Thursday, 26 May 2011

استااااااععععععععععدددددددددددددد


تحديث:
عزيزي الجيش.. الشخص اللي شار عليك بإنك تنسحب من الميدان ده بني آدم بيفهم وقلبه على البلد.. يا ريت تبقى تستشيره دايما
اوحش حاجة ممكن تحصل ان يحصل مواجهة بينا وبين الجيش، لإن الطرفين حيطلعوا خسرانين
واي حاجة تانية يمكن السيطرة عليها.. احنا شعب كارم كل من حكمه والدولة دي عارفة تحكم بس من كرمه
ونقدر نحمي البلد، ونحمي الميدان، اي مندسين من وسطنا يحاولوا يخربوا حينضربوا لما يتفسخوا من بعضهم
اي بلطجية حيهجموا علينا حيحصل فيهم اللي يتوب بلطجية العالم ويخليهم يجاوروا الحسين
ولو الشرطة حاولت تضربنا.. يا ريت.. عشان نعصرهم ينزلوا عساكر صغيرة، والشرطة مش حتحاول تضربنا خالص بالمناسبة، بس على الله تجرب
كده تمام.. وانا شايفة ان قرار عدم نزول الجيش ده قرار حكيم وفي صالح كل الاطراف
احنا بقى... بيقولوا لنا: يالا احموا البلد يا شاطرين.. هاه؟ نقدر نحميها ولا ما نقدرش؟ 
نقدر ولا ما نقدرش؟
تحديث:
المفاجعة... الجيش مش نازل الميدان
نزل بيان بيقول كده
عارفين ده معناه ايه؟ يعني بلطجية حينزلوا لنا او امن مركزي
لو امن مركزي قشطة.. خليهم ينضربوا
لو بلطجية
احنا عارفين حنعمل ايه.... بس البلطجية حيخشوا وسطنا عشان الناس تتخانق مع بعض، وحيحاولوا يخربوا محلات ويمكن يحاولوا يقتحموا اقسام عشان نبقى احنا اللي بنخرب البلد
فاهمين طبعا، يعني مش احنا اللي حننضرب، ده ناس حيندسوا وسطنا ويبان كأنهم متظاهرين وحيحاولوا يخربوا
كده هايل.. عارفين طبعا حنعمل ايه

