Sunday, 8 May 2011

خلصونا بقى من الحكاية دي عشان كده مش كويس

السلام على من اتبع الهدى
مطلوب فورا السيطرة على اللي بيحصل... اذا كان فيه رغبة في السيطرة اساسا
السيطرة على اللي بيحصل سهلة وتتحل بالكبارات
اولا: من فترة وفيه شحن مفاجئ طائفي على الكنيسة... وكده ما يصحش، ما يصحش ابدا، اه... الكنيسة عملت كام حركة قرعة ايام اعتصام ماسبيرو، لكن ما انتوا جبتوهم وعرفتوهم غلطهم، لزومه ايه التنكيل؟ الناس سمعت الكلام ولمت الليلة، مافيش ما يدعوا لاستغلال اطراف اخرى لتخويفهم، هم بيسمعوا الكلام وقتي
زي ما مشايخ السلفية بيسمعوا الكلام وقتي برضه، وتقدروا تجيبوهم - زي ما جيبتوا غيرهم - وتقولوا لهم خلصوا... موضوع الحريم ده ما يتفتحش تاني، والشحن على الكنيسة يتوقف فورا
وانا مش عارفة لحد امتى حيفضل يتحكم في البلد دي كبارات الدين اللي بيلعبوا شطرنج. بس اهو نصيبنا.. ده شعبنا وطول عمره ماشي ورا الكاهن، حنرميه يعني؟ 
انا باوجه كلامي دلوقت للجيش، لإني للاسف في النقطة دي مش حاعرف اوجه كلامي للناس، الناس في مصر هم كده، من سبعتلاف سنة وهم كده، ومافيش حد خالي العيوب يا قصب، كعب اخيلوس بتاع المصري انه ماشي ورا الكاهن، نعمل له ايه؟ نقتله؟ 
مافيش غير ان الجيش يستدعي الكهنة من الجانبين ويقولهم لايموها.. وحيلايموها، عشان طول عمر كهان مصر بيسمعوا الكلام عادي، مدام حشيت لهم بطنهم كويس
ثانيا: العيال اللي عند السفارة الامريكية دلوقت حد يروح يلمهم فورا.. ومش حيسمعوا كلام حد مسلم، يعني صفوت حجازي مافيش داعي يروح يشحطط نفسه، ردود افعالهم مش مضمونة. برضه الجيش يكلم الكنيسة ويقولهم لموا العيال دي. وحيتلموا
ثالثا: اجتماع عاجل بقى.. سري بقى ولا علني زي ما تحبوا
يجيبوا فيه مشايخ السلفية، وقساوسة الكنيسة. ويخلصوا الموضوع. والجيش يحمر عينه عليهم. والوحيد اللي يقدر يحل الموضوع ده هو الجيش. 
شيخ سلفي اهل ثقة يطلع يقول للناس: ايديكوا شفتوا كاميليا.. وطلعت مسيحية. اقفلوا على السيرة دي. وحيقفلوا عليها.
قسيس اهل ثقة يطلع يقول للعيال اللي جاية في اتوبيسات دلوقت وطالعة على امبابة: بيتك بيتك. مافيش مظاهرات طائفية. 
الطرفين حيحاولوا يتمرقعوا ويقولوا مالناش سيطرة على الشباب المتحمس!!!! لا... حمروا عينيكم بقى.. حمروها قوي، اخر ما عندكم يعني
الكام عيل اللي اتقبض عليهم يطبق عليهم عقوبات مشددة. 
وزي ما كلمتوا الكنيسة كده وقلتوا لهم موضوع المادة التانية ده ما يتفتحش تاني، كلموا برضه مشايخ السلفية وقولوا لهم موضوع الحريم ده ما يتفتحش تاني.
رابعا: ما قلنا اللعب ده مش حلو.. وبيجيب ضرف اي حاجة.. ليه كده؟ ليه؟ ماحدش بيتعظ ليه؟ ده مبارك شنق نفسه بالحبل اللي فضل يلعب بيه ده... ماحدش يمد ايده على الحبل ده.. الحبل ده يتساب في مكانه كده. 
خامسا:
الساعة اربعة فيه وقفة وحدة وطنية عند دار القضاء العالي. ده اخرنا نقدر نساعدكم بيه. بس ايدكم معانا يعني. 
الوقفة دي لزمن ولابد ييجي فيها سلفيين.... كتيييير... كتير. عشان الموضوع ده يخلص. والا بقى كل واحد لا يلومن الا نفسه. 
سادسا:
عيب يعني لما الجيش ما يبقاش عارف يسيطر على التدخل الامريكي السعودي. فيه ستميت حاجة تتعمل عشان يلموا ديلهم... او صارحونا لو مش عارفين تتصرفوا واحنا نتصرف بقى معاهم.
سابعا:
ايه حكاية احكام عرفية دي اللي فيه ناس متسلطة تطلع تقولها في التلفزيون؟ هي بقت كده؟ ماحدش يوصل الامور معانا لكده.... يا اما بقى خالتي وخالتك واتفرقوا الخالات
شكرا لساعي البريد.. اللي على الله يوصل الكلام ده
مافيش قلبين وسهم
فيه وش زعلان وبيعيط
ووش غضبان واحمر وبيطلع دخان من ودانه

62 comments:

محب روفائيل said...

http://mo7eb-rofail.blogspot.com/2011/05/blog-post_08.html
السلفيون - الأقباط - الجيش - الشرطة - المسلمون - الخسائر - التليفزيون المصرى - والعصر الجاهلى

http://mo7eb-rofail.blogspot.com/2011/05/blog-post_5556.html
يا بابا شنودة ، لا تصالح !!

آسف يا نوارة ، دول مش مجرد عيال ، دول أبطال

سعد بن أبي وقاص said...

كدا تأجيل للحلول و لإبقاء للنار تحت الرماد
نفس أسلوب تبويس اللحى و خلاص !

الحل أن يكون فيه حلول واضحة و نهائية

-كاميليا تروح أمام القاضي مش تطلع بمزاج اللي بيطلعها و تختفي بمزاج اللي بيخفيها. كاميليا ورقة بيتلعب بيها و لازم لازم لازم تنتهي

- ائتلاف دعم المسلمين الجدد يتحقق مع أعضاؤه و لو فيهم عملاء يتحاكموا

- موضوع السلاح في الكنيسة ظهر أنه مش إشاعة, لازم الكنائس تتفتش الموضوع دا محسوم

- المجلس العسكري ياخد قرارات رادعة في أي أحداث طائفية.

- لازم الكنيسة تطلع و ترفض الإعتصام و الإستقواء بالخارج سكوتهم على اللي بيقولوا نجيب جبرائيل دا معناه انهم موافقين عليه و بيدعموه

Medhat Nabawi said...

لابد من الرد السريع من المجلس العسكري على ذلك

Medhat Nabawi said...

لابد من الرد السريع من المجلس العسكري على ذلك ويفهمنا ليه ساكت

Ali EL Banna said...

انا مش موافق ان الدولة تقعد مع حد
القانون يطبق على الكل و اللي يخالف يطلع ميتين أمه وقتي بقى اهوه

Medhat Nabawi said...

في حاجات فعلا مش مفهومة من المجلس العسكري ولازم يوضحها

كيوبيد said...

