Thursday, 23 July 2009

قال لك مشائي قلبه قلب خساية

انا والله العظيم تلاتة ما فاهمة لهم حاجة العالم دي، وكل واحد فيهم جارر له وراه مليون بني ادم وماشي في الشارع، وبيزعقوا
كلهم بيزعقوا
حد يفهمني الخبر ده عشان انا ام محمد ومش فاهمة حاجة
موسوي بيقول بمنتهى الـ....منتهى الإيه مش عارفة، بيقول انتوا امام حكومة كل "الإيليت" ح يرفضوا التعاون معاها ومن ثم فعلينا اننا نبص لمصلحة الناس
ناس؟ ناس منين وانت بتقول الايليت؟ وللا هو سلو بلدهم ايليت؟
وبعدين ده ينفع يعني؟ ينفع ان زعيم سياسي يقول الكلام ده كده وش؟ هم مش دايما الزعماء السياسيين بينصبوا على الناس ويقولوا: انا من الشعب والى الشعب، انا م البلد ديييييييييي وانا م البلد دييييييييييي بلد ابوووووويا وجد جدييييي
وكدهون يعني؟ هو ينفع واحد يتكلم باسم النخبة ويبقى زعيم سياسي؟ طب ما تقولش يا عم، طب انتوا يا سيدي بلد كلها ايليت في ايليت وربنا يسعدكوا ويزيدكوا ويبارك لكوا، احنا بقى ناس غلابة، والسياسيين بتوعنا حافظ مش فاهم، ييجي واحد فيهم يقول لنا الكلمتين دول نطلع عليه ناكله بسنانا، ده ح يبوظ علينا السياسيين بتوعنا بالطريقة دي
جه بقى خامنئي اتخانق مع نجاد اكمن نجاد عين نسيبه مشائي نائب
هو ينفع الواحد يعين نسيبه؟ مش ده غلط وكده؟
الاغرب انهم مش زعلانين عشان مشائي نسيبه، هم زعلانين عشان مشائي قال: احنا اصدقاء كل الشعوب ومافيش بينا وبين الشعوب اي ضديات حتى الشعب الاسرائيلي
 على فكرة انا مش شايفة فيه حاجة التصريح ده؟ ده تصريح سياسي لبلد بتقول الموت لاسرائيل وبتضرب وتلاقي، مش شايفة انه تصريح غلط ولا حاجة، هو مش مسئول مصري اللي قال كده، ده مسئول ايراني، فيه فرق
الحاجة التانية اللي مضايقاهم انه عمل احتفال فيه واحد بيقرا قرآن ووراه واحد بيعزف على الطنبور
هههههههههههههه، الله يحظه، طبعا هم اتضايقوا واعتبروها اهانة للاسلام وللقرآن، هو باينه لاسع مشائي ده
ييجي بقى احمدي نجاد يقول ايه: فيه ناس كتير بتسأل انا عينت مشائي ليه، وفيه الاف الاسباب من ضمنها انك لما تكلمه تحس انك بتتكلم مع نفسك وقلبه زي المراية
يا ضنايا، ده انا الدمعة فرت من عيني، وهو عايز يتكلم مع نفسه نجاد ليه؟ ده حتى الستات بتتخانق مع اجوازها: هو انا باكلم نفسي؟ وبعدين ماهو يقدر يكلم نفسه فعلا ولا الحوجة لمشائي، ما ييجي يمشي في وسط البلد عندنا ويكلم نفسه زي الناس اللي باشوفها في وسط البلد كل يوم، هههههههههههههه والله عمالة اضحك من ساعة ما قريت الخبر اللوذعي ده، ويعني ايه قلبه زي البفتة البيضا وقلب خساية، يا عم ما انت ناسبته والحمد لله ربنا يهني بنتك بيه
مال ده ومال انه يبقى نائب؟
الاغرب والاغرب، ان الرئيس له كذا نائب، نائب اول، نائب تاني، نائب تالت، مش عارفة كام واحد، بس هم كتير يعني
تقريبا الشعب كله نائب، بس مشائي ابو قلب زي قلب الخساية هو النائب الاول
المتحدث باسم البرلمان قال: ح يمشي يعني ح يمشي، احنا سلطة اكبر من سلطة رئاسة الجمهورية، والقرار جاي من مجلس العلماء باين ما اعرفش ترجمته ايه
system of ruling clerics
يااااااااااااه، يعني الرئيس لا بيحل ولا بيربط اهو، امال كانوا عاملين الباللو ده كله ليه؟
وبعدين لا الحكومة بتسمع كلام خامينئي ولا المعارضة بتسمع كلامه، وبس مطلعين على نفسهم سمعة ان خامينئي ده الكل في الكل ومخليين الناس تعايرهم بيه ويا بتوع الملالي يا بتوع الملالي وطلع يا عيني الراجل ماحدش بيسمع كلامه خالص وكل واحد ماشي بدماغه
ايه ده؟ مين دول؟ بيزعلوا من حاجات ما تزعلش ويقولوا كلام ما يتقالش ويفرحوا بحاجات تضايق كل ده ويزعقوا، احنا كان ايه اللي حشرنا في الهلولة دي؟
هو ده طبيعي يعني؟ اصل ممكن اكون انا اللي مكبرة الموضوع وللا مثلا مش نايمة كويس

