Thursday 10 March 2011

بكرة آخر معارك أمن الدولة.. يا يكسبنا يا نكسبه

فيه تلات جبهات عليهم مسئولية انتصار مصر على امن الدولة في معركته الاخيرة
الجبهة الأولى:
مقسومة لفيلقين، فيلق مسلم، وفيلق مسيحي
ودي في حد ذاتها حاجة وسخة بعد نجاح ثورة 25 وردة ورجعنا عشر خطوات لورا تاني.. وانا ليا اني ازعل وليا اني اقول اني زعلانة واعاتب
لما انفجرت كنيسة القديسين انا بنفسي نزل وهتفت بالروح بالدم نفديك يا صليب
لكن بعد الثورة لما تنزل مظاهرة بصلبان وتقول ارفع راسك فوق انت قبطي، يبقى ما كانش العشم... ما كانش العشم ابدا
لو كنت واحد من اللي نزلوا في ثورة 25، يبقى مش ده اللي اتعلمته من الثورة المفروض، والمفروض ان الثورة دي ضناك اللي انت كنت حتموت عشانه، والمفروض انك اتعلمت ان حق المصري مصري، واننا انتصرنا في الثورة دي لما كنا مصريين وبس ولما حيدنا الجيش.. مش نتخانق معاه، دي غباوة دي، ومراهقة، مش ممكن ناس تقعد تتعامل مع الجيش زي المتصابية اللي بتعيش مراهقتها بعد عمو عزيز مات وماسكة وردة تقول: بيحبني ما بيحبنيش بيحبني ما بيحبنيش
طب افرضي ما بيحبكيش.. حتعملي ايه؟ لحم قصاد حديد؟ كنتي متجوزة واحد تلاتين سنة بيضربك وياخد فلوسك ويدخل عليك صحابه، جه واحد صاحبه صعبتي عليه طلقك منه وهربك عنده لحد ما ربنا يكرمك، وعشان الجيران ما يتكلموش كتب عليك، قاعدة واكلة دماغه وعمالة تقولي له مين اللي بيرن لك؟ انت متغير من ناحيتي.. انت ما بقتش تحبني زي الاول... وقاعدة ترغي ترغي ترغي بعد ما قعدتي تلاتين سنة ساكتة مع اللي كان بيديك بالجزمة.. انت حتمثلي؟ ما تخلي اليومين دول يعدوا بالطول ولا بالعرض، لا تتكتمي زي ايام المجحوم ولا تبقى زي الخياطة في مسرحية الا خمسة اللي ما كانش بيعرف يسكتها، اتكلمي وحددي اللي انت عايزاه في حياتك زي الناس العاقلين، مش تصحيه من النوم الساعة تلاتة عشان تقولي له مين دي اللي ضحكت لها وانت بتفتح عشان تاخد الجرايد اول امبارح الصبح؟ ايه الجنان ده؟
والكلام ده لكل الناس، مش مسيحيين بس ولا مسلمين بس
ولو كنت مش من اللي نزلوا في ثورة 25.. يبقى روح بيتكم، لا مؤاخذة يعني، مش مكسوف من نفسك؟ اللي زيك يتدارى ويقعد يعض بنان الندم، انت لا منك ولا كفاية شرك؟ مش كفاية قعدت موكوس ما عملتش حاجة في حياتك، نازل تركب على دم الشهدا وتضيعه؟
المسلمين لازم كلهم ينزلوا، المسيحيين فاكرين ان المسلمين مش زعلانين عليهم، وعايزين امارة ان المسلمين زعلانين عليهم، والمسيحيين المصريين عاملين زي السلفيين كده، يعني ما بيعترفوش بمسلمات مش محجبات او منقبات، ولا مسلمين ما بيصلوش، لو واحدة مش محجبة ولا منقبة او انت واحد ما بتصليش انت بالنسبة للمسيحي المصري مش مسلم.. ولا مسيحي.. انت واحد كده
يعني فرض عين على كل منقبة ومحجبة وكل واحد لما بيدن الادان بيصلي انه ينزل بكرة.. اذا كان عايز ينقذ الثورة وينقذ مصر ويحل امن الدولة اللي قعد تلاتين سنة ملبسك تهمة الارهابي وماحدش ارهابي غيره، انزل بكرة خلينا نخلص
مطلبنا: تجميد امن الدولة والتحفظ على العاملين فيه لحين التحقيق معهم، وبعد كده ابقوا شوفوا بقى حتعملوا فيهم ايه
والعنوان: ايد واحدة ضد امن الدولة
فيه شاب لطيف قابلته النهاردة في اعتصام المسيحيين - قلبي بيتقطع وانا باقول اعتصام المسيحيين بصراحة - اسمه مروان، هو عامل مبادرة هو مجموعة من صحابه، ان المسلمين يروحوا اطفيح يساعدوا الجيش في مهامه وينضفوا مكان الكنيسة ولما يبتدي البنا يبنوا بايديهم
بس هم لسه مش عارفين حيعملوا ده ازاي؟ هم جايين بكرة ان شاء الله الميدان، وعايزين يروحوا بكرة يوصلوا الاهالي اللي خايفين يرجعوا اطفيح وهم تلات عائلات، ويعملوا لجنة شعبية لحمايتهم وعايزين الناس تضم عليهم لانهم محتاجين عدد، بس بين ماسبيرو واطفيح حوالي 65 كيلو وهم مش عارفين حيروحوا المسافة دي ازاي لو العدد كبير
كمان عايزين يروحوا من غير ما يشتبكوا مع الاهالي هناك
وعايزين الجيش يبقى معاهم وهم معاه، بمعنى يعملوا لجان شعبية لاتمام مهام الجيش في اعادة بناء الكنيسة في مكانها والتهدئة والحماية الخ
عموما دي نمرته وهو قال لي انزلها عندي
0115200801
مروان قال لي ان جات له معلومات بالصور - وبرضه نتعامل مع المعلومات بحرص عشان المعلومات كترت قوي - ان فيه 60 عضو من الحزب الوطني اجتمعوا عشان ينزلوا بلطجية يعملوا فتنة طائفية بكرة
على اي حال، اذا كان الكلام ده صدق او كدب مش مهم
فيه ناس بتسخن في كل الاحوال سواء كانوا فعلا مزقوقين من الحزب الوطني او اغبيا
وفيه احتمال ان ناس تيجي بكرة اعتصام التحرير يسخنوا، مسلمين يسخنوا على مسيحيين ومسيحيين يسخنوا على مسلمين
مالكوش دعوة دول امن ولا حزب وطني ولا اغبيا، ما تفرقش، اللي عليكوا تتلموا عليهم وتدوهم واحدة سلمية من اللي كنتوا بتدوها للبلطجية لحد ما يبان لهم صاحب وتسلموهم للجيش عشان بيعملوا فتنة طائفية
وابقى خليه ياخد اعدام بقى.. حتى لو كان غبي مش عميل.. الغبي اولى بالاعدام من العميل، عشان العميل ممكن يركب الموجة ويغير اتجاهه، لكن الغبي حيفضل غبي لحد ما يموت
بكرة مصر امانة في ايدكم والتاريخ وقبل التاريخ، ربنا، مش حيسامحكم لو الثورة اجهضت عشان المسيحيين عايزين يبقوا لوحدهم والمسلمين قافشين عليهم
اللي عايز يبقى لوحدة يتجاب غصب عنه ويتباس ويتحضن ولو فلفص يتطلش بالالم ويتباس ويتحضن تاني غصب عنه
واللي قافش يقفش على امه، مش على بلدنا، وبرضه يتلطش بالالم
دي اخر معركة لينا مع امن الدولة واللي حيخستك يبقى خاين
لا.. مش جبان.. ولا اهبل.. ولا غبي..
خاااااايييينننننن
--------
الجبهة التانية:
الجيش المصري
المسيحيين عايزين بيان عسكري مرقم ينزل على الفيس بوك عشان يصدقوا ان الكنيسة حتتبني مكانها
وعايزين اللي يقرا البيان على التلفزيون يبقى واحد لابس ظابط
معلش.. عشان خاطري انا، مش حيجرا حاجة لما تعملوا لهم اللي هم عايزينه، وفيه ناس كتير مستعدة تتطوع كلجان شعبية عشان تسهل للجيش مهمته
وكلمة لسيادة المشير:
حقك على راسي انا.. امسحها فيا ولغمط بيها وشي، عندي انا وعلى راسي
بس عشان خاطر مصر... عشان خاطر ربنا
جمد امن الدولة وتحفظ على ظباطه، وادي امر ببيان عسكري مرقم.. واحنا حنعمل لجان شعبية وخدنا مداس عشان بلدنا
انا شخصيا ما اقدرش بلدي تروح.. انا تعبت عليها قوي، مش بعد التعب ده كله تروح
--------
الجبهة التالتة:
الكنيسة المصرية
ايه؟ ايه يا ابونا؟ قداستك فين؟
يا ابونا انت لك مواقف وطنية كتير، وحطيت مصر قبل اي حاجة في مواقف كتير، وسكت الاقباط وقت ما كان لهم حق ودم كتير، وايام المخلوع ياما انحنوا لعواصف كتير... وفي احيان كتير جيت عليهم بزيادة وكان لهم حق
دلوقت مصر محتاجة كلمة منك ولو تسجيل صوتي تلم بيه شمل البلد خصوصا ان الكنيسة حتتبني، وفيه لجنة تقصي حقائق، وان شاء الله الجهاز اللي ياما شرب من دم الاقباط حيتحل، والدنيا في طريقها انها تزهزه والمصريين مقبلين على عدالة ومساواة، اللي بيحصل ده بيعرقل مسيرة مصر ويضر بمصالح الاقباط
احنا في ثورة.. مش انا اللي حاقولك يعني ايه ثورة.. ثورة يعني الغايب مالوش نايب، وقعدة الاقباط لوحدهم تحت الصليب دي غيبة تخلي ماحدش يشوفهم ولا يسمعهم والاهم تاكل نايبهم.. حرام ده حقهم، جم وثاروا وناموا في الشارع وقدموا شهدا واتجرحوا، حقهم يبقى لهم نصيب في الثورة، واحنا كلنا نازلين لهم نديهم نايبهم
ما تسيبهمش فريسة للي بياكل من وراهم عيش وما يهموش لما حقهم يتاكل، كل اللي يهمه انه يصورهم وينشر صورهم في الصحف العالمية وهم ماسكين الصليب ويكتب تحتها كوبتس بروتستينج آفتر كلاشيز ويذ موسليمز
ولو حتى ماتوا، حييجي يصور الجتت ويكتب: كوبتس كيلد باي موسليمز
وياخد تمويل، ويحضر مؤتمرات، وياخد عليها فلوس، امال هو جاي من آخر الدنيا يهبب ايه؟ .. وقداستك عارف ان كوبتس وير نوت كيلد باي موسليمز، وقداستك عارف مين اللي عمل فيهم كده، وحقهم عند مين، ومصلحتهم فين، وانهم لو مشيوا ورا اللي بياكل من وراهم عيش لا حيطولوا عنب الشام ولا بلح اليمن ولا حياخدوا حقهم الوقتي ولا حقهم في المواطنة يا ابونا.. اعمل معروف
حينعزلوا عن المسلمين ويعادوا الجيش؟ وبعدين؟ وحيعملوا ايه؟
حق الشهدا يقول ان المسيحيين اللي في ماسبيرو يضموا على المسلمين والمسيحيين اللي نازلين في التحرير، عشان التحرير ده مكان الثورة، وده اللي لما حد بيدخله بيبقى له نايب فيها
كلمة منك ترجع لهم حقهم في الثورة.. والا حيطلعوا من المولد بلا حمص بعد كل التضحيات اللي قدموها
-------------
يا مصريين
قولوا يا رب


