لازم يتشنقوا الكلاب دول

يعني احكام عسكرية بسرعة بسرعة كده لناس الجيش قبض عليهم وعذبهم في اعتصامات بدعوى انهم بلطجية

طب ممكن افهم اللي عملوا كده متسابين لحد دلوقت ليه؟

اولا احنا حقنا ان الجيش المصري يعتذر عن التعذيب، وانه يقدم المدنيين لمحاكم مدنية، بلطجي بقى مش بلطجي، انشالله يكون بديل، يتقدم لمحكمة مدنية
ثانيا.. عايزة اوضح حاجة بس، الصدمة العصبية اللي بتصيب اي مواطن مصري لما بيتعرض لتعذيب على ايد ظابط جيش تختلف تماما عن احساسه لما بيتعذب من شرطة
المصريين بيكرهوا الشرطة، وبيحتقروا امن الدولة
لكن بيحبوا الجيش، وعندهم قناعة انه بيحميهم، مش متوقع ابدا، تحت اي ظرف وتحت اي بند، ان ظابط جيش ممكن يمد ايده عليه ويعذبه، والالم النفسي اللي بيفضل معاه اكبر واقوى بكتير من اي الم بدني او نفسي ممكن يتعرض له لما يتعرض لتعذيب من ناس هو بيحتقرهم وشايفهم حيوانات، مش جيشه اللي هو بيحترمه
وفيه حاجة احنا محتاجين لها تفسير
الشدة دي في التعامل بدعوى ان البلطجي بيفزع الناس ولازم الشدة وما يستاهلوش الرحمة
امال الشرطة تستاهل الرحمة؟ يعني الجيش ما قبضش على ظباط الشرطة وعذبهم كده ليه؟ اهم دول اولى بقى اذا كان التعذيب بحجم الجريمة
الشرطة اللي عملت في انسان زي ده كده وضيعت مستقبله.. تستاهل ايه؟
ايوة فيه ناس، يا مجنونة يا مأجورة، بتظيط على الجيش وبتتطاول عليه وبتحاول تخلق حالة من عدم الثقة في الجيش
والناس دي حنجز لسانهم ان شاء الله ما لكوش دعوة بيهم، احنا حنعرف نربيهم كويس
بس مافيش حاجة تجز لسان اي حد بيحاول يشكك في الجيش الا ان الجيش المصري يفضل ملتزم بالصورة اللي له في الوجدان المصري
وعشان بقى اشرح صورة الجيش في الوجدان المصري حاحكي حدوتة، ياريت حد يوصلها للمجلس العسكري، يمكن يصدر تعليمات مشددة بعدم التعرض للمواطنين بالتعذيب وعدم احالة المدنيين لمحاكم عسكرية
دي حدوتة بيحكيها الفلاحين لعيالهم:
كان فيه ملك عنده مشكلة ان فيه شباب كتير مش لاقيين شغل
وابتدا الشباب يتململوا وعملوا ثورة
فقال للوزير بتاعه، اجمع لي كل الشباب اللي عايز يشتغل وخلي كل واحد فيهم يجيب ابوه معاه 
جمعهم كلهم وقال: انا عندي شغل في البلاط بمناصب كبيرة واجور كبيرة على شرط، اللي عايز الشغل ده يقتل ابوه، واللي مش حيقتل ابوه حنقتله، لانه عمل قلق في البلد وثورة وهو مش جاد في انه عايز الشغل
اللي حيقتل ابوه ييجي يمين، واللي مش حيقتله ومستعد يتقتل ييجي شمال
فاتقسموا نصين، نص اختار يقتل ابوه، ونص اختار يموت هو
فالملك قال للوزير: اللي كان حيقتل ابوه شغله في الشرطة
واللي ما رضيش يقتل ابوه ورضي يموت هو شغله في الجيش
---------
ده تصور المصريين... وما كانش العشم ابدا