Friday, 26 March 2010

ذكرى المعاهدة المشئومة

تحديث:
المؤتمر الساعة واحدة الضهر
والوقفة الساعة خمسة العصر
يوم السبت 27 مارس
يوم السبت بعد بكرة ان شاء في نقابة الصحفيين الساعة 5 وقفة احتجاجية ومؤتمر في الذكرى المشئومة لاتفاقية كامب ديفيد. 
انا رايحة ان شاء الله، يارب في المؤتمر حد يقول لنا نخلص من الورطة السودا دي ازاي مش بس يعبروا عن غضبهم. لو فيه طريقة قانونية، مش مهم تاخد حيز التنفيذ دلوقت حالا، بس المهم ناخد بيها ورق
يعني مثلا، فيه بنود كتير قوي في الاتفاقية غير دستورية وتتعارض مع القانون المصري والمصالح الاقتصادية والامنية للبلد، وفيه منها بيتعارض مع عقيدة الجيش ومواد القانون الخاصة بالجيش والمخابرات، ممكن بدل ما نمسك الاتفاقية كلها ونقول مش عايزينها، ناخد مادة مادة ونرفع بيها قضايا، ومش مهم تتنفذ دلوقت، بس المهم الاجيال الجاية يبقى معاها ورق
ماهو ده اللي حصل، ماهو ايام توقيع كامب ديفيد مش كل البنود اتنفذت، وما كانش يهم اسرائيل وامريكا انه يتم التنفيذ دلوقت حالا فورا، اللي يهمهم ان الاجيال الجاية، اللي هي احنا، يبقى عليها كومبيالات، واللي اهاليهم موظفين اكيد سمعوا منهم الكلمة دي: عك زي ما انت عايز، بس ما تكتبش على نفسك ورق
احنا كتبنا بقى على نفسنا ورق.. واتفاقية كامب ديفيد هي السبب في ان مبارك قاعد على قلبنا تلاتين سنة وما يتعتعش ابدا الا امريكا تبقى متأكدة ان الجاي ح يتلزم بكامب ديفيد بنفس التفاني والاخلاص
واتفاقية كامب ديفيد هي اللي خلتنا نكتب على نفسنا ورق للبنك الدولي ويدونا فلوس بالفايظ وما نعرفش نسددها فالقطاع العام بتاعنا يتباع والعمال يتشردوا، لان دي شروط اللي احنا ادينا له الحق الحصري في تمويلنا وتسليحنا وتدريبنا، ولو خالفنا الشروط يدينا بالجزمة 
واتفاقية كامب ديفيد هي اللي خلتنا نغير سياستنا الاقتصادية من انتاجية الى استهلاكية عشان صاخب المخيل يرضى يدينا المرتب الشهري
واتفاقية كامب ديفيد هي اللي فتحت البلد على البحري للمؤسسات الاجنبية والامتيازات الاجنبية بتاعة الاحتلال رجعت تحت مسمى تاني
واتفاقية كامب ديفيد هي اللي عزلتنا وخلتنا مش عارفين نعمل سوق عربي مشترك ولا نتعاون عسكريا ولا علميا مع اللي حوالينا مما تسبب في تراجعنا وتراجعهم، لان الطبيعي الدولة اللي عايزة تتقدم بتتعاون مع ناس في حجمها، مش اكبر منها بكتير، لان لو اكبر منها بكتير عمر ما الدولة الصغيرة بتتقدم، وانما بتفضل تابع، لكن لما بتتعاون مع ناس قدك بتكبروا سوا لان ده مصلحتك ومصلحته
وامريكا واخدة الحق الحصري في مصر... مافيش نملة تدخل ولا تخرج منها الا امريكا تبقى عارفة وموافقة.. وده يا سيدي في حد ذاته مش عيب، ما احنا ياما كنا واقعين تحت احتلال ما جاتش عليهم، المشكلة ان امريكا يهمها امن اسرائيل وملتزمة بيه
امن اسرائيل في التفوق على كل دول المنطقة في كل حاجة.. وده اهم من السلاح النووي، مش ممكن ابدا دولة لازقة في اسرائيل يسمح لها بتقدم علمي، ولا ديمقراطية، ولا ازدهار اقتصادي ابداااااااااااااااا، امال ايه تميز اسرائيل بقى لو اي حد من اللي حواليها حقق تقدم؟ ولما امريكا تاخد الحق الحصري في مصر، خلاص، يسهل بعد كده اي دولة مجاورة تتبلع، واحدة بالحصار، واحد بالفتن الطائفية، واحدة اصلا ما كانتش دولة واتعملت وطبقتها الحاكمة تدين بالولاء للي عملوهم حكام وهكذا، ده كلام كارتر مش كلامي، وكارتر دلوقت بيضرب نفسه بالجزمة وعمال يعتذر.. يعتذر.. مين ح يسامحه؟ الله يخرب بيته هو وروزالين في ساعة واحدة
واتفاقية كامب ديفيد هي اللي ضيعت استقلالنا وخلتنا لا نملك دستورنا ولا حكمنا ولا فلوسنا ولا مصانعنا ولا زراعتنا ولا اي حاجة
وكله بالورق والعقود وماضيين على نفسنا ورق جتنا خييييييييييييبة 
