا الى شايفه عكس كدا تماما ,, يعنى الجيش بيحاول بكل استطاعته انه يتحمل وظيفتيين واحده مدنيه والتانيه عسكريه ,, يعنى شايل البلد كلها فى وقت كل حاجه بيظه ,, الطبيعى انه ميقدرش يلم كل حاجه مره واحده ,, وده الى بيحصل فعلا ,, المجلس العسكرى علسه ضغط كبير فى انه يشوف الحدود وينقذ الاقتصاد و يحافظ على امن المواطن جوه الدوله فى وضع الشرطه بتستهبل فيه ,, وغير ده وده ويعملنا طريق نوصل بيه للديمقراطيه سريعا ,, ده كله مش عاجب الغرب وامريكاواسرائيل,, هما مرعوبين من ان واحد يجى يمسك مصر ميكنوش مستعديين ليه هما كلهم دلوقتى عايزين وقت يحضروا اورقهم ,, امريكا واسرائيل مش جاهزه دلوقتى للتعامل مع الى بيحصل فى مصر ,, فبيحولوا انهم يطولوا المده ديه على اد ما يقدروا يخلونا نقرف الجيش والجيش يقرفنا و يخلونا نقلبها مسلم ومسيحى ويخلونا نشك فى نفسنا وكل الحجات الى تخلينا مننتبهش للطريق نحيه الديمقراطيه بشكل سريع لا يخل بالاستقرار .. ده الى شايفه

jess said...

و بعدين عمر سليمان قبل ما يكون رئيس المخابرات هو كان ضابط فى الجيش المصرى و أى إهانة ليه أو تخوين أو تشكيك فى وطنيته هو تشكيك فى الجيش يا نوارة ربنا ينور طريقك

السلام عليكم said...

بصى انا دخلت عنك كركبتيلى مصارينى لما جيبتى سيره عمر سليمان وطلعت من عندك اشوف الاخبار لقيت زاهى حواس رجع تانى الاثار .......هو كان فى حاجه نسى ياخدها فرجعوه علشان يكمل والا ايه ايه زاهى حواس ده

aldarweesh.org said...

طالما ناوية تمشي أول ما المشير -ومن باب أولى الجيش- يتشتم يبقى هتمشي أول ما تروحي لأن الجمعة دي بيتحشد لها من الأول على أنها ضد الجيش، أديني قلت لك أهه

أبو هاجر said...

إلى المحترمة
مش فاهمة
وأنا أيضا استمتع بأسلوبك الهادئ و الجميل الذي يكشف عن أديبة
أو شاعرة
أما بخصوص الرئيس فما قصدته أن بنية النظام لازالت قائمة ولم يحصل فيها تغيير جذري لأن الثورة أطاحت، و لم تغير . بمعنى أطاحت بجزء من النظام لكن النواة الصلبة التي تمثل استمرار النظام لا تزال قائمة و الرئيس القادم حتما يكون برضي هذه القوى أو النواة . بجملة واحدة الرئيس القادم مطلوب منه حماية مصالحها ولو لحين. وهذا ما فهمه عمرو موسى بخبرته وذكائه وتجربته ودهائه لما قال أن الرئيس القادم يجب أن يبقى مدة واحدة كمرحلة انتقالية وهذا الكلام لم يطلقه هكذا على عواهنه إنما كان بمثابة رسالة لصناع القرار داخل النظام وهي رسالة واضحة لا تحتاج إلى اجتهاد كبير حتى تفهم
و الرسالة تقول انني قادر على حماية المصالح وتسويق المشاريع .

M.Khanom said...

عمر سليمان !! يانهار إســـود ومطين !! Mr. Tourture
أخيرا يانواره بعد ماتنبح حلقى فى كل حته ، أخيرا نشرتى حقيقة دراكولا اللى اسمه عـمـــر سليــمـــــان واللى كان نايب المخلوع واللى قال إيه كان قاعد يتحاور مع شباب الثورة !!!! يادهوتىىىىىى ياامه غطينى وصوتى ! أحمد الليبى اللى (( إنتحروووه )) فى زنزانته فى ليبيا بعد مااتضح إنه لسه عايش بالصدفة عن طريق زيارة تفقدية لإحدى المنظمات الحقوقية . شوف الروابط دى وافهم وفتح عينك لكل المحتوى .
“Omar Suleiman, the CIA’s Man in Cairo and Egypt’s Torturer-in-Chief” View Video !
http://www.democracynow.org/2011/2/11/omar_suleiman_the_cias_man_in

M.Khanom said...

