Saturday, 26 March 2011

انتوا خفتوا ولا ايه؟ ما تخافوش... احنا معاكوا

تحديث:
للي بيجمعوا توقيعات في الفيوم
0185020552


قالك النائب العام يعتزم تجميد ارصدة صفوت الشريف وزكريا عزمي خلال ساعات
الكلام ده كان من 3 ايام، وزي ما احنا عارفين كلنا يا اولاد ان خلال ساعات دي عادة بتبقى مش اقل من خمسة وتلاتين الف ساعة زي الاعلان الدستوري اللي كان حيعلن في خلال ساعات من اسبوع
وعنها وعاديك.. ده كان اخر مرة النائب العام يقول حاجمد ارصدة حد وراح سبحان الله، ولا اله الا الله، ولا حول ولا قوة الا بالله، البنك المركزي، اللي لازم يتم الرجوع اليه في عملية تجميد الارصدة، اتحرق بماس كهربائي في التكييفات
ههههههههههههههههههههههههههههههههههه 
حبايب قلبي.. والله باحبكم، احب انا اللي ما يعرفش يكدب ولما يحاول يكدب وشه يحمر ده، تكييف في مارس؟ وكمان عليه ضغط لدرجة انه يعمل ماس كهربائي؟ وفين؟ في البنك المركزي؟ ليه؟ البنك المركزي ما بيعملش صيانة؟ 
انتوا خفتوا ولا ايه؟
طيب ما احنا عارفين ان الثلاثي المرح لهم ميليشيات ومسلحين كمان، هو احنا بنخاف؟ ما تخافوش
اذا كانوا هددوا بأنهم حيولعوا لكم في البلد كلها لو هوبتوا ناحيتهم
ما تخافوش
اذا كانوا هددوا بانهم حيعملوا فتنة طائفية ويعملوا تفجيرات شبه تفجيرات كنيسة القديسين
ما تخافوش
اذا كانوا هددوا بأنهم حيخربوا البلد
ما تخافوش
احنا واقفين جنبكم... والله العظيم تلاتة احنا واقفين جنبكم.. قسما بالله العظيم احنا واقفين جنبكم
بس ادونا فرصة نقف جنبكم بقى، احنا مش الحيطة المايلة، وجودنا جنبكم هو الضامن الوحيد
انا لو مكانكم اعمل ايه؟
انا لو مكانكم اطلع بيان اقول فيه ان مطالب الشعب على العين والراس، واحنا عارفينها واحدة واحدة، وعايزين نحققها، وبيتم ممارسة ضغوط علينا من قبل كبار الفاسدين، ومن قبل المتضررين من ملاحقة الفاسدين، وبيهددوا امن البلد وشعب مصر، ومحتاجين في هذه الظروف الحرجة وقفة الشعب المصري جنبنا، فيه ناس عايزة تعمل فتن طائفية، وناس عايزة تعمل بلبلة وتخريب، وعايزين جهود الشعب المصري تساندنا
واتفرجوا علينا
اتفرجوا على الشعب ده حيعمل ايه؟ قبل ما البيان ده يخلص حتلاقوا الدنيا كلها لجان شعبية محاوطة كل المصالح والكنايس والجوامع، وفجأتن المسيحيين والمسلمين اللي مسكوا في شعر بعض دول حينزلوا بوس في بعض واحضان تاني، والبلد حتتنظم وتبقى ولا السويد في زمانها
احنا اصلنا لما بنبقى فاضيين بنهبل، لما بيبقى فيه ازمة وعندنا هدف بنبقى زي الساعة.. حتى في الماتشات، ما بنجيبش الجون غير في الوقت بدل الضائع
ده شعبي وانا عارفاه... كان شعبك انت يا كابتن؟ انا اللي لقيته
ما تعملوناش الحيطة المايلة واسمعونا احنا ناس كويسة والله العظيم
مش عارفة... قلبي حاسس كده ان فيه ضغوط عليكم عشان ما تطلعوش الاعلان الدستوري وتسقطوا 71، فيه ناس عايزة دستور 71 وانتوا مش عايزينه، صح؟
وقلبي حاسس كده ان الثلاثي المرح بيهددوكوا بخراب ودمار وحرقوا البنك المركزي بالطريقة الواضحة دي عشان يهتوكوا
طب واحنا رحنا فين؟ ما احنا اهو.. يا ريت يبقى عندكم ثقة فينا شوية
مش انا دلوقت باحب الجيش من طرف واحد؟ بس انا مش حاعرف ادافع لو استمرت سياسة التكتم دي؟ انا مش مصدقة شكوك الناس اللي ابتدت تعلا، لكن مش حاقدر اقولهم مالكوش حق او اسكتوا، لأن الوحيد اللي بايده يطمنهم ويخزي الشيطان هو الجيش المصري فقط لا غير
دلوقت فيه اجهزة، بتحريك من امريكا، عايزين يقعدوا الجيش سنتين تلاتة لحد ما يحضروا البديل الامريكاني، والجيش مش عايز يقعد، فبيحاولوا يقعدوه غصب عنه بأن في نفس اليوم اللي فتحي سرور يتملق فيه الجيش والمشير يندس في مظاهرة ماسبيرو ناس تشتمهم
طب وبرضه انتوا يخيل عليكم الكلام ده؟
احنا شعب مصر.. مافيش احسن من الصراحة معانا، تعالوا لنا بشفافية وتشوفوا وقفتنا جنبكم شكلها ايه، وبعدين كام بلطجي قال كلام فارغ على المشير واساسا ما كانوش جزء من المظاهرة، دول يترنوا علقة بمنتهى السهولة لو جيتوا لنا دوغري وصارحتونا وطلبتوا مساعدتنا في اننا نحقق اهداف الثورة، بدل ما تقعدوا تبعتوا على كل واحد فينا واحد يطقس ورانا عشان يعرف احنا عملاء لمين
احنا مش عملاء ولا حاجة، واللي بنعرفه مش بنعرفه من العمالة، بنعرفه بالاستنتاج، معلش، ربنا فاتح علينا في مخنا شوية عشان الترنت وكده بتعلي مستوى الذكاء، وبعد كده لما تبعتوا حد ورانا يطقس ما تخليهوش يسألنا اسئلة هابلة تكشفه من اول لحظة عشان حتى اهبل ناس فينا فقسوهم، والله العظيم دي مجرد نباهة، والله العظيم كمان مرة احنا ما بنعمل اي حاجة غلط ولا ماشيين في البطال وكلنا عذراوات سوا مدامات ولا انسات ولا حتى رجالة، انتوا شاكين فينا ليه؟ طب لما ناس منا بتشك معذورين عشان هم ما عندهمش مصادر معلومات وكل واحد بيفسر على قد مخه، لكن اصول انت انتوا يبقى عندكم مصادر كويسة تعرفكوا اننا بنحب بلدنا بس، ثقوا في الشعب وما تخافوش علينا
ايه صفوت وزكريا اللي يهددوا دول؟ يروحوا يتوكسوا على خيبتهم، لو عرفوا يعملوا حاجة يوم معركة الجمل يبقى يعرفوا يعملوا حاجة دلوقت، وحرق البنك المركزي مش قصة يعني، والاحداث الطائفية البلهاء بتاعة اطفيح وقطع ودن واحد برضه مش قصة، عادي، احنا اتعاملنا مع حاجات انيل من كده بكتير وقت ما كنتوا في الصحرا، زي ما اتدربتوا هناك ما تخافوش من التعابين والعقارب احنا اتدربنا ما نخافش من صفوت الشريف وزكريا عزمي وفتحي سرور وسوزان مبارك وجمال مبارك، بس ثقوا فينا شوية
ثقوا فينا شوية.. او بلاش.. خلوا بينا وبينهم
يا اما انا مش حاعرف ادافع تاني بقى
واحنا مستمرين في حملتنا لحد ما نجيب الثلاثي عشان يبقوا يعرفوا يحطوا ايدهم في الكوبس وياكلوا ماس كهربائي يا كلوا جاتوه ياكلوا كل اللي يحبوه
هوبا يا شباب؟ 
للي بيجمع توقيعات في اسوان
0122375490


ده رقم مالك عدلي للي عايز ينسق معاه من المحافظات
0101044264


للي بيجمع في دمياط يتصل برقم
0111179793


اللي بيجمع توقيعات في الاسماعيلية يتصل على
0122526411


اللي بيجمع توقيعات في طنطا يتصل على
0124544946


واللي بيجمع توقيعات في اسكندرية يتصل على
0111860593


اللي عايز يوقع في سوهاج يتصل على
0146075050


اللي بيجمع توقيعات في بورسعيد
0120522209


اللي بيجمع توقيعات في المنصورة
0101176127


اللي بيجمع توقيعات في المنوفية
0171009042


لارسال مجموعات التوقيعات داخل او خارج مصر عبر البريد الالكتروني
fegypt20@yahoo.com
الميل ده للي بيجمع توقيعات كتير وياخدها سكان ويبعتها بالميل، ما تبعتليش توقيعك لوحدك، لو توقيعك لوحدك يبقى حطه على التوقيع الالكتروني


وللارسال بالبريد او التسليم يدا بيد
1 ش سوق التوفيقية


ودي صفحة التوقيعات الالكترونية
ودي صفحة الفيك بوس على رأي امين الشرطة اسم الله


وعموما لو هم ما صارحوناش او اتحرجوا منا يقولوا لنا الكلام ده، ادي احنا عرفنا، ماهو الثلاثي المرح دول اساسا هم اللي خربوها على دماغ مبارك بنباهتهم، يحرقوا البنك المركزي يعني فاكرينا مختومين على قفانا؟ 
بلدنا وحنجيبهم يعني حنجيبهم
وبنحضر ملف مبارك واسرته كمان.. هو احنا بنخاف؟ اللي يخاف يروح 
واذا كانت التوقيعات بتخضهم كده وبتخليهم يحرقوا بنوك.. قشطة جدا.. اللي ما وقعش يبقى خايف زيهم، وما يلزمناش الخوافين.. عيب يا جدع احنا من زمان.. من زمان قوي.. من ايام مينا موحد القطرين

73 comments:

ٍShakty said...