انا كان عندي يضيع البلد كلها وللا يحطها حتى تحت الاحتلال بس ما يمضيناش على ورق، عشان على الاقل يبقى الوضع مش قانوني
ده الفلسطينيين كده عندهم امل اكتر مننا، على الاقل مش ماضيين ورق على اللي حاصل لهم، ويظل وضع الاحتلال غير شرعي وغير قانوني
لكن كل اللي احنا فيه ده، من ديكتاتورية، وفساد، واقتصاد خربان، وزراعة منهارة، وصناعة في الباي باي، وانعدام سيادة، وعدم قدرة على السيطرة على الحدود، كلللللللللللل ده بالورق والامضا والبصم، ما نعرفش نتكلم
احنا خلاص ضعنا.. وكل واحد منه لله
المهم الجايين، مالهمش ذنب يفضلوا واقعين زي الدبانة في العجين بالطريقة دي، لما يبقى معاهم ورق ان الاتفاقية دي او على الاقل بعض بنودها باطلة بالقانون يمكن يبقى عندهم صيغة يعرفوا ينفذوا بيها الاحكام دي لكن لو فضلنا ما نحاولش نعمل اي حاجة، اي حاجة خالص، ولا حتى نحاول نطعن في بعض البنود كده حال الجايين مش ح يبقى زينا، ح يبقى اوحش
فكر فيها على مستوى فردي، واحد ابوه باع البيت اللي هم ساكنين فيه عشان يصلح المنور بالفلوس اللي اخدها من الشاري، الشاري مضى العقد وما طردش ابوه، وابوه صلح المنور فعلا، ومات، الواد قاعد في بيت متباع، الشاري قال له: ده بيتي، ادفع ايجار. عشان الواد ما يخرجش بيدفع ايجار
وهي دي فلوس الضرايب اللي احنا بندفعها، احنا بندفع فوايد الفلوس المركبة، والكلام ده اتكتب في الواشنطن بوست، وفي صحف امريكية كتير، ان المصريين ما بيتلقوش خدمات بضرائبهم لان اصلا ضرائبهم بتروح فوايد للبنك الاحتياطي الفدرالي والبنك الدولي
ماشي، هو دلوقت بيدفع ايجار، بس افرض صاحب البيت قرر في يوم من الايام يطرد عياله بعد ما هو يموت؟ عايز يهد العمارة ويبنيها مول، عايز يبيعها انقاض، عايز يخرطها للوز، ماهو ملكه
على الاقل امشي في قضية ابطال البيع واذا كان الشاري بلطجي وبيهددك بالسنجة، ح تفضل تدفع ايجار صحيح، بس على الاقل لما تموت انت مش ح يقدر يطرد عيالك من البيت بالقانون على الاقل، لو ح يطردهم بالسنجة يا سيدي يمكن هم يبقوا اجدع منك ويعرفوا يتصدوا له
وضحت؟
الموضوع لا له علاقة بالسادات ولا عبد الناصر ولا نجيب ولا فاروق ولا حجا ولا الملك مينا موحد القطرين
الله يرحمهم جميعا، وللا يجحمهم وللا يعمل فيهم اللي هو عايزه بقى احنا مالنا، مش ممكن نفضل ماسكين في اللي فات بالطريقة دي، ومش ممكن يفضل كل همنا مصبوب على اننا نحمل اللي فاتوا مسئوليات عشان نلاقي وسيلة نتهرب بيها احنا من مسئولياتنا.. خلاص يا سيدي، كللللللللللللل اللي فاتوا ولاد كلب.. حلو كده؟
او
كللللللللللللللل اللي فاتوا اجدع ناس.. حلو كده؟ اختار اللي يعجبك وانساهم بقى شوية
وافتكر ان فيه اجيال جاية ذنبها ح يبقى في رقبتك، اللي حصل حصل، دلوقت احنا قدام مشكلة حقيقية، اتفاقية كامب ديفيد، والاتفاقيات المبنية عليها مع البنك الدولي، والتعديلات الدستورية اللي مبنية عليهم هم الاتنين هم مشكلتنا الحاضرة والحقيقية، وواجبنا نحلهم او نحاول نحلهم
فوقوا بقى
احنا واقعين تحت احتلال، ونظام مبارك ده الحاكم الاقليمي، ولو حيمشي وييجي غيره ح يبقى حاكم اقليمي برضه لو فضل الوضع على ماهو عليه، مش ممكن ابدا الاجيال الجاية تيجي تقول علينا: ولاد الكلب ولا حتى حاولوا
عيبة في حقك.. ح ييجي يوم والناس تقول لعيالك: ياللا من هنا يا كابتن، مالكش فيها مش بلدك اصلا احنا شارينها والعقد اهو
ده كابووووووووووووووس.. تخيل كمان عشرين سنة في استيطان في بلدك
فوق بقى
وبناء على كل الرغي السابق، انا طالبة من الجميع الحضور بكرة
لو عايز مصر مستقلة وديمقراطية وحرة ومتقدمة او حتى عندها امكانية تقدم في الميت سنة الجاية
ومش وقت سفسطاط وحياة والدك... عيب عليك تتمسك باحتلال لبلدك عشان ماسكك العند

