Sunday, 6 December 2009

وادي رقصة المجنونة يابا يابا ع اللمونة

آخر خبر كان امبارح لما عرفت ان مصر انسحبت من تنظيم كاس الامم لكرة اليد وقالت يا انا يا هي
قامت الجزائر قالت لها: ولا يهمني، اني معايا الواد.. اني ام الواد
قامت مصر قفشت الاتحاد الافريقي وقالت له: في الزريبة يا ناقص؟
قام الاتحاد الافريقي قال لها: النسوان على قفا من يشيل
قامت مصر قعدت تعيط وتقول له: انت لسة بتعزني زي الاول يا عمدة؟.. قام قال لها: واكتر من الاول، كل ما بتكبري بتتصبي وتحلوي
قامت قالت له: الليلة يا عمدة.. قام قالها: هي حباكات؟ قامت رايحة للجزائر وقالت لها: نامي لوحدك يا دلعدي
خلااااص، خلاصص، هوووو.. ماما زمانها جاية، جاية بعد شوية

 

.... بلدي اتهبلت يا رجاااااالة
معلش.. ح نعمل ايه؟ امكوا اتجننت يا ولاد، ح نرميها يعني؟ نقل اصلنا معاها؟ اتجننت ولبست بنطلون بيجامة وشبشب حمام مقطوع وفوقيه بالطو جدها المقطع اللي عليه نياشين مصدية وبرنيطة امها جلفدان هانم اللي فيها ورد وماشية تقول: انا بكيزة هانم الدرمللي بنت الدرمللي باشا شيرين وعمالة توري الناس صورة جدها وهو بياخد النيشان من جلالة الملك وتقول لهم ده جدي انا خريجة مدرسة بارل فو فرانسيه ديمي سيزون الا جارسون بيتي بان ساكلامان جاتو سواريه آليه آليه إيلنيابا دارجان باسيه كومبوزيه انشانتيه..مساء الخير.. مساء الخير.. وهو كذلك

ربنا يشفي كل مريض... ما تقعدوش تغيظوها بقى وتخلوها تحدفكوا بالطوب.. احسن تقتل لكوا هنومة
خلاص، الوقت اللي ينفع كانت تتحاسب فيه على افعالها عدى من تلاتين سنة، وانتوا طلعتوا ولاد اصول وما اذيتوهاش... ولو ان فترة المقاطعة اللي بعد كامب ديفيد دي لو كانت كل الدول العربية اتفقت علينا كانوا عرفوا يئذونا ويرجعوا العمالة المصرية ويلعبوا في حصتنا في مية النيل ويدخلوا لنا من الحدود اللي اسرائيل بتدخلهولنا دلوقت واحنا عاملين معاها سلام، لكن ما قلوش اصلهم وهي بعقلها، ح يقلوا اصلهم لما اتجننت؟ مش معقول يعني

طب مصر ح تنظم كاس الامم الافريقية لكرة اليد، طب لما المشجعين الجزائريين يحبوا ييجوا ح يعملوا ايه؟ انا اقول لهم
يسألوا على عنوان فردوس عبد الحميد، ويروحوا يقفوا تحت البيت بتاعها، بتاع تلاتين واحد كده واول ما يشوفوها نازلة يروحوا كلهم قالعين البنطلونات في نفس واحد، ويستحسن لو يربطوا البنطلونات في حبل واول ما يشوفوها يروح واحد شادد الحبل ويجيبوا نسوان تزغرد
جنان بجنان بقى، الفريق الجزائري لكرة اليد يجي كله ناكش شعره ولابس بنطلون رجل ورجل وفردة جزمة كوتشي وفردة شبشب حريمي بكعب، ويضربوا بلانصات في الهوا

26 comments:

mido said...

يا حلاوة عالكرومبة

:D

طنطـــاوى said...
This comment has been removed by the author.
جبهة التهييس الشعبية said...

طنطاوي
انت مش قلت انك دخلت غلط؟
ما تمشيش في الغلط عشان نهايته بطالة

ggt1230 said...

