بالنوسبة للسيادة ومنظمة العفق الدولية

مبدئيا تعزيز منظمة العفق الدولابية موجود جزء منه هنا والنص الكامل على موقعها ياراجلة بالانجليزييييييييييييييييييييي

بيقول ان "الاتنين" حماس واسرائيل، عيال وحشة وح نذنبهم هم الاتنين الضارب والمضروب

ليه؟ لان المساواة في العفق عفش

والتقرير بيقول انه بالرغم من ان حماس نادرا ما احدثت خسائر في الجانب الاسرائيلي، وبالرغم من ان حماس لم تتعمد الاصابة في الجانب المدني، وبالرغم ان مافيش دليل على ان حماس استخدمت اي بيني ادم كدرع بشري، وبالرغم من ان اسرائيل احدثت خسائر شديدة ومعظم الخسائر اللي احدثتها في الجانب الفلسطيني كانت مدنية، وفيه ادلة بتقول انه عن عمد، وفيه ادلة بتقول ان الجانب الاسرائيلي استخدم الاطفال دروع بشرية

الا ان الاتنين، حماس واسرائيل وحشين

انا زعلان منهم لانهم نوتي نوتي نوتي، ومافيش شيكولاتة بعد الغدا ومافيش مرواح للنادي الا لما يخلصوا الواجب

احنا مش عارفين نشكر منظمة العفو ازاي؟ العفو والله، ده احنا خدامينك

طيب هلبت حسني مبارك، اللي امبارح قفل السكك كلها عشان كان بيتفسح، احم، حمد الله ع السلامة يا ريس، والله احنا كنا قلقانين عليك ما تعرفش قد ايه، الحمد لله، ربنا ما يحرمناش من العطلة اللي بتعملها لنا كل ما تفكر تبص من الشباك

حسني مبارك بقى، ما بيتكلمش غير عن حاجتين لا ثالث لهما: الشرعية الدولية، والسيادة المصرية

طيب ادي الشرعية الدولية يا بابا حسني زي ما انت شايف، بيقولوا لنا في وشنا كده: بالرغم من ان حماس ما عملتش حاجة بس هي مدانة بجرائم حرب لان جوة قلبها مش نضيف، والاعمال بالنيات، واذا ما كانوش ح ينضفوا قلوبهم اللي زي علبة البلاك نهارهم مدوحس

بالنوسبة للسيادة

مقال ندى القصاص اللي واقفة على المعبر بقالها مدة بيقول ان، الى جانب البشريات الكتير اللي واقفين على حدودنا عشان يحموا اسرائيل، زي مثلا امريكا واوروبا، جات اليابان قالت لك: وانا كمان يا عمو وانا كمان، خدني معاك والنبي ومش ح اعمل شقاوة

حد عمره شاف المعبر؟ ياريت والنبي حد يروح يطل على المعبر شوية، لو انا وكام واحد من اللي بيعلقوا عندي وقفنا عليه ح نسده

وكلللللللللللللللللللللل جيوش العالم جاية تقف عليه، حتى اليابان ونحن الان في انتظار الهند والسند وبلاد تركب الافيال وبوركينا فاسو نظرا لامتلاكها سلاح نووي عضوي من الاعشاب الطبيعية

طيب يا جدعان ده اسمه احتلال كده، مش هو الاحتلال بيبقى كده؟ وللا انا بقالي كتير سايبة التعليم ونسيت؟ مش لما قوات اجنبية تيجي تقف على حتة من بتاعتك تبقى محتلاها؟ امال احنا بنقول على الخليج تحت الاحتلال ليه؟ ماهو عشان عنده ناس شبه اللي عندنا واقفين في اماكن شبه اللي واقفين فيها الاخوة كرامازوف

يعني سيبك من ان دي ارضك، ح نعتبر انها منطقة دولية، ولو اني اللي اعرفه ان سينا رجعت كاملة لينا ومصر اليوووووم مصر اليوم في عيد، هيه، مصر اليوم في عيد، الله، مصر اليوم في عييييييييييييييييييييييييييييييييييييييييييييييد، واهلا اهلا بالعيد، مرحب مرحب بالعيد، هيه، هيه، هييييييييييييييه، هيههيه، هييييييييييييه

طيب الاستاذ سعد نبيهة بيسأل سؤال هنا والله: مش ده اعتراف ضمني من السلاطات المصرية بانها غير كفء وغير قادرة على حماية حدودها؟

يعني انا لما انادي ابن الجيران يقف على الباب عشان يحميني، مش ده معناه اني ما عنديش قفل؟ واني مش عارفة احمي بيتي؟

انا: بس يا سعد، ايه الكلام اللي بتقوله ده؟ الناس لبعضيها يا اخي

طيب برضه الاستاذ سعد نبيهة بيسألني سؤال جوهري، هي اسرائيل ناوية تضربنا وللا ايه؟

قلت له ليه يا سعد بتقول كده؟ كفا الله شر، تف من بقك يا راجل، العدو

قال لي: اصل كل الجيوش الجرارة دي جاية واقفة على حتة معبر لا راح ولا جه، ده معناتو ان فيه على الناحية التانية جيش جرار على قبة الاستعزاز عشان يئتحم الحدود المصرية، الا اذا بقى مصر هدد اسرائيل في السكرتة انها ح تضربها علقة موت بعد اللي عملته في الفلسطينيين في يناير اللي فات، انا مش قلت لك التعلب هو اللي ح يخلص على اسرائيل؟

قلت له: لا والله يا سعد، ما وصلنيش خبر ان مصر هدهدت اسرائيل بحاجة، دول حتى اكتر من السمن ع البرنجان الاسود، وبعدين اسرائيل مالهاش جيوش جرارة في غزة، هي لو ح تيجي ح تيجي بالطيارات بقى زي ما عملت المرة اللي فاتت

سعد نبيهة: قصدك في سبعة وستين؟

انا: لا سبعة وستين ايه ياراجل، هو في سبعة وستين غزة كانت تحت الاحتلال؟ دي كانت تبع مصر

سعد نبيهة: يبقى في تلاتة وسبعين، ايام الثغرة؟

انا: لا يا سعد، ثغرة ايه؟ انت مالك قديم كده؟

سعد نبيهة: امال مرة فاتت فين؟ تمانية واربعين

انا: ياراجل المرة اللي فاتت، لهم حق يسموك على اسم امك وانت تايه كده، يناير اللي فات، ماهي ضربت االحدود ورفح المصرية ودخلت مجالنا الجوي بالطيران

سعد نبيهة: اخصصصصصصصصصصص عليك وعلى وشك، اسفخص، اسفخص، بتشوهي سمعة مصر، مالكيش دعوة بيا تاني ولا بامي الحاجة النبيهة

ومشي وسابني وهو بيقول: قال ضربوا حدودنا قال، اشاعات، اشاعات، اشاعات، بيقولوا الطيارات لبستنا الخازوقات، اشاعات اشاعات

------

ملحوحة:

اسمع كلب بيتكلم عن سيادة مصر تاني مالوش غير الشبشب في بقه رأسا، قال سيادة مصر قال، دي سيادة امك