Saturday, 25 July 2009

هو سيادتك مش معانا وللا ايه؟

انا مستنية مرعي (مش بتاع الكلمة مرعي المدون) بينزل فيديوهات اعتصامات العمال في طنطا وح انزلها لكوا عشان بس نقدر الناس حق قدرها
انا مش كل ما ح امشي وللا اتكلم مع حد اسمع شتيمة في "الشعب المصري" زي الشيخ عبد الباري: هو ربنا عماكوا من شوية؟
- هو سيادتك مش معانا وللا ايه؟
- انا؟ انا مؤمن، والمؤمن مصاب
انا عايزة اعرف هو احنا مالنا؟ اقصد الشعب المصري اللي بيتشتم عمال على بطال من مواطنين من الشعب المصري برضه، وللا هم فاكرين نفسهم لوردات انجليز؟ ايه اللي وحش فينا في سياق ظروفنا؟ وايه المصلحة في هدم نفسية المصريين وتحطيمهم واصابتهم باليأس والقاء اللوم عليهم في كل حاجة؟ عشان يبرأوا مين؟ يبرأوا مبارك، وللا يبرأوا امريكا واسرائيل اللي مشغلين مبارك؟ وللا بيسبقوا قبل ما حد يقول لهم: يا فشلة؟ طب ولزومه ايه؟ ادي احنا بنتعكز على بعض، هو احنا لينا حد غير ربنا؟ هو احنا لينا دولة وللا سفارة وللا مجتمع مدني يسأل علينا من غير اجندة وللا قانون بيطبق؟ احنا لنا مين؟ احنا اللي اتعمل فينا لو اتعمل في جبل كان اتهد، هو فيه حد في الدنيا بيتعمل فيه ده كله ويطلع سليم؟
والناس لا هم "عبيد" ولا متخلفين ولا اي حاجة، اللي احنا فيه يخلي الناس تمشي تموت بعض في الشارع
ثم يا اخي ما تشوف نفسك يا اخي، ما تشوف نفسك، يعني هاذوها المجموعة اللي مصممة تحطم معنوياتنا لما بيقولوا: شعب متخلف، شعب سلبي، شعب شرير، شعب قاسي، شعب وسخ، شعب بلا بلا بلا
قصدهم ايه؟ قصدهم ان كل الناس وحشة وهم اللي كويسين؟ طب ولما هم كويسين ما عملوش حاجة عدلة ليه؟ وللا بيبرروا لنفسهم تقصيرهم بان الشعب هو اللي وحش؟ انا مش عايزة اعرفهم الناس دي تاني، اللي بيتكلموا كده، ما يكلمونيش تاني عشان بعد ما باقفل معاهم باعيط وبطلت ادخل المدونات اللي بتتكلم كده عشان ما اعيطش
ده ظلم
ماهو يا انت شايف نفسك وسخ ما تعممش على الشعب كله وتقول شعب وسخ، خليك راجل كده وشجاع وقول انا عيل وسخ واللي له عندي حاجة ييجي ياخدها
يا انت شايف نفسك انضف من كل الناس، اديني امارة بقى وقول لي انت عملت ايه يا عم عرابي، على وشك يبان يا نداغ اللبان، طب احنا كلنا وحشين وزبالة وانت فين بقى يا باني الاهرامات وبرج القاهرة والسد العالي في تلات ساعات وتمنتاشر دقيقة؟ ما تكنس الزبالة
اللي مش عاجبه البلد وشعبها يفارقنا من غير شر ويرحمونا من الطراش في ودن الناس وارسال رسائل سلبية لهم عشان يحطموا معنوياتهم، فشرتوا، لا عشتوا ولا كنتوا، احنا عندنا سبعتلاف سنة، مش كام كلب مهزومين وعينهم مكسورة وفضايحهم الله اعلم بيها ورسوله والمؤمنون جميعا يبقوا هم دول احنا ويتعمموا علينا، كل شعب فيه ناس وحشة، وفي وقت الفيضان الزبالة بتقب على وش المية، معلش، بكرة تروق وتحلا بـ"أما ما ينفع الناس فيمكث في الأرض" بس الغمة تزول، وح تزول ان شاء الله، عدا علينا اوحش منها وكله طلع في الغسيل وما يفضلش من بني ادم غير ذكره وعمله واقل ارزقي امي بيسعى على اكل عيشه احسن وانضف واشرف من المتقعرين اللي بيشتموا فيه وهم ما يقدروش يقفوا وقفته في الشمس نص ساعة بس، ويحشر المرء مع من احب، اللي بيحب الخواجات يشبع بيهم
الرسول كان بيقول: اللهم احيني مسكينا وامتني مسكينا واحشرني في زمرة المساكين
وانا كمان يارب وانا والنبي كمان يارب
الرسالة دي جات على التويتر من منعم تقريبا وعرباوي نقلها
RT @3arabawy تعالوا نبعت احنا فاكسات للنائب العام لسرعة الافراج عن عياش ابو خليل ومجدي سعد وده رقم الفاكس 0225774716

5 comments:

mido said...

