Friday, 25 December 2009

ذنبه ايه الباسبور المصري؟

انا مش متأكدة من المعلومة دي، بس فيه حد على التويتر قال ان في سفارات برة بعض المصريين حرقوا الباسبور المصري بتاعهم احتجاجا على ما يحدث في غزة
ااااااااااااااه ياااااااااااااانا، اااااااااااااه ياااااااااااانااااااااااااا اعمل فيكوا ايييييييه؟ اعمل فيكوا ايييييييييييييييييييييييه؟ هو يا اما تقولوا فلسطين اولها فلس واخرها طين يا اما تحرقوا الباسبور المصري؟ مافيش حد عايز يطلع نفسه غلطان ابدا؟ يا اما فلسطين اللي غلطانة يا اما مصر اللي غلطانة؟ ماحدش عايز يواجه نفسه بحقيقة اننا جيل عرة واننا احنا اللي عرينا مصر مش مصر اللي عرتنا؟ واننا فضحناها ووكسناها وكسفناها ولوثنا تاريخها وعمرها في تاريخها الطويل ما شافت اللي شافته على ايدينا؟ ده الباسبور المصري لو بينطق كان قال لنا حلوا عني حرام عليكوا كسفتوني
قدر من تحمل المسئولية، احنا الغلطانين، ومصر مبلية بينا، مصر دي مش اسرائيل عشان باسبورها يتحرق، الاسرائيليين اللي حرقوا باسبورهم عملوا كده عشان يتبرأوا من الصهيونية ويقولوا احنا اتخدعنا واكتشفنا حقيقة الخديعة ان الدولة دي مش مفروض كانت تتوجد اصلا، ايه وجه المقارنة بقى ما بين كيان مصطنع الناس اللي اخدت جنسيته راجعت نفسها واكتشفت حقيقته وما بين مصر اللي عندها سبعتلاف سنة اظلمهم المرحلة اللي احنا اتولدنا فيها، لا كانت كده قبل ما نتولد ولا ح تبقى كده بعد ما نغور في داهية، هو احنا ايه؟ يا اما بغبغنات نكرر الكلام ورا عمرو اديب يا اما قرود بنقلد اي حاجة نشوفها؟ اعمل فيكوا اييييييه؟ ايه الغباوة دي؟ ايييييييييييه دين ام الغباوة ديييييي؟ ح امووووت حرام عليكوا، ومش ح اموت شهيدة كده ح اموت منقوطة
المعلومة دي على مسئولية غفاري على التويتر، يارب يطلع غلطان، افش غلي فيه هو احسن ما اموت كمدا

16 comments:

Os Ansary said...

اوروبا تهدد بمقاطعة السياحة في مصر والمنتجات المصرية ردا على بناء مصر لجدار فولاذي على الحدود مع غزة

.............


December 23 2009 15:05


قالت الحملة الاوروبية لرفع الحصار عن قطاع غزة الأربعاء إن عددا من النشطاء الأوروبيين يعتزمون إطلاق حملة في عموم القارة الأوروبية لمقاطعة حركة السياحة إلى مصر والمنتجات المصرية. وذكرت الحملة، في بيان صحفي، أن هذا الموقف جاء في أعقاب "إصرار القاهرة على بناء الجدار الفولاذي" بطول الحدود مع قطاع غزة، في الوقت الذي ترفض فيه فتح معبر رفح الذي يعتبر "شريان الحياة" لمليون ونصف المليون إنسان فلسطيني

وأوضحت أن اجتماعا عقد الثلاثاء لعدد من الناشطين المدافعين عن حقوق الإنسان والمتضامنين مع القضية الفلسطينية ينتمون إلى عدة منظمات أوروبية، وبينها " تضامن من أجل فلسطين" و" سلام لأطفال العالم" لبحث أمر الجدار الفولاذي. ونقلت الحملة عن النشطاء تنديدهم بهذا الجدار وتشديد الحصار على قطاع غزة وأنهم اقترحوا بعض الأنشطة والفعاليات لمواجهته من خلال حملة مقاطعة تستهدف البضائع المصرية وحركة السياحة الواردة لمصر بهدف تشكيل عامل ضغط على القيادة المصرية. ولم تعلن مصر رسميا عن إقامة مثل هذا الجدار، لكن وزير الخارجية المصري أحمد أبو الغيط قال في تصريح له تعقيبا على هذه الأنباء "من حق مصر فرض سيطرتها على حدودها، وصيانة أرضها" وايده في ذلك ابو مازن


........