اولا:
حتقرا المقال ده بالتفصيل، سطر سطر، كلمة كلمة، حرف حرف، زنجة زنجة... 
بلال قايل كل اللي نفسي فيه، كله كله... عشان كده ابوس ايدك ركز وانت بتقرا، عشان انا حطيت المقال على التويتر ولاحظت ان ردود الافعال برضه لسه في اطار "الطفولة الثورية" اللي بيتكلم عليها بلال في المقال.. ماما دح بابا كخ.. لسه
امال الراجل ناتع المقال اللي قد اللحاف ده كله ليه؟ ركز الله يخليك
----------
ثانيا:
عندنا استعدادات بكرة
1- من المنتظر ان تقوم جهات غير معلومة - او معلومة انت ونيتك بقى - بمحاولة افساد تحريرية بكرة بإنها تحط ناس تتعمد الاشتباك مع الجيش، او تصعيد الموقف. ايه الهدف؟
الهدف انها تخلص بنهاية مأساوية تخلي الناس متهوبش بقى ناحية ميدان التحرير تاني
مين اللي بيعمل كده؟ الله اعلم، مالكش دعوة
انت لك دعوة بالاتي:
أ- لجان شعبية شديدة الحراسة، وتفتيش دقيق جدا، حيبتدي من الليلة
ب- مراقبة كاملة للمداخل والمخارج، على اللجان الشعبية اللي واقفة انها تبذل كل ما في وسعها عشان تبعد اي متظاهرين عن الدبابات لو فيه دبابات واقفة، او عن الشرطة العسكرية لو فيه شرطة عسكرية واقفة، لازم المسافة بينهم وبينا تبقى كبيرة
ج- اللجان تبقى وش وضهر.. معلش، حنتعبكم يا شباب.. يعني لجنة لاستقبال اللي داخل من برة، ولجنة لحراسة الوضع من جوة.. شرطة شعبية يعني، عشان ممكن حد يخش من غير اي سلاح، ولا اي حاجة، ويختلق خناقة جوة الميدان عشان يعمل بلبلة قد تتطور لعنف تستدعي تدخل الشرطة العسكرية.. فحتعملوا مجموعات جوة الميدان تمشي تقول: هااااا مين هناك
2- انت بقى كإنسان عادي مش في اللجنة الشعبية عليك حماية الميدان برضه
اي حد تشوفه بيحاول يتحرش بالشرطة العسكرية او بالجيش تمسكه وتديله واحدة سلمية سلمية وتطلع بطاقته وتعرف لنا مين ده، عشان نعرف مين اللي كان حاطط خطة افشال بكرة
حتلاقي ناس بتفتعل خناقات، شغلتك تفضها، واي حد بيفتعل خناقة برضه تديله سلمية سلمية وتطلع بطاقته وتخلي اللي ما يشتري يتفرج عليه
3- هالله هالله ع الجد والجد هالله هالله عليه.. مافيش هتافات مش عليها اجماع وطني
وانا احب اوضح هنا ان الناس اللي بتنادي بمجلس رئاسي او الدستور اولا دول مش خونة ومش طالبين تغيير عقيدة الجيش ولا طالبين حماية السفارة الاسرائيلية (ها؟ ها؟) ولا بيقولوا مش علم اسرائيل اللي حينزل لباس امك هو اللي حينزل (واخد لي بالك؟) دول مواطنين محترمين، بيحاولوا يلاقوا حلول للازمة القائمة
ومن حيث المبدأ مافيش حاجة غلط في اللي بيقولوه، بس كان من الاول الكلام ده، يعني كان ينفع يتعمل من اربع شهور، طرحه دلوقت مش واقعي، وتنفيذه حيبقى صعب، ومش حننتخب مجلس رئاسي في شهر عشان يقعد شهر، ولا ينفع اننا نتجاوز فكرة ان الناس صوتت على التعديلات الدستورية وما تشتغلوش الناس وتقولوا اصلهم اضافوا عليها مواد ماحدش استفتى عليها، لو كانت مش عاجبة الناس في وقتها كانوا نزلوا في ساعتها برضه
فخليك في نفسك وما تخليناش نسلط عليك القلم واللسان
الخلاصة يعني، الكلام بتاع المجلس الرئاسي والدستور اولا ده حكي في المحكي وتضييع وقت
المطالب اللي الكل عايزها اهي سواء اللي عايز مجلس رئاسي او اللي مش عايز
الى جانب يعني ان الهلاوس اللي عند بعض الناس والمرتبطة بالبدلة مالهاش اي اساس من الصحة، مين قال انك لما تجيب مجلس رئاسي حتروح البيت وترتاح وتنام ملء جفنيك؟ لا.. حتفضل صاحي له، وبرضه حيحاول يلعب بديله - على اوسخ كمان لانه مسيس - وحيحاول يديك على قفاك
عادي.. البشر بشر والبدلة ما بتفرقش.. والسلطة سلطة والكرسي ما يتسابش
فإحنا للاسف، في كل الاحوال، ولى عهد النوم يا خديجة.. ولى عهد النوم يا خديجة
حنفضل ورانا شغل كده.. واي كلام في قضايا خلافية في التوقيت اللي البلد دلوقت في حالة سيولة، حيجرنا للرذيلة.. نسيب شغلنا بقى ونتفرغ للرذيلة؟ 
ام الصبي هي اللي تدي ابنها لغريمتها مش ترضى بإنه يتقسم نصين بالسكينة عشان تاخد حتة منه
انا عارفة ان فيه ناس حتقولي: ماهو كنتي بتقولي كده عشان الاخوان ينزلوا واهم خلوا بينا.. لا مش باقول كده عشان الاخوان ينزلوا، باقول كده عشان ما اشوفش ناس بتتخانق في الميدان
الشعب يريد محاكمة السفاح
الشعب يريد تطهير البلاد
الشعب يريد حد ادنى واقصى للاجور
الشعب يريد الغاء المحاكمات العسكرية
الشعب يريد حرية
ما تشمتوش فينا اللي نزلوا امبارح بيان يبلغوا فيه ويقولوا: دول عايزين يعملوا وقيعة بين الجيش والشعب
مافيش حاجة تطلعهم كدابين غير اننا نكدب ظنهم.. لو كدبنا ظنهم حيعضوا بنان الندم، وبعد البيان بتاع امبارح مات الكلام، ما ينفعش يقولوا ما احنا نزلنا ولا احد ينكر اسهامتنا
لو هبلنا في الهتافات بتاعة اسقاط المشير ومجلس رئاسي والدستور اولا حيقولوا: شفتوا؟ كان معانا حق ولا ما كانش معانا حق؟ 
ساعتها بقى الروس حتتساوى.. هم استندلوا، واحنا عبطنا، وعادي يعني.. عيان بيـ... بوس في ميت
مجلس رئاسي ودستور اولا دي احد الوسائل المطروحة للوصول للهدف بس مش هي الهدف
ولو هي الهدف يبقى انت بتاع مصالح وعارف انك حتسقط في الانتخابات فعايز المجلس العسكري يغير لك البامبرز وبتقول له حوش عني الاخوان يا سي عبده اه يا سي عبده 
وفي الحالة دي يبقى معاهم حق ياخدوا الموقف ده لإن ده حيبقى صراع وجود.. انت عايز تنهي وجود الاخوان؟ 
حيبان في الميدان بكرة... ابوس ايدك
ابوس ايدك
ابوس ايدك
ابوس جزمتك من قعرها
طلعهم غلطانين... طلعهم غلطانين لانهم غلطانين فعلا.. ولانهم عارفين انهم غلطانين فعلا حيحاولوا يتصيدوا اي همسة اي كلمة اي لمسه... اعيش خدامتك طول العمر لو ما ادتهمش الفرصة دي
4- اسمحوا لي اغني خارج السرب كعادتي عشان الكل يزعل ويتفلق وانا انبسط واحس اني صح
بلاش قلة اصل
بلاش قلة اصل
بلاش قلة اصل
بلاش قلة اصل
بلاش قلة اصل
ابوس ايدك يا جعيدي بطل قلة اصل
يابني اسمعني انا زي امك.. امي انا؟ ايوة.. امك انت
انت يابني لو فضلت ناصب المقصلة للناس ومسمي نفسك راديكالي عشان مكسوف تقول انا قليل الاصل راسك حتطير تحتها بعد شوية وحينتهي بيك الامر لحاجتين مالهمش تالت:
يا اما حتنتهي نايم على الرصيف ولابس بالطو وسخ وفي ايدك ازازة سبرتو احمر
يا اما حتنتهي علي الدين هلال وجهاد عودة
بص على كل اللي وسخوا لما كبروا حتلاقيهم اكتر ناس كانوا بيقولوا على نفسهم راديكاليين في شبابهم
يا ابني يا حبيبي.. الحركة اللي الاخوان المسلمين عملوها دي حركة مش محترمة وغير اخلاقية ومالهاش ما يبررها ابدا.. ابدا
ادعاء ان اصل "هناك بعض الناس ممن يطلقون دعاوى المجلس الرئاسي والدستور اولا" ده ادعاء بيرد على نفسه.. لما انت بتقول بعض الناس، ما تنزل انت وتبقى اغلبية الناس وتسحب من تحت رجليهم البساط وبعددك الكبير وصوتك الاعلى وسيطرتك على الاعلام - واهمها الجزيرة مباشر اللي بقت مقر المرشد - حتقدر تسيطر على الموقف وتحول مجرى المطالب.. اللي بيقولوا الكلام ده زي ما بلال بيقول بالظبط.. خلاص.. حطوا صوابعهم في الشق وطلعوا من هدومهم، ما لو لبستوهم هدومهم وجوزتوهم هنومة واتنفذت كل المطالب العادلة اللي مش محتاجة كيميا ولا خارطة طريق ما كانوش نكشوا شعرهم كده
كمان ادعاء ان الدعوة بتاعة بكرة "للايقاع بين الجيش والشعب" ياااااااااااااا... وسخ وسااااخةةةةةةة.... وسخخخخخ وساااااااااخةةةةةةةة وسسسسسسسسسخخخخخخخخخخخخخخ وسسسسسسسساااااااااااااااااخخخخخخخخخخخخخةةةةةةةةةةةةة
اييييييه القرف ده؟ 
بقى ناس بتقول مجلس رئاسي عشان طلعت من هدومها بتوقع بين الجيش والشعب؟ اه.. طب واللي استقبل ظباط جيش انقلابيين نازلين في التحرير بالافرول يقولوا يسقط المشير، وطلعهم على منصته، والاكتر من كده، دخلهم من اللجان الشعبية اللي اساسا كان مسيطر عليها الاخوان كلهم، واصلا كان نازل وعارف ان فيه ظباط نازلين وانا بنفسي مكلمة قيادات من الاخوان وكان ناقص ابيع لهم شرفي عشان يمنعوا حاجة زي دي انها تحصل وولا سألوا فيا.. اللي عمل كده يبقى ايه؟ 
من امتى قلب الام ده على الجيش؟ حصلت امتى الحادثة دي؟ 
بس يابني يا حبيبي.. ما تطلعليش إذ فجأتن وتمسح كل اللي الاخوان عملوه عشان دي اسمها قلة اصل
يابني انت وهو بطلوا قلة الاصل دي في الاخر حتلبسونا في واحد نصاب... والله العظيم تلاتة قلة اصلكم دي حتلبسنا في عمرو موسى.. ايه رأيكم بقى؟ وبرضه حتناموا على الرصيف بالبالطو وازازة السبرتو الاحمر
اه.. الموقف اللي اخده الاخوان ده لا اخلاقي وغير مبرر. نقطة من اول السطر. ما تطلعش بقى تقولي والاخوان بقى ولا حتى شاركوا في الثورة، والاخوان بقى ولا حتى عملوا اي حاجة، والاخوان بقى اساسا هم اللي ركبوا على الثورة، والاخوان بقى ولا لهم اي لازمة في الحياة، والاخوان بقى اصلا كل الناس بتكرههم ومالهمش شعبية في الشارع
ايه ايه ايه ايه؟ 
ايه؟ 
انت اهبل ولا بتضحك على نفسك؟
لا.. الاخوان كانوا جزء هام جدا وحيوي جدا في الثورة، وقدموا شهداء، وقدموا تضحيات، وعملوا بطولات، وكانوا من اجدع الناس في الميدان ان لم يكونوا اجدعهم على الاطلاق.. والفرق بين اي شباب وبين شباب الاخوان ان الشباب كان جاي يتظاهر وما جراش حاجة لو مات.. شباب الاخوان كان جاي يموت وما جراش حاجة لو فاته الموت النهاردة ممكن يلحقه بكرة
دي حقيقة تسجل للتاريخ.. ومافيش حاجة اسمها الاخوان بيكتبوا نهايتهم.. مش حتنتهي الاخوان، اخرها حيتعمل لها مذبحة زي بتاعة اربعة وخمسين، عادي، ماهم بيكرروا نفس الاخطاء، بس مش حينتهوا
والاخوان منهم جرحى كتير.. وشهدا كتير.. وعشان كده انا زعلانة منهم وواخدة على خاطر، عشان الموقف اللي هم واخدينه النهاردة ده ياخده الحزب الوطني... مش ناس قدمت كل التضحيات دي
والتبرير بإن اصلهم عملوا كده عشان بيتشتموا!!!!!!!!!!!!! انما يبكي على الحب النساء
وطلعوا ما بيبكوش.. انا ما بابكيش على الحب... طلع الرجالة اللي بشنب ودقن هم اللي بيبكوا على الحب، ولو اني مش شايفة ان ده تبرير حقيقي، دي مجرد ذريعة
وبكرة الاخوان يعرفوا انهم بيئذوا نفسهم، وانهم بيستخدموا دلوقت كمكنسة يكنسوا بيها القدرة على الحشد وبعدين حيتحرقوا ويتعمل فيهم اللي اتعمل فيهم.. اتعمل فيهم طول عمرهم، وبياكلوا خمسين قفا على سهوة
وانا من موئعي هذا بادعو شباب الاخوان للثورة... مش نافعة القيادات العجوزة دي.. تفكيرها قديم وحتلبسكم في حيطة، انتوا مستعيلين نفسكم ليه؟ ما حسن البنا كان قدكم لما عمل الجماعة.. الجماعة مؤسسها شاب ومرشدها والقيادات اللي فيها لازم يبقوا شباب، ويتنحوا عند سن 49 سنة، السن اللي مات فيه البنا
-----------
معلش.. شدة وتزول.. انقسام الصف ده شدة وتزول.. لو احنا عايزينه يزول، وكل واحد ييجي على نفسه ويحط مصلحة مصر قبل صراعاته واحقاده ومصالحه
اليوم ان شاء الله حيعدي على خير قوي وبسلام وامان اذا احنا عايزينه يعدي على خير وبسلام وامان وما طرحناش قضايا خلافية وحمينا الميدان من المندسين اللي عايزين يصعدوا ويلبسونا في حيط
اديني باقولكم اهو
لو حصل تصعيد من جانبنا بكرة حتبقى آخر مرة مخلوق ينزل فيها الميدان
لو حصل تصعيد من جانبنا بكرة حتبقى آخر مرة مخلوق ينزل فيها الميدان
لو حصل تصعيد من جانبنا بكرة حتبقى آخر مرة مخلوق ينزل فيها الميدان
عايزة اكتبها 13859 مرة والله
اوعى.. اوعى.. اوعى... مافيش مخلوق يصعد بكلمة، مش حاقول بحركة، واللي حيصعد حينضرب لما يتفسخ من بعضه، وسلمية برضه
اوعى تمد ايدك ولا تسيب حد يمد ايده ناحية الجيش ولو من بعيد
اوعى تطرح قضية خلافية ولا تسيب حد يطرح قضية خلافية ولو بالتلميح
انقاااااذ مصر واااااااااااجب وطنييييييييييييي
حاشوف بكرة في الميدان مين ام الصبي في قصة سيدنا سليمان... اوعى نشمت فينا حد
انا عايزة بكرة يبقى احلى يوم للميدان من يوم 25 يناير.. وربنا قادر، واحنا اذا عايزين حنقدر، اوعى تفتكر ان المؤامرات بتنجح الا اذا انت نجحتها
كل واحد فينا بكرة الميدان ده ابنه اللي في الحضانة وخايف عليه من الهوا... لو ابنك مات اعرف ان انت اللي قاتله
وحنعمل تاني؟ حنعمل اللي بنعمله كل مرة:
يااااااا رب... يا رب.. يا رب
خد.. اتسلى وانت ماشي