عزمي بشارة : اخشي ان مسار الثورة في مصر يسير مثل ماحدث في الجزائر فهناك النظام خرج من الباب ثم التف ودخل من الشباك..
للاسف الثورة توقفت ابكر مما يجب مكنش المفروض نقفل كده بدري بدري.

ٍShakty said...
This comment has been removed by the author.
Khaled Saleh said...

الامضاء عالورقة دي واجب شرعي يالله اشمعنا انتي

Tears said...

طيب يا نوارة يا صاحبه القلب الابيض و حسن الظن مهما عقلك شاف لو كان التهديد هو انهم ح يجيبوا رجل حد على راسه باطحة و عنده مليارات محوشها من مرتبه و اولاده الاتنين نسخة من جمال و جيمى و عاملبن بزنس و طايحيين فى البلد و يقال انهم شركا لجيمى ح نساعد ازاى؟

Khaled Saleh said...

الامضاء عالورقة دي واجب شرعي يالله هي جت عليكي

sporefominghuman.. said...

مين بيجمع في الزقازيق

sporefominghuman.. said...

مين بيجمع في الزقازيق؟؟

زعبلاوى said...

انا عارف انك بتزعلى وبتتكهربى لما حد يهوب ناحية الجيش , , بس بجد كده كتير اوى , انا ساعات بسأل نفسى هى كانت ثورة بجد ولا مشروع ثورة تم احتواءها بواسطة قوة هلامية فضائية شفافة
انا فاكر زمان كان عندنا واد صايع فى المنطقة كان كل ما يضرب حد , يطلعنا راجل سكرة كده ويقلنا خلاص امسحوها فيا , وانا هجيبلكم حقكم من الواد ابن الهرمه ده , وبعد كتيييير , بعد ما عيال المنطقة كلها اضربت من الواد الصايع ابن الهرمه , وطبعا كلنا كنا مستنين الراجل الطيب يجيبلنا حقنا , لغاية ما المنطقة كلها صحيت على فضيحة , وعرفنا ان الراجل السكرة المحترم كان عشيق (الهرمه) اللى هى ام الواد الصايع بن الهرمة , وده كانت نهاية الهرمه وابنها والراجل السكرة

إعادة التفكير said...

وسط الاخبار غير السعيدة..اللى بنشوفها وبنسمعها يومياً..وفى اطار الالتزام الكامل من جانبى بمرسوم مجلس الوزراء "لسه لم يصدر على فكره بقانون ولكنه اتطبق فورا قبل اصدارة رسميا ًعلى معتصمى كلية الاعلام ومحتجى ماسبيرو!!" ومن هنا ورايح وجاى فلن احرض احدا..والثورة ماشية تمام "فلة شمعه منوره" ومافيش حاجة اسمها ثورة مضادة"وهنام وانا ف بطنى بطيخه صيفى"..ولا اعرف شىء اسمه فلول "الحزب الواطى "ولا أذناب " قمل الدولة" واحب اخبركم بانى قلت" نعم " للتعديلات الدستوريه "انا اكذب على فكره"..و لم اوقع على حملة محاكمة الظرفاء الثلاثة " صفوت وزكريا وسرور " (رجعت اكذب عليكوا تانى لانى وقعت وخليت كل اللى يعرفونى يوقعوا كمان)..انا لا احرض احدا ولن اقول لكم بصوا رجالة تونس بيعملوا ايه (ملناش دعوة بحد..انتوا نسيتوا ابو الغيط : مصر مش زى تونس)..ولن احرض احدا على "حل الحزب الواطى "ولن احرض احدا على استرجاع "دولار واحد " ولن اهمس فى اذنكم عن عدم تنفيذ اى شىء فعلى حتى الان " لا حد اتعدم ولا حد جابلنا دولار ولا حتى سنت من المليارات اللى بتتحدف فى مانشيتات الصحف وبتتجمد دى" ...ومتتوقعش من انى هسأل طلعوا كام..ولن اخوفكم من جلسة يوم الثلاثاء اللى جاى (للى ميعرفش دى جلسة بخصوص دعوى مرفوعه من ناس " ولاد تيت"عاوزين يلغوا قرار التنحى ولا التخلى ولا التنازل .. بتاع الرئيس (العالم كله بيقول السابق ومرعوب يقول "المخلوع رغما عنه" اومال لو كان مشى بمزاجه كان هيسموه ايه؟؟) ومعرفش لو صدر الحكم لصالحه هيرجع ازاى (مش معترض لاسمح الله على رجوعه لكنى معترض على الوقت بس مش اكتر ..اصل يوم الثلاث قريب ومش هالحق اعمل لافتة كبيررره ترحب بعودة السيد الرئيس وتهنئه بسلامة العودة من الشرم قبل الفرم)..واحضرله كام مانشيت كده فى الصحف القومية من عينة كلام راجل معروف عنه انه "عُرس" قديم وصف يوم اجراء تعديلات الدستور عام 2005 بانه يوم" عُرس" ومتتخضش انا حاطط ضمه على الكلمتين ..ركز وكمل معايا ارجوك..اصلى فى الحقيقه وجدت ضالتى فى بعض العبارات التى قد تخفف عليكم حالة الانتظار والقلق لولادة الاعلان الدستورى وبين جلسة الثلاثاء ايهما اقرب سوى بعض العبارات التى قد تخفف عنكم ونصيحة اسمعوا اغنية كوكب الشرق ام كلثوم: انا فى انتظارك ..مليت!!!! ومحدش يفهمنى غلط ارجوكم انا عندى عيال!!! وتعالوا معايا نوجه بعض نداءات ارجع ياريس..وركزوا اووى فى اخر سطر فى المقالة دى :


ارجع يا ريس قبل العيد عشان نعرف نقول فى رسالة التهنئة بالعيد :عيد مبارك..وشريف ونظيف وكله سرور....ارجع يا ريس مش لاقيين اسم لمحطه رمسيس في المترو..وشكلها هتروح للشاذلى "حبيبك"!!! فاكره؟؟؟ ارجع يا ريس... تقريبا حضرتك نسيت نور الصالون في القصر الرئاسى مفتوح ...ارجع لحسن شكلك هيبقي وحش قدام السادات و وعبد الناصر لما يسألوك مشوك ازاي العفاريت دول ؟؟؟ ...ارجع يا ريس.. وحشتنا صور ابنك جمال فى الجرائد اليوميه و...قناة المحور....ارجع عشان ننزل التحرير تاني و ناكل كنتاكي وناخد يورهات....ارجع.. بقوا يطبخوا ع الفحم في اسرائيل يرضيك كل ده يحصل لاسرائيل ..ارجع ياريس ... شارع صلاح سالم بقالو كتير مابيوقفش ارجع يا ريس دكاترة الضغط والسكر و القلب مش لاقيين شغل ..طب ارجع عشان تامر حسني .. أو تامر أمين.


ارجع والنبى عشان خاطر سماح انور وزينة وطلعت زكريا..هو عبد اللطيف المناوى واسامة سرايا للدرجة دى بقى ملهموش خاطر عندك؟...ارجع يا ريس انا بقيت باتكلم في السياسة براحتي خالص....ارحمنا وارجع بقي...مين اللي هيغير اسم 620 الف مشروع ومدرسة باسم سعادتك وباسم الهانم؟...ارجع ياريس شكلنا هنبقي من الدول المتقدمة بجد....ارجع بقي ده حتي هالة سرحان رجعت , يرضيك كده يعني ؟؟.....يا ريس ارجع انا خايف رغيف العيش يكبر و أنا نويت اعمل دايت....ارجع بجد, دلوقتي لما مبيعجبناش وزير بيتغير , المسئولين اتبهدلوا من بعدك ...ارجع يا ريس , الإخوان بقوا بيطلعوا في التليفزيون الحكومي ......طب ارجع يا ريس و اللي اتفرم يتصلح ....طب بص.. بلاش انت ترجع.. بس جمال وعلاء ضروري يرجعوا قبل رمضان .. هنعمل الدورة الرمضانية ازاي من غيرهم؟؟

عموما قدامك لحد شهر رمضان لو مارجعتش وفضلت هناك..هانجيلك احنااااا
د/ هشام صلاح
http://www.facebook.com/profile.php?id=100000383224721

elzahraamegahed said...

هو خيرى رمضان وتامر امين والمناوى وسرايا والعالم بتوع الاعلام دول مش شغل الجيش انه يشيلهم

الكلام ده عصام شرف ليه ما بيعملوش؟؟؟؟

يا اما يرجع لصفوف الثوره زى ما وعد لو عليه ضغوط

لو صدقت ان على الجيش ضغوط بخصوص الثلاثى المرح فمش هقدر اصدق انه فيه ضغوط على عصام شرق عشان خيرى رمضان!!!!!

nour1971 said...

يا نواره اسمعي عبد الحليم قنديل في الجزيره مباشر حا تلاقيها طبعا علي النت و يا ريت تدخلي علي صفحه ضباط من اجل الثوره و تشوفي كتاباتهم حا يجيلك الاكتذاب اللي عند الواحد ربنا يستر علي البلد و يجعلها احسن و احلي بلاد الدنيا يا رب

Bienveillant أوفياء مصر d'Égypte said...

مصر دخلت فى حالة هستيريا سياسية ودينية - بس حالتها مستقرة الحمد لله

صوت الحق said...

نفسي اكون هادي زيك كده مش عارف جبتي الهدوء ده منيين صراااحة

ثم حرص ولا اتخونش ثم مانعمل حاجة وسط تضمن حقوقنا وفي نفس الوقت مانتخانقش الا لو هم اللي بدأوا

يعني ايه التشكييك في ان مفيش حاجة بتتعمل وفي نفس الوقت مطمنيين

اي نعم احنا مطمنين عشان الحمدلله احنا موجودين واي انحراف مش هنسكت بس لييه نستنى لما يدخل فينا جوون هو ماينفعش ابدا نخرج فايزيين لازم نتعاااادل لازم نفضل ندلع كده

طب مرة بس نكمل حاجة للآخر مرة واحدة بس ياربي

مهندس مصري said...

