Monday 27 July 2009

اشوف فيك يوم يا لطفي

زمااااان ايام ما كنا بضفاير، واحدة صاحبتي اتقدم لها عريس قال لها: حسني مبارك اذكى رئيس جه مصر
قامت رفضته
هي الحقيقة مش رفضته هي قامت وسابته في وسط ماهو بيتكلم، وانا باطالبها من موقعي هذا انها تدور على عنوانه وتبعت له جواب اعتذار، عشان طلع معاه حق، لان الراجل ما قلهاش حسني مبارك اكتر واحد بيحب المصريين، هو قال لها اذكى رئيس حكم مصر
مشاعره ناحية المصريين بقى هي ما ادتوش فرصة انه يشرحها لها
ايه كانت مشكلة حسني مبارك اول ما مسك مصر؟ (غير انه بيكرهنا لله في لله من غير ما نعمل له حاجة) الجماعات الاسلامية المؤمنة بوجوب الثورة على الحاكم الظالم، ولولا انهم اتغابوا في اليات الثورة دي وده اللي قلل شعبيتهم، لكن هم في الاول كانوا لهم تعاطف كبير بين الناس عشان ناس مؤمنة، وبتقول كلام معقول من وجهة نظر الشعب، لاننا طول عمرنا شعب متدين، والدين جزء اساسي من حياته، بعد كده الناس كرهتهم لما اتهبلوا ومشيوا يفرقعوا بغباوة واصابوا مصريين وحرموا كل حاجة، بس في الاول كان فيه تعاطف معاهم (خصوصا انهم كانوا دايما يستشهدوا بثورة سيدنا الحسين اللي شتموه بعد كده لما "تابوا" واحنا هنا في مصر: مدد يا حسين مدد)، جه بقى سونة لقط الخيط ده، وبالتوازي مع القبضة الامنية والامعان في كسر نفس الناس عشان ما تبقاش لها عين تفتح فيه
قال لنا: مش انتوا عايزين دين؟ انا ح اجيب لكوا دين يا ولاد دين...
وراح مسنجف لنا دين وطلق علينا مجموعة من الدعاة وفق خطة ما تخرش المية
الطبقة اللي معاها فلوس واللي تقدر تعمل شحن، او توعية، او مشاريع، او حتى ضميرها يأنبها انها بتاكل في قتة محلولة وغيرها مش لاقي العيش الحاف، طلق عليهم دعاة الفضائيات يصوصوا لهم ويريحوا لهم ضميرهم من خلال استنزاف طاقاتهم في الهبل:
شنط رمضان
هدوم يوزعوها
بطاطين
ويقعدوا بقى يعبوا في الرز والفاصوليا البيضا سبع ساعات ويرجعوا هلكانين وفرحانين وحاسين انهم عملوا اللي عليهم وزيادة، وبكده، لا حلوا ولا ربطوا، وبقوا منزوعين الفتيل، وضميرهم مرتاح، وحاسين انهم احسن من بقية الشعب كمان (وبيشتموا في الشعب بغباوة) وانا عندي واد بيضرب بانجو وضميره مأنبه احسن الف مرة من واحد ما بيعملش حاجة خالص ومقصر وحاسس انه سيدنا عمر وسيدنا ابو بكر في طلعه واحدة
افيد لي انا كمواطنة، على الاقل ممكن اللي بيضرب بانجو ده يجيله يوم ويفوق، لكن اللي بيضرب شنط رمضان عمره ما ح يفوق
الفقرا بقى عمل فيهم ايه؟ اااااه حسبي الله ونعم الوكيل فيك يا عوكل
فتح عليهم ماسورة دعاة سلفيين معاتيه بياخدوا لستة خطواتهم من ساعة ما يصحوا لحد ما يناموا من الامن، الواحد فيهم بالدبلون، ما قراش حاجة في حياته غير الرحيق المختوم، وهو اصلا بيشتهجى "زاراعا"، وكلهم بلا استثناء بيقولوا بحرمة الثورة على الحاكم، والاكتر من كده، طالعين في مودا جديدة يقولوا سيدنا يزيد (ههههه يعني يا عوكل انت عارف انك زي يزيد؟ بالشفا) و"ان خروج الحسين على يزيد لم يكن فيه اية مصلحة لا في الدنيا ولا في الدين" وكل حاجة حرام بقى
الفقرا، زيهم زي اي انسان يتحط في مكانهم، غضبانين، وقرفانين، وزهقانين، ولانهم بني ادمين مش كلاب، حاسين ان مافيش عدل لما يبقى هو بيدور في الزبالة على اكل وواحد تاني راكب مصفحة، وحكاية دي ارزاق دي مش داخلة دماغه، حط نفسك مكانه، لو عشت عيشته مش ح يدخل دماغك ابدا ان ربنا هو اللي عمل في الناس كده وان دي مجرد ارزاق
عشان كده بيروح البيت ينزل في مراته ضرب لما يعدمها العافية، وعشان كده بيخانق دبان وشه وماشي بالسنجة ونفسه ومنى عينه يقول لحد مساء الخير فيقول له مساء النور: وكمان بتقول مساء النور؟
عادي، ده سلوك انساني طبيعي
طب بدل ما يقع في ايد واحد يقول له: وانت ايه اللي يصبرك على العيشة دي؟ بدل ما تضرب مراتك ما تاخد حقك بدراعك يا اخي، بتستقوى على مره؟
وتقوم ثورة جياع (اللي كان مفروض تقوم من حوالي خمس سنين وفات وقتها) فات وقتها ليه؟
عشان عنده واحد في الجامع بيخليه يضرب مراته برضه، وبدل ما يضربها من غله وبعد شوية لما يبص لوشها الازرق تصعب عليه وضميره يأنبه ويحتقر نفسه زي ما كان بيحصل له زمان، لا، هو بيريح له ضميره بانه يقدر يضربها عشان تتنقب، يقدر يضربها عشان كلمت جارهم، يقدر يضربها عشان ما قامتش صلت الضهر، وفي الحالة دي، لما يبص لوشها الازرق مش ح يحس الاحساس اللي كان بيحسه قبل كده، ح يحس انه مجاهد في سبيل الله
وبدل ما يمسك السنجة وينزل بيها على رجل اعمال وللا عضو مجلس شعب
هي هي السنجة خليها في ايدك، بس انزل بيها على المسيحيين، يستاهلوا، عشان عباد الصليب وعشان بينصروا
حاجة كمان، الفقير ده عنده احساس بالدونية وانه مهان ومالوش كرامة، بدل ما يقع في ايد واحد يقول له: انت انسان ولك كرامة زيك زي غيرك، لا، سعادة الشيخ بيقول له: انت مسلم، انت من شعب الله المختار، والمسيحيين دول كفار، وح يروحوا النار، انت احسن منهم، واذا حطينا في الاعتبار ان المستوى الاقتصادي للمسيحيين اعلى من المسلمين، نقدر بقى كده نشنير المسيحيين تماما: البلد بلدنا وهم كفار واحنا مسلمين وهم معاهم فلوس واحنا لا؟ هجوووووم
الله؟
طب والنسوان والمسيحيين ح يفضلوا ينضربوا ويسكتوا
النسوان اه، ح ينضربوا ويسكتوا، ح يعملوا ايه؟
المسيحيين، لا دول في جيبنا، واحنا مقسمين تقسيمة عدل، الكنيسة لها شعب الكنيسة، واحنا لنا بقية الشعب نطلع تلاتينه
وانا احب اقول حاجة هنا ح تزعل المسيحيين، ومش مهم يزعلوا، انا ح اجي ايه في اللي بيحرقوهم، يعني استحملوني شوية دول كلمتين، انا ايدي فاضية اهي من غير سنج
الكنيسة مسئولة مسئولية كبيرة قوي عن عزل المسيحيين وحرمانهم من حق المواطنة اللي بجد لانها قبلت الصفقة مع مبارك، وبتتحامى في مبارك اللي هو اصلا مسلط عليهم اللي بيعملوا فيهم ده كله، والمسيحيين مش مستفيدين، كباراتهم بس هم اللي مستفيدين
الكنيسة بتتصرف مع المسيحيين على انهم شعبها وهي سلطة سياسية كمان مش بس سلطة دينية، هي مش قعدة عرب دي، دي دولة، والمفروض ان فيها قانون
كام مرة في هجوم على المسيحيين الكنيسة تدخلت واجبرت المصابين بالتنازل عن المحاضر؟ هي ايه اللي يخصها الكنيسة تتدخل في حاجة زي دي؟ واحد ضرب واحد حل المشكلة في القسم وساحة القضاء مش في الكنيسة
بلاش
مال الكنيسة ومال انها تدعم مبارك وللا غير مبارك؟ هي حزب سياسي؟ دي مؤسسة دينية، مالها هي ومال الانتخابات؟
ااااه لبعدين الاخوان ييجوا
همم، طب ايه اللي ح يحصل لهم اوحش من اللي حاصل دلوقت يعني؟ يعني فيه ايه اكتر من انهم مش بيترخص لهم ببناء كنائس ولما بيصلوا في البيت بينضربوا؟ فيه ايه اكتر من ان الامن يروح للناس يقول لهم انصروا دينكوا؟ فيه ايه اكتر من ان كل مسيحي يهج من ام البلد يبقى موصوم من انه من "اقباط المهجر" يعني خاين وعميل وعايز بلده تحتل؟
بلاش
مال الكنيسة تتدخل وتقول انا امنع وجود حزب مسيحي؟ هم مالهم؟ الكنيسة دي الناس بتروح تصلي فيها وهي المرشد الروحي بتاعهم، وفيما يخص العقيدة المسيحية بالذات الكنيسة مش مفروض تتدخل بالطريقة دي في السياسة، كده هي مش مدية فرصة لاي قانون انه يتنيل ياخد مجراه
ومش مفروض المواطن المصري المسيحي يحس ان حمايته في الكنيسة، المفروض ان حمايته في القانون، فيه جريمة حصلت اول امبارح، وانا من حقي، كمواطنة، اعرف مين المتسبب في الجريمة واعرف انه ح ينال جزاءه القانوني مظبوط
تيجي بقى الكنيسة تتدخل وتجبر الناس يتنازلوا عن المحاضر و"نحلها ودي" وحبايب؟ لا مش حبايب، ماحدش عاد بيحب حد دلوقت، الناس روحها في مناخيرها
وعوكل ماسكهم من خناقهم، وبيلعب بالنار عشان يمرر ابنه دلوقت ولما ابنه يمر ح يحلها بانه يكتم نفسنا كلنا وكأن مافيش حاجة حصلت
وعوكل ما يهموش يلعب بالنار ولا يهمه ان المسامير لما تتشال ح تسيب مكانها اخرام عمرها ما ح تتصلح
عشان هو بيكرهنا
هو اذكى واحد حكم مصر
واكتر واحد بيكره المصريين، واحنا ما نهموش في حاجة، ما نهموش في حاجة ابدا، لو موتنا بعض وفضينا البلد يبقى خير وبركة: ما انتوا كتير

