طلعوا الاعلان الدستوري اللي اداهولكم المستشار البشري بقى

يا سيادة البيه الجيش... هو ايه الساسبنس ده؟

كل حاجة لازم تتعمل ببطء كده؟ ما المستشار طارق البشري عامل لكم الاعلان الدستوري ومجهزهولكم وكله تمام، ماشي انا عارفة ان دول ناس لبط وبياكلوا الدماغ

وبتلاتين رأي كل ساعة، بس معلش اعذروهم، عشان تعرفوا بس مبارك عمل فينا ايه، انا اقولكم على حل يرضي بتوع نعم وبتوع لا

انتوا حتعلنوا اعلان دستوري بالمواد اللي احنا صوتنا علينا والاضافات اللي حطها المستشار طارق البشري للصلاحيات وحتقولوا عليه اعلان دستوري، صح؟ مش دي الخطة دلوقت؟ واحنا مستنينها اهو، وكل حاجة جاهزة على الاعلان بس

قولوا لهم بقى الجملة دي: "ونعلن سقوط دستور 71" انا عارفة طبعا انكم عايزين ترجعوا البلد زي ما استلمتوها ما تبقاش ناقصة دستور

بس صدقوني مش حينفع

لو اعدنا تفعيل دستور 71 دلوقت انتوا حتمشوا، وصدقوني كمان مرة، ما حدش عايزكم تمشوا... غيري، وطبعا مش لأن متضايقة من وجودكم ولا حاجة، ده انا حتى لسه ما اتصورتش على الدبابة، بس كان القصد اني ما اتعبكوش، واحنا واضح اننا تقلنا عليكم، والشرطة العسكرية عملت مجهود، وبعدين انا صوت بنعم اصلا عشان عايزة الدستور الجديد اللي يعملهولنا ناس مدنيين ما يبقاش تحت حكم عسكري

اللي صوتوا بنعم مافيهمش حد عايزكم تمشوا وتجيبوا رئيس المحكمة الدستورية اغلبهم شايفين ان ده الدستور اللي جابه الجيش وما يصحش نتني له كلمة وهو عارف اللي فيه الصالح

ومش محتاجة نشرح ان كل بتوع لا صوتوا عشان الجيش يقعد

اذن.. الجيش والشعب ايد واحدة وانا اللي حشرت نفسي في اللي ماليش فيه

ثم لو جبتوا رئيس المحكمة الدستورية لازم يعمل انتخابات بعد مرور 60 يوم من خلو المنصب.. من خلو المنصب.. يعني فاضل عشرين يوم على الانتخابات اللي مفروض يجريها رئيس المحكمة الدستورية لو فعلتوا 71

يبقى مش حتفعلوا دستور 71 ده كلنا عارفينه، طبعا انا قريت انكم عايزين تفعلوه تاني بعد الانتخابات، هو الحقيقة بعد الانتخابات السلطة حتتسلم لسلطة مدنية ومش حينفع يا سيادة البيه الجيش حضرتك ترجع اي حاجة لأن مالكوش سلطة وقتها - مش القصد ليكم سلطان على القلوب طبعا - بس مالكمش ترجعوا الدستور ده، وحتى لو كلمتوا الرئيس الجديد المنتخب وقلتوا له: رجعه، احسن احنا مستلمين البلد بدستور 71 وعايزين نرجعها زي ما استلمناها لبعدين يقولوا لنا اخدتوا البلد ورجعتوها ناقصة دستور

الرئيس المنتخب مش حيعرف يعمل الحكاية دي

لأنه محكوم بإعلان دستوري بيلزمه بدستور جديد، يعني حتى الرئيس والبرلمان المنتخبين مالهمش سلطة يرجعوا دستور 71

اذن، فهو على ارض الواقع ماحدش حيشتغل بالدستور ده، لا آجلا ولا عاجلا

سواء انتوا اعلنتوا ده او ما اعلنتوهوش... بس احنا عندنا شوية ناس مهابيش هنا نفسهم يسمعوا كلمة حلوة منكم، اعذروهم، بقالهم تلاتين سنة تحت حكم واحد بيديهم على قفاهم ويقولهم كلام ويبقى مطبخ لهم مصيبة، فمعلش يعني خلوها عليكم المرة دي وقولوا لهم الجملة دي خلينا نخلص لأني انا فعلا اتخنقت وراحوا عملوا للناس هيستيريا بلا مبرر واضح وخوفوهم

وانا اساسا عمالة اقول التصويت بنعم التصويت بلا مش حيفرق النتيجة اللي يفرق ان الدستور الجديد وفقا للتعديلات حيتعمل في ظل حكم مدني، والفرق ان الاعلان الدستوري ده احنا مصوتين عليه

بس طلعوا بقى الاعلان الدستوري دلوقت عشان الناس قلقت كده.. وانا عارفة ان معاكم اعلان دستوري كويس ما تقلقوش منه ده حيرضي كل الناس ان شاء الله.. على قد ما نقدر يعني، ما عدا اللي رجعوا من برة بمهمة مخصوصة انهم يفسدوا الثورة طبعا.. اللي هم مايكل منير بدون ذكر اسماء 

حاجة تانية: عرفت من مصدر موثوق بيه ان سوزان كل يوم والتاني بتيجي مصر وبتتغدى وتتعشى هي وابنها وهم الاتنين مفروض يتقدموا للمحاكمة.. وانها لم تفقد الامن وعندها امل قال ايه ترجع والظاهر هي اللي مسلطة الراجل ده

طبعا ده هلس مالوش اي لازمة قانونية، لكن حرام الناس حتتخض، راعوهم، ما شافوش شوية في حياتهم، طلعوا بقى الاعلان الدستوري لان اصلا الحيزبون دي متغاظة من الجيش والشعب الاتنين وهي خلل كده وتقريبا هي اللي بتحرك الثورة المضادة لأن دماغها سم، انا مش فاهمة انتوا ما بتحددوش اقامتها ليه؟ وغدا وعشا ايه اللي بتعملهم هنا وبفلوس مين؟ 

وما تسمعوش كلام يحيى الجمل.. يحيى الجمل وحش

وحش ومش كويس كمان

حاجة تالتة: احنا عايزين الثلاثي المرح عشان دول صبيانها اللي بيشتغلوا تحت ايدها

ورجاء من الاخوة المصريين في الداخل والخارج وقعوا لنا على الكلام ده بقى ووزعوا

حاجة رابعة:

واحد اتصل بيا بيقول لي في حملة لترشيح د.سليم العوا وبيقول لي ان انا مشاركة في الحملة!

انا مش مشاركة في حملة ترشيح سليم العوا، وما اعتقدش ان من الحصافة ان العوا يترشح، اللي عمل الصفحة دي يقصد يعمل مقلب