ازدواجية المعايير في نقد ازدواجية المعايير

الحقيقة الناس مش مفزوعة من اللي بيحصل في الصين لان الصين كده، الصين من كام سنة عدت بالدبابات على متظاهرين، ما كانوش مسلمين ولا حاجة، صينيين عاديين، الديفولت يعني، هي الصين كده، لو ماو تسي تونج نفسه صحي من موته ومشي في مظاهرة ح يتقتل

ومافيش اعتقالات، قتل على طول، وبرضه احقاقا للحق، الناس ما قتلوش مسلمين بس، اللي طلع في الشارع من الهان اتقتل برضه

الكلام بقى عن ان المسلمين ليه ما خرجوش في مظاهرة للتنديد بالصين ده كلام عنصري جدا

فيه كائن اسمه طارق عبد الفتاح، وكائنة تانية اسمها منى الطحاوي (الاتنين عايشين في امريكا وبيكتبوا اول انجليش اول زا طايم)، قالوا الكلام ده، قالوا المسلمين عندهم ازدواجية معايير عشان ما خرجوش في مظاهرات مساندة للصينيين المسلمين

هم صحيح المسلمين عندهم ازدواجية معايير (لاسباب كتير مش مجالها دلوقت)، بس مش في دي، دي بالذات هم كانوا ابعد ما يكونوا عن ازدواجية المعايير، لان لو ح نخرج في مظاهرات على ممارسات الصين يبقى نخرج في مظاهرات عشان المسلمين وغير المسلمين اللي الصين بتقتلهم، وفي الحالة دي ح نفضل قاعدين في الشارع طول حياتنا، جايين نفتكر دلوقت بس ان الصين بتموت الناس؟ لو ما كانوش مسلمين وعملوا مظاهرة كانوا اتقتلوا برضه

ولو كان الناس خرجوا في مظاهرات عشان الصين كان طارق عبد الفتاح ومنى الطحاوي برضه، هم هم، قالوا: طب خرجتوا عشان المسلمين اللي قتلتهم الصين، ما خرجتوش ليه عشان العيال اللي الدبابات عدت عليهم؟ 

وفيه بعض المتحمسين بيقترحوا اننا نقاطع الصين!!!!!! انا بصراحة ضحكت، ده احنا كده مش ح نلاقي خيط في ابرة نشتريه، هو فيه حاجة مش صيني؟ ده سجادة الصلاة صيني، وفانوس رمضان صيني

اللي عندهم، في الموقف ده، ازدواجية معايير فعلا هي امريكا واوروبا برضه، عشان هم اللي ابدوا قلقهم على قمع التظاهرات في ايران وهددوا ايران بعقوبات وكمان حرب، وماحدش فتح بقه قدام الصين

عشان هم كمان مش ح يلاقوا كلسون بدكة يلبسوه لو داسوا للصين على طرف

ليه منى الطحاوي وطارق عبد الفتاح ما قالوش كده على امريكا واوروبا؟ عشان بيسترزقوا منها، مش عشان عندهم عدالة بجد

اذا كنا ح نتكلم عن ازدواجية المعايير عند المسلمين، انا مستعدة االف مجلدات، بس نتكلم عن كله بقى

لا، عشان المسلمين، لا بيصنعوا كل حاجة من اول الشبشب لحد الاجهزة الكهربائية زي الصين، ولا لما بيزعلوا بيموتوا اكتر من تلاتة مليون في تمن سنين زي امريكا واوروبا، ما عندهمش الامكانية يعني، مش ما عندهمش الرغبة

والاسهل انك تيجي على الغلبان وترمي عليه كل البلا اللي في الدنيا لانه مش ح يعرف يعمل لك حاجة

عرفتوا الدنيا دي ماشية ازاي؟

الدنيا كلبة والانسان واطي

وايوة كتير من المسلمين عندهم ازدواجية معايير، بس عاملين زي النشال اللي بينشل محفظة، ينضرب في الاتوبيس لما يتعدم العافية

انما اللي ياخد رشوة عشرة مليون يبقى باشا

والانسان اللي اصله واطي يتكلم عن قمع التظاهرات في "محور الشر" وما يتكلمش عنه في "محور الخير" والانسان اللي اصله واطي يقول العنصرية في الغرب ضد الاسلام سببها المسلمين ويقول العنصرية ضد الغرب في العالم الاسلامي سببها التطرف الديني بتاع المسلمين، يعني هم السبب في الاتنين