ربنا يا بنتي يصدق ظنك في قيادة الجيش و يخلف سوء ظننا
بس إحنا ملناش غير اللي شايفينه بعينينا
و الأفعال أصدق من الأقوال
و برضه أنا شايف إن مليونية يوم الجمعة الجاية حتضبط وضع الثورة اللي نامت دي
و ربنا يوفق شعبنا لكل خير و ينصره على من يعاديه

صوت الحق said...

انتي هتقعدي تهدي الناس كده لإمتى ؟؟؟

ماينفعش شغل اللي بيصلحوا بين الراجل ومراته ده

الحق حق ولو خفنا النهاردة مرة يبقى بكرة هنخاف الف مرة

والخوف هيرجع تاني للناس والناس هتتفرق تاني

ونرجع نعيده من اوله

راجعي كده ثورة 52

Hoda said...

والله انا خليت كل عيلتى توقع حوالى 15 توقيع لغاية دلوقتى ومن بكره بإذن الله هخلى كل زميلاتى فى الشغل توقع على البيان وهحاول مع الرجاله مع انهم بيخافوا قوى من حكاية الرقم القومى دى وممكن يتهمونى بالعماله .. بس ولو احنا ما بنخافش واللى خايف يروح وانشاء الله هنكنسهم كلهم وننضف البلد ربنا يعزك وينصرك

ryad.younis said...

وسط متلازمة الاحباط والحزن على الثورة المغتصبة هاقولك .. تسلم ايدك يانوارة الأسد


البيان الدستورى اللى كان مفروض بعد ساعات شكله مش طالع

محاكمات الوزرا اتأجلت والمحكمة
بعتتها

بقيت عناصر الفساد متسابين بيخربوا البلد اكتر ماكانوا بيخربوها الاول

جيمى وابوه فى شرم

الجيش بعد مالم وثايق امن الدولة من الناس وقال هيحقق فيها رجع وسلم الجهاز كله للداخلية تانى

قانون الاعتصامات اللى نزل ده .. لاتعليق طبعا غير أحا

فين الجيش .. القوة الضاربة والمسيطرة
صاحب القرار اللى اديناله حق حماية بلدنا من كل عدوان خارجى وداخلى
فين قراراتك ياجيش

يااستاذة نوارة .. بلطجية مين اللى يتضربوا عشان شتموا المشير ؟ من امتى وقرارات الجيوش اللى بيترتب عليها مصير الشعوب بتبنى على خلافات شخصية او شغب فردى اوشتيمة ؟


هل فشلت الثورة ؟

nwara said...

يارب قدم إلي فيه الخير لمصر

Samah said...

احنا عايزين مظاهرة مليونية محترمة في التحرير .. أنا قربت أولع من عمايل الجيش
كده يبقى العقيد عمر عفيفي صح بقى

أمــانــى said...

انا كمان معاكى برضو من اسوان وهأشوف مين صاحب الرقم المكتوب وهأشاركه ان شاء الله
لا وقت للرجوع للخلف كفاية كلام وقعدة على النت الناس البسيطة هما اجدع من الف واحد قاعد يعمل كليك وبس
انتهى عصر الكليك

hardway said...

الي ارق نـــــــوارة....ياجـــــامدة
أنت جامدة اووووووووووووي..ياربي
ايه المقالة الجبارة الجامدة ولا معقولة
ما تخافوش...ما تخافوش..ماتخافـوش..!!!!
تقريبا الثلاثي بتاعك اللي بدوري عليهم
اثروا علي دماغك..وضربوا كل الفيوزات
ايه يا نوارة..حصل حاجة..تعبانة مجهدة
الثلاثي تعبوكي كده للدرجة دي لا لا لا...
بأمــــــــــــارة ايه ..مايخافوش؟؟؟؟؟
ممكن اعذرك لما وصلتي له من حالة ميئوس منها
لوصول التوقيعات حتي رقم12766 اليوم
بعد مرور 6أيام ....ممكن بعدشهرين توصلي للعدد 100000 ممكن أنجاز
بس برضه كل ما يحدث لا يجعلك تقولي
ماتخافـــــــــــــــــــــوش
انت عارفة لولا الخائفين دول المنتظرين حماية سيادتك
لولا هؤلاء.........عارفة كنتم كلكم...
كــــــــــــــــــلــكـم
بكل أسمائكم...وأطيافكم
أئتلاف..أمناء..حكماء..6....شباب..
كــــــــــــــــــلــكـم
لولا الخائفين....المنتظرين سيادتك
لولا هؤلاء ...لما حدث ما حدث يوم 25 يناير
وما بعد 25 يناير
لو تصورت ما كان يمكن أن يحدث لمصر كلها
من خراب..وضياع..وفوضي..وأنقسام
وبعد كده نداءات ياعالم التحضر والتقدم ..ألحقــــــونا
وبالطبع ماأسهل تلبية النداء
الحلف الاطلنطي موجود وفي الخدمة...
عيب....عـــــــــــــيــــب
ما تكتبيه..وما تخطيه بيدك عيب
لكل مقام .....مقال
عندك ثأر مع الثلاثي...حاربي وناضلي
واجمعي توقيعات ...لكن أن تخطئ ..وتتجاوزي وتخلي الدنيا كلها طحينة في بعضها
لالالالالالالالالالالا
الناس دول أسألي والدك عن تاريخهم
عـــــــــــــــيــــــب

samysalah7 said...

يا نوارة أنا مش مطمئن كل اللي بيحصل بيقول إنه فيه توطؤ وإلتفاف على المطالب الثورة.الغريب إن هويدي مصر على أنه مفيش ثورة مضادة! يعني إيه الناس ماتتحاكمش لحد دلوقتي يعني إيه مافيش تصريح من ولا مصدر داخلي أو خارجي بحجم الأموال المجمدة؟ فيه إيه، وإلا حكاية تحرج المحكمة بتاعة عز ديه كمان، كل حاجة عمالة تتأجل، الثورة لم تحقق مطلباً واحداً على أرض الواقع لا يمكن الرجوع فيه بجرة قلم، أليس كذلك أما أنا شخص سوداوي بطبعي ولا فيه إيه؟

samysalah7 said...

ما هي الخيانة العظمى؟
وعلام يحاكم مبارك وأسرته وحزبه وأجهزة أمنه؟

الخيانة العظمى تعني عدم الولاء للدولة والعمل ضد مصالحها. (موسوعة ويكيبديا)

وماذا نسمي ما فعله مبارك وأسرته وحزبه وأجهزة أمنه بمصر وشعبها طيلة ثلاثين عاماً؟

إفقار وإذلال وقهر وتعذيب الشعب، وإهدار حقوقه وأمواله وموارده، وتهريب أمواله خارج البلاد، والتفريط في حقوق البلاد والعباد لأطراف خارجية منهم أعداء الوطن من أجل مصالح شخصية، ونشر الجهل والفساد والفتن والأمراض والرذائل للإلهاء الشعب عن حقوقه والمطالبة بها. تأخر مستوى الوطن على جميع المقاييس الدولية وعلى جميع الأصعدة: سياسياً وإقتصادياً وعلمياً وأخلاقياً وإجتماعياً وصحياً وبيئياً ... ماذا نسمي هذا كله؟ أنسميه وفاءاً بالقسم الذي أقسمه مبارك أمام الله أولاً ثم أمام شعبه حين تولى مسؤولية حكم وحفظ البلاد والعباد؟

وما هي الدولة؟ أليست هي البلاد والعباد، أليست هي أرض مصر وشعبها؟

أم هي الحاكم وأسرته وحزبه كما يعرفها مبارك ونظامه؟

هل أقسم مبارك أمام الله على حفظ نفسه وأسرته وحزبه وأجهزة أمنه؟

أم أقسم على حفظ مصالح مصر وشعبها؟

والآن ما هي الخيانة العظمى؟

محمد طنطاوي said...

ضاقت فلما استحكمت حلقاتها
فرجت
وكنت أظنها لا تفرج

Sameh said...

شوف يانواره
, الاهم هو تجميع الشباب علي خطوات محدده وواضحه, ما تم تنضيفه من الفساد هم اشبال جمال مبارك فقط وحتي هذا لم يتم بعد , كل الحرس القديم لم يمس وهذا المفروض ان يرعبنا لانه لامعني له غير التواطؤ
والتفكك والتخبط بين الشباب اللي بدء الثوره هو اللي حايضيع الثوره
احنا وثقنا وصدقنا فيكم وقدمنا الشهداء وكنا جنبكم ووراكم وخلفكم, واملنا في الله وفيكم كبيييير قوي, فارجوكم لاتخذلونا, ولا تخذلو مصر
الوحده , الوحده الوحده

ملكش دعوة said...

الله يحظك يا نونو ..ضحكتيني وانا مليش نفس من ساعه ما عرفت موضوع البنك وانا حسه ان الناس دي مش هتسيبنا في حالنا وهيولعوا فينا
انا وقعت علي البيان وحطيت رقم بطاقتي وده الغالي اللي محدش يعرفه غيري بكره مصر كلها هتعرفه ويمكن ولاد الكلب يجبوني بس مش مهم
انا عايزه اشوف الصفرا بنت الكلب دي واجيبها من شعرها وامسح بيها بلاط اوسخ حمام في اعفن موقف اتوبيس كله منها عايزه تخربها معلش ربنا انتقامه اشد وهنشوف فيها يوم

الحسينى said...

أوجعوا فى قلبى بقى ومصارينى أصل هى الحكاية ناقصة.
هو ليه الناس بتوع الإئتلاف كده مش بيتكلموا بأسمنا ومش شادين حيلهم كده ومصحصحين.
ليه مش بيطلبوا الحاجات المهمة اللى هى من الأولويات من الجيش لما هما بيكلموا الجيش يعنى وبيجتمعوا معاهم؟
يعنى الناس كانت فاكرة أن الشباب دول هيبقوا صوتهم عند المجلس العسكرى ولا لازم الصوت يعنى يجى من الميدان؟
وبعدين الكلام الكتير ده والتعليقات متطمنش والحياة بقت سودة على الأخر .
سؤال كمان ليه صفحة التوقيعات شالوا العداد ؟ و الناس مش شغالة فى موضوع التوقيعات بقلب ليه ؟ لو الموضوع مش نافع ييجى بالورق يبقى ييجى من الميدان.

