Wednesday, 30 December 2009

خبر عاجل من على التويتر

من مالك مصطفى عشان هو في هشام مبارك وهم اللي متابعين قضية الدويقة
النائب العام احال محافظ القاهرة ورئيس حي منشية ناصر الى التحقيق بسبب احداث الدويقة 
يييسسسسسسسسسسسسسسسسسسسسسسسسسسسسسسسسسسسسسسسسسسسس
طب وبغدادي؟ مش ح يحول بغدادي للتحقيق، حيدر بغدادي النائب عنهم في مجلس الشعب، لما الصخرة اتهدت على راسهم راحوا له مشاهم ولا سأل في قرعتهم وبس بيطلعوه في الجزيرة يقول اسرائيل ما بتخافش غير من مبارك ولولا خافت من مبارك ما كانتش وقفت حرب غزة قامت خديجة بن قنة قالت له طب ليه ما خوفش اسرائيل من اول يوم قام قال لها: لا ماهو لازم يتم ردع حماس برضه
ههههههههههههههه
مش ح يتحول للتحقيق ده؟ ده طرد سكان الدويقة لما راحوا له، هو لازمته ايه؟
الخبر التاني من نورا يونس على التويتر برضه ان فيه مظاهرات كبيرة في جامعة الازهر احتجاجا على الجدار
بس انا مبسوطة بخبر الدويقة ده، يارب ياخدوا حق الغلابة اللي ماتوا ويدوا اللي عايشين شقق ويعيشوا زي البني ادمين
----
آه ونسيت، مصر تتهم حسن نصر الله بالعمالة للنظام الايراني 
انا سألت سؤال قبل كده وماحدش رد عليا: المسرحية الهزلية المكونة من سبعمية سبعة وتمانين فصل دي ح تنتهي امتى؟ انا مش ح اقول اللي اختشوا ماتوا لان الله يرحمهم قبل ما يموتوا ما عدوش في الشارع اللي احنا ساكنين فيه اساسا ولا حتى سلموا على جار طليق بنت عمة جدتنا فاحنا ما نعرفهمش وبالتالي مش زعلانين عليهم ولا بنحيي ذكراهم السنوية، ودي اول مرة نسمع عنهم والله، ومش عارفين البني ادم لما بيختشي بيحصل له ايه؟ 
يعني نظام بيبني جدار لحصار اهل غزة بالتعاون مع اسرائيل وامريكا وفرنسا عدوان رباعي على اطفال وحريم لما وصل الامر ان اسرائيليين جم يتضامنوا يعني صعبوا ع الكافر والراجل ما كانش يقدر يعدي مناسبة عاشوراء من غير ما يتكلم عن اهل غزة يعني ضميره ما يسمحلوش، ماهو فضل ساكت وبيتقي شر لسان النظام المصري ولهم عين يقولوا له يا عميل ايران؟ أأأ....إإإ مين اللي جاب القلعة جنب البحر؟ مين اللي جاب القلعة جنب البحر؟

5 comments:

fifi said...

حبيت فقط اكتبلك اني من
قراء مدونتك و احبك في الله و يا ربي يكثر من امثالك من اصوات الحق في زمن الكل اصبح مثل النعامة راسه في الرمل

بهيج الشرير said...

والنبي ياأبلتي أنا عندي إقتراح بخصوص موضوع الدويقة وسور غزة، طالما شخاخ المصريين بيهد الجبال، إيه رأيك نبدأ حملة ضد السور ونسميها حملة الطرطرة عالحدود أو قلوط عالجدار، وكل واحد يساهم بمجهوده بعد أكلة فسيخ وإزازتين بيرة

Os Ansary said...

مابعرف اذا هالموضوع الو صلة يانورارة

بس حبيت انقله الك حتى تشوفين التميز

والخوف والهستريا وصلت لاي حد ..


مصر ترفض استقبال المصريين المقيمين فى العراق من دخول مصر بسبب تشيع اغلبهم .. وعددهم اكثر من 130 الف مقيم

http://www.islamtimes.org/vdcj8mev.uqea8zf3fu.html

عبد الزهراء المصري (علي الحسيني) said...

أولاً بالنسبة لموضوضوع الدويقة فأتمنى من الناس تفوق بقى وتطالب بإعدام أو على الاقل حبس جميع المسئولين وعلى رأسهم رئيس الوزراء ورئيس الجمهورية "أنا عارف إن أحلامي وردية " لأنهم رأس السلطة التنفيذية المسئولة عن كل كبيرة وصغيرة في البلد .

ثانياً بالنسبة لنصرالله فهو فعلاً عميل لإيران وحسحس عميل لأمريكا وأسرائيل وكلهم ولاد تيت جزم لأن كل واحد فيهم بيدور على مصالحه الشخصية دون النصر لمصالح الشعوب المسكينة .

Dr. Eyad Harfoush said...

لابد أن تنزعج الأنظمة الهشة والشيوخ الذين ملأتهم الشروخ من كاريزما حقيقية بحجم نصر الله، ولابد للأنظمة المعتدلة "صديقة الطلبة" من اتهام الغير بما فيها حتى تلهيه، فإيران وسوريا وحزب الله هي الأنظمة العميلة وليست أنظمة مصر والأردن والسعودية، المسرحية مضى منها ألف فصل وبقي ألف يا عزيزتي
تحية للتدوينة وكاتبتها