64 comments:

الطريق الى مصر said...

عارفة بعد كل التحذيرات دى حصل حاجة بكرة فى الميدان يبقى احنا شعب وسخ ونستاهل نتفشخ من الجيش والأخوان

kjhfkjsdhsf said...

الجيش نزل من شوية بيان رقم 58 على صفحته بيقول إن في قرار بعدم تواجد قوات الجيش نهائيا عند الميدان وإن الثوار لازم يحموا نفسهم بنفسهم

مش عارف ليه مش مرتاح للبيان ده

samy said...

ممكن اعمل شير عللموضوع؟ و كمان عايز اسئلك هنصلى الفجر فى التحرير؟

Passant said...

انتى فين يا ست البنات البيان رقم 58 من القوات المسلحة نزل كل حاجة فيه كويسة لحد آخر مقطع طب اقريه و بعدين نتكلم

محمد نبيل said...

مايفعله الاخوان اليوم فى مصر فعلوه فى السودان من قبل، التدليس باسم الدين واتهام المخالفين بالبعد عن الدين أو معاداته، حتى وصلوا للحكم، وبعد وصولهم للحكم أذاقوا أهل السودان الويلات ومن المضحكات المبكيات أنهم حرقوا قرى بسطاء دارفور حفظة القرآن وأعملوا فيهم المذابح والتشريد ثم يحاكمون أمرأة سودانية بتهمة مخالفة الشريعة الاسلامية لأنها ارتدت بنطلون !! هذه "الشريعة" التى لم تمنع العصابة الحاكمة فى السودان من نهب وقتل واذلال الشعب. أدعو الله ألا يمكن هؤلاء المدلسين باسم الدين من الانقضاض على حكم مصر وأن يقينا شرهم.

scorbion_cezar said...

شكللك كاتبة المقال دة قبل رسالة الجيش الاخيرة يانوااااارة الجيش مش هيكون موجود بكرة خاااااالص
مش كدة افضل ... ولا اية رايك ؟؟

gasser said...

طيب ايه نحضر السيف أو لمبة ولا ايه ؟؟؟؟
لا بجد لو في لجان تفتيش أو لجان شعبية أنا عاوز أشارك فيها
بس أعرف التفاصيل من مين

رجل المستحيل said...

الله معنا

nour1971 said...

امبارح واحد من شباب ائتلاف الاخوان كلم محمود سعد و قاله شباب الاخوان نازل التحرير علي فكره و اعد يتكلم مع واحد من الكبار بتوع الاخوان كله علي التليفون شوفي حلقه امبارح . انا بقي النهارده كنت بتكلم مع الناس عاشوفهم حا ينزلوا بكره ولا لاه رد عليا دكتور محترم قال لي لاءه طبعا مش نازلين فبقول له ليه ايه وجهت نظرك قال لي اصل انا فلول من السلفيين مش انتوا بتقولوا علينا فلول و اعد يقنعني ان اللي حصل ده غلط علشان الخر،ج علي الحاكم و اعد يحكيلي علي ايام الصحابه و الفتن و الكلام اللي من النوع ده علشان يقول لي ان احنا اللي عملنا الفتن و خلاصالبلد بقت مليانه فتن و ايام مبارك كنا في استقرار و كلام فاضي من اللي قلبك يحبه انا مش مصدقه ان فيه ناس كده يخرب بيت التخلف . ممكن اطلب منك طلب لو سمحت لو سمحت لو سمحححححححت ممكن قناه التحرير تنقل للناس اللي حا تعد في البيت و الناس الكبيره اللي متقدرشي تنزل و نفسها تنزل التحرير ايه اللي بيحصل لو سمحتتتتت كل مره بيعدوا يتشحططوا لغايه لما يلاقوا الجزيره مباشر مصر ناقله شويه و بعدين مينفعشي القناه يبقي اسمها التحرير و متجبشي التحرير يوم الجمعه ولا انتي رأيك ايه

ملكش دعوة said...

انا مش قادره اصدق انك في كامل وعيك .... مش انتي برضه اللي كنتي بتقولي بعضمه لسانك ان موقعه الجمل اللي تصدي ليها الاخوان واللي اظهر شجاعه فائقه الاخوان واللي ساند الثوره ودعمها الاخوان ...
دلوقتي بتبرري عجزك علي شماعه الاخوان وبتوصفيهم بالعماله .. عماله لمين انتي فاهمه كويس ان الكلام ده عاري من الصحه واجهي نفسك انكم في الميدان بكره مش هتكونوا علي قلب رجل واحد
في ناس نازله عشان المطالب المشروعه اللي في البوستر وناااس تانين نازلين عشان خوفهم من قرب الانتخابات زي اللي عايز يؤجل ماده في الترم عشان مذاكرش وفاشل وعمره ما هينجح لانه فاشل فاااااشل
واللي نازل يقولك نغير الماده معرفش ايه اصلها بتعمله عسر هضم وتبول لا ارادي
لو خايفه من الفشل يبقي مش عشان بيان الاخوان .. الاخوان وكتييييير قاعدين في البيوت ومش نازلين بكره عشان مش شايفين امانه ونزاهه في اللي بيحصل وجيتي تطينيها في الاخر وبتحاولي تعملي فتنه بين شباب الاخوان والقيادات
حبيبتي ... همه مش سذج للدرجه دي بدل ما تتعبي نفسك في غير ذي نفع شوفي اللي نازلين بكره وكل واحد عنده طلب يخدم اهدافه والكرسي اللي هيسرقه في لعبه الكراسي وسلميلي علي الميدان اصله وحشني لما كنا كلنا واحد

كيوبيد said...

