انا جالي تخلف

اتفرجت على حلقة العاشرة مساء اللي استضافت عماد اديب.. بس بس بس.. اسكت يا لساني اسكت يا لساني، انا قفلت التويتر عشان كنت ح اقول كلام يعاقب عليه العرف والقانون وكل الشرائع السماوية والوضعية وحقوق الانسان وجمعية الرفق بالحيوان

حتى لما عبد الله الاشعل اتصل يبل ريقنا (الحقيقة غسل عماد اديب) قامت منى قاطعت عبد الله الاشعل وقفلت عليه و..و...و... ليه؟ ليه؟ ليه وسنة جديدة داخلة علينا يعملوا فينا كده؟ مين اللي له مصلحة في انه يقامر بمرارة وكبد وقلب وفشة و... اعضاء اخرى للشعب؟ مين؟

انا متأكدة ان الخط البياني للزيادة السكانية ح يتخسف بيه الارض بعد الحلقة دي... تستاهلوا، عمالين يقولوا لكوا بطلوا خلفة، اوعي يا شابة تنسي الحبة، ركبوا لولب

اهم ركبوا لكوا عماد اديب وروني ح تخلفوا رجل كرسي ازاي بعد كده، وللا خفة دمه خفة دمه نقطاني يا ناس خفة دمه، ونقطة ومن اول السطر، نقطة ومن اول السطر، كل قنبلة من قنابله يقولها ثم يشفعها بجملته المأثورة: نقطة ومن اول السطر واحد مسلطينه على الشعب عشان ينقطه من اول سطر في السنة

مش ممكن، مش معقول، انا مش مصدقة اللي شفته بمناخيري وسمعته بصوابع رجليا، انا جالي البواسير في مخي، وماحدش يسالني قال ايه؟ ما تتصورش، ما تتخليش، ما تصدقش

وشعب التويتر كله من شرقه الى غربه ومن يساره الى يمينه بقوا ولا ضحايا هيروشيما ونجازاكي انا سبتهم في اخر ربع ساعة وما بصيتش عليهم تاني ومش عارفة عدد القتلى والجرحى والمشوهين واللي نكشوا شعرهم ونزلوا يجروا عريانين في الشارع الساعة اتنين بالليل وصل لقد ايه دلوقت، بس دي جريمة حرب

وانا ناوية اشتكيه انا والتلاتة اللي فضلوا عايشين وبكامل قواهم العقلية وقادرين على الكلام من شعب التويتر ونقدمه لمحكمة دولية

ده في حالة اذا قمت بكرة الصبح