46 comments:

مواطن مصري said...

شفتي نتيجة توظيف الدين في السياسة لما الكنيسة على سبيل المثال توظف الدين

و تقولللمسيحين بلاش تتظاهرو او تشاركو

و السلفين يوظفو الدين و الاخوان توظف الدين و اقباط المهجر توظف الدين

في الاخر الدنيا هتولع

overdose said...

لا طبعا
هو اقل بكتير من دا

Unknown said...

نشوف فيك يوم يا لطفى
وحسبي الله ونعم الوكيل

لو كان لطفى ذكى ، فمن المفروض إننا نكون أذكى فى التعامل معاه
انا شايف ان كل اللى بيحصل على الساحة فى الفترة الأخيرة واللى هايحصل فى الفترة اللى جاية عبارة عن خطة مجهزة ومتحبكة ولغرض واحد ، واحنا طبعا مش بنعمل حاجة غير إننا نتفرج أو بنتكلم
أنا مش عايز أعلق على الكلام لأنى متفق جدا معاك ولكن الاحساس واحد والحلم واحد ، لكن أمتة يكون السعى ورا الحلم يكون واحد
لطفى ذكى لأنه بيعرف إزاى يتعامل مع الشعب ، وأحنا مش أذكية لأننا مش عارفين نتعامل مع الشعب قبل مانتعامل مع لطفى.

الثورة لازم تكون ثورة فكر
عمرنا ماهنعمل حاجة
طول ما مثقفين البلد بعيد جدا عن الناس
:: لو مش نازلين للناس فبلاش ::

طبعا أتمنى أن النقاش يطول ولكن لنا حديث أخر

مواطن مصري said...

هاجم الحاخام عوفاديا يوسف والزعيم الروحي لحزب شاس الإسرائيلي المتطرف المشارك في الحكومة بشدة الإدارة الأمريكية بسبب مطالبتها إسرائيل بتجميد الاستيطان.

وقال كبير حاخامات السفاردم السابق في إسرائيل في عظته الأسبوعية التي بثتها الإذاعات الإسرائيلية يوم الأحد : "بأي حق يقولون لنا : هنا نبني وهنا لا نبني ، إننا لسنا عبيد لديهم".

وتوجه للمصلين قائلا إن اليوم سيأتي "وسيطردهم المسيح" وكذلك "الأشرار الموجودين في جبل الهيكل" , في إشارة إلى المسلمين والحرم القدسي.

وقد أثار مشروع استيطاني يهودي جديد في القدس الشرقية - التي أعلنت إسرائيل ضمها بعد احتلالها في يونيو 1967 - توترا جديدا بين إسرائيل والولايات المتحدة حول سياسة الإستيطان في الأراضي الفلسطينية المحتلة.

وقال رئيس الوزراء الإسرائيلي بنيامين نيتانياهو يوم الأحد الماضي : "لن نقبل بأن لا يكون لليهود الحق في العيش والبناء أينما كان في القدس الشرقية".
http://www.shorouknews.com/ContentData.aspx?id=82040

مواطن مصري said...

هو احنا لية طيبين اوي مش صيع زي اسرائيل؟

mido said...

انا بقول يلموا نفسهم بقى و يعملوا قانون دور العبادة الموحد

على الجامع و الكنيسة

lastcrazyboys said...

