رجالة وطول عمر ولادك يا بلدنا رجااااالة

ايه يا امامير

يا حلوين

يا كتاكيت

يا سباع يا جمال، ياللي بتقولوا الست قلبها ضعيف ورهيف ومكسورة الجناح ولا تصلح للقضاء عشان مخها طاقق وقلبها بيزقزق وما تستحملش اللي بيستحمله الرجالة

صح

انتوا صح، انا عن نفسي مش قادرة استحمل اللي انت بتستحملوه ده ^^

دي صورة، امثالي من النسوان الطاقة المجنونة اللي قلبها رهيف وعقلها خفيف ما يستحملوهاش

الرجالة بس هم اللي مستحملينها، ومش بيتهوروا، وطبعا كرجالة جانتي، شيك، يفهموا في الذوق والاتيكيت مش معقولة ح يسترجلوا على المزز اللي في منتهى الرقة اللي في الصورة دول، اقصى حاجة يعملوها انهم يحلموا انهم بيغتصبوهم انتقاما لحرمات الله، وواحد كاتب تعليق في الخبر يقول: للبيت رب يحميه

ايوة.. ايوة يا سبع الرجال يا جامد يا شيرز يا شديد، للبيت رب يحميه عشان طبعا انت لو اتدخلت ممكن تتهور، هو مش خايف من حد ولا حاجة، هو بس مش ميال للمشاكل

هم يسترجلوا علينا احنا بس

انا والله العظيم تلاتة، والله العظيم تلاتة، والله العظيم تلاتة ما عارفة مجلس الدولة واللي كانوا معلقين على مقالي هنا ليهم عين منين يفتحوا بقهم ويفتحوا فينا ويقولوا الستات تلبس ايه وما تلبسش ايه وتشتغل فين وتصلح لايه قال يعني معتبرين نفسهم رجالة يعني

ده على اي اساس؟ جابوا التصور الوهمي ده منين؟

والعيب مش عليهم، العيب على النسوان الخايبة اللي ما عرفتش تطلعهم رجالة، ولا حتى عرفت تكسب احترامهم وهم ولادها

ما هو اللي بيقول الست لا تصلح عشان غبية وجاهلة وضعيفة ده رأيه في امه، اكيد امه غبية وجاهلة وضعيفة او هكذا تصوره عنها، امال هو جاب الكلام ده منين ماهو اي راجل بيعامل الستات زي ما امه عودته يعاملها، واي راجل بيجيب تصوره عن الستات من خلال تصوره عن امه، لو بيحترم الستات ويقدرهم يبقى امه محترمة، ولو بيحتقر الستات يبقى لو امه مش حقيرة على الاقل علمته يحتقرها.. يعني ما عرفتش تربيه ولو شايف الستات اقل من الرجالة يبقى شايف امه اقل منه

واكيد اللي ح يبقى تربية واحدة غبية وجاهلة وضعيفة ح يتمرجل على الهايفة ويسيب الحريم بالبنادق يدخلوا الجوامع بجزمهم ويقعد يتفرج ويقول للبيت رب يحميه وما يعملش راجل غير واحدة كده يستضعفها وما يحسش برجولته الا بانه يقول: الست لا تصلح للقضاء لانها جاهلة وغبية وضعيفة.. عشان يقول ضمنا انا مثقف وذكي وقوي عشان يعوض النقص اللي عنده.. ماهو لو عارف انه له قيمة مش حيضطر يستمد قيمته من انه يحقر نوع كامل لانه موكوس ومش عامل حاجة عليها القيمة يفتخر بيها ويحس بيها انه بني ادم

صح

ده فعلا تربية واحدة جاهلة وغبية وضعيفة ومش بس لا تصلح للقضاء، دي لا تصلح حتى للامومة، ابوه كان لازم يطلقها ويحطه في ملجأ يمكن كان طلع ارجل من كده

وكمان ليهم عين يقرروا الست تصلح للقضاء وللا ما تصلحش

ما يتلطوا ويسكتوا بقى، ما يتنيلوا يسكتوا بقى اللي زيهم يروح يدفن بالحيا اكرم له، الست ما تصلحش للقضاء؟ وهم ما يصلحوش يعيشوا اساسا