يا مجججججرمة

حرام عليكي

و االه العظيم انتي و ابراهيم عيسى حتروحوا ابو زعبل

ماهو راح يبنوه مرة تانية علشانكم

خفوا شوية الحكومة مش قدكم

انتم من حزنتمزني على الحكومات العربية , ماتتوصيش شوية على محمود اولقاس اللي قارفنا

.....

مفروض يستنسخوكم نسخ فلسطينية و لبنانية ...الخ
....
على فكرة مرة لما حكيتلك ان حزب الله اصولي قعدت تتريقي و ان الاصولية على الاصل دور

ابقي سلميلي على صاحبنا تبع السنة و المهلبية

هوه فينه عندي له ناس يهديهم


مع التحية

طنطـــاوى said...

هو الرد هنا باثر رجعى ؟؟؟ شايل منى لية يا جميل ؟؟ وربنا فى بلدنا دى مفيش حاجة صح غير الغلط

المهم انا مسحت التعليق عشان ممشيش فى الغلط

بس على فكرة اللى يمشى فى الغلط نهايتة يبقى وزير واسالى عمنا الكبير

ggt1230 said...

لأ و زعلانة انهم فاتحينلك ملف عند الجماعة الزعلانين...
في مش اوروبا ولا الدول المتحضرة يامحترمة ..يعني عندنا من الخليج المفلس ال المحيط المهلس يفتحو دماغك ...وليس مجرد ملف .. على واحد من سيليريون مما تقوليه على حكومتكم الرشيدة

مع الاعتذار لفلم ارهاب و كباب
.....

بس مشان خاطر الناس الطيبين تسيبك من الفنانة فردوس عبدالحميد
هي فعلا انسانة قومية و متزنة
و متستاهلش تريقاتك عليها

....

على فكرة حيث ان الترشيح ...

قصدي الانتخابات مفتوح

ماترشحي نفسك


...


مع التحية

DomDam said...

انا خريجة مدرسة بارل فو فرانسيه ديمي سيزون الا جارسون بيتي بان ساكلامان جاتو سواريه آليه آليه إيلنيابا دارجان باسيه كومبوزيه انشانتيه..مساء الخير.. مساء الخير.. وهو كذلك

يا شيخة حرام عليكي كان حيجيلي أزمة قلبية، قاعد في المكتب و عايز أنفجر في الضحك و عمال أكتم في بقي و أعض على سناني و إلا فضيحتي حتبقى بجلاجل

بالراحة شوية

Amr said...

اللى حصل ده لأن بعد أنسحاب مصر مفيش غير الجزائر اللى أتقدمت لتنظيم البطوله والأتحاد الأفريقى قال لو محدش أتقدم غير الجزائر مصر اللى هاتنظمها يا أما هانشنيرها
قوم أييييييييه
مصر قالت لا والنبى ياعبده

مايهمش said...

ممممممممممممممم

مش عارف ...بس حاسس انك بقيتى مزوداها قوى يانوارة وبقيتى جزائرية أكتر من الجزائريين

اهدى شوية عشان زى ما هو مايصحش نهاجم بعشوائية برضه مايصحش ندافع بعشوائية

خللى طريقة لعبك متزنة

جبهة التهييس الشعبية said...

ابوس ايديكوا استروا عليا

انا اتكشفت وعرفوا اني جزائرية مزروعة في مصر ولقوا الحبر السري والراديو اللي كان بيطلع مع جمعة الشوان ورأفت الهجان ولازم المخابرات هي اللي تدهوله ما ينفعش هو يشتري واحد وهو مروح من شارع عبد العزيز

بذمة النبي يا شيخ انت مش محرج؟ مش محرج من تصرفات الساسة المزئوئين ومش محرج من كلامك؟

فيه بلد في الدنيا تمشي تدور على بلد وتشوفها قاعدة فين وتقول لها طب والله ما انا قاعدة معاكي

لا والتانيين ما كلموناش

فلما تقول لها احسن تقوم تقول لها: احسن؟ طب ح اقعد بقى هه

انت مش محرج؟

فيه حد بيعمل كده؟ فييييييييه حد بيعمل كده؟ ماهو يا اما خايفين منهم يا اما مكسوفين يتكشفوا عليهم

انا مستغربة ان الاتحاد الافريقي والفيفا ما عاقبوناش على الهبل ده

المفروض البلدين يتمنعوا يلعبوا رياضة لمدة عشر سنين

يمكن يفلحوا

mido said...