79 comments:

Mouri said...

يارب يانوارة يارب

masehee said...

ربنا يباركك

dr_abdog said...

ولا تيأسوا ما خاب اصحاب ملة إذا ما تواصوا بينهم ثم شمروا
وما ضاع حق لم ينم عنه أهله ولا ناله في العالمين مقصر
إذا الله أحيا أمة لن يردها إلى الموت جبار ولا متكبر

Hesham essa said...

Yaaaaaaaa rabb
In shaa Allah every thing will be ok
Egypt = Misr = Om aldonia

nona said...

أنا معاكي .. صحيح مش في كل حاجه
بس عندي كلمتين..
عايزه اقولهم ممكن يضرب بيهم عرض الحائط عادي
بس أنا مصريه معرفتش أوصل صوتي لحد من الكتاب الي المفروض كانوا بيقابلوا الجيش والجيش بطل يقابلهم..
ولا أوصل صوتي للإتلاف لانهم متشككين من أي حد جديد ينضم إليهم رغم إنا كنا منكم وفيكم طيله 18 يوم ..بس أنا اكتشفت بجد إن مفيش أي فتن بتحصل غير في القاهره لأانها كبيره وناسها كتيره وسهل أوي نوقع الفتن فيها
بس كل المناطق التانيه والمحافظات التانيه أمن الدوله ميستجريش يعمل حاجه لأن الناس هناك حافظه بعض وعارفه بعش كويس ..

المهم ..
فاكره الكلام الي كنتي بعتيه على صفحه الجيش وإنتي بتسأليهم عن كلام زكريا عزمي والتصريح الي قاله على التلفزيون
على فكره محدش عبرنا
والجيش مطلعش ينفي ..
يعني صمته يدل على إن كلام زكريا صح وده معلش بقى تبقى بجد مصيبه ..

ثانيا ..
معلش ترجمي للناس الإسلوب الهمجي الي الجيش بيستخدمه سواء في التعذيب أو الإعتقالات عمال على بطال والمحاكم العسكريه وكل ده لولاد الناس فقط وللناس الي شاركت في الثوره بروحها ودمها وعقلها
وسايبين الناس التانيه تولع في البلد...
على أقل القليل حتى مفرضوش عليهم إقامه جبريه بدون اي تنقلات أو زيارت ..زي زكريا وصفوت ونظيف
لحد ما يتأكدوا من جنسهم القذر
رغم إن الأعمى عارف مصايب الناس ده..؟؟

والأدهى والأمر حسني مبارك طالب مرتب شهري يعني لأنه مش لاقي ياكل بعد ما الحكومه جمده حسباته زي ما بيقولوا ده لو كان ليه حسابات في مصر اساسا ..


وأنا بكتب هنا لعل أي حد يسمعني بجد ولو حد عنده كلام يقدر يقنعني ويقنع ناس كتير بتفكر زي ومش قادره ترتاح للجيش ياريت بجد ينورنا بيه ..
وإحنا بجد مش هنقول له بس هاتوا كلام منطقي وعقلاني ..بعيد عن التخويف والتأليه لأن الحجات ده كرهناها موت ومش هنرجعلها تاني ..

أنا بجد بحبك ..
وشكرا

Nicholas Urfe said...

والله ما تعودت اعلق على اي حاجة بتكتبيها واقعد امدح واقولك انا معجب !

لكن بجد انت اليومين دول بتقولي افضل ما عندك ، تسلم ايدك يا نوارة

ملف الوحدة الوطنية عندنا يتقال فيه كتير ومحتاج شغل كتير، واعتقد الفترة الجاية ومع مشروع النهضة المصرية اللي هياخد فرصته اخيرا ، ومع تطوير التعليم ومع محاربة البطالة والفقر ، ومع الحوار الاسلامي - الديني - العلماني والجدل الاجتماعي اللي هنخش فيه انا متفاءل تماما بخصوص الوحدة الوطنية

ببساطة وبالبلدي الفتنة ناتجة عن حاجات معينة:

1- امن الدولة والوقيعة بين مختلف الفئات

2- الجهل والنظام التعليمي الضعيف والحياة في القمع وبالقمع ومن القمع والى القمع

3- الفقر، لان الجعان بيبقى زهقان والجوع كافر زي الفتنة الطائفية بالضبط

4- الميراث التاريخي من ساعة ما واحد حط ناس في المعتقلات وواحد تاني خرج ناس من المعتقلات وادينا بنشرب المر بسبب اللي حصل

The Dagger said...

Nawara,

I am not Egyptian as I told you before, but I love the Egyptians (Christians, Muslims, Atheists, everybody). Please, please, please don't let the counter revolutionaries destroy the Revolution of January 25. That revolution is not for the Egyptian people alone. It is for every Arab, and every oppressed person in the world. I still have hope and faith in you. All of you. Peace be upon Egypt and ALL of her people. To hell with Mubarak and his Amn Dawla!

Unknown said...

يا رب!

salwa ibrahim said...

Thawra will win to the end, Inshaa allah that's what is going to happen,did you notice what Mubark's family is doing quietly and slowly they are working on 2 levels, the first level : the emotional one: Mubark grows his beard, mowazaf el shahr
el 3akary goes to them kollhom receive him modestly and greet him that when he leaves he will talk abut how modest and kind this family is, news from Mubark ex lawyer that he doesn't have wala maleem ,then Mubark asks government for monthly salary (how poor)!!!! the second level is Safwat , Sorrour ,and 3azmy and amn eldawla shake egypt's stability
that people say ya 7ram elrayes tala3 ghalban bass shelnah we albald bazet off course this is in their dreams because Egyotian people are not emotinal or stupid anymore and Mubark elmakhloo3 and his famly were earased from people's hearts and minds for ever bass ahom at least trying to annoy people and do not forget this family hated Egyptian people that they humiliated the epeople as never any president did before, be careful every body

ahkbaza said...