انا شايفك بالصلا عالنبي كــده بتفتحي على نفسك ابــواب جوهنم ..لأنه يبدو انه قد غاب عن ذهنك ان الكنيسة ليسـت فقط للقيام بدور الاشراف على أداء الطقــوس والصــلوات بس

الكنيسة -واكيد انتي عارفة الكلام ده- سلطة ..شئنــا أم أبينا ..بيقولوا يمين يبقى يمين ..شمال يبقى شمــال

والعملية كده عاملة زي النظام الديني في الدول "المسماة" بالاسلامية ..عندك السعــودية مثـلا..الناس عايشين على حسب وداد السلطة الدينية ..واللي الفئة دي تقول عليه يبقى "آآآآآآآآمين

بس هما طبعا كانوا متمنجهين ومتضبطين ..فالعملية بصراحة انا شايفها تبقى لوز ..لأنه ثبت بالدليل القاطع ان اللي بيتعب هو اللي بيفكــر بس ..أو بالأصح مفيش حاجة اسمها تعب بدني أو عضوي

التعب كله نفسي ..وبس

يعني انا لو اديت واحد صاحبي ضربة بهزار ..مهما كانت قوتها ..ممكن توجعه شوية انما بعد كده هيفوق وهيضحك ويفكر يرد لي المقلب
انما لو خلال مناقشة وسخنت قمت ضاربه..هتقلب بغم
يعني كل العملية نفسية وفي ناس بدأوا يفكروا في السعودية ..الناس دي تلاقيها اكيييد تعبانة ..ونفسيتها طييين عشان اتبطروا عالنعمــة اللي هما فيها .الاكل ومرعى

وبجد بقى عشان تعبنا خلاص..انتي بدال ما تسلطي "الاخوة" المسيحين - وانا ملاحظ انك مابتستخدميش الاخوة دي وكده غلط عشان الرقابة-انهم يتمردوا عالكنيسة اللي مضبطاهم ..ومهيئاهم نفسوياً ومعنويا..المفروض انك تدعي جميع المسلمين انهم يسلكوا هذا المسلك الطيب المسالم ..الذي يساعد على توطيد الامان في البلد ..وحســن البارودي يطمن العمدة الى ان البلد كلاتها الأمن فيها مستتب والرخاء يعم أرجاء الوطن ..طن طن

Unknown said...

بتلومي الكنيسة طب ليه ما بتلوميش الافباط القابلين بهذا الوضع؟ يعني ليه واحد عنده حق و القانون في صفه, ليه يتنازل عنه تحت اي ضغط حتي و لوكان من الكنيسة؟
و نتلومي الدعاة اللي غسلوا مخ المسلمين . طب ليه ما بتلوميش الافراد انفسهم؟ اوليس طلب العلم فريضة؟ ليه ميعرفوش دينهم الصحيح؟ هل الدين جاء للدعاة و الفقهاء و اصبح حكرا عليهم ام ان الدين جاء لكل الافراد علي اختلاف درجاتهم.

ان القاء التبعة علي جهات و فئات بعينها فيه الغاء مسؤلية الافراد في المجتمع في فرز الطيب من الخبيث و نبذ الضار و التمسك بالنافع. فليس مبررا ان احد الدعاة حرض مجموعة من الناس علي الاعتداء و الحرق, ليس مبررا لهم اتيان هذه الافعال. ان ابسط قواعد الاسلام هي في المسؤلية الشخصية عن الافعال بغض النظر ان كانت هذه الافعال استجابة لفقيه او حاكم. و الامثلة علي هذا المعني كثيرة في القران

ابراهيم (آية:21): وبرزوا لله جميعا
قال الضعفاء للذين استكبروا انا كنا لكم تبعا فهل انتم مغنون عنا من عذاب الله من شيء قالوا لو هدانا الله لهديناكم سواء علينا اجزعنا ام صبرنا ما لنا من محيص


غافر (آية:47): واذ يتحاجون في النار فيقول الضعفاء للذين استكبروا انا كنا لكم تبعا فهل انتم مغنون عنا نصيبا من النار


الاعراف (آية:38): قال ادخلوا في امم قد خلت من قبلكم من الجن والانس في النار كلما دخلت امه لعنت اختها حتى اذا اداركوا فيها جميعا قالت اخراهم لاولاهم ربنا هؤلاء اضلونا فاتهم عذابا ضعفا من النار قال لكل ضعف ولكن لا تعلمون

هذا هو القرآن و هذا دليل المسؤلية الفردية عن الافعال فهل استعصي علي الناس قراءته و فهمه و العمل به و هو الكتاب الذي جاء للناس جميعا علي اختلاف عقولهم و لم ياتي فاصرا علي فئة الدعاة و الفقهاء

سبهللة said...

بموت فى تحليلاتك الجامدة دى

sherif said...

الله يفتح عليك

مش فاهمه said...

يانوارة يا عزيزتى انت ليه دايما فاكره ان المسيحيين بياخدوا فوق دماغهم و ساكتين و اللهالعظيم ما ساكتين ماشوفتيش من شهر البقال اللى فىالفلاحين علشان ازازة حاجه ساقعه موت له واد مسلم ولا بتوع دير ابو فانا اللى واضهعين ايدهم على اراضى مش بتاعتهم ولا حادثة وفاء قسطنطين اللى لحد دلوقتى مش عارفين هى حية ولا ميته .يانوارة انا معاكى فى موضوع الفقر و الحاجه و الدعاة السلفيين اللى يشلوا بس بعض من الأنصاف المسيحيين مش ملايكه و بصراحه هم مش ضحايا قوى كده زى ما بتصوريهم و بعدين شوفى المسلمين بيفترشوا الأرض ازاى اثناء الصلاة و شوفى الكنايس الطويله العريضه كام واحد بيدخلها .انا معاكى فى موضوع ان القانون الوحيد اللى يفصل بيننا لكن كون ان المسلمين مجرمين و بيقتلوا فى اخوانهم المسيحيين مش 100% صح صدقينى

tuhamy said...

نوارة
.........

انتي بتقولي :
(فتح عليهم ماسورة دعاة سلفيين معاتيه بياخدوا لستة خطواتهم من ساعة ما يصحوا لحد ما يناموا من الامن، )


المشايخ اللي بياخدوا لستة خطواتهم من الأمن معروفين للقاصي والداني

لكن اللي أعرفة ان علماء السلفيين المحترمين -وهم مش معاتية - الأمن مضيق عليهم جدا ، ومطهقهم في عيشتهم





وبمناسبة دور الكنيسة السياسي

لا ننسي دور رجال الأعمال المسيحيين في إشعال الفتنة

وأنا لاأنسي في مشكلة (دير أبو فانا )
-اللي يبعد بيتنا 5 كيلو متر-
الدور الرائد اللي قام بية (نجيب سويرس - وعادل لبيب) في دعم الفتنة
واللي شفته بأم عيني

Unknown said...