Egyptian Vice-President tortured me, says Habib!!

http://www.theaustralian.com.au/news/nation/egyptian-vice-president-tortured-me-says-habib/story-e6frg6nf-1226004691814

أنا أحــــذر من تمرير هذا الرجل علينا كمرشح للرئاسة فى غفلة منا! إنشــر وحذر الناس إللى مش عارفة!

Mokhtar said...

الاخت نوارة نجم اعلم جيدا انى سوف اتهم بالعماله و الانتماء للنظام السابق و كل الكلمات التى تلقى على اى احد يختلف فى الرأى تلك الايام فتلك هى الديموقراطيه فى ايامنا هذة لا نسمع بعضنا و ان اختلفنا فى الرأى نكيل الاتهمات الى بعضنا البعض ارجو ان تتقى الله فيما تقولين و لا ترمى الناس بالباطل فهذا هو الافك بعينه و دعينى اذكرك بقول الله تعالى فى سورة النور"( إذ تلقونه بألسنتكم وتقولون بأفواهكم ما ليس لكم به علم وتحسبونه هينا وهو عند الله عظيم ( 15 ) ولولا إذ سمعتموه قلتم ما يكون لنا أن نتكلم بهذا سبحانك هذا بهتان عظيم ( 16 ) يعظكم الله أن تعودوا لمثله أبدا إن كنتم مؤمنين ( 17 ) ويبين الله لكم الآيات والله عليم حكيم ( 18 ) إن الذين يحبون أن تشيع الفاحشة في الذين آمنوا لهم عذاب أليم في الدنيا والآخرة والله يعلم وأنتم لا تعلمون ( 19 ) " اللواء عمر سليمان رجل شريف اعتقد انه لو كان حسنى محطوش فى وش المدفع و معملوش النائب كان هيبقى على قلبك زى العسل ارجو انك تعرفى وواضح انك تفتقدى للمعلومات عن اللواء عمر سليمان هو احد ابناء الجيش المصرى و احب اديكى فكرة صغيرة عن حيانه لعلك تتقى الله و لا تقولى ما لا تعلمين(تلقى تعليمه في الكلية الحربية بالقاهرة، ومن بعد ذلك تلقى تدريبا عسكريا إضافيا في الاتحاد السوفييتي السابق ودرس أيضا العلوم السياسية في جامعة القاهرة . قبل توليه إدارة المخابرات العامة عام 1993 عمل رئيساً لفرع التخطيط العام في هيئة عمليات القوات المسلحة، ثم مديراً في المخابرات العسكرية )
اذا هو احد ابناء القوات المسلحه و هو رجل مشهود له بالكفاءة و دة من داخل جهاز المخابرات لو تعرفى حد منهم اسأليهم اد ايه بيحبوا الراجل دة هو اثر السلامه و ابتعد لانه عارف و اعتقد ان لو قرأ قظفك له بالباطل مكنش هيصدق ان ممكن يجي اليوم و حد ممكن يتهمه بالخيانه زي سعادتك كدة عملتى انت ايه لبلدك نزلتيلك يومين التحرير طب مهو ياما اتعرض للخطر كظابط فى الجيش و محاوله الاغتيال اللى اتعرضلها ارجو ان تتبعى قول الله تعالى و اعتقد ان دة مش هتختلفى معاة "ايحب احدكم ان يأكل لحم اخيه ميتا فكرهتموة"
اعتقد انك مش هتنشرى تعليقى انا متأكد من دة مهو احنا كدة دلوقتى لا نعترف بالرأى الاخر و التجريح مباح

محمد نبيل said...

