انا حاتكلم في التعديلات الدستورية عشان مبسوطة

بس الاول اقول لكم اللي حصل مع وزير التعليم العالي

1- قريت له كل اللي انتوا كتبتوه في التعليقات على المدونة هنا وعرضت عليه كل اللي قلتوه وهو كتب نقط، وحتى من ضمن الكلام اللي قلتهوله: محتاجين معايير للنجاح في الدراسات العليا وواحد كاتب بين قوسين معايير اخرى غير "انت عايز تنجح من اول مرة؟" فضحك وقال لي ده في طب اللي كتب لك كده ده.. انا عارف. وفعلا كاتب التعليق في طب الزقازيق

2- هو في اغلب الاجتماع كان بيسمع اكتر من اللي حاضرين واللي حاضرين كانوا معظمهم دكاترة جامعة، وكان فيه واحد من ستة ابريل خريج السنة اللي فاتت واتكلم وعرض برضه مطالب كتير كويسة والوزير كتب نقط، والوزير قال انا في الاجتماع ده مش حاتكلم قد ما اسمع..

3- قرر اجتماع تاني يشكل فيه لجنة منتخبة من الحضور عشان يقولوا توصيات اعادة الهيكلة 

4- كان فيه حضور كتير بس ابرز الناس د. عواطف عبد الرحمن، د. حسن نافعة، د. محمد ابو الغار، واساتذة كتير، منهم دكتور في طب اسكندرية وقال كلام كتير حلو قوي، طبعا فيه دكاترة زعلانين عشان الطلبة الظاهر هتفوا ضدهم ولا ايه، المهم يعني لو اتشكلت لجنة من الحضور ان شاء الله تبقى كويسة لأن معظم الحضور كانوا بيقولوا كلام كويس واقتراحات كويسة

5- فيه اقتراحات قالها الوزير كحل عاجل للتوتر في الجامعة لحين اتمام اعادة الهيكلة وهي

أ - حيطلب من كل رؤساء الجامعات والعمداء ورؤساء الاقسام تقديم استقالاتهم ثم اجراء انتخابات تكون بشكل ودي لحين اصدار لائحة لانتخاب رؤساء الجامعات والعمداء ورؤساء الاقسام، وقال ان ده لازم يتم انجازه في خلال شهرين ونص

ب- إجراء انتخابات اتحاد الطلاب

ج- نشر ميزانية الجامعات في الصحف، وقال انه مش حيقدر يعمل حد ادنى للاجور في الجامعة بشكل فوري، لكن يقدر بشكل فوري يعمل حد اقصى للمكافأة بحيث ما يحصلش نهب للميزانية

وقال ان دي حلول آنية، لحين إصدار قوانين ولوائح جديدة

------------

العاملين في التلفزيون عاملين اعتصام لاقالة القيادات الفاسدة.. والمسيحيين اللي قدام ماسبيرو قرروا تعليق الاعتصام حتى يوم 25 مارس 

-------

نرجع بقى نتكلم عن التعديلات الدستورية.. اصلي مبسوطة قوي اننا بنتكلم وكدهون بقى

اولا، خلاص بقى، انقلوا المحطة، اقصد محطة العمالة والثورة المضادة والكلام ده، ده استفتاء، يعني لا اللي بيقول نعم فلول، ولا اللي بيقول لا اجندا... بس اللي بيقول نقاطع ده مختل عقليا، ماحدش يزعله، اول ما حد يقول لك نقاطع خده في عربيتك لأقرب مصحة امراض عقلية، او ركبه تاكسي وحاسب له وشوش السواق: الخانكة يا اسطى.. بس ما تزعلوش وانتوا في السكة

نقاطع ايه يا عم حرام عليك... اول مرة في حياتنا حيبقى لنا كلمة وحتتسمع.. انت مفتري ليه؟ بقى اليوم اللي احنا حنصوت فيه بالرقم القومي وبمراقبة قضاء ومن غير تزوير تقول لنا نقاطع؟ نقاطع ليه؟ 

ماحدش يقاطع الاستفتاء.. احنا كلنا حنروح، سواء كنت فلول ولا اجندا كله حيروح..