مواطن مصري
ايوة توظيف الدين غلط لان رأس الدول ما بيتقيش الله
والمفروض ان المؤسسات الدينية المسلمة والمسيحية تبقى مستقلة مش تابعة للدولة ويبقى دورها ناصح ويبقى دورها كلمة حق عند سلطان جائر
لو بيعرفوا ربنا يعني
بدل ما يقرفونا احنا


المينيماليزم
اقل كام جنيه كده؟

:)

بلال

والنبي يا بلال ما تفتح عليا بوابة المثقفين دي احسن دول حكاية لوحدهم وانا لما باسمع سيرتهم بامسح بيهم البلاط
دول عايزين ضرب الجزمة
وبرضه بيشتموا في الشعب

مواطن

اسرائيل لا ناصحة ولا حاجة
حتة بتاعة العالم كله - بما فيها حكام العرب - بيدعموها وبيدوها فلوس وسلاح وده مستواها

العالم مافيهوش عدل
واسرائيل دي وجودها في الدنيا ظلم والظلم مهما الناس كلها دعمته بيفضل خايب

ميدو

المفروض انه دور العبادة تتعامل زي اي مبنى وتاخد الترخيص اللي بياخده اي مبنى مش دور العبادة

انا متفقة مع الاخوان في الموضوع ده ان ما يبقاش في قانون دور عبادة
يبقى فيه قانون للبناء موحد مدام المبنى مستوفي الشروط يبقى يتبني

lastcrazybody
ههههههههههههههههه

pink

لا انا ما اقدرش الوم الناس طبعا
الكلام ده لو الناس قاعدة في التكييف وبتشتغل وسعيدة ومبسوطة لما ييجي واحد يقول لهم كلام مجانيني ويسمعوا كلامه يبقى الومهم فعلا
لكن ما تبقاش الدنيا مقفلة في وشهم من كل حتة وكمان اخدوا منهم باب ربنا وعايزني الومهم
هم ح يعملوا ايه؟

سبهللة

شالله تسلمي وتعيشي

شريف
وعليك

مش فاهمة

انا حطيت صوابعي العشرة في الشق خلاص
صح
انت صح
هو البقال هو السبب في كل اللي حصل

تهامي

والله يا تهامي العلماء السلفيين اللي انت بتقول عليهم محترمين مش ممكن ابدا ياخدوا فرصة يتكلموا في الجامع

واللي بيشتغلوا مع الامن عددهم مش قليل
سواء من الدعاة اللي بيصوصووا او من اللي بينزلوا للفقرا

والامن بيهتم بالشيوخ اللي بيتكلموا في العشوائيات والاحياء الشعبية اهتمام بالغ
لان الفقرا اخطر على النظام من اللي معاهم فلوس

بالنسبة لدور نجيب ساويرس
والله بس للعدالة يعني انت ليه نقيت نجيب ساويرس؟ طب دور الشيخ صالح يعني في تخدير الطبقة المتوسطة العليا؟

اصلا اصلا كل المشايخ فوق وتحت الدولة بتحط لهم الخطة ورجال الاعمال بيصرفوا عليهم

وفيه تنسيق ما بين النظام السعودي والنظام المصري كبير قوي

Fatma said...

موتيني من الضحك بحكاية يعبوا فاصوليا 7 ساعات ويروحوا هلكانيين وضميرهم مرتاح :)

طيب ايه اللي ممكن يعملوه احسن من كدا ؟ او افيد من كدا ؟ لما البلدمجوعاهم مش واجب الناس تأكلهم؟ دا حقهم مش فضل حد بيتفضل بيه على حد
والذين في أموالهم حق معلوم للسائل والمحروم

حق مش فضل وضميرهم مش لازم يستريح لازم يعملوا دا ويفضلوا حاسيين انهم ماعملوش حاجة لان دا واجب مش تفضل
بيعملوا دا عشان نفسهم عشان يطهروا نفسهم من الخرا اللي ماليهم من جواهم عشان يحسوا بنعم ربنا عليهم
أنا بس سؤالي ..يعملوا ايه مفيد لومش هيعبوا فاصوليا؟

Unknown said...

يا فنون

انت ما تتخيليش الملايين اللي بتتصرف على الجمعيات الخيرية

مش التنموية

حلال الفلوس دي وللا حرام

طول عمر شنط رمضان موجودة وما كانتش هي ضرر في حد ذاتها
لان الاسر المصرية كانت بتعملها بنفسها

يعني ست البيت تعبي لها خمس ست شنط وتدي البواب والست اللي بتساعدها في البيت ومثلا جوزها يقول لها اديني شنطة للساعي اللي عندي في الشغل
وكام شنطة للجيران

دي كانت حاجة كويسة قوي وفيها تكافل وبتقوي مشاعر الحب بين الناس

لكن لما جمعيات تصرف خمستاشر مليون على شنط رمضان تبقى قلة ادب

اولا
ستات البيوت لما كانوا بيعملوا كده ما كانش حد بيحس انه بيشحت

لكن دلوقت الناس بقت حاسة انها شحاتة وجمعيات مخصوص معمولة لهم عشان الشحاتة

وما يهمهمش غير انهم يقعدوا يعلفوا في الفقرا اللي لا بيعرفوا يقروا ولا يكتبوا ولا حتى في ايدهم صنعة زي زمان ولا بيدخل لهم مية ولا كهربا ولا صرف صحي وبس عمالين يعلفوا فيهم كأنهم ح يدبحوهم على العيد

حلال ده وللا حرام؟

انا شخصيا شايفة انه حرام

Unknown said...

اه وبالنسبة ليعملوا ايه؟

يا فنون

الخمستاشر مليون اللي جمعية واحدة بدون ذكر اسماء بتصرفهم على شنط رمضان

ما تبنيش مدرسة محترمة لعيال المنطقة؟
ما تعملش ورش نجارة وحدادة وصناعات صغيرة لاهالي المنطقة العواطلية؟
ما تدخلهمش مية وكهربا؟

ما تشتريش ارض يزرعوها بدل ما يخلقوا منهم شحاتين؟

Fatma said...

يبقى دا عيب الجمعية دي
أنا لما اتكلمت على تعبية الفاصولية نسيت ان في جمعيات اساسا متفرغة للحكاية دي
أنا شايفاها حاجة حلوة جدا لما كل مجموعة كدا مع نفسهم يعملوها ويوزعوها
بس الرقم اللي انتي بتقوليه دا عته بصراحة
15 مليون شنط رمضان؟!!!!

يالهوي !
طب حد يقولوهم يمكن مش عارفين ممكن يعملوا بيهم ايه
والله يا حرامن ممكن يكونوا مش عارفين يوجهوا الفلوس فين وحافظين مش فاهمين شنط رمضان يبقى شنط رمضان

في حاجات كتير اوي ممكن تتعمل
انا كان كلامي عن الحاجات الفردية اللي شلة ممكن يعملوها سوا ويلموا فلوس من اللي حواليهم وكدا انما جمعية والارقام دي عشان شنط دا تخلف رسمي بصراحة

into said...

الإسلام اللي جه بيه سيدنا محمد صلى الله عليه و سلم مافيهوش دعاء لل مدد و ألعون غير من الله سبحانه و تعالى.
اللي بيضرب بانجو مصيره يوم هيعمل فعل طائش أثناء ما عقله غايب . أما موضوع إن مبارك هو اللي جاب الدعاه الجدد دي حاجة جديدة أول مره أسمعها .
أما موضوع شنط رمضان ده أنا متأكد إن موقفك كان هيكون غير كدة لو كونتي بتوقفي طابور أمام جمعية شرعية علشان تاخدي شنطة و بتستنى العيد علشان تذوقي اللحمة من الصداقات.

عموما اللي يفرح بل بوست ده هو المحشش علشان هيحس إنه أحسن من غيره و المتصدقين المخلصين مش يهمهم علشان أجرهم على الله مش عايزين من الناس جزءا ولا شكورا

عيب عليكي بدل ما تشجعي الناس على التصدق تقولي اللي بيشرب بانجو أجدع

Unknown said...