كلام حلو بس المشكله في ناس كتير مش فاهمين اي حاجه و بيقولوا ان الثوره السبب ما كنا كويسيين بناكل و بنشرب و لا فتنه طائفيه و لا غيره و دي مشكله كبيره

Unknown said...

يا رب
ملناش غيرك

Unknown said...

مصر : حسني يتشمس في شرم
تونس : بن علي مطلوب من الانتربول وتونس طلبته رسميا
مصر : فلوس حسني اللي هي فلوس المصريين لسه المحكمة بتايد قرار مش عارف مين علشان فيه حساب مش عارف فين في قصة طويلة ملهاش اخر
تونس : فلوس بن علي شفنا كتير منها دهب وياقوت ومرجان وهيه بتطلع من ورا الجدران ولا مغارة علي بابا
مصر : حبيب بيتحاكم على جريمة غسيل اموال و4 مليون جنيه
تونس : محاكمة وزير الداخلية بتهمة القتل العمد
مصر : مجلس عسكري
تونس : رئاسة انتقالية ولجنة تاسيسية لدستور جديد
مصر: امن الدولة بيحرق ويفرم ويعيش حياته لغاية ميروحوا الشباب علشان يحموا مباني امن الدولة من ظباط امن الدولة
تونس : حل جهاز امن الدولة
مصر :شباب متخيل انه علشان ضحكوا عليه في التلفزيون وقالوله ثورة الشباب , صدق انه بيفهم اكتر من اللي عمرهم راح في السياسة من الشرفا ومااكثرهم
تونس : رئيس ورئيس وزرا ونخب سياسية بتتكلم
انتو بتخسروا لانكم ماشيين في سكة الفرحان بنفسه وصدق ان الثورة خلصت
وحاطت ثقته في غير محل ثقة ,
متقلقيش على شوية الاوباش بتوع ماسبيرو والزراريب , دي محنة اخيرة وحتعدي غظب عنهم علشان اقصى الراديكاليين من الاسلاميين حاليا ملتزمين بضبط النفس علشان ميبقوش سبب ضياع الثورة وده حيخلي الحريقة من جانب واحد وحتنتهي بانها حتلتهمهم هما واي مكسب حياخدوه بلوي الدراع حيخسروه من مشاعر الترابط الحقيقة من المسلمين في الشارع
مبارك -صفوت -زكريا -سرور -جمال وظباط الصف الاول والتاني من امن الدولة يتحطوا في السجن زي الكلاب واي ذيل ليهم حيخاف ويدخل جحره اما كل يوم كلام وتوك شو وزياد وعمر ووائل فسلميلي ع الثورة واللي كسبته ر

ملكش دعوة said...

والله انا حزينه ومقهوره وكل مشوف منظر مظاهرات الاقباط ابقي عايزه اغطي عليهم بديل جلابيتي
يادي الغلب ..بيعملوا كده ليه هو انتو عايزين تضربوا الارض تطرح بطيخ .طب الارض بور ومتجرفه ومدفون فيها نفايات سامه شمروا وانزلزا اعزقوا وطهروا وبعدين ازرعوا هي ناقصه الناس دي يا مضحوك عليها يا فاهمين وبيستهبلوا حد يفهمني هما مستنين ايه في ماسبيرو كفايه فضايح بقي والله انا حسه ان البلد بتتعري ولحمها مكشوف استروا عليها ربنا يستر عرضكوا ايه هي مش نهبه!!!!!!!!!! الكلام ده لكل التظاهرات الفئويه والطائفيه حرام عليكوا اعتبروها بلدكم فكروا شويه بلاش الغباء ده جابنا ورا

Unknown said...

ياست الكل يا نواره الأنتصار انا قارئه مدوامه الكلام كتير و الاراء و التحليلات و الفلسفه اكتر مشكلتنا الحقيقيه فى الظرف الدقيق دا و بعد نجاح الثوره فى تحقيق حاجه مهمه و هى خلع النظام عندنا حاجه اهم بكتير و انا مش فاهمه يعنى ايه مثلا استفتاء على مواد اتعدلت من دستور مرقع اصلا مش الدستور سقط مع النظام ليه الجيش مايعملش الى كل الناس طلبته و بسرعه مجلس رائس و تاسيس لجنه لوضع دستور جديد و بعدها انتخابات زى كل الدنيا ماعملت الفتنه دى زوبعه فى فنجان هاتغور بسرعه ان شاء الله مهما كان اللى وراها بس المهم التاسيس للديمقرطيه الى ناس ماتوا علشانها ربنا يحمى مصر و يصونها و يارب صوتنا يوصل للجيش و حكومه شرف

Unknown said...

ياست الكل يا نواره الأنتصار انا قارئه مدوامه الكلام كتير و الاراء و التحليلات و الفلسفه اكتر مشكلتنا الحقيقيه فى الظرف الدقيق دا و بعد نجاح الثوره فى تحقيق حاجه مهمه و هى خلع النظام عندنا حاجه اهم بكتير و انا مش فاهمه يعنى ايه مثلا استفتاء على مواد اتعدلت من دستور مرقع اصلا مش الدستور سقط مع النظام ليه الجيش مايعملش الى كل الناس طلبته و بسرعه مجلس رائس و تاسيس لجنه لوضع دستور جديد و بعدها انتخابات زى كل الدنيا ماعملت الفتنه دى زوبعه فى فنجان هاتغور بسرعه ان شاء الله مهما كان اللى وراها بس المهم التاسيس للديمقرطيه الى ناس ماتوا علشانها ربنا يحمى مصر و يصونها و يارب صوتنا يوصل للجيش و حكومه شرف

Unknown said...

rabna ma3ana in sha2 alah

Early bird said...

مالناش الا اننا نقول يارب ويرد عنا كيد الكائديين والمتربصيين من الداخل والخارج وعلى فكره فعلا الموضوع دهمن بدايه الثوره ربانى اساسا اللهم اجعل تدميرهم فى تفكيرهم

يا رب الموضوع بقى يتحل علشان نفضى بقى لحكايه التعديلات فيه ناس كتير متبنيه حمله ان الناس تقول لا لتعديلات الدستور

مش عارفه هو مش كده احنا نلبس فى الحيطه ويبقى الناس مبسوطه من الدستور القديم وعايزيين مبارك وابنه ويبقى اللى بيقولوا ان الثوار قليليين وان الاغلبيه الصامته المؤدبه اللى ملهاش فى المظاهرات اللى فى البيوت نزلت وقالت رايها

اصل اللى فى الفيس بوك بيقولوا ان الناس لو صوتت لا للتعديلات يبقى كده معناه انهم يغيروا الدستور

Early bird said...

مالناش الا اننا نقول يارب ويرد عنا كيد الكائديين والمتربصيين من الداخل والخارج وعلى فكره فعلا الموضوع دهمن بدايه الثوره ربانى اساسا اللهم اجعل تدميرهم فى تفكيرهم

يا رب الموضوع بقى يتحل علشان نفضى بقى لحكايه التعديلات فيه ناس كتير متبنيه حمله ان الناس تقول لا لتعديلات الدستور

مش عارفه هو مش كده احنا نلبس فى الحيطه ويبقى الناس مبسوطه من الدستور القديم وعايزيين مبارك وابنه ويبقى اللى بيقولوا ان الثوار قليليين وان الاغلبيه الصامته المؤدبه اللى ملهاش فى المظاهرات اللى فى البيوت نزلت وقالت رايها

اصل اللى فى الفيس بوك بيقولوا ان الناس لو صوتت لا للتعديلات يبقى كده معناه انهم يغيروا الدستور

Unknown said...

صح جدا الكلام دة...وياحنا يا امن الدولة فى البلد ده...هنرووح بكرة كلنا احنا المسيحين و المسلمين هنكيد امن الدولة و الاعاااادى ان شاء الله...واى حد هيستغبى مش هنسيبو...مش الاغبيا او الحزب الواطى او زفت الدولة هما الى هيبوظولنا الى طفحنا الكوتة علشانه...ياااااااااارب يا نوارتى

Anonymous said...

ياااااارب بحق موسى والمسيح ابن العدرا ومحمد احقن دماءنا وعقّلنا كلنا ونزلنا التحرير وقف معانا في معركتنا ضد اللي خانوا مصر والمصريين بكرة يا رب
آمين

Unknown said...