هههههههههههههههههه ضحكتنى فى عز ماانا مجروح على الله كلامك يوصل بس اسمح لى اقولك بيت الشعر الشهير (لقد اسمعت لو ناديت حيا ولكن لاحياة لمن تناد *** ولو نارا نفخت بها اضاءت ولكنك تنفخ فى رماد)المشكلة ان الاخوة السلف عقلهم مقفول بقفل مصدى مش عايز يسمع وعلشان مش تقولى انى طائفى وابن كلب زى ما قولت لك الف مليون مره قبل كده دول لان يتغيرو دول القاموس عندهم خالى من الرحمه والتسامح فيه بس كل عنف وضرب وفرض الدين بالقوة والاخوان نسخه محدثه منهم بردو ما العن من سيدى الا سيدتى وعلى الله المجلس العسكرى يسمع كلامك وفعلا نلقى عين حمرا ضد ها الكلام الى لا يقره شرع ولا دين وربنا يستر على مصر وعلى اهل مصر وسلام غالى والنبى لعم احمد

متفائل said...

أيه حكاية احكام عرفية دي اللي فيه ناس متسلطة تطلع تقولها في التلفزيون؟ هي بقت كده؟ ماحدش يوصل الامور معانا لكده.... يا اما بقى خالتي وخالتك واتفرقوا الخالات

بالعكس بقى .. أنا شايف إن ده الحل الوحيد عشان الناس تتلم .. سيبي الجيش يشوف شغله ويعمل الصح وعموماً الجيش والشعب أيد واحدة يعني الجيش عمره ما حيخون الشعب

elzahraamegahed said...

العقاب المشدد لل190 واحد مش المهم الأهم التحقيق معاهم ومرفة الى زقهم وهما دول اللى ياخدوا عقاب مشدد وهى دى تحميرة العين اللى بحق وحقيق

بالنسبه للشحن على الكنيسه انا واحد ولا بشوف قناهة الناسو لا الرحمه ولا لى ف السلفيين بس مشحونه جدا واللى شحنى على الكنيسه هما المسيحيين التلى اسماؤهم:
- زكريا بطرس
- بيشوى
- شنوده
- وفاء قسطنتين
- ماريان وتريز

Hossam Hassan said...

يارب الجيش يخلصنا بقى من الاشكال دي

والسعوديه وامريكا ايد واحده علينا
االله يحرقهم

واللى طلع اشاعة ان فى واحدة لازم يتجاب ويتعلق ويبقى عبرة لمن يعتبر

واكيد دي مش عصعبة ع الجيش او المخابرات

dragon said...

كل حاجة السلفيين السلفيين بصي بقه لا هنعتذر ولا هنقول تاني ايد واحدة و لا وحدة الا لما الكنايس تتفتتتتتتتتتتتتتتتتش

bambino said...

يا نوارتي يا حبيبتي
انا واحدة عادية جدا
بس اخويا سلفي
و في وقت الجهاد المقدس امام الكنيسة امبارح، كنا قاعدين بنتعشى عند أهلي
قلت له مين دول ياض؟
بطلوا القرف ده
قاللي انا اصلا ماعرفش مين دول
الواد اخويا ده و الله العظيم بيتخانق عشان ما نقتلش فراشة ، اللي بتبقى سودا ووحشة عشان فيها روح، بيقول نطيرها برة البيت احسن
ده مش دفاع عن اللي عملوا احداث امابة‘ دول رمم يستاهلوا الحرق
لكن بلاش التهم الجاهزة و احنا متاكدين ان في حد قاعد بينخور جوا و بره
انتم فاكرين ان مصالحة فتح و حماس و الانتفاضة التالتة حاجة هينة على البعدا؟

nour1971 said...

البيه محافظ الجيزه طلع الصبح في صباح دريم بيتكلم في التليفون بيقول الناس اللي ماتت ماتت برصاص مطاطي و رصاص حي انا عايزه اعرف الناس جابت رصاص مطاطي من فين بالظبط يعني الراجل ده اصده ايه مش كفايه التخلف بتاع الناس اللي سايبه شغلها و الدنيا و تظبيط البلد ورايحه تجري وراء كمليا شحاته انشاءالله تولع كاميليا و نيله البلد اهم منها يعني دم الشهداء اللي راح ده مش غالي علي المسلمين اكتر من كاميليا و اللي زيها ما تسلم ولا تتنصر ولا تتهودن البلد زنبها ايه حرام البلد يحصل فيها كده و ابتدينا نسمع في الجزيره مباشر الناس اللي بتتصل بتقول ولا يومك من ايامك يا مبارك حرام اللي بيحصل ده واللهي حرام البلد حا تخرب علي ايدين شويه فلول ولا شويه معاتيه

د/ أحمد السعدنى said...

!!!!!!السلف الصالح ... والمستسلفوووون

فيه سلفى ... للسلف الصالح ألِفى ... مسترشدا بهداهم فى كل هدفِ ... ملتمس لنور الرسول بشغفِ ... وبرحمة ولطف وعطفِ ... طهر كفه معلمة ف كفى ... قلبه من الله مشفى ... وللنفوس الضعيفة يُشفى ... خصاله م الشرف عفى ... والعدل ف نفسه يحتفى ... والظلم عنده ينتفى ... والجهل فيه يختفى ... وفيه تلفى ويقولنا سلفى ... للشحاتة والتسول من الغير سلفى ... وفى الكبر والغرور صَلفى ... بياكل بدل عيشنا عَلفى ... نمش جهل من الكلفى ... عايش عوالة وسفّى ... وطايح فى البلد بينتف ريشها نتفِ ... وناوى يحفها حفِ ... حواره كله غلظة بعنفِ ... قال : يا تنفى اللى ضدى لتبقى منفى ... كلامه شبيه ببوش المخفى ... اللى قال اللى مش معايا بعتبره ضدى ... بأيده سيف الحد بالهزل يتحد ... ومضيع سيف الحد بالجد والكد ... عجايب عجايب ... فى دينه بيعمل مصايب ... ولأخلاق نبينا سايب سايب ... وعايش حياته يصلى على كل غايب... كان م الحبايب أو جايب نوايب ... تشوف أجسام كما الأصنام ... والمجتهد فيهم عايزله بردعة ولجام ... يكفر ينفر بكلام معفر ... من عقل مأرأر معصفر ... الخروج عن الحاكم الظالم كله مظالم ... والخروج لتخريب أمة كمال المعالم ... كان ظنى أنه فكره دامس ..ليقينى الأن بأنه طابور خامس ... دى غمة وبسرعة هتعدى ... ولا فتنة نار بينا تشتدِ ... والنار مابتميزشى بين شعر مكشوف وشعر متخبى ... ولا بين اللى يعرفله نبى واللى مايعرفلوش نبى ... يا مصر تتحبى ... بحُبك متربى ... وبقلبى شوق ليكى متعبى ... بصلى بيكى من كلام ربى ... اللى يهينك يبقى هان ربى ... يا مصر دايما بتلبى ... الوقت آن للشر تِلبى ... ياأمه بُعثت للأنام ... مابُعثتش لكى تنام ... والحق بالمعنى لما قال العلام ... سيستبدل غيرنا بناس تمام ... وأبقوا قابلونى لو حيلنا فى الدنيا قام ... ولا عند ربنا بقلنا مقام ... يا موحديين أفيقوا لنجدة وطن لو راح من الوجوووود ... هتلاقوا فين مكان يحضن جِبهكم لما تخضع لربها بالسجووود
By: Ahmed Elsaadany

free basmagy said...

