انسانية كاميليا شحاتة!

طبعا احنا سيبنا اشغالنا، واعمالنا، وحالنا ومحتالنا، واللي ورانا، وبنتكلم عن كاميليا شحاتة دلوقت حاليا، وعايز اختي، وانت فين يا خالتي؟ واللي يتجوز امي اقوله يا عمي

مش ورانا حاجة غيرها

وامبارح كان فيه مظاهرة عند الكاتدرائية، سألتهم: هم انتوا مسيحيين ولا سلفيين احسن بقيت اتلخبط.. فضحكوا

لما ضحكوا بقى عرفت انهم مسيحيين

طب واقفين ليه؟

اصل السلفيين شتموا البابا بشتايم وحشة الاسبوع اللي فات

فقلت لهم وانتوا داخلين لبعض مظاهرات من الاسبوع للاسبوع؟ فضحكوا تاني... انت جاي تتظاهر ولا جاي تهرج؟ 

لا.. انت جاي تهرج، عشان هم شكلهم كده قالوا لهم اتظاهروا، هم مش بيتظاهروا من معاميق قلبهم، زي ايام ماسبيرو كده لما كنت باروح لهم اقولهم المظاهرة دي طائفية، قوم يقولوا لي: والله معاكي حق، المفروض نروح التحرير ونتظاهر مسلم ومسيحي، عموما، كلمي ابونا عشان ياخدنا! 

بس الشهادة لله.. المظاهرات دي مجرد ردود افعال

هيييييه... والله وجه اليوم على السلفيين اللي بقوا بيتكلموا فيه بكلام كفري والعياذ بالله.. زي انهم مثلا يقولوا: دي قضية حرية عقيدة.. دي قضية سيادة قانون.. دي قضية حقوق انسان

الله الله الله يا عبد الله... جامد قوي الكلام ده، وشكلكم قمر وانتوا بتقولوا الكلام ده

همممم.. ولو ان مافيش اي دليل مادي واحد انها قضية حرية عقيدة، أو حقوق انسان، أو سيادة قانون، لأن القانون مافيهوش ابو يحيى

وولو ان النيابة نفسها تجاوزت القانون لما خاطبت الكنيسة عشان تجيب لها مواطنة، مع ان المفروض ده دور الشرطة، والكنيسة غير ذات صفة، ولو ان فيه تناقض ما بين موقف النيابة نفسها، وموقف المطالبين بسيادة القانون، والكلام عن ضرورة ان الكنيسة في حد ذاتها ما تدخلش وفي نفس الوقت يخاطبوها كأنها جهة ذات صفة عشان تجيب لهم مواطنة، وانا مش فاهمة على اي اساس الكنيسة تجيب لهم المواطنة دي، ماهو يا الشرطة تروح تجيب كاميليا بنفسها عشان تمثل قدام النيابة، يا النيابة توجه اتهام للانبا اغابيوس بانه اختطف كاميليا والشرطة تروح تقبض عليه.. يعني ايه الكنيسة تسلم اي حد؟ هي مالها؟ ده في قانون ايه؟ ما هو يا الكنيسة متهمة، وفي الحالة دي مافيش حاجة اسمها الكنيسة متهمة، فيه افراد بيعملوا في الكنيسة متهمين ولازم يتقبض عليهم من قبل الشرطة، يا الكنيسة كنيسة وبس مش شغلتها تسلم ناس، هي ايه صفتها تسلم وتستلم؟ 

بس حنمشي قضية كاميليا قضية انسانية وحرية عقيدة وسيادة قانون.. كده بدون ادلة غير شهادة ابو يحيى

وانا مستعدة انضم لحملة كاميليا سيدة العصر والاوان... بس عشان تبقى قضية انسانية بقى فيه شروط:

1- الاخوة اللي راحوا يروعوا الناس قدام دار عبادتهم ويتظاهروا قدام جهة ليست ذات صفة مع ان القضية في ايد النيابة عايزة اشوفهم بيتظاهروا قدام سجن طرة للافراج عن المقبوض عليهم في قضايا "التشيع". اييييووون.. اييييوووووننن... ايه؟ هو التشيع ده مش حرية عقيدة برضه؟ يعني ايه يتقبض على ناس بتهمة التشيع مش فاهمة يعني؟ مافيش في القانون المصري تهمة اسمها التشيع، ومع ذلك، فيه ناس كتير اتقبض عليها بتهمة "التشيع". 

