Saturday 25 July 2009

ولا سعودي ولا ياباني شركة طنطا ح ترجع تاني

انا اليومين دول سنتمنتالية مهترئة زيادة عن اللزوم، بقيت اتضايق قوي، هم بيعاملونا كده ليه؟ فيه في الدنيا بلد الشعب فيها يعتصم عشان عايز يشتغل والحكومة تقول له لا، خليك كده عواطلي؟ نفسي ادخل جوة دماغك يا عوكل واعرف ايه اللي بيدور فيها
اكيد له عذر ما، او تبرير ما، في الكورس اللي باخده عند رأفت الميهي كان بيقول لنا على رسم الشخصيات: اوعى ترسم شخصية سودا، مافيش شر مطلق، كل انسان له اعذار ومبررات واسباب تخليك تتعاطف معاه، حتى ابليس لما ربنا وصفه اداله مبرراته وعمل له تاريخ.
يمكن يكون الكورس ده هو اللي مخليني سنتمنتالية مهترئة بزيادة كده؟
طيب يا عوكل، لو سمحت خليني اشوف مبرراتك زي ما شفت مبررات ابليس على الاقل، بتعمل فينا كده ليه؟ هو احنا وحشين؟ هو احنا طلباتنا ايه غير الستر ولقمة العيش، والناس عايزة تشتغل، نفسها تشتغل يا اخي، ده احنا شعب اي حكومة في الدنيا تتمناه
بتعمل كده ليه؟



الناس بتقول بالروح بالدم نفديك يا كتان، انا عمري ماشفت كده في اي حتة في الدنيا


مرة ابليس طلع لعوكل وقال له: انا عندي ليك فكرة تعملها في الشعب ده.... هات ودنك: وشوشوشوشوشوش
راح عوكل قال له: طب اسمع الفكرة دي، هات ودنك..وشوشوشوشوشوشوش
قام ابليس قال له: لا يا شيخ حرام عليك

5 comments:

مواطن مصري said...

هو كريم البحيري مش معاهم هناك


الصراحة مش هيجي واحد سعودي وهابي على اخر الزمن يشتري مصنع و يطرد ناس كفائة
و خبرة في الكتان

و الغزل

العمال دول اصحاب حق و الحق هيرجع ل اصحابة

هو مش ابليس هاجر لكندا :D

mido said...

فعلا المشكلة انه سعودى وهابى

:D

Kalimalhus said...

مواطن مصرى
---------
فيه برضه واحد هندى بس مش وهابى مشترى مصنعين و مطلع عين العمال .. ينفع ده و ألا لازمن و لابد يبقى وهابى؟

يا بنى مش محتاج تحشر وهابى و ظلامى و إرهابى فى كل حاجة.. حاول تركز على الموضوع..

و لو عايز الحق بقى .. سعودى هندى وهابى أو مش وهابى الأصل فى الموضوع إنه رأسمالى سعيه الوحيد هو لتعظيم أرباحه و ده بيتم من خلال إستغلال العمال و مص دماءهم.. و ده حال أى رأسمالى فى أى مكان ..

Unknown said...

اختى ما ترحمينا من تعليقات مواطن مصرى انتى بتتكلمى فى حاجة هو يمسك فى حاجة تانية خالص
بس الحقيقة بيظبط لى ضغطى المنخفض

حسام السعيد عامر said...

شئ مبشر بالأمل إن الناس تبتدي تتحرك وتتظاهر ده أحس كتير من التماوت والموات اللي مصر بشعبها وحكومتها وسلطاتها وبابا غنوجها غرقانين فيه