هييييه.. حنصوت.. حنصوت يا عيال... والله كل ما افتكر اني حادلي بصوتي وحيتحسب افتكر سعيد صالح في العيال كبرت وهو بيقول لاخته: حتتجوزي :))

وعشان كده انا مش عايزاهم يأجلوا الاستفتاء

يأجلوه ليه؟ ما يسيبونا نصوت وننبسط.. يقولك اصل ما لحقناش.. ما لحقناش ايه؟

ما احنا بنتكلم مع بعضينا اهو

بص بقى يا سيدي

اول حاجة: لو النتيجة طلعت نعم.. مافيش مبارك آخر حييجي، ومافيش كارثة، ومافيش تسليم للبلد، ومافيش اجهاض للثورة، ولو النتيجة طلعت لا مافيش امريكان حيحتلوا البلد، ومافيش اسرائيل حتجيب  عميل لها يحكمنا، ومافيش تقسيم لمصر

عشان نبقى واضحين يعني

مافيش كارثة حتحصل من نتيجة الاستفتاء ده، ومافيش حد من اللي بيقول لا او نعم متآمرين على البلد.. خلاص، احنا خلصنا المحطة دي وقلبنا على محطة نجوم اف ام.. 

حنتكلم بقى مع بعض ونرغي.. ومالكش دعوة مين بيقول ايه؟ لك دعوة مخك بيقولك ايه؟ انا شخصيا مبسوطة ان فهمي هويدي متفق معايا في الرأي، بس لو كان مختلف معايا في الرأي ما كنتش حاغير رأيي، وجلال امين قال النتيجتين مش كارثة يعني، سواء نعم او لا، كله شغال، ذلك لأن عمو عزيز مات يا علية.. مات.. وتقدري تنقي يحيى شاهين او احمد رمزي زي ما تحبي.. عمو عزيز مش راجع تاني، صدقيني يا علية، عمو عزيز مش راجع

وحابتدي بمنطق اللي عايز يقول لا.. عشان انا عايزة اقول نعم فحاقول اللي مختلف معايا في الرأي بيقول ايه عشان ارد عليه

(يااا.. مختلف معايا في الرأي.. واستفتاء.. وتصويت.. احنا عيارنا فلت يا عيال) 

اللي بيقول لأ:

- بيقول احنا من حقنا دستور جديد.. ايه اللي يخلينا ناخد دستور مرقع؟ 

- ننتخب لجنة تأسيسية تعمل لنا دستور جديد

- واذا كنتوا خايفين من الجيش، نعمل مجلس رئاسي، والجيش يسلم له السلطات

- وبعد ما نعمل دستور جديد نعمل انتخابات رئاسية وبعدها برلمانية

ده اللي انا جمعته من اللي بيقولوا نقول لا

طيب

اولا فيه بعض الكلام الغلط اللي اتقال، وده سببه ان مش كل الناس قانونيين فممكن يكونوا فهموا غلط، بس أنا سألت قانونيين

المادة 189 مكرر مادة ملزمة، ولازم تتقري بالرجوع للمادة 189، يعني المادة 189 مكرر لما بتقول لكل من رئيس الجمهورية، المقصود بها، انه يرجع للمنهج المتبع في تشكيل اللجنة التأسيسية المكتوب في المادة 189 مش مقصود بها انه على كيفه يعمل او ما يعملش، لأن المادة تؤقت سنة و15 يوم من اصدار التعديلات، وهي مادة ملزمة، بإجماع القانونيين، اللي بيدعي انها مادة مش ملزمة دول الناس اللي مش قانونية واتلخبطت، لكن كل القانونيين بما فيهم اللي حيقول لا عارف انها مادة ملزمة