تسلم ايدك يا نوارة

Anonymous said...

يا رب ييجي اليوم اللي نشوفك طالعة توعي الشعب في تليفزيون الشعب بدل الخاين اللي اسمه تامر أمين اللي جايب بتوع أمن الدولة
حرام الكلام ده مايوصلش للناس

tahrir said...

هيييييه
انا جالي تهديد
رسالة على الموبايل فيها كلام خايب و في للاخر نعم لمبارك
تلاقيهم نواب الحزب الوطني في الصعيد لسه ما وصلتش ليهم الاخبار
مع اني لسه مدون مبتدء

shaarawim said...

It's seriously dangerous times. We must understand that our ONLY weapon is our unity. If we lose this, we lose everything. I disagree with issuing a comforting statement by supreme council. We must be addressed ONLY as a nation in anything that relates to the revolution or it's members. On the other hand, I completely agree with all said by nawara and apart from the statement, I send the same messages she sent to the same people

God save EGYPT

صمت الحملان said...

ربنا يسترها معاكم يانوارة ويحفظكم بالاسلام قائمين وقاعدين وراقدين ولا يشممت بنا ويكم الاعداء والحاقدين اللي حصل دا شغل من اشتغالات البلطجية ولازم يعرف اخواتنا النصاري الكلام دا كويس النظام المخلوع لايهمه نصاري ولا مسلمين دا كلمة كافر شوية عليه هم كل اللي يهمه يرجعوا السلطة ولو ابادوا نص الشعب مش فارق معاهم بجد خايفه جدا عليكوا وعلي الثورة ومش هاقول غير ربنا ينصر بلدنا وشعبها علي كل خائن يكفينا شر كل من اراد اهلها بسوء

Unknown said...

يارب .. بس من غير حكاية البوس دي :-)
--------------------------------------------------------------------------
بكرة في التحرير ان شاء الله للمطالبة بدستور الثورة وحل زفت الدولة .. ارجو النشر
المطالبة بدستور جديد لمصر...مفيش اهم من دستور مصر
http://www.facebook.com/event.php?eid=182699108441780
V.V.V.I. please read
http://www.facebook.com/note.php?note_id=114881305256079
http://www.facebook.com/note.php?note_id=115160971894779

amt said...

مش احنا لسة في حالة طوارئ؟
ليه ما نضغطش على الجيش بكرة يعتقل صفوت و زكريا و سرور و شهاب و قيادات خراب الدولة و باقي رؤساء عصابات الوطني و البلطجة بموجب قانون الطوارئ والاشتباه في التأمر و التخريب

liel99 said...

:)
ya rab
ana 7agi bokra ma5soos we anzel taltish bel alam
:)))

ya rab kamlha 3lina belsatr
ya rb estorha m3 el3'laba
ya rab estorha m3 masr
dodda

Anonymous said...

ان شاء الله تكسبي يانوارة

nour1971 said...

بسم الله الرحمن الرحيم

و يمكرون و يمكر الله و الله خير الماكرين

صدق الله العظيم

انشاء الله ربنا حا يوفق مصر و يجعلها بلد عظيم ربنا قال لنا ايه لو الطغاه زادوا في طغيانهم و نشروا في الارض فسااااااااادا لو احنا مغيرناهوش بأدينا حا يبدلنا بقوم خير منا و الحمد لله ان الشعب كله طلع علشان يغير الفساد الي انتشر في البلد بالعبيط فبإذن الله ربنا عمره ما حا يسبنا بس عمليه الولاده متعسره جامد ولازملها عمليه صعبه علشان المولود الي طالع يبقي مولود كويس بإذن الله

Unknown said...

كتير من الناس يا نوارة وحضرتك على رأسهم كنتم فاكرين مجرد رحيل الرئيس مبارك الدنيا خلاص تكون هادية، وجايز حاولت أشرح النقطة دي هنا أكتر:
http://3ayezjob.blogspot.com/2011/02/8.html

لذلك تلاقي ناس كتير مش متنبهين لنقطة المجتمع دي ومش عارفين يفسروا المظاهرات الفئوية وغيرها فيقوموا راميينها على حكومة شفيق والحزب الوطني وأمن الدولة لدرجة أنا ح أتجنن، طيب لو الحزب وأمن الدولة فادرين يحركوا كل الناس كده طيب كان من الأولى تحريكهم أثناء وجود الرئيس مبارك.

للأسف فئات اجتماعية كثيرة خرجت من السيطرة (النموذج العراقي والغزاوي وأخيرا التونسي)، وهو ما كان الرئيس مبارك من وجهة نظري يتحفظ بسببه على التنازل عن السلطة وليس كما روج البعض من أنه متمسك بالسلطة أو ناهب للثروات وإلا لكان هرب خارج البلاد ومليون بلد ترحب به وعرضت عليه ذلك كما قرأنا جميعا.

ويبقى الأمل في الله كبيرا ثم في سر يحتفظ به المصريون يفسر تماسكهم على مر السنين

رغم اختلافي الكامل مع حضرتك لكن أحترم حماسك رغم أنه أحيانا كثيرة في الاتجاه الخطأ للأسف، وتحيا مصر.

Omadham said...

اللهم انت ولينا سبحانك
لا إله إلا أنت
عليك توكلنا
و إليك أنبنا فانصرنا على القوم الظالمين

محمد طنطاوي said...

اللى رايح ميدان التحرير بكرة إن شاء الله أمن الدولة هيحاول يعمل بلبلة وفتن ومشاكل بين الناس يعنى يقول الشخ الفلانى مات ويختار شيخ مشهور ، الكنيسة الفلانية اتحرقت فتنة طائفية يعنى ، الكلام دا أكده عقيد شرطة سابق من واشنطن من شوية على قناة الجزيرة اسمه عمر عفيفى يعنى كلام أكيد كلنا نخلى بالنا ولازم نركز على حل أمن الدولة ويارت الحاضر يبلغ الغايب

monasoly said...

انت والله بنت جدعه يانواره ربنا يحميك ويحرسك انت وكل المصريين اللى زيك وربنا معاكو بكره وتعدى على خير وليكم كل الاحترام لان انتوا اللى بيطلق عليكم اسم الرواد او الصفوه وفقا للمنحنى الاعتدالى لفئات اى شعب فى العالم كما يذكر دكتور احمد عكاشه ويارب كل اللى مش قادر يشارك غير بالدعاء يدعى ليكم ولكل المصريين بكره وتمر بسلام

Unknown said...

يارب انصرك يامصر. لازم كلنا نعرف ان مينفعش ناكل فى طبق مازال به بعض الواسخة . لازم نغسالوا كويس ونظافوا علشان ناكل على نظافة . والواسخة دة هى امن الدولة الوسخ . ان شاء الله بكرة ربنا يعنه و نتخلص منه الى الابد . ومن بلطجية الحزب اللى مش وطنى . ونطلبوا من جيشنا بكل ادب انهم يحققوا لنا مطلبنا بالتخلص من هذا الجهاز الفاسد. كلنا يدا واحدة و مطلب واحد . امن الدولة الواسخ لازم يمشى. يارب تقومى بالسلامة يامصر . وتكيدة كل عوزالك . يارب يارب يارب يارب يارب يارب يارب

ندا منير said...

يارب ربنا يستر بكرة ان شاء الله

بكرة ممكن يبقى يوم الحسم لمصر اللى جاية

وبجد فى ناس عمالة تنخرب وتبوظ كل حاجة صح بتتعمل

ابن طفيل said...

ما دمتم مصممين فانتم يا دعاة المسيرة قد ترون ما لا نراه .. اللهم سدد خطاكم وبارك .. عليكم النداء وتوكلوا على الله ..حفظكم الله ..رعاكم الله .. اعانكم الله.. لا نملك الا الدعاء ونحن خارج مصر.. ومبروك حل المجالس المحلية والمسيرة الجاية لالغاء الاستفتاء والدعوة لمجلس رئاسي واعلان دستورى ولجنة تأسيسية.. وربنا يسترها معاك يا مصر يا قلبنا الموجوع

assour said...

لا تحزني ان الله تحزني ان الله معنا
و يمكرون و يمكر الله
علينا السعي و الله عليه الستر و الهدف

مصر المحروسة في السجن محبوسة و في سجانها ناسج قضبانها و جنده مرصوصة و ناسي السجان ولادها الجدعان انسهم من الجان و حاجة كده مخصوصة و طلعت عيال شالت الحبال و فكوا الأسير و و العصابة بلبوصة و هي دي يا خلق مصر المحروسة

neveen said...

ربنا معانا ومع مصر

بهيج الشرير said...