الموضوع كده مش نافع مش كل يوم مورناش غير المظاهرات الطائفيه وانا مش بتفق معاكى فى حكايات اننا نجيب الشيوخ والقساوسه و نلم الليه ده مش حل ده مجرد مسكن و كمان بيروح تاثيره بعد فترة احنا بنخلص من اطفيح ندخل على كامليا و بعدين امبابة.... الشغب المصرى شعب معظمه شباب و عاطلين لازم نشغلهم فى اى حاجه اتناشر ولا تمنتاشر ساعه نهد حيله فيها لازم نخلى عند الناس حاجه تخاف عليه اى حاجه شغل ولا بيت ...بصى احنا نعملهم مشروع زواج جماعى. http://freebasmagy.blogspot.com/

ملكش دعوة said...

موضوع كاميليا لازم يتقفل مش عشان سواد عيون النصاري لكن عشان كاميليا بقت بح .. بح .. فاهمين بح يعني ايه يعني حتي لو عايشه اكنها مش عايشه ولا يخفي علي احد ممارسات الكنيسه علي اللي يطلع من توبها والكلام قديم واترغي فيه كتير واظن بقي لو في عقل عند الاخوه القساوسه يسيبوا اللي يسلم يسلم واللي يحب يتنصر مع ستين سلامه والقلب داعيله بالهدايه
لكن برضه مينفعش نطرمخ علي العمايل الواطيه اللي بيعملوها الاخوه ادام السفاره ومحدش يقولي ان صمت البابا حكمه عشان في الوقت ده يبقي الصمت مريب ولما السلفيين اتشتموا علي ارض المدونه الطبالين اشتغلوا والكمنجات صهللت يبقي من دلوقت طالما شنوده رمز الكنيسه يبقي سكوته علي اللي بيحصل يعتبر موافقه ضمنيه وفي هذه الحاله يبقي خاين ومحدش يقولي قداسته قداسه البلد وامن البلد اهم ولا ايه يا عاقلين

Bean Ender said...

أنا أتقرفت من موضوع بجاحة الكنيسة دة و غباء إلي بيتقال عليهم علماء المسلمين فالتعامل مع المشكلة
خليني بقي اقولكم المفيد
١. أي انسان خاين لمصر بيطلب تدخل أجنبي يحاكم محكمة عسكرية بتهمة الخيانة
2. إلي عاوز يسلم يسلم و إلي عاوز يتنصر اتفضل لأقرب جامع أو كنيسة ليك و أعمل دة هناك .... و أول ما يكون عندك شهود أي حيوان يمسك محاكمة عسكرية بتهمة إثارة الفتنة الطائفية
3. التحقيق مع كل من بابا كنيسة الأقباط و أمام الأزهر و مفتي الجمهورية بتهمة إشعال الفتنة الطائفية (لا أحد فوق القانون)
عيب عليكم بقي وسختم شكل البلد جتكم نصيبة تخدكم كلكم

أي حد مش عجبه الكلام يعملي ريمفوف فوراً أنا مش قناة الجزيرة هنا الرأي و الرأي الأخر

esraa said...

الاخ متفائل ده عايز احكام هرفية ميعرفش يعني ايه احكام عرفيه (احكام عرفية يعني لو المجلس طلع مبارك براءة مش هنعرف نقله بم و لو كافئ حبيب العدلي محدش يقدر يقله تلت التلاتة كام) هية اللعبه كدة اصلا يوصل البلد لحالة ميؤوس منها و يفرض الاحكام العرفية هية كدة بانت لبتها و بان اللعب فيها يا نوارة افهميها بقة

كوكو said...

أمريكا مش مصدقة انها مش عارفة الخطوة التالية في مصر 1_
2_اسرائيل المصالحة و الوحدة في فلسطين مجنناها
3_ رجال الأعمال المسيحيين اللي انتفعوا من النظام القديم و الجديد مصلحتهم ان الحكومة تفضل عندها حساسية عند الحديث عن الأقباط الغلابة
4_ الجديد هو الاعتصام عند سفارة البلطجي الأوحد
ياتري مين المستفيد من ده كله ...... السلفيين فعلا

كوكو said...

أمريكا مش مصدقة انها مش عارفة الخطوة التالية في مصر 1_
2_اسرائيل المصالحة و الوحدة في فلسطين مجنناها
3_ رجال الأعمال المسيحيين اللي انتفعوا من النظام القديم و الجديد مصلحتهم ان الحكومة تفضل عندها حساسية عند الحديث عن الأقباط الغلابة
4_ الجديد هو الاعتصام عند سفارة البلطجي الأوحد
ياتري مين المستفيد من ده كله ...... السلفيين فعلا

hardway said...

او صارحونا لو مش عارفين تتصرفوا واحنا نتصرف بقى معاهم.
نـرنـر
لالالالالالالالالالالالالالالالالالالالالالالالالالالالالالالالالالا
النهاردة مكنتيش بشياكة يوم الكتدرائية
نرجع لمرجوعنا في حكاية عدم استطاعة الجيش التصرف حسب أقوالك السابق ذكرها....... ما تتصرفي أنت وثوارك.....ولا هو كلام وخلاص
ولا مفيش ثوار..خلاص أتسكنوا..ولبسوا بدل وكرافتات
وأصبحوا ثوار ميكروفونات في القاعات المكيفة
والامثلة كثيرةشادي الغزالي حرب،نور الغزالي حرب قيادية..كلهم قياديين
الاخ /مش متأكد من اسمه تقريبا نـــاصر
متصور بجانب ساويرس و وزير التنمية المحلية في الاهرام في مؤتمر مصر الاول...
شادي لازق مع ساويرس.....
وناصر لازق مع ممدوح حمزة
مفيش حد لازق مع الفقراء
نـرنـر
بوسي لي الثورة

hardway said...

او صارحونا لو مش عارفين تتصرفوا واحنا نتصرف بقى معاهم.
نـرنـر
لالالالالالالالالالالالالالالالالالالالالالالالالالالالالالالالالالا
النهاردة مكنتيش بشياكة يوم الكتدرائية
نرجع لمرجوعنا في حكاية عدم استطاعة الجيش التصرف حسب أقوالك السابق ذكرها....... ما تتصرفي أنت وثوارك.....ولا هو كلام وخلاص
ولا مفيش ثوار..خلاص أتسكنوا..ولبسوا بدل وكرافتات
وأصبحوا ثوار ميكروفونات في القاعات المكيفة
والامثلة كثيرةشادي الغزالي حرب،نور الغزالي حرب قيادية..كلهم قياديين
الاخ /مش متأكد من اسمه تقريبا نـــاصر
متصور بجانب ساويرس و وزير التنمية المحلية في الاهرام في مؤتمر مصر الاول...
شادي لازق مع ساويرس.....
وناصر لازق مع ممدوح حمزة
مفيش حد لازق مع الفقراء
نـرنـر
بوسي لي الثورة

Talal Hefnawy said...

نوارة أنا أعرف انك داعمة لمشروع الإكتفاء الذاتي من القمح.. لكن أنا أدعوك لقراءة الملخص ده إذا تفضلتي.

http://www.facebook.com/note.php?saved&&note_id=161154497280796

qqq said...