بالنسبة للمادة 190 دي برضه مافيش حد قانوني اتكلم فيها لأن القانونيين عارفين انها مادة معطلة اتعملت مجاملة للسادات وسقطت بانتهاء المدة الاولى للسادات، وما اتشالتش لأنك عشان تشيل مادة من الدستور عايزة لها غلبة، وبسبب معرفة اللجنة بأن المادة معطلة ما وضحتش النقطة دي، لكن اهم وضحوها وانا سألت فيها

نيجي بقى للرد على اللي بيقول لا، وانا ليه حاقول نعم، مع الوضع في الاعتبار ان اللي بيقول لا مش اجندا، وان النتيجة لو طلعت لا مش كارثة على البلد.. هي كارثة عليا انا لوحدي لأني مش عايزة المجلس العسكري يطول في الحكم

الكلام على ان الجيش ممكن يطمع في الحكم، بصراحة انا كنت متخوفة الاول، بس كل يوم بالاقي انهم مش طايقينا ومش طايقين يقعدوا في البلد ولا عايزين يبصوا في خلقتنا اساسا، فده مطمئن انهم فعلا مش طمعانين في الحكم، هم عايزين يشوفوا شغلهم وحاسين اننا دبسناهم واتخنقوا آخر حاجة منا

- اولا: الدستور الجديد حيتعمل وانا شايفة ان في كل الاحوال احنا حندي وقت

يا ندي وقت نقعد المجلس العسكري على ما نخلص الدستور الجديد

يا ندي وقت نمشي المجلس ونعمل انتخابات وبعدها نعمل الدستور الجديد على مهلنا

انا افضل الحياة المدنية في كل الاحوال.. مش بس عشان مش عايزة شرطة عسكرية ولا احكام عسكرية، عشان ما احبش اربط ناس جنبي وهم مش طايقيني وملويين في وشي، خلاص.. الجيش ضرب بوز في الشارع وما بقاش يضحك في وشنا، وانا كمصرية اصيلة، احب الناس تلاقيني ولا تغديني

الدستور الجديد حيتعمل حيتعمل... ما نمشي الناس ونقعد احنا مع بعض مع برلمان منتخب ورئيس منتخب وشرطة مضروبة علقة سخنة مش حتنساها ابدا وحتقعد شوية كتير متربية 

لأن الدستور الجديد محتاج مناقشات ومساجلات واخد وعطا، وممكن تكبر في دماغ حد، ينزل يعمل مظاهرة، ولا اعتصام، ييجي ينزل في المظاهرة واد مطول شعره، يستفز الجيش، ياخدوه يقدموه لمحكمة عسكرية، طب وليه النكد ده؟ ما تخلي اللي مطول شعره ينزل واللي حالق شعره يروح يشوف شغله في الصحرا

يعني مثلا.. المادة التانية مش حتتغير، حتنزل زي ما هي وحتفضل.. انا باواجهكم بالحقيقة عشان ماحدش يتشنج لي

ليه بقى؟ عشان هي دي الديمقراطية، الدستور الجديد يختلف عن الدستور المؤقت، لأنه حيتصوت عليه مادة مادة، والمادة دي لو نزلت او نزل خيار الغاءها او حتى تعديلها، الناس حتصوت لصالح شكلها كده زي ما هي

بس برضه من حق اللي معترضين عليها انهم يعبروا عن نفسهم، ولو عايزين يعملوا مظاهرة يعملوا، ولو عايزين يعتصموا يعتصموا، ولو عايزين يرغوا يرغوا.. صح؟ 

طب ده بالذمة ينفع في وجود الشرطة العسكرية يا ناس؟ يعني افرض نزلوا يتظاهروا، قام نازل لهم ناس تانية يتظاهروا مع المادة، ينفع في الجو ده، وفي السخونة دي، والشرطة العسكرية قاعدة، والاحكام العرفية، ومحاكم عسكرية، الناس تعمل العملة دي؟

