الاخ الغالي
1- رجاء السماح للمصريين في الخارج بالتصويت
مافيش حجة تقبل انهم ما يصوتوش.. التصويت الالكتروني كل الناس بتعمله اشمعنى احنا اللي الهاكرز حيبوظوا لنا التصويت الالكتروني
ويقدروا يصوتوا في السفارة امال هي لازمتها ايه السفارة غير انها ترازي في المصريين في الخارج
المصريين في الخارج بيصرفوا على البلد وبيدفعوا عملة صعبة
ماذا والا يعملوا مليونية الزحف الانتخابي، وييجوا كلهم في يوم واحد.. التمانية مليون واحد، ويقعدوا لكم هنا.. وورونا العملة الصعبة حتدخل لمصر ازاي
2- ايه موضوع تأجيل الانتخابات ده؟
ما قلنا بتوع الحمار الوطني دولم ناس فاشلة ولو اديتهم ميت سنة فرصة مش حينجحوا في الانتخابات وبيفضلوا الديكتاتورية على الديمقراطية لو هم مش حينجحوا.. ومهما استنينا عليهم مش حينجحوا، نعمل لهم ايه؟ ساقطين ساقطين ساقطين
وبلاش التحجج بالاوضاع الامنية.. نعمل لجان شعبية
ما تأجلوووووش الانتخاباااااااااااااااااااااااات... وعد الحر دين عليه، انتوا وعدتوا انكم مش حتقعدوا غير ست شهور، عملتوها تسع شهور، حتعملوها تلاتين سنة تانيين على ما الاوضاع "تستقر"؟ مش عايزين احنا استقرار
عايزين انتخابات
خلصونا بقى... مش كفاية اللي حصل؟ هو كل شوية؟ كل شوية كده؟
يعني ما نعرفش نفرح في يوم على بعضه؟
استغفر الله العظيم يا رب.. ده ايه حرقة الدم دي
والسلام على من اتبع الهدى
شكرا لساعي البريد
سبعين علامة استفهام
---------
ما تنسوش مليونية صلاة الفجر، فيه حوالي 3 او اربع كنائس مشاركة في صلاة الفجر لدعم الانتفاضة والوحدة الوطنية والتأكيد على مطالب الثورة
الامام حيبقى الدكتور صفوت حجازي
ناصر من ائتلاف شباب الثورة كلم كل الشيوخ الازهريين اللي يعرفهم
كل واحد ييجي يجيب معاه عشرة اصحابه
حنبقى موجودين في الميدان من الساعة واحدة ونص صباحا كده، الفجر بيدن الساعة تلاتة ونص
No comments:
Post a Comment