Saturday 11 July 2009

جهول مجهال ابو جهل

تحديث:
انا بس للامانة كتبت اقول: ييجي واحد زي ده، وانا مش عارفة الشخص اللي بعت لي راجل وللا ست لانه يا عيني، ههههههه، باين عليه خواف/ة وللا ايه وخاف/ت من لساني وفضايحي قام/ت مخصوص عمل/ت الاكاونت ده
"Anonymous A"
personanony@yahoo.com
انا بعد ما اتغاظت منه عشان نفسية المتسول اللي مسيطرة عليه (او عليها بقى مش عارفة) صعب/ت عليا
افتكرت كلام فرانتز فانون في كتاب "جلد اسود اقنعة بيضاء" بالظبط زي الناس اللي كان بيوصفهم، حتى كان بيقول انه من الغريب ان بعض الافارقة المنسحقين لما تقول لهم انت كان عندك حضارة يتقمص الابيض ويتشنج وينكر حضارة ناسه لانه مصمم على ارتداء القناع الابيض، يارب نخلي بالنا بس وما نعياش اكتر ما احنا عيانين
انا اصلي جالي ميل، ما بقتش عارفة، الاول طنشت قلت ما اردش، بس اللي باعت لي الميل قال لي كلمة استفزتني قوي دونا عن كل الميل، فقلت بقى لزمن افضحه على رؤوس الاشهاد
الميل الطويل العريض شتيمة عادي، انا مش بازعل منها، اللي غاظني الجملة دي:
" في عدائك هذا للغرب لو كان لديك ذرة كرامة لما استخدمت التكنولوجيا الغربية واقلها مدونتك"
هو بعيدا عن اني مش عارفة انا معادية للغرب في ايه؟ يعني لا معادية ولا مصاحبة انا بس ما احبش ابقى شبشب لحد، بس ده مش مهم
المنطق بتاع: ولما بتكرهوا امريكا بتستخدموا الكمبيوتر ليه؟ منطق غبي قوي، وجهول، ولو فيه اكتر من الجهل الواحد يقوله يبقى يقوله، والعجيب ان فيه ناس بتقوله، ولسة امبارح انا ومينا كنا عاملين زي عواجيز الفرح وبنتكلم عن قمة التمانية، وانا كنت باقول له هم مدينين لينا اصلا، مينا اخدته الجلالة وقال لي ولازم يدفعوا لنا تعويضات والفلوس اللي بيدوهالنا دي مش حسنة ده حقنا، قلت له بس يسيبونا في حالنا، وهو معتبر انه: لا.... يدفعوا فلوس ويسيبونا في حالنا برضه
وهو له حق بس ده مش ح يحصل
اولا الحق المعنوي:
بسبب عنصرية اوروبا (المفارقة ان اوروبا عنصرية اكتر من امريكا بكتيييير)، مش مقبول ابدا اي باحث يقول ان الحضارة الغربية والنهضة الصناعية كلها مبنية على الانجاز العربي/الاسلامي. ومع ذلك فيه بعض الباحثين الاوروبيين اللي اتمكنوا من انهم يقولوا كده ويتسابوا في حالهم من غير ما يسقطوهم (خصوصا لما يبقوا يهود عشان ماحدش يقدر يكلم اليهود) ولسة شايفة امبارح باحث عراقي الدكتوراه بتاعته في اثر الادب العربي على رواية دونخيشوت الاسبانية، واخدها من اسبانيا
الحقيقة ان كل الحضارة الغربية، بكل تفاصيلها، بما فيها الكمبيوتر، معتمدة على الانجاز الحضاري العربي/الاسلامي، وده مش عيب، احنا كمان اعتمدنا على اللي قبلنا، بس ما انكرناش فضلهم. وهاتوا مقدمة ابن خلدون واقروا البحث اللي عامله الدكتور محمد عبد الواحد وعارض فيه الجدول الحسابي اللي عمله العرب واللي على اساس الحسابات دي الغرب اتمكن من انه يطورها لحد ما وصل للكمبيوتر، كمان وجدوا مخطوطات عربية قديمة لفك رموز اللغة المصرية القديمة، والمخطوطات كانت متقدمة جدا وفيه اقوال بتقول ان شاملبيون اعتمد عليها سرا. بس الاحسن من كده فيه كتاب اسمه البذور الشرقية للحضارة الغربية، لكاتب امريكي اسمه جون ام هوبسون، بيقول ان كل تفصيلة، حتى التشريعات (بما فيها الجواز والطلاق) حتى العلمانية الغربية والحقوق المدنية (خاصة حقوق الاقليات) كلها مستمدة من الحضارة الاسلامية العربية، وهو بيقول انا عارف ان الكلام ده مش بيعجب بس دي ادلة علمية، واحيانا احنا بنحب نتهرب من الاسهام الاسلامي العربي لاننا حصلنا عليه عنوة بالحرب ونقول انه مش كله عربي واسلامي احنا اعتمدنا على الانجاز الحضاري الصيني، ودي حقيقة، بس احنا ما كناش ح نتمكن من الوصول للانجاز الحضاري الصيني لولا الوساطة العربية
طيب، انا واحدة جدودي عملوا انجاز حضاري وانا خايبة وما عملتش حاجة، ماشي، انا موافقة اني خايبة، بس جدودي دول بذلوا العلم لاي حد ولكل حد من غير النصب بتاع "حقوق الملكية الفكرية" اللي الغرب بيتنطع بيه عشان يحرمني من العلم اللي هو طوره وهو اصلا ميراثي من جدودي
انا جدودي ما كانش عندهم ملكية فكرية، كان عندهم: من كتم علما الجمه الله بلجام من نار يوم القيامة
وجدودي ما كانوش نصابين، ما كانوش ياخدوا من الناس وينكروا فضلهم، يعني المفارقة ان الحضارة الغربية اللي بتدعي لنفسها حقوق الملكية الفكرية ومش ناقص غير تبيع الهوا بفلوس عشان الملكية الفكرية، في نفس الوقت بيحرموا اصحاب الفضل من حق الملكية الفكرية ولو المعنوي، وبينكروا كتير من افضال حضارة اهل الجنوب
لما جدودي ترجموا الحضارة اليونانية واستفادوا بيها، ما خبوش مصادرهم وقالوا احنا اللي عملنا كده، وبالمناسبة بقى، الانجاز العربي والاسلامي والصيني موثق، وصعب انكاره، لكن في وقت ما العرب اكتشفوا اليونان، كان ممكن جدا يخبوا اللي اكتشفوه، وللا حتى يعيدوا نسخه ويحرقوا المخطوطات القديمة، ويدعوا لنفسهم الانجاز ولا حد كان ح ياخد خبر بالموضوع ده لحد اللحظة دي، لكن هم كان عندهم الامانة الكافية اللي تخليهم يرجعوا الفضل لاصحابه، واذا كانوا هم ما دفعوش لليونان او الفرس او الصينيين او الافارقة والهنود فلوس حق الاستفادة بالعلوم دي، فهم كمان ما اخدوش فلوس حق ما علموا غيرهم من الامم، والناس كانت بتيجي من اوروبا لقرطبة وبغداد عشان تتعلم على حساب الخليفة، ولما اتعلموا من الحملات الصليبية، كانوا هم اللي بيغزونا، مش احنا اللي عملنا عليهم حملة فرنسية عشان نجيب لهم مطبعة فرحانين بيها قوي بهبلنا، هم اللي جم زي النهابين واخدوا الحاجات دي ولا كأن ليها صاحب، وفوق ده كله، احنا ادينا الحق المعنوي لاصحابه مظبوط، ما سرقناش سطر، (ارجو قراءة كتاب الخطابة لابن رشد عشان تشوفوا ازاي معقد في موضوع العنعنة دي، يكتب يقول، من اول الكلمة الفلانية للكلمة الفلانية ده كلام ارسطو، ومن اول الكلمة الفلانية للكلمة الفلانية ده كلام، والجملة اللي قبل الاخيرة ده كلام فلان الفلاني، لما يطلع روحك وانت بتقراه) والبجاحة ياخدوا مننا ويشتمونا، ولولا ان اليهود مسيطرين على الاعلام والمؤسسات وهم السبب في ان صلاح الدين الايوبي يبقى له ذكر حسن في كتب التاريخ الغربية، لانه هو اللي انقذهم من الفناء واشترى صكوك عبوديتهم من الصليبيين واعتقهم ولولاه ما كانش ح يبقى فيه يهودي واحد في العالم دلوقت، كان زمان صلاح الدين بيتقال عليه بربيريان هو كمان
ده بالنسبة للحق المعنوي
انا مش بس ليا حق استفادة، انا ليا فلوس، يا يدفعوا لي فلوس، يا يدوني العلم اللي عندهم ببلاش زي ما اخدوا من عندي ببلاش
الحق المادي:
بعد النهضة الصناعية (اللي اتبنت على انجاز ناسي) حصل تضخم ولقوا انه من "الحتمي" احتلال الناس وسرقة مواردهم، والناس دي اللي هم احنا برضه، تاني، تاني احنا، كأننا اجوزنا امهم، طيب انا، في العالم العربي، وافريقيا، والهند، والصين، قد ايه من فلوسي ومواردي الطبيعية والبشرية استغلوا لدعم الحضارة دي؟ قد ايه؟ كل حاجة، كل مواردي وكل فلوسي وكل ناسي استعبدوا عشان يخدموا على الحضارة دي، لما 15 مليون يموتوا في البحر عشان رايحين عبيد يبنوا العالم الجديد (اللي الرحالة بتوعنا اكتشفوه قبلهم بس الفرق اننا ما احتليناش امريكا هم احتلوها) تسوى كام دي؟ لما عشرة مليون بنغالي يموتوا من الجوع عشان انجلترا عايزة ترفع سعر الاغذية، لما عشرة مليون هندي يموتوا وهم بيجمعوا القطن من الجوع والعطش والمرض، تسوى كام دي؟ ده غير استغلال زيتنا ودهبنا وزراعتنا وثرواتنا
فلوسي دي وللا مش فلوسي؟ ناسي دول وللا مش ناسي؟
حقها وللا مش حقهاااااا؟
لما لحد دلوقت، لحد اللحظة دي، بادفع ضرايب فحت ومش باخد بيها اي خدمات لان ضرايبي بتروح فوايد ديون لبنك الاحتياطي الفيدرالي في مقابل انهم يقعدوا حسني مبارك واتحرم من حقي في اني انتخب اللي انا عايزاه، وفوق ده كله، الدين اللي هو اخده واللي انا بادفع ضرايبي فوايده لا اكلت منه ولا شربت عليه مية
سرقة دي وللا مش سرقة؟
يسرقوني وكمان انا المدينة بالفضل ليهم؟ وواحد ذليل مريض زي ده يبعت يقول الكلام الفارغ ده؟ انا اللي غاظني انه صعب عليا
صعب عليا انه يبقى ده تقييمه لذاته ولنفسه، ليه؟ ليه يا جاهل؟ انت كويس، انت قدمت كتير للانسانية وما اخدتش اي حاجة في المقابل غير الاستغلال والقمع والوحشية
خلي عندك كرااااااااااااااااااااااااااااااااااااااااااااااااااااااااااااااامة
انت تستاهل يبقى عندك كرامة