بمناسبة الهموم المصرية اللى تهد جبال



يا جبل
مايهزك ريح

مهندس مصري said...

خارج الموضوع معلش
شوفي الموضوع المنشور في البوستين دول


http://misr-islamiya.blogspot.com/2009/07/blog-post.html



http://churchnewss.blogspot.com/2009/07/blog-post_8498.html

مهندس حر said...

ما ينفعش ناخد الشعب المصرى كده شاقلة واحدة على بعضها..

عموم الشعب من المسحوقين حياتهم كلها بتدور حوالين البحث اليومى عن لقمة العيش اللى لو بطلوا يشتغلوا يوم مش هايلاقوها .. و دول رغم إنهم الضحية الأولى لكل جرائم النظام إلا إن مطالبتهم بإدراك الحقيقة دى و مطالبتهم بإنهم يكونوا وقود ثورة تطيح بالنظام هو ظلم و سذاجة فى الوقت نفسه .. فى الحقيقة إتهام الناس دى بالسلبية هو غباء شديد لأن أقصى درجات الإجابية المتاحة ليهم هى فى البقاء على قيد الحياة من يوم ليوم..

لكن فيه طبعا طبقات أعلى .. و دول رغم معاناتهم من جرائم النظام و بالرغم إن لديهم القدر الكافى من الوعى لإدراك إن الخروج من دائرة الفقر أو التهديد بيه و إن الحصول على كرامتهم المهدرة و إصلاح حال بلادهم لن يكون إلا بإزاحة النظام فمعظمهم بيتجاهل الحقايق دى لدرجة إيهام النفس بإنها غير موجودة .. و البقية إما تدعى العجز اللى هو تبرير الجبن أو بيرموا العبء على الطبقات الأدنى بحجة أنهم ماداموا يعانون أكثر فلماذا لا يثوروا .. و هؤلاء يريدون ثورة يذهب ضحية لها غيرهم و يجنون هم ثمار نجاحها إن نجحت أو يكونون بمبعدة حال فشلها و لا ينظرون إلى الفقراء إلا أنهم وقود للحرق أو إحتياطى تعبوى و يسوءهم أن وقودهم المزعوم يدرك بفطرته أنه لا خير فيهم و أنهم لا يختلفون عمن خدعوه قبلا..

اللى عايز ثورة يروح يقوم بيها و مالوش دعوة مين هايقف معاه أو وراه .. أو يدور على سبيل يقدم بيه للناس بديل مقنع فعلا مش مجرد خيالات و أوهام.. العمل لازم يبتدى من الطبقات اللى عندها القدرة و عندها الوقت و اللى مش هايموتوا من الجوع لما يأجزوا يومين يكافحوا فيهم كل أسبوع.. على الأقل دول خدوا حاجة من البلد و عليهم دين يردوه.. لكن اللى ماخدش غير على دماغه ياريت نسيبه فى حاله..

جبهة التهييس الشعبية said...

مهندس حر

لا فض فوك

انا بقى ما باسمعش شتيمة الشعب المصري "المعفن" "المتخلف" الخ الخ الخ

غير من الطبقات اللي انت بتقول عليها عندها وعي وادراك وعايزين يقعدوا في البيت يدوا اوامر للناس وغيرهم يموت
ولما الشعب ما يسمعش كلامهم اللي بيقولوه على النت لانه اصلا مش بيدخل على النت يشتموه

أبويوسف said...

انا مستغرب ان البوست دة اخد 4 كومنت بس.
مع انه اكتر حاجة كتبتيها هزتنى يا نوارة و انا متابعك على الاقل من سنه.
يمكن لانى كنت واحد من الناس اللى بتتكلمى عليهم مشيت من مصر رغم انى بعشقها و جيت امريكا استفدت منهم فى حاجات و افدتهم فى حاجات لكن لما كنت بقول احنا سلبيين ونستاهل اللى بيجرالنا مكنش دفاع عن عوكل ولا تبرأة لامريكا دة كان غيرة على بلدى و أحساسى أن المواطن الامريكى هنا بيتمتع بحقوق نفسى ابويا و اخويا فى مصر يتمتعوا بيها لانهم بجد يستاهلوها.
جه البوست بتاعك و حطنى فى الكورنر لاما تقول الشعب سلبى و وسخ و أنا أولهم لأما أقول كتر خير الناس.
وبعدين جه مهندس حر و أداهملى فى وشى الناس اللى مش لاقيى تاكل مش هتثور و لو ثارت هتبقى ثورت جياع مش الثورة اللى بتحلم بيها. لكن التغيير لازم يجى مننا احناالناس المتعلمه و اللى عندهم رفاهية التفكير فى التغيير.
بس زى ما حطتينى فى مشكلة لازم تحليهاخلاص هقول كتر خير المطحونيين بس دلوقتى بقول السلبى الوسخ هو طبقتنا المثقفة رأيك ايه نعمله علشان منبقاش كده و أنا بتكلم عن جيلنا احنا التلاتينات و اخواتنا الاصغر مننا علشان منقولش الاجيال الاكبر خذلونا لاننا مش قصر