5 comments:

مواطن مصري said...

انا اعاوز افهم هو فية اية ؟

مهندس حر said...

غالبا مانمتيش كويس..

على فكرة ماشائى كان من نواب نجاد فى الفترة الأولانية برضه و قال كلامه عن إسرائيل و هو بالصفة دى و ساعتها البرلمان الإيرانى عمل هيصة..

خامنئى ليه سلطات شبه مطلقة و ده ما يمنعش إن ناس تعارضه بخلاف إن مجلس تشخيص مصلحة النظام اللى بيرأسه رافسانجانى يقدر يعزله.. و ده يخليه مش حاكم مطلق زى ناس كده لو إجتمع تمانين مليون من رعاياه على خلعه برضه مايقدروش..

إنت واجعة دماغك ليه مع الناس دى ليه؟ دول أمورهم ملعبكة قوى.. حليكى فى سلاسة النظام عندنا و وضوحه.. حاجة تفرح و تريح الدماغ.. ده حتى مفيش نائب رئيس .. الموضوع عندنا عبارة عن دكانة يديرها صاحبها و إبنه و بقيت الأرزقية اللى حواليهم هيش على مفيش..

و لو شفتى مثلا إخوانا خبراء وزارة العدل نازلين مناشده فى الرئيس و مراته و إبنهم عشان ينصفوهم .. الناس عارفه مصلحتها فى إيد مين و عارفين إن الباقيين دول مناظر لزوم الديكور و الفشخرة.. كبير طباخين و نواب كبير الطباخين و سفرجى و شماشرجى و كلب حراسة..

سيبك من إيران .. إحنا عقلنا لا يستوعب الحالات اللى ما تعرفيش فيها صاحب الدكانة مين..

مهندس حر said...

شفتى أهو حتى مواطن عايز يفهم ..
إنت سخن يا بنى؟.. يعنى مالقيتلهاش تفسير فى قاموس خفافيش الظلام أو شرح أبو زيد الهلالى فى أصول دولة الملالى أو حتى رسالة بن خرفان فى كشف مساتير الإخوان؟

جبهة التهييس الشعبية said...

اسم الله عليييييك
انا عايزة اعرف مين صاحب الدكانة
كل ما ارسي لي على واحد واقول ده صاحب الدكانة يطلع مش هو

وبعدين منين له سلطة مطلقة ومنين ماحدش بيسمع كلامه ابدا

يقول لدول بطلوا تنزلوا الشارع ينزلوا برضه

يقول لده اعزل الواد اياه يقول له ده قلبه قلب خساية

وبعدين واحد من البرلمان يقول ح يعزله ورجله فوق رقبته

وموسوي يقول مزورة ورجله فوق رقبته

وهو يقول ناجح ورجلكوا فوق رقبتكوا
والعملية زاطت والواحد بقى مش عارف فين رجليهم من رقابيهم

عبقرينو said...

وعاوزة تعرفى ليه ؟؟؟سيبك من ايران زخلينا فى المخروبة مصر لأنى معرفتك بإيران مش هاتزيد الموقف تعقيدا ولاهاتحل المشكلة
لكن فهمنا انا وانتى للموضوع المصرى المعقد هوا اللى هايخلينا نشوف البلد دى رايحة فى ستين داهية ولا لأ
كل الاخبار اللى باسمعها عن مصر زفت ومش عارف المستقبل مخبى لينا ايه والشواهد بتقول مصر داخلة فى كبوة قد تطول او تنقص فى مدتها حسب وعى ونضج الشعب بتاعها وحركته للتغيير
ايران فضلت 30 سنة فى اطار ثورة الخمينى وبعدها اهو بتعيد تشكيل نفسها فى كل المجالات وبقيت من القوى الكبرى فى المنطقة ومصرنا بتعيش 28 سنة فى حكم مبارك ولسه زى ماهيا ولا خطوة للأمام طيب والحل ايه؟؟؟