64 comments:

ماجد said...

اللة يفتح عليك
كلامك مافيهوش حرف غلط على وبضيف علية علية ان اللى ىزى الاخ دة هما اللى عاملين فينا كدة مخلينا انهزامين احنا مشكلتنا اننا انهزمنا من جوانا الاول ودة اللى نجحوا فية وكمان نجحوا فى انهم يعملوا اللى زى الاخ دة حكامنا و لو كن صدرنا ليهم العلم والتقدم هم بيردوها بيصدروا لينا الجبن والخنوع والاستسلام
احنا احسن واقوى وافضل من كدة بكتير

محمد فوزي said...

هو بصراحه حقها

إيه؟

هو المفروض لا يبقى عداء ولا صحوبيه الحقيقه , يعني لا كراهيه ورفض مطلق بخلفيات إيديلوجيه مبنيه على قاعدة الولاء والبراء مثلاً ولا إنقياد أعمى يخليكي يجيلك إيميل محموق على الغرب كأن الغرب ابن اخته وإشتكاله منك

هي فقط لعبة مصالح, أن يكون لديك ما تستطيع أن تضغط به أو تقايض عليه لتحقيق مصالحك الماديه و تمكين قيمك الروحيه أي حقي وحقك لا حب ولا كره

soreal said...

when one feels down, its blogs like this that make me proud of my self and the ppl i come from
am hard wired to be like them even if am not aware of it
i know many of my sisters and bothers are, inspite of every thing..

we still have a hope :)

Unknown said...

ياااا
انا التعليق ده خلاني اعيط

الحلم العربي said...

لا فض فوك يا نوارة
بجد المرة دي انا معاكي مليون في المية
و هو ده رأيي لما الاخ الحاج اوباما كان جاي يقول ان لينا فضل على العالم و الناس مبسوطة قوي انه بيقول كده زي ما يكونوا ماكانوش عارفين وهو جه قالهم ...بجد احنا انهزاميين قوي و عندنا شعور بالدونية غريب و للأسف الغرب نجحوا في انهم يخترقونا بالمشاعر دي

ممكن اطلب منك طلب ؟ انا عايزة آخد لينك التدوينة دي و احطها عندي على الفيسبوك ..تسمحيلي؟

tuhamy said...

الفاضلة نوارة
أود ان أضيف أنه حتي
فى ميدان العقيدة والدين

فقد كان لمبادئ الحضارة الإسلامية أثر كبير في حركات الإصلاح الدينية التي قامت في أوروبا منذ القرن السابع حتى عصر النهضة الحديثة، فالإسلام الذي أعلن وحدانية الله في ألوهيته وروبوبيته وأسمائه وصفاته، وتنزيهه عن التجسيم والتشبيه والتعطيل، كما أعلن استقلال الإنسان في عبادته وصلته مع الله وفهمه لشرائعه دون وساطة مخلوق أياًّ كانت منزلته، كان عاملاً كبيراً في تفتيح أذهان شعوب أوروبا إلى هذه المبادئ السامية والتأثر بها مع فتوحات الإسلام في الشرق والغرب، إذ قام في القرن السابع الميلادي في الأوروبيين من ينكر عبادة الصور، ثم قام بعدهم من ينكر الوساطة بين الله وعباده، ويدعو إلى الاستقلال في فهم الكتب المقدسة بعيداً عن سلطان رجال الدين ومراقبتهم، ويؤكد كثير من الباحثين أن "لوثر" في حركته الإصلاحية كان متأثراً بما قرأه عن للعلماء المسلمين من آراء في العقيدة والوحي، وقد كانت الجامعات الأوروبية في عصره لا تزال تعتمد على كتب العلماء المسلمين التي ترجمت إلى اللاتينية

Unknown said...

ماجد

طبيعي اي ناس بتعاني من اضطهاد بتبقى يا اما انهزامية يا اما عندها عنصرية مضادة
بس المفروض ان لنا تاريخ ولنا منظومة اخلاقية تخلينا متنبهين طول الوقت اننا ما نقعش في حاجة زي دي
احنا عجايز، المفروض نبقى اوعى من كده

محمد فوزي

تمام
x 10

soreal
انت خلتيني اعيط

الحلم العربي

طبعا
انا لازم اكتب على المدونة: حقوق الملكية محفوظة للانسانية

اللي عايز ياخد حاجة ياخدها فورا من غير استئذان

تهامي

انا ما رضتش اقول كده احسن يبقى فيه مشاكل

بس كتاب البذور الشرقية للحضارة الغربية بيقول ان الاصلاح الديني الاوروبي برضه اعتمد على الحضارة الاسلامية و"فصله للدين عن الدولة" اي والله
كنا مستنيين خواجة اسمه هوبسون عشان يقول لنا كده

فاروق عادل said...

الله عليكى يانوارة كلامك كله مظبوط فى كلمه مؤثرة جدا سمعتها من واحد بريطانى عن موضوع الحضارات دة بجد خلانى اتاثر جدا لكنى للاسف مش فاكرها
-----احسن حاجة فى البوست انى اخيرا لقيت حد مصدق ان اسمة دون خيشوت مش كيشوت اللى الكل بيكتبها وكلام سوريال مش محتاج تعقيب كلامه كله فى الجون يانوارة
:)))

simplymoi said...

Nawara

As I told before your ideas are bigger than this tiny window(blog). Find yourself a new one
maybe magazine or TV show. There are new generation who does not read and need to educate themselves about their history. There is moral obligation from you to the next generation. Go to every TV channel and called it Rewriting the history again. Nawara I am serious,it is your duty and Allah will reward at end.

Kalimalhus said...