بنت مصر said...

مصادر: اتجاه لتأجيل «الرئاسة» إلى يونيو 2012.. ولجنة ثالثة لحل خلافات «الإعلان الدستورى
شوفت الخبر ده اهم ناويين يقعدو فيها يعنى صوتى بنعم على الفاضى

utopia said...

رصد |صحافة| جامعة القاهرة تحيل إداريين وموظفين للتحقيق بتهمة التورط فى أحداث مظاهرات التحرير

بالشفا يا نوارة

ابو هاجلا كلامك مقنع لدرجة مخييييفة

ryad.younis said...

مين الأستاذ hardway ؟

ده حتى اللى ميشفش من الغربال يبقى أعمى .. وهما مخلوش فيها غربال اصلا

ياسيدى الفاضل الناس دول بشر .. يعنى مش معصومين من الخطأ .. وهى مغلتطش لما قالت ان عليهم ضغوط
وكمان خوفها على البلد والمصلحة العامة خلوها لحد دلوقت مش راضية تقولها صريحة اوحتى تلمح إن الجيش نفسه بقياداته لايخلوا من الفساد .. وكل افراد الجيش بلا استئناء عارفين كدا

وبالنسبة لتارخهم اللى بتتكلم عنه فبرضه لايخلوا من الاخطاء والفادحة احيانا .. فياريت نبطل نسبح بحمد بشر أيا كان
حب الجيش آه وخاف عليه واحترمه بس لما يغلط تاخد بإيده وتدعى اللهم لاتجعلنا من المعرصين

______
حاجة كمان .. الكلام ليكى يانوارة
ياريت متتبنيش اتجاهات تسنفد طاقة الثوريين من غير نتيجة مضمونة .. زى مثلا حوار التصويت على قانون الاعتصامات اللى كل شوية تحطى لينكه على تويتر
لأنه مش صعب ابدا على موقع رئاسة الوزرا انه يزور النتيجة الالكترونية بطرف صباعه للقرار اللى عايزة دا لو الناس البسيطة عرفت اصلا ان فيه استفتاء تم عالنت

انا وجهة نظرى المتواضعة انهم بيرمولنا انصاف حلول .. مش عارف استفتاءات دستورية واحنا اصلا من الاول كان مفروض نرفض الفكرة نفسها .. مفيشش استفتاءات على شرعية دستور ساقط .. ودلوقت اصل بتوع الداخلية نزلوا ولعوا فى مبنى يبقى نمنع العتصامات والنكتة بقا ان احنا ننزل استفتاء موافق نمنع الاعتصامات ولا لأ ..
يامصريين .. اضربوا بها عرض حائط الحمام .. وانزلوا التلات الجاى او حتى خلوها مليونية جمعة جديدة ومحدش يرجع بيته الا لما تتحقق مطالب الثورة الاساسية اللى لهونا عنها
- القبض على قيادات امن الدولة بالكامل ومحاكمة عسكرية عاجلية ليهم
- الثلاثى المرح ومن على شاكلتهم
- الاعلام ابن الوسخة بتاعنا .. ولازم شباب الثورة يكون ليهم قناة كاملة
- لما الجيش يتكرم ويحقق المطالب دى ويقرر انه يدخل التاريخ من اوسع ابوابه يتفضل مشكورا بتسليم القيادة لمجلس مدنى او مجلس حكماء متكون من ائتلاف لأبرز الشخصيات مع اعطائهم صلاحيات اصلاحية ووزارية تكفل دولة حرة عادلة وانتخابات نزيهة

انا عارف انى ممكن اكون بهرتل ووعيى السياسى مش عالمستوى المطلوب ..بس انا شايف انه ده الصح اللى لازم يتعمل فى الوقت ده
وواجبى انى اقول الكلام ده عشان احافظ عالثورة وعلى ولاد بلدى
وياريت يانوارة تحسى انه واجب عليكى انتى كمان تنشرى كلامى ده ولومش موافقانى تبقى تردى عليا وتفهمينى


إلى أصحاب نغمة الاستقرار وفزاعة البلطجية .. كلمة واحدة ... أحيه عالرجالة
اسكندرية عندهم اكبر نسبة بلطجة وطول الفترة اللى فاتت دى بنات بتتخطف ووصلت لأتوبيسات المدارس مع ذلك اهالى اسكندرية قالوا لأ للتعديلات الدستورية .. رجالة
وبالنسبة للفلوس اللى هتخسرها البلد فى الكام يوم دول مش اكتر من اللى مسروق وهيرجع بإذن الله


بالنسبة للدكتور عصام شرف ..لاأشككك فى نزاهتك بس ياريت ماتنساش وعدك بإنك هترجع التحرير تانى لو مقدرتش تنفذ مطالبنا
وأعتقد ان قانون منع الاعتصامات اللى ناقشته استحالة يكون من مطالب الثورة

ryad.younis said...

مين الأستاذ hardway ؟

ده حتى اللى ميشفش من الغربال يبقى أعمى .. وهما مخلوش فيها غربال اصلا

ياسيدى الفاضل الناس دول بشر .. يعنى مش معصومين من الخطأ .. وهى مغلتطش لما قالت ان عليهم ضغوط
وكمان خوفها على البلد والمصلحة العامة خلوها لحد دلوقت مش راضية تقولها صريحة اوحتى تلمح إن الجيش نفسه بقياداته لايخلوا من الفساد .. وكل افراد الجيش بلا استئناء عارفين كدا

وبالنسبة لتارخهم اللى بتتكلم عنه فبرضه لايخلوا من الاخطاء والفادحة احيانا .. فياريت نبطل نسبح بحمد بشر أيا كان
حب الجيش آه وخاف عليه واحترمه بس لما يغلط تاخد بإيده وتدعى اللهم لاتجعلنا من المعرصين

______
حاجة كمان .. الكلام ليكى يانوارة
ياريت متتبنيش اتجاهات تسنفد طاقة الثوريين من غير نتيجة مضمونة .. زى مثلا حوار التصويت على قانون الاعتصامات اللى كل شوية تحطى لينكه على تويتر
لأنه مش صعب ابدا على موقع رئاسة الوزرا انه يزور النتيجة الالكترونية بطرف صباعه للقرار اللى عايزة دا لو الناس البسيطة عرفت اصلا ان فيه استفتاء تم عالنت

انا وجهة نظرى المتواضعة انهم بيرمولنا انصاف حلول .. مش عارف استفتاءات دستورية واحنا اصلا من الاول كان مفروض نرفض الفكرة نفسها .. مفيشش استفتاءات على شرعية دستور ساقط .. ودلوقت اصل بتوع الداخلية نزلوا ولعوا فى مبنى يبقى نمنع العتصامات والنكتة بقا ان احنا ننزل استفتاء موافق نمنع الاعتصامات ولا لأ ..
يامصريين .. اضربوا بها عرض حائط الحمام .. وانزلوا التلات الجاى او حتى خلوها مليونية جمعة جديدة ومحدش يرجع بيته الا لما تتحقق مطالب الثورة الاساسية اللى لهونا عنها
- القبض على قيادات امن الدولة بالكامل ومحاكمة عسكرية عاجلية ليهم
- الثلاثى المرح ومن على شاكلتهم
- الاعلام ابن الوسخة بتاعنا .. ولازم شباب الثورة يكون ليهم قناة كاملة
- لما الجيش يتكرم ويحقق المطالب دى ويقرر انه يدخل التاريخ من اوسع ابوابه يتفضل مشكورا بتسليم القيادة لمجلس مدنى او مجلس حكماء متكون من ائتلاف لأبرز الشخصيات مع اعطائهم صلاحيات اصلاحية ووزارية تكفل دولة حرة عادلة وانتخابات نزيهة

انا عارف انى ممكن اكون بهرتل ووعيى السياسى مش عالمستوى المطلوب ..بس انا شايف انه ده الصح اللى لازم يتعمل فى الوقت ده
وواجبى انى اقول الكلام ده عشان احافظ عالثورة وعلى ولاد بلدى
وياريت يانوارة تحسى انه واجب عليكى انتى كمان تنشرى كلامى ده ولومش موافقانى تبقى تردى عليا وتفهمينى


إلى أصحاب نغمة الاستقرار وفزاعة البلطجية .. كلمة واحدة ... أحيه عالرجالة
اسكندرية عندهم اكبر نسبة بلطجة وطول الفترة اللى فاتت دى بنات بتتخطف ووصلت لأتوبيسات المدارس مع ذلك اهالى اسكندرية قالوا لأ للتعديلات الدستورية .. رجالة
وبالنسبة للفلوس اللى هتخسرها البلد فى الكام يوم دول مش اكتر من اللى مسروق وهيرجع بإذن الله


بالنسبة للدكتور عصام شرف ..لاأشككك فى نزاهتك بس ياريت ماتنساش وعدك بإنك هترجع التحرير تانى لو مقدرتش تنفذ مطالبنا
وأعتقد ان قانون منع الاعتصامات اللى ناقشته استحالة يكون من مطالب الثورة

kbahey said...

يا اخت نوارة

ابراهيم كامل مهندس الثورة المضادة من يوم موقعة الجمل، مش بيتحاكم ليه؟ اسمه مش مع سرور و عزمي و الشريف ليه؟

http://www.youtube.com/watch?v=Enuu5tq2dgQ

و قال الاقلية اللي في التحرير لا تمثل مصر، و الاغلبية عايزة مبارك، و هناك مؤامرات خارجية من حكومات و صحافة

https://www.youtube.com/watch?v=GY00UKCc_K8

و هو كمان مهندس التوريث بشهادة عادل حمودة

https://www.youtube.com/watch?v=sr6elFv2YVw

ارجو انه ينوبه من الحب جانب و يبقوا الرباعي المرح

حبيبة said...