عرب تايمز

طنطـــاوى said...

وحياة ربنا الكلمتين دول أجدع من 100 كوباية لبن .. اصل بالنوسبة لموضوع شرب اللبن انا مش عارف انت منين عرفتى انى مش بشرب اللبن ؟؟؟؟؟ وموضوع ان سيادتك سيبانى أكون عبرة لغيرى فأشكر لك هذا التكريم والشرف ... وربنا انا كنت مش عايز ارد فى اى موضوع حفاظا على صحة سعادتك واعصابك اللى علاء مبارك مخلاش فيها أى امل او عمر

لكن اكتشفت فجأة انك مصرية وبتحبى البلد دى زينا والكلمتين بتوع الباسبور المصرى دول جامدين جدا

وحياة ربنا انا قريت الكلام دة عشر مرات ... كلام عايز يتدرس ويتفهم وكلة وطنية وحب فى البلد اللى اتفضحت بينا .... ؟
برغم حكومة شعـــــــــــــارها الكلام
ورغم رئيســـــــــــــــــنا عليه السلام
برغــــــم إنى عايش في بلدى فريسة
ووجبة شهية لبعض اللئـــــــــــــــــام

برغم ده كله يــــــــــــا مصر بحبك

ABOUAL3RBY said...

بصى يا نوارة

أنا معاكى أن تقطيع الباسبورتات تصرف غلط ويدل على العجز وقلة الحيلة

لكن أنا مش معاكى أن الناس دى قصدت تهين مصر

أعتقد أن الناس دى من كتر المهانة اللى أصبح فيها المصريين أمام العرب والأجانب والكلام السم اللى مكتوب فى كل حتة على المصريين اللى خرج منهم 80 مليون زلمة علشان ماتش كورة وقاعدين دلوقتى يتفرجوا على شعب بيتخنق ويموت بأيديهم وأيدى نظامهم والـ 80مليون نعجة لم يحركوا ساكناً

فالناس دى حبت تقول لألألأ

نحن لسنا قتلة نحن لسنا هذا النظام نحن لسنا هذه النعاج التى حركها علاء مبارك علشان ماتش

نحن مختلفون نحن نبرأ مما حدث ضد الجزاشر ونبرأ مما يحدث لأهلينا فى غزة

ولم يجد قليلى البخت و الحيلة أمامهم ما يرمز لهذا النظام الخائن العفن سوى جوازت سفرهم ليمزقوها

وربما تجدين غداً فى أوروبا مصريون يحرقون العلم المصرى برضه كرمز من رموز الدولة المصرية والنظام المصرى

وساعتها ح يطلع برضه فلحوس ويقول حرقوا الراية اللى رفعت فى أكتوبر بالدم

وح يردوا عليه ويفولوه كداب فى أصل وشك العلم اللى أترفع فى أكتوبر تم تغييره

أبو أمك said...

يمكن معاهم الباسبور القديم اللي شكل بطاقة التموين وحرقوه عشان يطلعوا الباسبور الجديد

جبهة التهييس الشعبية said...

انا قلت ان هم قاصدين يهينوا مصر؟

انا قلت ان دي غباوة

فيه حالة من سوء التصرف

بصوا على مية بيضا برضه

ماحدش يقدر ينكر اننا مكسوفين ومحرجين

وحاسين ان شكلنا عار

واحنا متعودين اننا لما نتكسف نبجح

ما اعرفش مين تاني من الشعوب بيعمل كده بس ده تقليد عندنا

المرة دي الكسفة اوفر بزيادة ومخليانا مش عارفين نتصرف فبنهبل بقى في التصرفات

AhmedEzzat said...

