تاني حرق بيت مسيحي الناس بتصلي فيه "من غير ترخيص"

تحديث:
احلى تعليق على الخبر بتاع الجزيرة واحد كاتب كدهو:
ayman


نحن المسلمين نضرب ونهان في كل مكان ولي سؤال عندما دافع رجل عن زوجته ضربتة الشرطة الالمانية امام ابنة والناس اجمعين لان المسلمين هناك اقلية فماذا تفعل الشرطةهنا مع الاقلية؟

طب يا جماعة، ماهو الراجل كتر خيره قال لكوا اهو، صح، انت صح، عشان بنتضرب في العراق وافغانستان وفلسطين وبنضطهد في اوروبا يبقى من حقنا ناخد فرصتنا بقى احنا كمان نضرب الناس ونضطهدهم، اسمعوني يا جماعة اسمعوني، انا اضرب، اضرب والنبي اضرب، يعني ح نعيش عمرنا كله نتضرب؟ مالناش نفس احنا كمان؟ وللا تف علينا الكلب؟
ييجي واحد غلس يقول لي طب ما تتشمللوا كده على امريكا واوروبا واسرائيل اللي بيدوكوا بالجزمة القديمة المتعاصة في الكنيف ويأكلوهالكوا بعد ما ينسلوها على دماغكوا، بتتشطروا على الغلابة ليه؟ اقول له عشان حضرتك حمار، هو كده، هم يتعافوا علينا واحنا نتعافى على اللي عندنا، حق ربنا
اكفر بقى، ما انت تلاقيك مسيحي 


والترخيص ده بيتاخد من مين لما الواحد يحب يصلي للي خلقه؟

الجزيرة واخدة بيان الداخلية ومنزلاه زي ما هو وللا ايه؟ اشتباكات طائفية؟

حصل فيها ايه؟

اصابة اربعة

مين؟

اتنين مسيحيين واتنين شرطة
ودي اشتباكات ايه دي اللي طرف واحد بس هو اللي مصاب ومعاه الشرطة؟ على اساس ان المسيحيين كانوا بيلسعوهم باللبانة؟

والله ما عارفة اضحك وللا اعيط

نص الخبر اهو

اعتقلت قوات الأمن المصرية عشرات الأشخاص عقب اشتباكات بين مسلمين ومسيحيين في قرية بمحافظة المنيا جنوبي البلاد، أسفرت عن سقوط أربعة جرحى هم اثنان من المسيحيين واثنان من الشرطة وفق مصادر أمنية.

وقالت مصادر الشرطة إن الاشتباكات اندلعت بعدما هاجم مئات المسلمين في قرية الحواصلية (200 كلم جنوب القاهرة) عقب صلاة الجمعة منزلا اتخذه مسيحيون كنيسة دون ترخيص، وحاولوا إحراقه لكن الشرطة منعتهم.

وتدخلت الشرطة بإطلاق الغاز المسيل للدموع لتفريق المشتبكين من مسلمين ومسيحيين (قصدهم تدخلت عشان تشيل السادة المسلمين من فوق المسيحيين). ونقلت وكالة رويترز للأنباء عن مصادر أمنية أن الشرطة تعقبت طرفي الاشتباك واعتقلت 37 شخصا أغلبهم مسلمون (اغلبهم؟ ده مفروض ان فيه مسيحيين مقبوض عليهم؟ عشان عملوا ايه؟ مناخيرهم معووجة واستفزت اللي هاجموهم؟)، في حين ذكرت وكالة الصحافة الفرنسية نقلا عن مصادر الشرطة اعتقال عشرين شخصا.

وأغضب مسيحي في القرية مسلمين في وقت سابق هذا الأسبوع بعدما أعلن أنه سيحول منزله المكون من أربعة طوابق إلى كنيسة (هو اللي غلطان، لو كان قلبه بيت دعارة ما كانش حد كلمه، عشان بيت الدعارة مالوش ترخيص)، وفق ما نقلت وكالة الصحافة الفرنسية عن مسؤول رفض الكشف عن اسمه.

وأكد مسيحيون أن المبنى الذي استهدفه المهاجمون كنيسة لم تحصل على ترخيص بعد، لكن مسلمين أشاروا إلى أنه بيت موظف مسيحي يدعي أنه قس (يا سبحان الله، بيته وهو حر فيه، يوقع محفظته مطرح ماهو عايز).

وتشهد العلاقات بين المسلمين والأقلية المسيحية في مصر اشتباكات دامية بين الحين والآخر بسبب نزاعات على بناء الكنائس أو حدود الأراضي أو علاقات الرجال والنساء.