والنبي ياأبلتي أنا عندي إقتراح! إيه رأييك لو نكافئ ونفرج عن الواد اللي صوابعه تتلف في حرير اللي تحرش جنسيا بالعهري وبعبصه في السجن؛ ولو عايز يكون أنونيمس فممكن نعمله تمثال البعبوص المجهول

Anonymous said...

الثورة,من المفروض,أنها قد صححت كل الإعوجاجات,حل أمن الدولة,حل حزب الفساد الصهيونى,حل المحليات,لجنة تأسيسية منتخبة,لعمل دستور جديد.الروشتات معروفة,لكن,الله يكون فى عون المجلس العسكرى,لأن الثورة أعداؤها كثر.يارب,غدا,يمتلئ ميدان التحرير

Unknown said...

ثورة مضاده ثورة مضاده ثوره مضاده ثوره مضاده ....... مش ملاحظين أن انتم انشغلتم بيها عن أهداف الثورة الحقيقية وده في حد ذاته مكسب ليهم مش ليكم
تاني حاجه : دخل في قلوبكم الشك والخوف ودول إجتماعهم بيلغوا العقل وده مكسب تاني ليهم
هما متفقين على مبدأ واحد هو إحداث الفوضى بكل أشكالها بداية بخروج المساجين حتى بعد الثوره ونهاية بأحداث الفتنه الطائفيه ويا عالم بكره هيبقى إيه.. ده مكسب ثالث ليهم وبصراحه ناجحين فيه أوي .... يا ترا إيه سر نجاحهم .... انا عرفه كويس ومش هقوله علشان كلنا دايما بنزعل من الحقيقة

بس ان حابب أذكركم بشيئ من الماضي ليس ببعيد وهو يوم 25 يناير انتوا كنتم كام واحد طلع في اليوم ده وكلكم كنتم طالعين وعارفين إيه إلي مستنيكم من ثورات كتير مضاده زي الأمن المركزي وزي أمن الدوله وزي الإعلام المصري وزي الحزب الوطني وغيره من قوى أخرى ... ورغم كل القوى المضاده دي نجحتم في تحقيق جزء من أهدافكم
وحاليا انتوا انشغلتم بالناس " يا ترى هيجوا كتير ولا شويه " أكتر من أنشغالكم بتحقيق أهدافكم ..أرجوكم كل واحد يعمل إلي عليه وميفكرش في غيره يمكن غيره يكون "جعان وخايف أو خايف ومش فاهم أو جعان ومش فاهم" وده حال معظم المصريين ( المتفرجين ) ودول معذورين لأنهم شغالين زي الرحايه مفيش وقت عندهم للتفكير ... هنفكر ولا هنأكل عيالنا .
بس في النهايه تأكدوا إلي هيقف معاكم ( بمعنى هينزل الميدان ) هيبقى فاهم جدا يعني إيه حريه ويعني إيه عدالة إجتماعيه ويعني إيه مساواة .. ودي في الحقيقة مكسب كبير ليكم لإن في ناس كتير مكنتش فهمه المصطلحات دي وحاليا بدأت تفهمها وبيضموا صوتهم لصوتكم ودي حالة انتشرت في معظم الطبقات الأغنيه والفقراء وده إلي يبرر ان كل يوم بتلاقوا ناس جديده نزله الميدان "وجوه جديده "
انتوا بتعملوا حساب للبلطجيه جامد أوي ... بكل بساطه هما أضعف بكتير من الأمن المركزي إلي انتم وقفتم في وشه ودمرتوه هتيجي على البطلجيه .. بس مش معنى كده أنهم ضعفاء لا هما أقوياء بس قوتهم بتستمد دايما من موقف القوى المسيطره ...انت بتقول إيه ازاي .... القوى المسيطره دايما بتبقى شايف البلطجيه من بعيد وبيسيبهم وبيبقى عارف انهم بلطجيه .. تتحرك امته بقى القوى المسيطره لما يسمع أي إشاعه أن في عسكري منه أتأذى أو حصله حاجه يبدأ يتحرك ... بيعمل إيه ... يبدأ يمسك .. يمسك مين ... يمسك بلطجيه ومتظاهرين مع بعض ومش بيفرق ما بينهم إلا بعد الترحيل يبدأ يفرق بينهم بس المشكله البلطجي بيبقى معاه سنجه وسيف وسلاح كمان وتصرفاته بتدل عليه قبل الترحيل .. بيبقى باين اوي أمال احنى بنقول عليه بلطجي أزاي... وتيجي القوى المسيطره متتحركش إلا لما يحصل أشتباك ما بين المظاهرين المسالمين والبلطجيه إلي واضحين وضوح الشمس انهم بلطجيه امام الجميع قبل ما يحصل أشتباك ..وفي الأخر تيجي القوه المسيطره تلم الكل . هتقولي ليهم قائد وليهم مخطط ماشيين عليه هقلكم بكل بساطه لو القوى المسيطره فضلت على الموقف السلبي لمواجهتهم هيبقوا اقوياء والعكس صحيح

وخليكوا فاكرين أن القوى المسيطره مش بتسمع الكلام إلا بالضغط عليها والأيام إلي فاتت أثبتت كده وامن الدوله عايز ضغط من نار علشان يتحرق ويغور بزنازينه وكلابه وحراسه وياريت متبطلوش ضغط
والله انا كان جوايه كلام كتير حابب أقوله بس زعلت لما لقيت نبرة صوتكم فيها خوف وفيها تشكيك وفيها حزن وده ناتج عن تفكيركم في الثورة المضاده
وفي النهاية اتمنى توحيد الصفوف تحت راية واحده
وفقكم الله في مسيرتكم غدا

وشكرا

Unknown said...

جر الأقباط إلى الفخ
يستحيل أن تقنع بلطجيا أن ما يفعله إجرام، ويصعب أن تقنع جاهلا بأن ما يقوله خطأ، وليس سهلا أن تقنع أحد المستفيدين من وضع قديم بأن العهد الجديد النظيف قد يفيده أيضا وربما أكثر.

كل ما سبق قد يبدو منطقيا ومفهوما، لكن ما هو ليس مفهوما بالمرة هو موقف كثير من الأخوة الأقباط سواء المعتصمين أمام مبنى التليفزيون فى ماسبيرو أو أولئك الذين يغلقون المحور عند ميدان لبنان حينا أو طريق الأوتوستراد عند المقطم ومنشية ناصر أحيانا.

لا أدرى هل يدرك هؤلاء ومن يحركونهم أنهم قد يدخلون التاريخ من أسوأ أبوابه، وقد يتذكرهم الناس باعتبارهم الذين حاولوا إفشال الثورة لمصلحة القوى المضادة المنتمية للعهد البائد.

من قبيل التكرار أيضا تفهم غضب وثورة الأقباط، وحقهم فى التظاهر بل وحقهم فى الحصول على ضمانات تمنع تكرار ذلك وتضمن لهم مستقبلا يتعامل معهم باعتبارهم مواطنين يتمتعون بكامل حقوق المواطنة وليسوا أبناء أقلية دينية.

قلنا ذلك وقاله غيرنا كثيرا أثناء فتنة تفجير كنيسة القديسيين فى الإسكندرية أوائل العام، وإذا كنا قد ناشدنا الأخوة الأقباط وقتها ضرورة التمييز بين الحق فى التظاهر وبين فخ الوقوع فى الجيتو والتقوقع والانفراد، فمن باب أولى ألا يقعوا فى نفس الفخ هذه الأيام لأن التكلفة السياسية والتاريخية والاخلاقية ستكون باهظة، وهم أول من سيدفعون ثمنها.

الذى يحدث هذه الأيام كارثى وينذر بما هو أكبر من الكارثة.. المعتصمون أمام التليفزيون يتعاملون باعتبارهم أقباطا وليسوا مصريين.. يرفعون شعارات طائفية مفرقة وليست وطنية جامعة يرفعون الصليب بدلا من علم مصر.

والذين يقطعون الطريق فى منشية ناصر والمقطم وميدان لبنان وفوق كوبرى أكتوبر، بدأوا يستخدمون الطوب والحجارة لتعطيل المرور، وقد يستخدمون السنج والمطاوى والسيوف غدا، وربما الأسلحة النارية بعد غد.

وفى ظل ماكينة شائعات نشطة وخبيثة تتحدث عن حرق مسجد هنا وكنيسة هناك، ومقتل شخص هنا وآخر هناك، لن نعدم وجود شرارة صغيرة تقود إلى الحريق الكبير، الذى لن يجهض الثورة فقط، بل قد يقود إلى حرق الوطن بأكمله، وهو ما سيسعد المتآمرين على الثورة فى الداخل وكل أعداء الوطن فى الخارج.

