Thursday 17 March 2011

مصر حتبقى حلوة.. ومش عايزين فردوس عبد الحميد في الليلة دي

:)
تصدقوا بالله، في اجواء مباريات كرة القدم الاستفتائية دي انا مبسوطة اخر حاجة
مبسوطة مبسوطة مبسوطة مبسوطة... جدااااااااااااااااااااااااااااااااااااااااا
وان شاء الله، مطمئنة مطمئنة مطمئنة مطمئة، جداااااااااااااااااااااااااااااااااااااااااا
وفخورة فخورة فخورة فخورة، جدااااااااااااااااااااااااااااااااااااااااااااا
- مبسوطة:
عشان ياخويا.. سواق التاكسي، وسواق الميكروباص، والبياع في كشك السجاير، ومنادي العربيات اللي بيركني، والبواب، وبتاع كروت الشحن، اذ فجأتن بيتكلموا كلهم عن الاعلان الدستوري، والتعديلات الدستورية، والبرلمان، والرئاسة، بعد ما كانوا بيتكلموا عن اصابة ابو تريكة، وتشكيل المنتخب، ومشاكل ميدو مع حسن شحاتة، وبقى نجومهم دلوقت يسري فودة وبلال فضل وابراهيم عيسى والبرادعي وسليم العوا وفهمي هويدي وطارق البشري، بعد ما كان نجومهم متعب وبركوتة
:) 
مبسوطة قوي الحمد لله.. عشت لحد ما شفتها.. واخدتهم الجلالة لدرجة ان واحد وقفني في الشارع وقال لي: يا استاذة، انا مألف دستور وعايز اقراهولك.. مش حياخد عشر دقايق
انا باحلم؟ حد يقرصني
- مطمئنة
عشان النتيجة اللي حتطلع حتبقى في مصلحة مصر، للأسباب الآتية:
1- الناس روحها المعنوية مرتفعة جدا، وكلهم عايزين يشاركوا، وكلهم حاسين ان لهم قيمة، وان صوتهم مسئولية، وحيرانين كده ومحتاسين، والحيرة دي معناها احساس فظيع بأن اللي حيقوله حيعمل مستقبل بلد، مش رايح يهلل في الظيطة وخلاص
2- الناس فاتحة التلفزيونات وعمالة تسمع من ده ومن ده، ومش بيشتروا اي حاجة من اي حد، وعندهم حالة تشكك مش بتنيمهم الليل، بس بتنيمني انا مرتاحة، طول ماهم قلقانين ومتشككين كده انا مطمئنة، ومش قابلين اي كلام من اي حد، واي حد يحاول يمارس عليهم سلطة بيطلعوا في مصارينه.. صحيح في ناس نزلت بلطجية وبتوزع فلوس من الفريقين بتوع نعم ولا، اللي هم الوطني والوفد بدون ذكر اسماء، الوطني بينزل بلطجية وبيوزع عشان الناس تقول نعم، والوفد بينزل بلطجية وبيوزع برضه عشان الناس تقول لا، معلش اعذروهم، دي الطريقة اللي يعرفوها ومش عارفين يواكبوا العصر، وصحيح الاخوان بيعلقوا يفط يقولوا فريضة شرعية وبعدين يرجعوا يقولوا: لا مش احنا والله.. واللي بيخليهم يقولوا لا مش احنا ان الناس ما عادتش قابلة حد يكلمها كده تاني، وصحيح فيه قساوسة بتقول رجاء محبة في المسيح تقولوا لا.. بس برضه بيرجعوا في كلامهم عشان الناس ما عادتش قابلة حد يكلمها كده تاني
وانا لا قلقانة من وجبات الوطني والوفد، ولا قلقانة من شرع الله ومحبة المسيح، لأن انا لسه بابرم في الشارع وباتكلم مع الناس، وشايفة ان الناس بتعتبر ان دي طريقة منفرة، وبقت الطريقة دي تستفزهم
ولو سمحتوا، اللي مش متأكد من كلامي، ينزل دلوقت حالا، يلف لفة ويسأل الناس ويتكلم معاهم، وبالتحديد يسأله عن الوجبات والبلطجية وشرع الله ومحبة المسيح واسمع يا عم احلى كلام اللي عمرك ما كنت تتخيل انك حتسمعه ابدا