كلامك أكيد مظبوط و تفاصيله تحتاج لمجلدات و بالفعل فيه قدر هائل من الكتابات اللى بتؤكده..

لكن إتهامنا فى العصر الحالى بإنعدام الكرامة و التخلف إلخ ينبغى الرد عليه بتوضيح الأثر البالغ الأهمية للغرب الإستعمارى فى إجهاض فرص تقدمنا و لحاقنا بركب التنمية منذ بدايات التاريخ المعاصر..

الأكذوبة بتاعة إن نابليون أتى لمصر بالمطبعة و المدفعة و عندما غادرها أخذ المدفع و ترك المطبعة كلام فارغ لأن الواقع إن نابوليون أخد المطبعة و ساب مدفع ضرب بيه المصريين القلعة من مئذنة السلطان حسن لما كانوا محاصرين الوالى التركى أحمد خورشيد..

النهضة المصرية فى بداية القرن التاسع عشر لم يأتى بها الغرب إلينا بل بعثنا أبناءنا إلى مدنه لتلقى العلم.. و التدخل الغربى أجهض تكوين دولة عربية بقيادة مصرية و أرغمنا على التبعية للسلطنة العثمانية طوال عقود تالية .. و التدخل الغربى أغرقنا فى الديون تمهيدا لتدخل أكبر و نتيجته الإحتلال البريطانى اللى قضى على تحول مصر لدولة دستورية فى نهاية القرن التاسع عشر..

مصر كانت تانى دولة ينشأ بها خط للسكك الحديدية و عكس ما يعتقد البعض كان ده قبل الإحتلال البريطانى و على العكس الإحتلال البريطانى قضى على النهضة التعليمية و حجم التعليم العالى كما إن سياساته طوال 70 سنة من الإحتلال خنقت أى فرصة للتنمية الإقتصادية و الصناعية على وجه الخصوص..

الإستعمار الغربى كان مسئول عن زرع الكيان الصهيونى فى المنطقة و خلق الصراع العربى الإسرائيلى اللى إستنزف الموارد الإقتصادية و البشرية للمنطقة و كان ليه أثر كبير فى جمودها السياسى و إبتزاز شعوبها..

الغرب حتى اليوم بقيادة الولايات المتحدة لا يكف عن التدخل فى شئوننا و أهم ما يقوم به هو دعمه للأنظمة المستبدة الجاثمة فوق صدورنا و للطبقات الفاسدة من أصحاب الأعمال الذين يدمرون إقتصادنا لصالح تحويله إلى تابع للإقتصاد الغربى و متصرف لإنتاجه و عشوائيات يتم نقل الصناعات الملوثة و الخطرة إليه و مدفن لنفاياته النووية..

الغرب مدين لنا بما فات و مازال الدين يتضخم لأنه ككيان رأسمالى متوحش ينزح أموالنا إلى خزائنه يوما بعد يوم بما فى ذلك فوائض البترول و أرباح طبقات الرأسمالية المحلية الفاسدة المستزفة من عرق عمالنا الذين يأكلون التراب..

من يتهمنا بالتخاذل و إنكسار الظهر أولى به أن يرفع قدمه الغليظة عن رقابنا و يتيح لنا أن نتنفس و ساعتها فليحاسبنا أو ليحاول لأننا حينها من سيحاسبه.. و الحساب يجمع..

جنّي said...

السلام عليكم

احيكي تدوينة جميلة ورد بليغ ..

لقد قالوها لي من قبل وبغباء وليس بجهل لأنه وأمثاله لا يعلم الا ما يمليه عليه حقده وكراهيته لنا وبغباء شديد مركب ..وجدول الحسابات الذي تحدثتي عنه هو الشي الوحيد من كثير واجهته به وهو الخوارزميات والتي لم يستطيعوا ترجمتها الى كلمة اخرى غير الخوارزميات بكل اللغات .. وليس من جدودنا وفقط ولكن من روادنا وعلمائناالحاليين الذين سيطروا عليهم عنوة ونسبوهم للغرب فجامعاتهم تعج بالعرب والمسلمين في كل التخصصات وتضيف لهم الكثير والكثير

تحيتي

Kalimalhus said...

فاروق عادل.. هو الحقيقة دون كيهوته أو دون كيخوته.. مش دون كيشوت أو دون خيشوت

حسن على said...

احيلكم دام فضلكم الى كتاب شمس العرب تسطع على الغرب - او أثرالحضارة العربية فى اوربا"للمستشرقة الالمانية"زجريدهونكة" الكتاب يقارب الستمائة صفحة وتتجدث فية بأعجاب عن اثر العرب فى كل شىءتقريبا .. الرياضيات ..الفلك ..الطب الملاحة .. اللغة(بما فى ذلك الالمانية ذاتها).. الأداب ولايتسع المجال هنا لذلكر رؤوس الموضوعات فقط.وسيسعدنى ان ارسلة دى اتش ال على العنوان الذى تنشرة نوارة اذا اهتمت بذلك

احمد سعيد said...

على فكرة يانوارة

بالنسبه لموضوع المطبعه دة

الحمله الفرنسيه اخدت المطبعه معاها وهى ماشيه

وكمان اصلا كانت مخصصه لطباعه الجرايد والمنشورات التافهه بتاعهم



بالنسبه بقى للامريكتين

فيه اقوال بتقول ان الرحاله الاوروبيين اللى اكتشفوهم

وجدوا هناك مسلمين

طب الاسلام وصل هناك ازاى بقى ؟؟؟؟؟

simplymoi said...

This is so funny

Teen pregnant after ‘swimming in pool’By HAYLEY DOYLE

Published: 09 Jul 2009

A WOMAN is suing an Egyptian hotel claiming her daughter got pregnant - from using the swimming pool.
Magdalena Kwiatkowska's 13-year-old returned to Poland from their holiday expecting a baby.

Magdalena believes the teenager conceived from stray sperm after taking a dip in the hotel's mixed pool. She is now seeking compensation from the hotel.

A travel industry source said: "The mother is adamant that her daughter didn't meet any boys while she was there.

"She is determined to go ahead with the case."

Tourist authorities in Warsaw, Poland, have confirmed they received the bizarre complaint.

مهندس مصري بيحب مصر said...

في التدوينة دي بجد الله ينور عليكي
:)

Unknown said...

الاستاذ حسن علي
طب وانا ح ابعت لك المعلوم فين؟

Ibn Barhoma said...

With all the due respect to what u mentioned in this last blog, we cannot be proud just because our ancestors did great achievements to humanity ... da osr deel ... It's just like a homeless beggar who is boasting that his 13th grandfather was a king ... and even claims that he has the right to rule, as a lawful heir for the throne (which doesn't exist anymore). We (and the whole humanity) have to be grateful our ancestors for what they contributed to the human civilization, and make sure that WE TOO can do our jobs and bring something useful to humanity ... By the way, intellectual property is protected for only 20 years ... you cannot ask for money for things that were made more than 500 years ago !!! ... believe it or not, we haven't brought anything useful to this world for the last 500 years! ... I'm not pro-western and I'm not just criticizing you ... It's just that you cannot escape from the terrible present by saying my 13th grandfather was a king!

Unknown said...

ابن برهومة

لا حضرتك، انا باهرب من الواقع، ولا باقول اننا نرتكن لانجاز قديم
بس كمان ماحدش يقدر ينكر اسهام الحضارات بتاعتنا في الحضارة الموجودة
موضوع اننا بقالنا 500 سنة ما قدمناش حاجة انا اسفة، ده كلام مش دقيق ابدا

