تمنتاشر طعنة في تمن دقائق والقاضي بيتفرج وما قامش من مكانه

الكاريكاتير من اليوم السابع

ده الفيديو اللي اخو الشهيدة بيحكي فيه بالظبط اللي حصل، الواد ده مش اول مرة يتعرض لها، ومش اول مرة يحاول يشد الحجاب من على راسها، ده ساكن في العمارة اللي قصادهم وكل ما يشوفها يشد الحجاب من على راسها ويقول لها انت ارهابية مسلمة مالكيش مكان بينا، هي اللي مالهاش مكان، هي الصيدلانية الاكاديمية مالهاش مكان، وهو العاطل الصايع له مكان

طيب هو عاطل وفاشل وتلاقيه سكري كمان

طيب القاضي هو والمستشارين بتوعه اللي قعدوا تمن دقايق من غير ما يتحركوا من مكانهم وبيتفرجوا على الست وهي بتطعن 18 طعنة وبتفرفر؟

بلاش، قول القاضي راجل كبارة، وقد والدنا، ولازم كلنا ايه؟ نحترمه

طيب ظابط البوليس اللي استغاثوا بيه فدخل لقى خناقة راح ضارب جوز مروة بالرصاص ولما اتسأل ليه عملت كده قال: انا خمنت انه هو اللي عامل المشكلة!

بلاش الظابط، ظباط الشرطة في كل حتة مخهم على قدهم وبينقوهم يدوبك بيفكوا الخط

طيب الاعلام الالماني اللي تجاهل الموضوع وجابه في خبر سريع كده كأنه حادثة عادية وقال: الجريمة غالبا مش مع سبق الاصرار والترصد لانها نتيجة مشاجرة!

بلاش الاعلام، اهي ناس بتاكل عيش وفي كل حتة الاعلامي بيستنى اوامر (يا من الحكومة يا من صاحب المال) عشان يعرف ح يقول ايه

طب السفارة المصرية اللي قالت: لا ده الالمان يتحطوا على الجرح يطيب ودي مجرد مشاجرة مالهاش اي ابعاد عنصرية؟

بلاش السفارة، قد يكونوا خايفين على رقبتهم هم كمان وهم في الغربة

طب وزارة السياحة اللي قالت ان السياحة الالماني لن تتأثر بالحادث وان دي مجرد مشاجرة

الا دي بقى، الا دي، شوفوا بقى، انا هايفة وفيه حاجات كده صغيرة تسخن لي راسي وتخلي النمل يجري في عروقي، انا باكره التسول، انا عندي السرقة اهون من التسول، ايه التسول ده؟ مش ممكن بلد بحالها، دولة باكملها، ماسكة فوطة صفرا وبتمسح ازاز العربيات وتقول كل سنة وانت طيب يا باشا في كل ايام السنة، حمد الله ع السلامة يا باشا، في وسط ميدان التحرير، مافيش مطار قريب من هنا وحمد الله ع السلامة برضه

يعني نروح فين يعني؟ نقعد في بلدنا نتهان، نسافر دولة عربية نتجلد، نسافر دولة غربية نتقتل؟ نروح فين؟ هي لعنة يعني علينا؟

انا قلت لكوا، قلت لكوا، مشكلتنا اننا عادينا عوكل، والحاجة ام عوكل قالت له ربنا ينصرك على مين يعاديك ويذل عدوينك ويجعلهم عبرة خلقه

رجاء نشر الفيديوهات دي

ومراسلة السفارة الالماني

للمراسلة باللغة العربية اضغط هنا

للمراسلة باللغة الانجليزية اضغط هنا

وياريت تراسلوا بالاتنين
وانا بس حبيت افكركوا ان الاتحاد الاوروبي، بما في ذلك المانيا، ح يفرضوا عقوبات على ايران عشان ندا، مش عشان ندا مزة ولا حاجة، عشان اللي قتلها ايراني، ولو اللي قتلها الماني ما كانتش سيرتها اتجابت، وعايزة افكركوا برضه بكم الشرشحة وقلة الادب اللي سمعناها من بعض المصريين لما مصري اتجلد في السعودية، مع ان المفروض كنا نطالب بحق الطبيب المصري ونعمل له حملة من غير ما نقل ادبنا على كل الشعب السعودي اللي هو اصلا بيعاني من نظامه اكتر من الطبيب المصري، وحبيت افكركوا تاني لما الغزاوية كسروا الباب ودخلوا عشان جعانين وبيتشتموا لحد اللحظة دي، وحبيت افكركوا ببرنامج السي ان ان الشهير: مذبحة في موباي، لما واحد مسلم قتل حاخام اسرائيلي ومراته، لانه كان خاطفهم وعايز فدية، مش لانه عنصري ضدهم ولا حاجة، ولما ما رضيوش يدفعوا له الفدية ولقى البوليس جاي يقبض عليه راح قاتلهم عشان يهرب، وكانوا بيذيعوا البرنامج ده ايام حرب غزة، والله العظيم تلات مرات في اليوم، وبيعلنوا عنه بتاع عشر مرات في اليوم، في كل فاصل اعلاني، في عز عز حرب غزة ما كانوش بيجيبوا غير البرنامج ده اللي بتقدمه زفتة الطين كريستيان امانبور

وانا زههههههههقت من النفاق ده

وزهققققققققت من عقدة الدونية

ومش مستحملة اي حاجة من الاتنين دول خلاص، خلاص، مش ح ابلعهم تاني، واي كلب منافق وللا شحات عنده عقدة دونية ح انشر لسانه بالمنشار وانسل الشبشب على راسه

قال السياحة الالماني قال