وهو كدة يبقى الموضوع اتحل؟؟؟ بكل بساطة كمان يومين واحد نصراني أرعن يعمل عملة زي عملة كاميليا و يجري على السفارة الأمريكية تاني ما خلاص بقى هو عرف إن ده البعبع، بصي يا شطورة الحلول الحريمي دية متنفعش دلوقتي خالص لأنها بتجرأ العيال دول أكتر، الموضوع إنه لابد يكون فيه شفافية وحسم و تطبيق للقانون أكتر و بحزم من غير تراجع و لا خوف، يعني لما نقول كاميليا تظهر للنيابة تبقى النيابة و القضاء هم الحاجة الوحيدة اللي تقدر تلغي ده بناء على سلطة القانون، و بعدين انتوا مالكم مرعوبين من أمريكا و الأمم المتحدة كدة لية؟ و هو دية أول مرة يحصل فيها هياج طائفي؟ ما هو حصل كتير قبل كدة و أحداث الزاوية كانت أكبر من كدة بكتير و كانت أحداث طائفية حقيقية موش اصطناعية زي دي،الأمر الذي لا يمكن التساهل فيه هو خرق القانون الذي لا بد أن يكون خط أحمر على المسلم والمسيحي، و بعدين كفاية بقى حدوتة السلفيين اللي الكل ماسك فيها و التحليلات الهبلة بتاعة التدخل السعودي، و هو من إمتى السعودية بقت من كبيرة قوي كدة عشان تخترق الأمن القومي المصري بالقوة دية؟ و بعدين ماهو الأخبار في كل مكان إن اللي عملها بلطجية يعني فلول، و بعدين ماهو جبرائيل العبيط بينادي بتدخل دولي أهة و جبرائيل ده من بقايا العهد البائد، هو انتي نسيتي يا شطورة إن الكنيسة كانت رامية تقلها على جمال و التوريث؟ و الكنيسة أقصد بيها شنودة و القيادات الكنسية اللي عيطت على مبارك و ما كانتش مصدقة اللي حصل له، الخلاصة بلاش الرعب دة و كل 5 دقايق بوست و ولولة، إهدي الله يكرمك و بلاش هرتلة من قبيل السلفيين و كاميليا و التدخل السعودي و خلافه، على فكرة أمريكا عارفة كويس إن دة ملف حساس و أخرها فيه إنها تضغط بشوية كلام و خطب لأن مصر المستقرة بالنسبة ليها خط أحمر و إلا مصالحها و مصالح العالم كلة حتكون في خبر كان، مصر الغير مستقرة معناها إن مافيش حاجة اسمها قناة السويس و معناها إن مغناطيس ضخم للجماعات الجهادية حيتشكل على نحو يكون العراق و اللي حصل فيه بالنسبة له لعب أطفال، معناها إن إسرائيل أصبحت بين كماشة الشعوب و المقاومة الراديكالية اللي مالهش سقف و التي لا يمكن اللعب سياسيا معها أو الضغط عليها زي ما بيحصل مع الحكومات، يعني من الاخر بؤرة جديدة للجهاد أنكى من العراق و الصومال و أفغانستان و اليمن و تقدري تقولي كدة إن المنطقة كلها حتنفجر، عرفتي لية استقرار مصر بالنسبة لأمريكا و أوروبا خط أحمر؟؟؟ بل إن أساسا استراتيجية القاعدة قائمة على خلخلة الحكومات المركزية حتى تستطيع العمل و التجنيد وهو دة أول حاجة مؤسسة راند بتوصي بالتصدي له، و بعدين هو انتي نسيتي إن أمريكا ضحت بمبارك أساسا عشان الاستقرار دة؟ الخلاصة بلاش شغل الولولة دة و سيبي العيال دول يفرغوا اللي جواهم عند السفارة و هو اخرها شوية تصريحات و شجب، أما بقى اللي بتسموهم سلفيين دول فهم كارت جميل قوي عشان نلاعب بيه امريكا و اسرائيل و أحسن حاجة معاهم هي سياسة الاحتواء التي تقوم على الامتصاص و السيطرة، أخيرا مافيش داعي للفزع الجيش حريف تخطيط استراتيجي و أستاذ سياسة بس من تحت لتحت.

negmat lail said...

وبعدين ايه المجلس الرئاسي اللي انت عايزاه ده ياما فندتيه ووضحتي عدم جدواه ومش حينفع وان احنا رسمنا طريقنا وبسرعة نعمل مجلس شعب عشان نبعد امريكا وفلول النظام عن سكتنا ودلوقتي بكل بساطة بترجعي في كلامك وتزرعيها في امخاخ الناس تاني.. يعني تفتكري المجلس الرئاسي فعلا الحل مش حيتخانقوا مع بعض ومش كل واحد يعمل ريس على الباقيين.. يا رب استرها من عندك .. واهدي الجميع ..

hardway said...

مافيش قلبين وسهم
فيه وش زعلان وبيعيط
ووش غضبان واحمر وبيطلع دخان من ودانه
...................................
الا الكلام ده..وش زعلان و بيعيط.. الا كده
أنا أحرق اللي يزعلك..أولع اللي يعيطك
لا سلفيين.ولا أخوان. ولا فلول. ولاذيول...
ولا أمريكان.ولا أروبي .ولا تركي.ولا حد في الارض دي يقدر أو يفكرأو يخطر علي باله
يزعلك بس مش يعيطك كمان دي مصيبة ياناس
أنا مش أوباما..قاعد في المكتب بتفرج علي فيلم كيف تقتل أسامة بن لادن..
لالالالالالالالالالالالالالالالالالالالالالالالالالالالالالالالالا
أنا أحرق ..أولع..نــاااااااااااااار
وفي قلبين وسهم.....في

hardway said...

مافيش قلبين وسهم
فيه وش زعلان وبيعيط
ووش غضبان واحمر وبيطلع دخان من ودانه
...................................
الا الكلام ده..وش زعلان و بيعيط.. الا كده
أنا أحرق اللي يزعلك..أولع اللي يعيطك
لا سلفيين.ولا أخوان. ولا فلول. ولاذيول...
ولا أمريكان.ولا أروبي .ولا تركي.ولا حد في الارض دي يقدر أو يفكرأو يخطر علي باله
يزعلك بس مش يعيطك كمان دي مصيبة ياناس
أنا مش أوباما..قاعد في المكتب بتفرج علي فيلم كيف تقتل أسامة بن لادن..
لالالالالالالالالالالالالالالالالالالالالالالالالالالالالالالالالا
أنا أحرق ..أولع..نــاااااااااااااار
وفي قلبين وسهم.....في

hardway said...

مافيش قلبين وسهم
فيه وش زعلان وبيعيط
ووش غضبان واحمر وبيطلع دخان من ودانه
...................................
الا الكلام ده..وش زعلان و بيعيط.. الا كده
أنا أحرق اللي يزعلك..أولع اللي يعيطك
لا سلفيين.ولا أخوان. ولا فلول. ولاذيول...
ولا أمريكان.ولا أروبي .ولا تركي.ولا حد في الارض دي يقدر أو يفكرأو يخطر علي باله
يزعلك بس مش يعيطك كمان دي مصيبة ياناس
أنا مش أوباما..قاعد في المكتب بتفرج علي فيلم كيف تقتل أسامة بن لادن..
لالالالالالالالالالالالالالالالالالالالالالالالالالالالالالالالالا
أنا أحرق ..أولع..نــاااااااااااااار
وفي قلبين وسهم.....في

dr_toty2015 said...