يا أخ

jess

ماينفعش تشكك فى كل الكتب ووثائق ويكيليكس اللى اتكلمت عن عمر سليمان وبعدين المصادر اللى اتكلمت عن عمر سليمان مش أمريكية بس وما ينفعش نشكك فى مصادر لمجرد انها أمريكية ! وخد اقرا المقال دة لأبو عمر المصرى وأظن حكايته معروفة

http://saveegyptfront.org/readers-articles/23056.html

بعدين منطقك عجيب جدا فى حكاية ان التشكيك فى عمر سليمان يبقى تشكيك فى الجيش !! ليه هو الجيش دة مابيخشوش غير الملايكة ؟! طيب ما مبارك كان ظابط جيش ونماذج سيئة كتير من الناس كانوا ظباط جيش. الجيش زى غيره من المؤسسات فيه الصالح والطالح.

nashwa said...

اغنية المرحلة الضباب لعماد عبد الحليم المؤسسة العسكرية ليست مقدسة ولا فوق المسألة لااحد كذلك مادام انغمس فى الشأن العام المجلس العسكرى هو رئيس الجمهورية الان ومتى كان رئيس الجمهورية فوق النفد
الواضح الوحيد فى هذة المعمعة تمسكنا بثورتنا

ahmed said...

المشكله مش فى عمر سليمان لانه لواترشح مش هاياخد غير خمس ست اصوات المشكله الحيره اللى احنا فيهابين المستشار البسطويسى والدكتور البرادعى انا شخصيامحتار البرادعى يجى لعلاقاته الخارجيه العديده والمستشار البسطويسى نزيه وحاسس انه هايكون عادل لكن ممكن التشتت ياثر على الاثنين فى وجودعمرو وشفيق وخلفهم مليارات الفاسدين من رجال الاعمال

eman said...

الله يفتح عليك يا نواره وانا انصحك بلاش تنزلى الجمعه وانت حره طبعا لكن زى ما وصفت اللى حصل فى وقفه ماسبيرو فى احتمال يحصل تانى وربنا يستر انا كتبت لهم النهارده على كلنا خالد سعيد انى معاهم فى طرد الفساد لكن خلوها جمعه جمع توقيعات احسن

eman said...

على صفحه الفيس بوك بتاعتك يا نواره فى واحده اسمها نشوى دائمه اثاره الناس ضد الجيش بشكل سخيف

aly said...

للمرة التانية باطلب منك توضحي ايه علاقة عمر سليمان بكاميليا!!!
فيه قضية يا بنتي مرفوعة من اكتوبر اللي فات وشغالة والسلفيين بيقفوا كل جلسة واحيانا كان يوم جمعة من غير جلسة قبل واثناء وبعد الثورة واتسحلوا واعتقلوا بسبب الوقفات دي يعني لا حد صحا موضوع كاميليا ولا حاجة هو صاحي من الاول
لو عندك معلومات قوليها يمكن تهدي الجو المتوتر عند السلفيين لكن الكلام المرسل ده مش هياكل معاهم
بالنسبة للتوقيعات اسباب عزوفهم عن التوقيع مفهومة وان كانت مش مبررة وهي انهم منفسنين ومتعكننين من الهجوم الشرس عليهم وحرب الاشاعات والتشويه عقابا لهم على نعم لتعديلات الدستور
هم حاسين بالخيانة بعد التحرير وجو تغليب مصلحة المجموع على افكار الشخص ومصلحته فجأة رجع كل واحد لافكاره وكلهم اجتمعوا على الغمز واللمز منهم زي ايام مبارك تمام
حيث أن كل واحد يشوف مصلحته وهم مضطرين يشغلوا نفسهم ببيانات تكذب نيتهم خطف البنات وحرقهم بمية النار ونفي مسؤليتهم عن هزيمتنا في جنوب افريقيا الى اخر الهبل اللي حصل
ربنا سبحانه وتعالى سترها معانا في التحرير ووحد قلوب الناس وادعوه سبحانه وتعالى يهدي نفوس وعقول اخواننا المثقفين العظام والنخبة المحترمين والاقباط اصحاب الارض اللي مضايفين المسلمين اللي طولوا في الضيافة ويلتفتوا لمصلحة البلد بدل الحرب على الاسلاميين لمحاولة اقصاؤهم ويفهموا ان ده وقت الوحدة اكتر من الاول والا هتخرب على الكل تاني

aly said...

بخصوص موضوع المشير والجيش ياريت كل الاسود اللي عايزين يولوعوها مع الجيش يقولوا بوضوح كدة مطلوب ايه على وجه التحديد؟؟
وطبعا اللي هيقترح حاجة ياريت يعفيني من الجمل الافتتاحية من قبيل اللي خايف يروح والثورة والشعب والشهدا بلاه بلاه بلاه
ويدخل في الموضوع ويقول لنا الخطة ايه من وجهة نظره

kbahey said...