واحنا لحد دلوقت بنقدم، بس بصفة افراد مش بصفة امة او حضارة

الطبيعي والمنطقي ان الحضارات دي زي الامواج (هي غالبا بتبقى امبراطوريات وقانون الامبراطورية الحتمي انها لازم تقع) والطبيعي وسنة ربنا في الارض ان شعلة الحضارة بتتسلم من مجموعة بشرية لمجموعة بشرية اخرى
وكل حضارة في الدنيا بتقع
كلها
واللي انت شايفه ح يقع
ويبزغ مكانه ناس تانية
بس ما بيبقاش من الحضارة غير اللي سابته للانسانية واللي من حق الانسانية انها تستفيد بيه لان مافيش حاجة دايمة لحد
وعلى اساس ده لما كانت شعلة الحضارة عندنا ما خبيناش حاجة عن حد
وبس احب انوه هنا، بالرغم من اني مصرية وكل حاجة، بس الحضارة المصرية كانت حضارة بخيلة، وكانت معتمدة في اساسها على الاسرار والاخفاء
وده منع ناس كتير من انها تستفيد منهم بعد كده ده اولا
وثانيا حرمهم من ارجاع الفضل ليهم
يعني الحضارة اليوناينة استفادت من الحضارة المصرية، بس كان عندها فرصة انها تخبي الاستفادة دي لان اصلا المصريين القدماء تعمدوا اخفاء اسرار انجازاتهم
المفروض ان الاسرة الانسانية اسرة واحدة
ولما ربنا بيعمل تدوير للسلطة بين افراد الاسرة دي، المفروض ان صاحب القياد يكون عنده رحمة بالناس، لانه في النهاية مش دايم له، ح يقع وغيره ح ياخد القياد، وده اللي الفلسفة الاسلامية كانت مؤمنة بيه وكل المساجد والمكتبات والمستشفيات اللي اتبنت في عز ازدهار الحضارة دي كان مكتوب على سقفها داير من داير

"كل من عليها فان ويبقى وجه ربك ذو الجلال والاكرام"
لا غالب الا الله، لا غالب الا الله

وعشان كده الحضارة دي استمرت عشر قرون

عشر قرون ده كتير قوي، مافيش حضارة استمرت عشر قرون غيرها
واهي وقعت، مش لاننا ناس وحشة ولا ديلنا قصير
لان دي سنة ربنا في الخلق
احنا كحضارة وقعنا، بس كافراد ما احناش متشعلقين على الشجرة ولا حاجة
عندنا علماء وناس اسهمت في الحضارة الغربية من جواها
الانساني والاخلاقي ان الحضارة الغربية لما تتسلم القياد تحترم نفسها، دي حضارة ما بقلهاش اربع قرون بس
عيلة يعني
ومهددة انها تقع في اي لحظة بدري كده
الاخلاق تقول انهم يعترفوا بفضل اللي قبلهم، زي ما اللي قبلهم اعترفوا بافضال اللي قبلهم
والانسانية تقول انهم يخدموا الانسانية ويعلموا الناس زي ما اللي قبلهم خدموهم وعلموهم
ده واجب
لا قصر ديل مننا
ولا كرم وتفضل منهم

حسن على said...

الاستاذة نوارة...ههههههههه معلوم اية ياشيخة ...هوانا فى ديك الساعة(او حتى فرختها)لما أهدى كتاب جميل لقارىء فصيح؟؟؟ الكتب هدايا مقبولةوجمالها مش وهى ع الرف جمالها وهى متداولة واعتقد ان الوقت مناسب جدا لمثل هذا الكتاب ...ثم انك تقدرى تعزمينى على حاجة ساقعةلو مصممة

احمد سعيد said...

معلش يانوارة

احنا ماستمريناش عشر قرون ولا حاجه

احنا حضارتنا استمرت اكتر من كدة

طبعا احنا بتعامل كحضارة اسلاميه

لان الامبراطوريه العظيمه دى قامت على محور الاسلام وليس العروبه

وعلى ذلك فالدوله العثمانيه امتداد لهذة الامبراطوريه

العثمانيين كانوا مطلعين افلاس اوروبا لغايه القرن الثامن عشر

واللى هيتصفح ويدور يلاقى العجب

وساعتها مش هتستغربوا من كم الحقد والغيظ اللى فى قلوب ناس زى الصرب والكروات لغايه دلوقت


دة من رواسب الماضى

ودة مش وهم ولا حاجه حتى هما نفسهم معترفين بكدة

وكتائب التطهير العرقى اللى كانوا بيعملوها للمسلمين كانوا مسمينها كتائب الملك لازار

لازار دة كان الملك بتاعهم زمان واتهزم هزيمه ساحقه من العثمانيين واترقعله سداغه كمان

والله يانوارة اللى يدور هيلاقى بلاوى

بس احنا مش بنحب ندور

بنحب ناخد على الجاهز بس

احمد سعيد said...

على سبيل المثال لا الحصر

معركه بروزة

معركه حشدت فيها اوروبا قوتها البحريه ضد العثمانيين

وانفقت عليها البندقيه ( البنك الاوروبى انذاك ) بسخاء

600 سفينه اوروبيه

ضد 122 سفينه للعثمانيين

يعنى تقريبا العثمانيين سدسهم


تخيلوا ايه اللى حصل

المعركه اتحسمت لصالح الاتراك فى خمس ساعات

معركه بحريه بتخلص فى خمس ساعات

عمرها حصلت دى ؟؟؟؟




معركه ماريتزا
ودى كانت فضيحه بجلاجل

لان لا وجه للمقارنه بين القوات اصلا
كانت تحالف مشكل من الصرب والبلغاريين ضد العثمانيين

وكان العثمانيين بقيادة واحد اسمه لالا باشا شاهين

اللى حصل انهم كبسوا على معسكر الصرب والبلغار مساء وقضوا على الجيش بالكامل

الطريف بقى ان كل المراجع التاريخيه بتقلل عدد جيش الصرب والبلغار كتييير جدا علشان تدارى الفضيحه

وفى المقابل مافيش اى حد فتح بقه عن عدد جيش المسلمين فى المعركه دى

اجدعها مرجع تاريخى اوروبى هتلاقوة كاتب كدة بالحرف :

عدد الجيش العثمانى

غير معروف

او غير محدد بالظبط

او اقل بكثير من الجيش البلغارى



بالذمه فيه كدة

فيه معركه فى التاريخ مش معروف اعداد الجيوش فيها ؟؟

ولو بنسبه تقريبيه حتى


خمنوا انتوا بقى ايه اللى حصل


دة على سبيل المثال لا الحصر

والمعارك مافيش اكتر منها

دا غير التفوق العلمى طبعا

واللى بيتمثل فى التفوق العسكرى العثمانى

من ناحيه التسليح وفن صب الدافع

والتكتيك القتالى

فحرام يانوارة نستقطع الفترة دى من تاريخنا

العثمانيين حالهم ماتدحدرش الا لما استقبلوا اليهود من كل انحاء اوروبا وابتدوا ينخروا فى البلاط العثمانى زى السوس

من اول امهم روكسلانه

اللى اتجوزت السلطان سليمان القانونى

وكانت السبب فى مقتل اولادة


زوديهم شويه

بدل عشر قرون خليهم حداشر ونص او اتناشر

:D

احمد سعيد said...

اة نسيت اقول حاجه

معركه ماريتزا دى كان معاهم المجر كمان

والاتنين ملوك اللى قادوا الجيش اتقتلوا فيها

من باب توخى الدقه يعنى

حسن على said...

ابن برهومة تناول لتوة حقنة مركزة مقوية للذاكرة فى الوريد ان لم تصلح حالة الزهايمر التى يعانى منها فلن يفيدة زراعة مخ جديد حتى...

Unknown said...

بص بقى، انا العثمانيين دول مش بينزلوا لي من زور
انا باحب الاتراك ناس لطيفة ومهذبة
بس العثمانيين دول عقوبة ربنا

Unknown said...

حسن علي

لا هو ابن برهومة زعلان

زعلان علينا يعني، عنده تقدير مبالغ فيه لينا وحاسس اننا بامكانا نعمل احسن من كده ومكسلين

بس الحقيقة، يمكن طول الفترة (اللي مصممة انها عشر قرون يا احمد :)) ادانا احساس اننا لازم نبقى في الصدارة ولو ما بقيناش في الصدارة يبقى احنا فينا حاجة غلط وده مش مظبوط

ربنا ادا حق للانسانية ان كل فترة مجموعة بشرية فيها هي اللي تقود الحضارة، عشان ح يسألها بعد كده عملت ايه، احنا قبل ما نبقى عرب، او منتمين للحضارة الاسلامية (حتى اللي مش مسلمين منا) احنا انسان ومنتمين للجنس البشري وربنا قسم الازمان على المجموعات البشرية
من حقنا بوصفنا انسان، وبوصفنا مجموعة بشرية اسهمت في الحضارة الانسانية، اننا نطالب بحقوق من اللي بيقودوا الحضارة دلوقت
ده حقنا
وواجبهم
زي ما احنا لما كنا في القياد قمنا بواجبنا على اكمل وجه وابتكرنا مفاهيم كتير ما كانتش موجودة
زي مفهوم العولمة
زي مفهوم اتاحة المعلومة للجميع
قبل كده ده ما كانش موجود لاسباب متعلقة بالتطور البشري مش بصراع الحضارات ولا بالعرق
وهم اخدوا مننا وطوروا، وده اسهام مش لازم ننكره عليهم، بس الانسان بشكل عام له حقوق على الناس دي، عشان هم نفسهم في يوم من الايام ح يبقى لهم حقوق على ناس تانية
لكن بجد يعني، مع خالص التقدير لتطويرهم وانجازهم الحضاري هم اثبتوا ان ربنا ما يحكمهم على ولايا ابدا
ده كفاية القنبلة
اي قنبلة بقى، فكرة القنبلة في حد ذاتها قايمة على ايه؟ قايمة على كسر ارادة الشعوب مش الجيوش
هو حد بيضرب قنبلة على جيش؟ القنبلة معمولة عشان تترمي على شعب
وبرضه عملوا حاجات كويسة
والحاجات الكويسة دي من حقي عشان انا انسان، وعشان انا منتمية لمجموعة بشرية لها فضل كبير قوي على الانسانية

مهندس مصري بيحب مصر said...