يدرك عقلاء الأقباط أن قادة كنيستهم قد تاجروا بالقضية القبطية، ورهنوا كل مطالبهم العادلة عند النظام البائد، وكانوا ألعوبة وأداة فى يد الأجهزة الأمنية، مثلما كان بعض السلفيين المسلمين أداة فى يد نفس الأجهزة، وأن كل ما حدث فى أطفيح لم يكن موجها ضد المسيحيين بل ضد كل الوطن.

إذا كان العقلاء يدركون ذلك، فهل يقنعون الشباب القبطى الثائر بالتعقل أم بالانجراف نحو الهاوية.

إذا كنا نطالب أصحاب المصالح الفئوية بعدم الانتهازية والانتظار حتى تستقر الأوضاع، فمن باب أولى أن نطالب عقلاء الأقباط بذلك.

على كل قبطى أن يدرك أن خلاصه وحل معظم مشاكل طائفته المستعصية منذ سنوات ــ لن يتحقق إلا بنجاح الثورة ونسيان حكاية مسلم وقبطى.

على كل قبطى أن يدرك أن رهانه على أجهزة الأمن يشبه «عشم إبليس فى الجنة».

يا أيها الأقباط.. مبارك رحل والحزب الوطنى احترق وأمن الدولة سقط.. وليس أمامكم إلا التعاون مع الثورة والمشاركة فى إنجاحها أو فلتتحملوا مواجهة التاريخ.

عماد الدين حسين ..الشروق
http://www.shorouknews.com/Columns/column.aspx?id=405406

BT said...

و الله كل البلاوى و المشاكل ديه تتحل ببساطه لو الجيش أتلحلح كده شويه ولم حسنى و اعوانه اللى سيبهم يرتعوا فى البلد ويولعوا فيها لحد ما يهلكونا ويقضوا علينا و كأن المقصود اننا نزهق او نيأس او نرضى بالهم بقى وخلاص
و الله انا مش فاهمه لحد دلوقتى الناس ديه مش محطوطه تحت الأقامه الجبريه ليه ومسموحلها عادى تعمل اتصالات و انتقالات و عايشه حياتها و كلنا عارفين انهم سبب اللى بيحصل ده كله
هو قانون الطوارىء اللى قعد يطبق على الشعب الغلبان 30 سنه من غير ما يكون فى طوارىء مش اولى يطبق دلوقتى على العصابه ديه ويتلموا فى حديد كلهم

حسبى الله ونعم الوكيل فى صاحب القرار و اللى ممكن يريح البلد و ساكت ومصهين

Unknown said...

والنبي تفهمينا احسن انا مش عرفه انام
http://www.youtube.com/watch?v=xiRu8bZBXfM

محمود نجيب said...

الفتنة القادمة رياضية (اهلي و زمالك) و اللي حصل في ساقية الصاوي النهارده اكبر دليل
لما بعد حفلة بلاك تيمة النهاردة مجموعة كبيرة من الشباب يرددوا هتافات للاهلي بدون داعي اساسا و يشتموا بدون سبب و يولعوا شماريخ و بعدها تحصل اشتباكات بسيطة بينهم و بين بعض مشجعي الزمالك خارج الساقية و بعدها بكام ساعة رحت العجوزة لقيت خناق...ة مفتعلة و شماريخ ؟؟؟؟؟؟؟

Unknown said...

لافض فوكى يانوارة

يحرق أم الإعلام ابن الكلب بتاعنا
نص اللى اعرفهم تراجعوا بسببه

AME said...

نوارة، و مش حأقولك يا بنتي، رغم إنك ممكن تكوني بنتي، قلبي و روحي معاكوا. أنا شوفت مداخلة بلال فضل مع المحترم يسري فودة. وأعتقد إن بلال فضل على حق في رؤيته المتعلقة بعدم حل أمن الدولة. حيث أنه وثق رؤيته بتجارب وتاريخ شعوب أخرى.
فتنة الأقباط والمسلمين فتنة ملعوبة و مستهكلة، وسواء أكنا أقباط أم مسلمين فالوطن واحد.

و بجد ولو إنه مش وقته لا البابا شنوده ولا شيخ الأزهر السابق ولا الحالي يمثلون أي شئ بالنسبة للواعين من الديانتين. الإثنين تبع النظام الرث. تبع العصابة اللي كانت ترهب كل المصريين قبل 25 يناير.

فكفاية بقه عبط، اللي بيزرع الفتنة لا هما أقباط ولا مسلمين. إصحوا للون. المسألة ، القضية، الهم، هى مصر.

Cairo Loco list said...

The ignorance of the Christian Egyptians issues in the blog comments is sad and ironic in the same time .
Nawara what did you expect people to do seeing their church is being burned down by the mob ? and no one raised the finger, let me update you .. the mob continued to destroy it with the army presence who couldn't /wouldn't act .. and you wonder why they are in Maspero ?
I wonder if some Christians mob burned down a mosque would would the reaction be ?
for your info the Pope already asked them to go home so did several of the church leaders but you have people like Michael Mounir using the situation and the lack of action from the army than Sharaf PROVOCATIVE words that the Church will be built elsewhere didn't help

It's the first time you write without having all the details about the subject
Amn eldawla are using the ignorant easy to manipulate muslims and the educated muslims are just blaming the christians for trying to save their church instead of heading to Atfih (they did it yesterday but that's a WEEK TOO LATE and after the situation escalated to Msqpero)

Solve the Atfih problem so you can stop the likes of Michael Mounir from taking advantage of the situation
@ El Democraty , i think the law allow demonstrations and if no one is listening to the crying voices in Atfih the "turn a blind eye " led to the Egyptian christians going down in the streets .. kindly note it wasn't the first attempt , the people called the army , called the police .. the army came and didn't do a thing to stop them in short they were afraid .. even now with the situation wide open you are sending people to talk sense.. imagine that ?? they don't give a damn about the army words and you wonder why the Copts are in the street ???! as i said to Nawara.. imagine this was a mosque.. would the reaction of the army and the people wait for almost 2 weeks ??!

@واحد من الناس " متقلقيش على شوية الاوباش بتوع ماسبيرو والزراريب , دي محنة اخيرة وحتعدي غظب عنهم علشان اقصى الراديكاليين من الاسلاميين حاليا ملتزمين بضبط النفس علشان ميبقوش سبب ضياع الثورة وده حيخلي الحريقة من جانب واحد وحتنتهي بانها حتلتهمهم هما واي مكسب حياخدوه بلوي الدراع حيخسروه من مشاعر الترابط الحقيقة من المسلمين في الشارع "
Thanks for the "Obash" la wehda watania fa3lan.. salamly 3ala el salafain we habiabhom emn el dawla ely kano beydrabo naar 3ala el nas we beysta7'bo wara el dababa fi manchiat Nasr.. maybe you should go and ask the people Muslims and Christians what really happened

AME said...

نوارة، و مش حأقولك يا بنتي، رغم إنك ممكن تكوني بنتي، قلبي و روحي معاكوا. أنا شوفت مداخلة بلال فضل مع المحترم يسري فودة. وأعتقد إن بلال فضل على حق في رؤيته المتعلقة بعدم حل أمن الدولة. حيث أنه وثق رؤيته بتجارب وتاريخ شعوب أخرى.
فتنة الأقباط والمسلمين فتنة ملعوبة و مستهكلة، وسواء أكنا أقباط أم مسلمين فالوطن واحد.

و بجد ولو إنه مش وقته لا البابا شنوده ولا شيخ الأزهر الأسبق ولا الحالي، يمثلون أي شئ بالنسبة للواعين من الديانتين. الإثنين تبع النظام الرث. تبع العصابة اللي كانت ترهب كل المصريين قبل 25 يناير.

فكفاية بقه عبط، اللي بيزرع الفتنة لا هما أقباط ولا مسلمين. إصحوا للون. المسألة ، القضية، الهم، هى مصر.
و ثورة مصر اللي لو نجحت و صدقوني، حتغير وجه العالم كلوا.

nosseir said...