يا نوارة

انا مش عايز اشوف وش اي ضابط سواء جيش او شرطة في اي موقع سياسي

يعني مش رئيس، و لا رئيس وزراء و لا محافظ و لا مدينة و لا حي و لا حكم محلي

كفاية بقى حكم العسكر دة اللي خلانا متخلفين

diaa said...

رجو من الداعين الى جمعة حماية الثوره التراجع فى قرار النزول بدافع الرضا عن تصرفات المجلس العسكرى فى الوقت الحالى بعد الاعلان الدستورى وتغير ات الصحف والقوه فى الدعوه هى هى فى القدره على الغائها لكن ان اصروا على النزول فأنا معهم

Marzouk said...

ادينى مشيت وراكى ووقعت اما نشوف اخرتها ايه، وهنزل ان شاء الله يوم الجمعة
مش بس علشان يقبضوا عاللى لسه بره، بس علشان الناس تعرف ان لسه ال ثورة فينا ومش هنسكت على حقنا وهنحقق كل المطالب لحد أقل مطلب، احنا فعلا بكدة بنحمى الثورة

أخيرا مصرية وأفتخر said...

عمر سليمان رئيس لمصر عشان يعين على كل فرد مصري مخبر يتخابر عليه ومش بعيد الزوجه تتخابر على زوجها والعكس وتبأىملوخيه بالمهلبيه ننتظر ايه من واحد كانت امريكا بتبعت له اللي مش عجبنها علشان يعذبهم في مصر عشان امريكا بلد الديموقراطيه وحقوق الانسان واحنا بلد اللي يروح ما يرجعش ربنا ياخده هو والثلاثي ومبارك وعيلته دفعه واحده انه قادر على ذلك...............

FATMA said...

سؤال يا نوار لمالك
لماذا او هل يجوز او كيف شكلها القانوني ان كل من ينتمي للحزب الوطني يرجع للمحاسبة القانونية وان ثبت شئ كان وان لم يثبت تم الفرز حتي لانشك فيهم ونعيش بامان
وسؤال لنوارة من هو حسام بدراوي

haroon said...

طيب احنا دلوقت مشغولين بتحذير الناس من عمر سليمان ومن عمرو موسي وشفيق لرئاسة الجمهورية ..لازم بالتوازي يكون فيه التفاف مننا حول شخصيتنا اللي عايزينها تمسك البلد( البسطويسي مثلا ) لانهم هيفضلوا شاغلينا بحاجات كتير جدا لغاية ما نلاقي الانتخابات الرئاسية كبست علينا ونتفاجيء بعمرو موسي أو شفيق علي كرسي الرئاسة ....وللاسف نسبة كبيرة جدا جدا من الشعب المصري تعرف عمرو موسي ومتعرفش هشام البسطويسي

haroon said...

قامت الثورة وتم الاطاحة بمبارك وابنه وتغيير الحكومة مع الابقاء علي بعض الرموز القديمة ...فقط لاغير ..حد يقدر يقوللي ايه الثورة عملت اكتر من كدة بالنسبة لتغيير النظام ؟؟؟ رؤساء الجامعات وعمداء الكليات ..المجالس المحلية ..القيادات الاعلامية ومسئولي التليفزيون ..عدم تنقية جهاز الشرطة وعدم تحملهم مسئولياتهم حتي الان ..كل ده لسة محصلش عليه اي تغيير ...بل بالعكس زاهي حواس رجع يمسك الاثار تاني وكأنه الوحيد اللي عارف الأهرامات بيروحولها ازاي ؟؟ والمصيبة الاكبر يحيي أفندي الجمل ...ده لواحده كارثة وانسان غير مريح ..رفضنا شفيق لانه اتعين عن طريق مبارك ..طب اشمعني الجمل يعني ؟؟ مش هو كان نائب لشفيق ..ويقولوله المناوي يقوللهم اقتلوه بس مقدرش اشيله ..ايه الراجل اللي لا بيحل ولا بيربط ده ؟؟ تحسوا كدة انه محطوط ومفروض عشان يخنق ف عصام شرف مش اكتر ويحجم من قراراته..

haroon said...