والانسان اللي اصله واطي يقول الافارقة كسالى واليهود شاطرين

والانسان اللي اصله واطي يتعاطف مع حفيد الريس لما يموت ويقول على عماد الكبير بلطجي ويستاهل يتعذب

هو كده، الضعيف مقرف، وعبء على الناس، وما بيصعبش على حد، وماحدش بيلتمس له الاعذار، وماحدش بيرحمه

وفيه ناس يعرفوا يقولوا: الامريكان غلابة لانهم جهلة والاعلام بيضللهم، وغصب عنهم، ومربوطين في ساقية، وما ينفعش نكره الشعوب، والخطاب العنصري هو اللي اضفى عليهم العنصرية دي، هم ضحايا الاعلام بتاعهم وحداشر سبتمبر هي السبب، واحنا مقصرين في اننا نعرض قضيتنا على الشعوب مش الحكومات، وغباوة بقى، يوم ما واحد حب يلفت نظرهم لينا قام قتل تلاتلاف منهم

(الكلام ده كلام ناس انا شخصيا باحترمهم جدا، وده كلام انا موافقة عليه جدا جدا جدا) 

بس هم هم نفس الناس دول، هم هم، بنفس البنطلون بنفس الفانلة مش عارفين يلاقوا للمصريين، على سبيل المثال لا الحصر، اي اعذار شبه كده خالص: احنا شعب عنصري، احنا شعب مزدوج المعايير، الناس طلعت ضد عنصرية المانيا في الشارع ولما المسيحيين اتحرق عليهم البيت عشان بيصلوا ما سمعناش حس ولا خبر ولما البهائيين اتحرقت بيوتهم ما سمعناش حس ولا خبر

(وده برضه كلام انا موافقة عليه جدا جدا جدا)

انا بس مش موافقة على ازدواجية المعايير بتاعة الناس اللي بتشتكي من ازدواجية المعايير

يعني يا انت دمك حامي وبتكره الظلم يبقى: المصريين فعلا شعب عنصري، ومتعصب، ومش عادل، ولما المسيحيين بيتقتلوا بيتكتب حتى في الجرايد "فتنة طائفية" وهي مش فتنة طائفية ولا حاجة، الفتنة دي بتتقال في العنف المتبادل، لكن العنف هنا من طرف واحد، والطرف ده مش المسيحيين اللي ماتوا، اكيد مش هم يعني

بس في نفس الوقت: والامريكان شعب عنصري، بيدفع ضرايب عشان يقتل الناس، وانتخب واحد مختل عقليا غزا بلدين عشان برجين وقتل تلاتة مليون عشان تلاتلاف وانتخبوه مرتين عشان بس يضمن لهم انه يقتل الناس ومش مستكفي لحد دلوقت وعايز يخلص على الناس (ده بعد حداشر سبتمبر على طول كان فيه اقتراح داخل امريكا باخصاء المسلمين) وقبل انه يدفع ضرايب عشان الناس تتعذب في جوانتانامو

يا اما انت اسم الله على مقامك قلبك حنين وبتلاقي اعذار للناس، وبتروح لابعد من السطح وتحلل الاسباب، والامريكان معذورين لانهم ناس جهلة والاعلام خوفهم وصور لهم ان المسلمين والعرب دول كائنات فضائية بديول وقرون

يبقى تعذر برضه المصريين يعني، يعني اذا كنت بتعذر الامريكان لان كم الرفاهية اللي هم عايشين فيها مش مديهم فرصة يحسوا بغيرهم ولا يسمعوا وجهة نظر غيرهم، يبقى الاولى تلتمس اعذار لناس كفرانة في حياتها وعاملة زي الراجل اللي مديره في الشغل بيذله فبيروح يضرب مراته، وحط في اعتبارك ان الشعب ده شاف على التلفزيونات تلاتة مليون بيتقتلوا قدامه وهو مش عارف يعمل حاجة، وحط في اعتبارك ان كل الهجمات الطائفية ضد المسيحيين والبهائيين كان وراها الامن اللي راح للناس وقال لهم: انصروا دينكوا، والاعلام برضه ونواب من مجلس الشعب

واذا كان الامريكاني مش فاضي يقرا كويس عشان بيشتغل ليل نهار لانه عايز يسدد اقساط البيت والعربية فالمصري ما بيعرفش يقرا اصلا، وعاطل وقاعد  على القهوة ونفسه يعمل اي حاجة بدل قعدته دي

انا مش معترضة لا على اللي بيهاجم، ولا على اللي بيلتمس اعذار، بس وبرة واحدة في الكلام، ما تغنيش اوبرا وبعدين تقوم ترقص عشرة بلدي

وللا ايه؟