3- ربنا واخد باله من مصر
والله العظيم تلاتة ربنا واخد باله من مصر ومش حيعمل لها غير الحاجات الحلوة وبس
انا بقى مصدقة مساعد وزير الدفاع الاسرائيلي اللي قال: ثورتا مصر وتونس صنعتا بيد إلهية
ومافيش اي حاجة وحشة حتحصل لمصر ابدا تاني ان شاء الله.. انا شخصيا مش عارفة اتوقع النتيجة ابدا، لأني سألت ناس كتير، قالوا لا، وسألت ناس كتير قالوا نعم
واسباب لا للناس في الشارع كانت ممتازة، مالهاش علاقة بأمراض النخبة اللي خايفة من الأخوان خالص، اغلب الناس في الشارع اللي قالت لا قالت: لو عندي تفاحة بايظة مش حاقعد  اشيل الحتت البايظة عشان اكلها وانا عندي فرصة اني اشتري تفاحة جديدة
واغلب الناس اللي قالوا نعم اسبابهم محترمة جدا ومالهاش اي علاقة بأعداء الله والمادة التانية والهلاوس السمعية والبصرية بتاعة البيانات السلفية، اللي قالوا نعم قالوا باللفظ:
لما يبقى عندي شارع منور عارف حيوديني فين حامشي فيه بدل ما اخرم من شوارع جانبية ويمكن تطلعني على مكان غلط
ده كلام الناس العادية في الشارع، اللي بقالي كام يوم بامشي اسألهم، وكتير منهم مش متعلمين تعليم عالي، وفيه منهم مش متعلمين خالص
اللي قاعد على النت بس بيتشاءم وله حق بصراحة.. حاجة مقرفة: تخوين، وتكفير، وتطاول، واجواء ماتش الجزائر خالص
اللي بينزل الشارع يتكلم مع الناس في احياء مختلفة بيتفاءل.. وانا بادعوكم سيبوا النت شوية - خصوصا الفيس بوك - وانزلوا اتكلموا في الشارع، امشي على رجليك شوية، المشي رياضة
بس عشان خاطر تتفاءل وتطمئن
- فخورة:
انا مش عارفة احنا ما عندناش ثقة في نفسنا ليه؟ بعد كل اللي عملناه ده ولسه شاكين في نفسنا ليه؟ 
لا.. لا مالناش حق ابدا
طب كنا شاكين في نفسنا ايام المجحوم عشان كان كاسر نفسنا وقاهرنا ومحطم معنوياتنا.. لكن علمنا ثورة نزل فيها 20 مليون مواطن باعتراف القوات المسلحة، وقدمنا شهداء، وقدمنا تضحيات، وخلعنا مخلوع، وجبنا مناخير امريكا الارض، بعد ما كانت بتيجي الست هيلاري تدينا اوامر غير قابلة للمراجعة، بقت جاية تتمشى في ميدان التحرير وتقول لنا: ده انا قاسم اخوك يا علي.. بوسة بوسة، وامن الدولة بقى عامل زي الولية اللي غرق دراها، وبعد ما كان بياخد الناس في بحر الظلمات تحول الى عصابات بلطجية هابلة، حتى مش عارفة تبلطج، وكل شوية يتقفشوا والناس تنزل فيهم ضرب لما يبان لهم صاحب، وبقى اخر امن الدولة انه يعاكس في التليفونات ويعمل اكاونتات على الفيس بوك عشان يقول للناس: ده احنا جامدين قوييي.. بعد ما اخدوا علقة ما اخدهاش حرامي في مولد، واسرائيل قاعدة تلف حوالين نفسها وتقول مين اللي جاب القلعة جنب البحر، وبسببنا مسئول ملف الشرق الادنى في السي اي ايه اتحول للتحقيق، وبسببنا، الاتنين المسئولين عن ملف مصر في الموساد اترفدوا، وبسببنا مساعد وزير الدفاع رفع ايديه لفوق وقال حكمتك يا رب، كل ده ولسه مش واثقين في نفسنا وعمالين نقول: لبعدين الناس تتأثر بعبود الزمر، لبعدين الناس تتأثر بيحيى الجمل، لبعدين الناس تتأثر بالأخوان المسلمين، لبعدين الناس تتأثر بأون تي في، لبعدين الحزب الوطني يرجع، لبعدين امريكا تحتل البلد