22 comments:

uotupia said...

أانا معاكى ان احنا احتلال امريكانى
ومش هاسفسط ولا حاجة بس هو لما تبقى البلد محتلة يبقى عندك امل ان المحاكم تطلع حكم ضد معاهدة تسليم مصر دى
أذا كانت المحكمة ما منعتش تصدير الغاز عايزاهم يبطلوا المعاهدة
الحل يابنت عمنا الكبير فى الناس الغلابة اللى لسة فاهمين ان سينا رجعت سالمة لينا
وان المعاهدة حلوة وزى الفل انا بتكلم على الغلابة اللى لازم يفهموا ويتحركوا
و مستنيين حد ينزل ينضف امخاخهم من غسيل الدماغ اللى اتعملهم

faissl said...

عصمت سيف الدولة كان عامل ملحق في آخر هذه المعاهدة، جايب شوية مخارج حلوة

سماء الحرية said...

الله ينتقم منهم باعوا البلد ماضى و حاضر و مستقبل

حدث بالفعل في مجلس الشعب: تريليون و272 مليار جنيه تم إخفاؤها من الحساب الختامي للموازنة ...مبلغ تافه وايــه يعني ........ معارضة مفـتـرية فعــــلا !! .. بقلم : د حمدي حســــــــــن

في الجلسة المسائية لمجلس الشعب امس الاثنين الموافق 22-3-2010 واثناء مناقشة حساب ختامي لميزانية 2008 -2009 اثيرت موضوعات مثيرة تتعلق بالحساب الختامي للدولة تصل الي درجة الفضائح المدوية بل أم الفضائح دون جدال :
كنت اود ان اثير مواضيع مختلفة منها مثلا استيلاء وزير المالية علي 400 مليون جنيه من صندوق التأمين الاجتماعي للعاملين بقطاع الأعمال العام والخاص بناء علي تعليمات وزير المالية ودون سند من قانون كما ذكر تقرير الجهاز المركزي للمحاسبات وهذا كان يتحتم ابلاغ النيابة العامة عن هذا الاستيلاء المفضوح والغير قانوني للأرامل وأصحاب المعاشات

سماء الحرية said...