كلام زى الفل وربنا يستر لانى مش مطمن وحاسس ان فيه حاجه هاتحصل بس الشباب هايعملو الى عليهم وربنا يستر ومنتصرين باذان الله

sum_1_ said...

أنا فلسطيني و والدتي مصرية و عاوز أنزل
أنزل ولا هيقولوا عليا مندس و واد أجندة؟؟

Mahmoud said...

نوارة
لو سمحتي اعملي بوست منفصل تحطي فيه الفقرة بتاعة الاستعدات التأمينية عشان يكون لافت للانتباه أكتر لأن كده تايه في زحمة الكلام الكتير

اقترح كمان يتعمل نقط إنذار مبكر من مسافات بعيدة عن الميدان عند كوبري 15 مايو وعند أول شارع باب اللوق وعند ميدان طلعت حرب وعند شارع رمسيس وعند أول كوبري الجلاء

الخوجة said...

#SCAF #May27 #Jan25 #Egypt #tahrirالجدع جدع والجبان جبان ..واحنا يا جدع ..راجعين للميدان

Mahmoud said...

عزيزي sum1
أنا رأيي تشتغل كنقطة انذار مبكر من خارج الميدان ولو شفت تحركات مريبة تبلغ اللي في الميدان لكن بدون أن تتواجد في الميدان

urnatatio said...

بصي انا ابتديت اقتنع ان المفروض الواحد يهدا لحد ما العسكر ينكلوا بالاخوان ويفشخوهم وبعدين نفضا للعسكر لوحدهم بدل ما ضهرنا مكشوف علي طول كده بسبب الاخوان

sasatifa said...

Mostafa Fares مع تحفظى على بعض الجمل بس أنا بحترم فكر نوارة نجم ومحدش ينكر انها شخصية محترمة
أنا مش نازل وشايف ان النزول غلط بس والله بتمنى من الله عزوجل وبدعى من كل قلبى ان بكره يعدى على خير وميحصلش حاجة للناس اللى نازلة ..أنا شايف ان النزول بكرة غلط بس خلاص اللى قرر انه هينزل هينزل ....امنى من الله ان مقال نوارة نجم كل الناس تنفذه ومتدوش فرصة لحد انه يعمل أى مشاكل وخليكم فى المطالب التوافقية بالله عليكم ......وربنا معاكم

felsamim said...

انت نازل ليه يوم 27؟

http://felsamim.wordpress.com/2011/05/25/%D8%A7%D9%86%D8%AA-%D9%86%D8%A7%D8%B2%D9%84-%D9%84%D9%8A%D9%87-%D9%8A%D9%88%D9%85-27-%D8%9F/

elsawraelarabia said...

بالنسبة لبكرة ..
المسألة كلها هتتوقف ع العدد اللى هينزل ، و موقفة من قيادة الجيش و ردود فعلة على تصرفاتها ..
يوم الجمعة 20 لما نزل عدد قليل جدا ، ما يجيش كام الف ، خطر فى بالى ان السلطات ممكن كاحتمال وارد جدا تعمل هجمة مضادة وقائية ضد الثوار ، على اعتبار ان اليوم دة كشف هزال السند وراء فكرة ثورة تانية ، و على اعتبار عدم الاستعداد للمقامرة و مواجهة يوم 27 اللى ممكن تحصل فية مفاجأت ..
الضربة الوقائية دى محصلتش ، و واضح ان قيادة الجيش هتستنى لبكرة و تشوف هيحصل اية فى الميدان .. اذا بكرة ( 27 ) برضة العدد كان قليل و باظت الحكاية ، ممكن قوى ساعتها يحصل هجوم حقيقى ( خلينا نلاحظ ان الاسبوع دة حصل هجوم وقائى استباقى فعلا ، بس بشكل ذكى و سياسى ، مش امنى و مش بالاعتقالات و هوة : احالة مبارك للجنايات ، احجام الاخوان المسلمين عن المشاركة فى الثورة التانية دى و اعتبارها من دعم و دعوة العلمانيين و الاقلية و الخارجين على الشرعية .. الخ ) .

لكن .. اذا حصل حشد كبير بكرة .. ممكن المجلس العسكرى يسيبهم فى الميدان .. يعتمد على حر الصيف و الشمس و الرطوبة ، يعتمد على ان الامتحانات قربت و ال " عيال " دى هتمشى قريب .. يعتمد على ان الناس ضجت منهم ، و ان كتير بيقولوا زهقنا و عاوزين نشوف اشغالنا و التلفزيون بيقول المجاعة و الافلاس و الخراب .. الخ .
لكن ممكن تحصل تنازلات مهمة برضة ..
( انا خطر فى بالى من كام يوم انى لو مكان المشير طنطاوى و عاوز اسحب البساط ـ و لو حتى مؤقتا ـ من تحت الثورة ، اعدم مبارك و رجالتة بشكل سريع جدا .. جايز الامريكان نفسهم يحبذوا او يقترحوا افكار زى دى .. انك تتقمص الثورية باكتر من عدوك ـ و لو ظاهريا ـ اسلوب ناجح للافلات من المواقف الحرجة احيانا .. العائق الوحيد مش شخصى ـ العيش و الملح مثلا ـ و لا حرج دولى ـ السعودية و الخليج مثلا ـ و انما الخوف ان دة هيجرنا ( السلطة الحاكمة ) لبعيد ، لابعد مما احنا عاوزين و هيجرأ الناس اكتر علينا و يخليهم يطالبوا باكتر و اكتر ) .
الشعب هيعمل اية لو حصل تجاهل من السلطة ـ من ناحية ـ او لو حصلت تنازلات ـ من ناحية تانية ـ بتتقدم لة فى نظير انة ينصرف .. هل هينخدع ؟

فية خلافات حول المطالب بتاعة بكرة .. لكن اللى انا شايفة اهم هوة انت بتطالب مين ؟ المجلس العسكرى ..
طب هوة ماعملش كدة من بدرى لية ؟ متباطئ ..
متباطئ لية ؟ قصر نظر و لا عجز عن التصرف و لا لانة ضد الثورة على طول الخط .
لو قلنا لانة مش ثورى و محتاج اننا نثورة كل شوية ( زى ما كام واحد خايب عامل فيها ثورجى قال ) او انة محتاج نسندة و ندعمة ضد الضغوط الداخلية و الخارجية او لانة مش سامع صوتنا و ما بيسمعش غير مليونيات و بس (!!!) يبقى قضينا على الثورة ـ سواء الاولى او التانية ..
لو قلنا لانة عدو للثورة على طول الخط ( زى مبارك بالضبط ) يبقى احنا بنتظاهر نطالبة لية .. و اية الضمانة لانة ينفذ اللى بيوعد بية او اللى احنا عاوزينة او انة ما يقضيش علينا اصلا لو اتيحت لة فرصة .
الاهم من البنود اللى مطروحة ، سواء المختلف عليها ، او المجمع عليها .. هوة سؤال : انت بتطالب المجلس باعتبارة " مجلس قيادة الثورة " و لا باعتبارة عدو هينفذلك مطالبك ( و اية اللى يخلية ينفذها !! ) ، و لا باعتبارة اية ؟!
الوعى بالمسألة دى تحديدا ، هيفرق كتير لو العدد بتاع بكرة كان كبير و الناس احتشدت و اعتصمت و احتلت الميدان من تانى ..
يمكن دا اساس كل شئ النهاردة : فهمنا لطبيعة المجلس العسكرى و دورة .
دة اللى هيحدد لنا موقفنا و رد فعلنا على تصرفاتة ، و هيبلور بالتالى مسار الثورة بعد كدة .

wael said...