المادة التانية ما تتكشفش على جيش... عيب

مثلا خمسين في المية عمال وفلاحين

ماهي دي برضه عايزة نقاش وحوار ومساجلات وخناقات الى اخره، والناس حتسخن وتنزل تتظاهر، مع وضد

طب هو احنا استعبدنا الجيش يا جدعان؟ ده جزاته انه عمل لنا اللي احنا عايزينه؟ حنفضل حاجزينه جنبنا ونعذب فيه ويعذب فينا؟ 

ما تسيبوه يخلص الست شهور بتوعه، وبعدها يمشي واحنا بقى نقعد نعمل اللي احنا عايزينه ونتكلم ونرغي

وبعدين ايه اللي يخلينا نعمل دستور جديد في ظل حكم عسكري؟ التاريخ حيكتب ان الدستور ده اتعمل في ظل احكام عرفية وما اخدش حقه من النقاش والمساجلات

ما هو النقاش محتاج شرشحة وخناق، والجيش ما بيحبش الصوت العالي ولما بيلاقي مدنيين بيشرشحوا لبعض بيرنهم علقة هم الاتنين

- بالنسبة للمجلس الرئاسي

المجلس الرئاسي حكم عسكري بمشاركة مدنيين

يعني مش حيفرق حاجة.. ما هو اصلا ده قائم دلوقت، عندنا وزارة مدنية ومجلس عسكري، كل اللي حيحصل انهم حيتم دمجهم

لكن قانون الطوارئ حيفضل ساري طول ما احنا ما عندناش دستور

الشرطة العسكرية حتفضل قاعدة طول ما المجلس الرئاسي قاعد 

المحاكم العسكرية حتفضل شغالة لأن الاحكام العرفية حتفضل موجودة لأن مافيش دستور اساسا

ومافيش حيبقى مجلس رئاسي مدني

لأنه سلطة غير شرعية، والجيش مش حيسلم السلطات لسلطة غير شرعية وغير منتخبة.. ايوة الجيش شرعي، لأنه جيش، ده جيش، له صفة، ايه صفة اعضاء المجلس الرئاسي؟ 

طب ما الدستور ده مؤقت اساسا، نمرره وبعدين نعمل انتخابات برلمانية، وبعدها رئاسية

انا ما يهمنيش مين اللي حيجي في البرلمان والرئاسة، ان شالله ييجي قرود في المجلس والرئاسة دلوقت

البرلمان والرئيس اللي حييجوا حيقعدا سنة يكتبوا لنا الدستور ويمشوا، وبعد ما يصدر الدستور الجديد، وناخد راحتنا بقى في النقاش والحشد والمظاهرات والكلام والاخد والرد، يصدر الدستور الجديد بالشكل اللي تصوت له الاغلبية وبعدين نعمل انتخابات رئاسية وبرلمانية جديدة بدستور جديد ونعيش وننبسط بقى

اللي بيقول: افرض البرلمان اللي جاي هو والرئيس خدونا على خوانة وكتبوا دستور يخدم مصالحهم

يا راااااجل... ياااااااااااا رااااااااااااااااجل، بقى خايف من سلطة مدنية منتخبة انها تاخدك على خوانة، ومش خايف من سلطة عسكرية في ظل احكام عرفية انها تاخدك على خوانة؟

طب لو السلطة المدنية اخدتك على خوانة تقدر تنزل تنام لها في الشارع

لكن لو السلطة العسكرية اخدتك على خوانة، بشعرك ده حتاخدك محكمة عسكرية لو نمت لها في الشارع

وبعدين تقول لي ننتخب لجنة تأسيسية؟ مين اللجنة اللي انت حتنتخبها؟ 

حتنزل قانونيين وقضاة انتخابات؟ طب دول ماحدش يعرفهم

يعني تخيل الخضيري نازل انتخابات وكاتب على وشه يس وي كان.. ايه يا جدعان ده؟ ثم الناس ايش عرفها مين قانوني كويس ومين قانوني وحش؟ ده مش تخصصها، الناس تخصصها انها تنتخب نواب يعبروا عن مصالحها والنواب يفهموا مين قانوني كويس وقانوني وحش، وتقدر تراقب اللجنة وهي بتعمل الدستور، احنا حنراقبهم ازاي؟