عيب
عييييييييييييييب
عيييييييييييييييييييييييييييب
كان اولى الناس تتأثر بتامر بتاع غمرة: يوم الخلاص من مييييين.. بلاش السلوجان ده
انا مش عايزاكم تبصوا لنفسكم البصة دي، انا عايزاكم تثقوا في نفسكم اكتر من كده، وتعرفوا ان ربنا معانا وحيسترها معانا ان شاء الله، وتعرفوا اننا عملنا حاجة حلوة، وحنعمل حاجة حلوة، ومصر دي حتبقى قمر، وعروسة
هي مزة اصلا.. اذا كانت ايام المجحوم قعدت تلاتين سنة ما تستحماش وكانت مزة برضه وفيها الطمع واللي رايح واللي جاي يعاكسها وماحدش سايبها في حالها
امال بقى لما حميناها وكيسناها، وبنلبسها فستان الفرح، ولسه بقى حنسرح لها شعرها، دي حتبقى فشر مارلين مونرو
--------
احنا كلنا رايحين الاستفتاء ده ان شاء الله
مش بس حنشارك بعد التكال على الله
كمان حنحمي اللجان بتاعتنا من بلطجية فتحي سرور وصفوت الشريف وزكريا عزمي بعد ان تواترت انباء عن نيتهم في اطلاق بلطجية لافساد الاستفتاء
قد تكون مجرد اشاعات عشان يخوفوا الناس ويبقى نأبهم على شونة، احنا مش بنخاف من حد
وقد تكون حقيقة ويبقى بلطجيتهم جم لقضاهم اساسا... تحالى لحمو يا حبيبي، انا عايزاهم يفضلوا ينزلوا في بلطجيتهم كده لحد ما يخلصوا على ايدينا ويقعدوا هم عريانين
وكلنا حنقبل نتيجة الاستفتاء عشان ده اختيار الشعب المصري ان شاء الله
انا شامة ريحة مش كويسة في بعض نشطاء النت اللي اصلا مش عاجبني خالص وحاسة انهم مش على مستوى الشارع
حاسة انهم ناويين لو النتيجة طلعت مش على مزاجهم انهم يعملوا زي المنتخب المصري لما اتهزم قدام الجزائر ويطلعوا فردوس عبد الحميد تقول قلعوا لنا البنطلونات
اللي حيعمل كده يبقى بيعمل جريمة في حق مصر، وفي حق الشعب المصري
ولازم يتأكد ان الناس مش حتبقى معاه في التصرفات دي.. زمن التسخين بالازاز اللي في تي شيرت محمد فؤاد عدى وولى
احنا كلنا قابلين النتيجة اللي ماحدش لحد اللحظة دي عارف يتوقعها خالص، واستطلاعات الرأي كلها بتيجي متناقضة تناقض فظيع
شايفين استطلاع الرأي ده
<<<<<<<<
ده بيقول ان النتيجة حتبقى لأ
وانا حابقى فرحانة بالنتيجة دي لو طلعت، وعارفة انها حتبقى لصالح مصر، مع اني حاصوت بنعم
وفيه استطلاع رأي تاني في مكان تاني بيقول ان النتيجة حتبقى نعم
وعارفة ان اللي حيصوت بلأ حيبقى فرحان بالنتيجة وعارف انها في صالح مصر
ولا انا، ولا اللي بيصوت بلا عارف النتيجة حتبقى ايه... طب ده ولا حتى القوات المسلحة عارفة النتيجة حتبقى ايه، وكل شوية استطلاعات الرأي اللي هم بيعملوها تطلع لهم بنتيجة عكس اللي قبلها
بس احنا كلنا المفروض نبقى فرحانين :)
انا شخصيا فرحانة قوي قوي قوي قوي قوي قوي قوي قوي... الحمد لله
وعندي ايمان بالله، وثقة في الشعب المصري
اهم حاااااجة: نشارك كلنا
وكل واحد يخلي باله من لجنته كأنها ضناه اللي خلفه