لالالالالالالالالالالالا يا نوارة كده كتييييييير واوفرررررر اوووووووى اللى بيحصل فينا ده يعنى محاكمة عز واللى معاه تتاجل عشان معرفش مين طلع متجوز مين مفهمش انا فى الكلام ده انا اللى افهمه ان فى ثورة والثورة يعنى كل الفاسدين واولهم الباشا الكبييييير والكونتيسة بتاعته والبهوات الصغيرين يتحطوا فى ميدان عاااام ويتولع فيهم جاز وسخ وده مش معناه اننا لا سمح الله ناس ظالمة ولا مفترية لو سألتى طوب الارض فى الشارع هيقولك ان الناس دى اللى خربت البلد الناس دى اللى قتلت شاب زى الورد ليه قى الجيش تاعنا مش عارف الكلام ده وسايبنا كده فى حرقة الدم ووجع القلب ده قسما بالله وانا باحلف الناس دى لو اتحكملها يوم التلات الدم فى الشوارع هيبقى للركب ولا هيهمنا قانون منع الاعتصام الغريب العجيب ده ولا هيمهنا حد عشان اللى بيحصل ده حراااااااااااام بجد وعدين فين شباب الائتلاف يا نوارة حسهم وطى ليه ما يطلعوا يتكلموا وهيلاقونا وراهم ومعاهم يا ناس ياااااااهو البلد دى لو ضاعت مننا يبقى احنا انتهينا ده احنا ما صدقنا انها رجعتلنا
حسى الله ونعم الوكيل فيك يا حسنى انت والعقربة بتاعتك وجوز الصراصير ولادك

أبو هاجر said...

ست الكل مساء الخير

كلنا عذراوات سوا مدامات ولا انسات ولا حتى رجال

لو كنت في الشقيقة سوريا وتلفظت بهذا الكلام لوجهت لك تهمة :وهن نفسية الأمة وإضعاف الشعور القومي .وهي تهمة صاحبها يأخذ إعدام

hardway said...

الي أرق نـــــــــوارة..نفسها تنزل التحرير
احنا رحنا فين؟ ما احنا اهو..
بس انا مش حاعرف ادافع لو استمرت سياسة التكتم دي؟....
احنا اتعاملنا مع حاجات انيل من كده بكتير وقت ما كنتوا في الصحرا
يا أرق نوارة...........
أحنا.....مين؟؟؟؟؟؟؟؟؟
هش حاعرف ادافع....عن مين؟؟؟؟؟؟؟؟؟؟؟
عيزاهم...يرجعوا الصحرا........!!!!!!!!!!!
مفيش نزول تاني......مفيش هطل تاني

OberonSky said...

إيه حكاية مظاهرة ماسبيرو إلي كان فيها شتايم إلي بتقولوا عليها .. انتو قصدك على الهتافات ضد المشير طنطاوي ؟؟ هي كانت شتيمة ازاي ممكن حد يشرحلي أنا مشيت بدري و مسمعتش شتيمة و مش فاهم إيه إلي حصل بالظبط ..



على العموم .. أنا أرجو اني أكون غلطان لكن رأيي إن المجلس العسكري بردو مهواش كله ملايكة .. الفساد وصل لكل حتة في البلد و من ضمنها الجيش .. ممكن يكون بنسبة أقل بكتير من الداخلية مثلاً لكن وجوده طبيعي .. العسكر و ظباط الصف و الكوادر المتوسطة و غيره دول حالهم من حال الشعب و أنا مش خايف منهم و من وطنيتهم عامةً .. أنا إلي خايف منهم بعض الناس اللي فوق و بتوع الشرطة العسكرية .. لأن دول عملين زي أمن الدولة بس على غير المدنيين ... و من الطبيعي بعد كل التباطؤ دة و الاخبار بتاعة التعذيب و الإهانات إلي شافوها بنات و شباب على ايد الشرطة العسكرية يبقى فيه خوف إن التباطؤ يبقى تواطؤ زي مبيقولو ...



المهم .. دلوقتي الوضع زي ما أنا شايفه لا يبشر بالخير .. أنا كنت أكتر واحد متفائل من يوم 25 يناير لحد امبارح .. بقى معقول بعد كل ده .. و احنا لسه عايزين نلم توقيعات علشان نحاكم فتحي سرور و صفوت الشريف و زكريا عزمي و غيرهم ؟؟؟ هو مش الثورة و إسقاط النظام تتضمن الكلام ده ولا احنا مكتوب علينا نقول طور يقولوا احلبوه في كل حاجة كدة ..



ليه يعني المصريين مكتوب عليهم ميفرحوش بثورتهم .. ناس هتقولي لأ أصل لزم مستندات و دلائل علشان نحكمهم .. لا والله عداك العيب .. و الناس إلي اتخدت محاكم عسكرية و إتلفق ليهم تهم بلطجة دول بردو كان فيه مستندات و دلائل ؟؟ جرت قلم وحدة هتجيب كل الفساد ده و ترميه السجن تحت بند الفساد السياسي ...



و بعدين أدي المجلس الأعلى أهو هيئخر الإنتخابات الرئاسية لغاية يونيو 2012 يبقى كان إيه لزمت الإستفتاء و خلتونا نقول نعم علشان يمشو بسرعة .. مهم قاعدين أكتر أهم .. و الدستور الجديد هيتعمل و هما في مركز الرئاسة .. روحوا شوفو صفحة جريدة الدستور .. فيها خبر عن ده ...



الثورة بتضيع .. و المجلس بيمشي بسرعة السحلفة .. و الاكثرية الصامتة إلي عندها جهل سياسي زهقت و كرهت الثورة و الثوار .. و التحرير خلص بقى مزار للأجانب بس و ممنوع الشعب يروح تاني .. و لما حاولنا نلم ناس علشان فساد ماسبيرو إلي جم كلهم 1000 بس على بعض .. .. و البلد اللي كان ممكن تبقى أحسن بلد في العالم هترجع تاني يدوب نص نص على أحسن حال ...



و بصراحه .. أنا أحمل المسؤلية و الغلط كله على المجلس العسكري .. بصرف النظر بقى هو عمل كدة بسبب حرص زايد أو تواطؤ أو جهل مش مهم النتيجة كانت واحدة ... إستنزف قوة الثوار و مجهودهم في حاجات خايبة .. يعني لو كان شال حكومة شفيق من أول يوم مش كان الناس بدل متضيع وقت عليه علشان ينشال كانت ركزت في حاجة أهم .. و لو كان جاب ولاد الكلب الثلاثي المرح من أسبوع مش كان الناس دلوقتي شغالة و بتبني مصر .. و لو كان شال سرايا و المناوي و قيادات الإعلام الفاشل مش كان زمان الإعلام نضيف و الناس بتتعلم الديمقراطية على أصلها .. و لو كان عمل دستور جديد من الأول مش كان الناس ركزت في عمل احزاب بدل تضييع الوقت في نعم و لأ و دين مخلوط فيه سياسة ...



المجلس العسكري من غير قصد أو تعمد منه طلع هو الثورة المضادة .. يا رب أكون غلطان

mohagamy said...

عايزين نعمل لجنة للشعب تتكلم بإسمه مع المجلش العسكري ... عدد الأعضاء 120 مثلاً ...عشان أي حد ينضم للجنه لازم مايكونش من الحزب الوطني..أو من أعضاء مجلش الشعب السابقين ... أو من الحكومات السابقه ...ويجمع 100 ألف توقيع مثلاً من مواطنين انهم عايزينه يمثلهم .. وكل مواطن يوكل شخص واحد فقط.

mohagamy said...

عايزين نعمل لجنة للشعب تتكلم بإسمه مع المجلش العسكري ... عدد الأعضاء 120 مثلاً ...عشان أي حد ينضم للجنه لازم مايكونش من الحزب الوطني..أو من أعضاء مجلش الشعب السابقين ... أو من الحكومات السابقه ...ويجمع 100 ألف توقيع مثلاً من مواطنين انهم عايزينه يمثلهم .. وكل مواطن يوكل شخص واحد فقط.

OberonSky said...

معلش إستحملوني شوية أنا هتفلق من الغيظ ..


دلوقتي لو الجمعة الجاية في التحرير اللي هي معمولة علشان محاكمة مبارك و عيلته و الثلاثي المرح و معهم كامل و سالم و قيادات الشرطة و أمن الدولة .. و تنضيف الإعلام و الصحف و الجامعات غيره .. و المحليات و المحافظين و حل الحزب الوطني و منع قيادته (على الأقل) من المشاركة السياسية لمدة معينة ... لو المظاهرة ديه ما راحش فيها 200,000 على الأقل مش هقول مليون لأن ده خلاص رجع تاني من ضرب الأحلام ... يبقى الثورة دي انتهت

Eldemokraty said...

هفكرك بجزء من كتاباتك

اولاً
اشغال الرأي العام الثائر في متابعة محاكمة مسؤولين كبار في الدولة ورجال أعمال بارزين وظباط ليبدو الأمر وكأن هناك خطة إصلاح حقيقية تحظى بتأييد شعبي واسع النطاق على ان تكون محاكمات صورية ويتم الأفراج عن من يتم سجنهم على مراحل مع تولى السيد عمرو موسى او السيد احمد شفيق رئاسة الجمهورية


جزء كبير منه حصل وده مش إشاعه

تاسعاً
يجب ان يتمكن شباب الحزب من وضع يده على ميدان التحرير بحيث يكون الميدان هو عودة للحكم كما كان سبب فى ترك الحكم وذلك بفض اى اعتصامات مستقبليه تحدث فيه وذلك بزرع عناصر من السوابق فى اى تواجد فى المستقبل حتى يعتاد الناس على وجوههم ويكونوا جاهزين لتنفيذ ما يطلب منهم فى المستقبل مع البدء فى وضع خطة شراء عدد 20 الى 30 شقة بالميدان حتى تكون مراكز للحزب فى المستقبل

جزء كبير منه حصل مش إشاعه بدليل انك قرفتي من وقفتك في ماسبيروا

سادساً
القيام بحملة إعلامية يترأسها السيد عبد اللطيف المناوى على ان يرشح ثلاث معاونين له بميزانية مفتوحة تركز على الإصلاح وتفتح المجال للتعبير عن الرأي بحرية بحيث اظهار الرأى الأخر المتمثل فى الحزب والدعوة الى فض اى اعتصام او مظاهرات وتفعيل دور برنامج مصر النهاردة بالأبقاء على السيد تامر امين وخيرى رمضان وابعاد السيد محمود سعد والتصدى لأى محاولة للتعاقد مع اعداء الحزب مثل حافظ الميرازى او ابراهيم عيسى او حمدى قنديل او اى اعلامى معارض