ههههههههههههههههههه
يا أحمد أنا معاك يا بني
الحضارة العثمانية هي إمتداد للحضارة الإسلامية و ما فسدتش غير في أواخر عهدها ساعة ما تحولت للرجل المريض

Unknown said...

"الحضارة"
العثمانية؟

طب قول الخلافة يا راجل
الطب المماليك في عهدهم اسس علم الاجتماع وازدهرت علوم الجغرافيا وتنقيح التاريخ

العباسيين، واو واو واو يعني، اسم الله عليهم
الامويين في الاندلس قنبلة نووية

لكن ايه الانجاز الحضاري للعثمانيين؟ هو مش ذنبهم، هم جم واحنا بنشطب خلاص وكانت وصلت الحضارة لذروتها وخلاص خطها البياني لازم ينزل زي ما ربنا بيرسم للناس
بس يعني هم عملوا ايه غير انهم استفادوا من الوصول للقمة وكان عملهم كله عسكري وجابوا الفنانين والعلماء من كل حتة عشان يعملوا لهم الاستانة
وكفروا سيئاتنا وهم السبب في عقدة البياض اللي عند المصريين لما جابوا لنا عدم ثقة في النفس: شعب كله اسمر والجمال بالنسبة له هو البياض طب ده لازم تجيله عقدة نفسية
لا
انا مش باحبهم قوي بصراحة

احمد سعيد said...

بصى يانوارة

العثمانيين اللى انتى بتتكلمى عنهم

( دول اللى هما الاتراك برضه )

دى الصورة الموجودة فعلا من القرن الثامن عشر فصاعدا

معاكى حق فيها

غباء وقنعرة وغرور وعنطظه على الفاضى

وناس شاربين ستين كيلو نشا على الصبح

ماشى

اللى قبل كدة كان حاجه تانيه

ومش مشكلتهم بقى ان فيه علام معرس ركز على فترة سيئه فى تاريخهم وتجاهل التانيه

الطب والهندسه اللى انتى بتتكلمى عليهم دول

لولا العثمانيين مكانش هيكون لهم وجود

العثمانيين كانوا السبب فى حمايه الدوله المملوكيه من الحملات الاوروبيه ابتداء من فترة ما بعد الحمله الصليبيه السابعه فصاعدا

الحملات الصليبيه مخلصتش ولا عمرها خلصت يانوارة

كل الموضوع انهم طلعلهم خازوق فى اوروبا اسمه الدوله العثمانيه

كل يومين كانت بتتعمل حمله صليبيه من 3 دول اوروبيه على الاقل , بس كانت بتتوجه للعثمانيين

فعلشان كدة جيوش الصليبيين مكانتش فاضيه لنا

طب ايام الحملات السبعه الاولى كان عندنا ناس زى صلاح الدين وزنكى ونور الدين محمود

وبعدهم جه قادة دكرة زى قطز وبيبرس وقلاوون ومحمد ابن قلاوون

وخلاص

راحوا الدكورة

طب كان يبقى ايه العمل بقى لو كانت جت حمله على مصر وهى تحت حكم ناس سيس زى برقوق وفرج والعالم دى ؟؟؟؟

طيب اديكى عينه بسيطه

اقرى تاريخ المقريزى

هتلاقى حملات على الاسكندريه

بدل الحمله عشرة

هى مش حملات بمعنى دقيق

لا

دى سفينه مكسحه محمله كام عسكرى اوروباوى
عدت البحر على حين غفله ونزلت اسكندريه وقعدت جواها بدل اليوم عشرة وهاتك يادبح فى خلق الله

وبعدين اخر ما يزهقوا يخادولهم كام الف اسير من اهل البلد ويروحوا يبيعوهم عبيد هناك
بالاضافه طبعا لسرقه ونهب الكنوز والاموال


كوووووووووول دة

وبسلامته سلطان مصر الننوس بيجهز الجيش وجاى فى السكه

اصله بيمشى جوة الجزمه الاول

الكلام دة فى زمن ابن خلدون على فكرة

انا مانكرش ان دوله المماليك كانت ذات هيبه

بس يبقى فى النهايه انها ضعفت كتييييير قوى بعد محمد ابن قلاوون

( الفرق بينه وبين قطز فى الزمن مش كتير على فكرة )

يعنى لو حصلت حمله صليبيه بمستوى الحملات السبع الاولى فمصر كانت هتقع لا محاله

بس محصلش

علشان الاتراك كانوا مطلعين افلاسهم هناك

وكان من الطبيعى جدا ميبقاش فيه نهضه علميه بالشكل اللى يرضيكى

ناس بتحارب بين الحرب والحرب حربين

عاوزة منهم ايه يعنى

يانوارة دا فيه سلاطين منهم مشافوش كرسى العرش بتاعهم اصلا

من يوم ما مسك لغايه مامات وهو طالع من حرب لحرب

يعنى مش بيخلص الحرب ويروح بلدة يريح

لا

دا يطلع من برة برة على بلد تانيه


كما ان الدوله كانت فى قلب اوروبا

ومحاطه باعدائها من كل جانب

يعنى مهددة

فالكلمه الاولى للمدفع وللسلاح

لولا الناس اللى مش عاجبينك دول

كنتى هتلاقى السيناريو الوسخ اللى حصل من اول حمله نابليون وبعدين احتلال الجزائر وما بعدة


كوووووووول دة

كان هيبدأ من سنه الف تلتميه وحاجه

مش الف سبعميه

يعنى الناس مشكورة فضلوا يحاربو عننا اكتر من ربعميه سنه

عايزة ايه تانى يانوارة ؟؟؟؟؟

احمد سعيد said...

وبعدين بقى ايه حكايه انهم جم واحنا بنشطب دى ؟؟؟

هى انبوبه بوتاجاز ؟؟

احنا ايه وهما ايه ؟؟؟؟

مش بقولك

هى دى بقى الشوفونيه القوميه

الوهم العربى

يابنتى احنا امبراطوريتنا قامت على اساس الاسلاااااااام لا العروبه

طب احنا هنحشر نفسنا فى العرب

هنقول ستنا كانت هاجر

ماااااااااااااااااشى

هفوتها دى

مش هقول اننا خلطنا من كل امم الارض ولا هقول على جيش لويس اللى اتاسر واتوزع على اهالى الدقهليه وبعدين النسوان بتوعنا عجبهم الشباب ابو شعر اصفر وعنين خضرا وعتقوهم واتجوزوهم

ومش هقول على حمله نابوليون اللى جت حاجه واربعين الف ومشيت اربعتلاف بس

ولا الباقيين اللى استنوا فى مصر وعاشوا فيها

ولا هتكلم عن الفلاحين اللى شعرهم اصفر وعنيهم خضرا

ولا هتكلم عن الرومان والبطالمه وغيرهم وغيرهم

مااااااااااااااشى ياستى

هنقول الصعيد اغلبه عائلات عربيه وكذلك قبائل البدو

ماشى احنا عرب

طيب

ليبيا عرب ؟؟؟

الجزائر عرب ؟؟؟؟

دول كانوا اسمهم البربر على فكرة

المغرب عرب ؟؟

السودان عرب

ايران عرب ؟؟؟

كل الدويلات المسلمه اللى كانت فى اسيا زمان , عرب ؟؟؟؟؟

لا مش عرب

فبلاش شوفونيه

وبلاش احنا وهما

واحنا مشينا وهما جم

لا

احنا وهما واحد

علشان احنا وهما مسلمين


ولا بلاش دى علشان بتزعلى

احنا وهما بشر بندافع عن قضيه واحدة
شايفين انها هى الصح والعدل والصواب

انا بتكلم عن ناس زى بايزيد ومراد ومحمد الفاتح

حرام قوى تحطى دول فى قفه واحدة مع المعاتيه اللى خربوها بعد كدة

ولعلمك بقى

كل الناس اللى مسببين فى العقليه المصريه عقدة من الاتراك

كانوا دلاديل محمد على ومقاطيعه اللى جابهم معاة

زى لاظوغلى وكلوت بيه وغيرهم

وكلهما كانوا اما صيع فى بلادهم او صيع برضه هربوا من دول اوروبيه وجم يتنغنغوا عندنا هنا وعملوا نفسهم بشاوات ولبسوا العمه ورطنوا بالتركى

احمد سعيد said...

