Wednesday, 24 March 2010

انا شرقت من الضحك وانا باقرا المقال ده

القهوة وقفت في زوري وشرقت وقعدت اكح... هههههه يا عيني علينا، والله احنا غلابة قوي، طب وربنا غلابة، طب تصدقوا انا فعلا مش باكرهه، انا باكره علاء مبارك، باكرهه قوي يعني، بس حسني، عادي يعني، عايزة اغير بس، ومش عايزة جمال رئيس، بس هو شخصيا عادي يعني مش باكرهه

19 comments:

lastcrazyboys said...

طب والله فعــلاً ..رغم كل انتقاداتنا لأعماله..وتصرفــاته

كنت متضايق جــداً ..من بعض الزمــلاء اللي كانوا بيتشمتوا في مرضه ..وانا اعرف واحــد بيشتغل مع عيسى ..كان مستني الخبر على أحـر من الجمـر
مما أدى الى تصــادمنا في اكثر من موقف خلال الايام الفائتة
http://www.youtube.com/watch?v=MLqnyMYPNjo
واكتشفت اني - على الرغم من انه لاهيغديني ولا يعشيني ولا فيه مصلحة بيني وبينــه - اخترناه اخترنــــاااه

لأنه فعــلا لو بصيتي هتلاقي مبـارك انسان مش وحش ..بس هو يعيبـه الانفراد الدائم بالسلطة والقرارات حتى لو اتضح مدى خطأها ..وكذلك خوفه من الجوقــة المحيطة به
وثالثة الاثافي - وخاصة بالنسبـة لشخص جنوبي حاد الطباع مثلي- انه مش ممشي أهل بيتــه على العجين ..وسايب لهم الربط والزبط
هو في بيته حررر..انما مش فينــا


اما جمال ..فمن المعروف انك - ولامواخذة - مستهيفاه من يومه ..يعني زي ما بنقول بالبلدي كده ..مش في الدماغ
بس ما يجيش يحط على دماغنا ..وينزل بالبراشوت ويعمل فيها "دون كيشوت " بروح امه
!!..صح كده

ونأتي لحبيب الملايين ..الكابتشن " عيــلاء" نجم قريق الصقــور وهدافه الأول الذي نافس حسام حسن في احدى الدورات الرمضانية المذاعة على دريم
المهم ..انتي ما بتحبيش السهن ..المسهــوك
اللي يعمل عملته باليمين ..ويدهن المرهم بالشمال
وده نابع من انك ذات رؤية اشتراكيــة " متعفـنة" عفى عليها الزمن ..وبتهتمي بالغلابة والمستضعفين
ولم تستطيعي التكيف مع طبقــة " البرجوازيين " -حيث النغنغة والفخفخة وكل شيء مبــاح-..ومبقــاش شيء متاح

نصيحــة : اتعالجي من القصــور في الرؤية عندك
قبل ما الشعب ده يجيب لك الفقــر الازلي
http://www.youtube.com/watch?v=ahw2t_w7Loo&feature=related

Safa said...

طب بتكرهي علاء ليه بس :]

شمس العصارى said...

لا انا مش بحبه ولا بتعاطف معاه

شمس العصارى said...

اولا سلامتك من الشرقة الوحشة دى
ههههههههههههههه
بس اكيد القهوة كانت سادة وده فال وحش
المهم
هو عجبك علشان خرزانته طالت الكل
الرئيس و الحاشية و المنافقين و النخبة و الشعب نفسه
رغم انى معترض ان يحط الشعب مع دول
هو عموما كلام كويس و خصوصا الفقرة الاخيرة من المقال دى افضل ما فيه
بس انا اختلف معاه فى كام حاجة كده
1- ظلم ان خرزانته تطول الشعب بالطريقة دى
2- النخبة مجتمة لا تقدر على تغيير الرئيس و الدليل الواقع و ال50 سنة الماضية
3- صاحب العزبة ....... دى جملتى ... ابقى قوليله يا نوارة ميخدش حاجة تانى من كلامى لاما يقول المصدر هههههههههههههه
اه اهم نقطة انا اتفق معه فى ان الرئيس ليس والدى على الاطلاق بمعناها القريب و البعيد ههههههههه
و الى بيقول عليه انه والده براحته يروح يسال امه
هههههههههههههههههه

مواطن مصري said...

