نتكلم في المفيد بقى

انا بادور على الحوار اللي اتعمل مع طارق البشري عن التعديلات الدستورية

طبعا انا على رأي علاء سيف من القلة المندسة اللي حتصوت بنعم على التعديلات الدستورية، لأن اللي بيقول لا مش بيطرح اي بديل غير ان الجيش يقعد اكتر من كده

الجيش ينفع يقعد اكتر من ست شهور؟ ده قعد شهر ونص وابتدا يزهق وابتدينا نتعب 

انا شايفة ان التعديلات دي كويسة، خصوصا ان المادة 189 مكرر بتنص على ضرورة انتخاب لجنة تأسيسية لكتابة دستور جديد، وانتخاب لجنة من برلمان منتخب احسن واكرم وانزه، امال يعملوا دستور جديد من لجنة تعيين المجلس العسكري؟ ده دستور مؤقت ومنصوص فيه انه دستور مؤقت

وبعدين انا مش عايزة الجيش يقعد اكتر من كده، لو ينفع يمشي امبارح يبقى ياريت

عن نفسي، انا قاعدة في بيتنا دلوقت، ومش حانزل غير اروح الشغل، وارجع اقرا التعديلات واعمل المناقشات واكتب في الموضوع ومش ناوية انزل غير على الاستفتاء ان شاء الله

لأني مش عايزة الجيش يقبض على حد تاني ولا يعذب حد تاني، ويبدو ان اقناعه بأي حاجة من دي صعب

هم بالنسبة لهم المليون ده الشعب، حيبوسوه ويحضنوه وينططوه على الدبابة ويشيلوا عياله ويسيبوه يتصور جنبهم

اقل من مليون لحد ميت الف، ده العيال بتوع الفيس بوك، وما عرفوش يقنعوا الشعب بكلامهم

اقل من ميت الف لحد عشرتلاف، دول المجانين اللي مش عارفين هم عايشين ليه

اقل من عشرتلاف دول القلة المندسة والبلطجية واللي عندهم اجندات وبياخدوا 50 يورو او بيشتغلوا لحساب امن الدولة او عملاء للخارج او الداخل او اي حاجة.. المهم ان دول حينضربوا ويتعذبوا ويتاخدوا في محاكم عسكرية ويتعمل فيهم اللي ما اتعملش.. واللي حيتقبض عليه من وسطهم يبقى بلطجي، امال كان نازل في اقل من عشرتلاف ليه؟ 

فأنا شخصيا مش حانزل غير  مع الشعب بعد كده... 

دلوقت، الشعب يريد أن يفهم الدستور. آه ليه؟ ولا ليه؟ ولو آه ايه اللي حيحصل، ولو لأ ايه اللي حيحصل؟

- بالنسبة للمجلس الرئاسي، مافيش تشكيلات اتعملت بالمجلس الرئاسي واسماء واضحة للناس

ومن ثم

مافيش مليون نزلوا يقولوا عايزين المجلس الرئاسي

وعليه

فالمجلس العسكري اللي ما بتوصلوش ذبذبات اصوات اقل من مليون مش حيسمع مجلس رئاسي لأنه مش حيحط حد مش منتخب

يبقى كده المجلس الرئاسي بخ.. ما نزلتش معاه العدد المطلوب

وبعدين المجلس الرئاسي وتشيل المشير طنطاوي؟ انت لو بتبرم في الشارع وبتتكلم مع الناس العادية زيي تعرف ان المشير طنطاوي تحول الى بطل شعبي دلوقت واي حد الجيش بيضربه ويعذبه الناس بتقول: اصلهم بيشتموا سيادة المشير

عشان تقنع الناس بأن المجلس الرئاسي ده عشان تريح سيادة المشير مش عشان تمشيه وتزعله، لازم تنزل تتكلم مع الناس، ولازم تعرض عليهم اسماء، ما عملتوش الشغل ده من بدري ليه؟ الوقت بيمر والجيش ابتدا يجز على سنانه، وانا حضرت فض اعتصام التحرير والاهالي بيزايدوا على الجيش في الضرب وبيقولوا للمعتصمين: انتوا بتقولوا ادبكم على الجيش.. نعمل ايه احنا دلوقت طاه؟ 

ناخد بالنا بقى من عصام شرف، ونقدم له طلب بتجميد امن الدولة والتحفظ على العاملين فيه مش اعادة هيكلته، هيكلة ايه؟ مش عايزينه تاني ده

ونقول له يتوسط لنا عند المجلس العسكري عشان يطلع الناس اللي اخدت احكام عسكرية، وياريت يبقى ما يعذبش حد تاني.. بعد اذنه يعني

بديل ان الجيش يقعد اكتر من مدة ست شهور ده مش مطروح اساسا.. يا اما ما اسمعش حد يشتكي بعد كده ويقول الجيش عذبني الجيش ضربني.. هو ده النظام، حيقعد اكتر من ست شهور على كده؟ 