40 comments:

Magdy El-Serafy said...

النتتجة ما تفرقش واللى لقى نتيجة عكس اللى قاله هيكمل المشوار فيها كانه اختارها. الرسالة اللى هتوصل هتحصل بنزول الملايين: الحركة الثورية مستمرة و الشعب كله ركبها و يا ويل اللى هيقف قصادها

Drmalyha said...

I love you for the sake of Allah

محمد نبيل said...

الاستفتـــــــاء المـــــــــــــــر

http://www.bilakoyod.net/details10306.htm

Tamer said...

معلش حتة تشاؤم على المسا
http://dostor.org/politics/egypt/11/march/17/38300

Anonymous said...

من الان يانوارة انا بقولك ان نتيجة الاستفتاء ستكون نعم وبنسبة من 60 في المائة الي 75 في المائة والسبب معروف ومش هقولة الا بعد نتيجة الاستفتاء

المهدى said...

لو لا فعلا نطمن وميهمناش من أى حد
حتى لو نعم بنسبة لا تتجاوز ال60% برضه نطمن لإن مع الوقت الثورة حتغسل كل مصر
لكن إيه رأيك لو النتيجة نعم 70-80% يبقى نخاف ولا منخافش يبقى دولة الحزب الواطى وأمن الدولة والسلفيين بمادتهم التانية اللى فجأة بقوا بيحبوا الإخوان موووت بعد ما كانوا كلاب أهل النار والإخوان بمصالحهم التى لا تنتهى واللى زهقوا من الثورة وعايزين نخلص بقى ممكن يبنوا دولة
ساعتها يا نوارة يبقى عليه العوض

Unknown said...

سبعين تمانين؟

مافيش نتائج حتطلع سبعين تمانين دي

النتيجة لو طلعت 55 في المية يبقى كويس قوي، لصالح اي حاجة من الاتنين، ماحدش عارف يتوقع اصلا

ِAmira hassan said...

http://www.youtube.com/watch?v=l2gyY3DtWKc&feature=player_embedded#at=465
عندي اكتئاب السنين

Anonymous said...

لمزيد من التفاؤل:
http://www.youtube.com/watch?v=ajCe1km7UFM
الاستفتاء الله يلعنه نسانا المهم
ضحكوا علينا و في الآخر زوّدنا حرية النباح و وهم الحرية
خطتهم ماشية و ربنا بيقول المؤمن لا يلدغ من جحر مرتين

Unknown said...

اخيرا حد عرف يعبر عن الاحساس اللى حسه كنت كل شويه يقول للناس انا فرحان حتى فى عز الثوره فى ايام موقعه الجمل وغيرها ويقولولى انت اتجننت البلد مش مستقره والبلطجه فى كل مكان وانا اقولهم انا فى منتهى السعاده وياسلام اول يوم اروح فيه الكليه مافيش حرس مافيش اهانه مافيش عربيات امن مركزى شارع الكليه مفتوح عادى كده مافيش حد يفتش الشنطه بتاعتى ويفتكر الاب توب شنطه جوه الشنطه ويفتكرونى مهرب حاجه
الحمد لله الذى رزقنا من غير حول منا ولاقوه

Unknown said...

مش متخيلة انا كنت زعلانة قد ايه و محبطة من الخناقات و التخوين اللى على الفيس بوك

بجد كلامك ريحنى و طمنى اووووووى

Unknown said...

من أحسن الكلام اللي أنا قريته ليكي .........بس بلاش مارلين مونرو ده علشان ماتت موته وحشه

zara shaishaa said...

Amr Elbehairy and the activists were arrested on March 9, do not forget them, ask for their immediate release or ask for civilian trail. Do not forget them and all the missing ones from Jan28.

مهندس مصري بيحب مصر said...

طمنتيني و ريحتي قلبي
أنا بره مصر مفيش قدامي غير النت لما قربت أتجنن

و أنا لغاية دلوقت محتار بين نعم و لأ رغم إني بره مصر و مش حأصوت أساساً

و كل المصريين اللي أعرفهم هنا زيي كده محتارين

ربنا يحمي مصر و يحرسها

Heema said...

