Thursday 31 December 2009

انا جالي تخلف

اتفرجت على حلقة العاشرة مساء اللي استضافت عماد اديب.. بس بس بس.. اسكت يا لساني اسكت يا لساني، انا قفلت التويتر عشان كنت ح اقول كلام يعاقب عليه العرف والقانون وكل الشرائع السماوية والوضعية وحقوق الانسان وجمعية الرفق بالحيوان

حتى لما عبد الله الاشعل اتصل يبل ريقنا (الحقيقة غسل عماد اديب) قامت منى قاطعت عبد الله الاشعل وقفلت عليه و..و...و... ليه؟ ليه؟ ليه وسنة جديدة داخلة علينا يعملوا فينا كده؟ مين اللي له مصلحة في انه يقامر بمرارة وكبد وقلب وفشة و... اعضاء اخرى للشعب؟ مين؟
انا متأكدة ان الخط البياني للزيادة السكانية ح يتخسف بيه الارض بعد الحلقة دي... تستاهلوا، عمالين يقولوا لكوا بطلوا خلفة، اوعي يا شابة تنسي الحبة، ركبوا لولب
اهم ركبوا لكوا عماد اديب وروني ح تخلفوا رجل كرسي ازاي بعد كده، وللا خفة دمه خفة دمه نقطاني يا ناس خفة دمه، ونقطة ومن اول السطر، نقطة ومن اول السطر، كل قنبلة من قنابله يقولها ثم يشفعها بجملته المأثورة: نقطة ومن اول السطر واحد مسلطينه على الشعب عشان ينقطه من اول سطر في السنة

مش ممكن، مش معقول، انا مش مصدقة اللي شفته بمناخيري وسمعته بصوابع رجليا، انا جالي البواسير في مخي، وماحدش يسالني قال ايه؟ ما تتصورش، ما تتخليش، ما تصدقش
وشعب التويتر كله من شرقه الى غربه ومن يساره الى يمينه بقوا ولا ضحايا هيروشيما ونجازاكي انا سبتهم في اخر ربع ساعة وما بصيتش عليهم تاني ومش عارفة عدد القتلى والجرحى والمشوهين واللي نكشوا شعرهم ونزلوا يجروا عريانين في الشارع الساعة اتنين بالليل وصل لقد ايه دلوقت، بس دي جريمة حرب


وانا ناوية اشتكيه انا والتلاتة اللي فضلوا عايشين وبكامل قواهم العقلية وقادرين على الكلام من شعب التويتر ونقدمه لمحكمة دولية


ده في حالة اذا قمت بكرة الصبح


16 comments:

mony said...

حسبنا الله و نعم الوكيل
أنا مش عارفة أنام يا ناس وعندي شغل بكرة يمكن ده قصدهم أنا بقالي ساعتين بكلم نفسي

mony said...

بصي أنا مش قصدي أخلص عليكي والله بس أعمل إيه أقول لمين وحقك علي http://www.shorouknews.com/ContentData.aspx?id=21740

مواطن مصري said...

يا نوارة الف سلامة عليكي بس شكلك مركزتيش في كلامة كويس

Leonardo said...