هو اخر كلام فى موضوع مطالب بكرة اية يا نوارة؟؟؟
إن بكرة يعدى على خير ... او باقل الخسائر
طيب لية يا بنتي تذنقى نفسك فى الخشب؟؟؟؟
اعمل اية فى اللسان الفالت
قلتى جمعة قلة الادب .... يارب تيجى بس على قلة الادب

wael said...

هو اخر كلام فى موضوع مطالب بكرة اية يا نوارة؟؟؟
إن بكرة يعدى على خير ... او باقل الخسائر
طيب لية يا بنتي تذنقى نفسك فى الخشب؟؟؟؟
اعمل اية فى اللسان الفالت
قلتى جمعة قلة الادب .... يارب تيجى بس على قلة الادب

wael said...

هو اخر كلام فى موضوع مطالب بكرة اية يا نوارة؟؟؟
إن بكرة يعدى على خير ... او باقل الخسائر
طيب لية يا بنتي تذنقى نفسك فى الخشب؟؟؟؟
اعمل اية فى اللسان الفالت
قلتى جمعة قلة الادب .... يارب تيجى بس على قلة الادب

mostafa said...

استعداد انطلالالالاق على كل ميادين مصر

torero said...

ربنا معاكو ومع مصر
انا مش خايف على مصر طول ماهى مليانة بشباب زى الورد زيكوا و يمكن ربنا مش عاوز الاخوان ينزلوا عشان نعرف حجمهم الحقيقى و الشعب المصرى يعرف قوته و حجمه الحقيقى
صدقينى ربنا هو اللى بيدير الثورة دى ومش اى حاجة تانى
و ربنا هيتم نوره على مصر ولو كره الكافرون

محمد نبيل said...

ياريت الكل يلتزم بالتحذيرات دى وندعى كلنا من هنا لبكرة ربنا يعدى بكرة على خير، ويجعل كيد من يريد افساد هذا اليوم فى نحره.

hassn hamdi said...

محدش سأل نفسه يعني ايه ان الجيش مش هيحمي الميدان وهيكتفي "بتأمين المنشآت الحيوية"؟ منشآت ايه بالضبط؟ غرفة عمليات القوات المسلحة مثلا؟ مجلس الشعب مثلا؟ مبنى الاذاغة والتلفزيون مثلا؟
حاولوا تقروا البيان تاني وخلوا بالكم من اللي بين السطور
يا مسهل

أبو هاجر said...

الجيش مش نازل و الإخوان مش نازلين

بالمختصر المفيد و من الآخر و على بلاطة، عقد القران تم ياالنوارة، والمأذون ماما أمريكا يا النوارة .لكن أمريكا متوزعش شاربات هي توزع جوني ولكر و الإخوان مالهمش فيه. معنى ذلك لازم حل وسط ولا يجدون أحسن من جماعة الوسطية أمثال أبو العلا ماضي يبقى شيء واحد الزغاريد، هذه ساهلة يتكفل بها إخوانا السلفييين.

أبو يوسف said...

سلام الله عليكم ورحمته وبركاته
يا أستاذة نوارة:- فين مقال بلال فضل؟وكذلك نريد النزول من الآن إلي ميدان التحرير حتى يتم التنسيق والإعداد الجيد للغد إن شاءالله وعاوزين ناس تسجل الكشوف وتحدد مهام كل فرد من الآن وحتى الغد؛وأن يكون كل منا رقيب على الآخر بحذر ودن شك أوانتقاص من قدر الغير أوالتقليل من وطنية الآخر ولكن يجب على الجميع تفهم الموقف وتقدير المحنة؛ثالثاً أنا منتظر أشوف البرنامج وأقوم أنزل وأنا أمامي مشوار طويل على ما أوصل لميدان التحرير.

emi_80 said...

نواره مين هيصلي بينا الجمعه ياريت تنسقى او اي حد علشان مننساش بس صفوت اللي كان بيصلي بينا او محمد جبريل شوفي مين هيكون بدالهم

mahmoud said...

من ناحية عمر موسي انا حاسس انه مترتب انه الاقرب للحكم وكان من فترة في حديث قال فيه الاخوان قوة لايستهان بيها وماكانش مبسوط وهو بيقول كدة وانا جالي احساس انها اطبخت مع المجلس العسكري الرئيس موسي وامتيازات للاخوان مهمة بس الاحساس ده اتغير سنة لما لقيت البرادعي بيصلح كلامه مع الاخوان وبياكد علي المرجعية الاسلامية لمصر مما يدل انه عنده امل ويمكن فرصة بس انا شايف ان الاخوان بيعتبروا نفسهم قوة كبيرة هي الاقوي ويجب ان تقود من حولها نحو المجتمع الاسلامي الذين يؤمنون به لا ان يكونوا مجرد جزء عادي من مجتمع تسيطر عليه ديموقراطية العلمانيين مع عدم الاهانة لذلك استكمال تحالفهم مع القوي الوطنية سيجعلهم مضطرين ان يكونوا جزء عادي من الكيان السياسي يقبلوا بما ينالوه من امتيازات ويتركوا باقي القوي لتشارك في الحكم ولكن ما لا افهمه ويدعم نظريتك يانوارة انه لماذا يسلم المجلس العسكري وبموافقة الغرب ومتابعتهم البلد كلها لجماعة اسلامية وياخذوا هذه المخاطرة بدل من ان يصنعوا ديموقراطية يحكم فيها الكل من مختلف الوان الطيف السياسي واذا كانت مؤامرة وانا لم اصل لتفصيلها وماهيتها فهل الاخوان ككيان منظم صمد كل هذه العقود لم يجاوب علي هذه الاسئلة عموما انا احب حلمهم الاسلامي ان كانوا صادقين وائتمن علي نفسي تحت حكمهم علي الاقل سيصان اعراض الناس وكرامتهم في ظل اخلاق الاسلام انا شايف يانوارة اننا نتفاهم معاهم ونتواصل معاهم ونتحالف معاهم حتي لو مختلفين في الافكار لاننا في مركب واحد بيحركها المجرمين في الداخلية وفي النظام وفي الخارج عشان يقلبوها والاتحاد قوة والخلاف علي طريقة صنع الدولة الجديدة يكون ودي ويكون لما تبقي بتاعتنا رسمي وحتي ذلك الحين كل القوي السياسية بمن فيهم الاخوان ايد واحدة

mahmoud said...

انا سمعت كلامك وقريت مقال بلال فضل بتمعن وبعديه كلامك ياريت تقري التعليق بتاعي اللي فات ومعلش عشان طوله وهو مش عن عمر موسي بس ارجو انك تقريه وشكرا يانوارة وجزاكي الله خير

negmat lail said...

و الله كلام زي الفل ..نفسي يتم تطهير القضاء و الاعلام والداخلية ومقالات نوارة من الشتيمة

Wardaya said...

نوارة انتي مقتنعة بلي مكتوب في الصورة الحمرااا طيب يا ريت بقى انتي الي تقرئي البوست ده عشان تشوفي سهولة الالتفاف على مطالب الثورة و انكو ممكن تتفشخو http://ahmedsaed.blogspot.com/2011/05/blog-post_26.html

القلم said...

اومال البيه اللى اسمه احمد سعيد ده عمال يقول كلام غيركم تماما وبيقول ان الطلبات دى معموله بس علشان الناس تنزل وانكم مش هتمشوا وهيكون فيه اعتصام مفتوح وطبعا المجلس العسكرى مش هيقدر ينفذالطلبات دى فالحل هيكون هو المناداه بإسقاطه وبكده يمون المطلب الحقيقى اتنفذ........... الكلام ده مكتوب على المدونه دى النهارده وبتاريخ 22/5 http://ahmedsaed.blogspot.com/

gogo said...