بس في الدستور الجديد عايزين نكتب ان المرشح للرئاسة ما يبقاش طيار، ولا حارب في اكتوبر، ويا ريت يبقى عنده فلات فوت عشان يبقى عمره ما دخل الجيش.. احسن دول بيزعلوا من كلام تاني خالص غير اللي بيزعلنا

يعني مرة مالك عادلي قال لظابط جيش: خلي بالك من نفسك

اتنرفز عليه وقال له: قصدك ايه اخلي بالي من نفسي؟ يعني ايه اخلي بالي من نفسي؟ انا اقدر اخلي بالي من البلد كلها لوحدي

مالك فاكر انه بيقول له كلمة حنينة، وده افتكر انه بيقول له انت ضعيف او مهدد

مرة ظابط جيش بيقول لي على الله تفضلوا تحبونا دايما، فقلت له ليه انتوا ناويين تعملوا فينا ايه؟ فقال لي مش احنا اللي حنعمل فيكم، قلت له ولا احنا حنعمل فيكم، راح ظابط صاعقة طلع فيا زي الطلقة وقال لي: ما حدش يقدر يعمل حاجة في الجيش المصري.. احنا جيش مصر.. فاهمة يعني ايه؟ جيش مصر ماحدش يقدر يعمل فيه حاجة ابدا

طبعا كل ده يسعدني ومقدراه، بس هو كويس لما يتوجه للعدو، لكن قعدتهم معانا هنا لو طولت، كل ما حنقول كلمة يقلبوا علينا؟ 

ماهي قعدتهم لو طولت كده يبقى حاجة من الاتنين، يا هم اللي حيحقلوا لنا شعرنا ويقلبونا زيهم، ويتعمل فينا زي ايام محمد علي اللي انتوا فرحانين بيه ده ويكتموا نفسنا وترجع نفسنا تتكسر تاني بعد ما رفعنا راسنا

يا اما احنا اللي حنطول لهم شعرهم وساعة الحرب ما نلاقيش حد يدافع عنا

لا احنا عايزين نغير طبيعتهم، وادي احنا شفناهم بعد غيبة واطمنا عليهم انهم ميت فل وسبعتاشر وان جيش مصر وطني وبخير، بس خلاص خليهم بقى كده ويروحوا

ولا عايزينهم يحولونا لمجتمع عسكري.. عايزين كل واحد يخلي باله من لغاليغه، احنا لينا لغاليغ مختلفة خاااااالص عن لغاليغهم

- ليه نعمل الرئاسية قبل البرلمانية؟

انا مش عارفة ليه حاسة ان اللي عايزين يقولوا لا للتعديلات عايزين يبتدوا من الآخر للأول

الدستور وبعدين الرئاسية وبعدين البرلمانية؟ حد بيعمل كده؟ مش الناس تمشي بالترتيب الطبيعي؟ 

دلوقت اللي بيقال ان الدستور المعدل بيدي صلاحيات كبيرة للرئيس

طيب والرئيس اللي من غير دستور خالص بقى؟ اهو ده صلاحياته مالهاش اي سقف، لا وكمان لوحده من غير ولا حتى برلمان معين، مستفرد بينا في خلوة شرعية من غير اي محرم، ومصر طول عمرها مزة ومغرية والشباب بيطمعوا فيها، ومافيش قانون ولا دستور حاكمه، لا بصلاحيات كبيرة ولا صغيرة، ومش معاه برلمان يقول له اختشي يا ولا.. دي لو اختك كنت عملت معاها كده؟ 

