Wednesday 29 July 2009

بقينا ملطشة للي رايح واللي جاي حتى روبرت فسية

لا
حلوا انتوا بس عنا واحنا نبقى زي الفل، في المنطقة بتاعتنا الدول المحاصرة مستواها الاقتصادي والتنموي اعلى من الدول اللي عاملة علاقات كويسة مع الغرب
سوريا، سوريا اللي المفروض انهم غلابة قوي، حالهم احسن من حالنا، ومستوى المعيشة عندهم مرتفع اكتر مننا، ونسبة الفقر عندهم اقل، وعندهم انتاج وزراعة، بنستورد منهم قمح وفول، ما تجيش القاهرة اللي معمول فيها قلة ادب من المستثمرين الاجانب لما جوعوا تلات ارباع الشعب وتقول "المشكلة في العقل العربي" عشان ما عندهمش انتماء
ايران لما مستوى الفقر عندهم وصل تمنتاشر في المية عمالين يلطموا ويصوتوا ونزلوا يموتوا نفسهم في الشارع
وماحدش اتوكس غير مصر ولبنان والاردن عشان مشينا البطال مع الدول الغربية والبنك الدولي وبنك الاحتياطي العالمي والمعونة الامريكية حللللللللووووووووااااااااا عن سماااااااااااانااااااااااااااا
دماغنا بقى انت شوية، احنا اصلا نازلين شتيمة في نفسنا من غير حاجة مش ناقصاك انت كمان تطول لسانك علينا
ادي اخرة قلة ادبنا على نفسنا كل واحد رايح جاي ياخد من بقنا ويبيع علينا وامي دايما تقول لي: من دعا الناس الى ذمه، ذموه بالحق وبالباطل
لم تعابينك بقى انت زودتها قوي
وماحدش يدافع، دي قلة ادب، ونصب، وقطع لسانه لما يقل ادبه علينا، احنا نشتم نفسنا مايجيش الخواجة يشتمنا كأنه ح يعلمنا، وقال ايه؟ اتفاجئ لما جه مصر ولقى ان شباب جامعة القاهرة مخهم نضيف، اه، وجزمتهم انضف من مخك كمان يا سي فسية
والسنة اللي فاتت برضه قل ادبه علينا وعديناها له وقلنا ده عتاب محبة لما قال علينا فاسدين ونصلي ونرتشي ونصلي ونعذب، طب ده كلام علمي وللا كلام مصاطب؟ يعني هو كان عمل احصائية ولقى ان البني ادم لما يصلي لازم يعذب ويرتشي؟ وماحدش يقول لي اصله داعم للقضايا العربية، هو ح يمن علينا يعني؟ بياخد تمن دعمه لينا بانه يهزأنا، هو احنا يعني من قلة الاسياد اللي مستعبدينا رايحين نأجر اسياد كمان؟ ثم ان تقارير التنمية دي جلال امين شخرمها وشركها وخلاها ما تنفعش ببصلة، وايه اللي يخلي روبرت فيسك بيفهم احسن من جلال امين، جلال امين متخصص في الكلام اللي هو بيقوله وما بيقولش كلام جزافي من غير دراسة ولا احصائية زي اللي بييجي سايح ويمشي من عندنا يهزأنا
كفاية بقى قفانا اعرض
------------
هيه هيه هيييييييه، انا شمتانة، اما نشوف صحاب اسرائيل اللي بيشحتوا منها ح يعملوا ايه لما الوكالة اليهودية تفلس
-------------
ولما هم فالحين قوي زي ما كل الناس موهومة، مالهم ملحوقين على التطبيع قوي كده؟ المفروض انهم جزيرة الديمقراطية وجنة الله على الارض واحنا تواليت الشيطان على الارض، يبقى ح يموتوا يعملوا تطبيع كامل معانا ليه لو كانوا عدلين فعلا؟
خليك انت يا سونة اعمل كل التنازلات وادي دقني ان ابنك فلح، يعني يمرروه ويجيبوه رئيس ممكن، لكن ح يركبوا له مخ؟ ح يركبوا له احساس؟ ح يخففوا له دمه؟ ح يحببوا فيه الناس بالعافية؟ يعني ابوسك منين يا بخرا؟ ح يعيدوا تصنيعه ازاي ده؟ 

18 comments:

Unknown said...

اه يا بهيج
انت تالت واحد يقول لي انه بيدخل على مدونتي كل يوم وانه شايل مني وناوي لي على نية سودا

طب والنبي فيه واحد عنده مخ يبقى ابن الريس ويشيل من حتة مدونة لا طلعت ولا نزلت؟

mido said...

د . نادر الفرجانى فضح التقرير و هو طبعا كان من المساهمين فى كتابته من فترة


د. نادر فرجاني يكتب: تدجين تقرير «التنمية الإنسانية العربية»

بس انا موافق فيسك انا الانتماء عند المصريين بعافية شوية

مواطن مصري said...

