Tuesday 21 July 2009

ماحدش يشتكي من اخلاق اي حد تاني

اي بلد في الدنيا اقتصادها معتمد على البقشيش والسمسرة مش ح يبقى فيها ناس عندهم اخلاق، عشان لا الشحاتة ولا الحنجلة بتنتج بني ادمين محترمين
ماحدش بقى يكلمني على الدين، وللا الاخلاق، وللا قيم، ولا البلد مافيهاش رجالة، ولا فيها رجالة
احنا اتسترنا في السبعينات عشان كان فيه فرصة ان بعض المصريين يسافروا الخليج ويضخوا فلوس للبلد، لكن تجريف الاراضي وهدم الصناعة ابتدى من السبعينات، ولولا سفريات الخليج كان زمان البلد دلوقت معتمدة على....ما تخلوناش نتكلم
وعمالين يتمادوا في الخطة الاقتصادية اللي ابتداها السادات ودلوقت وصلت لذروتها
خصوصا بعد ما العراق (اللي كانت ساترة بيوت كتير برضه) اتهدت على دماغ المصريين ورجعوا هربانين وشقا عمرهم راح عليهم
يعني مافيش فرصة ان واحد يشتري حتة ارض ويزرعها
ولا حتى يعمل صناعة صغيرة
ودلوقت البلد بتاكل عيشها منين؟ من ناس تيجي من برة تصرف فلوسها علينا، يا نمد ايدنا وناخد تيبس (دلوقت الناس بقت تقول على الشغل: طالع لي "حسنة" كويسة منه) يا نهنكر ونشتغل سماسرة ونطلع كوميشن
دي مش شغلانات، دي سفالة، وانحطاط، وقلة ادب، وكل حاجة بقت معتمدة على البقشيش والسمسرة، حتى الطب، والهندسة، والفن، والصحافة، ده التدوين بقى كده، كل حاجة، كل حاجة
صلي بقى وربي دقنك وصوم اتنين وخميس، وحج بالفلوس اللي انت شاحتها كل سنة، مهما تعمل، انت عايش عيشة مش محترمة ومش ح تبقى محترم، انت متسول وفي احسن الحالات شماشيرجي بتطلع بسبوبة
من هنا بقى لحد ما ربنا يفك اسرنا من الورطة اللي ورطها لنا السادات وبينفذها مبارك بكل الاخلاص والتفاني - مما يجعله الوحيد اللي مخلص في شغلته ومهمته في البلد
نستحمل بعض بقى، نستحمل بعض على قد ما نقدر، ما نمشيش نشتم في اخلاق الناس، شوف اخلاقك الاول، اكيد اتأثرت بشغلانتك يعني، واللي مرتاح سنة يستحمل اللي تعبان اكتر منه، ما تبقاش راكب عربية مكيفة وتتخانق مع سواق ميكروباص وسواق عربية نص نقل وسواق تاكسي، احترم نفسك وخلي عندك كرامة - لما تفتري على الاضعف منك (حتى لو غلطان) يبقى انت بني ادم لا عندك كرامة ولا عندك دم ولا احساس، كتر خيره انه ما رفعكش بالمطواة عشان ياخد حقه، ما تبقاش راجل وتتخانق مع ست، ما تبقاش شاب وتتخانق مع راجل كبير (حتى لو قليل الادب - مش عارفة ايه اللي حصل الرجالة الكبار بقوا قلالات الادب قوي - بس استحمله بكرة تبقى قده) ما تبقاش مسلم وتتخانق مع مسيحي، ما تبقاش قوي او مرتاح شوية او عندك اي امكانية على اي مستوى وتتخانق مع الاضعف وللا الاتعب وللا الاعجز، احترم نفسك، لا بنشتغل شغلانات محترمة، ولا عايشين في بلد محترمة يبقى على الاقل نتصرف بشكل محترم عشان بس يبقى فيه امل
دي بلد لا فيها انتاج ولا فيها قانون يعني مافيهاش اي حاجة تخلي البني ادم عنده مرجعية اخلاقية، حتى الدين بيتفسر على مزاج صاخيب المخيل، وفيها ناس تعبانين، نساع بعضينا شوية، ونستحمل بعضنا شوية
لو الرحمة كمان راحت من البلد يبقى دي بلد ليه بقى؟ يبقى مالهاش لازمة اصلا، ربنا ح يجيب ضرفها، ولو جاب ضرفها مش حلو علينا 

14 comments:

mido said...

فى راجل عجوز سايق شتمك قبل كده ولا ايه ؟

:D

Unknown said...