ايه ماسورة المنشورات اللى انفجرت ف البلد اوعوا تنزلوا الفتنه العلمانيين الشيوعيين المسيحيين .. وانا مش نازل يوم 27 علشان 15 سبب بدأوها بلأن البلد على حافة الانهيار ونهوها بثوره على من الجيش ام الشعب .. وانا قاعده ف البيت ف حالى علشان الحر ده الاقى كل ماحد ينزل ويرجع البيت يسلمنى منشور جديد ... هو فيه ايه حاجه مسخره والله بيعيدوا فيلم الاستفتاء بالنص شفت والله ورقه مكتوب عليها نعم كبيره وعلامة صح للجيش وحاجات غريبه يظهر كانت عندهم من ايام الاستفتا وطلعوها يستعملوها تانى .... لا وكملت بخبر الكنيسه تدعو اتباعها للنزول غدا .. ياجدعان الفيلم ده شوفناه قبل كده....... مقال بلال فضل ده عينه من التعليقات اللى عليه ...المسيحيين والعلمانيين بكره نازلين عشان يلغوا الدستور وبعد كدا يمارسوا البلطجه علينا زي مابيعملوا دلوقتي عشان يلغوا التشريع الاسلامي من مصر وتبقي دوله بزرميط المسيحي يتجوز مسلمه والشواذ ينتشروا في البلد ومفيش قوانين المواريث والدعاره بالقانون واهم حاجه المسيحي يبقي رئيس مصر

Mohammed said...

اخطارجمعة الغضب الثانية

1- تسميتها باسم ثورة الغضب الثانية وتذكير الناس بالمواجهات الدموية والضحايا يزرع التحفز عند الطرفين
2- وضع الجيش والشعب في مواجهة وليس شركاء كما يفترض ان يكون
3- انضمام البلطجية الجاهزين للانضمام لاي شيء من شانه تخريب البلد وتوسيع الفجوة بين السلطة والشعب كما حدث عند الكنائس وعند السفارة
4- انضمام اتباع عمر عفيفي المخبول والموتورين لاغراض شخصية بينهم وبين المشير
5- الانجرار الى مخطط مبارك للايقاع بين الجيش والشعب
6- اتساع الفجوة بين الجيش والشعب
7- في حالة فشل اليوم ستكون مشكلة ايضا فان الجيش سيغر في نفسه ويعتقد ان الشعب موافق على كل اخطاؤه وتباطؤه
8- في حالة فشل اليوم ستنقلب البرامج الى مناحة ان الاخوان والسلفيين سيطروا على البلد وهذا غير صحيح لان جموع كبيرة من الشعب مش موافقة على النزول وللاسف سيزداد الرعب من الاخوان وهو ليس حقيقيا ولكنه في مصلحة الاخوان بالطبع فهم مستفيدين من تضخيم صورتهم وقوتهم من المرتعشين
9- ماذا ينتظر المحتجون لكي تكون النهاية سعيدة او ماذا يتوقعون
ان يخرج الجيش ويعد الناس بتلبية المطالب
وهل سيصدق المحتجون هذا الكلام
بالطبع لا
سيقولون ان هذا التفاف وكذب

وبالتالي سيتمسك معظم المحتجون بالبقاء والاعتصام حتى تحقيق المظالم
وسندخل في نفق مظلم لا نعرف نهايته


تعليقات اخرى

لماذا لا يتحاور الناشطون مع الجيش هل رفض الجيش اي دعوة للنقاش
لا اظن

لماذا نتحاور مع بعض ولا ننقل حوارنا مباشرة الى الجيش وهو على استعداد

2- لن يخرج مبارك ام نحن نكذب الكذبة ونصدقها

3- طبيعة المحاكمات والقضايا وثغرات القانون ان تكون بهذا البطء

4- لماذا لم تذهب مظاهرة صغيرة الى سفارة اسرائيل وترفع اعلام فلسطين وتهتف وتصور بالاعلام والقنوات ثم تحرق علم اسرائيل أليس هذا أفضل من التجمهر والغوغائية واندساس البلطجية ومحاولة التصادم من البعض وطلب تنكيس العلم ثم المواجهة وهي سفارة لدولة لها علاقات رسمية مع مصر حتى الان بغض النظر عن اي شيء

5- اما عمرو موسى وبقايا الوطني والاخوان فهم كالتلميذ الشاطر اللي جاي مذاكر وقاعد في اول دكة بيرفع ايده ويجاوب والناس تصقفله
واحنا قاعدين نتخانق مع بعض ورا

6- بعد 3 شهور في امتحان الانتخابات شوفوا احنا انشغلنا بايه ومين بقى اللي هيكسب
اللي هيكسب هو اللي ذاكر كويس وجاي بدري

7- لماذا يخاطب الجيش دائما كمتهم و كخصم وليس كشريك

8- الجيش شريك وليس خصم
ثائر وليس موظف

والدلائل

الجيش هو من اجبر مبارك على التنحي
هو من اجرى المصالحة الفلسطينية
هو من فتح معبر رفح
هو من كظم غيظه ولم يعلن شهداؤه اثناء الثورة حتى لا يتهيج افراده في اعلى درجة من درجات ضبط النفس
هو من فجر انبوب الغاز المتجه لاسرائيل
يستجيب لضغط الشارع ليس كالنظام السابق

ربنا يهدينا جميعا

ربنا يستر

hardway said...

اللحاف ده ؟أتغطي به ؟أنت و بلال بتاعك
أخوان..لا..تكتبي ازرق..احمر..أخوان لا..
وشغلانة الاخوان الشباب والعواجيز والكلام
العبيط ده مش مع الاخوان با حاجة......
ده يمشي مع أئتلاف الثورة ..ينفع مع 6 أبريل.. راجعي نفسك شوية بلاش هرتله ؟أخر حاجة...
نوارة العادلي...
ايه الشغل العالي ده في التخطيط و كيفية أدارة التجمعات والمظاهرات....؟أنت تعلمت ده من أمن دولة..أنت مرشدة ؟؟
أنت هتعصري الشرطة وتنزلي عساكرصغيرة
طب خلي بالك من الـلـبـاس

hardway said...

اللحاف ده ؟أتغطي به ؟أنت و بلال بتاعك
أخوان..لا..تكتبي ازرق..احمر..أخوان لا..
وشغلانة الاخوان الشباب والعواجيز والكلام
العبيط ده مش مع الاخوان با حاجة......
ده يمشي مع أئتلاف الثورة ..ينفع مع 6 أبريل.. راجعي نفسك شوية بلاش هرتله ؟أخر حاجة...
نوارة العادلي...
ايه الشغل العالي ده في التخطيط و كيفية أدارة التجمعات والمظاهرات....؟أنت تعلمت ده من أمن دولة..أنت مرشدة ؟؟
أنت هتعصري الشرطة وتنزلي عساكرصغيرة
طب خلي بالك من الـلـبـاس

محمد نبيل said...

البيان مريب وحاسس انهم مرقدين لنا على حاجة بكرة.

AhmeD 3llaM said...

طز في الاخوان
وتحيا مصر
نواره قولي يارب
فين يارب بتاعت كل مره
ياااااااااااااااااااارب

Beroz said...

Nawara... de hate3gebek awi http://www.youtube.com/watch?v=xQnZHAT-K3A&feature=share

AhmeD 3llaM said...

السلفيين يرونها
مظاهرات الكفار في ميدان الجاهليه
مفيش حد عارف ياخدني في صفه ابدا كل ما افكر في الاخوان الاقيها ماشي مع واحد
ابص للسلفيين القيها ماشيه مع مملكه

طب اعمل ايه بقي محدش عدل في البلد دي

نور الدين said...