ردا على موضوع السلطات المطلقة لرئيس الجمهورية واعتراضات أخرى

المادة 189 مكرر تلزم الأعضاء المنتخبين لأول مجلسي شعب وشورى (بعد التعديلات) بانتخاب جمعية تأسيسية. ودور الرئيس الوحيد حيال الدستور الجديد حسب الفقرة الأخيرة من المادة 189 هو دعوة الشعب للاستفتاء على الدستور. إذا هذه الجمعية التي انتخبها نواب الشعب الذين انتخبهم الشعب تستطيع أن تعمل من دون تدخل الرئيس ، وبعد ذلك مباشرة يعرض الرئيس هذا الدستور على الشعب ليقول رأيه فيه. كل المذكور هنا وجوبي ولا يمكن الالتفاف حوله.

أليس هذا السيناريو أفضل كثيرا من مجلس دستوري يختاره المجلس العسكري ، أو ينتخبه عامة الناس (وكيف – هل يختار الناس مثلا من قائمة مكونة من ألف شخص من الخبراء الدستوريين والقانونيين؟ سأترك الحكم على ذلك لفطنتكم)؟

لدينا إذا حصانتان لضمان إزالة هذه المواد من الدستور الجديد: (1) المجلس الدستوري المنتخب من نواب الشعب ، (2) وموافقة الشعب نفسه في الاستفتاء.

هناك أيضا اعتراضات على الشروط الواجب توافرها في رئيس الجمهورية ونائبه/نوابه (مادة 75) - والتي لن أدخل في تبريرها الآن (رغم ميلى الشخصي إليها) ، وكذلك اعتراضات على مبدأ التعيين لنائب (أو نواب) رئيس الجمهورية بدلا من الانتخاب المباشر (مادة 139). الرد على هاتين المادتين هو نفس الرد على المواد الخاصة بالصلاحيات المطلقة. أي أن الدستور الجديد سيحدد إن كانت هذه البنود وغيرها ستستمر كما هي أو تعدل أو يعاد صياغتها. وذلك بنفس الشروط الإلزامية للبرلمان والرئيس وبنفس الضمانين السابقين.

وهذا هو نص المادة 189 مكرر (والملزمة بإجماع الفقهاء الدستوريين ، كما أن أي عالم بقواعد اللغة يدرك أن الفعل المضارع – يجتمع – للوجوب وليس للندب):

يجتمع الأعضاء غير المعينين لأول مجلسي شعب و شورى تاليين لإعلان نتيجة الاستفتاء على تعديل الدستور لاختيار الجمعية التأسيسية المنوط بها إعداد مشروع الدستور الجديد خلال ستة اشهر من انتخابهم و ذلك كله وفقا لأحكام الفقرة الأخيرة من المادة 189.

وهذه هي الفقرة الأخيرة من المادة 189:

وتتولى جمعية تأسيسية من مائة عضو ينتخبهم أغلبية أعضاء المجلسين غير المعينين في اجتماع مشترك إعداد مشروع الدستور في موعد غايته ستة أشهر من تاريخ تشكيلها و يعرض رئيس الجمهورية المشروع خلال خمس عشرة يوما من إعداده على الشعب لاستفتائه في شانه و يعمل بالدستور من تاريخ إعلان موافقة الشعب عليه في الاستفتاء.

بناء على كل ما سبق أقول نعم للتعديلات الدستورية.

في النهاية بعد قراءتكم لهذا الكلام والاستماع للآراء الأخرى وبعد دراسة وتأني خذوا القرار الذي ترونه صائبا وضعوه على بطاقة الاستفتاء.

(إبراهيم المهندس)

nosseir said...

يوم السبت يوم تاريخى
اول استفتاء فى تاريخ مصر يكون حقيقى ان شاء الله
وانقسام الناس فى الرائ هو اجمل ما فى الموضوع..لانة بيدل ان الحمد لله التلاتين سنة اللى فاتو ا ما اثروش على قوانا العقلية رغم انهم كفيلين بان يجيبوا لاى شعب اخر عتة مغولى
http://www.youtube.com/watch?v=8NuqtlyHLnY

المهدى said...