على فكرة اللينك الاولاني خالص مش شغال عندي يا نوارة جربت اشغلة بكروم و فاير مشتغلش


المهم انا اتخنقت من ام روبر فيسك دة

ماسك مصر و نازل فيها مش هما السبب م هما الي احتلونا اما بني ادم معندهوش دم صحيح

Unknown said...

لا انا ما اعرفش حكاية اللي حواليه دي

انا اللي اتقال لي انه بيدخل المدونة كل يوم وبيشتم فيا جامد
:)
وناوي لي على نية وسخة

ربنا موجود
انا حسبي الله ونعم الوكيل
هييييييييييييه
بكرة نترحم على ايام عوكل

Unknown said...

الا قول لي يا بهيج
هو انت في الحرس الجمهوري وللا ايه؟
بتختفي ليه كل ما يبقى الريس في مشوار؟

mido said...
This comment has been removed by the author.
Unknown said...

باكلم بهيج

اصله كان بيقول لي ان جمال مبارك شايل مني وناوي لي على نية سودا
الكلمتين دول سمعتهم تلات مرات في اقل من يومين من كذا حد مختلفين عن بعض خالص

بيقولوا لي بيدخل المدونة كل يوم ومحروق مني
بذمتك يا شيخ
بذمتك ودينك
ده يبقى رئيس ازاي؟ واحد حاطط عقله بعقل مدونين

mido said...

a7a

ايه التخريف ده ؟

انت بتهرجى ؟

جمال مبارك ايه

Unknown said...

انا عارفة يا اخويا

يا اما الامن بقى باعت لي ناس تقول لي الكلام ده
مع اني ما عملتش حاجة يعني الفترة اللي فاتت
هو انا عملت حاجة؟

بس في ظرف يومين باقول لك تلاتة من ضمنهم بهيج قالوا لي نفس الكلام، وسبحان الله الظاهر متفقين مع بعض مع ان الاتنين التانيين ما بيعرفوش بعض: ناوي لك على نية سودا

ما اعرفش نية سودا ايه يعني؟
وواحد قال لي: انت اصلك ما تعرفيهوش ده مش زي ابوه ده سماوي وغلاوي زي شجرة الدر
هههههههههههههههه
ما داهية اكون تلاتربع اللي اعرفهم بيشتغلوا مع الامن
امال ايه المصادفة ان تلاتة يقولوا الكلام ده في يوم ونص؟

بقى بيدخل المدونة كل يوم؟

هيييييه

نورت يا جمال باشا
هم بيقولوا لك ايه؟ جمال باشا وللا الاستاذ جمال وللا ابيه جمال وللا ايه؟

اوعى تطلع انت بهيج
هيهيهيهيهيييييييييييي

Unknown said...

اه
والسفريات الكتير دي ما بتجيش غير لما الريس يسافر او يستقبل حد هنا ليه؟

Kalimalhus said...

اللى روبرت قايله مش بالسوء ده و خصوصا لو قريتى الأصل مش الملخص.. (متهيألى قريتى الأصل بس إنتى برضه مش بتستحملى حد يحك مناخيرك)..

الراجل بيحمل الأنظمة الديكتاتورية معظم المسئولية بما فى ذلك عدم شعور الناس بالمسئولية و الإنتماء نتيجة إحساسهم إن البلد مش بتاعتهم .. حكاية إن البيوت نضيفة (بتلمع) و الشوارع وسخة.. معناها إن العرب أكيد نضاف لكن حكوماتهم (اللى المفروض تنضف الشارع زى أى حكومة فى الدنيا) حكومات وسخة..

لما قال إن العرب حتى لما بيصوتوا فى إنتخابات حرة نسبيا بيختاروا الإنتماء القبلى و الطائفى .. و ده صحيح فى حالات كتير حسب حدة الإنتماء و مش طبيعى نتوقع من واحد أجنبى ما
يجيبش سيرته..

الترجمة كانت مغرضة فى بعض الحتت .. يعنى هو ماقالش إنه إندهش لما لقى طلبة الجامعة أذكياء و مثقفين .. قال كان سعيد بأن عدد أكبر من البنات كان بينهم و ده معناه إن البنت المصرية مش محرومة من التعليم و محبوسة فى البيت زى ما بعض الهبل فى الغرب ماهمه متخيلين و واخدين العرب كلهم قفة واحدة.. الراجل إندهش لما لقى معظم الطلبة دول عايزين يهجوا عالغرب .. و إحنا كلنا عارفين إن ده صحيح..

أنا مش بدافع عن الراجل و لا هاقول إنه فعلا مساند لقضايانا لأن ده مايديلوش الحق يسبخلنا بالباطل .. بس هو ما سبخش و لا تطاول .. قال حاجات حقيقية .. كان قاسى شوية .. بس الواحد يقدر يحس بحسن نيته..