الله ينور عليكي ..الله ينور عليكي يا نواره ريحتيلي قلبي انا كنت حاطط ايدي علي قلبي من اللي ممكن يحصل في التحرير بكره....انا وكل اصحابي في اسكندريه كنا في حالة قلق رهيبة من اللي ممكن يحصل بكره...مع اننا طالعين طبعا في اسكندريه ...بس قلقي كان علي التحرير عشان هي اللوحه الكبيره اللي لو حد حب يبوظ المعرض بتعنا يقطعها .....كده انا اطمنت شويه والراحه كلها تيجي بكره ان شاء الله بعد النجاح وتحقيق المطالب...المهم تكون سلميه ...ورساله اخيره (((خلي بالكوا يا قاهرويه ان الاسكندرانيه عددهم بكره حيبقي اكتر منكم وحتبقي سلميه ان شاء الله ...تابعونا))))اهم حاجه تحفظوا علي السلميه ...يارب استر....

عبده مكيافيلي said...

يا ريت كل واحد عنده كاميرا أتش دي يجبها بكرة علشان تصوروا أى لبش بوضوح (HD Camera) علشان تساعد لو حاجة حصلت

شمس العصارى said...

مخفناش 28/1 ولا 1/2 ولا 2/2 ولا 3/2 ولا ايام اللى بعدها
يبقى اكيد بكره مش خايفين
انا عارف الفرق بين الوضع ده واللى فات
وعارف ان الموضوع بكره اعصاب ولازم الكل يضبط نفسه
لكن ربنا يسهل ويستر
طول ما النية للخير ولمصر ربنا بيوفق
ونلتقى بعد المجلس العسكرى

btkhekhaweaykalamtoz said...

نوارة منك لله

nosseir73 said...

ربنا يستر ويعديها على خير
يارب يارب يارب انقذ مصر من المكايد والفتن ضرورى الكل يفتكر ان الكل مصريين وكل مصري يضع مصلحة مصر نصب عينيه و لو صدقت هذه النية لن يحدث شئ غدا بل بالعكس ستنجح وسيتم الاستجابة لجميع المطالب

Adb El-Hameed Riad said...

الاخوان متامريين والمجلس الاعلى متامر والدكتور محمد سليم العوا متامر والمستشار البشرى متامر وكل السياسيين الى دعوا لمقاطعه ميدان التحرير بكره متامريين وبتكررى نفس الكلام بتاع الجيش هيقلب على الاخوان بعديين وانه عايز دكتاتوريه جديده . طيب المجلس ده 36 واحد هيتفق ازاى على ديكتاتور جديد .طيب منفسرها بشكل تانى ان الى دعوا لمليونيه بكره هما الى متامريين وعايزيين يفرضوا رايهم على الشعب كله و بيخفوا مطالبهم الاساسيه بمطالب شكلها حلو ولطيف

om said...

ربنا يهديكم فعلا
بتحاولى تبينى إن الإخوان بس هما إللى رافضين ينزلوا!! مع إنى بعتلك كذا مرة بالدليل إن أكتر من 12 ائتلاف من شباب الثورة رافضين النزول، و من ضمنهم تنسيقية الثورة إللى هى لمة غالبية الائتلافات الثورية أساسا!! و رغم كدة برضه الكدب فى دمكم إنتوا و تتهموا بيه غيركم؟؟ {{{كل دول: جماعة الإخوان المسلمين , وائتلاف ثورة مصر الحرة , وتحالف ثوار مصر , وائتلاف الوعي المصري , ولجنة الإغاثة الميدانية , والجماعة الإسلامية , وحزب شباب التحرير, واللجنة التنسيقية للثورة , وجمعية محبي مصر السلام , ومجلس أمناء الثورة ويمثله د. هاني حنا , وائتلاف العاملين بالدولة , والدكتور مظهر شاهين خطيب الثورة}}}

كل دول يا مفتريين و مش شايفين غير بس الإخوان!!! دة غير بعض الأفراد المستقلة و إللى أنا منهم و ناس على مدونتك هنا قدام عنيكى، لكن برضه مش شايفين غير الإخوان!! أوام نسيتوا المعروف و العشرة فى الميدان؟؟ أوام المخلص خليتوه خاين و مصلحجى !!؟؟ إبه كفران العشير دة؟؟ دة النبى بيقول ما معناه "لا يغضب زوج من زوجته، فإن كره منها خُلُقًا رضى منها خُلُقًا آخر".. و كذلك إحنا كإخوات مع بعض لو اعترضنا على حاجة حد منا بيعملها لازم ندور على الحاجات الكويسة إللى بيعملها عشن نكون منصفين، مش نرمى بعض فى الزبالة عند كل مفترق طرق.. دة الظلم ظلمات يوم القيامة..

و طالما الإخوان -كما تزعمون أنتم- هما الوحيدين بس إللى رافضين ينزلوا لكن الشعب كله معاكم، خايفين من إيه؟؟ ما أكيد عدد بقية الشعب بالإضافة إلى عددكم هيعوض غياب الإخوان؟؟ لكن طبعا مش هى دى الحقيقة لإن الغالبية العظمى بالإضافة إلى الإخوان رافضين إللى إنتوا بتعملوه دة.. دة كفاية تسمية النزول ثورة الغضب الثانية عشن محدش ينزل.. إيه الهرتلة دى؟؟دة بلال فضل نفسه معترض على التسمية!!و جايين دلوقتى و قبل النزول بيوم تغيروا المنشورات و تشيلوا منها مطلب المجلس الرئاسى و الدستور الجديد، طب ما كنتوا تعملوا كدة من الأول و تثبتوا لكل الناس إللى رافضة تنزل معاكم إنكم متفقين سوا وياهم على نفس المطالب إللى هما مستعدين ينزلوا عشانها دايما و هما كانوا هينزلوا معاكم؟؟ ما هما رغم إنهم مش نازلين إلا إنهم أعلنوا استمرار مطالبتهم بكل المطالب إللى إنتوا كاتبينها فى المنشور الأحمر بتاعكم دة.. حاجة عجيبة جدا بجد!! لأ مطلعين إنتوا إللى مش هينزل كإن الطلبات دى ما تهموش لإنه مظبط نفسه خلاص مع الجيش على مصالحه الشخصية!! منتهى الاستهتار بالحقائق و عدم التحرى قبل إصدرا التهم ... من إمتى الإخوان أو باقى الائتلافات الثورية بيرفضوا ينزلوا و يتضامنوا مع الشعب إللى هما منه؟ من إمتى؟ هو كمان الشيخ مظهر شاهين خطيب التحرير مظبط مصلحته مع الجيش صح؟ و سليم العوا كمان أكيد ضمن مكاسب سياسية عشان كدة مش موافق على النزول؟؟ منتهى الظلم و الإجحاف و الانتقاص من الآخرين و الشعور بالأنا و عدم الاكتراث بالرأى الآخر المخالف .. ربنا يهديكم
و بدعى ربنا إنكم ما تتعرضوش لأذية طبعا بكرة فى المدان ، لكن فى نفس الوقت بدعى ربنا إنه يعلمكم درس بكرة يحط الحقائق قدام عنيكم كدة واضحة كدة عشن تبطلوا تفتروا على الناس، لكن طبعا أسأل الله ألا يمكن أحدا منكم بسوء نتيجة لعنادكم و تكبركم.. و ليغفر الله لكم و يكفينا شر المتهورين و الحاقدين و الظالمين و المفترين..

om said...