لا

رئيس الاتحاد الدولى لكرة اليد

مصرى


حسن مصطفى

عشان كده مش حنتعاقب

احنا المأجورين said...

البلد يا جماعة كلها بقت تهييس ربنا يسترها علينا ويخر بيت الاخ حموكشة وابنه عوكل الصغير

حسن على said...

البوست "دوبل فاس" "ينفع طبلة وينفع طار"لة اسقاطة العام واضح واسقاطة الشخصى ايضا على العجوز اللى "دايرة على حل شعرها"- وحل الشعر هنا لايقصد بة المعنى البرىء -بجد دماغ هايلة

مايهمش said...

فيفا مين يا ست الناس؟

موضوعك عن بطولة كرة يد...ايه دخل الفيفا بالموضوع؟

طبعا أنا مكسوف من تصرف المسئولين بس مش مكسوف من كلامى

عارفة ايه اللى كاسفنى فى موقف المسئولين؟
انهم ماقدروش ياخدوا موقف( حتى لو غلط) ويدافعوا عنه للنهاية ويتحملوا عواقبه

قعدوا يهاجموا ويشتموا ويهللوا فى كل حتة وحانقاطع فنى ورياضى وثقافى و حانبطل نشم الهوا اللى بييجى من ناحية الجزاير...قلنا ماشى.. موقف نتفق أو نختلف معاه

طلع علاء باشا ورزع كام تصريح..قلنا بس..دى مصر ناوية على نية

كل ده وبتوع الجزاير مانطقوش ولا عبرونا

وفجأة...تن تان تاااااااااا

قال لك الريس بعت برقية تهنئة بالعيد لبوتفليقة (وبوتفليقة ماردش على فكرة)
لقينا البالونة فست.. ورجعت الجزاير بلد الشهداء وعلاقتنا بيهم أزلية ورجع مصطفى عبده يقول بدون خجل كل الاحترام للجزاير ورجع بندق بلا كسوف يقول احنا والجزاير واحد ورجع شوبير الحرباية أبو دبلون يقوللك طول عمرى باقول بلد الشهداء

قوم ايه؟ راح طالع رئيس وزراء الجزاير لما لقانا كسكسنا راح طالع رازعنا على قفانا بالتصريح التالى

http://dostor.org/ar/index.php?option=com_content&task=view&id=39759&Itemid=30

التصريح ده يوجع قوى يانوارة..بصرف النظر عن محتواه صح ولا غلط بس بجد يوجع

تصريح يحسسك قد ايه ان المسئولين الجزائريين بيحترموا نفسهم وبلدهم وشعبهم

وقد ايه بلدك مافيهاش راجل


تيجى انت وتكملى علينا؟

حرام بقى الضرب فى الميت

جبهة التهييس الشعبية said...

انا اسفة انا اسفة انا اسفة

نسيت انه كرة يد
خصوصا ان الفيفا مسيطرة علينا دلوقت اكتر من الامم المتحدة والبنك الدولي


انما الضرب في الميت حرام؟

هو ميت؟

الميت يندفن ما يقعدش يقرفنا بجتته المعفنة

اذا كان صاحي يبقى يصحى بقى

مش عايز يفوق لا بنشادر ولا علاج

اللي مغمى عليه بيصحى من التلطيش

اذا ما صحيش يبقى اكرام الميت دفنه

حسن على said...