ذكر النائب ان هناك مبلغ 1272 مليار جنيه لم يدرجوا في تقرير لجنة الخطة ولا يعرف احد اين ذهبت هذه الأموال ولا كيف صرفت و لمن ؟ ..... ولم يجبه احد ؟!!
ظننت في بادئ الأمر انه يبالغ أو انه قرأ المبلغ خطأ .. فراجعته بعد انتهائه من كلمته فأكد صحة الأرقام التي ذكرها
لما جاء دوري في الحديث قررت ان لا أتحدث فيما كنت اود الحديث فيه مما ذكرته في بداية المقال وقررت ان اتأكد بنفسي من السيد المستشار رئيس الجهاز المستشار جودت الملط فسألت : هل ما ذكره الزميل النائب من ارقام صحيحة ؟ هل فعلا الصناديق الخاصة بها مبلغ تريليــــــــــــــــــــــون و272 مليار جنيه ؟ فلم اسمع ردا من احد !! قلت إن مسئولية المجلس خطيرة ,مبلغ بهذا القدر” تريلـــــــون و272 مليار ليس بالمبلغ البسيط ليست ملاليم ولا فكة حتي لا يهتم بها احد !! لماذا لم يدرج هذا المبلغ في تقرير لجنة الخطة والموازنة ولصالح من ؟
نحن نتحدث ليس عن مليار جنيه بل نتحدث عن الف مليار من الجنيهات ومعهم فكة تبلغ وحدها 272 مليار اخري ؟؟ نريد مسئولا واحدا يرد علينا .. رئيس لجنة الخطة يسمع ولا يبدي اي اهتمام ويتشاغل بالحديث مع جاره والباقي "يبحلقون" فيّ دون اجابة !! لماذا لايجيب احد ؟

سماء الحرية said...

وكنت اود ان أتحدث عن عدم ادراج اعتمادات لأموال لعلاج الأطفال بالتأمين الصحي تنفيذا لقرار مجلس الوزراء رقم 15 منذ عام 1997 مما جعل العجز المالي لمواجهة هذا الموضوع يصل الي 400 مليون جنيه
وكنت اود ان اتحدث عن فضيحة توفير 200 مليون جنيه خاصة بدعم الصعيد رغم ان الصعيد و مواطنيه في حاجة ماسة الي عشرات اضعاف هذا المبلغ للتنمية المختلفة وتوفير فرص عمل مما يدل علي نجاح الحزب الوطني في تدجين نواب الأغلبية من الصعايدة واكتفاؤه بترديد شعارات جوفاء عن التنمية بالصعيد اتضح أنها كاذبة و فضحها تقرير الجهاز المركزي للمحاسبات
كنت اود الحديث عن نقص أموال الاستثمار الأجنبي المباشر وتراجعه في الوقت الذي زاد وتصاعد هروب أموال المصرين للاستثمار بالخارج وهو مؤشر جد خطير يدل علي سوء الأحوال الداخلية والتي أدت الي هذه النتيجة الحتمية
إلا أن ما أثاره الزميل النائب أشرف بدر الدين أثار حفيظتي وغضبي لخطورة ما ذكره وتجاهله كل المسئولين المتواجدين بالجلسة عمدا وهروبا من المسؤلية ومحاولة للإفلات من العقاب المفترض

سماء الحرية said...