وبالنسبه للعمال والحرفيين المصريين اللى مؤرخينا مازالت ماثرة عليهم الشوفونيه المصريه وبيبكوا عليهم لغايه دلوقت


الناس دى كانت بتاخد اجرة محترمه

مش سخرة يعنى

وبعد ما يعملوا المطلوب منهم كانوا بيتخيروا بين البقاء او العودة لبلادهم

واغلبهم كان بيرفض يرجع

وفيه ناس بالفعل اترصدت عودتها لمصر

( بدائع الزهور فى وقائع الدهور )


اينعم كان غلط انهم يجبروا على الرحيل من الاول

انما كل زمن وله اعرافه

الكلام دة كان عادى اياميها

بل ان فيه سلاطين مماليك وغيرهم

كانوا بيساووا المدن بالارض وبيعملوا اهرامات من الجثث

ياشيخه عندك واحد زى تيمور لنك دة

بلوة من بلاوى الزمن

هولاكو جنبه ملاك برىء

شفتى عمل ايه فى بغداد ودمشق

قتل اعداد بالملايين

دى ارقام مؤكدة

تخيلى دة لو كان دخل مصر

اهو دة كان حاكم مصر فى عهدة واحد جربوع اسمه برقوق

افاق اساسا

ابعدين ابنه كان اسمه فرج

وكان ولامؤاخذة

راجل مش ولابد يعنى

مؤخرة جيش تيمور

المؤخرة بس
هزمت جيش برقوق

طب لولاش واحد زى بايزيد
فضل يناكف ويحارب فيه

كان بقى موقفنا ايه

تيمور دة لو كان دخل مصر

والله مكان بعيد عليه يهدم الهرم او يفكك حجارته

دا اقل واجب معاة يعنى

احمد سعيد said...

مهندس مصرى

نوارة معاها حق فى البق دة

هى مسمهاش حضارة عثمانيه

هى اسمها دوله عثمانيه

ثم خلافه بعد ذلك

انما حضارة دى لا

لانهم من الناحيه العلميه مالهمش اثر يذكر باستثناء جانب العلوم العسكريه

كما انهم جزء من الحضارة الاسلاميه اصلا
وامتداد لها داخل اوروبا

Unknown said...

انا لما قلت هم كان قصدي على الدولة العثمانية ككيان مش الاتراك

وكل اللي انت بتقوله انجاز عسكري مش حضاري

وانا مش باشيطنهم زي ما فيه ناس بتشيطنهم ولا حاجة
كان فيهم مميزات، زي القوة العسكرية اللي بتتكلم عليها، وزي السماحة الدينية برغم بقى كل الكلام عن اللي حصل في الاخر، اللي حصل في الاخر ده له اسباب سياسية، لكن هم كان عندهم سماحة دينية مع الاديان الاخرى غير المسلمة
ما كانوش متسامحين مع المسلمين بس
:)
كالعادة يعني
وبعدين تيمور لنك ماهو مسلم يا احمد

Unknown said...

انا بقى الحاجة المستغربة لها اليهود
عاملين زي البلية
الكفة تميل شرق يميلوا معاها تميل غرب يميلوا معاها
ودايما قابين على وش الفتة

احمد سعيد said...

مسلم مسلم يانوارة

مش دى القضيه

شفتى مان بيسيب المدن اللى بيدخلها ازاى ؟؟؟؟؟

دا من فئه ( هادمى الحضارات ) ان لم يكن استاذهم

احمد سعيد said...

اة يانوارة

ولاد لذين

الفرس يقبوا دول يقبوا معاهم

الاسكندر ييجى يلزقوله

المسلمين برضه يلزقولهم

الاتراك برررررضه تلاقيهم عندهم

وبعدين انجلترا

واخر الكلام حدفوا الدفه على امريكا

وبيجهزوا نفسهم علشان ينقلوا تانى دلوقت

المرة دى الدفه على الصين

Unknown said...

اه يا احمد
بالنسبة للامريكتين
انا ح ابقى ارجع للمرجع عشان اجيب لك التاريخ بالظبط

لقوا مخطوطات من تلات رحالين عرب كانوا باعتين للخليفة في الاندلس بيكلموه عن الناس اللي ورا البحر اللي شعرهم "سبط بالغ الطول" وعيونهم جميلة وطيبين ومضيافين ورئيس قبيلتهم ادا الرحالة هدايا كتير ح نبقى نديلك منها، بيقولوا للخليفة، ح نبقى ندي لك منها :)) وقعدوا عندهم وكان عندهم واحد بيتحدث بلسان العرب ولما سألوه عرفت منين لسان العرب قال جم رحالة قبلكوا عرب وقعدوا شوية وعلموني لسانهم الكلام ده يا سيدي يكون في القرن التالت الهجري تقريبا، بس ح اتأكد لك من التاريخ

Unknown said...

اه ونسيت اقول لك

الداء الوسخ بتاع رجالتنا، اول حاجة كتبوها في الجواب "قوم كرام نساؤهم جميلات" حاجة فضيحة من زمان يعني

مهندس مصري بيحب مصر said...

و هو إنتي عايزاهم يشوفوا الجمال و ينكروه
:))

احمد سعيد said...

ههههههههههههههههههههههههههههههههههه

اة

اعتقد الكلام دة كان فى امريكا الوسطى والجنوبيه

مش كدة

دول مكانوش مجرد قبائل زى الهنود الحمر

دول كانوا دول وحضارات قديمه

الغريب ان مثلا يعنى ناس زى المايا دول كانوا قتالين قتله واساتذة قرابين بشريه

ازاى قدروا يعيشوا فى وسطهم وكمان يعلموهم لغتهم بل ويعتنق بعضهم الاسلام

؟؟؟؟؟؟؟؟؟؟؟!!!!!!!!!!!!!!!

احمد سعيد said...

ولو سمحتى

مش كل رجالتنا

فيه لسه رجاله محترمين

زييى كدة

:D

Unknown said...

وح يعرفوا يسلكوا مع الصين؟ هم شاطرين عموما، وبيعرفوا يتاقلموا وعندهم احساس دائم بعدم الامان وانهم لازم يتركنوا على قوة تحميهم بسبب عددهم القليل

بس كويس ان مسلمين وعرب المهجر بيرموا بلاهم عليهم

Unknown said...

مهندس مصري
ههههههههه
ربنا يستر وما يكونوش اتحرشوا بيهم

احمد سعيد said...

يسلكوا ياختى وميسلكوش ليه ؟؟؟

بكرة يطلعلك صينيين يهود

مواطن مصري said...

أعرب الرئيس الامريكي باراك عن استعداده للالتزام مع سوريا، مشيراً الى "قلقه" من بعض جوانب التصرف السوري، وذلك في مقابلة مع شبكة "سكاي نيوز" التلفزيونية الاميركية تبث الاحد 12-7-2009.

وأبدى الرئيس أوباما في هذه المقابلة استعداده لقبول دعوة لزيارة العاصمة السورية وعقد لقاء مع الرئيس بشار الاسد.

وأضاف أوباما في المقابلة التي سجلت بينما كان يقوم بزيارة الى غانا، "بدأنا نشهد بعض الاتصالات الدبلوماسية بين الولايات المتحدة وسوريا".

الا انه اضاف "ثمة جوانب في التصرف السوري تقلقنا، ونعتقد ان سوريا تستطيع الاضطلاع بدور بناء اكثر حول عدد كبير من المسائل".

وأوضح أوباما "لكن كما تعرفون، أنا أؤمن بالالتزام وآمل في ان نتمكن من الاستمرار في رؤية حصول تقدم في هذه المجالات".