المجنونة"ابنهاالمجنون ايضا لة "بورنو سيت" اصر على ان تعمل فية امة وشقيقتة(انعم واكرم)وعندما حاولت التدخل لم اجد أجد ألا كذبا فاحشا وأنكارا تاما واتهامات وسباب بالجملة من الابن والشقيقة خريحة احدى الجامعات الاجنبية (هيومن رسورسس)وكانت تعمل فى احدى دور النشر بمرتب جيد(خمسة الاف)والام ايضا لاينقصها المال ولكن الطمع فى الملايين كما زين لهم فاوست الابن وحب الهلس جعل فاتن حمامة-فى ادوارها تتحول الى ميمى شكيب فى ادوارها او فى الحقيقة

مايهمش said...

أيوه ياستى ميت

موقفنا الرسمى وتراجعنا المخزى دول علامات موت

لو عندك حد ميت اكرميه بدفنه من سكات

لكن انتى عمالة تقطعى من جتته نسايل نسايل وتفرقيها ع النت

حسن على said...

نسيت اقول ان الام دخلها الشهرى من العمل الشريف يتجاوز العشرين الف!!!!!!!!!!

مايهمش said...

أستاذ حسن على..عروستى !!!!!

حسن على said...

مايهمش :عروسة حلاة نخبها النمل من الداخل ولوثها,والصغيرة كانت تعمل فى "الديوان". حكمة اليوم: لاتقدر تخلى "الشرمون" حرة,.... ولا تقدر تخلى الحرة "شارمون" وبس

karima said...

سلام الله عليكم استاذة نوارة ..لك هذه القصة علها تكون عبرة لمن يعتبر ..في حقبة الارهاب وفي عام 2000 بالضبط كنت متواجدة عندى خالتى في منطقة عانت كثيرا من ويلات الارهاب ..كانت جارة لخالتى زوجها يشتغل في البلدية وكانوا الارهاب متربصين به وفعلا في ليلة التى صادفت وجودي هناك جاءته هذه الجماعة لعنها الله ..واخذوه من بيته بل من فراشه ..وذبحوه على مقربة من بيت خالتى ..في الصباح اكتشفت الجثة ..مع العلم ان الارهابي الذي ذبحه كان يسكن بنفس المنطقة ..ونعرف أهله حق المعرفة ..هل تدرين ماذا فعل اهالى تلك المنطقة انقسموا نصفين نصف يعزي عائلة الميت ونصف يعزي عائلة الارهابي ..فمصيبتهم نفسها ..وانا انضممت الى الذين يعزون عائلة الارهابي فوجدت اخو الارهابي وهو يبكي من بكاء امه وخايف ان ينتقموا منه هو وعائلته لكن سرعان ما تحول ذلك البكاء الى راحة عندما راي الجموع تخفف من مصيبة الام في ولدها الارهابي ..والان ذلك الشاب اكمل تعليمه واصبح مهندس والكل يحترمونه لاخلاقه الرائعة ..ولم يصبح ارهابي مثل اخوه الذي مات على يد العسكر ...وهذا كله بفضل التعامل مع الموقف بحيادية وعدم خلط الامور

مايهمش said...

يانوارة

لوفاهمة حاجة من تعليقا الأخ حسن ياريت تفهمينا

haneen said...

ههههههههه... وحياة ربنا انتى هتموتينى مره بالسكته القلبية من كتر الضحك ... انتى مالكيش حل والنعمه . بصى انتى سيبك من النكته والهريه والهم دا كله واكتبى افلام كوميدى احسن والله هتعيشى صح وتزهزه معاكى

دانتيلا said...

يخرب عقلك يا نوارة. ضحكتينى ضحك رهيب. الله ينور عليكى

dodo555555.jeeran.com

حسن على said...

أشكر الاستاذة نوارة على استضافتها لى فى موضوعات تؤرقنى وان كانت مقطوعة الصلة بالبوست الاصلى,ومجرد البوح -ولو رمزيا -ارتاح كثيرا لأنى تركت النص مع من لا يرحم (هههههههههه)فأن كنت عكيت, فسأخرج بعين متورمة وانف نازف ولو ما عكيتش يبقى عرفت ذلك على الاقل

حسن على said...

دى بشاير وزير التعليم الجديد : حاجة زكى بدر