كشف الشيخ كمال الخطيب، نائب رئيس الحركة الإسلامية داخل الخط الأخضر، أن «جماعات يهودية تقدَّمت بطلب رسمى للشرطة الإسرائيلية للسماح لها بذبح قرابين فى المسجد الأقصى فى عيد الفصح الذى سيوافق يومى ٢٩ و٣٠ من مارس الجارى». وأضاف الخطيب لموقع قناة «الجزيرة» أن الاحتلال سيسمح للجماعات اليهودية بذبح القرابين كما فعل العام الماضى لولا تصدى المرابطين فى الأقصى. وشدد على أن «حشود النساء التى تتوافد على المسجد، بعد منع الرجال والشباب من دخوله، هى التى ستحبط اقتحامهم هذه المرة»


متطرفون يهود يعلنون اقتحام الأقصى بالذبائح فى «عيد الفصح».. وحشود نساء فلسطين تتوافد لحمايته

http://www.almasry-alyoum.com/article2.aspx?ArticleID=248447

مواطن مصري said...

http://www.youtube.com/watch?v=lKsIVmaGWJo

علامة ع الجبين 1


اتفرجي عليها ضروري

Ahmed said...

http://fahmyhoweidy.blogspot.com/2010/03/blog-post_1367.html

لقد قلت أكثر من مرة إن مشكلتنا ليست في تدخّل الدين في السياسة، ولكنها في تدخّل السياسة في الدين، وهذا الذي حدث في الأزهر «شاهد ملك» على صحة ذلك.
أ/ فهمي هويدي

و الله لو في هذه البلد من يستحق الترشح للرئاسة لكان الكبير, فهمي هويدي

نعيب زماننا

Ahmed said...

أكيد لازم أكره الرئيس. وهل الكره لابد أن يكون لصفاته الشخصية البحتة فقط؟. ربما نجد عميد كلية في مكان ما أو رئيس شركة فيه من الدكتاتورية و الاستيداد أكثر من الرئيس و لكن لو سمعت عن أفعاله لن يتولد لدي أي شعور بالكراهية أو على الأقل لن يكون كشعور من يرأسهم, و ذلك لسبب واحد أنه لا يمسني بصورة شخصية.
إذا قلت أني اكرهه فهذا لسبب واحد, أنه لم يحسن تولي المسئولية, و الدليل الحالة الاقتصادية. و من يقل الزبادة السكانية, نقول له الزيادة السكانية ربما تكون مشكلة. ولكن مادام يعترف أنه فشل في التعامل معها, فليتركها لمن يستطيع على الأقل المحاولة, لا أن تكون تبرير لفشله. الأمر بسيط, فشلت دع غيرك يحاول. أما البقاء مع الاعتراف بالفشل فهو تعريف للاستبداد. و هذا هو سبب الكراهية. و لا أخفي أنني سأستريح برحيله لأنني أعلم أن الوضع سيء بوجوده, أما القادم فعلى الأقل هناك احتمال ولو بسيط أن يكون أفضل, و هذا شيء قد يئسنا من احتمالية تواجده حتى بتنا نتمنى الوهية الرئيس لكي لا نخاطر بالمستقبل بدليل القول الذي شاع "اللي نعرفه أحسن من اللي منعرفوش"

نعيب زماننا

بهيج الشرير said...

يارب ياأبلتي المرة الجاية لما يجيبوا سيرته تكون قهوتك سادة عشان نفرح معاكي

مهندس مصري said...

لا انا بأكرهه لإنه سبب معظم البلاوي اللي إحنا فيها و المسؤول الأول عنها

حب ايه اللي انت جاي تقول عليه ؟

مهندس مصري said...

لا انا مش بأحبه لإنه سبب معظم البلاوي اللي إحنا فيها و المسؤول الأول عنها

حب ايه اللي انت جاي تقول عليه ؟

لورنس العرب said...

الانتقاد لا يعني الكراهيه
وما يجب أن يفهمه الناس أن الناس تنتقد لأنها تحب البلد وليس كرها في الرئيس أو غيره لأن ما هو المهم أن البلد يكون لها شأن آخر
وهذا ما لم يفهمه المؤيدين لسياسه مبارك
وما لم يفهمه أيضا المعارضين لسياسه مبارك
فهنا يجب ان تكون منحاز دائما لطرف عن الآخر مهما افتعل من اخطاء
وان ارتكب اخطاء فيجب أن تبررها للناس لأنه تابع له
وهذا ينطبق على المعارضين قبل التابعين للوطني

مي ثابت said...

أولاً :أعتقد أنه مقال مفخخ من كاتب لا يفتقر إلى الذكاء .