لا يا هنادي... مافيش احسن من الحلال

الناس اللي بتقول كده خايفة من اتنين

الحزب الوطني - اللي اساسا الشعب عامل عليه ثورة، الجيش قال ان اللي شاركوا في الثورة 20 مليون مصري

كل واحد فيهم وراه اسرة على الاقل اتنين موافقين على اللي هو بيعمله، يعني حوالي ستين مليون مصري، الحزب الوطني ماشي يقول يا حيطة داريني، ثم ان الحزب الوطني مش حزب ايديولوجي عشان يتخاف منه كده، كل اللي فيه بتوع مصلحتهم

يعني لما يلاقوا مصلحتهم مع الشعب حيعملوا للشعب الاعيب شيحا عشان يرضى عنهم، الى جانب ان قوة الحزب الوطني في رأس المال الفاسد، وادينا شغالين اهو وربنا يكرمنا ونشيع فتحي سرور وصفوت الشريف وزكريا عزمي وبقية رجال الاعمال الفاسدين، بس عايزين نشد حيلنا شوية، اللي يعرف حاجة عن اي حد ياخد بعضه ويطلع على النائب العام

القوة التانية هي امن الدولة

واهو ده بقى اللي عايزين نقضي على شأفته، يا جدعان لو سمحتوا اسمعوا كلامي مرة واحدة في حياتكم واجمعوا توقيعات كتير واطلعوا بيها على عصام شرف عشان يجمد العمل في امن الدولة ويتحفظ على العاملين فيه لو عايزين انتخابات برلمانية محترمة 

الناس التانيين اللي خايفين منهم هم الاخوان المسلمين

طيب الاخوان المسلمين مش حيترشحوا بأكتر من 35 في المية من المقاعد، ومش حياخدوهم كلهم

اشتغلوا بقى على بقية المقاعد

ودي سهلة ان شاء الله.. سهلة جدا

ان شاء الله بتوع الائتلاف مثلا حيحضروا قوائم مرشحين للمجلس، وعايزة بقية الناس كلها تحضر قوائم مرشحين للمجلس

اول ما نخلص من الاستفتاء كل الاحزاب حتتعمل بالإخطار، آمل ان كل اللي محضرين نفسهم يعملوا احزاب يكونوا كمان محضرين قوائم، ولو مش محضرين قوائم، يعملوها من دلوقت حالا

وننزل بقى نلف في الشوارع، وانا شخصيا حانزل الف مع قائمة الائتلاف واطبل وازغرد 

ويطلعوا في التلفزيونات ويتكلموا ويرغوا بقى وكده.. دي تتعمل في عشر ايام وسهلة جدا، وبعدين فيه شخصيات كويسة ولها قبول وعايزين نطلب منها انها تترشح في مجلس الشعب والشورى عشان تبقى موجودة والدستور بيتعمل، انا عارفة انهم مش بيحبوا يشتغلوا في السياسة، بس ده واجب وطني، يقعدوا السنة دي يخدمونا ويراقبوا لنا الدستور وهو بيتعمل وبعدين يطلعوا من المجلس لما الدستور يتعمل

يعني مثلا، ابراهيم عيسى، وبلال فضل، وحسام عيسى، وعلاء الاسواني، وحمدي قنديل، وجلال أمين، وعوطف عبد الرحمن، وحسن نافعة، وعبد الله الاشعل، واسامة الغزالي حرب، وعايدة سيف الدولة، وشخصيات كتير مش فاكرة منهم دلوقت غير دول، المهم اغلبهم يبقوا يسار وليبراليين وفي نفس الوقت محبوبين، عشان الاتجاهات التانية مقدمة نفسها كويس، يترشحوا في البرلمان، سواء الشعب او الشورى، وحيقشوا اصوات كتير، وحيبقى وجودهم مهم والدستور بيتعمل، وحيدخلوا المجلسين يعني حيدخلوا المجلسين واديني دبستهم اهو ولازم يخدمونا.. غصب عنهم، وبعدين يطلعوا لو مش عايزين يكملوا وعايزين يتفرغوا لشغلهم، وممكن انتوا كمان تطرحوا اسماء تنزل في انتخابات البرلمان كمستقلين او تابعين للاحزاب اللي حيتم اشهارها فور الانتهاء من استفتاء الدستور، انا مستنية اسماء تكتبوها في في التعليقات بس تراعوا انها تكون اسماء لها شعبية ومحبوبة وفي نفس الوقت ما تبقاش من الاتجاه الاسلامي لان الاخوان حينزلوا اظن باسماء حلوة برضه وكويسة مش حينزلوا باقفال ولا حاجة، فكده يبقى الاسلاميين ممثلين بأحسن حاجة عندهم، احنا عايزين فعلا برلمان ائتلافي عشان ده اللي حيعمل الدستور