بجد ميحسش بأحساسهم غير اللي عاش برا و تابع مصر من برا ! ساعات كتير والله كنت بحس اني مكسوف لما حد بيعرف اني مصري !
ساعات كنت بحس اني عاوز اقول للناس انا مش موافق علي اللي هما بيعملوه انا مش معاهم !! ياااه احساس وحش جدااا انك تلاقي نفسك بتنتمي لتصرفات ناس و انت مش موافق عليها :(

حد يعرف اطلع منين باسبور جلوبال سيتيزين :D

ggt1230 said...

اوعي يكون عندهم جنسية اجنبية و حرقوا الباسبور القديم هههههه

....

كل ما في الامر انه غضب يشتعل في الصدور ولا يجد منفس الا الاعمال الاعقلانية
...
حكامنا حلفوا يمين
ييموتونا يايخلونا مجانيين
و مش كفاية اننا متوكسين
و على نهب اكل ولادنا منخمدين

...

انا عمري ماحبيت شعر البرغوثي , يمكن خطئي انني باقارنه بدرويش او بنجم

... ولكن

قصيدته اللي في مدونتك ... اقول ايه
فعلا كلام جميل و له معنى ...

...

بخصوص انه المتمسك بمبادئه في زمنا الاغبر بيسموهم هبل ؟؟؟ على العموم بنام الليل مرتاحين و ننظر لعيون الحبيبة ولا نحس بالعار

متابعين كلامك المر الحلو
استمري يانوارتنا

ggt1230 said...

نوارتنا

بما انك بتاخدي اخبار من متابعين
المدونة ... فانا بعثت لك معلومة على الايميل اللي هنا :

nawaranegm@yahoo.com

اذا وصل اقريه و ردي علي اذا الخبر مهم و لونه قديم و مش في الموضوع الحالي

تحياتي

ggt1230 said...

الى الجميع

اقرئوا القصيدة اللي حطاها نوارة على الصفحة الرئيسيةللبرغوثي

اقرئوها ميت مرة

كلام من كلام الجن


اقرئوها بتمعن و استنشقوا مرارة فلسطين و مصر للاخر

و

يلعن ابوكم يلي في بالي


تحياتي

Dr Nemo said...

مش كده خالص يا نواره ... هو كان مجرد اقتراح من غفارى وانا " بتسرع " حقيقة تحمست ليه من باب ان حاجه مستفزه للمشاعر لازم تتعمل عشان تفوق الناس
لكن الناس ردت على بعضها وحصل سجال وانسحبنا علطول من مجرد التفكير فيها وقلنا معلش يبقى على الاقل اى عمل يفوق الناس النايمه جوه مصر ان شكلهم بقى وحش اوى برا ..... الاقتراح ده لم يعش على التويتر اكثر من ربع ساعه وتم سحبه .... وانا بعتذر انى سخنت ورا غفارى حتى لو هو قالها بشكل ساخر .... بس دى القصه والحكايه ..... شكرا فى النهايه لمواطنه شونبونجيه اللى وقفتلى وفوقتنى وقالتلى لا مينفعش متهرجش

Ghafari said...

عم اللذيذ محمولا ع الاعناق اهو: http://www.gettyimages.com/detail/84419362/AFP

دي تظاهرات السنة اللي فاتت قدام سفارة مصر ف بيروت

_____

هو في ايه بقى، ماله التويت بتاعي؟ انا طبعا كنت بقول كده ساخرا من الموقف. انا اي مواطن مصري يحرق جواز سفره معترفش بيه مصري، لأي سبب كان. اللي بيحرق جواز سفر بلاده، بيعبر بوضوح عن انه مستعر من جنسيتها، مش من نظامها السياسي، سواء قصد ذلك او لأ... حتى وان كان نظام بلده ده ضرب العالم بالقنبلة النووية!

لكن الكلام اللي بيقوله دكتر نيمو على تويتر وحملة وبتاع ده، انا مشفتوش امبارح. هو كان رد منه ورد من إسراء ومشفتوش حاجة تاني...

شمس العصارى said...