فنون

الحاجات الفردية اللي الاسر المصرية كانت بتعملها مهمة جدا
جدااااااااااااا

لانها اكتر من انك بتأكلي حد انت بتعملي روابط انسانية بين الناس
ومهم جدا ان ست البيت ترجع تعمل الحاجات دي لان فعلا تهادوا تحابوا

دي هدية وعلى فكرة، امي عشان دقة قديمة :) كمان بتقبل الهدايا من الست اللي بتساعدنا في البيت هي بتهاديها والست كمان بتهاديها لما تروح الصعيد وترجع ومعاها كركديه ودوم
وعشان تبقى فاهمة الحاجات دي كانت عادية جدا زمان
بس عشان تصدقيني لما اقول لك ان ثقافة الشحاتة انتشرت، الست في الاول ما كانتش مصدقة ان ماما طالبة منها هدية لما ترجع من الصعيد وما تتخيليش الفرحة اللي هي كانت فيها لما جابت كركديه ودوم وماما اخدتها هدية وما دفعتش فلوس
وجدتي كانت بتعمل كده
لما شنطة رمضان تتعمل من الاسرة في الاطار ده بتبقى حاجة مهمة جدا وبتقوي الاواصر الانسانية بين الناس

لكن انا باتكلم عن الجمعيات
مدام فيه شباب عنده طاقة يقعد سبع ساعات يعبي فاصوليا ورز

ما يروحش يدي في فصول محو الامية ليه؟

ما يديش دروس خصوصية لابناء المنطقة اللي في المدارس ليه؟

عارفة ليه؟

عشان الناس في العشوائيات لها اسئلة محرجة: هو ربنا بيعمل فينا كده ليه؟
وانت طبعا مضطرة تردي وتقولي لهم مش ربنا اللي عمل فيكوا كده
ولما ما تحبيش تدخلي في السياسة قوي ح تقولي له: انت لازم تتعلم وتشتغل وتجتهد عشان تحسن من نفسك، ده على اقل التقديرات صح؟
الله
طب وليه الكلام اللي مالوش لازمة ده؟
ما تخلينا في تعبية الفاصوليا والرز احسن

لا هم عارفين
وعلاقتهم بالامن كويسة جدا
والامن مش بيضايق غير اللي بيعملوا تنمية: مدارس وورش وزراعة الخ

Unknown said...

الاستاذ
help

انت فعلا محتاج

help

وانا ماليش مزاج اعيد التستيب من اول وجديد

كل اللي ح اقولهولك

تخيل نفسك امي ومافيش في ايدك صنعة وعايش في بيت لا فيه مية ولا كهربا وواحد نازل من عربية هامر يديلك شنطة رمضان
لو ترضى على نفسك العيشة دي
ارضاها على غيرك

مواطن مصري said...

بس المفروض يا نوارة ان الازهر و الكنيسة لو استقلو المفروض ان دة دور عبادة متدخلش في السياسة

lastcrazyboys said...

نـــوااااااااااااااارة

"لزمن الحتــة دي عشان صيغة النــداء"

لا بجد والله ..انا من هذوها المزنق بعمل لك نداء مخصوص عشان توجهي حملة صحية .."مش ضد انفلونزا الحلاليف"" لأ ..ضد انفلونزا التســول اللي سارحة في البلد اليومين دول
انا مشوفتش ولا هشوف من ساعة ما وعيت عالدنيا ..حر صيف كده ..ولا تسول بالانتشار ده

help لاحظنا ان رد الاستــاذ
ضايقك شوية ..بس ده المفروض يكون جرس انذاااار .لانه بيمثل شريحة عريضة ..شايفين انهم بيعملوا اللي عليهم فعــلا..بتعبئة الفاصوليا ..وان الناس اللي بتحارب ظاهرة التسول ناس مفيش في قلوبها رحمة ..من اللي "يكنزون الذهــب والفضــة" ومش عايزين ينفقــوا

حنا بقى عايزين حملة صحية في الدماغ
وصلي للناس دي ..ان ثقافة عملت اللي عليا غلط
وان اشجــع على ان التســول تتحول الى مهنة "واكل عيش على رأي واحدة منهم سمعتها بتقولها " برضه غلط
ده انا لسة من يومين كنت بفكر في كلام سمعته زمان في احدى حلقات الشيخ الشعرواي وهو بيربط بين نظرية ارسطوا في الوجود بالقوة ..والوجود بالفعل ..وبين الصدقة
الجارية المنتجة والصدقة الوقتية
حاولي تفهمي الناس ان الصدقة لما اعمل لواحدة غلبانة" بجد" كشك تقتات منه ..يبقى هو ده الصدقة الجارية ..وانفع البلد كلها من وراها
الناس بتوع البسكوت اللي هينزلولها..والعصاير..والبوزو
كلللله هياكل

ولما اجيب شوية العيال اللي عالنواصي وبيثبتوا الناس ..واشغلهم في ايييي حاجة ..ان شاء الله نشتري حتة صحرا..واخليهم يزرعوا فيها لحد ما يطلع عين ابوهم ..بس في الاخر اللي ينتج يبقى ليهم هما
ده يبقى صدقة بجد

لازم فعلا نبطل حالة الاستجداء ..ونشتري بكرامةو ونبيع بكرامة

وناكل عيييييش ..بكرامة

Unknown said...

ماهو ضايقني عشان بيمثل قاعدة عريضة

Unknown said...

المشكلة يا
lastcrazyboy
في كلمة "العدل" العدل انك تحط نفسك مكان الناس ولو ترضاها على نفسك يبقى ترضاها لهم

احنا مش بنعمل كده
او انا ح اتكلم عن نفسي عشان ما ابقاش باتهم حد حرام انا ما اعرفش اللي في قلب الناس

بس انا اعيش في التكييف وادي جنيه للشحات اللي في اشارة عشان اريح ضميري لانه صعب عليا انه واقف في الحر بيشحت

طيب
هل حطيت نفسي مكانه؟ هل استشعرت حياته بالتفصيل؟ وهل انا اقبلها على نفسي؟
نفس الراجل ده لما يقف في الحر عشان يزرع وللا يشتغل مش ح يصعب عليا
ح ابقى معجبة بيه
طب تخيل نفسك انت بقى اللي صعبان على الناس
مين عنده كرامة يرضى يصعب على الناس؟

simple girl.. ..simple dream said...

ازيك يا نوارة اخبارك ايه
انا شاهندة مرات احمد الجيزاوى
اسمحيلى انى اخد البوست بتاعك واحطه على الفيس بوك مع ذكر المصدر طبعا ماتخافيش

بس انا مستغربة من حاجة
انت ازاى لسه ماتحبستيش لغايو دلوقتى؟
ولا حتى استدعا واحد؟
عملتيها ازاى يا نوارة والنبى

دة انا جنب ضرب النار اللى بتكتبيه دة بطة بلدى ومع ذلك كنت هاروح فى داهية لكن ربنا ستر

Unknown said...

شاهندة
اتفضلي انقلي البوست في اي حتة تحبيها انا ما عنديش مبدأ الكوبي رايت

حرام عليكي يا شاهندة
عايزاني اروح السجن؟ ما انا اتسجنت مرة
:(

Kalimalhus said...

رصدك للواقع و تحليلك ليه أكيد سليم ..بس الموضوع بقى أعمق بكتير من كده ..

دعاة المساجد ليهم دور كبير خاصة فى المناطق العشوائية و المناطق الشعبية التى تدهورت و بقت هى كمان عشوائية و فى القرى .. لكن إحنا دلوقت بقينا قدام ثقافة متكاملة بتفهم الدين بشكل معين بحيث إن الغالبية العظمى من اللى بيكلموكى فى الدين فى أى حته و فى أى ظرف بيعيدوا نفس الكلام و نفس الأفكار..