2- هم هم نفس الاخوة الاربعتلاف واحد اللي جم باتوبيسات سياحية يروعوا الناس قدام دار عبادتهم ويقولوا على البابا شنودة نجس... عايزة اشوفهم بيروحوا يتظاهروا قدام مجلس الدولة عشان يطالبوا بحق البهائيين في انهم يتكتبوا في البطاقة: بهائي. مش: --.. كأنه لفظ قبيح. وقالك يتكتبوا شرطة عشان احنا "مش معترفين بيهم". يعني ايه مش معترفين بيهم مش فاهمة؟ نمتوا مع الشغالة في الحرام وحملت خلفت بهائي؟ طب نعمل دي ان ايه. قالوا: لا.. اصل لو اعترفنا بيهم (اسمعوا بقى بتوع الانسانية) حيطلبوا معبد يصلوا فيه، ويمكن يطلبوا ان عيالهم في المدرسة ياخدوا دروس دين بهائية وما يحضروش مع المسلمين والمسيحيين! سامعين بتوع الانسانية وحرية العقيدة وسيادة القانون بيقولوا ايه؟ حق ان الانسان ياخد اودة يصلي فيها ويعلم ابنه ديانته... ده حق، مش مكرمة من سيادتكم، ومش مستني سيادتكم "تعترفوا" بيهم. هم بني ادمين، ولهم وجود، ومكونين من خلايا ولحم ودم، ومعتقدين في اعتقاد معين، والاعتقاد ده حقهم يتكتب في البوطاقة عدم اللا مؤاغزة، ولو عايزين مكان يصلوا فيه من حقهم، ولو عايزين يعلموا ولادهم ديانتهم من حقهم. وحكاية ان عددهم الفين واحد دي حاجة تحرق الدم فعلا.. لأن عدد كاميليا: 1 فرد. ولو اضفنا عليها الاخت تريزة والاخت وفاء بقوا: عدد 3 مزز. 

3- هم هم نفس الاخوة الاربعتلاف واحد ياخدوا بعضهم على مشايخ السلفية ويتظاهروا قدام بيوتهم ويطالبوهم بالاعتذار عن فتاويهم ايام الحرب على لبنان سنة 2006 لما قالوا على الاطفال الرضع اللي كانوا بيموتوا في جنوب لبنان "روافض" وحرام تدعوا لهم عشان "حزب الشيطان" و"حسن نصر اللات" اخطر على الامة من اسرائيل. اهي دي بقى لا حرية عقيدة، ولا سيادة قانون، دي ارواح.. ارواح اطفال وستات وناس بريئة، وهان عليهم يقولوا عليهم روافض، وهان عليهم يكرهوا الناس فيهم وهم بيموتوا، وهان عليهم يحرموا على الناس حتى الدعاء لهم بالنصر ومنظر الطفل الرضيع اللي راسه طايرة بيتذاع على كل القنوات. 

4- هم هم نفس الاخوة الاربعتلاف واحد ياخدوا بعضهم ويتظاهروا تاني قدام مجلس الدولة عشان كاميليا برضه، بس كاميليا أم اندرو وماريو اللي قلبها اتحرق وولادها اتخطفوا منها بحكم المحكمة، وفوق ده كله اتجبروا على ديانة هم مش عايزينها، وعلى العيشة مع راجل بيكرهوه، والقاضي قال في حيثيات الحكم "لأن الاسلام هو الدين الافضل"! 

5- هم ذات نفس الاربعتلاف واحد دولم، يشرخوا على الصعيد ويعملوا مظاهرة عشان اللي قطعوا ودن الواد يتحاكموا، واظن القضية دي اولى، لأن قضية كاميليا قدام النيابة، وقضية سلوى مقبوض على اللي قتلوها، لكن المقطوع ودنه اللي عملوا فيه العملة دي ما اتقبضش عليهم

في هاذوها الحالة

انا مدينة لفرقة كاميليا للانشاد الديني بالاعتذار، وابقى فعلا اسأت فهمهم، ويبقوا فعلا بيسعوا لدولة قانون وعدالة ومساواة، وبيستخدموا قضية كاميليا لتطبيق سيادة القانون، وحانزل اركب معاهم الاتوبيس السياحي والف معاهم على الشوارع وانام فيها كمان، انا اصلا باحب نومة الشارع

اما اذا تحججت فرقة كاميليا للانشاد الديني بان الروافض اخطر على الامة من اسرائيل، والبهائيين مؤامرة ماسونية، وفعلا الدين الاسلامي هو الدين الافضل، وايه يعني دي حتة ودن؟ 

يبقى حماسهم لقضية كاميليا - اللي تاني مافيش اي ادلة على ادعاءاتهم فيها الا شهادة ابو يحيى وشهادة ابو محمد وشهادة ابو جلمبو - هو حماس طائفي، وتبقى القضية دي قضية طائفية

واظن هم هم نفس الناس دي بنفسهم حكموا على اصحاب القضايا الطائفية لما قالوا ان ثورة البحرين انها ثورة طائفية، وبناء عليه، فيحل لملك البحرين انه يقتلهم، ويحط جرحاهم في التلاجات، وبعد ما يستنفد كل طاقة جيشه وشرطته، يستدعي لهم قوات اجنبية تدخل تضربهم... ويستاهلوا، اصل مظاهراتهم مظاهرات طائفية

حكمتم بنفسكم على نفسكم.... بالشفا