وفي بداية يوليو/تموز، دعا الرئيس الاسد نظيره الامريكي الى زيارة سوريا لمناقشة مسائل الشرق الاوسط، وذلك في مقابلة حصرية مع شبكة "سكاي نيوز" البريطانية.

وقال الاسد "سيكون مرحباً به في سوريا. وأنا واضح جداً في هذا الموضوع".

http://www.alarabiya.net/articles/2009/07/12/78474.html



هههههههههههه و ادي يا نوارة جبهة الصمود و المقاومة صباحا و في المساء اهلن ب المفاوضات السرية بين اسرائيل


و دعوات ل اوبما

Ibn Barhoma said...

One cannot deny the recent contributions of "individual" muslims and arabs living in the western society. I'm for instance very proud and actually inspired by Zweil. But these contributions donot count as part of an islamic/arab civilization, but they are part of the western one. These contributions were achieved in the west, and only the west can benefit from them. Similarly, one cannot say that the contributions of Alrazy, Alkhawarezmy, and Albokhary are contributions of the persian civilization (simply because they were born in Persia and beyond), but they are islamic. It's the islamic civilization that gave them the chance to fluorish, and similarly, the western civilization gave the chance to contemproray arabs and muslims, and is thus the one to be accredited for those contributions.

One cannot blame the western civilization for not applying what we think is ethically and morally correct, namely to give credit to the islamic civilization. They have the power, they name the rules. If we want our rules to be followed, we should get powerful (not necessarily in a military sense) and force our rules. This is actually what God wants from us, to be strong enough/ to lead, so that humanity can experience the qualities and values of islam.

The cycles of civilization are understandable, but this doesnot mean that we are doomed to remain ignorant and poor. The real question is "when should our curve rise again?" ... we have seen how Taiwan, China, Malaysia, Brazil, and many others have grown economically strong because of the vision of the leaders and the industriousness of the people. History is the handicraft of man, and the opposite is not true.

Finally, I just want to say that I'm not having Alzheimer, I'm fully aware of the glory our ancestors did, I just want to see what me and my generation contributes. The saying says ... Lays alragol man kal haza aby, walaken alragol man kal ha ana za!

Fady Wadie said...

مقدرش غير اني احييك على الموضوع الرائع ده فعلاً انا مش عارف الناس اللي زي ده بيفكروا ازاي ... هو فاكر اننا ملناش لازمه
حتى في مجال الكمبيوتر اللي هو بيتكلم عليه انه اختراع غربي احنا عندنا عباقرة مش موجودين في اماكن كتير من العالم
عندنا علماء - للاسف ان اغلبهم موجودين بره - ليهم اسهامات عملاقة في العلم

بس مشكلة الحضارة العربية الوحيدة انها حضارة دموية في ده متفرقش كتير عن الحضارة الاستعمارية الغربية فلا تعايرني ولا اعايرك

احتمال احنا عندنا امانة شوية اكتر منهم اننا ساعات - مش دايما - بنقول مصدر المعلومة اللي احنا بنينا عليها منين

أحساس لسه حى ...أنا مش موافق said...

عزيزتى

بخصوص استخدام تكنولوجيا الغرب

ما نرجع بالسنين شوية ونشوف مين اللى استخدم خير مين واخد حق مين

والمفروض يعنى بدل مش بنصنع سلاح نرجع نحارب بالسيوف بدل صناعة غربية

ايه الجهل ده

سلام

حسن على said...

احمد سعيد اثرى الحوار , وماشاءاللة كبر شوية عن السنة اللى فاتت العكروت

Unknown said...

ابن برهومة

ههههههههههههههه يابني ما ينفعش تبقى زعلان قوي كده
انا مقدرة حماسك واحساسك ان يعني دول احسن مننا في ايه؟ ناقصين رجل ناقصين ايد؟ لا مش ناقصين بس دي طبيعة الامور

احنا في عصر اضمحلال ده مفهوم
ومفهوم اننا عايزين نقب
ودلوقت اللي طور العلوم وفي ايده مفاتيحها حاليا هو الغرب
ومافيش حاجة اسمها ما اقدرش الومه على فرض اخلاقياته هو
لا اقدر
انا انسان اولا
وفيه طرق كتير افرض بيها اخلاقياتي حتى وانا في عصر الاضمحلال

انا ليا حق في استخدام التطور ده وليا احق في اني ادين والوم واندد واطلع ميتين ابو اللي في ايده قوة وبيتصرف بما لا يتناسب مع الاخلاق والانسانية
مش معنى اني ضعيفة دلوقت وهو قوي دلوقت انه هو حر يعمل اللي هو عايزه
لا مش حر
والقيود اللي هو حاططها بتعوق تقدمي

الصين؟
اقول لك الصين عملت ايه عشان تنهض: اولا "سرقت" كل ما امكن من الابحاث والصناعات وكل اللي ينفع "يتسرق" ولو اني مش شايفة انها سرقة، وكل حاجة عليها حقوق ملكية فكرية
ثانيا عملت نظام قمعي فظيع عشان ما عندهمش وقت للمهاترات والرغي عايزين يشتغلوا
ثالثا عملت حماية على اقتصادها لحد ما احرزت تقدم كمي في كل الصناعات اللي هي سرقتها وفجأة راحت مغرقة بيها السوق
رابعا هي مهتمة بالنقل اكتر من الابتكار
يعني ينقلوا (باي طريقة بقى) الابحاث العلمية ويشتغلوا عليها

عارف
عاملين زي النمل

وهم همهم السيطرة على السوق اقتصاديا
ده مدخلهم
والسيطرة الاقتصادية مش انجاز حضاري، هي قوة، بس مش حضارة

وبعدين بقى اشتغلوا شوية في النصب

يعني منين ما تروح تلاقي مركز بيعلمك التأمل والسرحان بعشرميت جنيه
وشاكرا ومش الشاكرا والكلام النصب ده

المهم يعملوا فلوس وخلاص

وكذلك تايوان وماليزيا والبرازيل
لكن انت ما تقدرش تقول الحضارة الصينية (بفلسفتها بقى ومفاهيمها وقوانينها) بتغزو العالم

المنتج هو اللي بيغزو العالم والمنتج حاجة مهمة جدا

احنا بنعمل ايه؟

ولا حاجة كمجموعة بشرية
بس كافراد بنحاول نتعلم وننتشر في اي حتة

انا مبسوطة اننا بقينا زي العفريت طالعين في كل خرابة

وبنتعلم، الصين فيها عرب ومسلمين وتايوان والبرازيل وامريكا واوروبا

الافراد بينتشروا وبيتعلموا ودي حاجة في حد ذاتها كويسة
لكن احنا اذا عايزين نستعيد عافيتنا لسة قدامنا شوية

ولحد ما نستعيدها احنا من حقنا نفرض مطالبنا على اللي بيقودوا الحضارة
مافيش حاجة اسمها يقتل الناس وما يبقاش عنده اخلاق لانه قوي
بكرة يبقى ضعيف
لازم يعمل حساب الحكاية دي

Unknown said...

وعلى فكرة يا ابن برهومة
احنا لازم نركز قوي اننا نتعلم
زي ما الصين مركزة انها تنتج
الصين مركزة انها تنتج عشان عندها نظام وسيستم

احنا طبعا زي ما انت شايف
لا عندنا نظام ولا حتى فوضى
قاعدين كده في الاوف سايد

يبقى واجب الافراد انهم يتعلموا باي طريقة
مش لازم نسافر عشان نتعلم
ولو اننا المفروض دورنا يتفعل اكتر من كده برة

بس باي طريقة وباي وسيلة لازم نتعلم

زي ما الصين لطشت الصناعات ولا عبرت الملكية الفكرية

احنا من حقنا نلطش الابحاث وندرسها ونذاكرها وحتى نعمل جامعة على النت واللي عنده معلومة يعلمها لغيره ببلاش

دي اهم حاجة
كل مجموعة بشرية لها حاجة (بسبب تاريخها وثقافتها) بتتميز بيها

المنطقة دي من العالم (ايا كان بقى شرق اوسطيين اذا ضمينا ايران وافغانستان او عرب) اللي منتمين للثقافة دي

كويسين في تحصيل العلوم والتعليم عندنا مهم وبنتفوق فيه

نركز عليه بقى
لو حتى واحد قاعد في البيت كده ويلطش كتاب وينزله وللا حتى ابحاث وللا اي حاجة

المهم يبقى عندنا اكسس وارادة اننا نتعلم كتير وعلى قد ما نقدر

Unknown said...