السلام عليكم
استاذه نواره انا ايه عادل من كليه الطب البشري جامعه الاسكندريه و عضوه في اسره فوريو بالكليه نرتب لمؤتمر سياسي باسم " خطوه للمستقبل " نتحدث فيه عن المرحله القادمه من ثلاث نواحي التنميه البشريه "فن الحوار و تقبل الاخر" و الناحيه الدينيه " الدين و السياسه " و الناحيه السياسيه " مصر ...المستقبل " و نرجو من حضرتك حضور المؤتمر كمحاضره في فقره السياسه
نتمني من حضرتك الموافقه على أن يكون المؤتمر يوم الخميس 19/5/2011 في كليه الطب بالاسكندريه نرجو من حضرتك الرد على الايميل dr_toty2015@yahoo.com
و جزاك الله خيرا

dr_toty2015 said...

السلام عليكم
استاذه نواره انا ايه عادل من كليه الطب البشري جامعه الاسكندريه و عضوه في اسره فوريو بالكليه نرتب لمؤتمر سياسي باسم " خطوه للمستقبل " نتحدث فيه عن المرحله القادمه من ثلاث نواحي التنميه البشريه "فن الحوار و تقبل الاخر" و الناحيه الدينيه " الدين و السياسه " و الناحيه السياسيه " مصر ...المستقبل " و نرجو من حضرتك حضور المؤتمر كمحاضره في فقره السياسه
نتمني من حضرتك الموافقه على أن يكون المؤتمر يوم الخميس 19/5/2011 في كليه الطب بالاسكندريه نرجو من حضرتك الرد على الايميل dr_toty2015@yahoo.com
و جزاك الله خير

dr_toty2015 said...

السلام عليكم
استاذه نواره انا ايه عادل من كليه الطب البشري جامعه الاسكندريه و عضوه في اسره فوريو بالكليه نرتب لمؤتمر سياسي باسم " خطوه للمستقبل " نتحدث فيه عن المرحله القادمه من ثلاث نواحي التنميه البشريه "فن الحوار و تقبل الاخر" و الناحيه الدينيه " الدين و السياسه " و الناحيه السياسيه " مصر ...المستقبل " و نرجو من حضرتك حضور المؤتمر كمحاضره في فقره السياسه
نتمني من حضرتك الموافقه على أن يكون المؤتمر يوم الخميس 19/5/2011 في كليه الطب بالاسكندريه نرجو من حضرتك الرد على الايميل dr_toty2015@yahoo.com
و جزاك الله خير

james green said...

وبعدين معاك يانواره يبنت عم احمد من حشر السعوديه في الفاضيه و المليانه وقافله النور خالص على سوريا ما يبقى عندك شجاعه ادبيه وتقولي دي اوامر حبيبك حسن نصر الله

EMAK said...

نورة بصي احنا الكلام بينا شد اوي على توير وبلكتيني وبما اني كنت في الشغل فما عرفتش اكمل وجهة نظري

احلى حاجة في الدنيا انك تكوني محايدة لعلمك بقى اغلب اللي بيهاجموكي وانا منهم ضد اللي راحوا يهاجموا الكنيسة ولكني ضد التحامل على طرف واحد

لعلمك الاغلب من السلفيين في امبابة رفضوا ينزلوا المظاهرات دي وقالوا عليها فتنة لكن كلنا ضد دولة الكنيسة داخل دولة المصرية

وضد احتراز اسلحة في اي دور عبادة االكنيسة مؤسسة كانت تقدر تمتص الموضوع من بعض المتحمسين وتجيب الجيش مثلا يفضهم

ولكن اللي حصل ادى ايحاء للواحد انه ادام دولة لو اتقربت من حدودها هتعطي اوامر لجنودها باطلاق النار وسفك الدماء بلا ادنى رحمة

وبدل ما تتحاملي على السلفيين افتكري السلفي بتاع الزاوية الحمرا اللي بنته اغتصبت وما رضيش يعمل قلق ومحدش عبره ولو بكلمة شكر

EMAK said...

نورة بصي احنا الكلام بينا شد اوي على توير وبلكتيني وبما اني كنت في الشغل فما عرفتش اكمل وجهة نظري

احلى حاجة في الدنيا انك تكوني محايدة لعلمك بقى اغلب اللي بيهاجموكي وانا منهم ضد اللي راحوا يهاجموا الكنيسة ولكني ضد التحامل على طرف واحد

لعلمك الاغلب من السلفيين في امبابة رفضوا ينزلوا المظاهرات دي وقالوا عليها فتنة لكن كلنا ضد دولة الكنيسة داخل دولة المصرية

وضد احتراز اسلحة في اي دور عبادة االكنيسة مؤسسة كانت تقدر تمتص الموضوع من بعض المتحمسين وتجيب الجيش مثلا يفضهم

ولكن اللي حصل ادى ايحاء للواحد انه ادام دولة لو اتقربت من حدودها هتعطي اوامر لجنودها باطلاق النار وسفك الدماء بلا ادنى رحمة

وبدل ما تتحاملي على السلفيين افتكري السلفي بتاع الزاوية الحمرا اللي بنته اغتصبت وما رضيش يعمل قلق ومحدش عبره ولو بكلمة شكر

omima said...

يانوارة بلا واقفة بلازفت فوقى دا لعب وتكسير عضم بين طرفين نيتهم مش سالكة الاخوة المسحيين ماكانوش مع الثورة من البداية والبابا كان مانعهم واللى خرجوا طوائف اخرى من المسحيين وماتنكريش ان البابانفسة عجباة حكاية اللعب بمشاعر المسحيين عشان مزيد من الشعبية برة وجوة اما الطرف الاخر من الجهلة الاغبياء الذين تحركهم الدولة المتخلفة اياهاهم اسوا دعاية للاسلام ويبدوا ان الاثنينعايزين يجيبوا ضرفها حسبنا اللة ونعم الوكيل فى الاثنين

Build up said...

ياريت يا نوارة تشوفي المكتوب في المقال ده وعلى فكره هذا الكلام مش مجرد كلام واحد من أقباط المهجر و خلاص ده الكلام اللي بيتقال بينهم و بين بعض و بيعلموا بيه الأطفال الصغار في مدارس الأحد
http://www.copticnews.ca/index.php?option=com_content&view=article&id=931%3A2011-01-19-20-50-42&catid=34%3A2010-09-28-00-47-12&Itemid=28

Build up said...

http://www.copticnews.ca/index.php?option=com_content&view=article&id=931%3A2011-01-19-20-50-42&catid=34%3A2010-09-28-00-47-12&Itemid=28
ياريت كل واحد يشوف الكلام ده و يحكم عليه بنفسه و لو نرضى أن دي تبقى بلدنا

Adb El-Hameed Riad said...

مظاهرات ماسبيرو متحلتشى علشان الجيش خادهم على جنب مظاهرات ماسبيرو اتحلت بعد الاتفاق ان يحيى الجمل يرجع الوزاره ونظام مبارك يفضل موجود لحد شهر 9 . والجيش منجحشى الا انه يسيطر على حبه وزرات كمان منها الداخليه . بس فى ناس رجعت فى كلامها مرتيين . مره ساعت جمعه التطهير وبعد كده بدايه من احاث المنيا . للى بيحصل اليوميين دول . مش عارف ايه الى قوا قلوبهم تانى كده

Adb El-Hameed Riad said...