لماذا لا تجيب ياسيادة المستشار ونحن نحترمك ؟ لماذا لا تجيبنا الحكومة ؟ أكرر اين هذا المبلغ ؟ وكيف صرف ؟ ولماذا لم تدرجه اللجنة في تقريرها وتجاهلته تماما ؟ لماذا لا ترد يا سيادة رئيس المجلس ؟ قال : يرد رئيس الجهاز ! اما وزير المالية فقال : لن يرد عليك احد ... تحدث براحتك !! فرددت عليه : بالطبع سبق أن سببت الدين .. وتتعالج علي نفقة المواطنين ... ولم يحاسبك احد؟ فهل سيحاسبك احد علي الف مليار جنيه ومعهم 272 مليار اخري ضائعة ومختفيه في الحساب الختامي ؟
• إن المبلغ الضائع وقيمته 1272 مليار جنيه تجاهله تقرير لجنة الخطة والموازنه جريمة في حق الوطن والمواطنين وتوضيحا لما يمثله هذا المبلغ في الميزانية أقول أنه :
• يتعدي الناتج الاجمالي كاملا للوطن
• ويبلغ 14 مرة ضعف العجز الموجود والذي تعاني منه الموازنة
• ويبلغ 5 مرات ضعف الايرادات العامة للدولة {البترول – قناة السويس – الشركات والمصانع – الجمارك والضرائب .}
• ويبلغ 4 مرات ضعف التفقات العامة للبلاد { الصحة والتعليم والمياه والصرف والرصف و الطرق و..... }

سماء الحرية said...

كنت اتصور أن أغلبية مجلس الشعب ستثور علي ما وضحته المعارضة من جريمة ارتكبتها لجنة الخطة والموازنة ورئيسها في حق الشعب من تجاهل لمبلغ بهذا الحجم وبهذه القيمة إنحيازا لمصالح الشعب بدلا من مصالح حزبية فاسدة
وكنت اتوقع من رئيس المجلس الأستاذ الدكتور / احمد فتحي سرور موقفا آخر غير موقف الصمت الرهيب الذي لاذ به مخالفا دوره عن حماية مصالح الشعب ودوره كرئيس للمجلس من المفترض أنه يراقب أداء الحكومة .
أما الحكومة فأفصحت عن موقفها بما قاله وزير ماليتها : لن يرد عليك أحد !!
أخشي ان اتعرض إلي انفجار المرارة بل إلي انفجار في المخ اذا استمرت هذه الأوضاع دون تغيير !
أوجه تريليون و272 مليار دعوة للشعب المصري ليهب للدفاع عن امواله ومصالحه
اي 16 الف دعوة لكل مواطن مصري داخل أو حتي خارج مصر
إلي متي سنتركهم يسرقون وينهبون أموالنا
واخيرا مليون سلام أو تريليون سلام لكل المصريين

سماء الحرية said...

أجاب المستشار جودت الملط بأنه ادرج مخالفات الصناديق الخاصة في تقريره في البند رقم 35 وأنه ذكر ان ثمة مخالفات شابت اعمال الصناديق والحسابات الخاصة والوحدات ذات الطابع الخاص بلغت جمله ما أمكن حصره 3955 مليون ج تم تصويب ملاحظات بلغت 144 مليون ج وجاري متابعة ملاحظات اخري بنحو 3810 مليون ج . ثم تم سحب كلمتي واعطيت لنائب أخر لشكر الحكومة علي انجازاتها ؟؟!!!
جاءت هذه الجلسة في ذات اليوم الذي نشرت فيه الصحف خبر حبس نائب الحزب الوطني الملقب بنائب القمار سنتين لأنه ضبط متلبسا بتهريب 550 تليفون محمول من الجمارك ودفع غرامات تصل الي 100 الف جنيه تقريبا نتيجة رفض الوزير بطرس غالي التصالح معه !!
ويبدو ان هذا التواكب جاء ليبين ان الصغار يلعبون في خانة الآلاف { ثلاثة اصفار} بينما الكبار الآن يلعبون في خانة التريليون { التريليون 12 صفر } - اي بالعامية " كل برغوث ودمه " .

سماء الحرية said...

مصدر المقال على هذا الرابط و منتشر فى واقع اخرى كثيرة

http://www.saveegyptfront.org/news/?c=165&a=28808


عذرا على الإطالة و لكن المقال هام و صادم لدرجة ترفع الضغط

مواطن مصري said...

بالصور: "البرادعى" فى أول جولة له بـ "الشارع".. زار خان الخليلى ومسجد السلطان "بن قلاوون ".. وصلى الجمعة فى الحسين وسط حشد جماهيرى وهتافات مؤيديه


http://youm7.com/News.asp?NewsID=206007

البرادعي بدأ التحررك الشعبي

هاتجنن said...