جزء كبير منه حصل مش إشاعه خالص وإلا إسألي نفسك وقولي فين هيكل وفين محمود سعد وفين حمدي قنديل وفين طلعوا مره وحده وشكرا بس على فكره خيري وتامر زي ما هما رغم انهم منافقين بس زي مهما والمينياوي هو فين زي ماهو

يعني ده مش إشاعه ده حقيقه
عاشراً
لايوجد اى محاكمات لأى عضو من اللجنة العليا وما يقال فى الأعلام هو لتهدئة الرأى العام ولن يتجرأ احد على التحقيق او محاكمة السيد الرئيس السابق حسنى مبارك او احد من عائلته او القادة الموجودين هنا فى الأجتماع لأننا خط احمر والدليل اننا لم يتم توجيه اى اتهام لنا حتى اليوم ولن يحدث والسبب سنعلنه فى المستقبل

هما مين اللجنه العليا وبعدين أستني هو في حد اتحاكم أصلا
وده كمان حقيقة مش إشاعه

وقانون نجريم الإعتصامات والتجمهر ده إيه ده إشاعه برده ولا حقيقة

وحبك الدائم للمقالات التي كانت بتحرض الناس على نعم للدستور وبعدك التام عن أي مقال قال لأه
ده برضه حقيقة مش إشاعه

وبعديي مسألتيش نفسك هو ليه الجيش منزلش إعلان دستوري من الأول وخلا الإستفتاء تبقى عليه ولا إيه وكمان انا حاسس ان الناس كلها خدت على قفاه انا قلت لأه علشان إعلان دستوري والحمدلله الجيش فاجئني وونفذ رغبتي رغم إني مكنتش من الأغلبيه وكمان ضحك على بتوع نعم قصدي بتوع الماده التانيه وبتوع الإستقرار وهينزلهم إعلان بالمواد المعدله بس يا ترى هيلحق وعلى فكره خليكوا فاكرين أن الإستفتاء ده وجد نوع من الضغينه بين الشعب وبعضيه

زمان من شهر ونص كنا إيد وحده مكنش في خلافات ولا فتنه ولا ضغينه حتى

لكن حاليا فيه ضغينه ما بين معظم الشعب والإخوان وفي ضغينه كمان مابين الإخوان وبعضضهم وكمان فيه ضغينه بين السلفيين وبعضهم وكمان قدام هيبقى في ضغينه ما بين مؤيدين كل رئيس مرشح نفسه وكمان انت نسيتي مؤيدين حسني مبارك

وفي النهايه انت أرائك متردده بس انتي ثابته في حبك للجيش وده حقك طبعا حب مشروع على رأي القوات المسلحه نحن ننفذ المطالب المشروعه للثورة بس يا ترى إيه هي المطالب الغير مشروعه في نظر الجيش سؤوال محيرني ونفسي أعرفه مع إن أي مطلب للشعب وهو إيد وحده يعتبر مطلب مشروع أما أي مطلب للشعب وهو متفرق يعتبر مطلب غير مشروع

وعلشان كده أتمنى إن الشعب يبقى إيد وحده تاني
وأنه يتحد لأن الأيام القادمه خطيره على الديمقراطيه وتتطلب أن الشعب يكون إيد وحده تاني

وشكرا

وبصراحه انا مش عارف من الغبي ومين الزكي في نظر الجبهة
وعلى العموم سلام يا جبهه
اه نسيت أزاي هتحسبي ناس فوق القانون بالقانون ....أزاي

Lawyer 2012 said...

http://www.youtube.com/watch?v=UhyZ1WE2_f8

خدي الفيديو ده يانوارة (:

أي خدمة ياستي ...
ههههههههههه

negmat said...

اتجاه لتأجيل «الرئاسة» إلى يونيو 2012.. ولجنة ثالثة لحل خلافات «الإعلان الدستوريhttp://www.almasryalyoum.com/node/375150
ايه رأيك

علا حسين said...

أنا كدة بدأت اتخنق , طب أنا عايزاهم يحكموا فى القضية بان مبارك يرجع تانى ,أنا بصراحة ميدان التحرير وحشنى وساعتها مش حتلاقى 18 مليون بس ده انت حتلاقى ال85 مليون فى الشارع وساعتها بقى البلد حتنضف اسرع كله المره دى حيكسو بره سوزى وجيمى ولولو وابوه وعمهم وخالهم وست اللى جابت سلسفيل امهم وساعتها مش حنستنى قضاء وتجميد أرصدة وتجميع توقيعات كله حيخلص أوام أوام يا معلم وقشطه

hardway said...

الي أرق نــــــوارة....توقيعات
كل أصحابك في تعليقاتهم زعلانين وبيسألوا
عن التخبط..والتفكك لشباب الثورةولماذا نامت الثورةوتوقفت المليونات........
وكعادتنا القديمة التي لم و لن تتغير بندور علي شماعة نعلق عليها السبب ...سهلة مش عايزين نفكر ..سهل ..الجيش السبب ..وخلاص
هناك بعض الاسئلة يجب الاجابة عنها ..هي
1-ما هدف هذة الثورة.؟
توجه
الثورة...سياسيا..أقتصاديا..أجتماعي
ماهو.....؟؟؟؟؟؟؟؟؟ا
أين قيادة هذه الثورة....؟؟؟؟؟؟؟
مافيش حاجة أسمها ..أصل أحنا مجاميع؟؟؟
كل شاب يظهر في اي مقابلات صحفية تليفزيونية اذاعية يقــــــــول
انا بتكلم عن نفسي...مش باسم الثوار.!!!!!!!!!!!
فيـــــــــن هــــــــمـا الثـــــوار دووووووووووووووول؟؟؟
لازم نشوف ..نشعر.. نحس..بأشخاص تكلمنا
مثلا..مثلا لما قامت ثورة19 مش كان شخص أشخاص الناس شايفاهم
الثورة الروسية...الثورة البرتقالية الثورة المصرية52 مش كان في شخص أشخاص الناس شايفاهم
فين دوووووووووووول؟؟؟؟؟؟؟؟؟
اما الان تونس....لا اشخاص..لا اهداف محددة..ليس لها نوع او محدادات او فلسفة معينة...لذلك تخبط تفكك تغير وزارات
ده يمشي ..ده ييجي .. ثم لا ده يروح ..ده يرجع مفيش خطةطريق مفيش مبادئ
نفس النوع عندنا....توهان...توهان
كل مانتج عن الثورة.....
محاكمات...امسك..ألحق..اقيل..
ده حرامي..ده حزب واطي..لا..ده كويس
فين الفلوووووووووووووس
فين الارصــــــــــدة
فين العقربة و فين الصراصير؟؟؟؟؟؟؟؟؟
وتامر..وسرايا..والمناوي...........
أسماء...أسماء..أسماء..وبس خلاص
لكن خطة طريق...سياسة..أقتصاد..اجتماع
لالالالالالالالالالالالالالالالالالالالالالالالالالا
احنا بتوع المليـــــــــونية
هــــــــــوبا شـــــباب
انتم عارفين ليه عندنا مليونيه..؟
عدد سكان شبرا فقط...يعادل سكان الخليج كله
ليبا..كلها اقل من القاهرة فقط
يا مصريين أفيــــــــــــــــــقوا
الثورة..لها ثـــــــــــوار
الثورة..لها أهـــــــــــــــداف
الثورة ..لها منهج و منهـــــــــاج
عندما نجد هذا ستكون ثورة
اما هوبا شباب
ده عند أم التـــــــــيت

زينبو said...

يا لخوتي ، النافوخ بتاع الأنا حيطرشأ، مش عارفة اقول ايه وازاي وامتى وليه وفين.انا مين اصلا ،انا رايحة لأحمد عكاشة لحسن خلاص بأيت شاكة في كل اللي حوليا ونظريت المؤامرة مستحوزة علياومخلياني ماشية بأكلم نفسي طول النهار.ابقوا اسألوا عليا في العباسية.

زينبو said...

يا لخوتي ، النافوخ بتاع الأنا حيطرشأ، مش عارفة اقول ايه وازاي وامتى وليه وفين.انا مين اصلا ،انا رايحة لأحمد عكاشة لحسن خلاص بأيت شاكة في كل اللي حوليا ونظريت المؤامرة مستحوزة علياومخلياني ماشية بأكلم نفسي طول النهار.ابقوا اسألوا عليا في العباسية

soliman said...

طيب بالنسبة للشرقية إديني رقم لأن احنا هنبدأ بكرة إن شاء الله تجميع
p_soliman_a@hotmail.com

جبهة التهييس الشعبية said...

بالنسبة للشرقية رجاء الاتصال بمالك عدلي

أرنوب said...

أيام ماكان فيه مظاهرات فئوية كل يوم والتاني (وكانت فعلاً بتعطل العمل وتعطي فرصة لكي يندس فيها البلطجيه) كان الجيش بيكتفي أنه يبعت رسايل مناشدة على الموبيلات .. دلوقتي لما المظاهرات دي وقفت قوم يطلع القانون العجيب ده بتاع تجريم وتغريم من يعتصم ويتجمهر ؟ طب ليه ماطلعش القانون ده وقت المظاهرات الفئوية ؟ جايين يطلّعوه بعد ما وقفت ؟ يبقي قاصدين مين بالقانون ده ؟ مين يا نوارة ؟

ولاء علي said...

يا نوارة شوفتي اللينك دة؟؟؟انا مش فاهمة دة ايه بالظبط عندك فكرة؟http://www.facebook.com/pages/%D8%AC%D9%85%D8%B9%D8%A9-%D8%B4%D8%B1%D9%81%D8%A7%D8%A1-%D8%A7%D9%84%D8%AC%D9%8A%D8%B4-%D9%85%D8%B9-%D8%A7%D9%84%D8%AB%D9%88%D8%A7%D8%B1-%D9%84%D8%A7%D8%B3%D9%82%D8%A7%D8%B7-%D8%A7%D9%84%D9%85%D8%B4%D9%8A%D8%B1-%D9%88%D8%A8%D9%82%D8%A7%D9%8A%D8%A7-%D8%A7%D9%84%D9%86%D8%B8%D8%A7%D9%85/134170069989583

nosseir73 said...