حاجه تانيه المسلميين فى مصر مش طوائف اساسا علشان نطلع نقول سلفيين وغير سلفيين . بس فى ناس من مصلحتها انها تعمل تمييز دينى فى مصر بين المسلميين والاعلام ال... ماشى ورا كده . وبعضهم عارف هو بيعمل ايه. المظاهرات الى حصلت كان فيها ناس مش ملتحيين اكتر من الملتحيين . بس هو تلزيق وخلاص

ابراهيم رزق said...

نوارة يا بطلة

الجنازة حارة و الميت كامليا
التعتيم و اخفاء الحقائق و عدم الشفافية و اعتبار كامليا شحاتة سر حربى و عدم وجود دور للكنيسة و الازهر
ارض خصبة للفتنة
حاجة تانية
نجيب جبرائيل و مايكل منير وحسام البخارى و ابو يحى مطلوب عدم ظهورهم فى الاعلام حتى لو بقرار عسكرى
الشعب يريد عدم ظهورهم

تحيلتى

واحد من الناس said...

ايون ايون
السلفيين هما اللي هدوا كنيسة اطفيح باللودر

وضربوا الاقباط في منشية ناصر بالنار
ومنعوا محافظ قنا من اداء مهامه
وهدوا الاضرحة
وحرقوا كنيسة
وحاصروا الكاتدرائية وهما اللي اتصلو بنفسهم وقالوا لنفسهم تعالوا الحقوني انا في امبابة


الغريب مش في قدراتهم العظيمة دي , الغريب ان فيه مجلس عسكري مستني لما المضحوك عليه منهم يخلصوا دورهم بعد ما تم تشويه صورتهم من قبل الاعلام عديم الضمير , علشان يرميهم في السجون ويبقى هو البطل اللي خلص مصر
ونلقاكم في ثورة يناير 2060

Ahmed . M . Abdulrahman said...

بعد معاينه معظم الردود بتاعه الاخوه مقاطيع المدونه

وجدت شئ ان الكل بيعد يصوت فى التعليقات بتعته او يكتبلى بيتين شعر

او يعد يشيتم

ومفيش اى حد بيقدم اى حلول الا القليل جدا

انا بعد ادن فى مالطه

و المعلمه بتاعتنه الحاجه " نواره"

بتعد تغنى

و الكلام على التويتر يرفع الضغط

عاماً

علشان نلم الليله دى و انا بقولها بالبلدى على بلاطه

لازم يبقى فى عين من جهنم مسلطه على الخارجين عن القانون

زى الى شفتها لما كنت فى اللجان الشعبيه

الى احنا فيه ده اسمه حاجه واحده هو اسم مكلكع
" استاتيكا ثوريه "

ودى بعد الشر علينا بتقلب " خمول ثورى "

ثم يتبعها " وفاه للثوره "

و مرحله الاستاتيكا دى بتبقى اخطر مرحله

واى ثوره بتوصل للحاله دى المبه الحمره بتنور علطول

و المؤشرات بتنزل فى الارض

لو اتعاملنا مع موضوع امبابه و كاميليا و غيرهم معامله دينيه يبقى احنا بنضحك على نفسنا

لازم نلعبها سياسه علشان الى بره والى جوه والى فى النص بنهم بيلعبوها سياسه

+

تفعيل مبدأ الحرب النفسيه

وطبعاً حتقولى دا ماله ومال موضوعنا

حقولك يا استاذ و يا استاذه يا نواره

هم بيلعبوا على وتر الحرب النفسيه

اكتر من المسئله الطائفيه

تقدرى تولى ان الطائفيه اده لتنفيز مخطط اكبر هو " تدمير الثوره " بتفتيت الشعب

و فى محاولات لتفتيت الرموز من القيادات الشبابيه بس دى مبتنجحش كتير

و دا كله ليه نتيجه وحده هى ان بصله الشعب حتتكسر

ودا طبعلا لان مفيش قياده للثوره وبالتالى يبقى هم وصلوا للنتيجه

و امثال عمرو موسى يوصلوا للكرسى

و امثال مرتضى منصور يستولوا على كراسى هامه

و نرجع كهيئتنا اول مره

وساعتها حبقى افكركم اذا سابوا المدونه دى هى وصاحبتها فى حالها

النهايه لازم يبقى فيه حزم قاسى ومؤلم على شان كله يرجع جحوره

و نقطع صوابع امن الدوله

الى فاضله

لان بأمانه موضوع الواد الى اتجوز المسيحيه دا عرفى مش داخل دماغى

+

الغاء فكره الملاحه بالكنيسه

لازم المسيحين يستقلوا عن الكنيسه

الكنيسه مكان للعباده

لتعليم

للاخلاق الساميه

للاعترافات

لاكن مش معقول كل حاجه حعملها حروح اسأل الكنيسه

داخل الحمام حسأل الكنيسه

خارج اتفسح حسأل الكنيسه

+ تفعيل مبدأ القانون القاصم

لا احد فوق القانون الكل سواسيه

والى يفتح بقه بعد كده يبقى راجل " وسخ " ودى اول مره اشتم فيها على المدونه

اظن ان دا حيحقق الاستقرار و الامن و القوه

ياريت تفكرى يا نواره فى الى انا قلته

سلام مؤقتاً يا نواره

___________________________
الى عاوزنى يجينى
http://misr25jan2011.blogspot.com

Hady Hamouda said...

لماذا الفتنة و من خلفها؟

للإجابة عن هذا السؤال يجب اعتبار شيئين هامين... الاول من عنده الدوافع و الثاني ما هي الاسباب... لذا ساحاول ان اجيب و اوضح كلا الامرين... اصحاب الدوافع معروفين بالعقل و المنطق و هم ممن سيستفيدون من وراء الفتنة للإنتقام بعد ان حاولوا مرارا و قبل تقديمهم للمحاكمات او للتحقيقات و لكن من باب اخر حتى يرونا انهم من يحمونا و اننا سنغرق و تغرق مصر في انهار من الدماء و سيعم الخراب و الذعر بدونهم و قالها مبارك المخلوع صراحة و نفذها صراحة بعدة اشكال... قال انا او الفوضى و انسحبت شرطته و اطلق المجرمين و فشل... امن الولة و فلفول الحزب كثفوا من التلاعب على وتر الفتن الطائفية قبل حل امن الدولة للضغط لوقف حله و من بعده الحزب عن طريق بث روح ان أمن الدولة من يحمي البلاد من الفتنة الطائفية و ليس اساسا من فجر الكنائس و لو رجعنا بالذاكرة سنجد ان حادث اطفيح تزامن مع ايام الضغط الشعبي لحل أمن الدولة و فضائح حرق ملفاته و من هنا .... الباقي على صفحة الفيس بوك بإسم (زوابع فكرية) ياريت اللي مهتم يقرأ يتفضل بالدخول و المطالعة مشكورا ان رأى ان الصفحة بها ما يستحق حقا...
http://www.facebook.com/?ref=home#!/pages/%D8%B2%D9%88%D8%A7%D8%A8%D8%B9-%D9%81%D9%83%D8%B1%D9%8A%D8%A9/146115328790716?sk=app_109486035783059

omar said...