بصراحة ما يستاهلش نشتمه قوى لأنك عارفة إن غيره بيشتم و يسب و يلعن سنسفيل جدودنا عن كراهية و تعصب إسود و رغبة داخلية فى إننا نتمحى من على وجه الكرة الأرضية..

Kalimalhus said...

ميدو
----
الفرجانى قال إن التقرير إتخفف .. يعنى الواقع أسوأ مما ورد بالتقرير.. و تانى إحنا كلنا أدرى بسوء الحال و الوضع المنيل بستين نيلة..

و إيوة إحنا سلبيين أنا و إنت و السامعين .. مش الغلابة المطحونين .. إحنا اللى المفروض نعمل حاجة إيه هى مش عارف .. بس قاعدتنا زى خيبيتها آخرتها هتبقى خربتها و نهايتها ..

mohamad said...

http://www.4shared.com/get/56434954/5c521d69/___online.html

بصي على الكتاب ده يا نوارة

شبكة مصر الفاطمية said...

والله هو الي قاله موجود
الاعتراف بالحق فضيلة
بلدنا بايظه على الآخر
وفعلا بيصلوا وبيرتشوا
عشان عالم وسخة ماعندهاش دم
ده كلام مفروغ منه
لكن فيه نقطة نسيتها ياعم روبرت
وهي لو ماكانتش بلدنا نظام واطي ماكانشي زمانك ياعم روبرت نازل تهزيأ فينا كده وعامل فيها مندوب سامي علينا
كان زمان المسئولين عندنا اعطوك بالجزمة وعايروكوا على بلويكوا
ولم تكن اسرئيل الآن بأمان
ولا بدلنا دلدول ليكم
فمن الآخر كل البلاوي الي انت بتنتقدها في مصر انتم سبب رئيسي فيها
فلو مافيش فساد هنا
ماكنتش مصر هتبأ دولة عميلة لكم تنفذ لكم كل طلباتكم
فهمنا ياعم روبرت
سلام

Unknown said...

انا شايف إن الراجل مغلطش فى حاجة
حتى لو تاخدو بالكو لما جه أتكلم على العقل العربى قال
انتابنى الشك أن يكون أصل المشكلة فى العقل العربى

يعنى الشك ما طلعش فى محله

ده غير النقطة بتاعت الشوارع والبيوت
فعلا البيوت نضيفة والشوارع أجارك الله
وده ذنب الحكومة

غير كده أنا لما بنظر لكلام واحد زى ده
بشوفه ممكن يكون ورقة ضغط على السلطة لتحسين الاداء
لأننا عارفين أن أهم شئ هى صورة النظام فى الخارج
مش مهم الشعب يموت من الجوع يتحرق يتسجن
لكن صورة النظام والسلطة لازم تكون حلوة للغرب
ده طبعا على أساس ان مصر اتحجمت فى النظام وأتباعه

Unknown said...

لا مؤاخذة ح ارد على اللهو الخفي

بالنسبة للتحقيق بتاع وسيم السلطات الروسية بتتلكع بطريقة غريبة جدا
مش عايزين يكملوا تحقيق
وبيتوهوا ولا كأنهم هم اللي قاتلينه
والسفارة المصري مطنشة ومهملة كالعادة
بس حاجة غريبة البوليس الروسي
الظاهر البوليس واكل كويس

بس ايه اللي يخلي المافيا تقتل وسيم؟ لا حيلته فلوس ولا عنده حاجة يطمعوا فيها دول حتى ما طلبوش فدية
ممكن يبقى حد من النازيين الجدد
ممكن تبقى مراته الله اعلم
بس مراته ح تقتله ليه برضه؟
وسيم مافيش وراه فلوس ولا اي مصلحة عشان يتقتل عشان خاطر مصلحة مادية

Dr Nemo said...

اسمه السيد جمال مبارك يا نواره الراجل متواضع اهه وبيعمل زى بتوع المخابرات فى روايات نبيل فاروق..... اسمه السيد...... طبعا لو هندخل فى الالقاب مش هنخلص.... انا مثلا مش بقول على خالد الذكر الا صاحب الحكمة الابدية....... الا قوليلى يانواره انا جايلى استدعا لامن الدولة مع انى مدون نص لبة يعنى ... فاكس ولا اروح اشتغل نفسى؟؟!

Unknown said...

استاذنكم اختي نوارة في وضع فيديو لمظاهرات تطالب بحقوق الشيعة المصريين امام السفارة المصرية بلندن بتاريخ 24/7/2009
وذلك بعد الاعتقالات الأخيرة التي طالت ناشطين شيعة مصريين
http://www.youtube.com/watch?v=7necU3ngnVc
فاعتقال الشيخ المصري الشيعي حسن شحاته وتعذيبه حتى ينقل لمشفى القصر العيني بين الحياة والموت حاليا امر لا يمكن ان يمر هكذا دون حتى تعليق واحد من حضرتك اختي نوارة
ودمتم بود