البديل: دستور جديد

ايوة اللي هو ايه؟ مين اللجنة اللي حتعمله؟ وحتتشكل بناء على ايه اللجنة دي؟ يعني انا قدامي فرصة اني يبقى عندي لجنة منتخبة واختار لجنة مفروضة عليا من الجيش؟ وتعمل لي دستور جديد؟ لا بقى.. في الحالة دي يبقى ننزل القضاة انتخابات بقى، وتخيل بقى المستشار طارق البشري نازل في انتخابات واحنا كاتبين على وشنا

yes we can

.. وكده الجيش حيقعد اكتر

انا ممكن اتعامل مع برلمان 50 في المية منه منتخب فساكونيا، اتعامل مع رئيس منتخب فساكونيا، ولا اني اتعامل مع حكم عسكري لمدة اطول.. سيبوهم يمشوا بقى، اتخنقوا.. اتخنقوا.. وخنقتهم مش حلوة علينا، لحم قصاد حديد، وما بيستوعبوش قلة ادبنا، مافيش ظابط حيقبل انه يتهزأ قدام العساكر بتوعه، ويتهزأ دي يعني لما يقول لك اعمل حاجة تقوم ما تعملهاش.. دي بالنسبة لظابط جيش قلة ادب ولو ما سمعتش كلامه قدام العساكر بتوعه يبقى بتهزأه..

لازم يرجعوا ثكناتهم، احسن لهم واحسن لنا

بالنسبة للانتخابات البرلمانية

انا متفائلة بيها

لأن قوة التصويت ايام مبارك كانت 30 في المية.. او على وجه الدقة، 27 في المية

فيه تلاتة وسبعين في المية ما كانوش بينزلوا عشان مش عايزين المطروح، التلاتة وسبعين في المية دول حينزلوا الانتخابات البرلمانية، ومش نازلين عشان ينتخبوا الوطني والا كانوا انتخبوه طول السنين اللي فاتت، ومش نازلين ينتخبوا الاخوان اللي عاملين لكم عقدة دول، والا كانوا نزلوا سندوهم قدام الوطني، ولا طبعا حينتخبوا الاحزاب الكرتونية والا كانوا نزلوا انتخبوها قبل كده

دول نازلين ينتخبوا حاجة جديدة بورقها

حضروا لهم الجديد اللي بورقه

لكن مافيش حاجة اسمها تقول: سقط كل الدفعة عشان انا مش مذاكر ولو امتحنت حاسقط

طب ما تذاكر وفيه ناس كتير مستعدة تديك درجات رأفة

حضر حزبك وقوائمك وشيلهم في التلاجة لحد ما قانون الاحزاب ينزل واهو قرب ينزل واعمل حزبك في ساعتها وانزل للناس في الشارع بقى واتكلم معاهم، واطلع في التلفزيون كتير واهو التلفزيونات اتفحت واون تي في بقت اذاعة الثورة ومتحمسين قوي يعرضوا اي حاجة لها علاقة بالتغيير، حتلحق تكون خميرة في الشارع لو طلعت في التلفزيون باسم حزبك وطلعت حد نضيف يتكلم وتنزل ناسك الشارع

تأجيل الانتخابات البرلمانية حيدي فرصة للحزب الوطني انه يلم نفسه تاني وهو متدهول دلوقت

واذا كنتوا خايفين من الاخوان.. اطمنوا، مبارك عمل ضدهم دعاية عايزة تلاتين سنة تانيين عشان تتمسح من مخ الناس

انا مطمئنة ان شاء الله للانتخابات البرلمانية، واغلب الظن ان البرلمان اللي جاي حيبقى برلمان ائتلافي، لأن الناس حساسة قوي دلوقت، واي حد بيتشم من ريحته انه بيعوز يكتسح بيخسر عشر نقط عند الناس فورا، كل الناس مقدمة 

low profile

عشان حاسة ان الناس مش قابلة زعامة ولا اكتساح

بعد كده الانتخابات الرئاسية حتبقى كويسة ان شاء الله

قوم تعمل دستور جديد ببرلمان فيه نسبة نزاهة على اقل تقدير خمسين او سبعين في المية 

قوم البرلمان ده ينتخب اللجنة التأسيسية بما يعبر عنك 

لكن ما تعملش دستور جديد بلجنة اللي عاملها لك المجلس العسكري.. وإلزامي ان البرلمان والرئيس يعملوا دستور جديد، ده في المادة 189 مكرر

المهم يعني الاستفتاء شكله كده حيتأخر.. وانا بصراحة مش عايزاه يتأخر، لأن ده معناه ان الجيش حيقعد اكتر

ومش عايزاه يفشل لأن برضه ده معناه ان الجيش يقعد اكتر

والدنيا عمالة تبهوأ وتظروط وتفك من بعضها، ولو فضلت الوتيرة كده الجيش حيرمينا من الشباك، مش بس حيعذبنا

المهم 

اقروا البوست ده

واقروا الحوار مع طارق البشري في الاهرام النهاردة الصفحة 10 في عدد الجمعة

البرادعي عايز الجيش يقعد سنة، وبيقول لنا

why the rush

طبعا يا عم.. هو انت اللي بتنضرب؟