على فكره انتى اسلوبك بقى مش محترم
ايه الى هيليموها لو حشيت بطنهم كويس
انتى بتتكلمى عن رجال دين يبقى تحترمى نفسك
مش عارفه تحترمى نفسك يبقى تسكتى
فليقل خيرا او ليصمت

ساعي الخير said...

حسني مبارك فضل يطرمخ

تلاتين سنة

كل مرة شيخ و قسيس

و ضحك أصفر

و خلاص

و النتيجة زي ما أنتي شايفة

و علي راي الفيلم اللي الممثل اللي بيقوم بدور القسيس

قال فيه

اللي في القلب في القلب يا كنيسة

نوارة الطرمخة ما تنفعش

و لا هتجيب نتيجة

هييجي يوم

للأنفجار

جايز الليلة دي

أو مع طلوع النهار

يا نوارة الأنتصار ... أحمد فؤاد نجم

أنتي السبب

و بحملك دم اللي مات جنبك علي الكوبري
و بحملك دم اللي سابوا الدنيا من بدري

لما يروح هدر و أنتي و لا بتدري

و بحملك دم الناس اللي ماتت في أمبابة

دم الغلابة

و الناس اللي لسه هتموت و موت الطيابة

طول ما أنتي رافعة شعار

الطرمخة

و بتداري ع الديابة

يا نوارة الحل بسيط ... العدل

مش الثورة علشان العدل

و لا فيه حاجة تانية ..

يبقي لازم العدل يأخد مجراه

و اللي يزعل من الحق يتدق

لازم نقول للغلطان أنت غلطان

و لأ يا غلط لأ

يا نوارة دم الناس في رقبتك

دم الغلابة المسيحيين و المسلمين

دم الناس المساكين

اللي ما لهمش دعوة بدولة الكنيسة و لا دولة الخلافة

دم الناس اللي عايزة تنام في أمان و تعبد ربنا زي ما تحب و تختار

دم الناس اللي بتحب الحب

و مش عايزة حاجة تقف في طريقها للخير

دم الناس البسطاء اللي عايزين المودة و الخير و السلام

لا بد أن العدل يأخد مجراه

لازم كلنا نقول للغلطان أنت غلطان

لابد نقول للغلط لأ

لابد ننصر الصح و نقول كلمة الحق

الطرمخة لا تفيد

العدل هو اللي هيصلح كل شئ بالتأكيد

الطرمخة يعني تطرمخي علي دم اللي مات جنبك علي الكوبري

فاكراه و لا نسيتيه خلاص كده من بدري

نوارة يا بنت نجم

مر الكلام

زي الحسام

يقطع مكان ما يمر

و الحق دين

من غير يدين

بس الوفا ع الحر

الوفا ع الحر

يا حرة يا بنت الحر

كل نقطة دم تنزل من مسيحي أو مسلم

في رقبتك يا نوارة

أذا ما نصرتيش العدل

أذا ما طالبتيش بالعدل

أحنا كسرنا صنم مبارك

علشان نعبد صنم شنودة و المشايخ

لالالالالالالالالالالالالالا

لا يا نوارة

ما تركعيش

قومي يا حرة

قولي للغلط لأ

و اللي يزعل من الحق يتدق

من يوم السادات ما قال

أنا ما أقدرش أحارب أمريكا

و عمل اتفاقية الأستسلام

و الكنيسة بتجري علي أمريكا و ورا أمريكا

و بقت ماما أمريكا

و كل ما يزعلوا يقولولك أمريكا هتيجي

و هم اللي راحوا لها يعزموها عند السفارة

بيهددوا زي القذافي بالأستعمار و الأستحمار

ونسيوا مين حمي الكنايس قبل أمريكا

يا نوارة

نسيوا عمر الكنايس في مصر كام

و عمر أمريكا رغم صيتها كام

مين حمي الكنايس في مصر يا نوارة قبل أمريكا

قبل شغل البولتيكا

قبل الأستسلام لأعاديكا

مين حمي الكنايس و روادها

المسلمين

لأ
المسلمين ما حموش الكنايس

و أن كان عليهم فيه ناس محسوبة

ع الأسلام و متعرفش عنه حاجة بتبقي عايزة تولع في الكنايس

قبل أمريكا و لحد وقتنا

اللي حمي الكنايس و المساجد

اللي حمي مصر

ربنا

ربنا وحده هو اللي أمر

بالعدل

يا نوارة

مفيش كنايس ولعت في الثورة ليه من السلفيين

أو غيرهم

و اللي ولعت بأيدين الفلول الناس الطيبين أهل مصر طفوها

لأن مصر فيه ناس عندها أصل

و تعرف الأصول

و الأصل بالخير و الحب موصول

من زمان في مصر

و ده شئ شرحه يطول

يا نوارة

لازم نقول الحق مش نطرمخ

تبقي عملت أيه الثورة

لما كله يطرمخ زي حسني مبارك

و تبقي أنتي عملتي أيه

لازم الغلطان يتحاسب

و المثل في مصر بيقول

أن كنتوا أخوات أتحاسبوا

نوارة

يا حرة يا بنت الحر

ما تخافيش

من البطرك

و لا من أمريكا

و لا السلفيين

و لا المسلمين كلهم

و لا الهندوس

نوارة قولي الحق

أطلبي العدل للكل

قولي يا ناس يا فل العدل للكل

نوارة

يا حرة يا بنت الحر

الكلمة دين من غير أيدين

بس الوفا ع الحر

بس الوفا ع الحر

بس الوفا ع الحر

haleme said...

إيه رأيك يا نوارة في الخبر ده لازم نخلص بأه من الموضوع الزفت ده

http://www.dostor.org/politics/egypt/11/may/7/41478

LogicMind said...

الخروج من ورطة تأييد الثوره ممكن يكون ازياى؟؟؟ شغل مخك انت وهو؟؟؟واوع تكون فاكر انى عايز ارجع النظام القديم...ابدا ده انا عايز اخلص من الاثنين... يبقى ازاى؟؟.. ممكن احكام عرفيه..ممكن..الله يجازى اللى خلى الافكارالشريره تجول فى خواطرنا.. ايه البطء ده.. دى لم تعد ثورة ابدا..عايزين نفضى لاعمار مصر بقى..ليه البطء ده

Tears said...

ماعدش فيه وقت للعند و الاصرار على الراى اللى بيطلع غلط فى النهاية

فاكرة الاصرار على نعم اللى نتيجته بعد ما وافقوا على ست مواد لبسنا 63 مادة....النتيجة نعم لكن اللى اتنفذ هو كانه لا و الفرق الوحيد هو ان بدل ما نشترك فى وضع الدستور حط المواد لجنه سرية مافيش توافق عليها و دلوقتى بيتلككوا و بيقولوا نأجل الانتخابات

قلنا رئيس مدنى بسرعه

اسمعى الفيديو
http://www.youtube.com/watch?v=ebZyl_l-IH8

ahmed said...

الموضوع شكله مرتب وفى مؤامره مرسومه وتنفذ على مراحل ربنا يسترعلى مصر

متفائل said...

يا أخت إسراء .. نوارة إتهمت الجيش بصراحة ووضوح بأنه ورا الحدوته دي صح ولا غلط ؟عشان كده أرى أن تطبيقه للأحكام العرفية لوقف هولاء المخربين هو الرد الوحيد اللي يثبت برائته .. ثم مين قال إن الجيش حيستغل الأحكام العرفية دي ليعود بالنظام القديم زي ما بتقولي ؟ طب ما كان أسهل يقف جنبه م الأول

Gihan said...

