الولد ده مات؟
الصورة دي نزلت على ان الولد ده بعد 23 يوم من الغياب السلطات في ايران ابلغت اهله انه مات
مش عارفة اسمه ومش عارفة اذا كان الخبر صحيح وللا لا
ييجي واحد يقول لي وانت مال اهلك انت؟ ما تخليك في نفسك
والله هو مبارك بيعمل كده وكل حاجة بس هو عمره ما قال على نفسه بيعرف ربنا، ولا جه بثورة، ولا انتخاب، يعني ابوسك منين يا بخرا
اتق الله يا نجاد، ده انت حتى بتصلي يا اخي، اقول ايه بس؟
دول مش كفار، دول بيقفوا على السطوح يقولوا الله اكبر
دول مش جواسيس، مافيش جواسيس بالعدد ده كله والا يبقى نظام خايب قوي اللي ساب كل العدد ده يجند
دول مش اعداء، دول ولاد البلد
ودول مش صيع عايشين برة يسكروا ويتصرمحوا ويشتموا في بلدهم زي الايرانيين المتفرنجين ولا هم مجاهدي خلق، دول رباية الثورة، وعيال صغيرة، ولهم صوت ولازم يتسمع
اتقوا الله
اتقوا الله
اتقوا الله في نفسكوا قبل ما تتقوا الله في العيال دي
يارب يطلع الخبر مضروب
المدون الايراني بعت لي النهاردة يقول لي:
Pray for us
23 comments:
اخيرااااااا اقتنعتي
يا سبحان مغير الاحوال مكان من زماننننن
الحرية ل الاخ الي في الصورة دة
هو اسمة اية بقى؟ مدونتة معلومات عنة
اخيرا اقتنعت بايه؟
والحرية للاخ اللي في الصورة ازاي؟
مدونته؟
وانا اللي باقول على نفسي مهيسة؟
ده انا ست العاقلين
ما فية ناس كتيرة زية يا نوارة
فيه ناس كتير زي مين في ايه؟
يا ماشاء الله
ده ايه الفتوح ده كله
ده انت لقطة
انا عايزة جملة مفيدة، انت مش نايم كويس وللا ايه يا مواطن؟
انتى شوفتى الخبر
المنشور فى المصرى اليوم
من يومين
عن اعدام فلان و فلان
بتهمة محاربة الله
؟!!!
مين فلان وفلان اللي بيحاربوا الله دول؟
لا ما شفتش الخبر
هو اتجنن ده وللا ايه؟
ده بينتحر كده
انت مشفتيش الناس الي رفعو قضية بتهمة
محاربة الله و رسولة عشان معارض لنظام الايراني
اتفضلى الخبر
إيران تعتزم إعدام ١٢ متمرداً بتهمة «محاربة الله»
http://www.almasry-alyoum.com/article2.aspx?ArticleID=218663&IssueID=1464
دول مش تبع الاحتجاجات الاخيرة يا بدراوي
انا باحسبهم تبع الاحتجاجات الاخيرة
ومتهمين بتهمة الخيانة العظمى
يعني هو مش عشان احنا بطلنا نعدم الجواسيس، احنا زمان كنا بنعدهم
مش هبة سليم اعدمت عشان كانت بتتصل باسرائيل؟
وللا ما كناش نعدمها؟
اذا كان اخوه بيقول بياخد فلوس وتعليمات من امريكا
حرام عليك افتكرت ح يعدموا حد من العيال بتوع موسوي
لأ انا بتكلم على حتة محاربة الله
يتحاكموا بتهمة الخيانة العظمى ماشى
لكن تهمة محاربة الله ضد تهمة طريفة اووووى
قال يعنى النظام الإيرانى هو ظل الله على الأرض
ديه تهمة فيها نصب بإسم الدين
التهمة ثابته خيانة اه ماشى لكن متقوليش محاربة الله
مواطن
مين اللي رفع قضية بتهمة محاربة الله
دي رابع جملة مش مفيدة ما افهمش منها اي حاجة
انا ما بانامش كويس انا كمان
بس مش للدرجة دي
لا يا بدراوي
ده حد الحرابة موجود في الشريعة اسمه كده: محاربة الله والرسول
وده مالوش علاقة بالنظام ظل الله على الارض وللا على البحر
ده المصطلح الشرعي للخيانة العظمى، الخيانة العظمى مصطلح جديد، لكن في الشريعة محاربة الله والرسول مظبوط كده تفسيرها عند كل الناس (اقصد كل المذاهب) هو موالاة اعداء الامة ومساعدتهم على الغزو بالسلاح او المعلومة