يسمع منك ربنا
بس دى نتيجة القاهرة
مصر مش القاهرة وإسكندرية والسويس
سمعتى عن المادة الثانية ورعب المادة التانية أنا سمعتها من الفقرا والأغنيا وفى القاهرة
سمعتها من شباب سلفى زى الورد لسة على جسموا أثار الثورة
بيقولوا إن المسيحيين ( عفوا ) النصارى دخلوا فى الآخر فى الهوجة عشان يلتفوا على الثورة ويشيلوا المادة التانية
لو النسبة كبيرة الوسخ حيلط النظيف
بدايتها إنت شوفتيها ومخدتيش بالك كل اللى كانوا ضد العسكر وحكم العسكر دلوقت مع طول الفترة الإنتقالية ( والخوف من الإخوان ) والإخوان اللى طلبوا أن تطول الفترة الإنتقالية إكتشفوا فجأة ضرورة عودة الجيش
يا رب يكون كل ده صدفة ومراجعة حسابات لوجه الله والوطن

Magdy El-Serafy said...

to marobader
بلاش اكتئاب. الشاب بيتكلم بشجاعة و قوة و فخر بعد اللى اتعمل فيه. تفتكر(ي) ارادة شعب زى ده هتودينا فين؟ عالى أوى. و كل ما يحاولوا يهزموها .. تزيد و ِتعدى ناس تانيين

negmat lail said...

اقفل عل الحيرة السيرة.. وهات شربات للكل.. واقفل عينك وافتحها تلاقي الشوك بقى فل.. وزهور ليمون صابحة في يافا بتضحك وتطل تقول.. افتح صندوق العيد وادي الحلوة مراية- صلاح جاهين -عبدالحيلم

Anonymous said...

كلنا متفائلين يا نوارة و دي حلجو حلوة وغريبة في حياتنا فعلا الحياة بقت كلها أكشن وساسبنس بعد مبارك .. مش أحسن من الملل اللي كنا فية .. والله حاجة تفرح اننا لغايت دلوقتي مش عارفين نتيجة الاستفتاء رايحة لأي كفة بأي حال من الأحوال بس كلنا أكيد متفاءلين وواثقين ان ربنا هايقدم اللي فيه الخير

نوارة موضوع مقاطعة شبكات المحمول من الليلادي لحد بكرة مش مسمع عند الناس خالص .. مافيش ولا جروب أعلن أصلا عن النية حتى و كتير في الشارع ما يعرفوش حاجة خالص عنه.. الشغل كدة مهرجل .. لازم تنسقي مع كل الجروبات و الائتلاف و تعملوا حملة بايفنت انما عزومة المراكبية اللي عالماشي دي ما تنفعش :)
و شكرا

Unknown said...

الله يخليكي يا نواره كلامك طمني, انا عايشه خارج مصر كل معلوماتي من النت , نفسي ابرم في الشوارع زيك ,لكن معلشي انتي بتجيبي لنا الاخبار اللي بتطمئنا ان الشعب المصري بكل فئاته بخيرو الحمد لله.

mohamed said...

برافوووووووو يا نواره صحيح بنت ابوكى وامك انا كمان فرحان بيكى قوووووووووووووووووووووووى

محمد طنطاوي said...

لكن يا نواره مش عايزين الحلم دا ينسيكى التوقيعات المليونية اللى أنا ملاحظ إنك نستيها فعلا
شيئ ضرورى وههم جداً إننا نطالب بإلغاء أمن الوطن دا ولا معرفش إيه اللى كل شوية يخترعونا حاجة
الحاجة التانية المعتقلين أخويا واخوكى واختى واختك اللى قاعدين محبوسن فى السجن عشان بلدهم واحنا قاعدين كدا على النت بنشرب شاى
الحاجة التالته محاكمة المخلوعين مبارك وعائلته وصفوت وسرور وزكريا ومفيد ...
الحاجة الرابعة المطالبة بضرورة الاستجابة واثبات حسن النوايا لمطالب الثورة
الحاجة الخامسة نبدأ وبسرعة

احمد أبو العلا said...

إن شاءالله مصر هتبقى أحلى من نوارة نجم مش بس أحلى من مارلين مونرو ومبروك علينا كلنا

Unknown said...

كلامك جميل وحلو قوي قوي فعلا دي مصر المحروسه وغلاوتها زايده زايده

hardway said...