المدرسين فى المدارس و زملاء العمل و الأقارب اللى بيتطوع منهم و يحب ينصحك فى أمور الدين أو يناقش معاكى قضية متعلقة بيه أو مثلا يعلق على حادثة من الحوادث الطائفية إلخ بيتكلم بنفس المصطلحات و يقول نفس الأفكار.. و طبعا دعاة القنوات الفضائية بيعيدوا و يزيدوا فى نفس الحكايات..

النتيجة هى إعتياد خطاب دينى محدد الكل بيكرره لدرجة إن محاولة أى حد إنه يقول حاجة مختلفة بتواجه فورا من قبل حتى الناس العادية اللى مالهومش أى خلفية علمية متخصصة..

مواجهة الثقافة الدينية السائدة و إستبدالها بفهم أعمق لحقيقة الدين سواء كان إسلامى أو مسيحى .. مهمة أصبحت صعبة و محتاجة مجهود جماعى و هتاخد وقت .. ده لو أصلا بدأت من الأساس لكن لغاية دلوقت الموجود كلام فردى من ناس ما حدش بيسمعلهم..

شوفى كده كاتب كبير يكون له شعبية و محبة بين الناس و يجرب يقول كلام مختلف عن اللى الناس متعوداه.. هتلاقى التعليقات نازلة عليه ترف و الكل بيقولوله إحنا بنحبك فأحسنلك ما تتكلمش فى الدين عشان تفضل معزتك فى قلوب الناس!!

لغاية بقى ما يحصل و نغير ثقافة الناس فالحل الحالى هو إزالة بعض الأسباب المباشرة للتوتر زى إصدار القانون الموحد لدور العبادة .. و فى نفس الوقت لو تم رفع بعض من الضغوط الإجتماعية عن الطبقات الفقيرة و المهمشة أو المهشمة فده هيقلل من الإحتقان فى المجتمع عامة ..

طبعا النظام بتاعنا دلوقت مش مهتم بالحاجات دى .. لكن لو ماكناش قادرين نشيله يبقى محتاجين ننصحه بإستمرار بإنه ياخد باله من حلة البخار المكتوم على نفسها تحتنا و اللى ممكن تنفجر و تطلع عنين الكل .. و ده مش محبة فى خلقة النظام و رغبة فى إستمراره لكن عشان ماحدش له مصلحة فى إن البلد تقع فى فوضى مالهاش نهاية واضحة..

مواطن مصري said...

نوارة شفتي عمال طنطا تصوير كريم البحيري


http://www.youtube.com/watch?v=1Q6gxG8MzXY

اضراب طنطا للكتان تصوير كريم البحيرى

مهندسة كريمة said...

مهندس حر

أنا متفقة معاك تماماً فى إن لازم يحصل تغيير للخطاب الدينى
اللى للأسف بقى فى معظمة بيتقال بطريقة مملة
و لا إما مفرطة فى السطحية
أو مفرطة فى التعقيد

للدرجة اللى تشعر كأن الموضوع مُتعمد علشان الناس تحول المحطة
طبعاً مقصدتش المحطة بمعناها الحرفى

_____________________
شوفى كده كاتب كبير يكون له شعبية و محبة بين الناس و يجرب يقول كلام مختلف عن اللى الناس متعوداه.. هتلاقى التعليقات نازلة عليه ترف و الكل بيقولوله إحنا بنحبك فأحسنلك ما تتكلمش فى الدين عشان تفضل معزتك فى قلوب الناس

_________________________

بالزبط هوه ده اللى أقصده
إزاى تنجح الحكومة فى إنها تكره الناس و تجيبلهم الملل من الخطاب الدينى


أما بأه حكاية الدعاة فى المساجد

فلقد نجح زقزوق وزير الأوقاف الحالى و من قبله محمد على محجوب
فى إنحطاط مستواهم العلمى و المادى

و أصبح رضا الأمن هو المسوغ الوحيييد لتعيين معظم أئمة المساجد

و أصبحنا نسمع عن الإمام الذى لا يحفظ من القرآن سوى المعوذات
ليتعوذ بها من شر الشرطى و المخبر

MerMaid said...

dear,its a whole fucking dilemma.
u will never reach the truth in this country,its frustrating,i am thinking of joining el hezb el watany to know whats really going on(i dont know if its possible).
I think you are right but not totally right,about Ramadan's bag and stuff like that its a circle,if they cannot find food and lookn in the garbage for food,so its better if some merciful people give them fresh food.
Again nawarra,we dont have a national cause to be revolutionary,at least the majority doesn't have a cause.if u take a look at the faces of the ordinary clerk of the gov. u will find out that they ae not going to change their current situation.
another thing,,all the srikes and demonstrations are for ( Lo2met el 3esh) and the salary and benefits,its not for the unfairness and the oppression they are living through.
we are totally in a mess and chaos.i want to immigrate as soon as possible but mu husband's say he needs somr thinking.
where can we go??we are arabs and muslims and i am wearig a hijab,i dont want to be killed in germany or europe,and i dont want to live in pain and corruption,i wish if i had a chance to prove myself..
----------------------------
This country is the country of Mubarak,his family,Nazeef,Elshereef,ezz and those whales. its their bitch.
fuck him Ahmed ezz,says that egyptians are living in luxury.

MerMaid said...

will u vote for a christian,running for presidency??

Ahmed Salem said...

أنا موافق على كل كلمة في التدوينة دي فقط أحب ان ارفع عن الرئيس خالد الذكر تهمة الذكاء و شكرا

يا مراكبي said...

مين لطفي ده؟ واحد بس وألا أكتر من واحد؟ فيه كذا لطفي على فكرة

بعيدا عن التحليل القيم اللي في البوست .. ومن غير الدخول في تفاصيلة وتفنيدة .. أنا أتفق تماما على أن النظام الحالي (أكتر من لطفي زي ما أنا قلت) هو أذكى نظام مر على تاريخ هذا البلد بلا إستثناء .. قمة النضج السياسي في التعامل مع هذا الشعب وتسييره كما هو عليه الآن .. ومن هنا أنا لا أتوقع حدوث تغيرات دراماتيكية على المنظور القريب

simple girl.. ..simple dream said...

يا ستى الف بعد الشر عليكى
انا بس عارفاهم بيؤمنوا بحرية التعبير اد ايه
وبيكافئوا اى حد بيعبر عن ارائه
عشان كدة كمن مستغربة انت ازاى فلتى منهم
وايه حكاية الحبسة دى
انا معرفش
ياريت تحكيلنا عن ذكرياتك مع البورش

مواطن مصري said...

http://www.masrawy.com/News/Egypt/Politics/2009/july/28/ezz.aspx

القاهرة - أكد أحمد عز أمين التنظيم بالحزب الوطنى أن الشعب المصرى يعيش فى رفاهية حقيقية، وان الدليل على تلك الرفاهية هو زيادة أعداد السيارات الفارهة وأجهزة التليفون المحمول بين المواطنين.


ههههههههههههههههههههههه

لول

د. أحمد مراد said...

هو ده موسم الهجوم على الجمعيات الخيرية ولا ايه
عموما أعرف جمعيات خيرية بتعمل مشاريع تنموية كبيرة مثل دق طلمبات المياة في المناطق التي لا يصلها ماء
وجمعيات تقوم بعمل مجمع على شكل مستوصف ومدرسة وجامع .. أكيد هتقولو جميل بس لزومه ايه الجامع .. لأن الجامع من عوامل الهدم الآن من وجهة نظركم
وأعرف أحد دعاة الفضائيات العصريين الذي تفضلتي بمهاجمته على أساس أنه أحد أهم عوامل تخدير وتغييب وتهميش الشعب المصري
طرد من مصر بسبب أحد أهم مشاريعه التنموية في محاربة الفقر
كفانا بقي مبدأ خلقنا لنعترض بتاعكم ده

Unknown said...