اعتقد حاليا عند الحديث عن مصر يجب ان نفرق بين
مصر الرسمية : رئيس و حكومة و حزب و مؤسسات كمان
و بين
مصر الشعبية : الشعب و الشعب و بس
ان الانتماء لمصر الرسمية بالاوراق ( بطاقة - جواز - شهادات ميلاد ) لكن الانتماء لمصر الشعبية مش محتاج شئ من الحاجات دى
لان فى كتيييييييييييير مصريين الهوى حتى لو مش حاملى الجنسية المصرية
انا عاوز اقول ان فى حالات القهر و المهانة الانسان بتصعب عليه نفسه قوى و خصوصا لما يحس بعجزه عن فعل شئ
انا لا ارى فى صنيع هؤلاء - حرق الجوازات - شئ مخجل لهم ولا لنا كمان
دى وسيلة منهم لتاكيد رفضهم لمصر الرسمية و انا عن نفسى معاهم و بساندهم فى ده
و بتمنى الحرق
بس للنظام
نلتقى بعد حرق النظام

مواطن مصري said...

الجزيرة بتجمع شعبا و حكوما

faissl said...

الساكت -مصر الشعبية- عن حكومته -مصر الرسمية- يستاهل يتجمع معاها
لأن الشاهد الساكت مشارك في الجريمة في كل القوانين والأعراف
لحد ما يتكلم بقه، مصر ح تفضل تنهان شعبا ونظاما لحد ما الشعب يقول لأ، إحنا ما قلناش كده ولا عملناش كده واحنا ما يشرفناش كده والمصري مش كده
إنما طول مهو ساكت، يستاهل كل اللي يجرى له
مصر الشعبية خاينة وعميلة ومصرائيل زي الرسمية إذا فضلت ساكتة عليها وده كلام واحد مصري، لا جزيرة ولا جزائري ولا سوري ولا إيراني ولا بيقبض من كل دول ولا حتى بيقبض من مصر...

طنطـــاوى said...

انى اكون بيس وجميل وحاجة حلوة خالص واسمع كلام ام المدونات وأشرب اللبن بالليل وبالنهار دى حاجة وان حد يضربنى على قفايا ويكلمنى بسياسةانى لو حليت الواجب بابا حيجيبلك عجلة مفيش عندى غير مقولة خالدة الذكر نوارتنا ( ياخد اللي فيه النصيب هو والست والدته واللي خلفت والدته،و ح اشأمظ امه واطلع عليه كل قرفي)

يعنىOs Ansary

بيقول اوربا بتهدد ؟؟؟؟ يا نهار تهييس ؟؟ اوروبا حتموتنا وتقاطعنا وتعمل علينا عدوان ثلاثى محبة فى رسول الله وفى شعب غزة ؟؟؟ ومن المعروف ان كل شعوب اوروبا اسياد الديمقراطية بيموتوا فى غزة وبيكرهوا اسرائيل موووووووووت وبيكرهوا اى حد يساعد اسرائيل والحكومات والشعوب الاروبية حتدبح دين ام اى حكومة او شعب يساعد اسرائيل ضد غزة ويحيا القومية العربية الاوروبية المشتركة ؟؟؟ واضح ان 2010 حيكون العام العالمى للشأمظة ............

شمس العصارى said...

الاخ مواطن مصرى / الجزيرة مش حتبقى مقياسنا علشان نقول بتجمع او لا
الجزيرة قناة سواء تابعة لدولة او لامريكا او حرة على ضرة دى مشكلتها
لكن احنا مقايسنا من عندنا و من الواقع
ــــــــــــــــــــــــ
الاخ فيصل / اعتقد انه معك بعض الحق
اكيد فى كتييييير من مصر الشعبية ساكت و يمكن متؤاطئ كمان
لكن ما باليد حيلة
بس فى كتيييييييييييييير من مصر الشعبية شرفاء و العينة الى بتثبت كده العينة الموجودة فى المعتقلات حاليا بالاضافة لدعاة الاصلاح الحقيقيين
و اكيد كل واحد شريف بيعرف دعاة الاصلاح الحقيقين بقول كده علشان ميختلطش علينا الامر و نسمع لاى حد بيتكلم لاننا لازم نعرف وار الكلام ايه