ما تنسيش ان زي ما قال لك تميم البرغوثي و مثلما كتب في أحد مقالاته في الشروق ان الفتنة الطائفية هى اخر كرت في ايد أمريكة و اسرائيل. هما و أعداء الثورة داخل مصر مالهومش غيره لكي يفشلوا الثورة

Tears said...

من امام ماسبيرو الان

http://www.twitvid.com/DXHAB

ويكا said...

بقى حسنى مبارك قدمناه للنيابه

وكاميليا مش قادرين نعرضها على النيابه علشان الكنيسه مش عايزه ؟؟؟!!!!!
للدرجه دى الكنيسه فوق القانون؟؟!!! وكمان فى الاخر بيستنجدوا بأمريكا ؟؟!

دى خيانه عظى

وفى الاخر بتقولولى هاتوا شيوخ السلفييين ؟؟!!

عايزينهم ليه طيب ؟

انا بجد على لسانى لفظ وسخ موووووووت

بس همسك نفسى

اطلبوا من الجيش يضرب الكنيسه على قفى اللى خلفوها ويجيب كاميليا من بيت اللى جابوا البابا

بلاش هبل وتخلف ودفس راس فى التراب زى النعام

وبعدين الرشاشات دى كلها اللى كانت بتضرب من قلب الكنيسه جات ازاى وليه ؟؟؟؟؟؟؟

حسن محمد على said...

عايزين تحقيق عادل عاجل و عايزين عقوبات رادعة للطابور الخامس اللى بيقوم الناس على بعض وبيقتل ويحرق وهو مطلق السراح ,الثورة المضادة زادت تزامنا مع احكام قضية حبيب العادلى فهل كان ذلك مصادفة؟؟؟؟؟؟؟

lastcrazyboys said...

امـرأة مصريـة تلخص تداعيـات الأحــداث الأخيرة

ملكش دعوة said...

الي المدعو qqq الله عليك بجد
اسمعي يا ست النواره هو ده الصح مش نخلص من فزاعه الاخوان يطلعلنا فزاعه السلفيين وبعدين فزاعه الثوريين كفايه بأه يا ناخد الامور مأخد الجد يا نسيبها تولع وانتي وحيا ابوكي حنيه قلبك دي اوقات بتودي في داهيه احنا بنقول دوله القانون والقانون مبيعرفش يطبطب علي حد ولا الحنيه ليها ناس وناس

romancy said...

هههههههههههههههههه لا ونبى قلبك ابيض وبأستك من فوق

خلتى وخالتك ايه بس ولا اه صحيح انتى كنتى سادة ودانك الفترة الفاتت دى ولسة فايقة م الغيبوبة وبمناسبة فوقانك نقول تانى

الحركات ال بتحصل حاليا دى الراعى الرسمى لالاول والاخير ليها

المجلس العسكرى

لانهم اساسا جايين ع السلطة بس يدخلو للشعب الخروف ازاى لازم حوار كدا يكون مسبوك وكبش فدا يكون متربى ع الغالى عشان الناس تسلم بمزاج مزاجها والكارت جاهز

وطبعا اسمه الفتنة الطائفية

يجى بئا مجلس العرصات الموقر يدعم السلفيين بكل طوائفهم متشدد ومعتدل ومتخلف وجاهل وكله ماشى
يقوم يحصل ال بنشوفه حاليا دا

يقوم يحصل بردو والمسيحين يستنجدو بالدول ال برا ويطالبو بحماية دولية يقوم المجلس مستنى وراكن ف الدرة لحد ما تيجى الانتخابات يقوم الاخوان والسلفيين ينجحو يقوم تحصل كام حادثة طائفية كدا من النوع التقيل باشراف عسكرى وتنفيذ مشايخ امن الدولة
يقوم هوبا المجلس يعلن الانقلاب ع الحكومة الجديدة

وخدى فطيرك يا مصر

وابئى قولى الكلام ال انتى بتقوليه دلوئتى دا للظباط ولاد الناس المحترمين ال طلعو يوم 8 ابريل وقلتى عليهم عرصات وبلغتى عنهم الشرطة العسكرية وسبيتلهم الدين والملة

ملعون ابو الجاهل ال يعمل عالم

Bienveillant أوفياء مصر d'Égypte said...

ملعون أبو جمهورية ولا مملكة كاميليا شحاتة ولا عبير مش عارف إيه - إيه العبط ده كله فى بلد عملت ثورة هايلة؟ - هى الدنيا حاتخرب لما واحد يتحول للإسلام ولا للمسيحية؟ - هو حر - ومفيش واحد جنس كلب له من أصله له دعوة بدين واحد تانى - ولا بنحوله من دين لدين - إنتوا عاوزين تخربوا البلد عشان واحدة بقت مش عارف أبصر إيه؟ - كده تبقوا كلكم - مسلمسن ومسيحيين - ما تستحقوش تبقوا مصريين أصلاً - كده م الآخر - ده إيه اصله الهبل والقرف ده كله؟ - جاتكوا ستين نيله

Alaa said...

طلع رجل الأعمال المسيحي هو وراء هذه الفتنة , طبقا لتحقيقات النيابة العسكرية وتم إذاعة الخبر في الأهرام وقناة الحياة

حبيبة said...

القانون يا نوارة القااااااااااانننننننننون كله يتحكم عليه بالقانون شغل الطبطبة ده مش هينفع لازم النفوس تهدى وكل واحد ياخد حقه لكن تقولى لهم عيييييب العبوا مع بعض متتخانقوش مينفعش هتلاقيهم بكرة رجعوا اتخانقوا مع بعض تانى لازم يكون فى قوة اعلى من الكل والكل يخاف منها ويعملها حساب لكن مينفعش يبقى فى ناس فوق القانون وناس تحته

torero said...

http://www.algareda.com/2011/05/خالد-دياب-يكتب-المجلس-الأعلي-هاتخربها/

hyper said...

الأخوة المرضى نفسيا والمتوفر فيهم عقدة النقص المباركية بشدة معترضين على أى شخص يرى الواقع الأسود بعين صحيحة ....الجميع يرى ثورتنا تسرق ثم تظهر قلة مندسة من بين من يدعون انهم ثوار لتقود الثورة المضادة وتهبط معنويات الناس من النزول يوم 27 ...ردا على فلول النظام العاملين اون لاين ....يا بهايم ...من امتى كانت صفحة خالد سعيد بتعبر عن الشعب المصرى كله ..وهو معنى وجود فئة مش نازلة ولو كان عددهم 100 الف مش بس 40 زي الصفحة ما بتقول .ولو كانوا مليون ...معنى كده ان الناس مش هتنزل ...لا يا كلاب ...هننزل ان شاء الله ونحمى ثورتنا اللى راح فيها دم شهدائنا ...لما كان مبارك الكلب بيقول كده هو ونظامه عشان يمنعوا الناس من نزول التحرير ...ولكن الناس كانت بتنزل غصب عنه وعن كلابه أيا كان أشكالهم...حيحلها الحلال يا فلول ..وبكرة تضربوا بالجزمة ان شاء الله ..حسبنا الله ونعم الوكيل فى أمثالكم...صحيح اللى اختشوا ماتوا ...وادا لم تستح فاصنع ما شئت..الا كلاب طرة بيدفعلكو كام عشان تفضلوا اون لاين معظم الوقت