احمد مراد
ايه لزوم الجامع ازاي؟ هو حضرتك فاكر نفسك داخل على قريش وللا حاجة؟

انا ما اعرفش مين هاجم الجمعيات الخيرية تاني
بس اعرف ان اللي بتقول عليه اطرد ده
مش اتنفى للندن باين؟

عقبالك لما تتنفي الى لندن كده

ومش هو برضه اللي اخد من المعونة الامريكية مرتين؟


هي ايه حكاية المعونة الامريكية دي؟
النهاردة الصبح واحد بيقول لي انه سمع من مصدر غير موثوق فيه ان فيه ناس بتروح هيئة المعونة تطلب معونة وتقول لهم خبوا اسمنا
ههههههههههههههه
طب وليه التسول ده؟
ان خفت ما تعمل وان عملت ما تخاف

ده مجرد استطراد
عمرو خالد قال انه اخد من المعونة مرتين
"عشان يدعم العشوائيات"
بفلوس المعونة
امال الناس اللي بتتبرع بالملايين دي فلوسها بتروح فين؟
ااااه
في شنط رمضان

بص يا استاذ احمد
انا مش ضد العمل الخيري ولا العمل التنموي
ولو اني شايفة ان العمل الخيري مش بيفيد ان لم يكن بيضر
يعني مثلا دمياط مش محتاجة اي جمعيات خيرية عشان الكل فيها بيشتغل
من اول العيل اللي عنده خمس سنين، كلهم بيشتغلوا، والواحد فيهم بيشتغل كذا شغلانة: الحلويات، النجارة، الزراعة والصيد
لو بتوع العمل الخيري او التنموي فضلوا يتآلطوا على الناس زي ما بيعملوا دلوقت وعرفوا يعملوا اي منطقة عشوائية زي دمياط يبقى لهم حق يتآلطوا
انما يفضلوا يتنططوا على بعض
ويتنططوا على الناس
وتبقى فيه نخبوية جديدة اسمها نخبوية العمل الخيري والتنموي
وبتوع العمل التنوي بيحتقروا بتوع العمل الخيري وبيتعاملوا معاهم زي ما مخرجين السينما بيتعاملوا مع مخرجين التلفزيون ويفضلوا كل ما حد يتكلم معاهم يرفضوا اي نوع من انواع النقد ويتعاملوا مع الحياة على اساس ان العشوائيات دي دولتهم وهم رؤساء جمهوريتها
هممم
بص انا مقدرة على فكرة
يعني باعذر في النقطة دي
احنا بلد فاشلة وهي مش وش فشل
يعني احنا بطبعنا مش بنحب الفشل عشان من زمان واحنا دولة زراعية وبنصنع وطول عمرنا خيرنا على الناس كتير علينا نبقى فاشلين وشحاتين مش بالعينها
وكل واحد عايز ينفد بنفسه ويحس ان الفشل ده مش جاي منه
وكل واحد حابب انه يحس بالانتماء لنخبة معينة
فيه اللي بينتمي لنخبة ثقافية
نخبة سياسية
نخبة اقتصادية
ودلوقت بقى بقت نخبة العمل الخيري والعمل التنموي
وكلهم طبعا اول انجليش اول زا طايم وكل واحد عايز يحس انه كويس من خلال انه يثبت انه احسن من التانيين مش من خلال انه فعلا يعمل حاجة احسن
مش عشان احنا شعب وحش
بس عشان فعلا النخبوية دي مش ح توصلنا لحاجة وكل واحد محتاس ومش عارف يعمل ايه
وبقى فيه نخبوية دينية برضه
بس النخبوية الدينية وحشة، بيبقى فيها دم، مش عارفة ليه؟ مع ان الخناقة على ربنا يعني مش على دنيا
انا مش عارفة ايه الحل غير اننا نبقى مع بعض ونحترم بعض ونسمع بعض ومش معنى ان حد بينتقد الصحفيين مثلا اني اتضايق المفروض الناس تعمل نقد ذاتي
والصحفيين مش ماشيين على ديلهم ولا نخبة ولا على راسهم ريشة عشان يبقوا فوق النقد
امبارح مثلا كنت باتكلم مع صاحبتي الانتيخ اللي بتشتغل في التنمية وباقول لها ما اعمل اعلان على المدونة والعيال اللي بيدخلوا ييجوا يشتغلوا نفسهم يعملوا حاجة
حسستني انهم بيحضروا الذرة في العمل التنموي وان مش اي حد يعرف يشتغل وباين لازم يبقى خريج هندسة
حاجة كده
طب كده مش ح ينفع على فكرة هو انا عايزة اتآلط وللا عايزة اعمل حاجة كويسة؟
مفهوم ان الناس يبقى نفسها تتآلط في ظل الظروف اللي احنا فيها
بس مش كل حاجة مفهومة يبقى لازم تمرر
يعني ماهو مفهوم ان الناس يبقى نفسها تبقى عنصرية مرة واحدة في حياتها بدل ماهي على طول مادة العنصرية
مفهوم ان الناس يبقى نفسها تكسب فلوس بدل الضنك اللي هم عايشين فيه
مفهوم ان الناس يبقى نفسها تتميز ولو حتى بانها تبقى اقرب لربنا زي ما واحدة قالت لي: اصل انا طول عمري متوسطة في كل حاجة ونفسي اطلع الاولى في اي حاجة فباجتهد في الدين عشان اطلع الاولى
!!!!!!!!!!!!!!!!!!!!!!
ده كله مفهوم
بس مش معنى كده انه يمرر من غير ما ينتقد ومن ما الناس تنبه عليه وتفوق اللي نفسه يعيش في احلام يقظة
احنا مش في سبق مين احسن من مين
احنا لو واحد فشل بيجر فشله علينا كلنا
ولازم نبقى فاهمين اننا مالناش غير بعض
نسمع بعض بس ونستحمل بعض ونتعاون مع بعض عشان ينفع اي حاجة وللا يبقى فيه امل باي طريقة

عبد الزهراء المصري (علي الحسيني) said...

بسم الله الرحمن الرحيم
اللهم صلي على محمد وآل محمد وعجل فرجهم وألعن أعدائهم

أولاً أختي وأستاذتي الفاضلة نوارة نجم السلام عليكم ورحمة الله وبركاته وشحتني أوي مدونتك ووحشني مشاكساتك وأتمنى من حضرتك تستمري وصدقيني كلامك ده فعلاً له صدى فأنا كواحد من محبي مدونتك المتميزة أستوعبه في عقلي وأنشره بين الناس .

وأقول لحضرتك آآآآآآآآآآه ياأستاذة نوارة من اللي بيحصل من عوكل آآآآآآآآآآآآآآآه وألف آآه بجد أنا هتشل من اللي بيحصل ده ياأستاذة نوارة لأن حسني مبارك مش سايب حد في حاله ، وفاكر أن موضوع أبنه هيمشي وأن كل الناس هتقبله ويعتقد أنه بعلماء السلاطين أمثال علماء السلفية الوهابية ودعاة الفضائيات يستطيع أن يجعل كل الناس توافق عليه لكن زي ما بيقولوا عندنا في مصر نقبه طلع على شومة لكن لأن حسني مبارك أزكى من حكم مصر فراح أعتقل اللي فاهمينه زي الأخوان المسلمين والشيعة وسلط الإعلام على أقباط المهجر وجهز لهم تهم عجيبة ليس لهم أصل من الصحة فعلاً حسني مبارك ده أذكى واحد حكم مصر وأكثر واحد كره مصر والمصريين

شبكة مصر الفاطمية said...