انا قلقانة جدا و البطء فى الحساب والغلاء فى كل شئ والبلطجية وعدم وجود امن والحرائق كل دة مريب بس خوفى الاكبر من ان الناس تزهق من الثورة وتترحم على اللى فات زائد بصراحة انا حاسة ان بتوع الثورة حصلهم فتور و اصبحت كل القوى غير متعاونة مع بعضها ناهيك بقى عن اللى قال نعم واللى لا والشتائم الدايرة لغاية دلوقتى حاسة اننا فى دوامة ربنا يستر

ماجد العياطي said...

ان شاء الله هيروحوا في الرجلين زي الكبير بتاعهم

احنا نشرنا الموضوع على صفاحتنا الشخصيه وغيره

وان شاء الله المسأله هتبقى تماااااام

شكرا يانواره

تحياتي

hardway said...

مــــــــــــــــبـروكــــــــــ
العداد أصبح 13241.............
حـــــــــــــــلــــــــــــــو
في 6ساعات475توقيع
أنت عارفه ايه اللي عاجبني فيكي
صبرك....و..رقتك
والغريب...في وجود عصبيتك
تصبحي علي توقيعات أكثر غدا
تصبحي علي خير

rahrom said...

لندن قالت طلبكو جه متاخر ومافيش فلوس والبشرى السارة الفمجلس العسكرى قاعد ل2012 وال قلنا نعم علشان يمشى طب اما الحكاية كلها طبخة لغاية ماامريكا تلاقيلها حل كان تعديلات ليه وبتاع كلية الاعلام اجازة لغاية الاحوال ماتهدا وغرامة فورية للى قال لا لتصدير الغاز لاسرائيل والملاعين الثلاثة ورؤسلئهم بيتصرف على عيشتهم الفخمة من حبابى عنينا ممكن تقوليلى ايه ده بالظبط اه ده غير الجمل اللى اقسم انه من الثورة المضادة الحل ايه ماتقوليش التوقيعات وبس نعمل ثورة للثورة ولا ايه لم اعد اثق باحد الافعال تتحدث اوضح

محمد صبرى said...

http://www.youm7.com/News.asp?NewsID=377446&SecID=203&IssueID=160

هو بالنسبة للينك اللى فوق دا ..السؤال بقى هو كدا ازاى؟؟؟؟

IBN BAHYA - إبــن بهيـــــــــــــة said...

الجيش بيضحك علينا .. قلتها قبل أسابيع .. ومازلت أقولها .. ويا ريت نفرق بين الجيش المصري الحبيب وبين المجلس العسكري ده .. وضح التآمر على الثورة .. الثورة المضادة من داخل المجلس العسكري .. ويا ريت الناس ما تنساش أن هؤلاء عينهم وولي نعمتهم مبارك .. يعني بالبلدي كده متورطين معظمهم في فساد ذلك العهد البغيض .. وكل يوم طالعين لنا بقرار فارغ من النايم العام (تعيين مبارك أيضا) بتجميد ارصدة مبارك في بنك مش عارف إيه فرع إيه .. عشان الناس تظيط وتهيص وتفرح .. الرئيس الفاسد بيتحاكم .. وكله أونطه في اونطه .. يعني إيه كل يوم قرار تجميد في فرع بنك كذا ثم كذا ثم كذا ؟؟؟ ده منهتى الهبل .. فقرار واحد يكفي وتلتزم به جميع البنوك لأنه يرسل إلى البنك المركزي المصري المشرف على جميع البنوك وهو يجب أن يقوم بالتعميم على البنوك كلها والبونك تعمم على فروعها .. لكن سيادة النايم العام (اللي لازم يمشي) بيدلع الشعب كل شوية بقرار عبيط ما لوش ستين لازمة ... ومن حمى الثورة هم شعب مصر وليس عم المجلس العسكري ولا غيره .. واللي يقولنا شوفوا ليبيا نقول له شوفها أنت .. هو فيه جيش عاقل في الدنيا ممكن يفكر يدخل في حرب مع شعب ؟؟ إذا كانت جيوش العادلي البائدة طارت في ساعات .. وهي كانت أقوى عشرات المرات من الجيش المصري عدة وعتاد وأفراد .. مليون ونص فرد .. وعارفين نوع الفانلة الداخلية اللي سعادتك لابسها .. يا ريت نكون واقعيين .. وبلاش أحلام فارغة هتودي مصر في داهية ... الجيش حاجه والمجلس العسكري ده حاجة تانية .. مش هو جيش مصر ده .. والنبي شوية عقل http://ibnbahya.blogspot.com/

Lawyer 2012 said...

فقط للتذكرة:-
الإمام جعفر بن محمد الصادق (سلام الله عليهما) قال:”ويل لطغاة العرب من أمر قد اقترب“!
وهي إشارة إلى قرب ظهور حفيده مولانا الإمام المهدي الموعود صلوات الله عليه وعجل الله فرجه الشريف.

Lawyer 2012 said...

يانوارة يانوارة أنا مستعد أجمع في المنيا ...
أكلم أ/ مالك عدلي ولا أنسق معاكي ولا مع مين بالضبط ؟؟؟

muslim said...

نوارة:
مماطلة الجيش بالطريقة دى هتخلى رصيده يكشف

khaled said...

http://www.facebook.com/event.php?eid=199483743407705

إن مؤسسة الفساد فى مصر بما تضم من المفسدين والإنتهازيين والمتحولين مازالت تقبض بقوة على زمام المؤسسات الإعلامية والتعليمية والأمنية والإقتصادية والإدارية والإجتماعية، وتسعى بالثورة المضادة بشراسة لإستعادة زمام المبادرة بغية إجهاض باقى مطالب الشعب ، تحت دعوى أنه بسقوط الرئيس السابق وحل مجلسى الشعب والشورى قد تحققت مطالب الشعب .

إن الشعب فى مصر لن يقبل الحماية التى يضفيها المجلس الأعلى للقوات المسلحة على مبارك وبطانته. ولن يقبل محاولة غسل النظام السابق وإعادته فى صورة أخرى.

مطالبنا /

1- الأسراع في محاكمة كبار الفاسدين و علي رأسهم مبارك و ثلاثي الشر : زكريا عزمي و صفوت الشريف و فتحي سرور .

2- حل الحزب الوطني اساس الخراب و الفساد في بلادنا .

3- الأفراج عن معتقلين الرأي الذين اعتقلهم الأمن المركزي مسبقا و الشرطة العسكرية حديثا .

4- الأسراع من مصادرة اموال الطغاة و رجال الأعمال الفاسدين و تجميد كل ارصدتهم في كافة بنوك العالم و اولهم ال مبارك , و تطهير الأعلام الفاسد الذي يدافع عنهم و يؤيد ثورتهم المضادة .

5- التأكيد علي حرية الرأي و التظاهر السلمي و عدم العمل بأي قانون يصدر لتقييد رأي الشعب الذي يستمد الجيش منه شرعيته .

mezo_mesho said...

يا حضرات انت بتلفوا وتدورو على ايه الموضوع واضح جدا وقلته اكتر من مرة طنطاوى صديق وحبيب مبارك من زمان جدا ومش هيخسروا بعض علشان حتة ثورة لا راحت ولا جت الم يكن طنطاوى وزيرا للدفاع وكان يجب ان يذهب بعيدا عندما انحلت الوزارة ..من عينه ليكون رئيسا للمجلس العسكرى؟ الاجابة مبارك ..الثورة للأسف اتباعت ويجب القيام بثورة ثانية بس يكون هناك ايدولوجية ويكون هناك قائد ومعه اعوانه المخلصون

احلام جوليا said...

الا قولي لي يا نواره يا ختي هو ليه النائب العام كل ما يجي يجمد فلوس حد يديلوا تنبيه قبلها بكم يوم ؟؟؟

احلام جوليا said...

نوارة قولي لي شفتي حلقة واحد من الناس عن مقتل السادات الحلقة الاخرانية التانية يارب تكوني شفتيها يا نواره كانت تهمك قوي وبتكشف كمان ليه اخوانا البعادة ربنا يجعل كلامنا خفيف عليهم ليه بيدافعوا عن مبارك وعايزين يهربوه ويحموه ويمنعوا محاكمته كمان مش طلعوا هم الي حاطينه من الاول مش طلعنا كلنا كده خدنا احلى قفا طول السنين دي والعلاقات الحلوة بينهم لانه عميل ممتاز يا سلام وايه بايعنا ليهم خدم طبعا ميحبوهوش ليه ده كل ما يشاوروا على حاجة في مصر يديها لهم وببلاش كمان وعلى الف سنة اقساط ومدعمة من الشعب الفقير يارب تكوني شفتيها يا نواره حزعل قوي لو مشفتيهاش

سكوت هنصوت said...