طيب عاوزين نعرف راي الدكتور البرادعي
في اهم 3 حاجات كرهوا ابنا في النظام
القدس & فلسطين & كامبور ديفيد

لورنس العرب said...

المعاهده لا ذنب لها في شيء
عندما تنتقدي شيء يجب ان يكون لديك البديل
ما هو البديل الذي كنا نملكه وقتها؟

طيب أقولك على حاجه

منذ عام 1948 وحتى عام 67 لم يكن هناك معاهدة سلام
ماذا فعلنا؟

طيب ماذا فعلنا منذ عام 79 وحتى اليوم؟
هل يعقل أن نظل 31 سنه فاشلين ونقول ان السبب هو ما فعله فلان من 31 سنه؟
طيب تيجي ازاي؟

كلمة أخيره


لما نعرف ازاي نلم الكلاب من الشوارع نبقى نتكلم عن اتفاقيه كامب ديفيد وتعديل المواد الموجوده فيها او حتى الغائها
اما انك تشوفي الحال زي الزفت طول 31 سنه وتلقي باللوم على الاتفاقيه فهذا غير منطقي
الاتفاقيه لم تقول لك خلي الزباله في الشوارع
الاتفاقيه لم تقول لأصحاب الاعمال يظلموا الموظفين
كامب ديفيد لم تقول للناس يصحوا من النوم الظهر
الاتفاقيه لم تقول لمصر اهملي الصناعه واعتمدي على الصين في كل شيء
هاتقولي انها مقيده سيناء- وماذا عن باقي الاراضي المصريه؟
لماذالم نفعل فيها شيئا؟
هل هذا أيضا بسبب كامب ديفيد؟
هل سوء التخطيط سببه كامب ديفيد؟
هل السرقات التي تحدث في المستشفيات والعلاج على نفقة الدوله وغيره سببه كامب ديفيد؟
لو كانت هي السبب سأكون اول من يقف أمامها
لكن انتم بتضحكوا على انفسكم
تحملون حاجه حدثت منذ 30 سنه مسؤوليه الفشل الملحق بنا وهذا دليل على فشل آخر غير الفشل اللي احنا فيه

لورنس العرب said...

على فكره
صحيح احنا واقعين تحت الاحتلال الامريكي
لكن الامريكان لم يقولوا لنا سيبوا بلدكم وسخه وخلوا الزباله تملى الشوارع


دي مجرد ملاحظه

lastcrazyboys said...

مش عـــارف ليه يا استـــاذة كل ما أقرا موضـــوع من دول ..والاقيكي كاتبــة عن المعاهدة والاحتلال

لزمن اشوف الفيــديو ده
http://www.youtube.com/watch?v=7IS5fFRXC0Y&feature=related

يمكن اكون بعتهولك اكتر من مرة ..بس اهي فرصة يمكن يكون فيه ناس جديدة

شالله محــد حــوش

جبهة التهييس الشعبية said...

لورانس العرب
انت بقى لك جمهور كبير على فكرة

وبيقعدوا يسألوا عليك على طول.. اي والله

مي ثابت said...

لورانس !!!! العرب

إذا كان التقرير الذى أتت به سماء الحرية رافعاً للضغط .. فالمنطق الذى تتبناه أنت يصيب بالسكتة الدماغية

و أنا سوف أحاول الأخذ بنصيحة الجماعة بتوع التنمية البشرية

اللى بتقول : لتبسيط الأمور و شرحها إستخدم الأمثلة الملموثة
لذلك حافترض الآتى

زوج متزوج من واحدة طيبة و غلبانة

نكد عليها و أصابها بالإكتئاب .. كانت النتيجة إنها أهملت نفسها و كمان نظافة بيتها
راح المفترى و بتوكيل مزيف رهن 99% من البيت اللى فى الأساس ملك للزوجة للحرامى الكبير .. و فتح باب الشقة للحرامية الصغار من كل حدب و صوب
وبالرغم من وفاة الزوج ..لكنه للأسف قبل ما يموت وكل أسوء أولاده لخلافته .. نزولاً على شرط الحرامى الكبير مالك الرهنية
و مع مرور الأيام الحرامية الصغار بيتكاثروا و بيبقى من ذريتهم الهجان "مش رأفت " و المرتشى و الفاسد و الجاسوس و بتاع القمار و سميحة و قرصان العبارة و المحتكرين و جالبى السرطان

الفوضى فى البيت بتزيد و الهموم كادت أن تقضى على الأم

مي ثابت said...