مصر حتبقي حلوة.....علشان بس انت فيها
مصر مش مزة أصلا.. مصر أم الدنيا..
أنت ...و أنت فقط أرق مزة في مصر كلها
وبعد الشر عليك من القرص......
ولما تحلم..؟ ماتخليش حد يقرصك
فاهمة...........انا لا أقبل هذا الكلام
وحشــــــــــــــتيني
نتيجة الاستفتــــــــــاء
نــــــــــــــــعـــــــــــــــــم

hardway said...

مصر حتبقي حلوة.....علشان بس انت فيها
مصر مش مزة أصلا.. مصر أم الدنيا..
أنت ...و أنت فقط أرق مزة في مصر كلها
وبعد الشر عليك من القرص......
ولما تحلم..؟ ماتخليش حد يقرصك
فاهمة...........انا لا أقبل هذا الكلام
وحشــــــــــــــتيني
نتيجة الاستفتــــــــــاء
نــــــــــــــــعـــــــــــــــــم

Early bird said...

انا بس عايزه افهم ليه الحزب الوطنى حيصوت بنعم مصلحته ايه الا بقى لو الغباوه اللى فيه متاصله لدرجه انه فاكر ان لوفيه انتخابات برلمانيه دلوقتى حد حينتخب اى واحد كان متجوز بنت عم ام ابوه اللى خلفوا واحد كان معدى من قدام الحزب واللى بيقول حيشتروا الناس بالفلوس طيب ماكانوا اشتروهم من زمان ومكانش له لازمه التزوير الفاضح الواضح والبلطجه اللى قدام اللجان

اللى عايز يقول نعم معتقدش ابدا انه حزب وطنى لان من مصلحه الحزب ان الناس تنسى ويرجعوا ينظموا صفوفهم تانى ودلوقتى اعتقد انه مش وقتهم خالص وموضوع الماده التانيه مش مخوفه المسلميين العاديين_ يعنى مش السلفيين اللى فقدوا معظم رصيدهم عند الناس البسيطه نتيجه لموقفهم المتخادل اثناء الثوره _ يعنى مكانتش فى دماغهم دلوقتى لانهم معتقديين انهم قادرون على حمايتها سواء صوتوا بنعم ام بلا لكن اللى قالقهم تصريحات زى يتاعه ساوريس وحكايه المساواه والكلام اللى مش مضبوط عن الماده التانيه اللى مش بتضر اى مسيحى لكنها لازمه لاى مسلم علشان ميلاقيش نفسه فى تركيا اتاتورك ولا تونس بورقسبه
وكل ما يتكلموا عن الدوله المدنيه ايتكلموا عن الكنائس وبنى الكنائيس اللى المسيحيين بيقولوا انها مش مكفياهم المسلميين اصلا مش فاهميين الموضوع ده لانهم كل جمعه نصهم بيفرش فى الشارع ويصلى لان كل الجوامع مش مكافياهم واعتقد ان الموضوع مش فارق معاهم لكن كلام زى ده يقلق

Early bird said...

من المفارقات العجيبه لنجيب ساويرس المصرى الى مش حاسس انه متساوى مع اى مسلم مصرىفى الحقوق والواجبات واللى حاسس ان المسلميين متميزيين عن المسيحيين فى مصر كلامه لعصام العريان فى البرنامج بتاع يسرى فوده لما قاله اخيرا عرفنا نتستضيفك دا احنا كل منحاول نجيبك نلاقى التليفونات تشتغل وانك ممنوع تتكلم اوتظهر فى القناه يعنى هو ساويرس مسموح له يعمل قناه بس عصام العريان مش مسموح انه مجرد يظهر او يتكلم فى التلفزيون حتى بمحادير التلفزيون المعروفه

ادا كنت عايز مساواه من النوع ده معندناش اى مانع

iman said...

جميلة اوى "ربنا واخد باله من مصر" عسولة اوى منك يا نوارة

نوارة هو انتى تعتبرى ليبرالية؟

عارفة ان السؤال هيغيظك معلش استحملى :)

Unknown said...