يظهر يا نوارة ان انت الوحيدة الي لسة مصدقة الجيش!!!!! الجيش لو مع الثورة يبقى يطهر نفسه...هو ينفع ان الشعب يحال لمحاكم عسكرية والفاسدين ونظام الحكم البائد يحالوا لمحاكم عادية!!!! قانون الطوارئ يطبق علينااحنا والفسده يمرحوا كما يشاؤوا!!! نقول مش عايزين استفتاء دلوقت ينزلوه غصب عن بوزنا وبعدين يرجعوا يقولوا ارموه في الزبالة....انت مش شايفه ان اكبر معول لهدم الثورة هو الجيش المصري الي انت مصرة ان الشعب ينزل يبوسه من بقه....الجيش عمال يقول ثقوا فيا ثقوا فيا...طب وبعد الثقة..فين المحاكمات...فين المحاسبات...فين رموز الفساد...ليه لازم مليون توقيع عشان نقبض على صفوت وفتحي سرور وزكريا عزمي..وبعدين تلاقي دعوة غبية زي الي معموله من المحامين لعودة مبارك واتحداكي انها لجس النبض..ومش بعدي كلها كام يوم وتطلع مظاهرة تطالب بعودة الرئيس عشان البلد بتخرب...وحبة وتلاقي الجيش لبسك العمة ورجع الحكم تاني لإنه بيستمد شرعيته من الشعب الي هيكون المرة دي في مصطفى محمود ومش بعيد التحرير...مش بعيد الشعب المؤيد لمبارك ينزل يطالب برجعوه في التحرير....!!!!
الجيش متواطئ يا نوارة...ومحاولة الإصلاح مش هتنفع..يقولنا ثقوا فيا وامشوا مغميين عينيكم..ويدي كريم صلاح حكم عشرين الف جنيه غرامة عشان بيطالب بوقف تصدير الغاز لإسرائيل...يتفاوض مع امريكا لخروج عمر عبدالرحمن ويخرج عبود الزمر في الوقت الي معتقلين 25 يناير لسة محبوسين في معسكرات الجيش...معناه ايه ده...حد يفهمني...الجيش لازم يطهر نفسه من الداخل..

احلام جوليا said...

نواره الحقي بسرعة اقري الخبر ده وزير الخارجية السعودي وصل مصر ويريد اصطحاب عائلة مبارك ومبارك معه للسعودية الحقي يا نواره لاول مرة اقولها بجد لو مكنش ده يأذيكم اعملوا مظاهرة او اي حاجة امنعوا المجلس العسكري انه يخاف على العاملين بالخليج يا نواره انا اعمل بالخليج وحتقهر بجد لو متحاكمش مبارك مش مهم نرجع المهم يتحاكم ده احنا مزلولين يا نواره كسر نفسنا في الخليج يا نواره امانة عليك اتصرفي
شوفي اللنك
http://www.arabtimes.com/portal/news_display.cfm?Action&Preview=No&nid=8142

بساطه said...

يانواره اه موضوع يونيو 2012 يعني الجيش هيعد مش ماشى .. مش قلتي نعم يعني الجيش هيروح ونشرشح براحتنا .. حراااام انا زهقت خلاص .. الناس مش هتقدر تلم نفسها مع الجيش اكتر من كده .. لو قدرت تلم روحها هتتعود تنكتم تاني واحنا ماصدقنا اتفتحنا .. ولو ماقدرتش هتبقى مصيبه باردو.. والجيش مش نافع اكتر من كده .. ده الى كان بيكلم بلال فضل من الجيش بيقول الجو بتاع ابوك وغلط والحوارات الي بكرها دي ..لما بيكلموه علي طلبة اعلام ... يعني انا هعد كل الفتره دي في حكم ابوي يتلطشلي واسكت .. خلااااااص مش هينفع

بساطه said...

وبعدين هما مين الى خفتوا .. انا مش شايف خوف انا شايف طواطؤ .. ولو كانوا خايفين يبقوا خايفين على روحهم وفي حاجه بتهددهم هما .. لانهم عارفين ايه الي بيهدد امننا وسلامتنا وساكتين عليه .. يبقوا بيحموا نفسهم مش بيحمونا .. وانا اسف ليكي يانواره ولابويا ظابط الجيش عالمعاش الي مش بيستحمل كلمه عالقوات المسلحه

جبهة التوعية said...

التائهون بين الدولة الدينية والدولة المدنية: مقال لي-

لعلَّ من أهم أولويات تلك المرحلة المضطربة من تاريخ مصر (مرحلة التحول)، أن تتضح أمامنا المفاهيم كلُّها بلا لبسٍ ولا احتمال تأويل؛ إذ إنَّ ذلك سيترتَّب عليه رسم صورةٍ للمستقبل الذي نأملُ جميعًا أن يكون أفضل من الماضي المظلم الذي عشنا فيه عقودًا من الظلم والقهر والاضطهاد والتخلُّف.
ومن أعقد هذه المفاهيم، وأكثرها جدلاً، وأعمقها خطورةً وأثرًا فى المستقبل؛ مفهوما الدولة الدينية والدولة المدنية. ومهما حاول البعض أن يُقنع نفسه قبل أن يقنع الآخرين أنَّ الحرية والمواطنة واحترام الدستور والقانون هم الدعائم الثلاثة التي لن تقوم لمصر قائمةٌ بدونهم، وترسيخهم ولا شك من أوليات المرحلة القادمة. فإنه من جانب آخر لا يمكن لكائنٍ مَن كان أن يتغافل أو يتعامى عن دور الدين ومكانته وأثره في حياة المصريين مسلمين كانوا أم مسيحيين.
من هنا كان التساؤل: هل نحن قادمون على دولةٍ دينيةٍ أم دولةٍ مدنية؟
وللإجابة على هذا السؤال ينبغي أن نضع إطارًا لكلٍّ من الدولة الدينية والدولة المدنية بمفهومهما السياسي...
للأسف مساحة التعليق لم تكفِ فيمكن متابعة باقي المقال على مدونتي:

http://gabhataw3ya.blogspot.com

lastcrazyboys said...

الخــلاصة بالنسبــة للتعديلات الدستورية

أخيرا مصرية وأفتخر said...

انا نفسي اعرف هو امجلس العسكري ده مش كان عايش أيام مبارك دوول لو عايزين مصلحة البلد بجد كانوا نضفوها من الاشكال العفنه دي هي دي بلد مبارك واعوانه ولا بلدنا الجيش مش عايز يتحرك لانه متواطيئ معاهم على رأي الاستاذ عبد الحليم قنديل : تباطؤ فيه تواطؤ . يبأى احنا نتحرك على كل الميادين في مظاهرات كبيره نطالب بمحاكمة الثلاثي ومبارك وعائلته ..ولو خايفين على المصريين في السعوديه احنا مش عايشين في نعيم يعني في السعوديه ده احنا في ذل المهم لازم من توحيد الصف والثورة تقوم تاني المرة دي ضد الفساد وضد تباطؤ المجلس

واحد مش فاهم حاجة said...

انا بجد نفسي المظاهرات المليونية ترجع تاني في ظل الالتفاف على مطالب الثورة واود ان اطرح هذة الاسئلة البريئة 1-لماذا لم تتم محاكمة مبارك واسرته
2-لماذا لم يتم نغير المحافظين وحل المجالس المحلية
3-لماذا لم يتم تغير القيادات الاعلامية الذين حرضوا ضد المتاظهرين
4-لماذا الثلاثي المرح مازال طليقا
5- لماذا زكريا عزمي مازال رئيس ديوان رئيس الجمهورية ولا يوجد رئيس جمهوري
6-لماذا كل يوم هناك حريق جديد والسبب كالعادة هو ماس كهربي
7-لماذا لم يتم اطلاق سراح المعتقليين السياسيين
8-لماذا لم يتم رفع حالة الطوارىء
كل هذة الاسئلة تحتاج للاجابة وحتى يتم الاجابة على هذة الاسئلة البريئة لماذا لانسلي انفسنا ونتظاهر حتى يتم الاجابة على هذة التساءولات

داليا الدريني said...

هههههههههههههه........يا حبيبتي يا نوارة.....أنتي لسه واهمة نفسك أن سرور وعزمي وصفوت هم اللي بيهددوا المجلس العسكري ومخوفينه.....هو فيه حد بيخوف الجيش ؟؟؟؟؟؟؟؟ يا حبيبتي انتي حالتك انتي واللي زيك بقت صعبة جدا....

نفسك يبقى فيه حد في البلد تثقي فيه وتسندي عليه زي المجلس العسكري...ومش عاوزه تواجهي نفسك بالحقيقة اللي معروفة من قبل التنحي حتى.....يا حبيبتي المجلس العسكري دول والقيادات العليا في الجيش مكسورة عينهم.....

فاسدين ومتورطين في صفقات سلاح مشبوهة... وطول 30 سنة اتمرمغوا فيها في عز مبارك وملياراته....هم جزأ لا يتجزأ من نظامه الفاسد....وهم مختارين بعناية من مبارك عشان يحموه وما يعملوش أي انقلاب عليه....وكانوا بيتفرجوا في صمت وهو بيسرق وينهب ويهرب المليارات وكمان بيجهز يورثها لابنه...وبرده ما كانوش يقدروا يفتحوا بقهم....عارفة ليه....عشان هو كاسر عينهم والمؤسسة العسكرية من أكتر المؤسسات في الدولة اللي فيها فساد....كل القيادات العليا في الجيش ده فاسدة....انتي لسه برده بتحاولي تغالطي نفسك وتسندي على حيطة مايلة اسمها المجلس العسكري....

دلوقتي كمان بيقولك خلاص أوربا مش هتعرف تجمد الفلوس اللي نهبها مبارك وعيلته وهربوها قبل 22 مارس لتأخر قرار تجميد الأرصدة وكمان لم يرسل المجلس العسكري لأوربا الصيغة المطلوبة رغم أن أوروبا طلبت من الحكومة المصرية أنهم يرسلوا صيغة معينة بأدلة لتجميد الأرصدة.....والمجلس العسكري طبعا اتأخر عليهم جدا لحد ما يلحق مبارك يهرب فلوسه من أوربا.....
يعني خلاص الفلوس طارت ومش هناخد حاجة....بتدافعي عن مين يا نوارة....
ده مش تأخر في قرارات المجلس العسكري ولا خوف منهم ولا متهددين..
لأ ده تواطؤ وحرص كامل على حماية مبارك وكل الفاسدين ومساعدتهم على تهريب فلوسهم اللي أكيد القادة العليا في الجيش ليهم جزأ كبيرمن التورتة ومن فلوس قناة السويس اللي بينهبوها...

أنا عارفة أنك مش عاوزه تعملي صدام مع الجيش....بس اللي بتعمليه ده برده مش الحل...
لازم نفوق ونشوف هنطهر ازاي البلد والزارة اللي معظمها فاسدين وحزب وطني وكل المؤسسات وعلى رأسها المؤسسة العسكرية بقياداتها الفاسدة

adam1_eng said...

صفحه التوقيعات الالكترونيه مش شغاله