و كانت النتيجة إنقسام الأولاد إلى فريقين

فريق قانط و يائس و لا ينظر لأبعد من موضع قدمه .. كل عمله هو مداومة تأنيب الأم و تكديرها و معايرتها بضعفها و عدم نظافتها.. و بالتالى فهى فى رأيه لا تستحق سوى وجود الحرامى الكبير و إستمرار إستيلائه المزور على المنزل !!


فريق آخر مشفق على الأم و البيت.. فاهم و مقتنع إن أول خطوة للإصلاح هى فك رهان المنزل و طرد الحرامى و أعوانه كخطوة أولى و عاجلة لكى تستفيق الأم و تشفى .


الخلاصة : طيبة الأم و عدم إهتمامها بنفسها لا يبرر أبداً بيع أملاكها للحرامية .. كما لا يبرر تقاعص الأبناء عن التفتيش فى كيفية فك الرهنية و إعتاقها

مي ثابت said...

نونة

مش عارفة ليه تخيلت تعليق لبهيج "الغير شرير" و هو بيقولك بطريقته الظريفة المعهودة

أبلتى إنتى مش كنتى قلتى إن المدونة لا ترحب خالص مالص بالسادتيين
إلا بعد ما يفوقوا

Ahmed said...

لورانس

أكيد مش كل مشاكلنا سببها كامب ديفيد لكن
لا يمكن أن نقول فلنترك مشاكل الأمية مثلا حتى نحل مشكلة الطرق غير المرصوفة. هذه مصائب و تلك أخرى. فيجب العمل على حل الاثنين معا و ليس أن نهمل واحدة بحجة وجود مشاكل أخرى

نعيب زماننا

جمال مالك..)* said...

سعلق على افتتاحية القمة العربية (سرت)اثاره وتشويق..
واضح ان القاده العرب اكلوا كويس وناموا كويس ..
فيه نوع من المصارحة
والشفافية ولا عتراف
بتقاعسم المزمن والتخلي عن النرجسية والكلام الوردي
الذي يقولوه لبعض..
بداء بها امير قطر وبعده العميد القذامي المظلوم من الشعب
كما قال وان الشعوب
لم تعد تقبل منهم
الا ماتريده والذي
لا تريد يرموه على
عرض البحر..عمر موسى
ضهر مستا جدا من
الانتقادات التي توجه للجامعة العربية رغم ان الجامعة هي فقط موسسة تحاول تقارب
وجهات النظر والعمل وصدار
المقترحات وتطبيقها يبقي بيدي القادة العرب كلام جميل قاله عمر موسى ولكن يبقى
السؤال اين التطبيق
والتفيذ؟قمة مثيره
رئيس الوزراء الايطالي سيلفيو بيرلسكوني وبان كي مون
امين الامم المتحدة..
حفيد السلطان محمد الفاتح
ومن جعلني اشعر بالعار بأني احد احفاد العرب العاربة
وافتخر بكوني مسلم
ريس الوزراء التركي رجب طيب اردوغان..بداء لي مدافعن
عن القدس وفلسطين اكثر من الفلسطينيون انفسهم
.

هالة said...

الله عليكى يا مدام مي
حلووووووو جدا المثال اللى ذكرتبه حضرتك
أنا و الله مش قادرة افهم الناس اللى لسه بيأيدوا كامب ديفيد لحد دلوقتى !!!!!! بالرغم من اكتشافنا كل فترة لخيبة جديدة من بنودها المخفية

lastcrazyboys said...

@ مي

طب مانا "ساداتي" ..والاستــاذة عارفة كده تمام
بس مش ساداتي اللي هو بنقض كل شيء قــام به عبدالنــاصر

وهي عارفة كــده كويس

فكرك يعني .."تستجــري "تقول حكاية السادتايين يمتنعون" دي أمام ناظري"

:)