حتى تفسيرها كده (بس مش ده النص يعني) عند ابن كثير
ومحاربة الله والرسول مالهاش علاقة بمحاربة النظام لان دول مش بيحاربوا النظام دول بيساعدوا امريكا على غزو بلدهم
يعني بيتسببوا في قتل الناس
وقتل الناس الابرياء اكبر حاجة
انت ازاي يا بدراوي فايت عليك حاجة زي دي؟ ما بتقراش قرآن؟
لأ بقرا قرأن
و عارف حد الحرابة
بس ده دلوقتى بيتسخدموه ضد اى حد
يعنى فلانة قلعت تبقى بتسعى فى الأرض فساد
و ده حقيقى اه
بس مش حله اننا نقطع رجليهم و ايديهم
ياريت متدخلنيش فى نقاش دينى
انا مش اده
هي الناس كلها بترد على حاجات تانية وللا انا اللي بقت اخلاقي كنزة؟
يا بدراوي
حد الحرابة معروف هو قتل الابرياء الامنين او الاعانة على قتلهم
مافيهوش اي فصال الموضوع ده
في اللنك اللي انت جايبه حد الحرابة متطبق مظبوط
وطول عمره (قبل معاهدة السلام) كان بيطبق عندنا اللي هو اسمه الخيانة العظمى
وفي كل حتة في الدنيا من اول امريكا لحد الصين الخيانة العظمى، اللي هي قتل الابرياء الامنين او اعانة العدو على قتلهم، او اللي اسمها محاربة الله والرسول (لان حرمة انسان واحد اكبر من حرمة الكعبة عشان كده اتسمت محاربة الله والرسول) عقوبتها الاعدام
حتى في الدول اللي مافيهاش اعدام النوع ده من القضايا بيتحول عسكري والمتهمين بياخدوا اعدام
ايه دخل واحدة ترقص يقوموا يقولوا عليها بتحارب الله والرسول؟
وهم مين دول اللي قالوا كده؟
مالكوا يا شباب مصر؟
انتو نسيتو ان النظام الايراني بيعتمد
على
ولاية الفقيهة
يعني معتبر نفسة معاة توكيل من الله سبحانة و تعالى كهنوت
زي التهمة ال اتهو بيها الموسوي و المتظاهرين معاة انة بيعادي الله و رسولة
مواطن مصري
قوم اشرب فنجان قهوة
انت عمال تهلوس من الصبح
ياريتهم كانوا اتهموا موسوي باي حاجة
الا خالعينه من كل حاجة وعمالين يقبضوا على العيال
وما قالوش عليهم بيحاربوا الله ورسوله قالوا بيعملوا شغب
انت شارب ايه ع الصبح انت كمان
يا نوارة
اقرى الأية ديه
{إِنَّمَا جَزَاء الَّذِينَ يُحَارِبُونَ اللّهَ وَرَسُولَهُ وَيَسْعَوْنَ فِي الأَرْضِ فَسَاداً أَن يُقَتَّلُواْ أَوْ يُصَلَّبُواْ أَوْ تُقَطَّعَ أَيْدِيهِمْ وَأَرْجُلُهُم مِّنْ خِلافٍ أَوْ يُنفَوْاْ مِنَ الأَرْضِ ذَلِكَ لَهُمْ خِزْيٌ فِي الدُّنْيَا وَلَهُمْ فِي الآخِرَةِ عَذَابٌ عَظِيمٌ }المائدة33
و اعملى سيرش صغير بإسم الشيخ اللحيدان و الشيخ الفوزان
اللى افتوا بتطبيق حدالحرابة على اصحاب القنوات الفضائية و انتى تفهمى قصدى
هم دول ايرانيين؟
لأ سعوديين
بس انا قصدى اوضح ليكى
ان الآية بيتم استخدامها بشكل مختلف عما تقصديه
اه
انت بتستطرد يعني؟
اصل ده مش منطبق على اللنك اللي انت جبته
ولا له علاقة بظل الله على الارض
اصلا الجملة دي مش من الادبيات الاسلامية
وللا انت معترض على التسمية؟
طب ما فيه ناس بتصلي وبتسرق، نبطل نصلي؟
يعني اللي بيطبق حد الحرابة صح يبطله عشان فيه ناس بتستغله؟
طب ما حقوق الانسان بقت سبوبة وحصان طروادة
نبطل نتكلم عن حقوق الانسان؟
طب ما الديمقراطية جابت الخراب على العراق
نبطل نطالب بالديمقراطية؟
أعتقد تخوف بدراوي هو استخدام النظام الايراني لمبدأ "الحكم بالامر الالهي" و ان معارضي النظام ينظر لهم علي انهم معارضي لله فتلفق لهم تهمة الحرابة.