بسم الله الرحمن الرحيم
وصل اللهم على سيدنا محمد وآله الطيبين الطاهرين
واللعن الدائم الأبدي على اعدائهم اعداء الدين
اما بعد

فلعلي تاخرت كثيرا في الدخول لمدونتكم اختي الغالية نوارة فؤاد نجم
كنت اتابعها عبر مواضيعها التي كان يقوم بنقلها صديقي الاخ خادم آل البيت للمنتديات بتاعتنا مصر الفاطمية
بس ماتخافيش كنا متابعين يعني فمثلا اتذكر لما اوقفوا المدونة وانتي كنتي عامله منها نسخة احتياطي (ماشاء الله عليكي واعية) وقتها قعدنا نضحك ضحك كونك عامله منها نسخة احتياطي وماقدروا يعملوا فيكي المقلب ده ههههههههه
فكنا متابعين يعني
ههههههههههههه
بأي حال المقال بيوصف الواقع فعلا
فوالله كل لما اطلع على حال بلداننا اشعر وان ابليس هو من خطط لهذه الأوضاع المزرية
واوقن تمام اليقين ان الامر ليس وليد اليوم او الامس بل هو وليد الأمس القديم يوم الثقيفة
فبرضه سموها شورى رغم ماجرى فيها من بلطجة وفرض للرأي بالقوة واستفتاء على الرجل الواحد هههه الخ من امور يندى لها الجبين خجلا
اتمنى ان لا اكون ازعجتكم بمروري
وإن شاء الله تم وضع مدونتكم في المواقع التي نتصفحها يوميا
وممكن تعتبريني زميل مدون لكن في صورة منتدى
فانا فضلت انشاء منتدى عن انشاء مدونة منذو قرابة العامان عشان بتبأ مشاركة جماعية افضل واكثر ولتجنب ايقاف المدونة كما يحدث مع بعض الزملاء وللتنسيق الجيد بها الخ من اسباب
وإن كان في المدونة ميزة رئيسية وهي أنها غير قابلة للحجب من قبل الدولة إلا ان تحجب موقع المدونات الاساسي كله
بعكس المنتدى الذي يمكن للدولة ان تحجبه بكل سهولة
وبالنهاية نتمنى زيارتكم مثل مازورناكم

العلوي الفاطمي
طالب جامعي منياوي
مدير شبكة مصر الفاطمية

رامز عباس said...

السلام عليكم ورحمة الله

دين + مال +إعلام بدون مبدأ= تواكل

مبارك +جماعات إسلامية تخشي الحديث في السياسة +جموع أمية= سلبية أمام نتائج قرارات الحاكم

ماتشات كورة +شباب عاطل + مقاهي+ مخدرات= غياب للتنمية

جمعيات أهلية +رجالأعمال محتكرين + عشوائيات = ترسيخ للتسول

سلام زائف+ غلق معابر علي فلسطنين+ تطبيع مع إسرائيل= والله مبارك رجل السلام حتي ولو بالكلام


ناس مهاجرة + حوادث عنصرية +نظام الكفيل= مرمطة ومهانة لكل مصري


أمن الدولة + قوات أمن مركزى +معارضة نصفهم مشكوك في ولائة لقضية مصر الحرة= بقاء مبارك وتوريث جمال أبنه

مشايخ سلفية + أخوان مسلمين + حركات ومنظمات تدعي الأسلام= تشوية لصورة الأسلام وكما قال محمد عبدة هنا مسلمين بلا إسلام وبالغرب أسلام بلا مسلمين


مدونات مصرية + قضايا موحدة + تحالف إستراتيجي +فضح ممارسات قائمة = أمل لإعادة الوعي الشعبي والتمهيد للتغيير


رامز عباس
طالب بكلية الحقوق
مركز القاهرة للتعليم المفضوح

عم مينا said...

و ليه المسيحيين يزعلوا من كلامك؟ انتي ما قلتيش أي حاجة غلط يا نوارة.. الكنيسة مسئولة عن عزلة المسيحيين.. دي حقيقة.. الكنيسة أصبحت دولة داخل الدولة.. و اللي مش شايف كده يبقي أعمي

Unknown said...

عم مينا

يزعلوا يا مينا عشان هم حاسين ان مالهمش غيرها وممكن يشوفوا اني ايدي في المية الساقعة وبانظر وانا مش حاسة بيهم
بس اصلا الاحساس ده من اوله غلط
يعني ايه مواطن يبقى حاسس ان مالوش الا مؤسسته الدينية تحميه، ولا بيثق في قضاء ولا شرطة ولا دولة ولا طبعا بيثق في جيرانه اللي طافح معاهم عيش وملح امبارح والنهاردة يخرجوا يحرقوه

Unknown said...

اه نسيت
وانا شايفة ان الاستسلام للوضع ده
زي استسلام سكان العشوائيات للتدوير على الاكل في الزبالة

ماااااااااا ييييييينفععععععششششششششش

into said...

"In the world, approximately 62 millions people, all causes of death combined, die each year. One in twelve people worldwide are malnourished.[16] In 2006, more than 36 millions died of hunger or diseases due to deficiencies in micronutrients"[17]. The World Health Organization estimates that one-third of the world is well-fed, one-third is under-fed and one-third is starving

On June 19, 2009, it was reported that world hunger hit one billion people,[10] about a sixth of the world's total population.

There were 923 million hungry people in the world in 2007, an increase of 80 million since 1990.[11] The world already produces enough food to feed everyone - 6 billion people - and could feed the double - 12 billion people.
Reference According to the Food and Agriculture Organization of the United Nations (FAO)

و زي ما انت شايفه الناس اللي بتتبرع بالاكل و شنط رمضان دي مالهاش حق

into said...

الا بالحق يا نواره صحيح الكلام اللي بيقول ان الريس جاب المدونيين دول علشان يخلي شباب الانترنب في مصر مشغول علطول زي يعني كده ما جاب الدعاه الجدد للطبقات الرقيه؟و هل صحيح ان المدونين بيقبضوا من الريس؟و بيقبضوا كام؟؟
:-)

into said...

. المصري اليوم 15 اغسطس 2009 غاده علي عبد الحافظ
تزاحم الآلاف من المواطنين أمام بوابات إستاد المنصورة في الدقهلية اليوم السبت؛ للحصول على شنطة رمضان التي توزعها مديرية التضامن الاجتماعي وسقط العشرات منهم تحت الأقدام وحاصرت قوات الأمن الإستاد من الداخل والخارج لمنع حدوث مشاجرات أو أحداث شغب بين المواطنين.

وأمر اللواء سمير سلام، محافظ الدقهلية، إدارة الإستاد بفتح الأبواب والسماح للمواطنين بالدخول والانتظار داخل الإستاد بدلا من الانتظار في الشارع لحين البدء في التوزيع.

وقالت إحدى السيدات التي تنتظر إن الشنطة هذا العام تحتوى على 2 كيلو سكر و2 كيلو أرز و2 كيلو مكرونة و2 دقيق وكيلو بلح و2 كيلو فول.