راجل عجوز يشتمني مافيهاش حاجة اهو زي ابويا

انما صاحبتي تحرم تركب المكيف بسبب الرجالة العجايز

ح تعمل له ايه ده؟ لو كان شاب كانت بهدلته
لكن راجل عجوز تعمل له ايه؟
بطلت تركب المكيف وخلاص

Rasha said...

hi Nawara, it has been a while since I made a comment, but the did you get any information about the zoo, it is really going to happen, I thought there are some red lines no one can cross, but it seems to be the government, (ELHEKOMA) IS DOING WHATEVER IT WANTS NOW. IT IS A DISASTER.

tuhamy said...

الحكومة النظيفة ...الذكيه

هي اللي علمت الشعب الشحاته


يعني زمان أيام الفقر-علي رأي عادل إمام - كانت مصر بلد شهادات

دلوقتي احنا بلد شحاتين شحاتين

والشحاتة أدب مش هز اكتاف

وكلمة سر الشحاتة اليومين دول ًكل سنة وانت طيب ياستاذً
في كل أيام السنة

ولا هما الشحاتين كل أيامهم عيد ؟؟؟؟


اللهم ارفع مقتك وغضبك عنا

حسن على said...

الموضوع دة فى غاية الاهمية ....: كيف تكسب عيشك ؟؟؟ نوارة لخصت الموضوع بتبسيظ غير مخلة بالمعنى .يعنى ثقافة "جيف ايت ون سيجارت يا جونى" ثقافة البقشيش دى بتعلم الدونية التى تتطور الى امراض اخرى اكثر قبحا مثل الرشوة والاختلاس واستحلال المال - عام اوخاص مايهمش- تحت شعار (ناشف طرى هات)قلة الذمة والاستعداد لبيع اى مبداء مقابل المنفعة هو مستنقع قادنا الية السادات وزفت التانى دة كمان لأحساسهم انهم السادة الوحيدبن فى مصر وهما فى الواقع المعاش اقل من الخدم واحط من القوادين وبائعى الاعراض ومهربى المخدرات

حسن على said...

نسيت ان اذكر ان سياسة الرشاوى الفئوية(توزبع اراضى بمبالغ رمزية على فئة معينة(الشرطة مثلا)استجلابالولائها وسياسة"خذ ولا تقل"التى تعطى مبالغ خرافية لاصحاب مناصب معينة شرائا لذمتهم اومحاولة ذلك (القضاء)مثلا

mohamad said...

http://www.bbc.co.uk/arabic/worldnews/2009/07/090721_hh_britain_jobs.shtml

احمد سعيد said...

لا بنشتغل شغلانات محترمة، ولا عايشين في بلد محترمة يبقى على الاقل نتصرف بشكل محترم


طب بالعقل كدة

تيجى ازاى دى

يعنى واحد اتربى تربيه غبيه ومتخلفه

وشغال سمسار او شحات اوقواد ( بمختلف معانيها )والبلد اديكى شايفه


عاوزاة يتعامل باحترام ازاى؟
يعنى ابوك كذا وامك كذا هتجيب منين
الريحه الحلوة


فاقد الشىء لا يعطيه يانوارة

وعلى الرغم من ان كلامك صح

الا انه مينفعش يتطبق

لانها كلها منظومه واحدة

نزع الرحمه من قلوب الناس والسطحيه والغباء والتعصب الفكرى والعنصرى نتيجه حتميه وشىء مقترن بشكل كامل مع الفساد السياسى والانهيار الاقتصادى و( التفشخ ) الاجتماعى

طب هقولك قصه حلوة

هتفهمك اللى اقصدة كويس


كان فيه ايام محمد على راجل مستشرق انجليزى محترم قوى اسمه ادوارد لين

الراجل دة عاش فى مصر كتير واتكلم عنها كلام محترم وعميق قوى

اول مرة جه فيها مصر كانت فى بدايات تولى محمد على للسلطه

ايام ما كان لسه محمول على اكتاف الشعب وبيتسند عليهم ضد السلطان العثمانى اللى مش طايقه

مدح ادوارد كتير فى المصريين لما شافهم بيعملوا قدام محلاتهم احواض ميه علشان الكلاب الضاله والقطط تشرب منها فى حر الصيف !!!!!