اللى احنا فيه دلوقتى ده حلووووووو اوووى يا نوارة كل واحد بقى حاسس ان البلد دى بقت بتاعته هو وهو اللى شايل همها فوق دماغه كلنا خايفين لقرارنا يطلع غلط ونضر مصر اللى ماصدقنا رجعت لنا بس ان شاء الله خير وكل خير كمان
الا صحيح سمعت ان الوفد والتجمع بيدعوا لممليونية بكرة انا شايفة ان ملهاش لازمة اى مظاهرات دلوقتى الجيش مش هيسمح بيها واحنا مش عايزين قلق قبل يوم السبت
دلوقتى انا عاوزة كلامى ده يوصل لشباب الثورة انا وكل اللى اعرفهم مستنين بفارغ الصبر الحزب اللى هيتعمل عشان نشترك فيه وننتخبهم فى البرلمان بلاش الرعب اللى عندكوا ده من الاخوان وغيرهم احنا مستنينكوا انتوا وهنرشحكوا انتو شدوا حيلكوا بقى

أرنوب said...

سبحان الله في طبعك يا نونو .. خايفة من الجيش يقعد في السلطة أكتر من كده ومش خايفة من سلطة تيجي تخليكي ماتعرفيش تكتبي كلمة في مدونتك .. ده طبعاً لو كان لسه فاضل مدونات أو نت أساساً
بكرة تندمي حيث لا ينفع الندم .. وبدل مانتي دلوقتي عمّاله تقولي : أنا فرحانه .. فرحانه .. فرحانه .. حتضربي نفسك بأول شبشب زنوبه يقابلك وتقولي : كنت غلطانه .. غلطانه .. غلطانه

Unknown said...

هههه بجد أنتي مشكلة

Unknown said...

انوارة انت ليكي مواقف كويسة
في حد يقول ربنا واخد باله من مصر !!!
أستغفر الله
كمان تقسمي تلاتة يمين بالله !!!
" مالكم لاترجون لله وقارا "
الأدب في الحديث عن الله
احنا مش بنكلم أصحابنا زي مابنتكلم عن رب العزة
رب العزة لابد اننا نتكلم عنه بمنتهى الأدب وبما يليق بجلاله وكماله
اتق الله يابنت الناس
غيري الكلمة

torero said...

3- ربنا واخد باله من مصر
والله العظيم تلاتة ربنا واخد باله من مصر ومش حيعمل لها غير الحاجات الحلوة وبس
انا بقى مصدقة مساعد وزير الدفاع الاسرائيلي اللي قال: ثورتا مصر وتونس صنعتا بيد إلهية


طيب مانا قلت كده من ثالث يوم من الثورة
وبعدين من كتر كلامى عليكى قدام مراتى بقت بتغير منك
ومن الاخر كده يا بخت ولادكى بيكى يا نوارة
باحبك والله

hardway said...

انا باحلم؟ حد يقرصني............
يانــــوارة...يا نـوارة...
مرحلة انتقالية...دستور معطل..بورصة مغلقة..دبابات في الدينة..مظاهرات فئوية
وانت عايـزة حد يقرصــــــــــك.....
مش وقته دلوقتي.....وبعدين انت مكفكيش 30 سنة قرص........
سلامي لكي ولشباب (القرص بوك و لا..لا تنسي الاخ بلال فضل
اصل انت مهتمة جدا به

Unknown said...

نعم أو لا المهم ان الكل يقبل النتيجه لأن الاختبار هو اختبار للمديمقراطيه و ان الاستفتاء يكوت نزيه و العدد المهم هو عدد المشتركيين في الاستفتاء و هو ده العدد الفائز بصحيح أماعن النتيجه المهم ان الكل يقبلها لأن هي ديه ضريبه الحريه و الديمقراطيه علي شرط ان مايكونش في لعب في الصناديق و لا ضرب برده اللجنه و منع الناس من ممارست حقهم
أتمني التوفيق لمصر

hayat ank said...

عااااااااااااااااااااااااجل يا نواره شوفى حلقه هيكل على اون تى فى دلوقتى حاولى تشوفى من البدايه هاااااااااااااااام جدا

hayat ank said...

شوفوا حلقه ممد حسنين هيكل على اون تى فى دلوقتى هااااااااااااااااااااام

hayat ank said...

يا من يهمه الثوره الى بتتهدد دلوقتى شوفوا هيكل على اون تى فى من الاول دلوقتى