(او بسبب خبط في كتفه وما قالوش سوري سوري سوري، او بسبب بياكلوا زيت تلاتربع السنة وبيخلصوا كل الزيت والمسلمين عايزين يحطوه على شعرهم، او بسبب ان معظمهم قصيرين والمثل بيقول كل قصير مكير، او بسبب انهم... كده غلسين، ياباي، سم كده) 

وكانت اشتباكات مشابهة اندلعت في قرية جنوب القاهرة بعدما أقام قس في منزله قداسا في يونيو/ حزيران الماضي، مما أسفر عن جرح 18 شخصا واعتقال 35 آخرين.(اغلبهم مسلمين برضه؟)

---------------

شوف بقى، وهم خارجين، من صلاة الجمعة

باكرر، من صلاة الجمعة، كانوا بيصلوا، وجد المجموع نفسه في حالة روحانية عظيمة، حالة روحانية عميقة، حالة روحانية خلتهم طايرين، مش قادرين يستحملوا الحالة الروحانية اللي هم فيها، يعملوا ايه؟ يسيبوا نفسهم كده لحد ما يطقوا من كتر الروحانيات؟

راحوا هاجمين على بيت لواحد مسيحي عمله كنيسة، بس ايه؟ من غير ترخيص

وزي ما تقول كده، السادة المهاجمين، بيحبوا القانون، بيموتوا في القانون، القانون ده نني العين من جوة، وزي ما تقول برضه، اصل مصر دي كل حاجة فيها بترخيص، كل حاجة ماشية زي ما الكتاب بيقول، كل حاجة لها ورقها وقانونها، البلد مش سايبة

احنا ولا فخر، نعتز باننا ما عندناش بيوت بتتبني من غير ترخيص اسمها عشوائيات

ولا عندنا محلات بتتفتح من غير ترخيص

ولا جراج من غير ترخيص

ولا زاوية صلاة من غير ترخيص

احنا بلد التراخيص، الترخيص احنا واحنا الترخيص

نموت نموت ويحيا الترخيص، اللي يفرط في ترخيصه يفرط في شرف بنته، وشرف بنته زي ورق الترخيص، ما يترخصش الا مرة واحدة، واللي مالوش خير في تراخيصه مالوش خير في امه، وقال على رأي المثل: رخصت فلان؟ ايوة.. حرقته؟ لا.. يبقى ما رخصتوش

طبعا المسيحيين "ادعوا" ان دي كنيسة من غير ترخيص

بس المهاجمين قالوا: لاااا، ده بيت لموظف مسيحي "بيدعي" انه قس

وطبعا هم زعلانين قوي عشان بيدعي انه قس، لانهم خايفين على شرف القسوسية من واحد موظف مدعي، واللي ما نرضاهوش على نفسنا ما نرضاهوش على غيرنا، وزي ما احنا ما بنسمحش لواحد خريج تجارة انه يبقى داعية ديني، ما نسمحش لموظف مسيحي يدعي انه قس

وهو ايه اللي يخليه يبقى قس هو؟ احسن مننا في ايه عشان يبقى هو قس واحنا لا؟ وهو مش موظف في مصلحة القسوسية، هو موظف في مصلحة تانية، يبقى بيكدب ليه؟

وبعدين ايه لزوم الاستفزاز؟ لا خلينا بقى موضوعيين، المسيحيين مستفزين ليه؟ ليه يبقى موظف وعنده بيت من اربع طوابق؟ وليه يحوله كنيسة؟ وليه عايزين يصلوا طيب؟ وبعدين ليه كده التفرقة دي؟ عايزين يصلوا ما يصلوا في الجامع يعني مع المسلمين، لازم كنيسة يعني؟ ايه التشدد ده؟ ثم هم مسيحيين ليه بقى؟ ما كل الناس مسلمة هنا، خالف تعرف يعني؟ ايه الغلاسة دي؟ 

ايه الحكاية بقى؟

ايه الحكاية؟ اعرف بقى، انا ما اديش عقلي لغيري ابدا، مين اللي بيحط شطة في ودان الناس ويخليها تعمل كده؟ (مشيها ودان المرة دي) مين؟ ماهو ماحدش يقنعني ان الدولة ما تديش تراخيص لبناء كنيسة ولما الناس تصلي في بيت ده يغيظ اي واحد مسلم، اي واحد، اي واحد في الدنيا، ما بقالنا الف وربعميت سنة المسلمين بيصلوا في الجامع والمسيحيين بيصلوا في الكنيسة، ايه اللي يغيظ في كده؟

ومين اللي وزهم في صلاة الجمعة عشان يخرجوا من الصلاة بدل ما يروحوا يتغدوا يروحوا يحرقوا الناس من غير سبب في "اشتباكات" حيث كان المسيحيين بيزعقوا زي الغول ويقولوا: شيلوه من فوقي لاموته

حسبي الله ونعم الوكيل فيك ياللي في بالي

حسبي الله ونعم الوكيل فيك، من امتى الغلبان بييجي على الاغلب منه الا من ساعة ما ربنا حدفك علينا؟