الحقيقة أنا ماعجبتنيش مداخلة الأشعل قد ماعجبتنى مداخلة محمد - مش فاكر باقى الاسم- اللى اتكلم فى الآخر ..
الأشعل بدأ المكالمة منفعل وبتهمة لأديب وإن كانت مفهومة لكن من السهل جدا الرد عليها وده إدى فرصة لعماد إنه يرد عليه ويلف حوالين كلامه
تخيلى لو كان دخل فى موضوع إن اتفاقية المعابر ملغية من 2006 دى الأول وركز عليها وعلى باقى الكلام الفارغ بتاع الأمن القومى ومصر أولا ده ؟
لكن بانفعاله خلى منى الشاذلى والناس تركز بس على الاتهام الأولانى ..
لكن المتصل الأخير اتكلم بمنتهى الهدوء وواجه عماد بحكاية إنه بيهاجم كل اللى قاعدين بقى لهم عشرميت سنه وناسى البيج بوص ؟
وكمان نقطته الأولانيه اللى كان نفسى يتكلم فيها بصراحة أكتر وإن كنت عاذره لأنه كان خايف يتقطع الخط عليه بكل تأكيد إن عماد بيتكلم عن النظام فى حين إن الليلة كلها بتاع مبارك وكلنا عارفين كده
وحتى فى النقطة الأخيرة اللى اتكلم عنها بس للأسف ماعرفش برضه يستفيض فيها عشان مقاطعة منى وعماد ليه بإن حالتنا الاقتصادية أسوأ من الأول وإن أسلوب الأرقام الإجماليه ده خادع جدا جدا وبتستخدمه الحكومة فى النصب مش أكتر ..

بس سيبك إنتى أنا فضلت صابر وباتفرج عادى ومافيش مشكلة لحد الصدمة والمفاجأة اللى هتحصل كمان 15 يوم واللى منى قالتله نخليها لبعض الفاصل وهو بقى قال لها بس لازم لها موسيقى مخصوص
تا تات تاتاتتتااااااااا

ساعتها حمدت ربنا إنى لحقت نفسى وخلفت بدرى !

Unknown said...

نوارة بصراحة إت تستهلى كل اللى يجرالك

أولاً سلامة قلبك وسلامة كبدك وسلامة فشتك

يا بنتى إنت ما بتتعلميش فيه حد عاقل تخطى الخامسة والثلاثين من عمره وداخل مرحلة الكهولة المبكرة وخايف على صحته يتفرج علي العالم الوسخة دى على الهواء مباشرة كده إلا إذا كان متهور وخلل

يا بنتى دول عالم بيض بيض بيض فلازم الواحد اللى فى سننا يتحسب ويتحصن لهم قبل ما يشوفهم

والحمد لله فيه دلوقتى حاجة أسمها اليو تيوب الواحد يقدر ينزل من عليه أى حاجة بعد إذاعتها بساعات قليلة وبعد ماالناس اللى صحتها حلوة ومش ناويين يخلفوا خلاص ما يخدوا الصدمة الأولى ويطمنوناعلى الحالة

وبالمناسبة زمااااااااااااااااااااااااااان قوى وسى عماد بيقدم برنامجه الشهير فى أوربت وكانت مسألة أستقبال مكالمات من المشاهدين على الهوا لسه جديدة وكان الموضوع هو حكمة مبارك وعقلانية مبارك وديمقراطية مبارك وعيد مبارك

فإذا بمشاهد رذل يدخل وعلى الهوا مباشرة ويسأل سؤال برئ لماا لا يعين مبارك نائباًوماذا لومات مبارك فجأة

وعليها يا بنتى والجو أتكهرب وعماد أديب طلب فاصل ورجع عشان يشتم المشاهد ويؤنبه ويوبخه وبعد الحلقة ما كانت بيض أضبحت بيضان الضيوف والمشاهدين والمصورين وبياعين الترمس الكل داخل يشجب ويستنكر هذا السؤال الفاجر الماجن من هذا المشاهد المختل عقلياً و اتقلبت الحلقة إلى حلقة زار وعماد أديب هو الكوديا الكبيرة وربما كانت الحلقة ده هيه عربون المحبة اللى ربط عيلة مبارك بعيلة اديب

فرحمة بنفسك وأتفرجى على العته ده بعد كده مقطع على اليوتيوب أرحم

Unknown said...