أحب أضيف قائمة جديدة للرافضين لجمعة 27:
1- الدكتور صفوت حجازي عضو مجلس أمناء الثورة (غنى عن التعريف و وطنيته و إخلاصه كمان.. و اللا دة كمان هتقوله عليه مضبط مصالح مع المجلس العسكرى؟!!
2- شباب ائتلاف الثورة بمحافظتي الدقهلية وأسيوط
3- حزب المصريين الأحرار (نجيب ساويرس)
4-حزب الوسط
5- حزب السلامة والتنمية
6-عدد من القضاة وخبراء القانون

لو زودناهم على دول:
7-جماعة الإخوان المسلمين
8-ائتلاف ثورة مصر الحرة
9-تحالف ثوار مصر
10-ائتلاف الوعي المصري
11-لجنة الإغاثة الميدانية
12-الجماعة الإسلامية
13-حزب شباب التحرير
14-اللجنة التنسيقية للثورة
15-جمعية محبي مصر السلام
16-مجلس أمناء الثورة ويمثله د.هاني حنا
17-ائتلاف العاملين بالدولة
18-والدكتور مظهر شاهين خطيب الثورة
19-الدكتور سليم العوا

يا ترى كل دول استندلوا و ليهم مصالح متظبطة مع الجيش و مستفين نفسهم و مية مية واللا هما بس الإخوان إللى مش نازلين من الزور و نواياهم خبيثة!!
أوصيكم بتقوى الله و بلاش طفولة.. اعقلوا و اكبروا بقى خليكم على قد مسئولية مصر..

om said...

نسيت أضيف -على قائمة الرافضين للجمعة- الرافض رقم 20:
20- بالإصافة إلى لجنة الحريات بالنقابة العامة للمحامين.. و ممكن تقروا بيانهم الجميل هنا
http://www.ikhwanonline.com/new/Article.aspx?ArtID=85012&SecID=230

Adb El-Hameed Riad said...

ده سبب ان انا مش مرتاح لبكره بالذات وحاسس ان فى انقلاب مدنى بيتدبر

http://www.crisisgroup.org/en/about/~/link.aspx?_id=007F025EA86D4399B7F8C7BEB488046E&_z=z

حسن محمد على said...

النزول الى الميادين فرض عين للمصريين جميعا مهما كانت معتقداتهم او اتجاهتهم الفكرية او الحزبية,وذلك لحماية الثورة -السلمية المدنية -من رافضيها واعدائها سواء بسواء ثم أن الجيش لن يحمى التظاهرة ف بنقولة شكر اللة سعيك

متفائل said...

احنا بقى... بيقولوا لنا: يالا احموا البلد يا شاطرين.. هاه؟ نقدر نحميها ولا ما نقدرش؟
نقدر ولا ما نقدرش؟

بصراحة أنا ماشفتش في حياتي واحدة زيك بهذه القدرة على الإستعباط والتلكيك وقلب الحقائق .. وكما قال عمنا صلاح جاهين : علم اللوع أضخم كتاب في الأرض بس اللي يغلط فيه يجيبه الأرض .. سامعه ؟ يجيبه الأرض .. وهي النهاية التي أتوقعها لك .. الناس في رسالتهم للشعب إتكلموا عن (التنظيم والتأمين) وهما أليتان خاصتان بالتظاهر وبتجمع عدد كبير من البشر في مكان واحد .. ماحدش جاب سيرة (حماية البلد) أنهي بلد دي اللي حتحموها ؟ ومن مين ؟ ثم أيه علاقة تواجد شلة مجانين زيكوا في ميدان التحرير بحماية البلد ؟ هل سيحدث مثلاً هجوم مريخي على ميدان التحرير وستحمونه أنتم ؟ أيه الهيستريا دي ؟أيه الهلاوس دي ؟ أيه الخداع ده ؟ وبعدين قاعدة تجعري وتقولي على الله الشرطة تهوب ناحيتنا .. على الله البلطجية يهوبوا ناحيتنا .. هو (شكل للبيع) وخلاص ؟ عاملة زي البلطجي السكران اللي وقف في نص الحارة وقعد يجعر : يا حارة وسخة .. يالي مافكيش راجل .. الجدع ينزللي ... وبعدين لما حد ينزل يرنه علقة سخنه يقعد يعيط ويملأ الدنيا صراخاً عن القوى الشريرة التي تتربص بالثورة وشباب الثورة .. أقترح أن يكون إعتصامكم في الخانكة مش في التحرير

الشبكة المستقلة said...

لازم نرد على النتن هوهو دة
http://www.youtube.com/watch?v=_gwJ0WW_yCg
ما تنسوش لانهم بيقولوا انهم من حرضوا على الثورة في مصر و لازم يترد على الكلام دة و بقوة
و الله الموفق و المستعان

decentman32 said...

اولا لو جبنا مجلس رئاسى مش هيقعد شهر لان المجلس الاعلى هيعمل الدستور الاول يعنى هيقعد اكتر من شهر تسعة و لا حتى هيمشى السنة دى و ياريت تفكرى يا اخت نوارة كويس قبل ما يروح الوقت و تيجى بعد كده تقولى راح وقته و ماتقوليش الشعب يعمل لانك انتى و غيرك و كل المفكرين بتوجهوا الشعب و عليكم مسئولية تبقوا فايقين و قاريين المستقبل و عاملين خطط و الا ماتتكلموش اصلا او تتكلموا و تتحملوا نتيجة ضياع الثورة. ثانيا ياريت حضرتك او بلال فضل او اى حد بيفهم يفهمنى حاجة واحدة. هوه مش المجلش الاعلى اعترف ان مبارك امر بقتل شعبه طيب كان بيشكره ليه فى بيانه الثالث على ما قدمه للوطن؟؟؟؟؟؟؟؟؟؟ و على فكرة بيقول عليه الرئيس مش الرئيس السابق. ارجوكى تقرى الموقف و الواقع كويس بدون حب و حنان على اى جهة. لان لو قلنا المجلس الاعلى لو وقع البلد هتقع يبقى بنفس المنطق نقول ان الثورة لو وقعت المستقبل كله هيقع. يبقى لو قريتيه كويس و بعيد عن اى تهويل او خوف من وقعان البلد و لقيتى ان الثورة بتقع يبقى مصر تقع دلوقتى احسن ما مستقبلها كله يقع. اسف لانى لا استطيع الاقتناع بالحلول الوسط فى الثورات. فالحق حق و الباطل باطل. شكراااا

طبيب بيطري said...

ياريت تعرفي انتي وبلال ان الغلط منكم ولو اليوم بكره حصل فيه حاجة هيبقي منكم لله
عشان سبتوا شوية متخلفين يعملوا ايفنت غبي بيقول مجلس رئاسي والدستور دلوقتي وانتخابات في الجيش
وجاية دلوقتي تقولوا المطالب الصح قبل ساعات من الخروج
اتقوا الله خلتونا نهاجم اليوم بناء علي المطالب الزبالة اللي كانت بتقول بالمفتشر احنا متامرين
جايين دلوقتي وتقولوا كدا
كنتوا فين من اسبوع
حرام عليكم ياظلمة
ليه محدش اتكلم ووضح من اول يوم
ربنا يستر بكره

lastcrazyboys said...

لييه هنــزل بكـــرة

amal said...

يا حبيبتى يا نوارة كلامك ده كركبلى بطنى ده احنا بنتقوا بيكم ما تخافيش ماضاع حق ورائة مطالب , وربنا وعد ووعده حق ,لانصرنكم ولو بعد حين , وقال ايضا ان ينصركم الله فلا غالب لكم , ربنا يحميكم وينصركم ويبعد عنكم اولاد الحرام وان شاء الله منصورين .وماتنسوش الدعاء " اللهم نجعلك فى نحورهم , ونعوذ بك من شرورهم " " اللهم اعنا ولا تعن علينا " اللهم اكفينيهم بما شئت وكيف شئت انك على ما تشاء قدير " ربنا يحفظكم واستودعكم الله ,

أبو الهول said...

نوارة انت بنت جدعة

أبو الهول said...

انت بنت جدعة قوي

حسين العسقلاني said...

والله العظيم عيب اللي انت كاتبها ده يا ست نواره

hosseiny shatat said...

ياخسارتك يانواره

hosseiny shatat said...

ياخسارتك يانواره كنت فاكر رأيك من دماغك طلع من دماغ بلال