Thursday 23 July 2009

ليبرمان اتجنن يا عيني خالص

الراجل تخطى مرحلة الاستفزاز وابتدى يصعب عليا، بقى عشان يسكت الناس اللي بتقول له ما تتوسعش في المستوطنات (ماحدش قال له يفك المستوطنات اللي مفروض تتفكك اصلا) ماشي زي عبده مشتاق يوزع الصورة دي
امين الحسيني قاعد مع هتلر، وبيقول الصورة دي ح تحرج الدول الغربية وتخليهم يبطلوا يطلبوا منه ما يبنيش مستوطنات!!!! ايوة يعني الصورة دي محرجة في ايه؟ مش فاهمة، بيبوسه من بقه مثلا؟ قاعدين عريانين في الجاكوزي؟ ايه وجه الاحراج للدول الغربية ان امين الحسيني قاعد مع هتلر؟ طب ماهو كان رئيس المانيا وزعماء العالم كلهم قعدوا معاه بما فيهم ممثلين لبلاد الحلفاء، واتعشوا معاه كمان.
طب فين صورة ايكمان وهو قاعد مع بن جوريون؟ وفين اتفاقية هآرفا اللي بين العصابات الصهيونية وبين هتلر عشان يقتل اكبر عدد من اليهود قوم اليهود يطفشوا على فلسطين؟
والاهم من ده كله، فين الصور دي
ثم ايه الفرق ما بين تشرشل وديجول وما بين هتلر غير بس ان هتلر اتهزم؟ طب ما انجلترا قتلت عشرة مليون هندي، يعني الصهاينة لما اتعاونوا مع انجلترا كانوا بيتآمروا ضد الهنود؟ ثم ايه دخل ده كله ببناء المستوطنات؟
ايه شغل النسوان البلدي ده؟ 
يعني هو عايز يثبت ان اليهود دمهم خفيف ونكتية مثلا؟ ماهو توزيع الصورة دي مالوش معنى غير ان الراجل يا دمه خفيف يا مهبوش يا عمره العقلي تسع سنين وتمن اشهر وفي خامسة اول

4 comments:

mido said...

هم ازاى عينوه وزير خارجية ؟

!!!

Love-Guru said...

و ما الدليل ان هذه الصورة حقيقية و ليست مفبركة ؟ الفوتوشوب ممكن يعمل اي حاجة

Unknown said...

لا الصورة دي مش مفبركة
واتصال امين الحسيني بعدد من زعماء العالم للخلاص من الانتداب البريطاني بما فيهم هتلر ثابت بالتاريخ
هو ما قابلش هتلر بس، هو قابل زعماء عالميين كتير

هتلر دلوقت كابوس ووحش كاسر (وهو الحقيقة كان كابوس ووحش كاسر فعلا - بس زي بوش وزي تشرشل وزي ديجول ما يزيدش عنهم في التوحش سنتي واحد، عيبه الوحيد انه اتهزم وللاسف، من ايام الرومان الثقافة الغربية مافيهاش مفهوم احترام العدو اللي موجود عند العرب والصينيين والهنود والفرس، ماحدش عندهم بيقول على اعدائه "اشراف" و"اسياد" اللي بتتكتب في كتب التاريخ عندنا عن الاعداء زي "اشراف قريش" "سادة قريش" "فرسان الفرس" لأن المفهوم مختلف، احنا عندنا كلما علا قدر عدوك كلما انتصارك عليه كان مشرف اكتر هم عندهم عشان تبرر الهجوم على عدوك لازم تعمله عفريت بديل وقرون مش باقول انهي احسن وانهي اوحش بس باقول اختلاف في الثقافة) كتير من زعماء الدول العربية اللي كانت تحت الانتداب البريطاني والفرنسي كان عندهم امل ان هتلر ينتصر عشان يخلصوا من انجلترا وفرنسا
زي ما احنا تحالفنا مع الاتحاد السوفييتي في فترة
وهتلر كان زيه زي اي رئيس في العالم ما كانش لسة اخد السمعة دي
وانا مش شايفة فيها حاجة مخلة بالشرف ان العرب طرقوا كل الابواب

اللي مخل بالشرف والامانة فعلا هو اتصال الصهاينة بالنازيين عشان يشدوا شوية على اليهود يقوموا يطفشوهم من المانيا

هي دي بقى الوضاعة بعينها

doudou said...

ممكن أعرف و مالهم الستات البلدي اعتذري حرام عليكي تشبهيهم بال بال و لابلاش
الصورة فيها ايه نعم متفبركة أو حقيقية مش فاهمة ايه العلاقة بالمسنوطنات و الله مش فاهمة بجد
يعني لو جبت صورة الخديوي اسماعيل مع الوليه أوجويني جنوب السودان يحتله أمريكا نعم مش فاهمة مش فاهمة