أنا سبت الحلقه وقمت أنام
انا طول عمرى ضغط دمى منخفض تحت ال 50
أمبارح دماغى كانت هاتنفجر من عماد ومش هاعلق على اى كلمه قالها - بس اذا كان عليه هو معروف انه من أصدق أصدقاء القيادات السياسيه ولقاها فرصه أنه يرد جميل عدم غلق الأستديوهات بتاعة أوربت فى مدينة الأنتاج اللى تدخل فيها الرئيس شخصيا"

ولكن اللى حزنى هو منى
للأسف انا من عشاق منى الشاذلى ومن أشد متابعيها
بس ليه كده ؟
ليه يامنى ؟
أولا" انتى عارفه حكايته القريبه مع الرئاسه وقنوات أوربيت
تجيبيه ليه فى التوقيت ده بالذات وانتى عارفه أنه هايسبح ويحمد ويشكر

وبعدين ليه كنى قاعد قدامه زى التلميذه اللى قاعده قدام استاذها اللى رباها وعلمها
دى لما استضافت أحمد بهجت رئيس مجموعة دريم
ونجيب سوايرس راعى البرنامج الأول كانت حياديه جدا"
أنا حسيت انها كانت بتفخمه وتعظمه أوى

سبهللة said...

انا عايزة اشوف الحلقة دى
حد نزلها ؟؟
اشمعنى انتوا تتنقطوا لوحدكم
لازمن ولابد انى اشاركم فى النقطة دى بالذات
نقطة ومن اول السطر

Unknown said...

والله انا حذرت كل الشباب على التويتر وقلت لهم الشباب اللي لسة ما اتجوزوش وحاطين الجواز في خطتهم السبعينية القادمة يقفلوا التلفزيون فورا

بس محمود صابر قال لي: جاية تقولي الكلام ده بعد ايه؟ ماللي راح راح

Unknown said...

ليوناردو
معلش اصل ناوى اتجوز ومكملتش الحلقه
مفاجأة ايه دى اللى بعد 15 يوم ؟
قالوا عليها ولا لأ ؟

بر و ماء said...

مع انك السبب فى انك فرجتينى على الحلقه دى الا انى صراحه اتكيفت من رد د عبدالله الاشعل و كمان ا محمد اللى جه فى الاخر و لبسه فى الحيط لكن على العموم تستهالى با لتاكيد علشان اتفرجتى على البرنامج من غير ما تقولى لمامتك

ملحوظه :انتى ملاحظتيش التنويه اللى قبل البرنامج

علامه حمرا كبيره تنويه هذا البرنامج للفاقدين و اعضاء الحزب الوطنى

Sam said...

ممكن لو فيه فيديووز على اليوتيوب حد يحطلنا اللينكس...

عشان نحب نشوف برضه الاخ قال ايه...

Unknown said...

انا مش قادرة افهم، الناس اللي ربنا نجاها من الزلزال عايزة تعرض نفسها للكارثة تاني ليه؟
ربنا نجاكوا.. اسألوا الله العافية

mido said...

غلطة فى البوست

مواطن مصرى عجبه الحوار

=))

البنفسج الحزين said...

أناكنت باتفرج في أمان الله وحسيت ان عماد أديب بينيمني طغطاطيسي
وبيقولي:
نافع هو اللي بيحبك
انتي ملكيش غير نافع ...
نافع هو اللي عارف مصلحتك...
فقلت لأ أقوم أنام بارادتي أحسن ما نافع وحبايبه ينيموني غصب عني النومه الأبديه بالسكته القلبيه...

Leonardo said...

Amr

المفاجأة الرهيبة اللى تا تاتتتااااااا

كانت إن بتوع الجزائر هيروحوا أنجولا عشان يضربونا تانى !!!

تخيل .. بع دا قال على شوية أحداث مهمة السنه اللى جاية زى انتهاء مد قانون الطوارىء وانتخابات الشعب ونص الشورى و.. و.. و
دى بقى هى المفاجأة

Unknown said...

لا والله ؟
هو مسلسل الجزائر هايتعملوا جزء تانى ؟

أتااارى سايبين الجزء الأول End Open