لازم لازم نبدأ من دلوقت الاتفاق والدعاية وتعريف الناس بالمرشح الوطني اللي شايفين انه يصلح للفترة القادمة ولازم كمان ائتلاف الثورة والمتحدثين باسمه يتفقوا علي الشخصية دي ...مفيش وقت

haroon said...

Mokhtar >>الي الأخ
نختلف مفيش مشاكل وكل واحد له وجهة نظر يجب ان يحترمها الطرف الاخر
لكن لي تعليق علي كلامك ...مبرراتك ان عمر سليمان رجل شريف موجودة ايضا في الرئيس المخلوع مبارك ..درس ف الكلية الحربيةودرس علوم عسكرية مش عارف فين وكان قائد القوات الجوية ف حرب اكتوبر ...وبعدين ايه اللي حصل ..؟؟؟ نزل بمصر الي اسفل سافلين ووصلها لمرحلة من الفساد والانحطاط الغير مسبوق علي كل المستويات ...هل لانه رجل قوات مسلحة سابق يبقي شريف ؟؟؟ طبعا لا والف لا

haroon said...

مجرد هاجس طرأ ف بالي ..حاسس أن فيه مرشحين كتير هينزلوا انتخابات الرئاسة عشان تفتيت أصوات الناس لا اكثر ولا اقل وكله ف الاخر يصب ف مصلحة واحد ليه جماهيرية عند عامة الشعب والبسطاء زي عمرو موسي أو واحد بعض الناس للاسف شايفة انه اتظلم زي أحمد شفيق ..بينما غالبية الشعب المصري الطيب لسة ميعرفش صباحي أو البسطويسي..أو حد تاني غير موسي وشفيق

nashwa said...

اذا كان لدينا عشر مرشحين حتى الان وكلهم لايعرفون اولويات الشعب والنخب تتعالى على اهاليناوالجيش (رغم السخافة)لايملك الرؤبة للخروج من المرحلة الانتقاليةوالهجمة(الثورة) المضادة شرسة ومازلت تملك لكثيرمن الاوراق يبقى النزول بكرة هوانقاذنا وهو ملجأ لمن لا ملحأ له

tom_lion said...

عشان تبقي كملت شيلنا فرعون جالنا خادم سليمان الغير حكيم طبعا احنا لا عاوزين عسكر ولا خفافيش تاني ياويلنا يا مصر هو من هم لهم

math.2011 said...

ايه الحلاوة ديه

Omar said...

والله انتي عسل يا نواره

hayat ank said...

من ميدان التحريراحمد عادل حسن عبد المجيد طالب فى الجامعه العماليه مريض بالاستسقاء فى المخ وارتشاح بالعصب البصرى وارتشاح بالعصب البصرى وتم تركيب دعامه وانبوبه من المخ الى المعده تعتقدوا هذا الطالب ممكن ان يكون بلطجى او قادر على فعل اى شئ عدوانى الاطباء نصحوه بعدم الانفعال وهو غير قادر حتى على الجرى تم التعامل مع هذا الطالب من جهه الجيش والقبض عليه يوم 9مارس من قبل الجيش وحبسه فى السجن الحربى وتعزيبه وكهربته وسحله وضربه وتعزيبه بابشع الوسائل لدرجه انه فقد السيطره على نفسه بالتبول على نفسه وهو الى الان محبوس لدى الجيش ليس هذا الطالب فقط لكن لدى الجيش العديد والعديد من الحالات المشابهه لخيره شباب الوطن ممن ليس ل
يهم اى اتجاه سياسى لاكنهم تصادف وجودهم بشكل او باخر فى ميدان التحريروكانت بلامس العديد من الامهات الاتى ناشدن المجلس العسكرى بلافراج عن هولاء الشباب ايعقل ان يكون بلطجيه النظام ورؤس الفساد خارج السجون يعيثون فسادا فى البلد تؤهيب وقتل وفتن واللصوص ومهندسين عمليه الاربعاء الاسود طلقاء ويحبسون الطلبه الابرياء فى السجون مع ممارسه كافه الاشكلا الوحشيه فى التعزيب والتنكيل ممن تصادف وجودهم بشكل او باخر فى الميدان