واخدة بالك


اسبله معموله للقطط والكلاب

ومش واحد ولا اتنين لا , دا قدام كل محل ودكان


المهم


صاحبنا لين غادر مصر ورجع مرة تانيه فى نهايه حكم محمد على فى تلاتينيات القرن التاسع عشر


تخيلى قال ايه بقى ؟؟؟

الراجل استغرب من الاخلاق الحلوة اللى اتبدلت باخلاق زباله

والناس اللى عماله تلطش فى بعض عمال على بطال مع انهم مكانوش كدة خالص لما جه المرة اللى فاتت

الجميل بقى انه ملقاش اى اثر لاحواض الميه دى

بل على العكس

وجد الناس بيرجموا الكلاب والقطط بالحجارة والاطفال الصغيرة بتتسلى بتعذيبها وقتلها


اظن كدة قصدى وضح

:)

Anonymous said...

نوارة أحب اهديك مقال
http://shayunbiqalbi.blogspot.com/2009/07/2.html
تحياتى

simplymoi said...

Nawara Negm

You were busted in Youm7, so you belong to the upper class girl
:-)

هرطقة said...

"ضرورة القتال أمر يتصل بكل رجل وكل امرأة فى هذا البلد, إننا لو خرجنا من هذه الأزمة بحل دبلوماسى حتى وإن كان مقبولا, فإن هذا البلد قد يتحول الى مرتع للسماسرة بالنهار, ومرتع للغوانى بالليل"
الفريق عبدالمنعم رياض

واضح طبعا رأيه فى "مهنة" السمسرة
واضح برضه نتيجة "السلام"..ولا ايه

سبهللة said...

بصى بقى من الواضح كدة
ان البوست دة وراه حاجة
لان الحالة دى احنا عايشنها من سنين ايه اللى جد
انا اصلى عارفاكى ماتكتبيش الكلام دة
لله فى لله اكيد حصلك موقف او حاجة
يالا يا امورة
طلعى اللى عندك بالزوق
دة اولا
ثانيا بالنسبة لجملة

لا بنشتغل شغلانات محترمة، ولا عايشين في بلد محترمة يبقى على الاقل نتصرف بشكل محترم عشان بس يبقى فيه امل

طيب ازاى ؟؟
مابنى على باطل فهو باطل
اذا كان الشغل والعيشة مش محترمين
نتصرف بإحترام ليه
على أى اساس؟؟؟

Anonymous said...

هو انا عارف ان الموضوع صعب و ممكن يكون مستحيل تماما.. يا عالم..
لكن هيحصل ايه لو كل واحد بدأ بنفسه
.. يعنى لو الواحد ابتدا يعتبر الاخر فى الحياة العامة.. مهما كان ابن ستين كلب فى رأيك..
انا عارف بجد.. مرة كنت راكب ميكروباص, وباعت الأجرة للسواق, ست كبيرة خدت الأجرة ونزلت..
اه صدق, ده حصل.. والركاب كلهم كانوا نازلين ضحك..
بس ده مش معناه انى أبطل اتعامل مع الناس ك بنى ادمين.. الاحترام الغير مشروط, والفهم الغير محكوم..

Unknown said...

ههههههههههههه
والركاب ضحكوا؟

طب والله طيبين، اصلها حاجة تضحك فعلا
وبعدين اعملها بنية الصدقة، مدام سرقتها تبقى محتاجاها

انا مش عارفة يا اخويا هو احمد وسبهللة مصعبينها عليا ليه؟

هو انا طالبة حاجة صعبة
نعامل بعض كويس بس


انا خايفة يكون انا اللي بختي وحش عشان كده مش عايزة اعمم بس انا بامشي في الشارع بالاقي ناس كتير تقف وتنزل من عربياتها وبعدين تمسك في سواق عربية تانية ويطلع رقبته من الشباك ومن غير ولا كلمة دب دب دب في وشه
من غير يا ابن الكلب من غير يا حيوان من غير يلعن ابو شكلك
ضرب ضرب مافيش شتيمة

وبالاقي كتير قوي رجالة ببدل ومحترمين وماشيين يكلموا نفسهم واللي يتخيل نفسه عصفورة ويضرب بايديه كأنهم جناحات وعايز يطير

استغفر الله العظيم الحمد لله الذي عافانا
بس زمان المجانين كانت بتبقى هدومهم مقطعة ولونهم مدي على هباب من كتر ما بيناموا في الشارع ومش بيستحموا دلوقت بالاقي ناس عادية وبتكلم نفسها بصوت عالي

وناس كتير من غير سبب تطلع راسها من الشباك وتشتم بعض

مافيش حاجة ما حصلش حاجة، مش مثلا ده كسر على ده فالتاني شتمه
دول بيبقوا واقفين في الاشارة والتاني يروح مطلع راسه: يا حيوان يا ابن الكلب

انا قلت انا اكيد بختي مدوحس وعشان كده باشوف الناس دي

يارب يبقى مافيش حد غيري بيشوف الحاجات دي

ما نعامل بعض كويس يا ناس