وبكده، حتى لو الوطني دخل البرلمان، فيه ناس شخصيات عامة، ومن اتجاهات مختلفة، ومحبوبة، ولها وجهة نظر مختلفة، ولها تأثير، وصوتها مهم حتبقى موجودة، وينسقوا مع بعض، وبكده يبقى على الاقل خمسين في المية من البرلمان ناس جديدة نوفي مش وطني ومش اخوان.. كمان الاخوان مش حيعملوا حركات قرعة في البرلمان، الاخوان مهتمين انهم ينحازوا للثورة ولمبادئها ولما يبقوا في النص ما بين الوطني واي حد تاني، اكيد مش حيختاروا الوطني، اذا ما كانش عشان مش عايزين يخسروا الشارع، يبقى على الاقل عشان بينهم وبين الوطني تار بايت، اما اذا فرض ان بعض اعضاء الوطني نجحوا الحزب الوطني اساسا بتاع مصلحته، يعني لو حس انه حيتشأمظ وحيبان انه رجعي وضد الثورة حيقعد كانن وساكت في حاله، ده اذا ما زايدش على الباقيين في الثورية كمان

انا بس عايزة اعرف، هل البرلمان والرئيس المنتخبين بعد ما يعملوا الدستور، حيبقى لهم حق في الترشح تاني؟

اصل انا عايزة يصدر قانون سواء بقى في قانون الانتخابات، او ملحق للدستور او اي حاجة، تخلي الرئيس واعضاء المجلسين ما يقدروش يترشحوا لأول دورة بعد اصدار الدستور الجديد، وبكده نضمن انهم مش حيعملوا لمصلحتهم الشخصية الى جانب وجود شخصيات عامة في المجلسين

وعايزين من دلوقت نحضر اسماء لشخصيات عامة تنزل انتخابات المجلسين، وندبسهم وغصب عنهم يدخلوا يعني يدخلوا

ولازم نحضر نفسنا لكل الاحتمالات

يعني لو النتيجة طلعت نعم يبقى قوائمنا جاهزة

لو النتيجة طلعت لا

يبقى حضروا بديل لو سمحتوا يضمن لي اننا ما نستمرش في الحكم العسكري، ولا رئيس بلا سقف قانوني يحكمه ينفرد بينا واحنا شعب مالناش الا سمعتنا ثورتنا ومش عايزين الشيطان يبقى تالتنا

لأني لحد دلوقت مش شايفة بدائل لما نقول لأ

وبعدين انا عايزة افهم.. هو البرادعي مش بيطلع في التلفزيون كتير ليه؟ انا عايزاه في الفترة الانتقالية دي، وبعدها عايزة البسطويسي في الاربع سنين

ومش عايزة البرادعاوية يفتحوا بقهم تاني، خالص.. الراجل كل ما يطلع في التلفزيون ويكون رصيد كويس عند الناس يروح البرادعوية طالعين زي الخازوق لوحدهم ويعكوا في الكلام لحد ما يكرهوا الناس فيه تاني

الراجل ده ربنا باليه بمحبيه.... اسكتوا شوية.. اسكتوا وسيبوه يتكلم هو