ثانياً : مبارك لا يصلح أن يكون أباً للمصريين إلا من الناحية العمرية و فقط .

ثالثاً : مبارك عامل زى زوج سئ ..متزوج من زوجة غلبانة و قليلة الحيلة .. سكن فى بيت أهلها اللى طردهم و إستعان ببلطجية يحموه و بإتفاقه مع زعيم العصابة الكبير اللى كل شوية يقدمله هدايا من ميراث الزوجة و ثروتها و إرادتها

الزوجة ليها أولاد خايفين عليها "ناصريين إخوان إشتراكيين .." نجح الزوج المفترى فى تحجيمهم و تخويفهم بذبح أمهم و بهدلتها .. فاستسلموا إلا من الصياح

يا ترى بعد ده كله تفتكروا إن الحب و لا حتى التعاطف حيكون ليهم مكان طبيعى عند مرض أو موت هذا الزوج
!!!!!

بهيج الشرير said...

ياترى ياأبلتي الخبر ده صح! أن خديجة باراكودا خلفت فريدة

السلام عليكم said...

انا مش قادره انسى انه بيحاصر غزه

انا مش قادره انسى بيع كل مصر بتراب الفلوس لشله حراميه
انا مش قادره انسى كل اللى فى معهد الاورام وكل اللى فى مستشفى سرط
ان الاطفال



انا مش قادره انسى النيل اللى بفى بركه صغيره لا وملوثه كمان

هى دى مصر من 30 سنه

احنا كنا كده نظرات تائه ووجوه مش قادره حتى تتفرد مش حاقول تبتسم

قولولى فى اى دوله فى العالم رجال الاعمال هم الحكومه دى محصلتش ولا حى فى جمهوريات الموز

اقصى حاجه ان رجال الاعمال يشتروا ذمم القائمين فى الحكومه ويبقى اسمه زواج المال بالسلطه اللى حاصل فى مصر ان رجال الاعمال رفعوا شعار الوسطاء يمتنعون واداروا هم البلد كوزراء لمصلحتهم

على راى زينات صدقى برضون محصلتليش ولا فى المنامات

السلام عليكم said...

فكرينى بفيلم اهبل كده اسمه طباخ الريس

مطلع الريس ده زى شاديه فى فيلم كل الناس عدوينك وملكيش الا خطيبك نافع وهى منومه من عمتها الشريره يجى كمال الشناوى يفوقها شويه لكن الحصار حولها صعب

ويعينى الريس طيب بس اللى حواليه هم الحراميه

قط البكتريا said...

يعني بصراحه من البايخ انو موضوع اسمو (هل يحب المصريون الرئيس مبارك؟)
يجي واحد فلسطيني متميز ورائع ويجنن زيي كده ويعلق

بجد انا بحبش مبارك واسبابي معروفه , ولا جمال ولا علاء ( علاء شفتو مرة واحد بيتكلم ما نزليش من زور )

بصراحه الي بقهرني انو المصريين بس يحكو عن مصر بتحسيهم بجد بحكو بمحبة ؟؟؟
طيب هدول الي بحبوها ليش ما يحكموها يعني لو اصحاب القرار بحبوها بجد وبشتغلو عشانها
حتكون مصر احسن من الصين والهند

الله يهدي بالكم ويطلع مصر من ازمتها ويحطها بمكانها الي بتستاهلو

سماء الحرية said...

مي ثابت
يا ترى بعد ده كله تفتكروا إن الحب و لا حتى التعاطف حيكون ليهم مكان طبيعى عند مرض أو موت هذا الزوج
!!!!!
ده زوج يستاهل الضرب بالقديمة مش حب و تعاطف و صعبنيه ,تفتكرى انتى اننا هبل علشان كده المفترى بيستغل طيبتنا و بيعمل فينا ما بداله


السلام عليكم انا مش قادره انسى انه بيحاصر غزه

انا مش قادره انسى بيع كل مصر بتراب الفلوس لشله حراميه
انا مش قادره انسى كل اللى فى معهد الاورام وكل اللى فى مستشفى سرط
ان الاطفال

مهم جدا اننا مننساش , علشان تذكر الاسية ممكن يخلق فينا التصميم على التغيير

Tamer said...

مش هاقول اكتر من اللي الناس قالته

لا باحبه و لا باطيقه
و لو حبيت - او حتى كنت محايد - من واحد عمل فينا ده كله مش عارف اقول على نفسي ايه