و الاصل التاريخي هو هذا النظام الذي كان معمول به في العصور الوسطي في اوروبا حيث اجتمعت سلطة الكنيسة و سلطة الدولة في يد الملك مما اعطي الملك عصمة الهية فكما ان الله لا يخطئ فكذلك ورث الملك العصمة من الخطأ و اصبح من يحارب الملك يحارب الله و بذا وجب قتله.
معلومة طريفة... يستمد القانون في ولاية تكساس اصوله من القانون الانجليزي القديم الذي يعطي الحاكم مثل هذه الحصانة الالاهية و ورثت حكومة تكساس هذه الحصانة فهي لا تخطئ و لا يستطيع مواطني تكساس مقاضاة الولاية او اي من اجهزتها من خلال محاكم الولاية الا اذا سمحت الولاية بذلك و اذا حدث و خسرت الولاية (غير محتمل) فلا يمكن الرجوع عليها باي تعويضات (طب ايه كان لازمة النقاضي) باي حال من الاحوال. و يمكن فقط مقاضاة ولاية تكساس او اي من اجهزتها امام المحاكم الفيدرالية و بموافقة الولاية نفسها و لكن بدون الزام الولاية بدفع اي تعويضات.
السلطة الالهية كان معمول بها في العصور الوسطى في اوروبا
ده برضه ايه دخله بحد الحرابة
لا حد عمره كان عنده حصانة الهية
ولا عمرنا في حياتنا كان عندنا النظام ده لا في العصور الوسطى ولا في العصور الاولانية ولا الاخرانية
ولا حد الحرابة له علاقة بده كله
ايه العلاقة مش عارفة؟
حد الحرابة موجود
وله اسم تاني حداثي اسمه خيانة عظمى
طب ما الخيانة العظمى برضه ممكن تستغل بنفس الطريقة
ايه دخل العصور الوسطى والسلطة الكنسية في الموضوع
اذا كان احنا ما عندناش سلطة كنسية
الوووووووووووووو
الووووووووووووووووووووووووووو
دي حاجة كده عاملة زي ما تقول لي اصل انا خايف اركب العربية مع اخوها مع اخويا عشان سمية لما راحت النادي مع جوزها واحدة بنت حرام لافت عليه وخطفته منها واتجوز عليها
طب وده ايه علاقته بانك تركب مع اخوك العربية؟
ماهي سمية راحت مع جوزها بالعربية
اه
بس انت واخوك مش رايحين النادي
ثم ان ده اخوك مش جوزك
ثم انت اصلا راجل مش ست
بصوا ياجماعه
بص يابدراوى
فيه مقوله بتقول
لاتعرف الحق بالرجال
ولكن اعرف الحق تعرف الرجال
بمعنى
ماتلفظش الحق علشان واحد سافل بيستغله وبيشوهه وبينحرف بيه للباطل
الحق حق
اللى بيطبقه يبقى هو دة الراجل ايا كان والعكس صحيح
والرجاله اللى انت بتقول عليهم دول
الفوزان واللحيدان والبتنجان
وطقم مشايخ عاصفه الصحراء اياهم دول
مش جديدة عليهم يعنى
ايشحال ياعم بدراوى لو مكنتش مديك اللينكات من فترة
تسلط الانظمه واستغلال الدين وتحريفه لدعم النظام الفاسد
دى معضله البشريه من اول ما اتكونت حاجه اسمها دوله
ومافيش لا دستور ولا قانون ولا عرف هيقدر يتصدى لدة
صمام الامان الوحيد هو الشعب
وعقل الشعب
انه يميز بين الصح والغلط
وبعدين يغير الغلط بايدة
يعنى اكيد مش الحل اننا نبطل الشرع يعنى
ونا عارف انك متقصدش كدة
بس زى نوارة ماقالت
حد الحرابه معروف
وشروط تطبيقه كمان معروفه
اما بالنسبه لخوفك ان دة يتطور بعد كدة
فمتخافش
الشعب الايرانى مهواش زى الشعب السعودى ولا زى الشعب المصرى
دة شعب ثورجى
واديك شفت عملوا ايه فى الشاة
والفقيه اللى انت خايف منه
اديك شفت لما قال كلام ميعجبهمش مسحوا بيه الارض ازاى
دول ميتخافش عليهم
الرك والباقى بقى علينا احنا
بتوع الشيخ ابن باز قال وابن عثيمين عاد
والكرسى حرام والبنطلون حرام
ادعيلنا يابنى ربنا يسترها معانا
Post a Comment