الموقف كالتالى
شباب مسلم تم تسخينة من قبل امن الدولة وحرقوا كنيسة ومعتصمين فيها
المسحيين غاضبين وبرضة امن الدولة مسخنهم وعاملين اعتصام قدام ماسبيرو
الجيش مش عايز يفض اعتصام الشباب المسلم داخل الكنيسة بالقوة لان دة هيعمل احقاد فى القرية وهيكون لة تأثير على المدى الطويل
الجيش برضة مش عايز يفض اعتصام المسيحيين قدام ماسبيرو بالقوة لانهم هيقولولك روح فض اعتصام المسلمين داخل الكنيسة الاول
الحل هو فى اعتقادى هو تدخل عدد اكبر من الشيوخ اللى بيحبهم الناس لفض اعتصام الشباب فى الكنيسة الاول ...ثم البدء فى اعادة بنائها...وبكدة يكون فى دور على القساوسة اللى بيحبهم الناس ايضا لفض اعتصام المسيحيين فى ماسبيرو
يعنى مش محمد حسان وحدة يروح...فين باقى مشايخ السلف وفين شيخ الازهر بنفسة ينزل...شيخ الازهر اللى بيدعى انة كان مع الثورة ...اهو الثورة فى خطر يا سيدى...خذ موقف واذهب بنفسك
ربما هذا يكفر عما فعلتة ضد الثورة

محمد said...

فلو تركوا وما يفعلون لهلكوا وهلكوا جميعا .. ولو أخذوا على أيديهم لنجوا ونجوا جميعا .. صدق رسول الله صلى الله عليه وسلم

أرنوب said...

اللي عايز يبقى لوحدة يتجاب غصب عنه ويتباس ويتحضن ولو فلفص يتطلش بالالم ويتباس ويتحضن تاني غصب عنه
واللي قافش يقفش على امه، مش على بلدنا
عليا النعمه إنتي شربات بجد يا بت يا نوارة .. الله يخرب بيت جنانك يا بنت عم نجم .. عارفه .. أنا نفسي الثورة دي تنجح وتوصل لأهدافها عشان إنتي بالتحديد ما ينكسرش قلبك

elzahraamegahed said...

تعديلات دستوريه معيبه
حكومه بها رموز كريهه
قيادات الاعلام المرئى والمقروء زى ما هما
ممكن نركز شويه عشان حرااام أوى لو معملناش دستور جديد
كفايه الحكومه اللى رقعوها لنا
مش عايزين دستور مرقع

elzahraamegahed said...

اننا نعمل مجلس شورى ده اسمه استهبال
ان مجلس الشعب يبقى فيه خمسين فى الميه عمال وفلاحين وفيه كوتة مرأه ده جنان
انه ما يبقاش فيه حد أقصى لسن المرشح للرئاسه ده أمر غير مفهوم
وبعدين أنا عايزه افهم هو ليه عدلوا المواد 67 و77 هو مش المفروض ان انتخبات مجلس الشعب الاول والمجلس هو اللى هيعمل دستور جديد
ولا هو فيه احتماليه ان الرئيس يجى هو الاول ، طب لو كده معدلوش اختصاصاته ليه ،
اللى بيحصل ده تهريج

omar said...

ياااااااا رب

kiki said...

يا رب... لكن مافيش حاجة مخوفاني زي الثقة الزايدة في الجيش... أنا لسة شايف 3 فيديوهات لشباب عذبهم الجيش و مالهمش دعوة بحاجة يعني مش بلطجية... قلتلك احنا عندنا مشكلة شفافية و الجيش بياخد معانا اجرآت و مش معرفنا السبب... لك الله يا مصر

elzahraamegahed said...

سيبنا الاصل ومسكنا فى الفرع

حاصرنا لاظوغلى والحكومه بتترقع

وترقيع الدستور هيتم هو كمان واحنا ولا احنا هنا

ولا تعرف اذا كان الرئيس هيجى الاول طب صلاحياته ما اتعدلتش ليه؟
طب مجلس الشعب الاول طيب ما اتلاغش 50 فى الميه عمال وفلاحين وكوته المراه ليه وما اتلغاش النظام الفردى ليه ويبقى النظان بالقائمه النسبيه غير المشروطه
(
الانتخابات البرلمانيه بالنظام الفردى غايه فى الخطوره لأن لسه الوعى السياسى عند البسطاء لم يشكل لمعرفة كيفية الاختيار الانسب، والحل هو الانتخابات بالقائمة النسبية غير المشروطه فى نظام برلمانى (ميزة النظام ده أن الانتخاب بيبقى لبرامج الاحزاب مش لافراد وكل الاحزاب بتتمثل فى البرلمان حسب نسبة الاصوات اللى اخدتها ، يعنى بمقدار الاصوات اللى اخدتها الاحزاب بياخدوا عدد مقاعد فى البرلمان)


تعديلات دستوريه معيبه
حكومه بها رموز كريهه
قيادات الاعلام المرئى والمقروء زى ما هما
ممكن نركز شويه عشان حرااام أوى لو معملناش دستور جديد
كفايه الحكومه اللى رقعوها لنا
مش عايزين دستور مرقع

elzahraamegahed said...

رأى سياسيين ونشطاء كتير ويا ريت اللى مقتنع بيه ينشره
اننا نرفض التعديلات الدستوريه واننا نصر على تعديل كلى للدستور وان يمد المجلس اشرافه على البلاد لحين عمل انتخابت برلمانيه بالقائمة النسبية وبعدها يكون هناك انتخابات رئاسية .
بمعنى ان الحل يبقى:
- نصوت برفض التعديلات الدستورية لاجبار المجلس على عمل دستور جديد
- نشتغل بنظام القائمة النسبية غير المشروطه فى نظام برلمانى (ميزة النظام ده أن الانتخاب بيبقى لبرامج الاحزاب مش لافراد وكل الاحزاب بتتمثل فى البرلمان حسب نسبة الاصوات اللى اخدتها ، يعنى بمقدار الاصوات اللى اخدتها الاحزاب بياخدوا عدد مقاعد فى البرلمان)
- المجلس يطول الفتره الانتقاليه 3 شهور زيادة لحد ما الاحزاب الجديدة تشم نفسها وتلحق تعلن برامجها وكده كده هيبقى لها تمثيل لو اشتغلنا بالقائمة النسبيه
ولو المجلس مستعجل يشكل مجلس رئاسى يا اما يتحمل تلت شهور زياده وهو كده كده فى قراره قال 6 شهور او لحين انتخاب الرئيس

elzahraamegahed said...

رأى سياسيين ونشطاء كتير ويا ريت اللى مقتنع بيه ينشره
اننا نرفض التعديلات الدستوريه واننا نصر على تعديل كلى للدستور وان يمد المجلس اشرافه على البلاد لحين عمل انتخابت برلمانيه بالقائمة النسبية وبعدها يكون هناك انتخابات رئاسية .
بمعنى ان الحل يبقى:
- نصوت برفض التعديلات الدستورية لاجبار المجلس على عمل دستور جديد
- نشتغل بنظام القائمة النسبية غير المشروطه فى نظام برلمانى (ميزة النظام ده أن الانتخاب بيبقى لبرامج الاحزاب مش لافراد وكل الاحزاب بتتمثل فى البرلمان حسب نسبة الاصوات اللى اخدتها ، يعنى بمقدار الاصوات اللى اخدتها الاحزاب بياخدوا عدد مقاعد فى البرلمان)
- المجلس يطول الفتره الانتقاليه 3 شهور زيادة لحد ما الاحزاب الجديدة تشم نفسها وتلحق تعلن برامجها وكده كده هيبقى لها تمثيل لو اشتغلنا بالقائمة النسبيه
ولو المجلس مستعجل يشكل مجلس رئاسى يا اما يتحمل تلت شهور زياده وهو كده كده فى قراره قال 6 شهور او لحين انتخاب الرئيس

Anonymous said...

يارب أحفظ مصر من كل سوء

Shoukry said...

I don't like seeing any of my Muslim brothers getting annoyed from the Coptic demonstrations which said a lot of slogans that are not appropriate especially after our great revolution. I would like them to know that many christians are also annoyed as much as them.

I am sure you understand the hurt it causes when you see your worship house being demolished this way and I am sure you understand how they feel. Please, Accept my apology as one of the christians

Now, back to what is important, Watch this video by our of my church members
http://www.youtube.com/watch?v=tIh2qgmfi4c&tracker=False

Also, watch this very important video about constitution amendments
http://www.youtube.com/watch?v=lRJF4pBXyU8

Shoukry said...

I would like to add one more thing, if you allow me, the christians in this country are brave and want to live in peace with muslims

Read this
http://www.almasryalyoum.com/node/348306

Although they were revolting, they protected the mosque and because they know if they did demolish it (they were able to do so). They will give the cowards the opportunity to continue the sectarian strife. Unlike the cowards who demolished the church because of a rumor! They thought the coptic scripts (written in coptic letters - like greek letters), a magic scripts!

أرنوب said...

وبالنسبة لتعليق الأخت : نونا أرى أن معها مليون حق في اللي كتبته وقد سبق لي أن كتبت هنا وأعلنت بوضوح إن زكريا عزمي لما قال اللي قاله مكنش بيكدب لأنه مايستجريش يقول كده لو لم يكن حقيقي خصوصاً أنه لم يقله في (قعدة) خاصة .. ده قاله في مداخلة تلفزيونية لبرنامج شهير يراه الملايين .. عبيط هو يعني عشان يقول على الجيش حاجة ماعملهاش ؟ ده كان الجيش دبحه

Anonymous said...

hg

Anonymous said...