وعلى فكرة يا ابن برهومة
احنا لازم نركز قوي اننا نتعلم
زي ما الصين مركزة انها تنتج
الصين مركزة انها تنتج عشان عندها نظام وسيستم

احنا طبعا زي ما انت شايف
لا عندنا نظام ولا حتى فوضى
قاعدين كده في الاوف سايد

يبقى واجب الافراد انهم يتعلموا باي طريقة
مش لازم نسافر عشان نتعلم
ولو اننا المفروض دورنا يتفعل اكتر من كده برة

بس باي طريقة وباي وسيلة لازم نتعلم

زي ما الصين لطشت الصناعات ولا عبرت الملكية الفكرية

احنا من حقنا نلطش الابحاث وندرسها ونذاكرها وحتى نعمل جامعة على النت واللي عنده معلومة يعلمها لغيره ببلاش

دي اهم حاجة
كل مجموعة بشرية لها حاجة (بسبب تاريخها وثقافتها) بتتميز بيها

المنطقة دي من العالم (ايا كان بقى شرق اوسطيين اذا ضمينا ايران وافغانستان او عرب) اللي منتمين للثقافة دي

كويسين في تحصيل العلوم والتعليم عندنا مهم وبنتفوق فيه

نركز عليه بقى
لو حتى واحد قاعد في البيت كده ويلطش كتاب وينزله وللا حتى ابحاث وللا اي حاجة

المهم يبقى عندنا اكسس وارادة اننا نتعلم كتير وعلى قد ما نقدر

حسن على said...

عنوان رئيسى: الحمار فهم تانى يوم اعتذر عن غبائى عنوانى هو:lazarit2000@yahoo.com, وفى انتظار العنوان اللى حابعت لك علية الكتاب

Dr. Ahmed Wagih said...

طول ما ثقافتنا هي ثقافة تبجيل الغيبيات وتعظيم انفسنا او على الأقل الأكاذيب المنقولة عن حضارتنا الماضية، لن نتقدم ابداً. نوارة: انتي بتقولي انهم مانعينك انك تنتخبي حد تاني غير حسني مبارك: ياترى عندك بطاقة انتخابية اصلاً؟؟ انا مرة سألت طلبة بكالوريوس هندسة (اصغر واحد عمره 22 سنة) نفس السؤال، وكان فيه حوالي 5% منهم بس عندهم بطاقات انتخابية!!!

امريكا ممنعتناش اننا نأخذ حقنا في الأنتخابات،أحنا محاولناش اساساً

انا رأي اننا اولاً معلوماتنا التاريخية مغلوطة في معظمها! صلاح الدين لم يكن بالشخص العظيم الذي نصوره على سبيل المثال، وفتح مصر لم يتم لتحرير المصريين ولم يستقبل المصريين العرب الفاتحين بالورود - بغض النظر عن موقفنا الحالي يجب ان نكون موضوعيين ونعرف الحقائق قبل ان نتكلم، كما ان الحديث عن انجازات العثمانيين مردود عليه بأن اكبر انجازات العثمانيين هي توسيع الدولة الأسلامية وهو في الحقيقة احتلال دول اخرى بفظائع كبيرة يكفي ان تقرأ في المراجع حكاية ابراهيم باشا بتاعنا وكيف انه كان يقيم المستوطنات في اليونان ويأتي بسكان من الخارج ويحلهم محل السكان الأصليين هناك (فيه شبه من اللي بيحصل في فلسطين؟)وهزيمة الأسطول المصري وتدميره بواسطة الأسطول البريطاني وكيف حدثت...

مواطن مصري said...

نوارة مقال اكثر من رائع ل الاستاذ احمد خالد توفيق


http://www.boswtol.com/5gadd/nsahsah_256_011.html


لعبة الاثنين

حسن على said...

اه ونسيت اقول لك

الداء الوسخ بتاع رجالتنا، اول حاجة كتبوها في الجواب "قوم كرام نساؤهم جميلات" حاجة فضيحة " انا بصراحة مش شايف اى فضيحة فى ان توصف النساء بالجمال,اوالقوم بالكرم... الصياغة اللغوية بعيدة عن الوصف المسف او الممرقع ...ومش عارف مزعلاكى لية؟؟؟

Unknown said...

الاستاذ نهضة مصر

انت اسمك كده كنوع من السخرية يعني؟

mido said...

Nah·det Masr

انت عشان مش عجبك الحاضر تقوم رادم على الماضى !!؟


لأ صلاح الدين شخص عظيم

و انجازاته اكبر من اخطائه

مواطن مصري said...

جيت و لقتكم ببتكلمو عن العثمانين ناس بتقول خلافة


بس خلافة ازاي و احنا كنا تحت احتلال عثماني و سرقة اموالنا و استعباد المصرين ؟؟؟؟

مواطن مصري said...

انا جايبلك اية حاجة تخرجك من الجو دة و تضحكي


http://www.freechristian.eu/fcv/3-7-2009-1.wmv
مناظرة القمني و البدري مش هتقدر تبطل ضحك


بصراحة هي مش منظرة خناقة و كان ناقصها فيصل القاسم

مش فاهمه said...

بصى يا نوارة انتى نسيتى كمان الحضارة الفرعونيه و البابليه و الفينيقيه مااليونايين و الرومان اخدوا عنهم برضه انا فخورة بانى مصريه و عربيه و مسلمه
بس مش حساكى عايزة تذكرى موضوع الحضارة المصريه القديمه دى كتير بس ماعلينا انا طبعا مع اننا بلاش نطاطى قوى كده وبلاش الشعور بالدونيه اللى بيسيطر على البعض منا لأ و الأنكى مش بس شعور البعض باننا لا نملك شيئا لأ ده تطور لننا لا نستحق شيئا و حسارة فينا كمان و اننا كده فل قوى و نبوس ايدينا شعر و دقن على النيعمه اللى احنا فيها

Unknown said...

مش فاهمة
انا كمان اكيد فخورة اني مصرية
بس ماحدش اتمكن يستفيد من الحضارة الفرعونية غير اليونان واليونان اخفوا استفادتهم

وده بقى غلطة المصريين القدامى
لا ياربي حرام هو مش غلطة لان الانسان في وقتها ما كانش تطور بالشكل الكافي اللي يخليه يعلن عن اسرار قوته وفي نفس الوقت يضمن ان ماحدش يغير عليه

بسبب الموضوع ده المصريين كتموا خالص على اسرار قوتهم ولحد دلوقت فيه حاجات كتير ماحدش عارفها ولا فاهم لها حاجة

الرومان ما استفادوش من الحضارة الفرعونية ولا حتى الحضارة اليونانية

الرومان دول غجر ومقرفين ومن اوسخ حضارات التاريخ
مافيش اوسخ منهم غير امريكا
هممم
مش اوسخ

اهي زيها

بس هي دي فكرة ان المصريين حجبوا استفادة الناس بسبب الاخفاء وادوا اليونان فرصة انهم يسرقوا منهم وما يدوهمش اي فضل معنوي
المفروض ناخد من بعض
بس لما ناخد من بعض وننكر فضل بعض نبقى بنسرق

احمد سعيد said...

الاخ اللى اسمه نهضه مصر

نعم

بتقول ايه حضرتك

طب اوكيه انا هناقشك

بس واحدة واحدة كدة ومتتكلمش كلام عام

اولا مين ابراهيم باشا اللى حضرتك بتقول عليه

علشان فيه ستين ابراهيم باشا

منهم ابن محمد على

وايه بقى مساوىء صلاح الدين اللى انت شايفه شخص مش كويس بسببها

وايه هزيمه الاسطول المصرى دى

هو سيادتك بتصنف محمد على على انه عثمانى ؟؟؟؟

والله لو حضرتك قريت كلامى اللى كتبته كويس

دا ان كنت قريته اصلا

هتلاحظ انى بفرق بين فترتين فى عهد الدوله العثمانيه

الاولى كانت كويسه

والتانيه كانت فترة سقوط ووحشه

التانيه بقى دى من القرن الثامن عشر فصاعدا

واعتقد ان كل الكلام اللى سيادتك بتقوله دة بعد كدة

وايه علاقه اسطول محمد على بالكلام اللى قلناة ؟؟؟

مستنى ردك

حسن على said...

لحد اللحظة دي، بادفع ضرايب فحت ومش باخد بيها اي خدمات . .................................... بتدفعى ضرايب "فحت" بتاخدى بية مطبات يا اختى بلاش نكران جميل