العالم بقاله قد ايه ماشي مع اوباما في البطال؟

اوباما عريس الغفلة، داخلين ع السنوية اهو.. ايه بقى؟ نعم؟ ها؟ ايه الفرق ما بين السنة اللي قضيناها معاه والتمن سنين اللي قضيناها مع بوش؟ حصل ايه؟ خرج من العراق؟ خرج من افغانستان؟ قفل جوانتانمو؟ عمل ايه من الوعود الخلابة بتاعته بعد ما سلبنا اعز ما نملك وسلمنا نفسنا ليه؟ خلع زي اي راجل ندل وقال لنا زي ما مشيتوا معانا ممكن تمشوا مع غيرنا وانا عمري ما اتجوز شعوب مشيت معاها قبل الجواز.. انا مش قلت كده؟ مش قلت اتقلي يابت وما تدلقيش؟ اشربي بقى

---------

من الجزيرة فيه عبارتين اصطدموا في النيل

-----------

من واحد زميلي ساكن في القليوبية قال لي القطر في القليوبية خرج عن القضيب تاني، بس المرة دي ماحدش حصل له حاجة عشان كان ماشي على مهله

هو محمد منصور ح يتساب كده من غير ما يحصل تحقيق في صفقة العربيات الجديدة اللي كل شوية تطلع من القضيب دي؟

---------

الاهم من ده كله، مصر، بعد ما الجزائر طلعت المسدس وراحت مولعة فينا ومتنا مشنوقين،  كل ما تشوف الجزائر على القهوة في بطولة تطلع تجري  وقال عاملة نفسها مقموصة

ههههههههههههه شأمظونا

طبعا خايفين نتضرب تاني بعد طولة اللسان دي، ما انا قلت لكوا احنا بنعرف نشرشح ما بنعرفش نضرب وهم ما بيعرفوش يتكلموا بس بيضربوا، لما انتوا بتخافوا من الضرب ما لايمتوهاش من الاول ليه؟

------

شروط البرادعي: لو كان عندنا بسطرمة كنا عملنا لكوا بيض بالبسطرمة لو كان عندنا بيض

نزاهة ايه ومراقبة ايه ولجنة ايه؟ ايه الكلام القبيح ده؟ وكمان طالب دستور جديد؟ ايه الاحلام السيكوباتية والخيالات المريضة دي؟ طب ما نغير له الشعب بالمرة، ماهو شعب بيخرج في مظاهرات بالالاف عشان خسر ماتش ويعمل عبيط لما العيش يغلا يبقى شعب مش ح ينفع يتحكم الا بالناس اللي موجودة دي

طيب يا دكتور، خليك زي ما انت اوعى تتحرك، ح نروح نغير لك الدستور والقانون والشعب ونهر النيل ونجيلك.. نص ساعة اربعين سنة بالكتير، اشرب الشاي بتاعك