محمد طارق محبوس , لازم نعمله حاجة .

bassem said...

مممممممممممممم
انا علقت قل كده و قلتى عليا طائفى
اختلافى معاكى انك بتحللى الوضع من بره
مش عندك تفاصيل كتير يا نواره
و هى دى المشكله
التحليل اللى مبنى
على معلومات غير موثقه
و تحليل سطحى
بيؤدى الى ما نحن فيه
خشى عندى و اقرى و انت تعرفى
انى مش طائفى
تحياتى
http://00haba00bahbaha00.wordpress.com/

kooky kak said...

انتي قريتي شهادة رشا عزب عنا ما حدث في التحرير؟
لو مكنتيش قرتيها لازم تقريها ده كلام خطير جدا
http://www.facebook.com/note.php?note_id=10150096913541307

kooky kak said...

انا بس اللي بطلبه وطالبت بيه وحطلبه تاني ان يبقى فيه نقطة نظام واتفاق بين كل فئات الثورة يعني النهاردة الجمعة نص الناس بتقول مش نازلين لاننا وعدنا نعلق الاعتصام اسبوعين وعشان البلد دلوقت فيها فتنة مش عاوزين نثيرها اكتر والنص التاني بيقول نازلين كدا غلط
وكمان الناس اللي انضربت في التحرير انضربت برضه عشان عددها صغير لان مفيش كلمة موحدة على الاعتصام او فضه كده غلط غلط لازم النزول يبقى متفق عليه ومطالبه موحدة والاعتصام يبقى بميعاد متفق عليه وحشد مظبوط مش كل واحد بيتكلم على مزاجه

Anonymous said...

الى متى نتعامى عن الحقائق. الحقيقة أن شنودة وقيادات كنسية أخرى تعمل مع أمن الدولة في محاربة ثورة 25 يناير. أن بعض القيادات الكنسية ترى في انهيار النظام السابق كارثة. وأن المسيحيين الأورثوزوكس ينفذون ما يراه لهم الكهنة والقساوسة بدون نقاش. ليس أمن الدولة فقط المسئول عن الفتنة يشترك معهم قيادات الكنيسة المصرية.

ayman radwan said...

انا عايز اقول ان كل الي بنعمله ده كويس بس ملوش اي دعوه بالثوره.
يا نواره انا حقولك زي الراجل الي بيقول في الجزيره
انقاذ مصر واجب وطني لاجدال فيه
الدستور لازم يسقط احنا داخلين علي مصيبه
ارجوكي الحقي البلد مفيش وقت فاضل اسبوع بس واحنا بنتكلم في مطالب فئويه
دي مستقبل البلد كله في الدستور
الحقي البلد كلنا حنتحمل المسئوليه قدام الاجيال الجايه لو سمحنا ان الدستور الدكتاتوري ده يكمل

Ahmed . M . Abdulrahman said...

ان شاء الله كلنا وراء مصر

oozy said...

يا نوارة يا بنت نجم احييكى اولاً و اضربلك سلام على طول السلالالالالام لواحدة من آجدع بنات بلدى و بنت واحد من آجدع ولاد بلدى و بعد :) عايزين نوعى الناس فى الشارع يا نوارة عايزبن نوصلهم فى بيوتهم ع القهوة فى المطعم فى كل مكان مش على تويتر و كتاب الوش و النت فقط ، البلد فيها فوق ال٨٠ مليون تفتكرى كم من ال٨٠ مليون عندة آكونت ع التويتر !!! و كام من اللى عندهم آكونت عاملينلك او عاملن لحد بيفهم فولو !!!
ابوس إيديكم عايزين قناة للثوار نعملها بااجهود الذاتية و لو مكفيتش نبلطج على لاعيبة الكورة و نخليهم يشاركوا عافية طالما موقفهم كان مخزى إبان _ حلوة إبان دى _ الثورة ، و انا اول المساهمين

monasoly said...

يا نواره يا اعضاء جبهه النهييس فى مقال غريب لمصطفى بكرى النهارده عن اموال مبارك باختصار ان يوم 11 و12 اللى فات تم تحويل مبلغ 20 مليار دولار من بنوك بريطانيا وفرنسا سويسرا الى السعوديه والامارات ومش باسم مبارك لا دى عهده ملك السعوديه وشيخ الامارات والكلام ده منشور فى صحيفه الحقيقه الصادره فى لندن على لسان مسؤله مصرفيه فى بنك هابوعاليم الاسرائيلى فى سويسرا وفى نهايه المقال بيقول بكرى ان محدش يقدر يجزم بصحه التقرير من عدمه ولكن السلطات السعوديه والاماراتيه لم ينفيا حتى الان هذ التقرير ؟؟ ياوقعه سودا مهببه لو كان الكلام ده حقيقى لو حد عنده كلام منكوا يكتب فى الجبهه .

liliy pink said...

اعزائى فيه حاجتيين عايزه اتكلم فيهم معاكم
اولا حسن صقر بتاع الرياضه حايعمل اجتماع مع رؤساء الانديه الرياضيه لبحث عودة دورى كرةالقدم هل يعقل هذا فى التوقيت ده هما ليه مصممين يدوروا على الحاجات اللى بتخلق الخلافات بدل ما يشوفوا الحاجات اللى ممكن تجمع الناس وتزيد ترابطهم
والله الموضوع ده مش هايف تصوروا يا جماعه ماتش فى الاستاد بين الاهلى والزمالك او الاهلى والاسماعيلى شوفوا الدنيا هاتولع ازاى والالتراس تطلع ويالا
ربنا يهدى ويفكروا بمنطق شويه
ثانيا حاجة تخص الدستور وهى لماذا لا ينص فى الدستور فى الفقرة التى تخص نائب رئيس الجمهوريه ان يتم انتخاب الرئيس ونائبه بمعنى ان كل مرشح لمنصب رئيس الجمهوريه يكون مترشح معاه كمان النائب بتاعه لان اى رئيس منتخب ويعين بعد كده نائب ممكن لاى ظروف فى يوم وليله نلاقى النائب ده هو اللى بيتولى مسئوليات الرئيس

liliy pink said...

موضوع عمل دستور جديد مهم جدا بدل الترقيع والمواد المتعارضه مع بعضها ومع مبادئ الثوره
احد الاقتراحات ان يضغط الرموز اللى بتقعد مع المجلس العسكرى وايضا المثقفين والائتلاف كل دول لازم يوصلوا الرأى ده للمجلس العسكرى ولازم احنا نضغط على الاحزاب والكتل التى ننتمى لها لازم يكون ده رأينا والمفروض انهم بيمثلونا ويعبروا عن رأينا كمان ياجماعه لازم ننظم لقاءات شعبيه مع المستشاره تهانى الجبالى والمستشار البسطويسى
ياريت نتحاور فى الموضوع ده

kiki said...

Nawara... ana khalas 7aygeely enheyar 3assaby

e2ry da...http://www.facebook.com/?ref=home#!/notes/mona-ahmed-seif/رشا-عزب-تحكي-عنسلخانة-الجيش-فى-التحرير-المت�/10150111372439360

sadda2eeny, lana wala ghery leena masla7a lel tashkeek fe ekhlass el gesh.. bass e7na shayfeen eh?
Khalas, ma3adsh feeh aleha we asnam... ana nefsy wallahy el donia tet3addel.. bass fen? dol bakhlaneen 3alena 7atta bel tafseer.

ana khalas 7atgannen

ابراهيم رزق said...

مش للنشر

نوارة يا بطلة
تحياتى

اوجه لكى الدعوة لحضور تكريم امهات الشهداء يوم 17/3

يشرفنا حضورك فى حالة الموافقة رجاء الاتصال بى على تليفون
0123532722
والسلام عليكم و رحمة الله
كما ادعوكى لتشريفى فى مدونتى المتواضعة و ابداء رايك

ساعد نسرين الايمن said...

بحاول اتصل بمروان من السعودية مش بيرد
انا اسمي ادمن بياع الفل
ادمن في روم تغيير دوت نت بالبالتوك
ياليت يا نوراة تقولي لمروان
انني هانزل من السعودية يوم الخميس عشان حاجتين
انني اشارك ف الاستفتاء ع التعديلات اللي نفسي اشارك فيه
وانني اساعده انه يبني الكنيسة باطفيح عشان انا اصلا من حلوان
ويامن الدولة ماراحت عليك

بياع الفل