حد عايز حاجة من وزير التعليم العالي

انا كنت ناوية ارغي تاني في التعديلات الدستورية عشان انا اسيبكم اقعد اقرا في حاجات واكلم ناس قانونيين اسألهم

وكل ما اقرا واسأل اكتر الاقي نفسي متمسكة باني اقول نعم للتعديلات الدستورية، ما حدش يضحي بديمقراطية وحياة مدنية ويفضل عليها حكم عسكري الا اذا كان اهبل، ولما الناس بتطول في الحكم ممكن دماغها تزقزق 

هم حددوا لنفسهم معاد يمشوا فيه، ولازم يمشوا فيه، اسكتوا لبعدين تكبر في دماغهم ويفضلوا قاعدين 

المهم، المادة 190 دي مادة معطلة سقطت بانتهاء الفترة الاولى للسادات وفيه اسباب ليه ما اتشالتش حابقى اشرحها لما افضى، المادة 189 ملزمة لانها احالة الى منهجية التعديل وليس الى صلاحية التعديل

الخلاصة: الدستور ده مؤقت، يلزم البرلمان والرئيس بكتابة دستور جديد، ويخلي الرئيس والبرلمان اللي جايين انتقاليين

وكمان سألت في المجلس الرئاسي، المجلس الرئاسي ما هو الا ستار للمجلس العسكري، بمعنى ان المجلس الرئاسي هو حكم عسكري بمشاركة مدنيين واحنا مش محتاجينه لان الوزارة المدنية تغني عنه، والمجلس العسكري مش حيسلم السلطات الا لسلطة شرعية منتخبة وهي البرلمان والرئيس، يعني حتى لو عملنا مجلس رئاسي الشرطة العسكرية حتفضل موجودة، والجيش مش حيرجع لثكناته

احنا مش محتاجين اعلان دستوري لان الدستور القائم هو دستور مؤقت، وهو بمثابة الاعلان الدستور، كل ده واكتر حاحكي فيه بعد ما قعدت مع قانونيين فهموني، وابقوا اقعدوا انتوا كمان مع قانونيين ما يبقوش متغاظين انهم ما حدش حطهم في اللجنة

كمان الدستور الدائم محتاج يتعمل على مهل

وفي ظروف يبقى فيه حياة مدنية متكاملة، مش شرطة عسكرية ومحاكم عسكرية، قال وبتتخانقوا مع الجيش عشان مش معترف بحقك في الاحتجاج والتظاهر السلمي.. انتوا حتمثلوا؟ احنا في احكام عرفية وتحت حكم عسكري، هو فيه حكم عسكري عامل احكام عرفية وسايب البلد نادي الجزيرة كده؟ 

اثناء كتابة دستور جديد احنا محتاجين نقاش مجتمعي، يمكن ينتج عنه بعض المساجلات، التي قد تؤدي الى بعض الاحتجاجات، وفيه نقاط حساسة، زي مثلا المادة التانية، وزي خمسين في المية عمال وفلاحين، وطبعا الناس حتسخن، وعايزة تنزل تتظاهر

تنزل بقى والشرطة العسكرية تعذبها وتقدمها لمحاكم عسكرية؟

استمرار الحكم العسكري لاكتر من ست شهور حيعمل في المصريين حاجة من الاتنين:

يا اما حيكسر نفسهم ويرجعوا زي ايام عبد الناصر ومحمد علي ويتكتموا وعمرهم ما يتقام راسهم تاني

يا اما حيحصل احتكاك بين الجيش والشعب والجيش يفقد هيبته ومن ثم امن البلد القومي كله يتعرض للخطر

الجيش لازم يمشي.. الجيش لازم يمشي

مافيش حاجة حتمشيه غير الدستور المؤقت ويسلم السلطة لسلطة شرعية منتخبة... وعيب قوي ان احزاب مرخصة تدعي انها خايفة من منافسة حزب الشعب عمل عليه ثورة اساسا، وجماعة قعدت تلاتين سنة محظورة، وهم الاحزاب الشرعية الوحيدة، وتيارات سياسية كلهم كانوا ماسكين منابر البلد واخدوا فرصهم ايام مبارك اكتر من الاخوان بكتير، الفاشل فاشل، والله لو اجلنا له الانتخابات خمسين سنة، عمره ما حيفلح، ومش عشان هم فشلة احنا نفضل تحت حكم عسكري

الخلاصة، اللي عايز يطول الحكم العسكري يقول لا للتعديلات الدستورية

الحياة المدنية احسن الف مرة من اي حكم عسكري.. وعشان انا باحب الجيش واخاف تغير.. احسن يرجع ثكناته ويفضل محتفظ بصورته الحلوة في خيال الناس، وهو كمان حيرمينا من الشباك بعد شوية لانه اساسا مش فاهم احنا ايه ده؟ عيال مطولة شعرها، وبنات بتنام في الشارع وحاجة اخر هرجلة، ودي ناس من 86 ما جاتش من الصحرا، وواحد فيهم يقول لي: انا مش منعزل، انا بانزل اجازات.. يا جدعان خليهم يروحوا في حالهم بقى

------

المهم مش وقته دلوقت، اللي وقته ان مكتب وزير التعليم العالي دعاني لاجتماع حاضر فيه ناس كتير، فأنا قلت اعلمكم عشان لو عندكم حاجة عايزين توصلوها قولوا لي وانا اوصلها ان شاء الله

ونبقى نكمل في موضوع التعديلات الدستورية